សន្តិសុខសង្គម Archives - Kampuchea Thmey Daily

អភិបាលខេត្តកំពង់ឆ្នាំង ណែនាំកម្លាំងមានសមត្ថកិច្ចត្រូវពង្រឹងសន្តិសុខសណ្តាប់ធ្នាប់នៅតាមមូលដ្ឋានអោយបានល្អ

Ung Meng — Tue, 28 Apr 2026 06:59:14 +0000

នៅថ្ងៃទី២៨ ខែមេសា ឆ្នាំ២០២៦ លោក ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និងលោក ស៊ីវ រុន ប្រធានក្រុមប្រឹក្សាខេត្ត បានរៀបចំប្រជុំវាយតម្លៃលទ្ធផលការងារដើម្បីបូកសរុប ដែលសម្រេចបានក្នុងរយៈពេលកន្លងមក ព្រមទាំងពិភាក្សា និងដាក់ចេញទិសដៅការងារបន្តសម្រាប់អនាគត។

ក្នុងកិច្ចប្រជុំនេះ អាជ្ញាធរខេត្ត និងអង្គភាពពាក់ព័ន្ធបានរាយការណ៍អំពីស្ថានភាពការងារ ក្នុងវិស័យសំខាន់ៗ ដូចជា សន្តិសុខសាធារណៈ សុខាភិបាល អប់រំ កសិកម្ម និងសេដ្ឋកិច្ចក្នុងមូលដ្ឋាន។ ជាមួយគ្នានេះ ក៏មានការលើកឡើងពីបញ្ហាប្រឈមដែលនៅសេសសល់ និងវិធានការដោះស្រាយ ដើម្បីធានាបាននូវប្រសិទ្ធភាពការងារ និងការអភិវឌ្ឍន៍តំបន់ឲ្យកាន់តែប្រសើរឡើង។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានដាក់ចេញនូវទិសដៅសំខាន់ៗដូចជា បន្តយកចិត្តទុកដាក់ថែរក្សាសន្តិសុខ ស្ថិរភាព សណ្ដាប់ធ្នាប់សាធារណៈ បង្ការ ទប់ស្កាត់បទល្មើសគ្រប់ប្រភេទ ប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា បទល្មើសគ្រឿងញៀន បញ្ហាក្មេងទំនើង បញ្ហាគ្រោះថ្នាក់ចរាចរណ៍ បទល្មើសនេសាទ ត្រៀមលក្ខណៈអន្តរាគមន៍ឆ្លើយតបជួយប្រជាពលរដ្ឋរងគ្រោះដោយគ្រោះមហន្តរាយ និងបញ្ហាសំខាន់ៗមួយចំនួនទៀត។

ជាមួយគ្នាផងដែរលោកអភិបានខេត្តបានណែនាំឲ្យមន្ទីរ និងអង្គភាពពាក់ព័ន្ធបន្តពង្រឹងកិច្ចសហការគ្នា បង្កើនការទទួលខុសត្រូវ និងអនុវត្តការងារឲ្យបានតាមផែនការដែលបានកំណត់។ ពិសេស គឺការផ្តោតលើការផ្តល់សេវាសាធារណៈឲ្យមានគុណភាព ការពារសុវត្ថិភាពសង្គម និងការលើកកម្ពស់ជីវភាពរស់នៅរបស់ប្រជាពលរដ្ឋ៕ អត្ថបទ៖ វ៉ាន់ សេដ្ឋា

The post អភិបាលខេត្តកំពង់ឆ្នាំង ណែនាំកម្លាំងមានសមត្ថកិច្ចត្រូវពង្រឹងសន្តិសុខសណ្តាប់ធ្នាប់នៅតាមមូលដ្ឋានអោយបានល្អ appeared first on Kampuchea Thmey Daily.

ក្មេងទំនើងជាង៦ពាន់នាក់ត្រូវបានបញ្ជូនទៅកាត់ទោសនៅតុលាការពីឆ្នាំ២០២៣ ដល់ឆ្នាំ២០២៥

hun sirivadh — Mon, 02 Mar 2026 04:17:56 +0000

តាមរបាយការណ៍ក្រសួងមហាផ្ទៃចាប់ពីឆ្នាំ២០២៣ ដល់ឆ្នាំ២០២៥ សមត្ថកិច្ចបានបញ្ជូនក្មេងទំនើងចំនួន ៦ ៣៧៥នាក់ទៅកាត់ទោសនៅតុលាការ និងមានក្មេងទំនើងជាង ៤ពាន់៥រយនាក់ផ្សេងទៀតទទួលទណ្ឌកម្មរដ្ឋបាល និងអប់រំ។

តាមការឱ្យដឹងពីអ្នកនាំពាក្យរងក្រសួងមហាផ្ទៃលោក ទូច សុខៈ ពីឆ្នាំ២០២៣ ដល់២០២៥ សមត្ថកិច្ចបានបង្ក្រាបករណីក្មេងទំនើងបង្កបញ្ហាក្នុងសង្គមបានជិត៤ពាន់ករណី(៣ ៩៧៨) និងចាប់ខ្លួនបាន ១២ ១៩៤នាក់។ លោកបានឱ្យដឹងថាករណីបង្ក្រាបក្មេងទំនើងនេះមានវិធានការ២គឺការអប់រំហៅឪពុកម្ដាយមកធានា និងករណីដែលក្មេងប្រព្រឹត្តិបង្កការខូចខាតដល់សង្គមធ្ងន់ធ្ងរត្រូវបញ្ជូនទៅតុលាការ។

