សមិទ្ធផលខេត្តកំពង់ចាម Archives - Kampuchea Thmey Daily

តាមស្ថានីយជញ្ចីងថ្លឹងរថយន្តទូទាំងប្រទេស នឹងបំពាក់ប្រព័ន្ធបច្ចេកវិទ្យា AI គ្រប់គ្រងការដឹកជញ្ជូនលើសទម្ងន់

Dy Bunnara — Wed, 08 Jul 2026 02:35:47 +0000

ដើម្បីថែរក្សានិងការពារហេដ្ឋារចនាសម្ព័ន្ធផ្លូវថ្នល់ទូទាំងប្រទេស ក្រសួងសាធារណការ និងដឹកជញ្ជូន បានកំពុងជំរុញការប្រើប្រាស់បច្ចេកវិទ្យាទំនើប ដើម្បីពង្រឹងគ្រប់គ្រងការដឹកជញ្ជូនលើសទម្ងន់។

ថ្លែងនៅក្នុងពិធីសម្ពោធដាក់ឲ្យប្រើប្រាស់កំណាត់ផ្លូវជាតិលេខ ៧ ពីប្រជុំជនស្គន់ទៅក្រុងកំពង់ចាម លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូនបានឲ្យដឹងថា ក្នុងគោលដៅទប់ស្កាត់ការដឹកជញ្ជូនលើសទម្ងន់ដែលនាំឲ្យខូចខាតផ្លូវថ្នល់ ក្រសួងសាធារណការ និងដឹកជញ្ជូន កំពុងរៀបចំបង្កើតប្រព័ន្ធគ្រប់គ្រងការដឹកជញ្ជូនលើសទម្ងន់ឆ្លាតវៃ និងស្វ័យប្រវត្តិកម្ម តាមរយៈការបំពាក់ប្រព័ន្ធអ៊ីនធឺណិត កាមេរ៉ា CCTV និងកាមេរ៉ា AI ដើម្បីថែរក្សា និងការពារហេដ្ឋារចនាសម្ព័ន្ធផ្លូវថ្នល់ទូទាំងប្រទេស។

បន្ថែមពីនេះ លោករដ្ឋមន្រ្តីបានបញ្ជាក់ថា ក្រសួងក៏នឹងលើកកម្រិតប្រព័ន្ធជញ្ជីងបច្ចុប្បន្នឱ្យទៅជាប្រព័ន្ធជញ្ជីងស្វ័យប្រវត្តដែលថ្លឹងរថយន្តក្នុងល្បឿនយឺត ដើម្បីពង្រឹងការត្រួតពិនិត្យឲ្យកាន់តែមានប្រសិទ្ធភាពថែមទៀត។

នៅក្នុងឱកាសដឹកនាំមន្រ្តីបច្ចេកទេសចុះពិនិត្យសកម្មភាពត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅស្ថានីយថ្លឹងរថយន្តព្រៃព្នៅ ស្ថិតនៅទីតាំងចំណុចផ្លូវលេខ ៣៨៤ ភូមិភ្លយ សង្កាត់តាកោ ក្រុងព្រៃវែង ខេត្តព្រៃវែងកាលពីពេលថ្មីៗនេះ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសដាក់ចេញនូវវិធានការជាបន្ទាន់ ក្រោយរកឃើញជាក់ស្តែងនូវរថយន្តដឹកទំនិញលើសទម្ងន់កម្រិតកំណត់រហូតដល់ទៅ ៨៣ តោន។

ជាមួយការប្រកាសដាក់ចេញចំណាត់ការឆ្លើយតបភ្លាមៗ លោករដ្ឋមន្រ្តីបានបញ្ជាឲ្យរៀបចំដំឡើងប្រព័ន្ធកាមេរ៉ាសុវត្ថិភាព CCTV នៅគ្រប់ស្ថានីយជញ្ជីងអចល័តទាំងអស់ទាំង ៤៣ ទូទាំងប្រទេស ដែលប្រព័ន្ធនេះនឹងតភ្ជាប់មកប្រព័ន្ធការិយាល័យកណ្តាលរបស់ក្រសួងសាធារណការ និងដឹកជញ្ជូន និងតភ្ជាប់ដោយផ្ទាល់មកកាន់ទូរសព្ទដៃរបស់ថ្នាក់ដឹកនាំ ដើម្បីងាយស្រួលក្នុងការត្រួតពិនិត្យបន្ថែម។

លោកបានព្រមានពីការអនុវត្តអភិក្រមវះកាត់លើមន្ត្រីពាក់ព័ន្ធ ប្រសិនបើរកឃើញមានមន្ត្រីណាម្នាក់ជាប់ពាក់ព័ន្ធ ឬចូលរួមសកម្មភាពអនុញ្ញាតឱ្យមានការដឹកជញ្ជូនលើសទម្ងន់ ដោយយកអភិក្រមវះកាត់មកអនុវត្តតែម្តងដោយគ្មានការលើកលែងឡើយ។

ពាក់ព័ន្ធគម្រោងគម្រោងស្តារ និងលើកកម្រិតគុណភាពផ្លូវជាតិលេខ ៧ ពីប្រជុំជនស្គន់ដល់ក្រុងកំពង់ចាម រដ្ឋមន្ត្រីក្រសួងសាធារណការនិងដឹកជញ្ជូនបានបញ្ជាក់ថា កាលពីមុនកំណាត់ផ្លូវជាតិលេខ ៧ ពីប្រជុំជនស្គន់ដល់ក្រុងកំពង់ចាម ធ្លាប់ត្រូវបានស្តារ និងស្ថាបនាឡើងវិញម្តងរួចមកហើយកាលពីឆ្នាំ ១៩៩៩ ជាប្រភេទបេតុងកៅស៊ូ ដែលមានទទឹង ៧ ម៉ែត្រ និង ៩ ម៉ែត្រ។

