សហគ្រាសខេត្តកំពង់ចាម Archives - Kampuchea Thmey Daily

សេដ្ឋីកសិកម្មនៅស្រុកស្ទឹងត្រង់ គ្រោងបង្កើតរោងចក្រផលិតស្រោមដៃថែមទៀត បង្កើតការងាររាប់រយកន្លែង

Dy Bunnara — Mon, 23 Jun 2025 04:24:57 +0000

ក្រៅពីរោងចក្រផលិតជីសរីរាង្គ រោងចក្រផលិតកេសក្រដាស រោងចក្រកែច្នៃជ័រកៅស៊ូជាដើម ដែលកំពុងដំណើរការបង្កើតការងារដល់ពលរដ្ឋរាប់ពាន់កន្លែង សេដ្ឋីកសិកម្មនៅស្រុកស្ទឹងត្រង់ អ្នកឧកញ៉ា ហេង ឡុង គ្រោងនឹងបង្កើតរោងចក្រផលិតស្រោមដៃថែមទៀត ដោយប្រើប្រាស់វត្ថុធាតុដើមក្នុងស្រុក ដើម្បីបង្កើនតម្លៃសេដ្ឋកិច្ចក៏ដូចជាបង្កើតការងារបន្ថែមដល់ពលរដ្ឋក្នុងមូលដ្ឋាន។

អ្នកឧកញ៉ា ហេង ឡុង ប្រធានអគ្គនាយកក្រុមហ៊ុនចម្ការកៅស៊ូបឹងកេតនៅស្រុកស្ទឹងត្រង់ខេត្តកំពង់ចាម បានថ្លែងថា បច្ចុប្បន្នក្រុមហ៊ុនមានកម្មករប្រមាណ ៦ ពាន់ នាក់កំពុងបម្រើការងារនៅតាមខ្សែសង្វាក់រោងចក្រ និងនៅតាមចម្ការចេកនិងទុរេនរាប់ពាន់ហិកតា។

ដោយសារមើលឃើញសក្ដានុពលនៃផលកសិកម្មក្នុងស្រុក ក្រុមហ៊ុនគ្រោងបង្កើតរោងចក្រផលិតស្រោមដៃថែមទៀត ដែលអាចបង្កើតការងាររាប់រយកន្លែងដល់ពលរដ្ឋក្នុងស្រុក។

អ្នកឧកញ៉ា ហេង ឡុង បានបញ្ជាក់ថា ស្រុកស្ទឹងត្រង់ជាមូលដ្ឋានរបស់ក្រុមហ៊ុន ដែលកំពុងវិនិយោគដាំដុះដំណាំកសិកឧស្សាហកម្មលើផ្ទៃដីរាប់ពាន់ហិកតា។ ជាគោលដៅគឺក្រុមហ៊ុនចង់បង្កើតការងារឲ្យបានច្រើនសម្រាប់ពលរដ្ឋក្នុងតំបន់ ដើម្បីកាត់បន្ថយការធ្វើចំណាកស្រុកទៅធ្វើការនៅក្រៅប្រទេស។

នៅលើផ្ទៃដីវិនិយោគប្រមាណ ៧ ពាន់ហិកតា ក្រៅពីដាំដុះដំណាំកសិកម្ម ក្រុមហ៊ុន ឡុង ស្រេង ក៏បានវិនិយោគបង្កើតរោងចក្រកែច្នៃជ័រកៅស៊ូ រោងចក្រផលិតកេសក្រដាស និងថង់ផ្លាស្ទិកគ្រប់ប្រភេទ រោងចក្រផលិតជីសរីរាង្គ រោងចក្រវេចខ្ចប់ចេក រួមទាំងមន្ទីរពិសោធន៍ដំណាំកសិកម្ម។

លោក បាន ស្រេង អភិបាលស្រុកស្ទឹងត្រង់ ខេត្តកំពង់ចាមបានថ្លែងថា ស្រុកស្ទឹងត្រង់ជាស្រុកសក្ដានុពលកសិកម្មដ៏ធំមួយ ដែលកំពុងទទួលបានការវិនិយោគលើការដាំដុះដំណាំកសិឧស្សាហកម្មលើផ្ទៃដីរាប់ពាន់ហិកតា។

លោកថា បច្ចុប្បន្នក្រៅពីក្រុមហ៊ុន ឡុង ស្រេង ដែលកំពុងវិនិយោគលើការដាំដុះដំណាំកសិកម្មមានដូចជាកៅស៊ូ ចេក ទុរេន ស្វាយចន្ទី ក៏មានក្រុមហ៊ុនតូចធំជាច្រើនទៀតដែលកំពុងធ្វើអាជីវកម្មបង្កើតការងារដល់ពលរដ្ឋក្នុងស្រុក។