បើតាមរបាយការណ៍ដែលលោក ទូច សុខៈ បានឱ្យដឹងឆ្នាំ២០២៤ការបង្ក្រាបនិងបញ្ជូនទៅតុលាការបានច្រើនជាងគេដោយចាប់ខ្លួនក្មេងទំនើងបានជាង៥ពាន់នាក់ និងបញ្ជូនទៅតុលាការជិត៣ពាន់នាក់(២ ៨០២នាក់)។ ដោយឡែកឆ្នាំ២០២៥ ករណីក្មេងទំនើងកើតឡើង ៩៩១ករណី ថយចុះ ៣៨%បើធៀបនឹងឆ្នាំ២០២៤ តែចំនួនក្មេងទំនើងដែរត្រូវបញ្ជូនទៅកាត់ទោសនៅតុលាការមានដល់ ២ ៣៥៥នាក់។

លោកបន្ថែមថាជាវិធានការទៅមុខក្រសួងមហាផ្ទៃនឹងបន្តបង្កើនការផ្សព្វផ្សាយការអប់រំបន្ថែមដោយមានការចូលរួមពីអាជ្ញាធរ និងក្រសួងស្ថាប័នពាក់ព័ន្ធបន្ថែមទៀតដើម្បីតាមដាន អប់រំយុវជន ខណៈបង្កើនកម្លាំងល្បាត បង្ក្រាប និងបង្ការបទល្មើសដោយក្មេងទំនើង។

ករណីក្មេងទំនើងនេះត្រូវបានអ្នកតាមដានឃើញថាកើតឡើងជាច្រើនឆ្នាំមកហើយដោយពុំទាន់អាចដោះស្រាយទាំងស្រុងនោះទេ។ អ្នកស្រាវជ្រាវការអភិវឌ្ឍន៍សង្គមលោកបណ្ឌិត ប៉ា ច័ន្ទរឿន ធ្លាប់លើកឡើងប្រាប់កម្ពុជាថ្មីថា ចំណាត់ការកន្លងមករបស់រដ្ឋាភិបាលលើករណីក្មេងទំនើងនេះគឺជាប្រតិកម្មតបលើបញ្ហាដែលកើតឡើងប៉ុណ្ណោះ មិនមែនជាវិធានការបង្ការទេ ដែលនៅតែធ្វើឱ្យបញ្ហាក្មេងទំនើងនេះនៅតែជាបញ្ហាដដែល។

លោកបានឱ្យជាយោបល់ថា រដ្ឋាភិបាលគួរតែមានកិច្ចពិភាក្សាថ្នាក់ជាតិមួយដែលទាញយកធាតុចូលទាំងអស់ពីគ្រប់ភាគីពាក់ព័ន្ធ រួមទាំងអង្គការសង្គមស៊ីវិល សាលារៀន ឪពុកម្ដាយ សាសនា និងយុវជនផងដែរ ដើម្បីស្វែងរកដំណោះស្រាយ រួមទាំងការធ្វើការស្រាវជ្រាវលំអិតមួយលើករណីនេះដែលជាបង្គោលសម្រាប់ឱ្យរដ្ឋាភិបាលដាក់គោលនយោបាយចំទិសដៅផងដែរ។

រដ្ឋមន្ត្រីក្រសួងមហាផ្ទៃ ឧបនាយករដ្ឋមន្ត្រី ស សុខា កាលពីពេលថ្មីនេះបានបញ្ជាឱ្យស្នងការដ្ឋាននគរបាលរាជធានីខេត្តទាំងអស់ចាត់វិធានការបង្ក្រាប ចាប់ខ្លួនក្មេងទំនើងដែលបង្កផលប៉ះពាល់ដល់សន្តិសុខសណ្ដាប់ធ្នាប់ឱ្យបានយ៉ាងយូរ៤៨ម៉ោង ដោយមានជំនឿថាសមត្ថកិច្ចក្រសួងពិតជាអាចបង្ក្រាបករណីក្មេងទំនើងអស់ដើម្បីរក្សាសន្តិសុខ សណ្ដាប់ធ្នាប់សង្គម៕

អត្ថបទដោយ ហ៊ុន សិរីវឌ្ឍន៍

The post ក្មេងទំនើងជាង៦ពាន់នាក់ត្រូវបានបញ្ជូនទៅកាត់ទោសនៅតុលាការពីឆ្នាំ២០២៣ ដល់ឆ្នាំ២០២៥ appeared first on Kampuchea Thmey Daily.

