នេះ​ជា​ការ​លើក​ឡើង​របស់​លោក ស៊ីយ៉េដ យូសាហ្វ ក្នុង​ជំនួប​​ជាមួយ​ប្រធាន​រដ្ឋសភា​កម្ពុជា​ សម្ដេច​សភាធិបតី ឃួន សុដារី នៅ​វិមាន​រដ្ឋសភា​ព្រឹក​ថ្ងៃ​ទី​៤ ខែ​កុម្ភៈ ឆ្នាំ​២០២៦​នេះ ដោយ​លោក​ ស៊ីយ៉េដ យូសាហ្វ ថា​ជា​ការ​ឆ្លើយ​តប​នឹង​សំណើ​របស់​ប្រធាន​ព្រឹទ្ធសភា​កម្ពុជា​សម្ដេច​តេជោ ហ៊ុន សែន។

ប្រទេស​កម្ពុជា​ជា​ប្រទេស​កាន់​ព្រះពុទ្ធសាសនា​ធំ​មួយ​ដោយ​ភាគច្រើន​នៃ​ពលរដ្ឋ​កាន់​សាសនា​នេះ។ រដ្ឋធម្មនុញ្ញ​កម្ពុជា​មាត្រា​៤៣ កថាខណ្ឌទី៣​ក៏​បាន​ចែង​ផង​ដែរ​ថា «ព្រះពុទ្ធសាសនា​ជា​សាសនា​របស់​រដ្ឋ»។ យ៉ាង​ណា​ក្ដី​ការ​ចូល​ជា​សមាជិក​អង្គការ​ឥស្លាម​នេះ​មិន​ប៉ះពាល់​ដល់​ពុទ្ធសាសនា​នៅ​កម្ពុជា​ទេ​នេះ​បើ​តាម​ប្រធាន​ខុទ្ទកាល័យ​​សម្ដេច​ប្រធាន​សភា លោក កែវ ពិសិដ្ឋ។

លោក​ កែវ ពិសិដ្ឋ បាន​បញ្ជាក់​ក្នុង​សន្និសីទ​សារព័ត៌មាន​នៅ​ព្រឹក​ថ្ងៃ​ទី​៤​នេះ​ ថា​ការ​ចូលរួម​នេះ​គឺ​បង្ហាញ​ពី​ការ​ប្រកាន់​យក​សុខដុមនីយកម្ម​នៃ​សាសនា​នៅ​កម្ពុជា និង​ដើម្បី​គាំទ្រ​ដល់​អ្នក​កាន់​សាសនា​ឥស្លាម​នៅ​កម្ពុជា​ចូលរួម​ព្រឹត្តិការណ៍​អន្តរជាតិ ឬ​បណ្ដាញ​អន្តរជាតិ​ឥស្លាម​ឱ្យ​កាន់​តែ​ស៊ីជម្រៅ​ផង​ដែរ។

លោក​ថា៖ «បើ​គិត​ពី​ចំនួន​នៃ​ប្រជាពលរដ្ឋ​បងប្អូន​​យើង​កាន់​សាសនា​ឥស្លាម​ហ្នឹង​គឺ​ជា​ចំនួន​ដ៏​ធំ​មួយ​។ តែ​មិន​មែន​មាន​ន័យ​ថា​ការ​ធ្វើ​ការ​ចូល​រួម​នេះ​វា​ប្រឆាំង​នឹង​រដ្ឋធម្មនុញ្ញ​ទេ​ គឺ​រដ្ឋធម្មនុញ្ញ​យើង​គឺ​បាន​បើក​សេរី​ភាព​ដល់​ប្រជាជន​ទាំង​អស់​ក្នុង​ការ​កាន់​សាសនា​រៀង​ៗ​ខ្លួន​ »។

​យោង​តាម​គេហទំព័រ​របស់​អង្គការ​សហប្រតិបត្តិការ​ឥស្លាម (OIC) អង្គការ​នេះ​គឺ​ជា​អង្គការ​អន្តររដ្ឋាភិបាល​ធំ​ទីពីរ​នៅ​លើ​ពិភពលោក បន្ទាប់​ពី​អង្គការ​សហ​ប្រជាជាតិ​។ ​OIC ត្រូវ​បាន​បង្កើត​ឡើង​ក្នុង​ឆ្នាំ​១៩៦៩ ដើម្បី​ការពារ​ជន​មូស្លីម​ និង​ការពារ​ផល​ប្រយោជន៍​នៃ​ពិភព​មូស្លីម​ ក្នុង​ស្មារតី​លើកកម្ពស់​សន្តិភាព​អន្តរជាតិ​ និង​ភាព​សុខដុមរមនា​ក្នុង​ចំណោម​ប្រជាជន​ផ្សេងៗ​នៃពិភពលោក។​ អង្គការ​នេះ​មាន​រដ្ឋ​សមាជិក​ចំនួន ៥៧។ បើ​ទោះ​បី​ជា​អង្គការ​សហប្រតិបត្តិការ​ឥស្លាម​ក្ដី​តែ​ក៏​មាន​សមាជិក​មួយ​ចំនួន​មិនមែន​ឥស្លាម​ផង​ដែរ​ដូច​ជា ហ្គីយ៉ាន ស៊ូរីណាម អ៊ូហ្គង់ដា កាបុង និង​បេណាំង ដោយ​ឡែក​ប្រទេស​ រុស្ស៊ី និង​ថៃ​ ក៏​ជា​អ្នក​សង្កេត​ការណ៍​នៃ​អង្គការ​មួយ​នេះ​ដែរ​៕