កាលនោះ កំណាត់ផ្លូវនេះរួមជាមួយស្ពានមិត្តភាពកម្ពុជា-ជប៉ុន (ស្ពានគីហ្សូណា) ត្រូវបានសាងសង់ឡើងក្រោមជំនួយឥតសំណងរបស់រដ្ឋាភិបាលជប៉ុន។

លោករដ្ឋមន្រ្តីបានលើកឡើងពីមូលហេតុ ក្នុងជំរុញពង្រីកនិងលើកកម្ពស់គុណភាពផ្លូវនេះឡើងវិញឱ្យបានធំទូលាយ និងល្អប្រសើរជាងមុន ដោយផ្អែកលើការសិក្សាអំពីកំណើនដឹកជញ្ជូន ទំហំចរាចរណ៍ដែលកើនឡើងយ៉ាងខ្លាំង ក៏ដូចជាបញ្ហាកកស្ទះ និងគ្រោះថ្នាក់ចរាចរណ៍ដែលកើតឡើងជាញឹកញាប់។

គម្រោងសាងសង់កំណាត់ផ្លូវជាតិលេខ ៧ ពីប្រជុំជនស្គន់ទៅក្រុងកំពង់ចាម ត្រូវបានប្រកាសបើកការដ្ឋានសាងសង់ជាផ្លូវការកាលពីថ្ងៃទី ៩ ខែមករា ឆ្នាំ ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។

ផ្លូវនេះមានប្រវែងសរុប ៤៥,៤៨៩ គីឡូម៉ែត្រ ស្ថាបនាជាប្រភេទផ្លូវក្រាលបេតុងកៅស៊ូ (AC) កម្រាស់ ៩ សង់ទីម៉ែត្រ បែងចែកចរាចរណ៍ មាន ៤ គន្លង (២ គន្លងទៅ និង ២ គន្លងមក) ដោយគន្លងនីមួយៗមានប្រវែង ៣,៧៥ ម៉ែត្រ និងមានសួនពុះចែកទ្រូងផ្លូវប្រវែង ១,៥ ម៉ែត្រ។

នៅលើកំណាត់ផ្លូវនេះក៏មានការសាងសង់ស្ពានសរុប ៨ កន្លែង រួមបញ្ចូលទាំងការសាងសង់ស្ពានថ្មីចំនួន ១ កន្លែង ប្រវែង ៤០ ម៉ែត្រ និងទទឹង ២៤ ម៉ែត្រ និងស្ពានថ្មីចំនួន ៦ កន្លែងផ្សេងទៀតមានប្រវែងសរុប ១០៦ ម៉ែត្រ។

នៅលើគម្រោងផ្លូវនេះ ក៏មានសាងសង់ស្ថានីយថ្លឹងរថយន្តដឹកជញ្ជូនលើសទម្ងន់កំណត់ចំនួន ២ កន្លែង។ ថែមទាំងបំពាក់ភ្លើងសញ្ញាចរាចរណ៍ចំនួន ៤ កន្លែង និងបង្គោលបញ្ចេញសំឡេងសម្រាប់ជនពិការឆ្លងកាត់ចំនួន ៨ បង្គោល។

ការស្ថាបនាផ្លូវនេះបានប្រើប្រាស់រយៈពេលសាងសង់ចំនួន ២៧ ខែ លឿនជាងផែនការគ្រោងទុកចំនួន ១៥ ខែ ដែលចំណាយសរុបប្រមាណជាង ១១៧ លានដុល្លារអាមេរិកក្រោមឥណទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ ការបោសសម្អាតមីន យុទ្ធភណ្ឌមិនទាន់ផ្ទុះ និងពន្ធអាករផ្សេងៗ។

ផ្លូវជាតិលេខ ៧ នេះ ជាសរសៃឈាមសេដ្ឋកិច្ចដ៏សំខាន់ដែលតភ្ជាប់ជាមួយបណ្តាញផ្លូវជាច្រើនឆ្ពោះទៅកាន់រាជធានី និងខេត្ត។ ចំណុចចាប់ផ្តើមផ្លូវនេះតភ្ជាប់ជាមួយផ្លូវជាតិលេខ ៦ ពីរង្វង់មូលស្គន់ ឆ្ពោះទៅរាជធានីភ្នំពេញ ខេត្តកំពង់ធំ និងខេត្តសៀមរាប និងតភ្ជាប់ត្រង់ចំណុចបំបែកស្រុកព្រៃឈរជាមួយផ្លូវជាតិលេខ ៦០ ភ្ជាប់ទៅកាន់ផ្លូវជាតិលេខ ៦ និងផ្លូវជាតិលេខ ៧០ ឆ្ពោះទៅកាន់ស្រុកកងមាស។

លើសពីនេះ វាតភ្ជាប់ជាមួយផ្លូវជាតិលេខ ៧១ ត្រង់ចំណុចបំបែកត្រើងទៅកាន់ស្រុកចម្ការលើ។ វាក៏តភ្ជាប់ជាមួយផ្លូវខេត្តលេខ ២២២ ឆ្ពោះទៅស្រុកស្ទឹងត្រង់ និងផ្លូវខេត្តលេខ ២២៣ ឆ្ពោះទៅស្រុកកងមាស និងខេត្តភូមិភាគឥសាន។

ការតភ្ជាប់ក្នុងក្របខណ្ឌអាស៊ាន ផ្លូវនេះជាផ្នែកមួយនៃផ្លូវហាយវេអាស៊ានលេខ ១១ (ASEAN Highway 11) ដែលតភ្ជាប់ជាមួយបណ្តាញផ្លូវសំខាន់ៗឆ្ពោះទៅកាន់ព្រំដែនកម្ពុជា និងបណ្តាញផ្លូវខេត្តនៃបណ្តាប្រទេសក្នុងមហាអនុតំបន់មេគង្គ។