លោកមើលឃើញវត្តមានរបស់ក្រុមហ៊ុន ឡុង ស្រេង បានជួយអភិវឌ្ឍសេដ្ឋកិច្ចក្នុងមូលដ្ឋាន តាមរយៈការបង្កើតការងារសម្រាប់ពលរដ្ឋក្នុងស្រុក ដោយមិនចាំបាច់ចំណាកស្រុកទៅធ្វើការឆ្ងាយពីផ្ទះ។

បន្ថែមពីនេះ បើតាមលោកអភិបាលស្រុក ក្រុមហ៊ុនវិនិយោគកសិកម្មដ៏ធំ ក៏បានប្រកាសកំពុងត្រូវការកម្មកររាប់ពាន់នាក់ទៀត ដើម្បីបម្រើការងារនៅក្នុងរោងចក្រ និងនៅតាមចម្ការដាំដុះកសិកម្មរាប់ពាន់ហិកតាក្នុងស្រុកស្ទឹងត្រង់៕

The post សេដ្ឋីកសិកម្មនៅស្រុកស្ទឹងត្រង់ គ្រោងបង្កើតរោងចក្រផលិតស្រោមដៃថែមទៀត បង្កើតការងាររាប់រយកន្លែង appeared first on Kampuchea Thmey Daily.

ទុរេនស្រុកស្ទឹងត្រង់ មួយដើមអាចប្រមូលផលបានពី ៨០ គីឡូក្រាម ទៅ ១០០ គីឡូក្រាម

Dy Bunnara — Fri, 20 Jun 2025 04:08:44 +0000

ម្ចាស់ចម្ការទុរេនដ៏ធំមួយនៅស្រុកស្ទឹងត្រង់ ខេត្តកំពង់ចាមបានអះអាងថា ភូមិសាស្រ្តស្រុកស្ទឹងត្រង់ដែលជាតំបន់ខ្ពង់រាបដីក្រហម ការដាំដុះដំណាំទុរេនមួយដើមអាចផ្តល់ផលបានចន្លោះពី ៨០ គីឡូក្រាម ទៅ ១០០ គីឡូក្រាម។

លោក ស៊ីវ ថា ម្ចាស់ចម្ការទុរេននាគខៀវនៅស្រុកស្ទឹងត្រង់ ខេត្តកំពង់ចាមបានបញ្ជាក់ថា ដំណាំទុរេនចាយទុនច្រើនបន្តិចលើការដាំដុះនិងថែទាំ ប៉ុន្តែផ្តល់ផលចំណូលឆ្លើយតបការចំណាយ។

ផ្តល់បទសម្ភាសន៍ដល់ក្រុមអ្នកសារព័ត៌មាន ក្នុងឱកាសចុះទស្សនកិច្ចផ្សព្វផ្សាយពីសក្តានុពលកសិកម្មនៅស្រុកស្ទឹងត្រង់លោក ស៊ីវ ថា បានបញ្ជាក់ថា នៅស្រុកស្ទឹងត្រង់ លោកបានដាំដុះពូជទុរេន ៣ ប្រភេទលើផ្ទៃដីជាង ២០០ ហិកតា ក្នុងនោះមានពូជម៉ាន់ថង ម៉ូសាងឃីង និងប្លេកថន។ លោកអះអាងថា នៅស្រុកស្ទឹងត្រង់ដែលជាតំបន់ខ្ពស់រាបដីក្រហម ការដាំដុះទុរេនមួយដើមបើសិនមានការថែទាំដិតដល់ អាចផ្តល់ផលបានចន្លោះពី ៨០ ទៅ ១០០ គីឡូក្រាម។

ទិន្នផលទុរេនដែលកំពុងផ្តល់ផលលើផ្ទៃដីរាប់រយហិកតា ក្រៅពីសម្រាប់ផ្គត់ផ្គង់ទីផ្សារក្នុងស្រុក លោក ស៊ីវ ថា បានប្រាប់ថា ក៏មានគម្រោងក្នុងការនាំចេញទៅទីផ្សារក្រៅប្រទេសជាពិសេសទីផ្សារប្រទេសចិន ស្របពេលដែលលោកក៏កំពុងពិនិត្យលទ្ធភាពក្នុងការពង្រីកផ្ទៃដីដាំដុះបន្ថែមទៀត៕

The post ទុរេនស្រុកស្ទឹងត្រង់ មួយដើមអាចប្រមូលផលបានពី ៨០ គីឡូក្រាម ទៅ ១០០ គីឡូក្រាម appeared first on Kampuchea Thmey Daily.