អត្ថបទ​ដោយ ហ៊ុន សិរីវឌ្ឍន៍ ​​​​

The post ប៉ាគីស្ថាន​ស្វាគមន៍​កម្ពុជា​ចូល​រួម​ជា​សមាជិក​អង្គការ​ឥស្លាម appeared first on Kampuchea Thmey Daily.

សម្ដេច ហ៊ុុន ម៉ាណែត សង្កត់ធ្ងន់ដូច្នេះ៖«ការប្រះស្រាំ រើសអើងជាតិសាសន៍ នឹងអាចបង្កើតនូវជម្លោះជាតិសាសន៍ ហើយអាចបាត់បង់នូវមួយផ្នែកនៃសន្តិភាព និងស្ថិរភាពសង្គម។ ដូច្នេះកម្ពុជា ដែលទទួលបាននូវសុខដុមនីយកម្មជាតិសាសន៍ និងសាសនា គឺជាសម្បតិ្តដែលត្រូវថែទាំឱ្យបានគង់វង្ស»។

ពីពិធីដដែល សម្ដេចនាយករដ្ឋមន្ត្រី ឱ្យថ្នាក់ដឹកនាំខ្មែរឥស្លាម និងសាសនិកឥស្លាមទាំងអស់ ត្រូវបន្តសហការប្រកប​ដោយសាមគ្គីភាព និងមិត្តភាពព្រមទាំងមានទំនាក់ទំនងល្អ ជាមួយសហគមន៍ សាសនាដទៃទៀត ទាំងក្នុងថ្នាក់ជាតិ-អន្តរជាតិ ដោយឈរលើគោលការណ៍ សុខដុមនីយកម្មជាតិសាសន៍ និងសាសនា។

សម្ដេច ហ៊ុន ម៉ាណែត ក៏ឱ្យសហគមន៍ខ្មែរឥស្លាម បន្តសហប្រតិបត្តិការកម្រិតជាតិ-អន្តរជាតិ ដើម្បីកៀរគរថវិកា និងបច្ចេកទេសសម្រាប់គាំទ្រដល់សកម្មភាពអភិវឌ្ឍសហគមន៍ខ្មែរឥស្លាម ​ដើម្បីចៀសវាងការយកសាសនាសម្រាប់ធ្វើអាជីវកម្ម បង្កើតបញ្ហាមិនល្អ បែកបាក់សាមគ្គី និង ភាពជ្រុលនិយមក្នុងសហគមន៍។

សម្ដេចធិបតីប្រមុខរាជរដ្ឋាភិបាល បន្តរៀបចំដឹកនាំកិច្ចការសាសនា ក្នុងសហគមន៍ខ្មែរឥស្លាម តាមរយៈ កិច្ចសហការយ៉ាងជិតស្និទ្ធជាមួយក្រសួងធម្មការ និងសាសនា និងអាជ្ញាធរមាន សមត្ថកិច្ចតាមលំដាប់ថ្នាក់។

យ៉ាងណា សម្ដេចធិបតី ហ៊ុន ម៉ាណែត ក៏បានអះអាងថា កម្ពុជា ពិតជាមានមោទនចំពោះប្រជាពលរដ្ឋរបស់ខ្លួនដែលគោរពកាន់សាសនាផ្សេងៗគ្នា ប៉ុន្តែមានសាមគ្គីគ្នាយ៉ាងល្អ ដែលការណ៍នេះមិនត្រឹមតែជាមោទនភាពរបស់កម្ពុជានោះទេ តែជាមោទនភាពសម្រាប់ប្រទេសនៅក្នុងតំបន់ និងពិភពលោកផងដែរ។ សម្ដេចអះអាងបែបនេះ ដោយភ្ជាប់ទៅការកោតសរសើរពីសំណាក់ប្រទេសជាច្រើន ចំពោះសុខដុមនីយកម្មសាសនានៅកម្ពុជា តាមរយៈគោលនយោបាយដ៏ត្រឹមត្រូវរបស់រដ្ឋាភិបាលកម្ពុជា ដែលមានកិច្ចសហប្រតិបត្តិការងារល្អជាមួយគ្រប់ស្ថាប័ន អង្គភាព និងភាគីពាក់ព័ន្ធ ដើម្បីធ្វើឱ្យមានប្រសិទ្ធភាពខ្ពស់លើការងារ និងបង្កភាពងាយស្រួលដល់ប្រជាពលរដ្ឋគ្រប់សាសនិកនៅកម្ពុជា ទាំងបច្ចុប្បន្ន និងទៅអនាគត៕​

ដោយ៖ ង៉ិល ណារ៉ាត់

The post សម្ដេចធិបតី៖ ការរើសអើងជាតិសាសន៍ នឹងអាចបង្កើតជម្លោះជាតិសាសន៍ រហូតផ្ទុះសង្គ្រាម appeared first on Kampuchea Thmey Daily.