រដ្ឋបាលខណ្ឌឫស្សីកែវ បន្តចុះពិនិត្យផ្សព្វផ្សាយការគ្រប់គ្រងសន្តិសុខសុវត្ថិភាព តាមទីតាំងរស់នៅប្រមូលផ្ដុំ ដើម្បីធានាសុវត្ថិភាព សណ្ដាប់ធ្នាប់សង្គម

អ៊ិន ពិសី — Wed, 04 Feb 2026 07:02:31 +0000

កាលពីថ្ងៃទី ៣ ខែកុម្ភៈ ឆ្នាំ ២០២៦ ម្សិលមិញ រដ្ឋបាលខណ្ឌឫស្សីកែវ បានបន្តចុះពិនិត្យ និងផ្សព្វផ្សាយអំពីការអនុវត្តអនុក្រឹត្យលេខ ០៣ អនក្រ.បក ចុះថ្ងៃទី ៥ ខែមករា ឆ្នាំ ២០២៦ ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ដើម្បីធានាបាននូវសន្តិសុខ សុវត្ថិភាព និងសណ្ដាប់ធ្នាប់សាធារណៈជូនប្រជាពលរដ្ឋ។

លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានមានប្រសាសន៍ថា សុខសន្តិភាព គឺជាមូលដ្ឋានគ្រឹះដ៏សំខាន់បំផុតសម្រាប់ការអភិវឌ្ឍប្រទេសជាតិ។ ក្នុងបរិបទ នៃការរីកចម្រើនលើគ្រប់វិស័យ ជាពិសេសវិស័យសេដ្ឋកិច្ចជាតិ នាពេលបច្ចុប្បន្ន បានជំរុញឱ្យវិស័យសំណង់ និងការអភិវឌ្ឍលំនៅឋានបែបទំនើប មានការរីកចម្រើនយ៉ាងឆាប់រហ័ស ដូចជា បុរី ខុនដូ អាផាតមិន ផ្ទះសំណាក់ សណ្ឋាគារ និងអគារប្រមូលផ្ដុំមនុស្សផ្សេងៗ ជាច្រើន។

លោកអភិបាលខណ្ឌ បានបន្ថែមថា ទីតាំងលំនៅឋានទាំងនេះ ជាកន្លែងមានប្រជាពលរដ្ឋ និងជនបរទេសចម្រុះជាតិសាសន៍រស់នៅប្រមូលផ្ដុំ ដើម្បីប្រកបមុខរបរ និងបំពេញការងារផ្សេងៗ ដែលទាមទារឱ្យមានការគ្រប់គ្រងសន្តិសុខសុវត្ថិភាពយ៉ាងម៉ឺងម៉ាត់ និងមានប្រសិទ្ធភាពខ្ពស់។ ក្នុងន័យនេះ រាជរដ្ឋាភិបាលកម្ពុជា បានដាក់ចេញអនុក្រឹត្យលេខ ០៣ អនក្រ.បក ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ដែលជាឧបករណ៍គតិយុត្តិដ៏សំខាន់សម្រាប់គាំទ្រ និងពង្រឹងដល់ការងារគ្រប់គ្រងសន្តិសុខសង្គម ជាពិសេសការបង្ការ និងបង្ក្រាបបទល្មើសគ្រប់ប្រភេទ រួមមាន បទល្មើសឆបោកតាមប្រព័ន្ធបច្ចេកវិទ្យា និងបទល្មើសគ្រឿងញៀន ស្របតាមកម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល និងគោលនយោបាយ «ភូមិ-ឃុំ-សង្កាត់ មានសុវត្ថិភាព»។

ជាមួយគ្នានេះដែរ ក្នុងនាមរដ្ឋបាលខណ្ឌឫស្សីកែវ និងគណៈបញ្ជាការឯកភាពរដ្ឋបាលខណ្ឌ លោក ជិន ប៊ុនធឿន បានថ្លែងអំណរគុណយ៉ាងជ្រាលជ្រៅបំផុតចំពោះអ្នកវិនិយោគ ម្ចាស់អគារ និងម្ចាស់ទីតាំងរស់នៅប្រមូលផ្ដុំទាំងអស់ ដែលបានផ្តល់កិច្ចសហការយ៉ាងស្អិតរមួតជាមួយអាជ្ញាធរមូលដ្ឋាន ក្នុងការអនុវត្តវិធានការសន្តិសុខ សុវត្ថិភាព និងសណ្ដាប់ធ្នាប់សាធារណៈ ដើម្បីធានាបាននូវភាពសុខដុមរមនា សុខសុវត្ថិភាព និងភាពទុកចិត្តជូនភ្ញៀវ និងអតិថិជន៕

អត្ថបទ ៖ សំណាង

The post រដ្ឋបាលខណ្ឌឫស្សីកែវ បន្តចុះពិនិត្យផ្សព្វផ្សាយការគ្រប់គ្រងសន្តិសុខសុវត្ថិភាព តាមទីតាំងរស់នៅប្រមូលផ្ដុំ ដើម្បីធានាសុវត្ថិភាព សណ្ដាប់ធ្នាប់សង្គម appeared first on Kampuchea Thmey Daily.