សេដ្ឋីកសិកម្មដ៏លេចធ្លោនៅស្រុកស្ទឹងត្រង់ ជំរុញអ្នកមានលុយ បោះទុនវិនិយោគលើវិស័យកសិកម្ម

Dy Bunnara — Thu, 19 Jun 2025 03:14:37 +0000

អ្នកឧកញ៉ា ហេង ឡុង ប្រធានអគ្គនាយកក្រុមហ៊ុនចម្ការកៅស៊ូបឹងកេត បានជំរុញលើកទឹកចិត្តដល់អ្នកមានទ្រព្យធនក្នុងស្រុក ងាកមកវិនិយោគលើវិស័យកសិកម្ម ស្របភូមិសាស្ត្រប្រទេសកម្ពុជាមានភាពអំណោយផលសម្រាប់ការដាំដុះដំណាំកសិកម្មចម្រុះផ្សេងៗ។

ផ្តល់បទសម្ភាសន៍ដល់ក្រុមអ្នកសារព័ត៌មាន ដែលចុះទស្សនកិច្ចផ្សព្វផ្សាយពីសក្តានុពលកសិកម្មនៅស្រុកស្ទឹងត្រង់ ខេត្តកំពង់ចាម អ្នកឧកញ៉ា ហេង ឡុង បានថ្លែងថា ប្រទេសកម្ពុជាមានផ្ទៃដីធំទូលាយ ហើយសមស្របសម្រាប់ការធ្វើកសិកម្ម។ ស្របពេលដីក៏នៅថោក ជាឱកាសសម្រាប់អ្នកមានទ្រព្យធនអាចទម្លាក់លុយមកវិនិយោគលើវិស័យកសិកម្ម។

អ្នកជំនួយដែលប្រឡូកលើវិស័យកសិកម្មជាង ២០ ឆ្នាំដែលសាងកេរ្តិ៍ឈ្មោះល្បីនៅស្រុកស្ទឹងត្រង់ខេត្តកំពង់ចាមបានគូសបញ្ជាក់ថា ការធ្វើកសិកម្មត្រូវការទុន បច្ចេកទេសរួមទាំងឆន្ទៈ។ អ្នកឧកញ៉ាបានលើកឡើងការធ្វើកសិកម្មដូចអាវុធមុខពីរបើធ្វើត្រូវចំណេញ ហើយបើដើរខុសគឺខាតបង់។

ពាក់ព័ន្ធការធ្វើកសិកម្មនេះដែរ អ្នកជំនួញរូបនេះបង្ហើបថា លោកមិនដែលចូលរៀនសាលានោះទេ ប៉ុន្តែកើតចេញពីបទពិសោធន៍និងការចុះអនុវត្តជាក់ស្តែង។

លោកមើលឃើញសម័យនេះ ការធ្វើកសិកម្មមិនពិបាកដូចមុននោះទេ គ្រប់ពត៌មានមាននៅក្នុងដៃទាំងអស់។ យ៉ាងណាមិញ អ្នកជំនួយកសិកម្មរូបនេះប្រាប់ថា ដើម្បីធ្វើកសិកម្មសំខាន់ត្រូវត្រៀមទុន ដោយសារការធ្វើកសិកម្មត្រូវការចាយទុនធំ។ លោកលើកឡើងគ្រាន់តែដំណាំចេកមួយហិកតាត្រូវការចំណាយទុនពី ៣ ០០០ ទៅ ៣ ៥០០ ដុល្លារ ហើយប្រើប្រាស់កម្មករយ៉ាងហោចណាស់ ៣ នាក់។

បន្ថែមពីនេះ ការធ្វើកសិកម្មក៏ត្រូវចេះធ្វើពិពិធកម្មនៃការដាំដុះ។ ជាក់ស្ដែងលើដីកសិកម្មជាង ៧ ពាន់ហិកតា ដែលអ្នកឧកញ៉ាកំពុងវិនិយោគនៅស្រុកស្ទឹងត្រង់ មានដាំដុះដំណាំចម្រុះមុខមានចេកផង ទុរេនផង កៅស៊ូផង និងកំពុងបន្ថែមម្នាស់មួយមុខទៀត។

លោកប្រៀបធៀបការធ្វើដំណាំចម្រុះមុខដូចការដឹកជញ្ជូនពងមាន់ ត្រូវដាក់ឲ្យបានច្រើនកន្រ្តកដើម្បីបញ្ច្រៀសពេលជួបគ្រោះអាសន្ន។ បើចេកខាត បានទុរេនទប់ បើទុរេនខាត បានកៅស៊ូទប់ អីចឹងត្រូវលៃឲ្យបានច្រើនមុខ បើមុខណាមានបញ្ហាមានមុខផ្សេងអាចជួយស្រោចស្រង់បាន។

ក្រុមហ៊ុន ឡុង ស្រេង របស់អ្នកឧកញ៉ា ហេង ឡុង បានកំពុងវិនិយោគលើវិស័យកសិកម្មលើផ្ទៃដីទំហំជាង ៧ ពាន់ហិកតានៅស្រុកស្ទឹងត្រង់ ខេត្តកំពង់ចាម ដោយមានដាំដុះដំណាំកសិកម្មចម្រុះមានដូចជាកៅស៊ូ ចេកអំបូងលឿង ទុរេន និងកំពុងពង្រីកផ្ទៃដីដាំដុះម្នាស់បន្ថែមទៀត ដើម្បីនាំចេញទៅក្រៅប្រទេស។

