សម្ដេច ឃួន សុដារី Archives - Kampuchea Thmey Daily

ប្រធានសភាប្រាប់ពីអារម្មណ៍មនោសញ្ចេតនាផ្ទាល់ខ្លួនមួយចំពោះប្រទេសជប៉ុនប្រាប់ឯកអគ្គរាជទូតដែលចប់អាណត្តិ

hun sirivadh — Fri, 03 Jul 2026 09:09:01 +0000

ប្រធានសភាកម្ពុជា សម្ដេចសភាធិបតី ឃួន សុដារី បានបង្ហាញអារម្មណ៍មនោសញ្ចេតនាដែលជាការចងចាំមួយរបស់សម្ដេចចំពោះប្រទេសជប៉ុនប្រាប់ដល់ឯកអគ្គរាជទូតជប៉ុនលោក អ៊ូអិណុ អាត់ស៊ូស៊ី ក្នុងពេលដែលលោកចូលជួបជម្រាបលាមុនចប់អាណត្តិការងារពីកម្ពុជា។ សម្ដេចថាប្រទេសជប៉ុនជាប្រទេសទី១ដែលសម្ដេចបានទៅលេងតាំងពីនៅក្មេងមកម្ល៉េះ ហើយរូបភាពនៃដំណើរកម្សាន្តរបស់សម្ដេចទៅប្រទេសនេះគឺនៅក្នុងការចងចាំរបស់សម្ដេចជានិច្ច។

ថ្លែងក្នុងជំនួបនៅវិមានរដ្ឋសភាព្រឹកថ្ងៃទី៣ ខែកក្កដា ឆ្នាំ២០២៦នេះ សម្ដេចសភាធិបតី ឃួន សុដារី បានលើកឡើងថា និស្ស័យនិងមនោសញ្ចេតនាជាមួយជប៉ុន គឺបានបន្តរហូតមកដល់ពេលសម្ដេចធ្វើជាតំណាងរាស្ត្រ និងប្រធានគណៈកម្មការទី១សភាដែលពេលនោះសម្ដេចបានធ្វើដំណើរទៅកាន់ប្រទេសជប៉ុនស្ទើតែរាល់ឆ្នាំដើម្បីបំពេញការងារ។

នាយខុទ្ទកាល័យ និងជាអ្នកនាំពាក្យសម្ដេចប្រធានសភាលោក កែវ ពិសិដ្ឋ បានប្រាប់អ្នកយកព័ត៌មានថា៖ «សម្ដេចចងចាំថាលោកធ្លាប់ទៅជប៉ុនតាំងពីលោកនៅក្មេងម្ល៉េះ។ ដោយសារឪពុករបស់លោកធ្លាប់រៀនទទួលបានអាហារូបករណ៍រៀននៅប្រទេសជប៉ុនដល់អ៊ីចឹងមនោសញ្ចេតនាផ្ទាល់ខ្លួនរវាងសម្ដេចនិងជប៉ុនគឺវែងឆ្ងាយមកហើយតាំងពីអនុស្សាវរីយ៍លោកតាំងពីនៅក្មេង ហើយពេលចូលធ្វើការមកហ្នឹងគឺសម្ដេចលោកមកបំពេញតួនាទីហ្នឹងជាតំណាងរាស្ត្រជាប្រធានគណៈកម្មការគឺតែងតែចេញចូលលោកថាលោកទៅស្ទើរតែរាល់ឆ្នាំកាលពីមុននោះ»។

សម្រាប់ទំនាក់ទំនងនៃស្ថាប័នសភាវិញសម្ដេចសភាធិបតីបានវាយតម្លៃខ្ពស់ចំពោះទំនាក់ទំនងសភាកម្ពុជា-ជប៉ុន ជាពិសេសក្នុងអំឡុងទស្សវត្សឆ្នាំ៩០ និងឆ្នាំ២០០០ ប្រទេសទាំងពីរតែងតែផ្លាស់ប្ដូរទស្សនកិច្ចមន្ត្រីជាន់ខ្ពស់សភានឹងសភាជានិច្ច យ៉ាងណាទំនាក់ទំនងនេះហាក់ថយថយចុះពេលបច្ចុប្បន្ន ខណៈសម្ដេចថានឹងជំរុញឱ្យមានទំនាក់ទំនងកាន់តែល្អ និងរឹងមាំឡើងវិញផងដែរ។

ក្នុងជំនួបនោះលោក អ៊ូអិណុ អាត់ស៊ូស៊ី ក៏បានវាយតម្លៃខ្ពស់ចំពោះភាពជាដៃគូររបស់កម្ពុជា ព្រមទាំងរម្លឹកនូវអនុស្សាវរីយ៍ល្អៗដែលលោកចងចាំពីសម្ដេចសភាធិបតីផងដែរ។ លោក អ៊ូអិណុ បានរម្លឹកពីការឡើងមកធ្វើជាតំណាងទូតជប៉ុននៅកម្ពុជាក្នុងឆ្នាំដែលសម្ដេចសភាធិបតីឡើងជាប្រធានសភា និងមានកិត្តិយសដែលសម្ដេចបានចូលរួមក្នុងពិធីខួបកំណើតព្រះចៅអធិរាជជប៉ុនដែលរៀបចំដោយទូតជប៉ុននៅកម្ពុជា ព្រមទាំងចំណាយពេលជួបលោកដោយផ្ទាល់នៅនិវេសនដ្ឋានទូតពិសាអាហារពេលល្ងាចជាមួយគ្នាផងដែរនោះ។

លោកបង្ហាញអារម្មណ៍សោកស្ដាយដែលក្នុងអាណត្តិរបស់លោក មិនមានដំណើរទស្សនកិច្ចរបស់សម្ដេចប្រធានសភាទៅជប៉ុន ឬប្រធានសភាជប៉ុនមកកម្ពុជាដោយសារតែដំណើរការផ្លាស់ប្ដូររដ្ឋាភិបាលដោយសារការបោះឆ្នោត និងបេសកកម្មផ្សេងដែលត្រូវធ្វើ។