គណៈបញ្ជាការឯកភាពរាជធានីភ្នំពេញ ចុះឆែកឆេរទីតាំងចំនួន៦ ក្រោយបង្ហោះព័ត៌មានមិនពិត

Ung Meng — Wed, 04 Feb 2026 03:27:08 +0000

កម្លាំងគណៈបញ្ជាការឯកភាពរាជធានីភ្នំពេញ ចុះធើ្វការឆែកឆេរត្រួតពិនិត្យ ទីតាំងចំនួន៦កន្លែង ដែលបង្ហោះនៅក្នុងបណ្ដាញសង្គម ថាជាទីតាំងអគារអនឡាញនៅរាជធានីភ្នំពេញ ជាក់ស្ដែងក្រោយកម្លាំងអាជ្ញាធរចុះពិនិត្យជាក់ស្ដែងរកពុំឃើញមានបទល្មើសប្រព័ន្ធបច្ចេកវិទ្យាឆបោកតាមអនឡាញអ្វីនោះទេ។

ទីតាំងចំនួន៦ ដែលកម្លាំងអាជ្ញាធរ ធើ្វការចុះត្រួតពិនិត្យ ឆែរឆេរមាន ៖អគារ the bridge (ខណ្ឌចំការមន) , អគារ Marry Time (ខណ្ឌមានជ័យ) ,អគារPNN (ខណ្ឌជ្រោយចង្វារ) , អគារស្កាយឡាញ ក្បែរផ្សារអូឬស្សី (ខណ្ឌ៧មករា) , អគារមានរូបម្កុដិ (ខណ្ឌដូនពេញ) , អគារស្កាយទ្រី (ខណ្ឌឫស្សីកែវ)។

សូមបញ្ជាក់ថាកន្លងមក គណៈបញ្ជាការឯកភាពរដ្ឋបាលរាជធានីភ្នំពេញ បានដឹកនាំកម្លាំងសមត្ថកិច្ចចម្រុះ ចុះពិនិត្យរដ្ឋបាលទីតាំងខាងលើ ដោយទីតាំងខ្លះ ចុះពិនិត្យរដ្ឋបាលជាចំហរ, ចុះឆែកឆេរមួយទីតាំង ចំនួន០២ទៅ០៣លើករួចមកហើយ ជាលទ្ធផលពុំឃើញបទល្មើសប្រព័ន្ធបច្ចេកវិទ្យាឆបោកតាមអនឡាញនោះទេ និងបានរកឃើញជនបរទេស ដែលស្នាក់នៅ គឺមានលិខិតស្នាមស្របច្បាប់ត្រឹមត្រូវ បច្ចុប្បន្ននេះ ដោយអនុវត្តតាមអនុក្រឹត្យ០៣ អនក្រ.បក របស់រាជរដ្ឋាភិបាលកម្ពុជា ចុះថ្ងៃទី០៥ ខែមករា ឆ្នាំ២០២៦ ស្តីពីការគ្រប់គ្រងសន្តិសុខ សុវត្ថិភាព ទីតាំងរស់នៅប្រមូលផ្តុំ ដើម្បីធានាសន្តិសុខសុវត្ថិភាពសង្គម និងសណ្តាប់ធ្នាប់សាធារណៈ គណៈបញ្ជាការឯកភាពរដ្ឋបាលរាជធានីភ្នំពេញ ប្តេជ្ញាចុះស្រាវជ្រាវ និងត្រួតពិនិត្យបង្ក្រាបរាល់សកម្មភាពប្រព្រឹត្តបទល្មើសតាមប្រព័ន្ធបច្ចេកវិទ្យាឆបោកតាមអនឡាញខុសច្បាប់ នៅក្នុងភូមិសាស្ត្ររាជធានីភ្នំពេញ។

ដើម្បីបង្ក្រាបបើមានជនល្មើសបើកលួចលាក់បទល្មើសឆបោកអនឡាញខុសច្បាប់ កម្លាំងអាជ្ញាធរបានណែនាំដល់ម្ចាស់ទីតាំង ត្រូវសហការជាមួយសមត្ថកិច្ច កុំឲ្យមានការលួចលាក់ឃុបឃិតជាមួយជនល្មើស បើក្នុងករណីសមត្ថកិច្ចរកឃើញម្ចាស់ទីតាំងជាប់ពាក់ព័ន្ធឃុបឃិតឲ្យបើកបទល្មើសតាមប្រព័ន្ធបច្ចេកវិទ្យាឆបោកអនឡាញខុសច្បាប់ សមត្ថកិច្ចនឹងអនុវត្តតាមនីតិវិធី។

ជាមួយគ្នាផងដែរពាក់ព័ន្ធបទល្មើសបច្ចេកវិទ្យាឆបោកអនឡាញខុសច្បាប់នេះ គណៈបញ្ជាការឯកភាពរដ្ឋបាលរាជធានីភ្នំពេញ បានប្តេជ្ញាដាក់ចេញជាវិធានការយ៉ាងម៉ឺងម៉ាត់បំផុត មិនអនុញ្ញាតឲ្យកើតមានជាដាច់ខាត៕

The post គណៈបញ្ជាការឯកភាពរាជធានីភ្នំពេញ ចុះឆែកឆេរទីតាំងចំនួន៦ ក្រោយបង្ហោះព័ត៌មានមិនពិត appeared first on Kampuchea Thmey Daily.