នៅលើផ្ទៃដីវិនិយោគរាប់ពាន់ហិកតា ក្រៅពីដាំដុះដំណាំកសិកម្ម ក្រុមហ៊ុនក៏បានវិនិយោគបង្កើតរោងចក្រកែច្នៃជ័រកៅស៊ូ ក្រែប រោងចក្រផលិតកេសក្រដាស និងថង់ផ្លាស្ទិកគ្រប់ប្រភេទ រោងចក្រផលិតជីសរីរាង្គ រោងចក្រវេចខ្ចប់ចេក រួមទាំងមន្ទីរពិសោធន៍ដំណាំកសិកម្ម។

បើតាមអ្នកឧកញ៉ា ហេង ឡុង នៅពេលខាងមុខនេះ ក្រុមហ៊ុនក៏គ្រោងបង្កើតរោងចក្រផលិតស្រោមដៃថែមទៀត៕

The post សេដ្ឋីកសិកម្មដ៏លេចធ្លោនៅស្រុកស្ទឹងត្រង់ ជំរុញអ្នកមានលុយ បោះទុនវិនិយោគលើវិស័យកសិកម្ម appeared first on Kampuchea Thmey Daily.

ចេកអំបូងលឿងខ្មែរអាចនាំចេញដល់ជប៉ុន បញ្ជាក់ពីស្តង់ដាសុវត្ថិភាពខ្ពស់ អាចនាំចេញទៅគ្រប់ប្រទេស

Dy Bunnara — Wed, 18 Jun 2025 03:46:22 +0000

ចេកអំបូងលឿងខ្មែរដែលកំពុងដាំដុះលើផ្ទៃដីរាប់ពាន់ហិកតានៅក្នុងស្រុកស្ទឹងត្រង់ ខេត្តកំពង់ចាម ត្រូវបាននាំចេញទៅលក់នៅទីផ្សារក្រៅប្រទេសជាពិសេសទីផ្សារប្រទេសចិន និងជប៉ុន ដែលក្នុងមួយថ្ងៃមានចំនួនពី ៣ ទៅ ១០ កុងតឺន័រ។

ផ្តល់បទសម្ភាសន៍ដល់ក្រុមអ្នកសារព័ត៌មាន ក្នុងដំណើរទស្សនកិច្ចផ្សព្វផ្សាយពីសក្តដានុពលវិស័យកសិកម្មក្នុងខេត្តកំពង់ចាម អ្នកស្រី ហេង ដាវី ប្រធានគ្រប់គ្រងក្រុមហ៊ុន ឡុង ស្រេង ចម្ការចេកនៅក្នុងស្រុកស្ទឹងត្រង់បានគូសបញ្ជាក់ថា បច្ចុប្បន្នមានទីផ្សារប្រទេសធំពីរដែលក្រុមហ៊ុនបាននាំចេញមានទីផ្សារប្រទេសចិន និងជប៉ុន។

អ្នកស្រីបានលើកពីទីផ្សារប្រទេសជប៉ុន មុននាំចេញទៅបានមានការរិតបន្តឹងលើការអនុវត្តគោលការណ៍ស្តង់ដាសុវត្ថិភាពចំណីអាហារខ្ពស់បំផុត។ ដូច្នេះមានន័យថា ការដែលក្រុមហ៊ុនអាចនាំចេញចេកអំបូងលឿងទៅទីផ្សារប្រទេសជប៉ុនបាន ក៏អាចនាំចេញទៅគ្រប់ទីផ្សារប្រទេសផ្សេងទៀតនៅលើពិភពលោក។

ក្រុមហ៊ុន ឡុង ស្រេង ចម្ការចេក កំពុងវិនិយោគការដាំដុះចេកពូជអំបូងលឿងលើផ្ទៃដីប្រមាណ ២ ពាន់ហិកតានៅស្រុកស្ទឹងត្រង់ខេត្តកំពង់ចាម និងកំពុងពង្រីកការដាំដុះរាប់រយហិកតាថែមទៀត។

ពាក់ព័ន្ធការដាំដុះ និងខ្សែសង្វាក់ផលិតកម្មវេចខ្ចប់ ប្រធានគ្រប់គ្រងក្រុមហ៊ុន ឡុង ស្រេង ចម្ការចេក អ្នកស្រី ហេង ដាវី បានឲ្យដឹងថា ចេកអំបូងលឿងការដាំដុះត្រូវការរយៈពេលចំនួន ៩ ខែ ទើបអាចប្រមូលផលបាន ហើយការវេចខ្ចប់ក៏ឆ្លងកាត់ជាច្រើនដំណាក់កាលមុនបញ្ចេញលក់លើទីផ្សារ។