ផ្លូវនេះដើរតួនាទីយ៉ាងសំខាន់ក្នុងការសម្រួលដល់ការធ្វើដំណើរ និងការដឹកជញ្ជូនកសិផល កសិ-ឧស្សាហកម្មនានា ដូចជា កៅស៊ូ ស្រូវ ដំឡូងមី ស្វាយចន្ទី ពោត ចេក អំពៅ ថ្នាំជក់ ធុរេន បន្លែ ផ្លែឈើ និងត្រីសាច់។ វាក៏ជួយលើកកម្ពស់វិស័យទេសចរណ៍ក្នុងខេត្តកំពង់ចាមដែលមានប្រាសាទបុរាណ និងរមណីយដ្ឋានធម្មជាតិ និងវប្បធម៌ប្រវត្តិសាស្ត្រផងដែរ។

ផលចំណេញផ្នែកសេដ្ឋកិច្ច បើតាមការសិក្សាវាយតម្លៃបានបញ្ជាក់ថា ផ្លូវនេះនឹងផ្ដល់អត្រាផលចំណេញផ្នែកសេដ្ឋកិច្ចរហូតដល់ ១៥,២៧% ដែលបង្ហាញពីការរួមចំណែកជំរុញកំណើនសេដ្ឋកិច្ចជាតិទៅថ្ងៃអនាគត៕

The post តាមស្ថានីយជញ្ចីងថ្លឹងរថយន្តទូទាំងប្រទេស នឹងបំពាក់ប្រព័ន្ធបច្ចេកវិទ្យា AI គ្រប់គ្រងការដឹកជញ្ជូនលើសទម្ងន់ appeared first on Kampuchea Thmey Daily.

ផ្លូវជាតិលេខ ៧ ពីស្គន់ទៅក្រុងកំពង់ចាម នឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃ ០៧ ខែកក្កដា ខាងមុខនេះ

Dy Bunnara — Wed, 17 Jun 2026 03:04:35 +0000

បើតាមមន្រ្តីអ្នកនាំពាក្យក្រសួងសាធារណការនិងដឹកជញ្ជូនបានឲ្យដឹងថា កំណាត់ផ្លូវជាតិលេខ៧ ពីប្រជុំជនស្គន់ទៅក្រុងកំពង់ចាម គ្រោងសម្ពោធដាក់ឲ្យប្រើប្រាស់ជាផ្លូវការនៅថ្ងៃទី ០៧ ខែកក្កដា ឆ្នាំ ២០២៦ ដែលគ្រោងមានអ្នកចូលរួមប្រមាណ ៧ ពាន់នាក់។ នេះបើតាមលោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូន។

កាលពីថ្ងៃទី១៥ ខែមិថុនា ឆ្នាំ២០២៦ ក្រុមការងារបច្ចេកទេសក្រសួងសាធារណការ និងដឹកជញ្ជូន ដឹកនាំដោយ ដឹកនាំដោយលោក លឹម ស៊ីដេនីន រដ្ឋលេខាធិការ និងជានាយកគម្រោង បានអញ្ជើញចុះត្រួតពិនិត្យលក្ខណៈបច្ចេកទេសលម្អិត និងធ្វើពិធីប្រគល់-ទទួលគម្រោងសាងសង់ និងពង្រីកផ្លូវជាតិលេខ៧ (ស្គន់-កំពង់ចាម) បន្ទាប់ពីគម្រោងនេះសម្រេចការអនុវត្តបានពេញលេញ ១០០% តាមផែនការកំណត់។

គម្រោងពង្រីក និងលើកកម្រិតផ្លូវជាតិលេខ ៧ មានប្រវែងសរុប ៤៥,៥០ គីឡូម៉ែត្រ ចាប់ពីទីប្រជុំជនស្គន់ ស្រុកជើងព្រៃ រហូតដល់ក្រុងកំពង់ចាម ខេត្តកំពង់ចាម ដែលជាផ្នែកមួយនៃបណ្តាញផ្លូវអាស៊ាន AH11។

កំណាត់ផ្លូវជាតិលេខ ៧ បានបើកការដ្ឋានសាងសង់កាលពីថ្ងៃទី០៩ ខែមករា ឆ្នាំ២០២៣ ដោយធ្វើការពង្រីកពីផ្លូវ ២ គន្លង ទៅជា ៤ គន្លង ដើម្បីឆ្លើយតបទៅនឹងកំណើនតម្រូវការចរាចរណ៍ និងការដឹកជញ្ជូនកាន់តែច្រើន។

ផ្លូវជាតិលេខ ៧ គឺជាខ្សែផ្លូវសេដ្ឋកិច្ចដ៏សំខាន់មួយ ដែលដើរតួនាទីជាសរសៃឈាមសេដ្ឋកិច្ចក្នុងការតភ្ជាប់តំបន់កណ្តាលទៅភាគឦសាននៃប្រទេស ជួយសម្រួលដល់ការធ្វើដំណើរ ការដឹកជញ្ជូនទំនិញ កសិផល និងផលិតផលឧស្សាហកម្ម ព្រមទាំងរួមចំណែកលើកកម្ពស់សកម្មភាពសេដ្ឋកិច្ច សង្គម និងការវិនិយោគនៅតាមបណ្តោយខ្សែផ្លូវ។

កំណាត់ផ្លូវជាតិលេខ៧ (ស្គន់-កំពង់ចាម) គ្រោងនឹងប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនៅថ្ងៃទី០៧ ខែកក្កដា ឆ្នាំ២០២៦ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជាសមិទ្ធផលថ្មីមួយបន្ថែមទៀតក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូនរបស់កម្ពុជា៕

The post ផ្លូវជាតិលេខ ៧ ពីស្គន់ទៅក្រុងកំពង់ចាម នឹងសម្ពោធដាក់ឲ្យប្រើប្រាស់ជាផ្លូវការនៅថ្ងៃ ០៧ ខែកក្កដា ខាងមុខនេះ appeared first on Kampuchea Thmey Daily.