ឆ្លៀតក្នុងឱកាសនេះ សម្តេចធិបតី បានផ្ញើសារតាមរយៈបណ្តាញសង្គម ជូននូវក្តីនឹករឭក និងអរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមបន្តថែរក្សាសុខសន្តិភាព សុខដុមនីយកម្មជាតិសាសន៍ និងសាសនា ហើយមានជំនឿជឿជាក់លើការដឹកនាំរបស់សម្តេច, របស់សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សប្រជាជនកម្ពុជា តាំងពីដើមតរៀងមក រួមជាមួយនឹងប្រជាជនកម្ពុជា។

សម្តេចធិបតី គូសរំលេចថា ការរក្សាភាពសុខដុមរមនាពូជសាសន៍ និងសាសនានេះ គឺជាឌីអេនអេ (DNA) របស់គណបក្សប្រជាជន ហើយនឹងប្រកាន់ខ្ជាប់នូវគោលការណ៍នេះជានិច្ច ។

សម្តេចធិបតី បញ្ជាក់ថា៖«ដោយបន្តពីរាជរដ្ឋាភិបាលនីតិកាលមុន និង ដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះកិច្ចប្រណិប័តន៍ជំនឿរបស់បងប្អូនម៉ូស្លីម នៅថ្ងៃទី២៤ ខែមីនា ឆ្នាំ២០២៥ខាងមុខនេះ រាជរដ្ឋាភិបាល នឹងរៀបចំពិធីពិសាអាហារស្រាយបួសខែរ៉ម៉ាឌន នៃសាសនាឥស្លាមកម្ពុជា លើកទី៩ នៅរាជធានីភ្នំពេញ ដែលនឹងមានភ្ញៀវជាតិ និងអន្តរជាតិប្រមាណ ៦ ២០០នាក់ ចូលរួមក្នុងឆ្នាំនេះ»៕

The post ដើម្បីបង្ហាញការយកចិត្តទុកដាក់បងប្អូនម៉ូស្លីម កម្ពុជានឹងរៀបចំពិធីពិសាអាហារស្រាយបួសខែរ៉ម៉ាឌន appeared first on Kampuchea Thmey Daily.

រដ្ឋធម្មនុញ្ញកម្ពុជាមាត្រា៤៣ចែងថា ព្រះពុទ្ធសាសនាជាសាសនារបស់រដ្ឋ ខណៈពលរដ្ឋក្នុងប្រទេសនេះជាង៩៣%ជាអ្នកកាន់ពុទ្ធសាសនា។ តើហេតុអ្វីបានជាអង្គការសម្ព័ន្ធឥស្លាមបានជ្រើសរើសប្រទេស​កម្ពុជាជាទីកន្លែងប្រជុំកំពូលរបស់ខ្លួន?

ទេសរដ្ឋមន្រ្តីទទួលបន្ទុកបេសកកម្មពិសេសលោក អូស្មាន ហាស្សាន់ បានថ្លែងក្នុងពិធីបើកនោះថា កេរិ៍្តឈ្មោះដែលកម្ពុជារក្សាបានជាប្រទេសមានសុខដុមនីយកម្មសាសនាដែលគ្រប់សាសនិកសាសនាទាំងអស់ក្នុងប្រទេសនេះមានសាមគ្កីភាពគ្នាប្រកបដោយការអត់អោន បានធ្វើឱ្យអង្គការសម្ព័ន្ធពិភពឥស្លាមមានការចាប់អារម្មណ៍ជាខ្លាំងចំពោះប្រទេសកាន់ពុទ្ធសាសនាមួយនេះ។

លោកថ្លែងថា៖ «អាស្រ័យហេតុនេះទើបអង្គការសម្ព័ន្ធពិភពឥស្លាមសម្រាប់រៀបចំកិច្ចប្រជុំកំពូលនេះជាលើកទី១ លើព្រះរាជាណាចក្រកម្ពុជានៅពេលនេះ។ ដែលទូលបង្គំខ្ញុំបាទនាថ្ងៃនេះជឿជាក់ថាតាមរយៈកិច្ចប្រជុំនៅថ្ងៃនេះប្រទេសកម្ពុជានឹងត្រូវបានពិភពលោកទាំងមូលចាត់ទុកពិតជាប្រទេសដែលអាចយកជាគំរូ​​មួយដែលបានផ្ដល់ភាព​សុខដុមនីយកម្ម​ជាតិសាសន៍​ សាសនា​ដ៏ពេញលេញដល់​ប្រជាជនរបស់​ខ្លួន​ដោយមិនប្រកាន់ពូជសាសន៍ មិនរើសអើង ដែលមានវប្បធម៌ និងប្រពៃណីចម្រុះជាតិសាសន៍ខណៈប្រទេសតូចឬធំមួយចំនួននៅមិនទាន់ធ្វើបានដូចកម្ពុជា»។