លោកសង្ឃឹមថាឯកអគ្គរាជទូតថ្មីនឹងបន្តជំរុញទំនាក់ទំនងកម្ពុជា-ជប៉ុនឱ្យកាន់តែស៊ីជម្រៅថែមទៀត ខណៈសម្ដេចសភាធិបតីថ្លែងអំណរគុណចំពោះលោក អ៊ូអិណុ អាត់ស៊ូស៊ី ដែលបានខិតខំក្នុងការងារជួយដល់ទំនាក់ទំនងរវាងកម្ពុជានិងជប៉ុនកន្លងទៅ និងជួនពរឱ្យលោកជោគជ័យនាបេសកម្មបន្ទាប់របស់លោកនាពេលខាងមុខ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាប្រាប់ពីអារម្មណ៍មនោសញ្ចេតនាផ្ទាល់ខ្លួនមួយចំពោះប្រទេសជប៉ុនប្រាប់ឯកអគ្គរាជទូតដែលចប់អាណត្តិ appeared first on Kampuchea Thmey Daily.

ប្រធានរដ្ឋសភាកម្ពុជា ផ្ញើសារអបអរសាទរប្រធានរដ្ឋសភាកូរ៉េខាងត្បូងថ្មី ប្តេជ្ញាពង្រឹងកិច្ចសហប្រតិបត្តិការទ្វេភាគី

Samean Lay — Sun, 21 Jun 2026 05:11:56 +0000

ប្រធានសភាកម្ពុជា សម្ដេចសភាធិបតី ឃួន សុដារី ផ្ញើសារអបអរសាទរជូនឯកឧត្តម ចូ ជុងស៊ីក (Cho Jeong-Sik) ដែលត្រូវបានបោះឆ្នោតជ្រើសតាំងជាប្រធានរដ្ឋសភានៃសាធារណរដ្ឋកូរ៉េ កាលពីថ្ងៃទី៥ ខែមិថុនា ឆ្នាំ២០២៦ និង ប្តេជ្ញាលើកកម្ពស់កិច្ចសហប្រតិបត្តិការទ្វេភាគី។

ក្នងលិខិតអបអរសាទរ សម្តេច ឃួន សុដារី មានជំនឿយ៉ាងមុតមាំថា ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់ ឯកឧត្តមប្រធាន រដ្ឋសភានៃសាធារណរដ្ឋកូរ៉េ នឹងបន្តទទួលបាននូវសមិទ្ធផលថ្មីៗបន្ថែមទៀត។ ទន្ទឹមនឹងនេះ ប្រធានរដ្ឋសភាកម្ពុជាជឿជាក់ថា ចំណងមិត្តភាពដ៏យូរអង្វែង និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសយើងទាំងពីរ នឹងត្រូវបានបន្តពង្រឹង និងពង្រីកកាន់តែស៊ីជម្រៅបន្ថែមទៀតនាពេលអនាគត ដើម្បីជាឧត្តមប្រយោជន៍សម្រាប់ប្រជាជនយើងទាំងសងខាង។

តាមរយៈលិខិតនេះ សម្តេចសភាធិបតី គូសបញ្ជាក់ថា៖«ខ្ញុំត្រៀមខ្លួនរួចជាស្រេចក្នុងការធ្វើការងារយ៉ាងជិតស្និទ្ធជាមួយ ឯកឧត្តមប្រធាន និងសហការី ដើម្បីបន្តលើកកម្ពស់កិច្ចសហប្រតិបត្តិការសភាយើងទាំងពីរ ទាំងក្នុងក្របខណ្ឌទ្វេភាគី និងពហុភាគី»។

ទន្ទឹមនឹងនេះ ភាគីទាំងពីរនឹងបន្តសហការគ្នាដើម្បីពង្រឹងសណ្តាប់ធ្នាប់អន្តរជាតិផ្អែកលើច្បាប់ ព្រមទាំងលើកកម្ពស់ពហុភាគី និយមប្រកបដោយភាពបើកចំហ និងបរិយាបន្ន ដើម្បីបុព្វហេតុសន្តិភាព និងវិបុលភាព៕

The post ប្រធានរដ្ឋសភាកម្ពុជា ផ្ញើសារអបអរសាទរប្រធានរដ្ឋសភាកូរ៉េខាងត្បូងថ្មី ប្តេជ្ញាពង្រឹងកិច្ចសហប្រតិបត្តិការទ្វេភាគី appeared first on Kampuchea Thmey Daily.

ប្រធានរដ្ឋសភាស្នើសិង្ហបុរីជួយបណ្តុះបណ្តាលបច្ចេកវិទ្យា និង AI ដល់មន្ត្រីរដ្ឋសភា

hun sirivadh — Sat, 06 Jun 2026 02:25:51 +0000

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានបង្ហាញពីបំណងចង់ឃើញកិច្ចសហប្រតិបត្តិការកាន់តែស៊ីជម្រៅជាមួយប្រទេសសិង្ហបុរី លើការអភិវឌ្ឍបច្ចេកវិទ្យាឌីជីថល និងបញ្ញាសិប្បនិម្មិត (AI) ដើម្បីធ្វើទំនើបកម្មរដ្ឋបាលរដ្ឋសភាកម្ពុជា ឱ្យដើរទាន់ការវិវត្តនៃបច្ចេកវិទ្យារបស់សកលលោកនាពេលបច្ចុប្បន្ន។

ការថ្លែងបែបនេះបានធ្វើឡើងនៅក្នុងឱកាសដែល សម្តេចមហារដ្ឋសភាធិការធិបតី ឃួន សុដារី អនុញ្ញាតឱ្យ លោក ប៉ាង ឈី វី (PANG Chee Wee) ឯកអគ្គរដ្ឋទូតវិសាមញ្ញ និងពេញសមត្ថភាពទើបតែងតាំងថ្មី នៃសាធារណរដ្ឋសិង្ហបុរី ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ នាព្រឹកថ្ងៃទី ៥ ខែមិថុនា ឆ្នាំ២០២៦ នេះ នៅវិមានរដ្ឋសភា។