សមត្ថកិច្ចខេត្តព្រះសីហនុ ចាប់បានជនសង្ស័យ៣នាក់ ករណីជំរិតទារប្រាក់ជាង១ម៉ឺនដុល្លារពីជនជាតិប៉ាគីស្ថានម្នាក់

Ngoeul Narath — Mon, 15 Sep 2025 04:37:48 +0000

សមត្ថកិច្ចខេត្តព្រះសីហនុ សហការជាមួយសមត្ថកិច្ចខេត្តកំពត និងរាជធានីភ្នំពេញ ឃាត់ខ្លួនជនសង្ស័យជនជាតិប៉ាគីស្ថានចំនួន៣នាក់ និងបន្តស្រាវជ្រាវឃាត់ខ្លួន២នាក់បន្តទៀត ជាប់ពាក់ព័ន្ធនឹងករណីចាប់មនុស្សជំរិតទារប្រាក់ជាង១ម៉ឺនដុល្លារសហរដ្ឋអាមេរិក តាមពាក្យបណ្ដឹងរបស់ជនរងគ្រោះជាជនជាតិប៉ាគីស្ថានម្នាក់។

ស្នងការដ្ឋាននគរបាលខេត្តព្រះសីហនុ ឱ្យដឹងតាមរយៈទំព័រហ្វេសប៊ុកផ្លូវការថា ជនសង្ស័យចំនួន៥នាក់ បានធ្វើសកម្មភាពចាប់ជនរងគ្រោះ ០១នាក់ ភេទប្រុស ជនជាតិប៉ាគីស្ថាន ចូលក្នុងរថយន្ត ១គ្រឿង ម៉ាក GS-300 ពណ៌ស នៅវេលាម៉ោង០៧ ព្រឹក ថ្ងៃទី១៤ ខែកញ្ញា ឆ្នាំ២០២៥ នៅចំណុច JR Bar ក្រុមទី១៤ ភូមិ៤ សង្កាត់លេខ៤ ក្រុង-ខេត្តព្រះសីហនុ។

តាមសមត្ថកិច្ចនៅក្នុងរថយន្ត ជនសង្ស័យបានវាយគំរាមជនរងគ្រោះយកប្រាក់ចំនួន ១,៤០០ដុល្លារអាមេរិក និងទូរសព្ទ័ ១គ្រឿង ម៉ាក IPhone 16 Pro Max ព្រមទាំងនិយាយគំរាមជនរងគ្រោះថា ២ថ្ងៃក្រោយ ត្រូវយកប្រាក់ឱ្យពួកគេចំនួន ១០,០០០ដុល្លារអាមេរិកទៀត ។ បន្ទាប់ពីកើតហេតុ ១ម៉ោងក្រោយមក នៅវេលាម៉ោងប្រហែល ០៨និង០០នាទី ថ្ងៃខែឆ្នាំដដែល ជនសង្ស័យបានយកជនរងគ្រោះមកទម្លាក់ចោលនៅក្នុងឆាយណាថោន ហើយជនសង្ស័យក៏បានបើករថយន្តគេចខ្លួនបាត់។ បន្ទាប់មក ជនរងគ្រោះ បានមកដាក់ពាក្យបណ្ដឹងនៅអធិការដ្ឋាននគរបាលក្រុងព្រះសីហនុ ។

ភ្លាមៗ សមត្ថកិច្ចបានបើកការស្រាវជ្រាវ រហូតនៅម៉ោងប្រហែល ១១៖ ៥៥នាទីយប់ ថ្ងៃទី១៤ ខែកញ្ញា ដោយបានការសហការពីកម្លាំង នៃស្នងការដ្ឋាននគរបាលខេត្តកំពត សមត្ថកិច្ចបានឃាត់ខ្លួនជនសង្ស័យ ១នាក់ បន្ទាប់មក បានបន្តកិច្ចសហការជាមួយកម្លាំងអធិការដ្ឋាននគរបាលខណ្ឌសែនសុខ នៃស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួនបានបក្ខពួកជនសង្ស័យចំនួន ០២នាក់បន្ថែមទៀត ៕

The post សមត្ថកិច្ចខេត្តព្រះសីហនុ ចាប់បានជនសង្ស័យ៣នាក់ ករណីជំរិតទារប្រាក់ជាង១ម៉ឺនដុល្លារពីជនជាតិប៉ាគីស្ថានម្នាក់ appeared first on Kampuchea Thmey Daily.

រដ្ឋលេខាធិការក្រសួងមហាផ្ទៃ៖ អាជ្ញាធរមានសិទ្ធិគ្រប់គ្រាន់ក្នុងការអនុវត្តវិធានការរដ្ឋបាល ទោះក្នុងបុរី ខុនដូ ឬសណ្ឋាគារក៏ដោយ

Sokhom Khon — Thu, 04 Sep 2025 09:02:26 +0000

លោក ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារទី១ ត្រួតពិនិត្យ និងជំរុញការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” រាជធានីភ្នំពេញ បានមានប្រសាសន៍លើកឡើងថា ក្នុងនាមជាអាជ្ញាធររដ្ឋ មានសិទ្ធិគ្រប់គ្រាន់ ក្នុងការអនុវត្តវិធានការរដ្ឋបាល ទោះក្នុងបុរី ខុនដូ ឬសណ្ឋាគារក៏ដោយ ដើម្បីរក្សាឱ្យបានសន្តិសុខ សុវត្ថិភាព ក្នុងតំបន់ដែលយើងគ្រប់គ្រង។ តែមន្ត្រីអនុវត្ត សូមកុំធ្វើជាត្រីងៀត ឆ្លៀតពង។