កំពង់ចាមជាខេត្តទី១ បញ្ចប់ការកំណត់ផែនទីព្រំប្រទល់រដ្ឋបាលឃុំ សង្កាត់ ត្រឹមត្រូវ ច្បាស់លាស់ និងជាក់លាក់

Dy Bunnara — Tue, 02 Jun 2026 02:40:55 +0000

«ថ្ងៃនេះគឺជារបត់ថ្មីមួយទៀតសម្រាប់កម្ពុជា ដែលសម្រេចបាននូវការកំណត់ព្រំប្រទល់រដ្ឋបាល ដោយខេត្តកំពង់ចាមគឺជាខេត្តទី ១ ដែលមានផែនទីព្រំប្រទល់រដ្ឋបាលឃុំ សង្កាត់ ត្រឹមត្រូវ ច្បាស់លាស់ និងជាក់លាក់»។ នេះជាការថ្លែងរបស់លោក សាយ សំអាល់ ឧបនាយករដ្ឋមន្រ្តី និងជារដ្ឋមន្រ្តីក្រសួង រៀបចំដែនដី នគរូបនីយកម្ម និងសំណង់ ក្នុងឱកាសចូលរួមប្រកាសដាក់ឲ្យប្រើប្រាស់ផែនទីរដ្ឋបាល និងផែនទីប្រើប្រាស់ដីព្រំប្រទល់រដ្ឋបាលឃុំ សង្កាត់ ក្នុងខេត្តកំពង់ចាម។

ថ្លែងក្នុងឱកាសប្រកាសដាក់ឲ្យប្រើប្រាស់ផែនទីព្រំប្រទល់រដ្ឋបាលឃុំ សង្កាត់ ក្នុងខេត្តកំពង់ចាម ក៏មានវត្តមានចូលរួមពីលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោក សាយ សំអាល់ បានបញ្ជាក់ថា ផ្តើមចេញពីការកសាងផែនទីព្រំប្រទល់រដ្ឋបាលនិងផែនទីនៃការប្រើប្រាស់ដីនេះ រដ្ឋបាលខេត្តនិងឃុំ សង្កាត់ អាចដាក់ចេញនូវផែនការអភិវឌ្ឍន៍សេដ្ឋកិច្ចត្រូវនិងជាក់លាក់ កំណត់តំបន់អភិរក្ស តំបន់កសិកម្ម តំបន់ឧស្សាកម្ម តំបន់សេដ្ឋកិច្ចពិសេស តំបន់ពាណិជ្ជកម្ម ពិសេសកំណត់នូវសក្តានុពលរបស់ខេត្ត ដើម្បីរៀបចំរបៀងសេដ្ឋកិច្ចតភ្ជាប់ពីភូមិភាគឦសានទៅតំបន់ឆ្នេរ។

លោកសាយ សំអាល់ បានថ្លែងដូច្នេះថា «ផ្តើមចេញពីការកសាងផែនទីព្រំប្រទល់រដ្ឋបាលនាថ្ងៃនេះ យើងរួមគ្នាងាកមកកសាងជីវិតនិងសេដ្ឋកិច្ចយើងឱ្យរឹងមាំ»។

លោកឧបនាយករដ្ឋមន្រ្តីបានលើកពីផែនការទៅថ្ងៃមុខទៀត ក្រសួងរៀបចំដែនដី នគរូបនីយកម្ម និងសំណង់ នឹងរៀបចំឈ្មោះតំបន់ភូមិសាស្រ្តជាអក្សរខ្មែរ អក្សរឡាតាំង និងបាលីសំស្រ្កឹត ដើម្បីចុះបញ្ជីជាមួយGoogle map រៀបចំលេខកូដតំបន់ លេខកូដភូមិសាស្ត្រ និងអាសយដ្ឋានឱ្យបានច្បាស់លាស់។

បើតាមលោក សាយ សំអាល់ ក្រសួងរៀបចំដែនដី នគរូបនីយកម្ម និងសំណង់ រួមជាមួយក្រសួងមហាផ្ទៃនិងបណ្តារដ្ឋបាលខេត្ត នឹងបន្តអនុវត្តលើទិសដៅរួមមួយផ្អែកលើគោលនយោបាយអាទិភាពគន្លឹះនៃយុទ្ធសាស្ត្របញ្ចកោណរបស់រាជរដ្ឋាភិបាល គឺមនុស្ស ផ្លូវ ទឹក ភ្លើង និងបច្ចេកវិទ្យា ដោយនឹងធ្វើការកសាងភូមិឋានក្សេមក្សាន្ត ទ្រនំសុភមង្គល និងបុរីជនបទ ដោយរៀបចំក្រុង និងប្រជុំជន ឱ្យមានលំហសាធារណៈ រៀបចំសំណង់មិនរៀបរយ ភូមិ ឃុំ សង្កាត់ មានសុវត្ថិភាព ធ្វើឱ្យជនបទជាជនបទទំនើប៕

The post កំពង់ចាមជាខេត្តទី១ បញ្ចប់ការកំណត់ផែនទីព្រំប្រទល់រដ្ឋបាលឃុំ សង្កាត់ ត្រឹមត្រូវ ច្បាស់លាស់ និងជាក់លាក់ appeared first on Kampuchea Thmey Daily.