បើតាមអ្នកស្រី ហេង ដាវី ក្នុងមួយថ្ងៃក្រុមហ៊ុនត្រូវកាប់ចេកចេញពីចម្ការពី ៦ ទៅ ៧ ពាន់ស្និតដើម្បីវេចខ្ចប់នាំចេញ ដែលមួយថ្ងៃយ៉ាងហោចណាស់មានពី ៣ កុងតឺន័រ និងអាចឈានដល់ ១០ កុងតឺន័រនៅពេលមានតម្រូវការខ្ពស់ ដែលភាគច្រើននាំទៅទីផ្សារប្រទេសចិននិងជប៉ុន ខណៈទីផ្សារក្នុងស្រុកមានចំនួនតិចតួចបំផុត៕

The post ចេកអំបូងលឿងខ្មែរអាចនាំចេញដល់ជប៉ុន បញ្ជាក់ពីស្តង់ដាសុវត្ថិភាពខ្ពស់ អាចនាំចេញទៅគ្រប់ប្រទេស appeared first on Kampuchea Thmey Daily.

ពលរដ្ឋនៅស្រុកស្ទឹងត្រង់ សម្រុកដាំដុះដំណាំទុរេន បង្កើនពង្រីកផ្ទៃដីដាំដុះរាប់រយហិកតា

Dy Bunnara — Mon, 16 Jun 2025 11:05:19 +0000

ពលរដ្ឋក្នុងស្រុកស្ទឹងត្រែង ក្នុងខេត្តកំពង់ចាមបានបង្កើនផ្ទៃដីដាំដុះដំណាំទុរេន ស្របពេលដំំណាំសេដ្ឋកិច្ចដ៏សំខាន់នេះ បានក្លាយជាមុខព្រួយជំរុញការនាំចេញទៅក្រៅប្រទេស ក្រៅពីការផ្គត់ផ្គង់ទីផ្សារក្នុងស្រុក។

លោក បាន ស្រង អភិបាលស្រុកស្ទឹងត្រង់ ខេត្តកំពង់ចាមបានឲ្យដឹងថា បច្ចុប្បន្នទូទាំងស្រុកស្ទឹងត្រង់ មានផ្ទៃដីដាំដុះដំណាំទុរេនប្រមាណជាង ២ ពាន់ហិកតា ខណៈឆ្នាំក្រោយគ្រោងពង្រីកផ្ទៃដីដាំដុះបន្ថែមទៀតរហូតដល់ ២៥០០ ហិកតា។

ខណៈកៅស៊ូជាដំណាំយុទ្ធសាស្ត្រដ៏សំខាន់ពីមុនមក បច្ចុប្បន្នដំណាំទុរេនបានក្លាយជាដំណាំសេដ្ឋកិច្ចដ៏មានសក្តានុពលថ្មីរបស់ពលរដ្ឋនៅស្រុកស្ទឹងត្រង់ ស្របពេលស្រុកស្ទឹងត្រង់មានភូមិសាស្រ្តអំណោយផលក្នុងការដាំដុះដំណំាលើតំបន់ខ្ពង់រាបដ៏ក្រហមនេះ។

អ្នកស្រី ផាត ផាន់នី កសិកររស់នៅភូមិបែកអន្លូង ស្រុកស្ទឹងត្រង់ដែលបានដាំដុះដំណាំទូរេនលើផ្ទៃដីជាង ៤ ហិកតាបានឲ្យដឹងថា ដំណាំទុរេនដែលអ្នកស្រីដាំឆ្នាំនេះប្រមូលផលបានច្រើនជាងឆ្នាំមុន។ យ៉ាងណាមិញ តម្លៃហាក់មានការធ្លាក់ចុះបន្តិចបើធៀបឆ្នាំមុន។

ក្នុងការសាកសួររបស់ក្រុមអ្នកសារព័ត៌មានដែលធ្វើដំណើរទៅដល់ទីតាំងចម្ការទុរេនផ្ទាល់ អ្នកស្រី ផាត ផាន់នី បានបង្ហើបពីចំណូលពីការប្រមូលផលទុរេនក្នុងមួយឆ្នាំៗបានប្រមាណជាង ១០ ម៉ឺនដុល្លារ ដែលអាចនិយាយបានថាជាដំណាំដែលអាចកើបចំណូលបានក្រាស់ក្រែងបើធៀបដំណាំកសិកម្មផ្សេងទៀត។

ដោយសារមើលឃើញពីតម្លៃសេដ្ឋកិច្ចខ្ពស់ អ្នកស្រីគ្រោងពង្រីកផ្ទៃដីដាំដុះបន្ថែមប្រមាណ ៨ ហិកតានៅឆ្នាំក្រោយ។

មិនខុសគ្នានេះដែរ លោក ស៊ីវ ថា ម្ចាស់ចម្ការទុរេនដ៏ធំដែលបានវិនិយោគដាំដុះដំណាំទុរេនលើផ្ទៃដីរាប់សិបហិកតានៅស្រុកស្ទឹងត្រង់បានឲ្យដឹងថា ដំណាំទុរេនចាយទុនច្រើនបន្តិច ប៉ុន្តែទទួលបានផលនិងចំណូលឆ្លើយតបការចំណាយ។

