តម្លៃប្រេង​ធ្លាក់ចុះទាបបំផុតក្នុងរយៈពេល ៤ ឆ្នាំ ជុំវិញកង្វល់សេដ្ឋកិច្ច ដោយសារ ពន្ធ ត្រាំ

តម្លៃប្រេងអន្តរជាតិ​ធ្លាក់ចុះជាង ៣ ភាគរយ សម្រាប់ការជួញដូរ​នៅថ្ងៃចន្ទនេះ ដែលជាការបន្តធ្លាក់ចុះ​ធ្ងន់​កាលពីសប្ដាហ៍មុន​ ​ខណៈ​​សង្រ្គាម​ពាណិជ្ជកម្មពិភព​លោក​ ដែល​បង្កឡើងដោយ​គោលនយោបាយពន្ធរបស់​ប្រធានាធិបតីអាមេរិក លោក ដូណាល់ ត្រាំ កំពុង​បង្កើនក្ដីបារម្ភអំពីវិបត្តិសេដ្ឋកិច្ច ដែលអាចធ្វើឱ្យតម្រូវការប្រេងធ្លាក់ចុះ​។ នេះបើតាម​ការចុះផ្សាយរបស់​ទីភ្នាក់ងារសារព័ត៌មាន​រ៉យទ័រ​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក​ Brent បានធ្លាក់ចុះ ២,២៨ ដុល្លារ ឬ ៣,៥ ភាគរយ ដោយ​ជួញដូរ​នៅតម្លៃ ៦៣,៣០ ដុល្លារ/បារ៉ែល នៅព្រឹកថ្ងៃចន្ទនេះ ខណៈ​តម្លៃប្រេង​ឆៅនា​ពេល​អនាគត​របស់អាមេរិក ម៉ាក​ West Texas Intermediate​ (WTI) បានធ្លាក់ចុះ ២,២០ ដុល្លារ ឬ ៣,៦ ភាគរយ ដោយ​ជួញដូរ​នៅត្រឹម ៥៩,៧៩ ដុល្លារ/បារ៉ែល​។​ នេះ​បង្ហាញ​ថា​ តម្លៃប្រេងទាំង២​ បាន​ធ្លាក់ចុះដល់កម្រិតទាប​បំផុតរាប់តាំងពីខែមេសា ឆ្នាំ ២០២១។ ​

តម្លៃប្រេង បានធ្លាក់ចុះ ៧ ភាគរយ កាលពីថ្ងៃសុក្រ នៅពេល​ចិនបានប្រកាសដំឡើងពន្ធសងសឹក​លើទំនិញរបស់សហរដ្ឋអាមេរិក ដែល​ធ្វើឱ្យភាពតានតឹង​នៃសង្រ្គាមពាណិជ្ជកម្មកើនឡើង​។ ពេញ​មួយសប្ដាហ៍មុន តម្លៃប្រេងម៉ាក ​Brent បានធ្លាក់ចុះ ១០,៩ ភាគរយ ខណៈ ​WTI បានធ្លាក់ចុះ ១០,៦ ភាគរយ​ ។

អ្នកជំនាញ​គូសបញ្ជាក់ថា ការធ្លាក់ចុះ​នៃតម្លៃប្រេង​បង្កឡើង​ពីក្ដីបារម្ភដែលថា គោលនយោបាយពន្ធគយ​ថ្មីៗនេះ នឹង​ធ្វើឱ្យសេដ្ឋកិច្ចពិភព​លោក​ចុះខ្សោយ​ ​និង​ផែនការបង្កើនផលិតកម្មប្រេងឡើងវិញ​របស់​អង្គការ​នៃប្រទេស​នាំចេញប្រេង​កាត និងសម្ព័ន្ធមិត្ត (OPEC+)។

មែនទែនទៅ​ ការនាំចូលប្រេង ឧស្ម័ន និងផលិតផលចម្រាញ់ ទទួល​បាន​​ការលើកលែងពីពន្ធ​ថ្មីៗ​របស់លោក ត្រាំ។ ប៉ុន្តែ គោលនយោបាយទាំងមូលអាចបង្កឱ្យមានអតិផរណា កំណើនសេដ្ឋកិច្ចយឺតយ៉ាវ​ និងធ្វើឱ្យជម្លោះពាណិជ្ជកម្មកាន់តែ​តានតឹង​ទៅៗ​ ដោយ​នេះដាក់សម្ពាធ​លើ​តម្លៃប្រេង៕