សម្ពោធដាក់ឲ្យដំណើរការប្រព័ន្ធផ្គត់ផ្គង់ទឹកស្អាតខេត្តកំពង់ចាម

អ៊ិន ពិសី — Wed, 20 May 2026 07:14:46 +0000

ប្រព័ន្ធផ្គត់ផ្គង់ទឹកស្អាតខេត្តកំពង់ចាម ដែលជាគម្រោងហេដ្ឋារចនាសម្ព័ន្ធដ៏សំខាន់មួយ ក្នុងការលើកកម្ពស់សុខភាពសាធារណៈ គាំទ្រសកម្មភាពសេដ្ឋកិច្ច និង កែលម្អជីវភាពរស់នៅសម្រាប់ពលរដ្ឋក្នុងខេត្តកំពង់ចាម ពេលនេះត្រូវបានសម្ពោធដាក់ឲ្យដំណើរការជាផ្លូវការហើយ។

ដើម្បីពង្រីកការផ្គត់ផ្គង់ទឹកស្អាតបន្ថែមទៀតនៅក្នុងក្រុងកំពង់ចាម និង តំបន់ជុំវិញ បានទទួលសេវាទឹកស្អាតក្នុងការលើកកម្ពស់សុខភាពសាធារណៈគាំទ្រសកម្មភាពសេដ្ឋកិច្ច និង កែលម្អជីវភាពរស់នៅសម្រាប់ពលរដ្ឋក្នុងខេត្តកំពង់ចាម នៅថ្ងៃទី ២០ ខែឧសភា ឆ្នាំ ២០២៦ នេះ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ តំណាងដ៍ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញសម្ពោធដាក់ឲ្យដំណើរការប្រព័ន្ធផ្គត់ផ្គង់ទឹកស្អាតថ្មីក្នុងក្រុងកំពង់ចាម ដោយមានការចូលរួមពី នាយិកាធនាគារអភិវឌ្ឍន៍អាស៊ី (ADB) ប្រចាំប្រទេសកម្ពុជា និង តំណាងទីភ្នាក់ងារបារាំងសម្រាប់ការអភិវឌ្ឍ (AFD) រួមនឹងអាជ្ញាធរខេត្តកំពង់ចាម។

ឆ្លៀតក្នុងឱកាសនេះដែរ លោក ហែម វណ្ណឌី លើកឡើងថា “ការទទួលបានទឹកស្អាតប្រកបដោយសុវត្ថិភាព គឺជាមូលដ្ឋានគ្រឹះដ៏សំខាន់សម្រាប់សុខភាពសាធារណៈ ផលិតភាពសេដ្ឋកិច្ច និង ជីវភាពរស់នៅរបស់ប្រជាពលរដ្ឋ។ ខណៈដែលនគរូបនីយកម្ម និង ឧស្សាហូបនីយកម្ម កំពុងរីកចម្រើនខ្លាំង ហេដ្ឋារចនាសម្ព័ន្ធទឹកស្អាតដែលរឹងមាំ មានសារសំខាន់កាន់តែខ្លាំង សម្រាប់ការកសាងទីក្រុងដែលមានភាពធន់ ភាពប្រកួតប្រជែង និង ងាយស្រួលរស់នៅសម្រាប់កម្ពុជា”។

គូសបញ្ជាក់ថា គម្រោងដែលមានតម្លៃប្រមាណ ១២,៩៨ លានដុល្លារអាមេរិកនេះ បានបង្កើនសេវាផ្គត់ផ្គង់ទឹកស្អាតទ្វេដងដល់ប្រជាពលរដ្ឋក្នុងតំបន់សេវា ពី ៤៤.៩៥៥ នាក់ ដល់ ៨៩.០៣០ នាក់ និង បង្កើនចំនួនតំណចូលតាមខ្នងផ្ទះ ពី ១០,៤៦៤ ដល់ ១៩.៣៣៩ តំណ រួមទាំងគ្រួសារក្រីក្រចំនួន ៤១៤ ដែលទទួលបានតភ្ជាប់បណ្តាញដោយឥតគិតថ្លៃ។

ប្រព័ន្ធថ្មី ដែលរួមមានស្ថានីយបូមទឹកឆៅ រោងចក្រប្រព្រឹត្តកម្មទឹកស្អាត និង ការពង្រីកបណ្តាញបំពង់បញ្ជូន និង ចែកចាយទឹកស្អាត នឹងបន្ថែមសមត្ថភាពផលិតទឹកស្អាតចំនួន ១១.៦០០ ម៉ែត្រគូប ក្នុង ១ ថ្ងៃ ដែលធ្វើឲ្យសមត្ថភាពផលិតទឹកស្អាតសរុបរបស់រដ្ឋាករទឹកកំពង់ចាម កើនឡើងដល់ប្រមាណ ២៨.១០០ ម៉ែត្រគូប ក្នុង ១ ថ្ងៃ៕
អត្ថបទ និង រូបភាព ៖ ឡេក ចាន់ពេជ្រ

The post សម្ពោធដាក់ឲ្យដំណើរការប្រព័ន្ធផ្គត់ផ្គង់ទឹកស្អាតខេត្តកំពង់ចាម appeared first on Kampuchea Thmey Daily.

ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨%

Dy Bunnara — Wed, 06 May 2026 07:43:10 +0000

គម្រោងពង្រីក និងលើកកម្រិតផ្លូវជាតិលេខ ៧ ជាបួនគន្លង ចាប់ពីទីប្រជុំជនស្គន់រហូតដល់ក្រុងកំពង់ចាម ប្រវែង ៤៥,៥០៤ គីឡូម៉ែត្រ សម្រេចលទ្ធផលជារួមបាន ៩៨,៥៩%។

លោក ផន រឹម មន្រ្តីអ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថា ផ្អែកលើល្បឿនការងារ គម្រោងនឹងបញ្ចប់នាពេលឆាប់ៗខាងមុខ មានន័យថាលឿនជាងផែនការគ្រោងទុក។

ផ្លូវជាតិលេខ ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ជួយសម្រួលការធ្វើដំណើរ, ការដឹកជញ្ជូនផលិតផលកសិកម្ម,កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។

លោក ផន រឹម បានបញ្ជាក់ថា ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងក៏ជាគម្រោងយុទ្ធសាស្រ្តមួយដ៏សំខាន់សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋស្របពាក្យមួយដែលបានពោលថា «មានផ្លូវ មានក្តីសង្ឃឹម»៕

The post ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨% appeared first on Kampuchea Thmey Daily.