ការលើកឡើងរបស់លោក ប៊ុន ហុន បានធ្វើឡើងនាព្រឹកថ្ងៃទី០៤ ខែកញ្ញា ឆ្នាំ២០២៥នេះ ខណៈលោក និងលោក ឃួង ស្រេង អភិបាលរាជធានីភ្នំពេញ អញ្ជើញជាអធិបតីក្នុងកិច្ចប្រជុំបូកសរុបលទ្ធផលការងារត្រួតពិនិត្យ និងជំរុញការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ប្រចាំឆមាសទី១ ឆ្នាំ២០២៥ នៅសាលារាជធានីភ្នំពេញ។

បន្ថែមពីនេះ លោកក៏បានថ្លែងនូវការកោតសរសើរចំពោះ គណៈបញ្ជាការឯកភាពរាជធានីភ្នំពេញ ដែលបានអនុវត្តគោលនយោបាយភូមិ សង្កាត់មានសុវត្ថិភាពកន្លងមកបានល្អ ដោយមិនមានអ្វីគួរឱ្យកត់សំគាល់ឡើយ។ ប៉ុន្តែទោះបីជាយ៉ាងណាក្តី លោកជំរុញឱ្យអាជ្ញាធររាជធានីភ្នំពេញ បន្តពង្រឹងការអនុវត្តវិធានការរដ្ឋបាល ពិសេសនៅតំបន់ស្មុកស្មាញបន្ថែមទៀត។

លោក ឃួង ស្រេង បានមានប្រសាសន៍លើកឡើងដែរថា អាជ្ញាធររាជធានីភ្នំពេញ បានរក្សានូវសន្តិសុខ សុវត្ថិភាពយ៉ាងល្អប្រសើរ ដោយមិនធ្វើឱ្យប្រជាពលរដ្ឋមានការព្រួយបារម្ភឡើយ បើទោះបីប្រទេសជាតិកំពុងមានសង្គ្រាមឈ្លានពានពីទាហានថៃក៏ដោយ។ លោក ឃួង ស្រេង បន្តថា រដ្ឋបាលរាជធានីភ្នំពេញបានអនុវត្តគោលនយោបាយភូមិ សង្កាត់មានសុវត្ថិភាពបានល្អ ដោយបង្ការទប់ស្កាត់ បង្ក្រាបបទល្មើសគ្រប់ប្រភេទ មានទាំងបទល្មើស លួច ឆក់ប្លន់ និងល្បែងតាមអនឡាញជាដើម។

លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក្នុងឱកាសនោះបានលើកឡើងពីការអនុវត្តគោលនយោបាយភូមិ សង្កាត់មានសុវត្ថិភាព នៅរាជធានីភ្នំពេញបានល្អប្រសើរ ធ្វើឱ្យប្រជាពលរដ្ឋ ភ្ញៀវជាតិ អន្តរជាតិ អ្នកវិនិយោគ និងអ្នកទេសចរណ៍ទទួលបានភាពកក់ក្តៅ។ បានការពារព្រះមហាក្សត្រនិងថ្នាក់ដឹកនាំ បាន២០២លើក ប្រកបដោយសុវត្ថិភាព និងបានធ្វើឱ្យបទល្មើសថយចុះ។

លោកឧត្តមសេនីយ៍ឯក ជួន ណារិន្ទ បានបន្តថា ដើម្បីឆ្លើយតបបទល្មើសដែលបានកើតឡើង ស្នងការនគរបាលរាជធានីបានបង្ក្រាបបទល្មើសបាន២២៦ករណី ឃាត់ខ្លួនជនសង្ស័យបាន២៩៩នាក់។ បង្ក្រាបក្មេងទំនើងបាន១០៦ករណី ឃាត់ខ្លួនបានជាង៣០០នាក់ បង្ក្រាបល្បែងស៊ីសងបាន១៣២ករណី ឃាត់ខ្លួនបាន២៣៤នាក់។ ពាក់ព័ន្ធការអនុវត្តគោលនយោបាយភូមិ សង្កាត់មានសុវត្ថិភាពនេះ លោកឧត្តមសេនីយ៍ឯក ជួន ណារិន្ទ បានបញ្ជាក់ថា យើងបានផ្សព្វផ្សាយគោលនយោបាយនេះ បានចំនួន៦២២លើក ដែលមានមនុស្សចូលរួមប្រមាណជាង៣៦៧ពាន់នាក់៕

អត្ថបទ៖ ស្រីរ័ត្ន

The post រដ្ឋលេខាធិការក្រសួងមហាផ្ទៃ៖ អាជ្ញាធរមានសិទ្ធិគ្រប់គ្រាន់ក្នុងការអនុវត្តវិធានការរដ្ឋបាល ទោះក្នុងបុរី ខុនដូ ឬសណ្ឋាគារក៏ដោយ appeared first on Kampuchea Thmey Daily.