នៅក្នុងជំនួបនេះ សម្តេចរដ្ឋសភាធិបតី បានសង្កត់ធ្ងន់ថា នៅក្នុងអាណត្តិនីតិកាលទី៧ នេះ រដ្ឋសភាកម្ពុជាបាននិងកំពុងអនុវត្តការងាររបស់ខ្លួនយ៉ាងសកម្ម លើការងារកំណែទម្រង់រចនាសម្ព័ន្ធផ្ទៃក្នុង ការអភិវឌ្ឍន៍នវានុវត្តន៍ និងការធ្វើទំនើបកម្មស្ថាប័ន ក្នុងគោលដៅយុទ្ធសាស្ត្រចម្បង គឺការធ្វើបរិវត្តកម្មឌីជីថល ដោយបំប្លែងរដ្ឋបាលរដ្ឋសភា ទៅជា «សភាឌីជីថល» ដើម្បីបង្កើនល្បឿន ប្រសិទ្ធភាព និងតម្លាភាព ក្នុងការគ្រប់គ្រងរដ្ឋបាលសាធារណៈ ក៏ដូចជាការបម្រើសេវាជូនប្រជាពលរដ្ឋឱ្យកាន់តែល្អប្រសើរ។

ដើម្បីសម្រេចផែនការយុទ្ធសាស្ត្រដ៏សំខាន់នេះ សម្តេចប្រធានរដ្ឋសភា ក៏បានស្នើដល់រដ្ឋាភិបាលសិង្ហបុរី តាមរយៈឯកឧត្តមឯកអគ្គរដ្ឋទូតថ្មី ជួយផ្តល់ការគាំទ្រ ជួយចែករំលែកបទពិសោធន៍ជោគជ័យល្អៗ ក៏ដូចជាផ្តល់ការបណ្តុះបណ្តាលបច្ចេកទេសជាក់ស្តែង ជាពិសេសលើផ្នែកបច្ចេកវិទ្យាគមនាគមន៍ និងព័ត៌មាន (ICT) និងបច្ចេកវិទ្យាបញ្ញាសិប្បនិម្មិត (AI) ដល់មន្ត្រីរាជការនៃអគ្គលេខាធិការដ្ឋានរដ្ឋសភាកម្ពុជា។

សម្តេចរដ្ឋសភាធិបតី បានគូសបញ្ជាក់បន្ថែមថា៖ «ការកសាងសភាឌីជីថល មិនមែនគ្រាន់តែជាការបំពាក់ឧបករណ៍បច្ចេកវិទ្យាប៉ុណ្ណោះទេ ប៉ុន្តែចំណុចគន្លឹះគឺការវិនិយោគលើធនធានមនុស្ស ឱ្យមានចំណេះដឹង និងជំនាញឌីជីថលពិតប្រាកដ។ ក្នុងន័យនេះ ការទទួលបានការគាំទ្រ និងការចែករំលែក បទពិសោធន៍ពីប្រទេសសិង្ហបុរី នឹងក្លាយជាកាតាលីករដ៏សំខាន់ ក្នុងការជួយឱ្យរដ្ឋសភាកម្ពុជាសម្រេចបាននូវទស្សនវិស័យទំនើបកម្មមួយនេះ ប្រកបដោយផ្លែផ្កានិងនិរន្តរភាព»។

ជាការឆ្លើយតប លោក ប៉ាង ឈី វី ឯកអគ្គរដ្ឋទូតថ្មីនៃសាធារណរដ្ឋសិង្ហបុរី បានសម្តែងការឯកភាពទាំងស្រុងចំពោះទស្សនវិស័យ និងគំនិតផ្តួចផ្តើមវែងឆ្ងាយរបស់សម្តេចប្រធានរដ្ឋសភា។ ឯកឧត្តមបានគូសបញ្ជាក់យ៉ាងច្បាស់ថា ភាគីសិង្ហបុរីតែងតែចាត់ទុក «ការអភិវឌ្ឍធនធានមនុស្ស» ជាស្នូល និងជាអាទិភាពខ្ពស់បំផុតនៅក្នុងកិច្ចសហប្រតិបត្តិការទ្វេភាគីជាមួយកម្ពុជា។

ជាមួយគ្នានេះ លោកឯកអគ្គរដ្ឋទូត បានប្តេជ្ញាចិត្តយ៉ាងមុតមាំ ក្នុងការបន្តជំរុញ និងលើកកម្ពស់ទំនាក់ទំនងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រៅ និងឈានដល់កម្រិតខ្ពស់ថ្មីមួយទៀត។ លោកបានសង្កត់ធ្ងន់ថា កិច្ចសហប្រតិបត្តិការ និងការគាំទ្ររបស់សិង្ហបុរីលើការបណ្តុះបណ្តាលធនធានមនុស្ស និងបច្ចេកវិទ្យានេះ គឺដើរស្របតាម «នយោបាយឈ្នះ-ឈ្នះ» ដែលស្តែងចេញពីការគិតគូរខ្ពស់ ក្នុងការនាំមកនូវផលប្រយោជន៍ និងការរីកចម្រើនទៅវិញទៅមក សម្រាប់ប្រទេស និងប្រជាជននៃប្រជាជាតិទាំងសងខាង៕

The post ប្រធានរដ្ឋសភាស្នើសិង្ហបុរីជួយបណ្តុះបណ្តាលបច្ចេកវិទ្យា និង AI ដល់មន្ត្រីរដ្ឋសភា appeared first on Kampuchea Thmey Daily.

អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ

hun sirivadh — Thu, 04 Jun 2026 07:00:57 +0000

អ្នកសម្របសម្រួលអង្គការសហប្រជាជាតិប្រចាំកម្ពុជាលោកស្រី Vladanka Andreeva គាំទ្រដល់ការសម្រេចចិត្តរបស់កម្ពុជាក្នុងការប្រើប្រាស់យន្តការផ្សះផ្សាដោយបង្ខំក្នុងនីតិសមុទ្រអន្តរជាតិដើម្បីដោះស្រាយបញ្ហាដែនសមុទ្រត្រួតស៊ីគ្នាជាមួយប្រទេសថៃ។ ការគាំទ្រនេះក៏នឹងមានការជំនួយផ្នែកច្បាប់ ការប្រឹក្សាយោបល់ និងបច្ចេកទេសផងដែរបើកម្ពុជាស្នើសុំ។

លោកស្រី Vladanka Andreeva ជួបសម្ដេចប្រធានសភា ឃួន សុដារី នៅព្រឹកថ្ងៃទី៤ ខែមិថុនា

លោកស្រី Vladanka បានលើកឡើងបែបនេះក្នុងជំនួបជាមួយប្រធានសភាកម្ពុជាសម្ដេចសភាធិបតី ឃួន សុដារី នៅព្រឹកថ្ងៃទី៤ ខែមិថុនា នៅវិមានរដ្ឋសភាកម្ពុជា។

នាយកខុទ្ទកាល័យ និងជាអ្នកនាំពាក្យសម្ដេចប្រធានសភាលោក កែវ ពិសិដ្ឋ បានឱ្យអ្នកសារព័ត៌មានដឹងបន្ទាប់ពីកិច្ចប្រជុំនេះថាអ្នកសម្របសម្រួលអង្គការសហប្រជាជាតិប្រចាំកម្ពុជាបានគាំទ្រចំពោះជំហរកម្ពុជាក្នុងការប្រើប្រាស់ប្រព័ន្ធពហុភាគីនិយម និងច្បាប់អន្តរជាតិក្នុងការដោះស្រាយទំនាស់ដោយសន្តិវិធី ជាពិសេសគឺការប្រើប្រាស់យន្តការរបស់ UNCLOS សម្រាប់ដោះស្រាយនៅពេលនេះ។

លោកថា៖ «យើងអាចមានការប្រឹក្សាយោបល់ ភាគីទាំងសងខាងអាចមានសិទ្ធិក្នុងការសុំនូវការប្រឹក្សាយោបល់ សិទ្ធិនូវការសុំនូវជំនួយការបច្ចេកទេស ជំនួយផ្សេងៗ ហើយអង្គការសហប្រជាជាតិនឹងឆ្លើយតបតាមតម្រូវការផ្សេងៗ តាមអ្វីដែលគេអាចផ្ដល់បានតាមក្របខណ្ឌនៃអង្គការសហប្រជាជាតិ»។

លោក កែវ ពិសិដ្ឋ ក៏បានបញ្ជាក់ផងដែរថាការជ្រើសរើសយកយន្តការនៃការដោះស្រាយបញ្ហាតាមអង្គការសហប្រជាជាតិព្រោះកម្ពុជា មានជំនឿលើអង្គការនេះធានានូវយុត្តិធម៌ និងស្ថិរភាពពិភពលោក។

ក្នុងជំនួបនោះផងដែរប្រធានរដ្ឋសភា សម្ដេចសភាធិបតី ឃួន សុដារី មានប្រសាសន៍ដោយបានអរគុណដល់អង្គការសហប្រជាជាតិដែលជាអ្នកធានាដល់ការអភិវឌ្ឍន៍ និងខែលការពារប្រទេសនានាពីអំពើអយុត្តិធម៌។ សម្ដេចបានបញ្ជាក់ថាកម្ពុជានៅតែមានជំនឿលើប្រព័ន្ធពហុភាគីនិយម និងច្បាប់អន្តរជាតិ ដែលហេតុនេះហើយទើបសភាកម្ពុជាបានអនុម័តអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រកាលពីខែមករា និងសម្រេចប្រើប្រាស់យន្តការផ្សះផ្សាដោយបង្ខំដែលមានក្នុងច្បាប់នេះនៅខែមិថុនានេះផងដែរ។

គួរឱ្យដឹងផងដែរថា កាលពីថ្ងៃទី២ ខែមិថុនា រាជរដ្ឋាភិបាលកម្ពុជាបានផ្ញើលិខិតផ្លូវការទៅកាន់អគ្គលេខាធិការអង្គការសហប្រជាជាតិ និងប្រទេសថៃ ពីការចាប់ផ្ដើមយន្តការនៃការផ្សះផ្សាដោយបង្ខំក្នុងនីតិសមុទ្រ ដោះស្រាយបញ្ហាព្រំដែនសមុទ្រត្រួតស៊ីគ្នាជាមួយថៃ បន្ទាប់ពីថៃបានដកខ្លួនចេញដោយខ្លួនឯងពី MOU ឆ្នាំ២០០១ កាលពីដើមខែឧសភាកន្លងទៅ៕

អត្ថបទដោយ ហ៊ុន សិរីវឌ្ឍន៍

The post អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ appeared first on Kampuchea Thmey Daily.

ប្រធានសភាថា ទំនាក់ទំនងកម្ពុជា-ហុងគ្រី ៧០ឆ្នាំមកនេះ នៅតែរឹងមាំបើទោះបីមានការផ្លាស់ប្ដូររដ្ឋាភិបាលក៏ដោយ

hun sirivadh — Wed, 27 May 2026 07:53:31 +0000

ប្រធានសភាកម្ពុជា សម្ដេចសភាធិបតី ឃួន សុដារី បានលើកឡើងពីទំនាក់ទំនងល្អរវាងកម្ពុជានិងហុងគ្រីទោះបីជាមានការផ្លាស់ប្ដូររបបដឹកនាំ ឬរដ្ឋាភិបាលយ៉ាងណាក្ដីក៏ទំនាក់ទំនងនេះនេះនៅតែរីកចម្រើនជាបន្តបន្ទាប់គ្មានប្រែប្រួល ឬល្អក់កករជាមួយគ្នាទេ។ នេះបើតាមការឱ្យដឹងពីនាយកខុទ្ទកាល័យ និងជាអ្នកនាំពាក្យប្រធានសភាលោក កែវ ពិសិដ្ឋ បន្ទាប់ពីសម្ដេចសភាធិបតីជួបឯកអគ្គរដ្ឋទូតហុងគ្រីប្រចាំកម្ពុជាដែលមាននិវាសដ្ឋាននៅហាណូយនៅព្រឹកថ្ងៃទី២៧ ខែឧសភា ឆ្នាំ២០២៦នេះ។

