ព័ត៌មានជាតិ

រដ្ឋបាលខណ្ឌឫស្សីកែវ បន្តចុះពិនិត្យផ្សព្វផ្សាយការគ្រប់គ្រងសន្តិសុខសុវត្ថិភាព តាមទីតាំងរស់នៅប្រមូលផ្ដុំ ដើម្បីធានាសុវត្ថិភាព សណ្ដាប់ធ្នាប់សង្គម

បានផុស

៥ ខែ មុន

នៅ

ថ្ងៃពុធ ៤ កុម្ភៈ ២០២៦

ដោយ

កាលពីថ្ងៃទី ៣ ខែកុម្ភៈ ឆ្នាំ ២០២៦ ម្សិលមិញ រដ្ឋបាលខណ្ឌឫស្សីកែវ បានបន្តចុះពិនិត្យ និងផ្សព្វផ្សាយអំពីការអនុវត្តអនុក្រឹត្យលេខ ០៣ អនក្រ.បក ចុះថ្ងៃទី ៥ ខែមករា ឆ្នាំ ២០២៦ ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ដើម្បីធានាបាននូវសន្តិសុខ សុវត្ថិភាព និងសណ្ដាប់ធ្នាប់សាធារណៈជូនប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជិន ប៊ុនធឿន អភិបាលខណ្ឌឫស្សីកែវ និងជាប្រធានគណៈបញ្ជាការឯកភាពរដ្ឋបាលខណ្ឌ បានមានប្រសាសន៍ថា សុខសន្តិភាព គឺជាមូលដ្ឋានគ្រឹះដ៏សំខាន់បំផុតសម្រាប់ការអភិវឌ្ឍប្រទេសជាតិ។ ក្នុងបរិបទ នៃការរីកចម្រើនលើគ្រប់វិស័យ ជាពិសេសវិស័យសេដ្ឋកិច្ចជាតិ នាពេលបច្ចុប្បន្ន បានជំរុញឱ្យវិស័យសំណង់ និងការអភិវឌ្ឍលំនៅឋានបែបទំនើប មានការរីកចម្រើនយ៉ាងឆាប់រហ័ស ដូចជា បុរី ខុនដូ អាផាតមិន ផ្ទះសំណាក់ សណ្ឋាគារ និងអគារប្រមូលផ្ដុំមនុស្សផ្សេងៗ ជាច្រើន។

លោកអភិបាលខណ្ឌ បានបន្ថែមថា ទីតាំងលំនៅឋានទាំងនេះ ជាកន្លែងមានប្រជាពលរដ្ឋ និងជនបរទេសចម្រុះជាតិសាសន៍រស់នៅប្រមូលផ្ដុំ ដើម្បីប្រកបមុខរបរ និងបំពេញការងារផ្សេងៗ ដែលទាមទារឱ្យមានការគ្រប់គ្រងសន្តិសុខសុវត្ថិភាពយ៉ាងម៉ឺងម៉ាត់ និងមានប្រសិទ្ធភាពខ្ពស់។ ក្នុងន័យនេះ រាជរដ្ឋាភិបាលកម្ពុជា បានដាក់ចេញអនុក្រឹត្យលេខ ០៣ អនក្រ.បក ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ ដែលជាឧបករណ៍គតិយុត្តិដ៏សំខាន់សម្រាប់គាំទ្រ និងពង្រឹងដល់ការងារគ្រប់គ្រងសន្តិសុខសង្គម ជាពិសេសការបង្ការ និងបង្ក្រាបបទល្មើសគ្រប់ប្រភេទ រួមមាន បទល្មើសឆបោកតាមប្រព័ន្ធបច្ចេកវិទ្យា និងបទល្មើសគ្រឿងញៀន ស្របតាមកម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល និងគោលនយោបាយ «ភូមិ-ឃុំ-សង្កាត់ មានសុវត្ថិភាព»។

ជាមួយគ្នានេះដែរ ក្នុងនាមរដ្ឋបាលខណ្ឌឫស្សីកែវ និងគណៈបញ្ជាការឯកភាពរដ្ឋបាលខណ្ឌ លោក ជិន ប៊ុនធឿន បានថ្លែងអំណរគុណយ៉ាងជ្រាលជ្រៅបំផុតចំពោះអ្នកវិនិយោគ ម្ចាស់អគារ និងម្ចាស់ទីតាំងរស់នៅប្រមូលផ្ដុំទាំងអស់ ដែលបានផ្តល់កិច្ចសហការយ៉ាងស្អិតរមួតជាមួយអាជ្ញាធរមូលដ្ឋាន ក្នុងការអនុវត្តវិធានការសន្តិសុខ សុវត្ថិភាព និងសណ្ដាប់ធ្នាប់សាធារណៈ ដើម្បីធានាបាននូវភាពសុខដុមរមនា សុខសុវត្ថិភាព និងភាពទុកចិត្តជូនភ្ញៀវ និងអតិថិជន៕

អត្ថបទ ៖ សំណាង