លោកលើកទឹកចិត្តដល់ពលរដ្ឋដែលមានលទ្ធភាពគួរងាកមកដាំដុះដំណាំទុរេន ស្របពេលដែលរដ្ឋាភិបាលក៏កំពុងជំរុញការនាំចេញស្តេចផ្លែឈើនេះទៅក្រៅប្រទេសជាពិសេសទីផ្សារប្រទេសចិន។

លោក ពុយ គា ប្រធានក្លិបអ្នកកាសែតកម្ពុជាដែលបានដឹកនាំក្រុមអ្នកសារព័ត៌មានប្រមាណជាង ២០ ស្ថាប័នចុះផ្សព្វផ្សាយពីសក្ដានុពលវិស័យកសិកម្មក្នុងខេត្តកំពង់ចាមបានថ្លែងថា តាមព័ត៌មានដែលលោកទទួលបាននៅរដូវប្រមូលផលទុរេនឆ្នាំនេះ ខេត្តកំពង់ចាមទទួលបានទេសចរមកកម្សាន្តរហូតដល់ស្ទះចរាចរណ៍។

លោកបានរំលឹកពីប្រវត្តិខេត្តកំពង់ចាមដែលក្រៅពីល្បីដំណាំកៅស៊ូជាយូរមកហើយនោះ ឥលូវនេះពលរដ្ឋចាប់ផ្ដើមស្គាល់ខេត្តជាប់ដងទន្លេមួយនេះតាមរយៈដំណាំទុរេនដ៏មានតម្លៃសម្រាប់សេដ្ឋកិច្ច។

លោកមើលឃើញថា ដំណាំទុរេនជាដំណាំដែលនឹងអាចទ្រទ្រង់ដល់ការអភិវឌ្ឍសេដ្ឋកិច្ចសម្រាប់ពលរដ្ឋក្នុងមូលដ្ឋាន និងអាចជាគោលដៅទេសចរណ៍ថ្មីបន្ថែមទៀតនៅរដូវទុរេន សម្រាប់ទាក់ទាញទេសចរមកកម្សាន្ត៕

The post ពលរដ្ឋនៅស្រុកស្ទឹងត្រង់ សម្រុកដាំដុះដំណាំទុរេន បង្កើនពង្រីកផ្ទៃដីដាំដុះរាប់រយហិកតា appeared first on Kampuchea Thmey Daily.

ក្រុមហ៊ុនកសិកម្មដ៏ធំប្រចាំនៅស្រុកស្ទឹងត្រង់ ត្រូវការកម្មករបន្ថែមជាង ១ ០០០ នាក់ មួយថ្ងៃទទួលបានប្រាក់ពលកម្មពី ១៣ ដុល្លារដល់ ២០ ដុល្លារ

Dy Bunnara — Mon, 16 Jun 2025 05:01:29 +0000

បើតាមការបញ្ជាក់ដល់ក្រុមអ្នកសារព័ត៌មានដែលចុះបេសកកម្មផ្សព្វផ្សាយទ្រង់ទ្រាយធំអំពីសក្តានុពលកសិកម្មនៅខេត្តកំពង់ចាម ក្រុមហ៊ុនចម្ការកៅស៊ូបឹងកេតកំពុងត្រូវការកម្លាំងពលកម្មប្រមាណ ១ ០០០ នាក់បន្ថែមទៀត ដើម្បីបម្រើការងារតាមខ្សែសង្វាក់ផលិតកម្មនៅក្នុងក្រុមហ៊ុន។

អ្នកឧកញ៉ា ហេង ឡុង ប្រធានអគ្គនាយកក្រហ៊ុនចម្ការកៅស៊ូ បឹងកេត បានបញ្ជាក់ថា ឥលូវនេះក្រុមហ៊ុនកំពុងខ្វះកម្មករប្រមាណ ១ ០០០ នាក់ទៀត ដើម្បីបម្រើក្នុងខ្សែសង្វាក់ផលិតកម្មតាមផ្នែកជាច្រើនក្នុងនោះមានរោងចក្រកែច្នៃជ័រកៅស៊ូ រោងចក្រផលិតក្រដាស រោងចក្រផលិតជី ទាំងកម្លាំងពលកម្មបម្រើការងារនៅចម្ការចេក និងទុរេនរាប់ពាន់ហិកតា។

ខណៈក្រុមហ៊ុនមានកម្មករកំពុងបម្រើការងារជាង ៥ ពាន់នាក់ អ្នកឧកញ៉ា ហេង ឡុង បានបង្ហើបថា ក្រុមហ៊ុនកំពុងតម្រូវការកម្លាំងពលកម្មជាច្រើនពាន់នាក់ទៀត ដើម្បីបំពេញខ្សែសង្វាក់ផលិតកម្ម ដែលទទួលបានប្រាក់ឈ្នួលប្រចាំថ្ងៃចាប់ពី ១៣ ដុល្លារ ដល់ ២០ ដុល្លារទៅតាមសមត្ថភាពនិងជំនាញ៕

The post ក្រុមហ៊ុនកសិកម្មដ៏ធំប្រចាំនៅស្រុកស្ទឹងត្រង់ ត្រូវការកម្មករបន្ថែមជាង ១ ០០០ នាក់ មួយថ្ងៃទទួលបានប្រាក់ពលកម្មពី ១៣ ដុល្លារដល់ ២០ ដុល្លារ appeared first on Kampuchea Thmey Daily.