អង្គការសម្ព័ន្ធពិភពឥស្លាម បង្កើតឡើងនៅឆ្នាំ១៩៦២ ដោយព្រះចៅ ហ្វៃសល អាល់សាអូឌីត ព្រះមហាក្សត្រ​នៃ​ព្រះរាជា​ណាចក្រអារ៉ាប៊ីសាអូឌីត តាមសេចក្តីសម្រេច របស់អង្គការសហប្រតិ​បត្តិការ​ឥស្លាម (OIC)។ អង្គការនេះ មានទីស្នាក់ការនៅទីក្រុងម៉ាកាស់ (Makkah) ប្រទេស​អារ៉ាប៊ី​សាអូឌីត។ អង្គការនេះបង្កើតឡើង ក្នុងគោលបំណងពង្រីកទំនាក់ទំនង នៃកិច្ច​សហ​ប្រតិបត្តិការឥស្លាម និងមនុស្សធម៌នៅទូទាំងសកលលោក។

ក្នុងជំនួបជាមួយនាយករដ្ឋមន្ត្រីកម្ពុជា អគ្គលេខាធិការង OIC លោក  មហាំម៉ាត់ សាអ៊ីត អាល់ម៉ាជឌូអ៊ី បានវាយតម្លៃខ្ពស់ចំពោះការរីកចម្រើនរបស់កម្ពុជាជាពិសេសវិស័យសេដ្ឋកិច្ច និងវិស័យអប់រំ ដែលការណ៍នេះបានធ្វើឱ្យបណ្ដាប្រទេសលើពិភពលោកកាន់តែចាប់ផ្ដោតការយកចិត្តទុកដាក់ខ្ពស់ថែមទៀតមកលើកម្ពុជា។

លោកបានបន្ថែមថា «កម្ពុជាជាប្រទេសគំរូមួយនៅលើពិភពលោកដែលធានាបាននូវសុខដុមនីយកម្មជាតិសាសន៍ និងសាសនា»។

កិច្ចប្រជុំកំពូលឥស្លាម២០២៥ ត្រូវបានធ្វើឡើងក្រោមប្រធានបទ «ឥស្លាម និងពុទ្ធសាសនា» ដែលសម្ដេចធិបតី ហ៊ុន ម៉ាណែត បានចាត់ទុកជាជម្រើសប្រធានបទដ៏ស័ក្កិសមបំផុតសម្រាប់ការរៀបចំនៅកម្ពុជា។ សម្ដេចធិបតីបានថ្លែងក្នុងពិធីបើកថា កម្ពុជាតែងតែលើកស្ទួយកិច្ចសន្ទនាអន្តរសាសនា និងសន្ដិសហវិជ្ជមានរវាងជំនឿសាសនា ហើយសុទ្ធតែត្រូវបានអង្គការអន្តរជាតិធំៗ រួមទាំងអង្គការសម្ព័ន្ធឥស្លាមទទួលស្គាល់ផងដែរ។

សម្ដេចធិបតីបានរម្លឹកថា ភាពសុខដុមនៃសាសនានៅកម្ពុជាកើតពីថ្ងៃរំដោះ៧ មករា និងការប្រឆាំងនូវលិទ្ធិជ្រុលនិយមនៅកម្ពុជា។

សម្ដេចថ្លែងថា៖ «យើងពិតជាមានមោទនភាពក្រៃលែងដែលអង្គការសម្ព័ន្ធឥស្លាមបានទទួលស្គាល់នូវភាពអត់អោន និងភាពមិនជ្រុលនិយមនិងសុខដុមនីយកម្មជាតិសាសន៍ សាសនានៅព្រះរាជាណាចក្រកម្ពុជាដែលសម្ដេចតេជោ ហ៊ុន សែន បានខិតខំកសាងមកយ៉ាងលំបាក និងថែទាំយ៉ាងយកចិត្តទុកដាក់ដោយេហតុថាកត្តាទាំងនេះគឺធាតុផ្សំមិនអាចខ្វះបាននៃស្ថិរភាព និងសន្ដិភាពយូរអង្វែងរបស់កម្ពុជា»។

សម្ដេចធិបតីបានប្រកាសជាថ្មីថា ការជំរុញភាពសុខដុមនៃសាសនាគឺជាកោសិកាស្នូលរបស់គណបក្សប្រជាជនកម្ពុជា ហើយតែងតែប្រកាន់ខ្ជាប់នូវគោលការណ៍នេះ ហើយសម្ដេចធានាក្នុងនាមជាអ្នកដឹកនាំបន្តវេនគឺនៅតែបន្តអនុវត្តន៍នូវគោលនយោបាយនេះដើម្បីធានានូវភាពសុខសាន្តរបស់សង្គមជាតិទាំងមូល។