ប្រធានសភាកម្ពុជា សម្ដេចសភាធិបតី ឃួន សុដារី និងលោក ប័រ បាឡូកឌី ឯកអគ្គរដ្ឋទូតហុងគ្រី ថ្ងៃទី២៧ ខែឧសភា ឆ្នាំ២០២៦

លោក កែវ ពិសិដ្ឋ បានឱ្យអ្នកសារព័ត៌មានដឹងថាក្នុងជំនួបនោះសម្ដេចសភាធិបតី ឃួន សុដារី បានថ្លែងអំណរគុណដល់ប្រទេសហុងគ្រីដែលតែងតែគាំទ្រដល់កម្ពុជាតាំងពីទសវត្សឆ្នាំ៨០ និងជួយជាប្រចាំដល់ការអភិវឌ្ឍកម្ពុជារហូតមកដល់ពេលនេះ។

លោកថា៖ «រយៈពេលជាង៧០ឆ្នាំកន្លងមកនេះគឺទំនាក់ទំនងរវាងកម្ពុជានិងហុងគ្រីគឺមានការរីកចម្រើនជាលំដាប់បើទោះបីជាមានការផ្លាស់ប្ដូរនូវប្រព័ន្ធនយោបាយនារយៈពេលកន្លងមកក៏ដោយក៏ប៉ុន្តែទំនាក់ទំនងនៅតែរក្សាបាននូវភាពជិតស្និទ្ធជាប្រចាំ»។

គួរឱ្យដឹងផងដែរថាទំនាក់ទំនងរវាងកម្ពុជានិងហុងគ្រីបានចាប់ផ្ដើមនៅឆ្នាំ១៩៥៦។ គិតរហូតមកដល់ឆ្នាំ២០២៦ គឺប្រទេសទាំងពីរមានទំនាក់ទំនង៧០ឆ្នាំមកហើយ។

ក្នុងជំនួបជាមួយសម្ដេចប្រធានសភានៅព្រឹកថ្ងៃពុធនេះ ឯកអគ្គរដ្ឋទូតហុងគ្រីដែលចប់អាណត្តិលោក ប័រ បាឡូកឌី (Tibor Baloghdi) លើកឡើងថាបើទោះបីប្រទេសទាំងពីរមិនទាន់មាននិវេសនដ្ឋានទូតក្នុងប្រទេសរៀងខ្លួនក្ដីតែទំនាក់ទំនងរវាងកម្ពុជានិងហុងគ្រីនៅតែមានទំនាក់ទំនងជាលំដាប់។ លោកបានបន្ថែមថាលោកមានមោទនភាពដែលបានជួយឱ្យសភាកម្ពុជានិងហុងគ្រីមានទំនាក់ទំនងកម្រិតខ្ពស់ និងសង្ឃឹមថាឯកអគ្គរដ្ឋទូតថ្មីនឹងជំរុញទំនាក់ទំនងប្រទេសទាំងពីរឱ្យបានខ្លាំងក្លាបន្ថែមទៀត។

ប្រទេសហុងគ្រីបានឈានដល់របត់នយោបាយថ្មីបន្ទាប់ពីគណបក្ស Fidesz ដែលធ្លាប់គ្រប់គ្រងអំណាច១៦ឆ្នាំនៅហុងគ្រីបានចាញ់ការបោះឆ្នោតខែមេសា ឆ្នាំ២០២៦។ បច្ចុប្បន្ននេះប្រទេសហុងគ្រីបានដឹកនាំដោយគណបក្ស Tisza ដែលមានលោក Péter Magyar ជានាយករដ្ឋមន្ត្រី និងលោកស្រី Agnes Forsthoffer ជាប្រធានសភាថ្មី។

ក្នុងលិខិតកាលពីថ្ងៃទី១១ ខែឧសភា សម្ដេចសភាធិបតី ឃួន សុដារី បានអបអរសាទរជួនលោកស្រី Agnes Forsthoffer ក្នុងពេលដែលលោកស្រីកាន់តួនាទីប្រធានសភានៃប្រទេសជាមិត្តកម្ពុជានៅអឺរ៉ុបមួយនេះ និងមានជំនឿថាចំណងមិត្តភាព និងកិច្ចសហប្រតិបត្តិការរវាងកម្ពុជានិងហុងគ្រីនឹងបន្តពង្រឹងស៊ីជម្រៅបន្ថែមទៀត ដើម្បីជាប្រយោជន៍សម្រាប់ប្រជាជននៃប្រទេសទាំងពីរ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាថា ទំនាក់ទំនងកម្ពុជា-ហុងគ្រី ៧០ឆ្នាំមកនេះ នៅតែរឹងមាំបើទោះបីមានការផ្លាស់ប្ដូររដ្ឋាភិបាលក៏ដោយ appeared first on Kampuchea Thmey Daily.

ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ

hun sirivadh — Tue, 26 May 2026 09:14:36 +0000

ប្រធានសភាកម្ពុជា សម្ដេចសភាធិបតី ឃួន សុដារី បានជំរុញឱ្យមានការពង្រឹងតួនាទីរបស់ស្ថាប័ននានាធ្វើឱ្យការប្ដេជ្ញាចិត្តផ្នែកបរិស្ថានទៅជាសកម្មភាពជាក់ស្ដែង។ សម្ដេចថាច្បាប់និងគោលនយោបាយនានាដែលអនុវត្តដាច់ខាតត្រូវយកប្រជាជនជាស្នូល ធានាការពារជីវភាពរស់នៅ គាំទ្រសហគមន៍ងាយរងគ្រោះបំផុត ដើម្បីលើកកម្ពស់កំណើនបៃតង និងមិនបោះបង់នរណាម្នាក់ចោលឡើយ។

