រដ្ឋមន្ត្រី ជំរុញឱ្យក្រុមហ៊ុនដាក់ទុនវិនិយោគក្នុងវិស័យកសិកម្ម ខណៈរដ្ឋាភិបាលអនុ​គ្រោះ​ថ្លៃអគ្គិសនី

លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានជំរុញឱ្យក្រុមហ៊ុនដាក់​ទុនវិនិយោគក្នុងវិស័យកសិកម្មដែលនឹងទទួលបានការអនុគ្រោះថ្លៃអគ្គិសនី។

លោក កែវ រតនៈ លើកឡើងក្នុងពេល ចុះពិនិត្យសង្វាក់ផលិតកម្មដំណាំចេក និងជួបសំណេះសំណាលជាមួយបុគ្គលិក កម្មករ ក្រុមហ៊ុន «ឡុងស្រេង» ស្ថិតនៅក្នុងឃុំបឹងកេត ស្រុកស្ទឹងត្រង់ ខេត្តកំពង់ចាមនៅថ្ងៃទី ២៧ ខែសីហា ឆ្នាំ ២០២៤។

លោករដ្ឋមន្ត្រីបានឱ្យដឹងថា ចេករបស់ខេត្តកំពង់ចាមត្រូវបាននាំចេញទៅប្រទេសជប៉ុន និងចិនដោយមានការពេញនិយមជាខ្លាំង។ ក្រុមហ៊ុន «ឡុងស្រេង» របស់អ្នកឧកញ៉ា ហេង ឡុង បានផ្តល់ការងារដោយផ្ទាល់ចំនួនជាង ៧០០០កន្លែង ដោយគិតជាប្រាក់ខែជាង ២,៦ លានដុល្លារ ដែលជាការជួយសេដ្ឋកិច្ចបងប្អូនអ្នកស្រុកយ៉ាងច្រើន។

លោករដ្ឋមន្ត្រីបញ្ជាក់ថា៖ «រាជរដ្ឋាភិបាលគាំទ្រផ្នែកទីផ្សារផង និងផ្តល់អគ្គិសនីបៃតងក្នុងអត្រាពិសេសក្នុងផ្នែកកសិកម្មដែលត្រឹម ៤៨០៛ ក្នុង១គីឡូវ៉ាត់ម៉ោង»។

ជាមួយគ្នានោះលោក កែវ រតនៈ ក៏បានជំរុញឱ្យក្រុមហ៊ុនបន្តពង្រីកអាជីវកម្មដើម្បីជួយបង្កើតការងារថ្មីៗ និងអំពាវនាវអ្នកមានទុនឯទៀតជួយវិនិយោគក្នុងវិស័យកសិកម្មដែលនឹងទទួលបានអគ្គិសនីថ្លៃអនុគ្រោះជាពិសេស៕