ជារួម ការជ្រើសរើសកម្ពុជាជាទីតាំងប្រជុំកំពូលឥស្លាម ជាកិត្តិយសមួយរបស់កម្ពុជាក្នុងនាមជាប្រទេសកាន់ពុទ្ធសាសនាដែលរក្សាបាននូវភាពសុខដុមដល់គ្រប់សាសនាទាំងអស់ក្នុងប្រទេស ជាគំរូមួយដល់ពិភពលោកនៃការថែរក្សាសន្ដិភាព និងប្រឆាំងនូវអំពើជ្រុលនិយម ដែលជាគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា​ចាប់តាំងពីថ្ងៃដួលរលំនៃរបបខ្មែរក្រហមរហូតដល់ពេលបច្ចុប្បន្ន៕

អត្ថបទដោយ ហ៊ុន សិរីវឌ្ឍន៍

The post ហេតុអ្វីប្រទេសកាន់ពុទ្ធសាសនាកម្ពុជាត្រូវបានជ្រើសរើសជាទីកន្លែងប្រជុំកំពូលឥស្លាម? appeared first on Kampuchea Thmey Daily.

នាព្រឹកថ្ងៃទី២៧ ខែកុម្ភៈ ឆ្នាំ២០២៥ មុនចូលរួមជាអធិបតីភាពនៅក្នុងពិធីបើកកិច្ចប្រជុំកំពូលឥស្លាម ក្រោមប្រធានបទ «ឥស្លាម និងពុទ្ធសាសនា» រៀបចំដោយអង្គការសម្ព័ន្ធពិភពឥស្លាម សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យលោកបណ្ឌិត មហាំម៉ាត់ សាអ៉ីត អាល់ម៉ាជឌូអ៉ី អគ្គលេខាធិការរងអង្គការសម្ព័ន្ធពិភពឥស្លាម ចូលជួបសម្តែងការគួរសម និងពិភាក្សាការងារ នៅសណ្ឋាគារសុខាភ្នំពេញ។

ក្នុងជំនួបនេះ បណ្ឌិតអគ្គលេខាធិការង បានថ្លែងអំណរគុណចំពោះសម្ដេចធិបតី ដែលបានអនុញ្ញាតឱ្យលោក និងគណៈ ប្រតិភូ ចូលជួបសម្ដែងការគួរសម និងបានថ្លែងអំណរគុណកម្ពុជាដែលបានទទួលស្វាគមន៍យ៉ាងកក់ក្ដៅចំពោះលោកនិង គណៈប្រតិភូដែលបានចូលរួមកិច្ចកិច្ចប្រជុំកំពូលឥស្លាមក្រោមប្រធានបទ «ឥស្លាម និងពុទ្ធសាសនា» នាឱកាសននេះ។

លោក មហាំម៉ាត់ សាអ៉ីត អាល់ម៉ាជឌូអ៉ី បានសម្ដែងក្ដីសោមនស្សរីករាយដែលបានមកបំពេញទស្សនកិច្ចនៅកម្ពុជា ជាថ្មីម្ដងទៀត និងបានវាយតម្លៃខ្ពស់ចំពោះការរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា ពិសេសការរីកចម្រើនខាងវិស័យសេដ្ឋកិច្ច និងវិស័យអប់រំ ដែលការណ៍នេះបានធ្វើឱ្យបណ្ដាប្រទេសលើពិភពលោក កាន់តែចាប់ផ្ដោតការយកចិត្តទុកដាក់ខ្ពស់ថែមទៀតមកលើកម្ពុជា។ លោក បានលើកឡើងថា កម្ពុជា ជាប្រទេសគំរូមួយនៅលើពិភពលោក ដែលធានាបាននូវសុខដុមនីយកម្មជាតិសាសន៍ និងសាសនា។

សម្ដេចធិបតី ហ៊ុន ម៉ាណែត បានស្វាគមន៍ចំពោះលោកបណ្ឌិត អគ្គលេខាធិការរង និងគណៈប្រតិភូ ដែលបានអញ្ជើញចូលរួមកិច្ចប្រជុំកំពូល ព្រមទាំងបានវាយតម្លៃខ្ពស់ចំពោះការរៀបចំកិច្ចប្រជុំកំពូលនេះ ដែលជាលើកដំបូងនៅកម្ពុជា។

សម្ដេចធិបតី បានគូសបញ្ជាក់ថា កម្ពុជា ជាប្រទេសដែលគោរព​ និងផ្ដល់តម្លៃដល់ការគោរពបដិបត្តិជំនឿសាសនាផ្សេងៗ ហើយរាជរដ្ឋាភិបាល​នីតិកាលមុនៗ ក៏ដូច​នីតិកាលទី៧​នេះ តែងតែយកចិត្តទុកដាក់ខ្ពស់ក្នុងការធានាការរួមរស់ជាមួយគ្នាក្នុងចំណោមសាសនាផ្សេងៗនៅក្នុងសង្គមកម្ពុជា ប្រកបដោយសុខដុមរមនា។ សម្ដេចធិបតីបានសង្កត់ធ្ងន់ពីសារៈសំខាន់ និងតួនាទីរបស់សាសនាក្នុងការចូលរួមចំណែកដល់ការអប់រំប្រជាពលរដ្ឋ ដើម្បីធ្វើឱ្យសង្គមជាតិមួយ គ្មានជម្លោះ និងមានសុខសន្ដិភាព ស្ថិរភាព និងការអភិវឌ្ឍ។ 