បុរសជនជាតិបរទេសម្នាក់ លោតពីលើអគារខុនដូជាន់ទី ៦ បណ្ដាលឲ្យស្លាប់ភ្លាមៗ

Dy Bunnara — Sun, 24 Aug 2025 09:26:53 +0000

បុរសជនជាតិវៀតណាមមិនដឹងមានវិបត្តិអ្វីបានសម្រេចចិត្តធ្វើអត្តឃាតដោយលោតពីលើអគារខុនដូជាន់ទី៦ ធ្លាក់ចុះមកក្រោមបោកជាមួយរថយន្តចតនៅខាងក្រោមស្លាប់ភ្លាមនៅនឹងកន្លែង ។

ហេតុការណ៍នេះបង្កភ្ញាក់ផ្អើលកាលពីវេលាម៉ោង ១០ នឹង ៣០នាទីព្រឹកថ្ងៃទី ២៤ ខែសីហា ឆ្នាំ២០២៥ នៅចំណុចខុនដូមួយកន្លែង តាមបណ្តោយផ្លូវលេខ ២៨៨ ក្នុងសង្កាត់បឹងកេងកងទី០១ ខណ្ឌបឹងកេងកង រាជធានីភ្នំពេញ។

បើតាមប្រភពព័ត៍មានពីប្រជាពលរដ្ឋដែលនៅជិតកន្លែងកើតហេតុបានអោយដឹងថាមុនពេលកើតហេតុ គាត់កំពុងឈប់ម៉ូតូរងចាំម្ហូប ដើម្បីដឹកយកអោយភ្ញៀវ ប៉ុន្តែខណៈកំពុងឈប់ម៉ូតូបានមួយសន្ទុះ ក៏ស្រាប់តែមានឮសម្លេងលាន់ដូចឡានបុកគ្នា ខណៈនោះ គាត់បានរត់ចុះពីលើម៉ូតូទៅមើល ឃើញមានសពជនជាតិបរទេសម្នាក់ បានធ្លាក់ពីលើអគារខុនដូខាងលើ បានមកប៉ះជាមួយថ្ពាល់រថយន្ត បណ្តាលអោយកំពិត ។ ចំណែកឯសព បានបែកក្បាលស្លាប់ យ៉ាងអនោចអធម៍ហូរឈាមពេញចិញ្ចើមផ្លូវភ្លាមៗ អ្នកឃើញហេតុការណ៍បានប្រញាប់រាយការណ៍ជូនសមត្ថកិច្ចមូលដ្ឋាន ចុះមកអន្តរាគមន៍តែម្តង។

យោងតាមការបញ្ជាក់ពីសមត្ថកិច្ចជំនាញបានអោយដឹងថា បន្ទាប់ពីត្រួតពិនិត្យសព និងស្រាវជ្រាវមើលតាមកាម៉េរ៉ាសុវត្ថិភាពរួច សមត្ថកិច្ចបានសន្និដ្ឋានថា ជនរងគ្រោះបានធ្វើអត្តឃាតលោតសម្លាប់ខ្លួនពីជាន់ទី៦ ចុះមកក្រោមស្លាប់ ។

បច្ចុប្បន្ន សពត្រូវបានយកទៅតម្កល់នៅវត្តស្ទឹងមានជ័យ រង់ចាំសាច់ញា្ញតិយកទៅធ្វើបុណ្យតាមប្រពៃណី៕

អត្ថបទ៖ម៉េង

The post បុរសជនជាតិបរទេសម្នាក់ លោតពីលើអគារខុនដូជាន់ទី ៦ បណ្ដាលឲ្យស្លាប់ភ្លាមៗ appeared first on Kampuchea Thmey Daily.

អាវុធហត្ថខេត្តកំពង់ស្ពឺ ផ្តល់Hotline 1292 ដើម្បីឱ្យពលរដ្ឋ រាយការណ៍ព័ត៌មានទៅកម្លាំងជំនាញ ទោះបីទូរសព្ទគ្មានលុយ

កម្ពុជាថ្មី — Thu, 14 Aug 2025 02:57:42 +0000

បញ្ជាការកងរាជអាវុធហត្ថខេត្តកំពង់ស្ពឺ នឹងដាក់ឲ្យប្រើប្រាស់នូវ ប្រព័ន្ធ Hotline 1292 សម្រាប់បញ្ជាការដ្ឋានកងរាជអាវុធហត្ថខេត្តកំពង់ស្ពឺ នាពេលឆាប់ៗខាងមុខនេះ ដើម្បីឲ្យប្រជាពលរដ្ឋមានភាពងាយស្រួល ក្នុងការផ្តល់ព័ត៌មាន មកកាន់កម្លាំងជំនាញ ឲ្យទាន់ពេល។ នេះបើយោងតាមការបញ្ជាក់ពីលោកឧត្តម សេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ កាលពីថ្ងៃទី១៣ ខែសីហា ឆ្នាំ២០២៥ ម្សិលម៉ិញនេះ។