រដ្ឋមន្ត្រី ជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្ម ខណៈរដ្ឋាភិបាលអនុគ្រោះថ្លៃអគ្គិសនី

deth leng — Tue, 27 Aug 2024 09:32:57 +0000

លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្មដែលនឹងទទួលបានការអនុគ្រោះថ្លៃអគ្គិសនី។

លោក កែវ រតនៈ លើកឡើងក្នុងពេល ចុះពិនិត្យសង្វាក់ផលិតកម្មដំណាំចេក និងជួបសំណេះសំណាលជាមួយបុគ្គលិក កម្មករ ក្រុមហ៊ុន «ឡុងស្រេង» ស្ថិតនៅក្នុងឃុំបឹងកេត ស្រុកស្ទឹងត្រង់ ខេត្តកំពង់ចាមនៅថ្ងៃទី ២៧ ខែសីហា ឆ្នាំ ២០២៤។

លោករដ្ឋមន្ត្រីបានឱ្យដឹងថា ចេករបស់ខេត្តកំពង់ចាមត្រូវបាននាំចេញទៅប្រទេសជប៉ុន និងចិនដោយមានការពេញនិយមជាខ្លាំង។ ក្រុមហ៊ុន «ឡុងស្រេង» របស់អ្នកឧកញ៉ា ហេង ឡុង បានផ្តល់ការងារដោយផ្ទាល់ចំនួនជាង ៧០០០កន្លែង ដោយគិតជាប្រាក់ខែជាង ២,៦ លានដុល្លារ ដែលជាការជួយសេដ្ឋកិច្ចបងប្អូនអ្នកស្រុកយ៉ាងច្រើន។

លោករដ្ឋមន្ត្រីបញ្ជាក់ថា៖ «រាជរដ្ឋាភិបាលគាំទ្រផ្នែកទីផ្សារផង និងផ្តល់អគ្គិសនីបៃតងក្នុងអត្រាពិសេសក្នុងផ្នែកកសិកម្មដែលត្រឹម ៤៨០៛ ក្នុង១គីឡូវ៉ាត់ម៉ោង»។

ជាមួយគ្នានោះលោក កែវ រតនៈ ក៏បានជំរុញឱ្យក្រុមហ៊ុនបន្តពង្រីកអាជីវកម្មដើម្បីជួយបង្កើតការងារថ្មីៗ និងអំពាវនាវអ្នកមានទុនឯទៀតជួយវិនិយោគក្នុងវិស័យកសិកម្មដែលនឹងទទួលបានអគ្គិសនីថ្លៃអនុគ្រោះជាពិសេស៕

The post រដ្ឋមន្ត្រី ជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្ម ខណៈរដ្ឋាភិបាលអនុគ្រោះថ្លៃអគ្គិសនី appeared first on Kampuchea Thmey Daily.

ប្រធានសហគមន៍ត្រុំស្រុកកងមាស ចង់ឲ្យពលរដ្ឋក្នុងនិងក្រៅប្រទេស ជួយគាំទ្រផលិតស្នាដៃខ្មែរ

Dy Bunnara — Thu, 13 Jun 2024 10:15:52 +0000

ប្រធានសហគមន៍ត្រុំក្នុងស្រុកកងមាស ខេត្តកំពង់ចាម ចង់ឲ្យពលរដ្ឋក្នុងនិងក្រៅប្រទេសជួយគាំទ្រផលិតស្នាដៃខ្មែរ ដេីម្បីរក្សាវប្បធម៍ប្រពៃណីផង និងជួយបង្កេីមប្រាក់ចំណូលរបស់អ្នកភូមិនៅតំបន់នេះឲ្យកាន់ល្អប្រសេីរផង។

សហគមន៍ត្រុំអង្គរ ត្រូវបានបង្កេីតឡេីងដេីម្បីអភិរក្សជំនាញផលិតត្រុំជាលក្ខណៈប្រពៃណីរបស់អ្នកស្រុក ខណៈដំណាំត្រុំសព្វថ្ងៃមិនសូវមានអ្នកដាំឡេីយ។