សម្ដេចលើកឡើងបែបនេះក្នុងជំនួបមួយជាមួយប្រតិភូនៃសមាជិកអាយប៉ា និងវាគ្មិនអន្តរជាតិដែលបានចូលជួបសម្ដែងការគួរសម មុនពេលបើកសន្និសីទសភាជាតិស្ដីពីអភិបាលកិច្ចអាកាសធាតុដែលរៀបចំឡើងដោយរដ្ឋសភាកម្ពុជានៅព្រឹកថ្ងៃទី២៦ ខែឧសភា ឆ្នាំ២០២៦នេះ។

ក្នុងជំនួបនោះសម្ដេចសភាធិបតី ឃួន សុដារី បានទាញចំណាប់អារម្មណ៍លើសកម្មភាពឆ្លើយតបនឹងការប្រែប្រួលអាកាសធាតុដោយថាគ្រប់ការអនុវត្តទាំងអស់គឺដាច់ខាតត្រូវយកប្រជាជនជាស្នូល។ សម្ដេចបន្ថែមថាសម្រាប់ស្ថាប័នសភាតំណាងឱ្យប្រជាពលរដ្ឋ ការរួមចំណែកជួយដល់ពលរដ្ឋ គឺធ្វើឡើងតាមរយៈការរៀបចំនិងអនុម័តច្បាប់ស្ដីពីការប្រែប្រួលអាកាសធាតុប្រកបដោយប្រសិទ្ធភាព ការអនុម័តនិងតម្រង់ទិសកញ្ចប់ថវិកាជាតិឆ្ពោះទៅរកការវិនិយោគបៃតង ការពង្រឹងការត្រួតពិនិត្យ ការលើកកម្ពស់តម្លាភាពលើការអនុវត្តរបស់រដ្ឋាភិបាល ព្រមទាំងការកសាងទំនុកចិត្ត និងកៀរគរការចូលរួមយ៉ាងទូលំទូលាយពីសាធារណជន។

សម្ដេចថា៖ «សកម្មភាពឆ្លើយតបនឹងការប្រែប្រួលអាកាសធាតុមិនអាចជោគជ័យបានឡើយ ប្រសិនបើគ្មានការរួមគ្នារវាងរដ្ឋាភិបាល វិស័យឯកជន សង្គមស៊ីវិល សហគមន៍មូលដ្ឋាន និងយុវជន។ ភាពជាដៃគូដ៏រឹងមាំនេះ គឺជាគន្លឹះក្នុងការប្រែក្លាយច្បាប់ និងគោលនយោបាយនានា ទៅជាការអនុវត្តជាក់ស្តែង ដោយដាច់ខាតត្រូវយកប្រជាជនជាស្នូល ធានាការការពារជីវភាពរស់នៅ គាំទ្រសហគមន៍ងាយរងគ្រោះបំផុត លើកកម្ពស់កំណើនបៃតង និងមិនបោះបង់នរណាម្នាក់ចោលឡើយ»។

អនុប្រធានសភាប្រឹក្សាប្រជាជននៃសាធារណរដ្ឋឥណ្ឌូណេស៊ី និងជាតំណាងឱ្យគណៈប្រតិភូអាយប៉ាដែលបានចូលជួបសម្ដេចសភាធិបតីព្រឹកថ្ងៃអង្គារនេះលោក Eddy Soeparno បានគាំទ្រចំពោះទស្សនវិស័យសម្ដេចប្រធានសភាដោយថាពេលនេះបណ្ដាប្រទេសនៅតំបន់អាស៊ានត្រួវទទួលស្គាល់ថាបញ្ហាអាកាសធាតុក្នុងតំបន់នេះវាបានឈានហួសពីពាក្យថាការប្រែប្រួលអាកាសធាតុហើយ។

លោកថា៖ «បញ្ហាអាកាសធាតុនៅក្នុងតំបន់អាស៊ីអាគ្នេយ៍បច្ចុប្បន្ន បានឈានហួសពីពាក្យ «ការប្រែប្រួលអាកាសធាតុ» ហើយវាបានក្លាយជា «វិបត្តិអាកាសធាតុ» ដ៏ស្រួចស្រាវ ដែលទាមទារឱ្យគ្រប់បណ្តាប្រទេសក្នុងតំបន់អាស៊ានទទួលស្គាល់ការពិត និងដាក់ចេញនូវភារកិច្ចពិសេសរៀងៗខ្លួនដើម្បីជម្នះវិបត្តិនេះ»។

លោក Eddy ក៏វាយតម្លៃខ្ពស់ចំពោះគំនិតផ្ដួចផ្ដើមរបស់សភាកម្ពុជាក្នុងការរៀបចំសន្និសីទស្ដីពីអភិបាលកិច្ចអាកាសធាតុនៅថ្ងៃនេះដោយថាជាវេទិកាដ៏មានតម្លៃក្នុងការបន្តកិច្ចសន្ទនា និងពង្រឹងកិច្ចសហប្រតិបត្តិការក្នុងតំបន់ទាំងលើការបន្ស៊ាំ និងការកាត់បន្ថយ ឥទ្ធិពលនៃវិបត្តិអាកាសធាតុជាសាកលនេះផងដែរ។

សូមជម្រាបថា សន្និសីទសភាជាតិស្តីពីអភិបាលកិច្ចអាកាសធាតុ មានការអញ្ជើញចូលរួមពីសមាជិក សមាជិកាព្រឹទ្ធសភា រដ្ឋសភា ដៃគូអភិវឌ្ឍន៍ស្ថាប័នស្រាវជ្រាវ គ្រឹះស្ថានឧត្តមសិក្សា និងថ្នាក់ដឹកនាំ និងមន្រ្តីជំនាញនៃអគ្គលេខាធិការដ្ឋានសភាទាំងពីរ ក្រោមកិច្ចសហការរៀបចំ និងឧបត្ថម្ភដោយអគ្គលេខាធិការដ្ឋានរដ្ឋសភា លេខាធិការដ្ឋានអាយប៉ា និងមូលនិធិប្រែប្រួលអាកាសធាតុ (Tara Climate Change) ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ appeared first on Kampuchea Thmey Daily.