ក្នុងយុគសម័យឌីជីថល សាសនាកាន់តែមានតួនាទីសំខាន់ថែមទៀតក្នុងការលើកកម្ពស់ការអប់រំប្រជាពលរដ្ឋ ជាពិសេស នៅកម្ពុជា សាសនាពិតជាបានដើរតួនាទីយ៉ាងសំខាន់ក្នុងសង្គមជាតិ ដោយបានចូលរួមចំណែកយ៉ាងច្រើនដល់ការលើកកម្ពស់ការអប់រំតម្លៃមនុស្ស សីលធម៌ និងគុណធម៌ និងការកសាងខ្លួនជាពលរដ្ឋល្អសម្រាប់ប្រទេសជាតិ។ នេះជាការបន្ថែមរបស់សម្ដេចធិបតី នាយករដ្ឋមន្ត្រី ទៅកាន់ប្រតិភូអង្គការសម្ព័ន្ធពិភពឥស្លាម៕

The post អង្គការសម្ព័ន្ធពិភពឥស្លាម សរសើរកម្ពុជា ថា ជាប្រទេសគំរូ ធានាបានសុខដុមនីយកម្មសាសនា appeared first on Kampuchea Thmey Daily.

នៅចំពោះមុខគណប្រតិភូឥស្លាមសាសនិក សម្ដេចប្រមុខរាជរដ្ឋាភិបាលកម្ពុជា សង្កត់ធ្ងន់ដូច្នេះ «ទោះបីកម្ពុជា កំណត់យកពុទ្ធសាសនាជាសាសនារបស់រដ្ឋក៏ដោយ បច្ចុប្បន្ននេះក្រោមម្លប់ដ៏សែនត្រជាក់នៃសន្តិភាព យើងស្ទើរតែមិនដែលឮទាល់តែសោះ អំពីជម្លោះសាសនានៅកម្ពុជា។»។

សម្ដេចធិបតី ហ៊ុន ម៉ាណែត អះអាងថា កម្ពុជា តែងតែលើកម្ពស់ និងយកចិត្តទុកដាក់ខ្ពស់ចំពោះឥស្លាមសាសនិក តាំងតែពីអតីតកាលរហូតមកដល់បច្ចុប្បន្ន។ សម្ដេចធិបតី អះអាងដូច្នេះ ដោយសារតែកាលពីអតីតកាល ព្រះករុណា ព្រះបាទ សម្ដេចព្រះនរោត្ដម សីហនុ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ បានសព្វព្រះរាជហឬទ័យ ប្រទាននាមដល់ជនជាតិភាគតិចចាម ថា«ខ្មែរឥស្លាម» នៅក្រោយពេលទទួលបានឯករាជ្យពីបារាំងឆ្នាំ១៩៥៣ ក្នុងគោលបំណង់ចង់ឲ្យក្រុមជនជាតិភាគតិចចាមបានក្លាយជាពលរដ្ឋខ្មែរកាន់សាសនាឥស្លាមដោយស្របច្បាប់ នឹងក្លាយជាខ្មែរតែមួយព្រមទាំងបានបន្សល់ទុកនូវអត្តសញ្ញាណដើមជនជាតិចាមផងដែរ។

សម្ដេចធិបតី ហ៊ុន ម៉ាណែត ​ក៏ឆ្លៀតរំឮកពីអតីតកាលដ៏ឈឺចាប់ដែលកើតលើខ្មែរឥស្លាមប្រាប់ទៅកាន់អង្គមហាសន្និបាតថា ក្នុងពេលដែលកម្ពុជា ស្ថិតក្រោមការដឹកនាំរបស់របបលន់ នល់ ពលរដ្ឋខ្មែរឥស្លាម ត្រូវរងទុក្ខវេទនា ដោយសារតែសង្គ្រាម ការរើសអើងជាតិសាសន៍  ចំណែករបបប៉ុលពត ពលរដ្ឋខ្មែរឥស្លាម ត្រូវរងទុក្ខដោយសារតែការលុបបំបាត់ទាំងស្រុងនូវសេរីភាពសាសនា និងអំពើប្រល័យពូជសាសន៍។ សម្ដេចធិបតីប្រមុខរាជរដ្ឋាភិបាល បញ្ជាក់ថា សិទ្ធិសេរីភាពរបស់ពលរដ្ឋខ្មែរឥស្លាម បានស្រស់បំព្រងឡើងវិញ ក្រោយថ្ងៃ៧ មករា ឆ្នាំ១៩៧៩ ក្រោយរបបប៉ុលពតបានដួលរលំ។