សូមបញ្ជាក់ថា សម្រាប់លេខ Hotline 1292 នេះ គឺទទួលការ ហៅចូលបានគ្រប់ប្រព័ន្ធ ដោយមិនអស់លុយនោះទេ លោកឧត្តមសេនីយ៍ត្រី មេបញ្ជាការតែងតែគិតគូរ និងយកចិត្តទុកដាក់ ជួយសម្រួលការចំណាយ និងការលំបាករបស់ប្រជាពលរដ្ឋ ដើម្បីឲ្យមានភាពងាយស្រួល ក្នុងការផ្តល់ព័ត៌មានមកកាន់កម្លាំងជំនាញឲ្យទាន់ពេលនិងដើម្បីឲ្យកម្លាំងជំនាញ ចុះអន្តរាគមន៍ទាន់ពេលវេលា ជូនដល់ប្រជាពលរដ្ឋ ដែលជាជនរងគ្រោះ។ ដោយមើលឃើញដូច្នេះ លោកឧត្តមសេនីយ៍ត្រី មេបញ្ជាការ ក៏បានសម្រេចដាក់លេខ Hotline 1292 ឲ្យប្រើប្រាស់ក្នុងបញ្ជាការដ្ឋាន កងរាជអាវុធហត្ថខេត្តកំពង់ស្ពឺ ។

លោកឧត្តមសេនីយ៍ត្រី មេបញ្ជាការ បានលើកឡើង ក្នុងកិច្ចប្រជុំ នោះថា ការដាក់ឲ្យប្រើប្រាស់នូវប្រពន្ធ័ 1292 ឬហៅ ថា HotLine នេះ យើងទាំងអស់គ្នាត្រូវមានការទទួលខុសត្រូវឲ្យបានខ្ពស់ ជាកស្តែង នូវពេលយើងប្រើប្រាស់លេខ Hotline 1292 និងមានការរវល់ច្រើន តែទោះជាយ៉ាងណា ក៏ដោយ យើងទាំងអស់គ្នាត្រូវតែលះការហត់នឿយ ហើយធ្វើឲ្យបាននូវការងារនេះ ដើម្បីធានាសន្តិសុខ សុវត្តិភាព និងធានា សណ្តាប់ធ្នាប់ជូនប្រជាពលរដ្ឋ ថ្នាក់ ដឹកនាំ និងអ្នកវិនិយោគ នៅក្នុងមូលដ្ឋានរបស់យើង ។

សូមបញ្ជាក់ថា ពាក់ព័ន្ធនឹង ភូមិ ឃុំ សង្កាត់ មានសុវត្ថិភាព ប្រជាពលរដ្ឋ ក្នុងខេត្តកំពង់ស្ពឺ អាចខលមក លេខអន្តរគមន៍បន្ទាន់ 1292 ( ហើយការហៅចូលគ្រប់ប្រពន្ធ័ មិនអស់ ថវិកាឡើយ)។ ក្នុងកិច្ចប្រជុំខាងលើ មេបញ្ជាការ ក៏បានពិភាក្សាអំពី ការផ្សព្វផ្សាយអំពីលេខ 1292 ជូនទៅដល់ប្រជា ពលរដ្ឋ ដើម្បីឲ្យប្រជាពលរដ្ឋយល់កាន់តែច្បាស់ពីគុណសម្បត្តិ និងការប្រើប្រាស់ ក្នុងការទំនាក់ទំនងមកកាន់ លេខ Hotline 1292 នោះផងដែរ៕

The post អាវុធហត្ថខេត្តកំពង់ស្ពឺ ផ្តល់Hotline 1292 ដើម្បីឱ្យពលរដ្ឋ រាយការណ៍ព័ត៌មានទៅកម្លាំងជំនាញ ទោះបីទូរសព្ទគ្មានលុយ appeared first on Kampuchea Thmey Daily.

សន្តិសុខសង្គម Archives - Kampuchea Thmey Daily

ក្មេង​ទំនើង​ជាង​៦ពាន់នាក់​ត្រូវ​បាន​បញ្ជូន​ទៅ​កាត់​ទោស​នៅ​​តុលាការ​ពី​ឆ្នាំ​២០២៣ ដល់​ឆ្នាំ​២០២៥

គណៈបញ្ជាការឯកភាពរាជធានីភ្នំពេញ ចុះឆែកឆេរទីតាំងចំនួន៦ ក្រោយ​បង្ហោះព័ត៌មានមិនពិត

បុរសជនជាតិបរទេស​ម្នាក់ លោតពីលើអគារខុនដូជាន់​ទី ៦ បណ្ដាលឲ្យស្លាប់ភ្លាមៗ

អាវុធហត្ថខេត្តកំពង់ស្ពឺ ផ្តល់Hotline 1292 ដើម្បីឱ្យពលរដ្ឋ រាយការណ៍ព័ត៌មានទៅកម្លាំងជំនាញ ទោះបីទូរសព្ទគ្មានលុយ

ក្មេងទំនើងជាង៦ពាន់នាក់ត្រូវបានបញ្ជូនទៅកាត់ទោសនៅតុលាការពីឆ្នាំ២០២៣ ដល់ឆ្នាំ២០២៥

គណៈបញ្ជាការឯកភាពរាជធានីភ្នំពេញ ចុះឆែកឆេរទីតាំងចំនួន៦ ក្រោយបង្ហោះព័ត៌មានមិនពិត

បុរសជនជាតិបរទេសម្នាក់ លោតពីលើអគារខុនដូជាន់ទី ៦ បណ្ដាលឲ្យស្លាប់ភ្លាមៗ