តំណាងប្រតិភូអាយប៉ា៖ បញ្ហាអាកាសធាតុនៅតំបន់អាស៊ីអាគ្នេយ៍ឈានដល់ជា«វិបត្តិអាកាសធាតុ»

hun sirivadh — Tue, 26 May 2026 08:36:30 +0000

តំណាងសន្និបាតសភាអាស៊ានលោក Eddy Soeparno បានលើកឡើងថាបញ្ហាអាកាសធាតុនៅតំបន់អាស៊ីអាគ្នេយ៍បច្ចុប្បន្នបានឈានហួសពីពាក្យថា ការប្រែប្រួលអាកាសធាតុ ហើយបានក្លាយជា វិបត្តិអាកាសធាតុ ដ៏ស្រួចស្រាវដែលទាមទារឱ្យគ្រប់បណ្ដាប្រទេសក្នុងតំបន់អាស៊ានដាក់ចេញនូវវិធានការពិសេសរៀងខ្លួនដើម្បីជម្នះវិបត្តិនេះ។

លោក Eddy បានលើកឡើងបែបនេះនៅវិមានសភាកម្ពុជា ជាមួយប្រធានសភាកម្ពុជា សម្ដេចសភាធិបតី ឃួន សុដារី នៅព្រឹកថ្ងៃទី២៦ ខែឧសភា ឆ្នាំ២០២៦នេះ ដោយថា ប្រទេសក្នុងតំបន់អាស៊ានត្រូវទទួលស្គាល់ការពិតមួយនេះនិងមានភារកិច្ចពិសេសរៀងខ្លួនដើម្បីជម្នះបញ្ហា។ លោកបន្ថែមថាការផ្ដួចផ្ដើមរបស់រដ្ឋសភាកម្ពុជាក្នុងការរៀបចំសន្និសីទសភាជាតិស្ដីពីអភិបាលកិច្ចអាកាសធាតុនៅថ្ងៃនេះគឺជាវេទិកាដ៏មានតម្លៃក្នុងការបន្តកិច្ចសន្ទនា និងពង្រឹងកិច្ចសហប្រតិបត្តិការក្នុងតំបន់ទាំងលើការបន្សាំ និងការកាត់បន្ថយ ឥទ្ធិពលនៃវិបត្តិអាកាសធាតុជាសកលនេះផងដែរ។

រដ្ឋសភាកម្ពុជាបានរៀបចំសន្និសីទសភាជាតិស្ដីពីអភិបាលកិច្ចអាកាសធាតុនៅព្រឹកថ្ងៃអង្គារ៍នេះដោយមានការចូលរួមពីប្រតិភូសភានៃសមាជិកអាយប៉ា និងវាគ្មិនអន្តរជាតិជាច្រើនរូប។

ក្នុងជំនួបនោះព្រឹកនេះផងដែរ ប្រធានសភាកម្ពុជា សម្ដេចសភាធិបតី ឃួន សុដារី បានស្វាគមន៍ចំពោះវត្តមានរបស់ប្រតិភូទាំងអស់ដែលបានចូលរួមនៅពេលនេះ និងជំរុញដល់ប្រទេសក្នុងសហគមន៍អាស៊ានរួមគ្នាពង្រឹងយន្តការត្រួតពិនិត្យរបស់សភារាល់ការប្ដេជ្ញាចិត្តនានាពាក់ព័ន្ធនឹងអាកាសធាតុ ដើម្បីធានាថា រាល់ការសម្រេចចិត្ត មិនត្រឹមតែមានភាពស៊ីចង្វាក់គ្នាប៉ុណ្ណោះទេ ប៉ុន្តែថែមទាំងជួយឱ្យអភិបាលកិច្ចអាកាសធាតុក្នុងតំបន់អាស៊ានទាំងមូលកាន់តែមានសង្គតិភាព ភាពម៉ឺងម៉ាត់ និងស័ក្តិសិទ្ធិភាពខ្ពស់ ក្នុងការឆ្លើយតបទៅនឹងវិបត្តិសកលនេះ។

សម្ដេចបានអំពាវនាវដល់ស្ថាប័នសភានៃបណ្តាប្រទេសជាសមាជិកអាយប៉ាទាំងអស់ ឱ្យរួមគ្នាពង្រឹងតួនាទីស្នូលរបស់ខ្លួន ក្នុងការប្រែក្លាយការប្តេជ្ញាចិត្តផ្នែកបរិស្ថានឱ្យទៅជា «សកម្មភាពជាក់ស្តែង» ដោយឈរលើគោលការណ៍ «យកប្រជាជនជាស្នូល» និងការកសាងភាពជាដៃគូរវាងរដ្ឋ វិស័យឯកជន និងប្រជាពលរដ្ឋ ដើម្បីទប់ទល់នឹងការប្រែប្រួលអាកាសធាតុដែលកំពុងគំរាមកំហែងយ៉ាងធ្ងន់ធ្ងរដល់តំបន់អាស៊ីអាគ្នេយ៍៕

អត្ថបទដោយ ហ៊ុន សិរីវឌ្ឍន៍

The post តំណាងប្រតិភូអាយប៉ា៖ បញ្ហាអាកាសធាតុនៅតំបន់អាស៊ីអាគ្នេយ៍ឈានដល់ជា«វិបត្តិអាកាសធាតុ» appeared first on Kampuchea Thmey Daily.