ស្វែងយល់ពីភូមិសាស្រ្តខេត្តកំពង់ចាម មានស្លាកស្នាមប្រវត្តិសាស្ត្រតាំងពីសម័យមុនអង្គរ

Dy Bunnara — Mon, 27 Apr 2026 02:04:12 +0000

ខេត្តកំពង់ចាមគឺជាទឹកដីចំណាស់មួយដែលមានស្លាកស្នាមប្រវត្តិសាស្ត្រតាំងពីសម័យមុនអង្គរ និងសម័យក្រោយៗមកទៀត តាមរយៈវត្តមានប្រាសាទបុរាណ ទួលបុរាណ និងបុរាណវត្ថុជាច្រើន។

ខេត្តនេះមានសក្តានុពលធម្មជាតិសម្បូរបែប រួមមាន ព្រៃភ្នំ ទន្លេ ព្រែក និងបឹងបួ ដែលគាំទ្រដល់វិស័យកសិកម្ម ទេសចរណ៍ និងការវិនិយោគ។

ស្ថិតិប្រជាជន និងរដ្ឋបាល

បើតាមរដ្ឋបាលខេត្តកំពង់ចាម គិតត្រឹមឆ្នាំ ២០២៥ ខេត្តកំពង់ចាមមាន៖

-ប្រជាជនសរុប៖ ប្រមាណជាង ១ លាន ១៤ ម៉ឺននាក់
-ផ្ទៃដី៖ ៤,៥៤៨.០៩ គីឡូម៉ែត្រការ៉េ
-ការបែងចែករដ្ឋបាល៖ មាន ១០ ក្រុងស្រុក និង ១០៩ ឃុំសង្កាត់

ហេដ្ឋារចនាសម្ព័ន្ធ និងគម្រោងអភិវឌ្ឍន៍

រដ្ឋបាលខេត្តកំពង់ចាមបានខិតខំកសាងផ្លូវកៅស៊ូ ផ្លូវបេតុង ស្ពាន និងសួនច្បារជាច្រើន ដើម្បីបង្កើនគុណភាពជីវិតរបស់ប្រជាពលរដ្ឋ។ គម្រោងសំខាន់ៗរួមមាន៖

-ផ្លូវជាតិលេខ ៧៖ ត្រូវបានស្ថាបនាពង្រីកជា ៤ គន្លង ចាប់ពីទីប្រជុំជនស្គន់រហូតដល់ក្រុងកំពង់ចាម
-កំពង់ផែទេសចរណ៍កំពង់ចាម កំពុងដំណើរការសាងសង់ដើម្បីសម្រួលការតភ្ជាប់ការដឹកជញ្ជូនភ្ញៀវទេសចរតាមទន្លេមេគង្គទៅកាន់ខេត្តក្រចេះ និងអន្តរជាតិ (វៀតណាម-ភ្នំពេញ) ព្រមទាំងតភ្ជាប់ទៅកាន់ព្រែកជីកហ្វូណនតេជោផងដែរ។

វិស័យសេដ្ឋកិច្ច និងវិនិយោគ

ខេត្តកំពង់ចាមបានទាក់ទាញវិនិយោគិនឱ្យបង្កើតតំបន់សេដ្ឋកិច្ចពិសេស និងរោងចក្រសហគ្រាស៖

-មូលដ្ឋានសិប្បកម្ម និងរោងចក្រ៖ មានសរុបចំនួន ១,៦៦៨ មូលដ្ឋាន ដែលផ្ដល់ការងារដល់កម្មករនិយោជិតជិត ៥ ម៉ឺននាក់
-វិស័យកាត់ដេរ៖ មានរោងចក្រកាត់ដេរ និងផលិតស្បែកជើងជាង ២៩ កន្លែង
-ថាមពល និងទឹកស្អាត៖ មានក្រុមហ៊ុនផ្គត់ផ្គង់អគ្គិសនីចំនួន ៤៦ និងមូលដ្ឋានទឹកស្អាតឯកជនចំនួន ៥៥

វិស័យកសិកម្ម

ខេត្តមានដីមានជីជាតិ និងប្រព័ន្ធធារាសាស្ត្រល្អសម្រាប់ដំណាំសំខាន់ៗ៖

-ស្រូវ៖ ផ្ទៃដីដាំដុះសរុបជាង ១៨១,០០០ ហិកតា (ស្រូវវស្សា ១១៦,០០០ ហិកតា និងស្រូវប្រាំង ៦៤,០០០ ហិកតា)
-ដំណាំឧស្សាហកម្ម និងហូបផ្លែ៖ កៅស៊ូជិត ២៧ ម៉ឺនហិកតា, ចេកជាង ៦,០០០ ហិកតា និងធុរេន ១,៦០០ ហិកតា

វិស័យសុខាភិបាល និងសង្គមកិច្ច

-ក្នុងឆ្នាំ ២០២៥ មន្ទីរពេទ្យបង្អែកខេត្តកំពង់ចាមទទួលបានចំណាត់ថ្នាក់លេខ ១ ក្នុងការផ្តល់សេវាគំរូទូទាំងប្រទេស។ ការិយាល័យប្រជាពលរដ្ឋ និងអង្គភាពច្រកចេញចូលតែមួយរបស់ខេត្តក៏ទទួលបានលេខ ១ ដូចគ្នា។

ទេសចរណ៍

ខេត្តកំពង់ចាមមានរមណីយដ្ឋានធម្មជាតិ និងប្រវត្តិសាស្ត្រចំនួន ១០ កន្លែង និងមានមូលដ្ឋានអាជីវកម្មទេសចរណ៍ (សណ្ឋាគារ ផ្ទះសំណាក់ អាហារដ្ឋាន) សរុបចំនួន ៣២៨ កន្លែង៕

The post ស្វែងយល់ពីភូមិសាស្រ្តខេត្តកំពង់ចាម មានស្លាកស្នាមប្រវត្តិសាស្ត្រតាំងពីសម័យមុនអង្គរ appeared first on Kampuchea Thmey Daily.

រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨ តោន បានដាក់តម្កល់នៅរង្វង់មូលនាគព័ន្ធចាស់ ខេត្តកំពង់ចាម

អ៊ិន ពិសី — Thu, 23 Apr 2026 04:32:12 +0000

នៅព្រឹកថ្ងៃទី ២៣ ខែមេសា ឆ្នាំ ២០២៦ នេះ លោក អ៊ុន ចាន់ដា អភិបាលខេត្តកំពង់ចាម និង លោក ខ្លូត ផន ប្រធានក្រុមប្រឹក្សាខេត្តកំពង់ចាម បានរៀបចំពិធីកាត់រឹសសីមារូបសំណាកនាគព័ន្ធថ្មី សាងសង់ឡើងអំពីស្ពាន់សុទ្ធ ទម្ងន់ ៨ តោន កម្ពស់ ១០ ម៉ែត្រ (បូកទាំងជើងទម្រ ៣ ម៉ែត្រ) បានរួចរាល់ជាស្ថាពរ ក្នុងដែនដីខេត្តកំពង់ចាម។

គូសបញ្ជាក់ថា រូបសំណាកនាគព័ន្ធថ្មី ធ្វើពីស្ពាន់សុទ្ធ ទម្ងន់ ៨ តោន នេះ ត្រូវតម្កល់នៅរង្វង់មូលនាគព័ន្ធចាស់ ព្រំប្រទល់ស្រុកកំពង់សៀម និងក្រុងកំពង់ចាម លើផ្លូវជាតិលេខ ៧ ខណៈបច្ចប្បន្នក្រុមការងារស្ថាបនាបានជាង ៩០ ភាគរយហើយ ចាប់ពីរង្វង់មូលស្គន់ ដល់រង្វង់មូលស្ពានគីហ្សូណា ក្រុងកំពង់ចាម៕
អត្ថបទ និង រូបភាព ៖ ឡេក ចាន់ពេជ្រ

The post រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨ តោន បានដាក់តម្កល់នៅរង្វង់មូលនាគព័ន្ធចាស់ ខេត្តកំពង់ចាម appeared first on Kampuchea Thmey Daily.

ផ្លូវជាច្រើនខ្សែក្នុងខេត្តកំពង់ចាម និងក្រចេះប្រែក្លាយជាផ្លូវបេតុង និងកៅស៊ូ ក្រោមគម្រោងអភិវឌ្ឍន៍ជនបទ

Dy Bunnara — Thu, 02 Apr 2026 03:06:00 +0000

លោក ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទកាលពីថ្ងៃទី ១ ខែមេសាឆ្នាំ ២០២៦ បានដឹកនាំប្រតិភូចុះទៅពិនិត្យគុណភាពផ្លូវជនបទចំនួន ៥ ខ្សែ ក្នុងនោះនៅក្នុងខេត្តកំពង់ចាមចំនួន ២ ខ្សែ និងនៅក្នុងខេត្តក្រចេះចំនួន ៣ ខ្សែ។

ខ្សែទី១៖ ឈ្មោះផ្លូវ ទួលប្រាក់-សូភាស ជាផ្លូវក្រាលកៅស៊ូពីរជាន់(DBST) មានប្រវែង ៩,៨៨២ គ.ម. ទទឹង ៥ ម៉ែត្រ តភ្ជាប់ពីភូមិទួលប្រាក់ ឃុំតាអុង ស្រុកចំការលើទៅកាន់ភូមិសូភាស ឃុំសូភាស ស្រុកស្ទឹងត្រង់ ខេត្តកំពង់ចាម។ ផ្លូវនេះអនុវត្តការសាងសង់ដោយក្រសួងអភិវឌ្ឍន៍ជនបទក្នុងឆ្នាំ២០២២ ក្នុងក្របខ័ណ្ឌគម្រោងខ្សែច្រវ៉ាក់ផលិតកម្មដោយភារៈបរិស្ថាន (CFAVC) ក្រោមហិរញ្ញប្បទានពីធនាគារអភិឌ្ឍន៍អាស៊ី (ADB)។

ខ្សែទី២៖ ឈ្មោះផ្លូវ ប៉ប្រក-ទ័ព ជាផ្លូវក្រាលបេតុនិងក្រាលកៅស៊ូពីរជាន់(DBST) មានប្រវែងសរុប ៥,៤៧ គ.ម. មានទទឹង ៦ ម៉ែត្រ តភ្ជាប់ពីភូមិប៉ប្រក ឃុំសូភាស ស្រុកស្ទឹងត្រង់ ទៅកាន់ភូមិទ័ព ឃុំសូភាស ស្រុកស្ទឹងត្រង់ ខេត្តកំពង់ចាម។ ផ្លូវនេះអនុវត្តការសាងសង់ដោយក្រសួងអភិវឌ្ឍន៍ជនបទ គិតមកដល់បច្ចុប្បន្នសម្រេចវឌ្ឍនភាព ៥៥% ក្នុងក្របខ័ណ្ឌគម្រោងពិពិធកម្មវិស័យកសិកម្មកម្ពុជា (CASDP) ហិរញ្ញប្បទានពីធនាគារពិភពលោក( WB)។