គួរឱ្យដឹងថា នៅក្នុងរដ្ឋធម្មនុញ្ញដែលជាច្បាប់កំពូលតែមួយរបស់ជាតិកម្ពុជា ត្រង់ជំពូក៣ អំពីសិទ្ធិ និងករណីកិច្ចរបស់ប្រជាពលរដ្ឋខ្មែរ  មាត្រា ៤៣ បញ្ញត្តិថា ព្រះពុទ្ធសាសនាជាសាសនារបស់រដ្ឋ។

ជាការកត់សម្គាល់ នៅកម្ពុជារវាងឥស្លាមសាសនិក និងពុទ្ធសាសនិក គឺមានសុខដុមនីយកម្មរវាងគ្នាទៅវិញទៅមក ជាក់ស្ដែងក្នុងជីវភាពរស់នៅប្រចាំថ្ងៃ សាសនិកទាំងពីរតែងតែអញ្ជើញចូលរួមកម្មវិធីនានាទៅវិញទៅមក៕​

ដោយ៖ ង៉ិល ណារ៉ាត់

The post សម្ដេចធិបតី៖ទោះបីកំណត់យកពុទ្ធសាសនាជាសាសនារបស់រដ្ឋ តែកម្ពុជាគ្មានជម្លោះជាមួយឥស្លាមសាសនាឡើយ appeared first on Kampuchea Thmey Daily.

យោងតាមរបាយការណ៍របស់​ The Straits Times​ ទាំង Aziz និង Ruhainies ត្រូវបានចាប់ខ្លួននៅថ្ងៃទី ០៩ ខែមីនា ក្រោមការសង្ស័យថា បានភ្ជាប់ជាមួយនឹងទំនៀមទម្លាប់ khalwat ដែលកើតឡើងនៅពេលដែលស្ត្រីនិងបុរសមិនដែលរៀបការជាមួយគ្នា ឬទាក់ទងគ្នាប៉ះសាច់ ឬបានរកឃើញនៅជាមួយគ្នានៅក្នុងការកំណត់ឯកជនភាព។

សារព័ត៌មានដដែលបានកត់សម្គាល់ដែរថា នៅថ្ងៃទី១៤ ខែមីនា Ruhainies បានបង្ហោះសារនៅលើ Instagram របស់នាង ដោយបញ្ជាក់ថា អាជ្ញាធរមិនបានរកឃើញភស្តុតាងនៃ khalwat ដែលកើតឡើងរវាងនាងនិង Aziz នោះទេ។

ក្នុងនោះនាងថែមទាំងបានពន្យល់ថា នាងបានអញ្ជើញ Aziz មកបន្ទប់ខុនដូនៅ Kuala Lumpur របស់នាង ដើម្បីទទួលទានអាហារពេលល្ងាចជាមួយបងប្អូនបង្កើតរបស់នាង ដោយមិនមានអត្ថន័យលើសពីនោះទេ។ ទោះយ៉ាងណាក៏ដោយ មានពេលមួយដែលពួកគេបាននៅតែម្នាក់ឯង ដោយសារតែបងស្រីរបស់ Ruhainies បានជាប់លើដងផ្លូវដោយសារតែបញ្ហាស្ទះចរាចរណ៍ ទើបគាត់មកដល់យឺត ហើយធ្វើឲ្យរឿងរ៉ាវកាន់តែវែងឆ្ងាយបែបនេះ។

ឆ្លើយតប​នឹង​ស្ថានការណ៍​នេះ តារា​ស្រី​រូប​នេះ​បាន​អំពាវនាវ​ដល់​សាធារណជន ​ឲ្យ​ឈប់​ផ្សព្វផ្សាយ​ពាក្យ​ចចាម​អារ៉ាមមិនច្បាស់លាស់ដែលអាចបង្ខូចកេរ្តីឈ្មោះរបស់នាង និងតារាប្រុសសិង្ហបុរីថែមទៀត។

ដោយឡែក ងាកទៅកាន់តារាសម្ដែង​សិង្ហបុរី Aziz ក៏បានសរសេរនៅលើ Instagram របស់គាត់ថា ឧប្បត្តិហេតុដ៏អាក្រក់នេះ ពិតជាហួសប្រមាណយ៉ាងខ្លាំង។ គាត់បានសុំទោសដោយ​លើក​ឡើង​ថា ថ្ងៃក្រោយគាត់នឹងមានការ​ប្រុងប្រយ័ត្ន​មុន ​ក្នុង​ការ​រង់ចាំ​នៅ​បន្ទប់​ទទួល​ភ្ញៀវ ជាជាង​នៅ​ក្នុងខុនដូ​របស់ Ruhainies ។