តំណាងប្រធានាធិបតីអាសែប៊ៃហ្សង់ចែករំលែកបទពិសោធន៍ដោះស្រាយបញ្ហាព្រំដែនក្នុងជំនួបជាមួយប្រធានសភាកម្ពុជា

hun sirivadh — Wed, 13 May 2026 05:29:39 +0000

តំណាងប្រធានាធិបតីអាស៊ែបៃហ្សង់លោក Elchin Amirbayov បានចែកលែកពីបទពិសោធន៍ប្រទេសលោកមួយចំនួនក្នុងការដោះស្រាយដោយសន្តិវិធីលើបញ្ហាព្រំដែនជាមួយប្រទេសជិតខាង ក្នុងពេលលោកជួបជាមួយប្រធានសភាកម្ពុជាសម្ដេចសភាធិបតី ឃួន សុដារី នៅព្រឹកថ្ងៃទី១៣ ខែឧសភា ឆ្នាំ២០២៦នេះ។

អាស៊ែបៃហ្សង់ជាប្រទេសមួយនៅតំបន់អាស៊ីខាងលិចដែលមានជម្លោះព្រំដែនដ៏រ៉ាំរ៉ៃជាមួយប្រទេសអាមេនីអស់ជាច្រើនឆ្នាំមកហើយ។ យ៉ាងណាក្ដីក្រោយមានការសម្របសម្រួលពីអាមេរិកប្រទេសទាំងពីរសម្រេចបានកិច្ចព្រមព្រៀងសន្តិភាព និងអាចឈានដល់ការចុះហត្ថលេខាអនុវត្តន៍ពេញលេញនៅឆ្នាំ២០២៧ខាងមុខ។

នាយខុទ្ទកាល័យ និងជាអ្នកនាំពាក្យប្រធានសភា លោក កែវ ពិសិដ្ឋ បានឱ្យដឹងថាក្នុងជំនួបជាមួយប្រធានសភាព្រឹកនេះលោក Elchin បានថ្លែងថាបទពិសោធន៍របស់អាស៊ែប៉ៃហ្សង់ និងអាមេនីគឺប្រទេសទាំងពីរបានព្យាយាមក្នុងការធ្វើឱ្យមានការយល់ពីគ្នាលើប្រវត្តិសាស្ត្រ ការបញ្ចៀសនូវការយកប្រវត្តិសាស្ត្រធ្វើឱ្យមានភាពប្រេះស្រាំ និងការយកចលនាជាតិនិយមដើម្បីពង្រឹងភាពខ្លាំងរបស់ជាតិ។

លោកថា៖ «សន្តិភាពមួយដែលមាននិរន្តរភាពយូរអង្វែង។ ព្រោះសន្តិភាពដែលទទួលបាននេះមិនមែនជាសន្តិភាពដែលបានដោយងាយៗទេ ដោយគាត់ប្រឹងប្រែងខ្លួនឯងដូចដែលខ្ញុំបានលើកឡើងពីមុនចឹង។ គឺសន្តិភាពដែលមានកម្លាំងមានអំណាចយោធា មានអំណាចសេដ្ឋកិច្ច មានប្រជាជនខ្លួនឯងតែក្នុងហ្នឹងក៏ប្រទេសទាំងពីរមិនអាចប្រើអំណាចកម្លាំងដែលខ្លួនឯងមានហ្នឹងបន្តជំរុញធ្វើសង្គ្រាមបានទេ»។

ក្នុងជំនួបនោះផងដែរប្រធានសភា សម្ដេចសភាធិបតី ឃួន សុដារី ក៏បានលើកឡើងពីបញ្ហាព្រំដែនកម្ពុជា-ថៃផងដែរ ដោយថាកម្ពុជានៅតែប្ដេជ្ញាក្នុងការដោះស្រាយបញ្ហាដោយសន្តិវិធី ច្បាប់អន្តរជាតិ និងប្រព័ន្ធពហុភាគីនិយម។ ការសម្រេចរបស់ថៃដើរចេញពីយន្តការទ្វេភាគីលើតំបន់ត្រួតស៊ីគ្នាលើដែនសមុទ្រ ជាហេតុធ្វើឱ្យកម្ពុជាមិនមានជម្រើសអ្វីងាកទៅរកយន្តការពហុភាគី ច្បាប់អន្តរជាតិនោះទេ។

លោកElchin Amirbayov ក៏បានជម្រាបសម្ដេចប្រធានសភាផងដែរថាប្រទេសលោកឱ្យតម្លៃលើទំនាក់ទំនងដ៏ល្អជាមួយកម្ពុជាហើយនឹងជួយកម្ពុជាជានិច្ចប្រសិនជាមានតម្រូវការពីកម្ពុជា។

គួរឱ្យដឹងផងដែរថាកម្ពុជានិងអាស៊ែបៃហ្សង់មានទំនាក់ទំនងការទូតជាមួយគ្នាតាំងពីឆ្នាំ១៩៩៤ និងបានបង្កើនជាបន្តបន្ទាប់។ ក្នុងឆ្នាំ២០១៤ អតីតនាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានទៅធ្វើទស្សនកិច្ចនៅប្រទេសនេះដែលបានជំរុញទំនាក់ទំនងប្រទេសទាំងពីរកាន់តែកើនឡើងថែមទៀតចាប់តាំងពីពេលនោះមក៕

អត្ថបទដោយ ហ៊ុន សិរីវឌ្ឍន៍

The post តំណាងប្រធានាធិបតីអាសែប៊ៃហ្សង់ចែករំលែកបទពិសោធន៍ដោះស្រាយបញ្ហាព្រំដែនក្នុងជំនួបជាមួយប្រធានសភាកម្ពុជា appeared first on Kampuchea Thmey Daily.

សម្ដេច ឃួន សុដារី Archives - Kampuchea Thmey Daily

ប្រធានរដ្ឋសភាស្នើសិង្ហបុរីជួយបណ្តុះបណ្តាលបច្ចេកវិទ្យា និង AI ដល់មន្ត្រីរដ្ឋសភា

អ្នក​សម្របសម្រួល​ UN គាំទ្រ​កម្ពុជា​ដែល​ប្រើ​យន្ត​ការ​ផ្សះផ្សា​ដោយ​បង្ខំ​ជាមួយ​ថៃ​

តំណាង​ប្រតិភូ​អាយប៉ា៖ បញ្ហា​អាកាស​ធាតុ​នៅ​តំបន់​អាស៊ី​អាគ្នេយ៍​ឈាន​ដល់​ជា​«វិបត្តិ​អាកាសធាតុ»

អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ

តំណាងប្រតិភូអាយប៉ា៖ បញ្ហាអាកាសធាតុនៅតំបន់អាស៊ីអាគ្នេយ៍ឈានដល់ជា«វិបត្តិអាកាសធាតុ»