ខ្សែទី៣៖ ឈ្មោះផ្លូវ ព្រែកប្រសព្វលើ-កំពែង ជាផ្លូវក្រាលកៅស៊ូពីរជាន់ DBST មានប្រវែង ១៤,២០ គ.ម. ទទឹង ៦ ម៉ែត្រ តភ្ជាប់ពីភូមិព្រែកប្រសព្វលើ ទៅកាន់ភូមិកំពែង ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ។ ផ្លូវនេះអនុវត្តការសាងសង់ដោយក្រសួងអភិវឌ្ឍន៍ជនបទ ដោយសម្រេចបាន ៩៨,៨៦% ហើយគ្រោងនឹងបញ្ចប់ការសាងសង់ក្នុងពេលឆាប់ៗខាងមុខនេះ។

ខ្សែទី៤៖ ឈ្មោះផ្លូវ ថ្មរាប-ទួលខ្នុរ ជាផ្លូវក្រាលកៅស៊ូពីរជាន់ (DBST) មានប្រវែង ៤,៧០គ.ម. ទទឹង ៦ ម៉ែត្រ តភ្ជាប់ពីភូមិថ្មរាប ឃុំព្រែកប្រសព្វ ទៅកាន់ភូមិសោបក្រោម ឃុំសោប ស្រុកព្រែកប្រសព្វ ខេត្តក្រចេះ។ ផ្លូវនេះចាប់ផ្ដើមសាងសង់នៅចុងឆ្នាំ ២០២៤ ដោយក្រសួងអភិវឌ្ឍន៍ជនបទបច្ចុប្បន្នសម្រេចបាន ៨៧%។

ខ្សែទី៥៖ ឈ្មោះផ្លូវ ចង្រ្កង់-ថ្មគ្រែ ជាផ្លូវក្រាលកៅស៊ូពីរជាន់ DBST មានប្រវែង ១១,១០គ.ម. ទទឹង ៦ ម៉ែត្រ តភ្ជាប់ពីភូមិចង្ក្រង់ ឃុំចង្រ្កង់ ទៅកាន់ភូមិថ្មគ្រែលើ ឃុំថ្មគ្រែ ស្រុកចិត្របុរី ខេត្តក្រចេះ។ ផ្លូវនេះត្រូវបានចាប់ផ្ដើមសាងសង់នៅចុងឆ្នាំ២០២៤ ដោយក្រសួងអភិវឌ្ឍន៍ជនបទ បច្ចុប្បន្នសម្រេចបាន ៩៦,៧៣% ។

ផ្លូវទាំង ៣ ខ្សែនៅក្នុងខេត្តក្រចេះ ស្ថិតក្នុងក្របខ័ណ្ឌគម្រោងតភ្ជាប់បណ្តាញហេដ្ឋារចនាសម្ព័ន្ពផ្លូវថ្នល់ (RCIP) ហិរញ្ញប្បទានពីធនាគារពិភពលោក (WB)។

ក្នុងឱកាសចុះពិនិត្យគុណភាពខ្សែផ្លូវខាងលើ លោក ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទបានណែនាំដល់ទីប្រឹក្សាបច្ចេកទេស និងក្រុមហ៊ុនទទួលការសាងសង់ប្រចាំការនៅការដ្ឋានផ្ទាល់ អនុវត្តឱ្យបានត្រឹមត្រូវតាមបទដ្ឋានបច្ចេកទេស និងពន្លឿនការងារសាងសង់ឱ្យលឿន ស្របតាមកិច្ចសន្យាការងារដើម្បីបានបម្រើផលប្រយោជន៍ជូនប្រជាពលរដ្ឋក្នុងមូលដ្ឋានបានយូរអង្វែង៕

The post ផ្លូវជាច្រើនខ្សែក្នុងខេត្តកំពង់ចាម និងក្រចេះប្រែក្លាយជាផ្លូវបេតុង និងកៅស៊ូ ក្រោមគម្រោងអភិវឌ្ឍន៍ជនបទ appeared first on Kampuchea Thmey Daily.

សមិទ្ធផលខេត្តកំពង់ចាម Archives - Kampuchea Thmey Daily

សម្ពោធដាក់ឲ្យដំណើរការប្រព័ន្ធផ្គត់ផ្គង់ទឹកស្អាតខេត្តកំពង់ចាម

ផ្លូវជាតិលេខ ៧ ពង្រីក​ ៤ គន្លង ពី​ស្គន់​ដល់ក្រុងកំពង់ចាម​សម្រេច​ការ​ស្ថាបនា​បាន ៩៨%

ស្វែងយល់ពី​ភូមិសាស្រ្ត​ខេត្ត​កំពង់ចាម មាន​ស្លាកស្នាមប្រវត្តិសាស្ត្រតាំង​ពី​សម័យមុនអង្គរ

រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨ តោន បានដាក់តម្កល់នៅរង្វង់មូលនាគព័ន្ធចាស់​ ខេត្តកំពង់ចាម

ផ្លូវជាតិលេខ ៧ ពង្រីក ៤ គន្លង ពីស្គន់ដល់ក្រុងកំពង់ចាមសម្រេចការស្ថាបនាបាន ៩៨%

ស្វែងយល់ពីភូមិសាស្រ្តខេត្តកំពង់ចាម មានស្លាកស្នាមប្រវត្តិសាស្ត្រតាំងពីសម័យមុនអង្គរ

រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨ តោន បានដាក់តម្កល់នៅរង្វង់មូលនាគព័ន្ធចាស់ ខេត្តកំពង់ចាម