ទោះជាយ៉ាងណាក៏ដោយ កាសែត The Straits Times បានរាយការណ៍ថា ភរិយារបស់ Aziz ជាតារាចម្រៀងម៉ាឡេស៊ី Bella Astillah មានអាយុ ២៩ ឆ្នាំ បានដាក់ពាក្យលែងលះ បន្ទាប់ពីឧប្បត្តិហេតុនេះបានកើតឡើងភ្លាមៗ។ គូស្នេហ៍ដែលបានរៀបការកាលពីឆ្នាំ ២០១៦ បានបែកគ្នាកាលពីឆ្នាំ ២០១៩​ ដោយសារតែការចោទប្រកាន់ពីភាពមិនស្មោះត្រង់របស់ Aziz ប៉ុន្តែបានផ្សះផ្សានៅឆ្នាំ ២០២០ ឡើងវិញ។ បច្ចុបន្បន្ននេះ ពួកគេមានកូនប្រុសអាយុ ៦ ឆ្នាំម្នាក់ និងកូនស្រីអាយុ ៣ ឆ្នាំម្នាក់ដែរ៕

អត្ថបទ៖ សាង ស្រីល័ក្ខ

ចុចអាន៖សិង្ហបុរី​ កាត់ទោស​អ្នក​ទេសចរ​កូរ៉េ ក្រោយដាក់ថ្នាំ​ក្នុងតែ​ពពុះសម្លាប់​ស្ត្រី​ម្នាក់ដើម្បីសងសឹក

The post តារា​សម្ដែង​ សិង្ហបុរី​ ត្រូវ​ឃុំ​ខ្លួន​ពី​បទ​បំពានច្បាប់ឥស្លាម ក្រោយជិតស្និទ្ធជាមួយ​តារាស្រីម៉ាឡេស៊ី ​ appeared first on Kampuchea Thmey Daily.

តាមសំណេរដដែល សម្ដេចធិបតី បានផ្ញើជូននូវក្តីនឹករឭក និងអរគុណយ៉ាងជ្រាលជ្រៅបំផុតចំពោះជនជាតិខ្មែរឥស្លាមកម្ពុជា ដែលបានចូលរួមបន្តថែរក្សាសុខសន្តិភាព សុខដុមនីយកម្មជាតិសាសន៍ និងសាសនា ហើយមានជំនឿជឿជាក់លើការដឹកនាំរបស់សម្ដេចធិបតី, របស់សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រី និង របស់គណបក្សប្រជាជនកម្ពុជា តាំងពីដើមតរៀងមក រួមជាមួយនឹងប្រជាជនកម្ពុជា។

ដោយបន្តពីរាជរដ្ឋាភិបាលនីតិកាលមុន និង ដើម្បីបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាល ចំពោះកិច្ចប្រណិប័តន៍ជំនឿរបស់សាសនិកឥស្លាម នៅថ្ងៃទី២១ ខែមីនា ឆ្នាំ២០២៤ខាងមុខនេះ រាជរដ្ឋាភិបាល នឹងរៀបចំពិធីពិសាអាហារស្រាយបួសខែរ៉ម៉ាឌន នៃសាសនាឥស្លាមកម្ពុជា លើកទី៨ នៅរាជធានីភ្នំពេញ ដែលនឹងមានអ្នកចូលរួមជាភ្ញៀវជាតិ និងអន្តរជាតិប្រមាណ ៦ ២០០នាក់ ។

សម្ដេចធិបតី ក៏បានទម្លាយថា ឆ្នាំនេះក៏មានមិត្តភក្ដិបរទេសនឹងមកចូលរួមទាំងនៅក្នុង និងក្រៅប្រទេសប្រមាណជាង ៤០០នាក់ មកពី ៣៩ ជាតិសាសន៍ ជាពិសេសមានតំណាង អគ្គលេខាធិការអង្គការសហប្រតិបត្តិការឥស្លាម (OIC), លោក Wan Muhamadnoor Matha ប្រធានរដ្ឋសភា នៃព្រះរាជាណាចក្រថៃ និង អតីត-ថ្នាក់ដឹកនាំជាន់ខ្ពស់នៃបណ្ដាប្រទេសជិតខាងមកចូលរួមជាច្រើនផងដែរ ។

សម្ដេច ហ៊ុន ម៉ាណែត បានជូនពរដល់បងប្អូនខ្មែរឥស្លាមកម្ពុជា ទាំងក្នុង និង ក្រៅប្រទេស ព្រមទាំងឥស្លាម លើសាកលលោក ឱ្យជួបប្រទះតែសេចក្តីសុខ សុភមង្គល និងជោគជ័យក្នុងកិច្ចប្រតិបត្តិជំនឿសាសនាឥស្លាម អំឡុងខែបួសរ៉ម៉ាឌនឆ្នាំ ២០២៤ នេះ កុំបីឃ្លៀងឃ្លាតឡើយ៕

The post សម្ដេចធិបតី អបអរសាទរ និងជូនពរសាសនិកឥស្លាម ដែលនឹងចូលបួសខែរ៉ម៉ាឌន ខែពិសិដ្ឋក្នុងសាសនាឥស្លាម appeared first on Kampuchea Thmey Daily.