បេីតាមការបញ្ជាក់ លោកស្រី ធុច សោភ័ណ្ឌ ជាប្រធានសហគមន៍ត្រុំអង្គរបាន ស្រុកកងមាស ខេត្តកំពង់ចាម បានប្រាប់ឲ្យដឹងថា ចំការត្រុំនៅក្នុងឃុំអង្គរបាន មានអ្នកដាំដុះតែ ២ ទៅ ៣ គ្រួសារតែប៉ុណ្ណោះ ដោយសារផលិតផលត្រុំមិនមានទីផ្សារ។

លោកស្រីបន្ថែមទៀតថា ផលិតត្រុំគេយកទៅច្នៃធ្វេីធម្មជាតិ ដេីម្បីជ្រលក់ជាមួយសសៃរសូត្រនិងអំបោះ ដែលអ្នកភូមិយកទៅត្បាញ់ជាក្រមា។

ប្រធានសហគមន៍ត្រុំអង្គរបាន លោកស្រី ធុច សោភ័ណ្ឌ អំពាវនាវចង់បងប្អូនប្រជាពលរដ្ឋក្នុងប្រទេស និងក្រៅប្រទេស ជួយគាំទ្រផលិតផលខ្មែរស្នាដៃកូនខ្មែរផង ពោលគឺចូលរួមចំណែកលេីកស្ទួយកំរិតអាជីវភាពអ្នកមួយនេះឲ្យកាន់តែធូធារផង និងចូលរួមអភិរក្សថែរក្សាវប្បធម៍ប្រពៃណីខ្មែរផង។

សហគមន៍ត្រុំអង្គរបាននេះ មានទីតាំងស្ថិតក្នុងភូមិទី ៧ ឃុំអង្គរបាន ស្រុកកងមាស ដែលសព្វថ្ងៃសហគមន៍មួយផលិតត្រុំផង និងធ្វេីតម្បាញ់ក្រមា ដោយចងក្រងអ្នកភូមិជាក្រុម ដេីម្បីជួយបង្កេីនប្រាក់ចំណូលដល់អ្នកភូមិ និងជួយថែរក្សាប្រពៃណីខ្មែរឲ្យកូនចៅជំនាន់ក្រោយស្គាល់ផង៕

អត្ថបទ៖ ឡេក ចាន់ពេជ្រ

The post ប្រធានសហគមន៍ត្រុំស្រុកកងមាស ចង់ឲ្យពលរដ្ឋក្នុងនិងក្រៅប្រទេស ជួយគាំទ្រផលិតស្នាដៃខ្មែរ appeared first on Kampuchea Thmey Daily.

សហគ្រាសខេត្តកំពង់ចាម Archives - Kampuchea Thmey Daily

ទុរេន​ស្រុកស្ទឹងត្រង់​ ​មួយ​ដើម​អាច​​​ប្រមូល​ផល​បាន​ពី​ ៨០ គីឡូក្រាម ទៅ ១០០ គីឡូក្រាម

សេដ្ឋី​កសិកម្ម​ដ៏​លេច​ធ្លោ​នៅ​ស្រុក​ស្ទឹងត្រង់​ ជំរុញអ្នកមាន​លុយ​ បោះ​ទុន​វិនិយោគ​លើ​វិស័យ​កសិកម្ម​

ពលរដ្ឋ​នៅ​ស្រុក​ស្ទឹងត្រង់​ សម្រុក​ដាំដុះ​ដំណាំ​ទុរេន បង្កើន​ពង្រីក​ផ្ទៃដី​ដាំ​ដុះ​​រាប់​រយ​ហិកតា

រដ្ឋមន្ត្រី ជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្ម ខណៈរដ្ឋាភិបាលអនុ​គ្រោះ​ថ្លៃអគ្គិសនី

ប្រធានសហគមន៍ត្រុំស្រុកកងមាស​ ចង់ឲ្យពលរដ្ឋក្នុង​និងក្រៅប្រទេស​ ជួយគាំទ្រផលិតស្នាដៃខ្មែរ​

ទុរេនស្រុកស្ទឹងត្រង់ មួយដើមអាចប្រមូលផលបានពី ៨០ គីឡូក្រាម ទៅ ១០០ គីឡូក្រាម

សេដ្ឋីកសិកម្មដ៏លេចធ្លោនៅស្រុកស្ទឹងត្រង់ ជំរុញអ្នកមានលុយ បោះទុនវិនិយោគលើវិស័យកសិកម្ម

ពលរដ្ឋនៅស្រុកស្ទឹងត្រង់ សម្រុកដាំដុះដំណាំទុរេន បង្កើនពង្រីកផ្ទៃដីដាំដុះរាប់រយហិកតា

រដ្ឋមន្ត្រី ជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្ម ខណៈរដ្ឋាភិបាលអនុគ្រោះថ្លៃអគ្គិសនី

ប្រធានសហគមន៍ត្រុំស្រុកកងមាស ចង់ឲ្យពលរដ្ឋក្នុងនិងក្រៅប្រទេស ជួយគាំទ្រផលិតស្នាដៃខ្មែរ