ពិធីចុះហត្ថលេខានេះ មានការចូលរួមពីថ្នាក់ដឹកនាំសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន គិតម៉េង, ឧកញ៉ា គិត លីច័ន្ទផាន់ណា អនុប្រធាន និងជាទីប្រឹក្សាជាន់ខ្ពស់សមាគមសិល្បករខ្មែរ និងលោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត និងជានាយកគ្រប់គ្រងប្រចាំប្រទេសកម្ពុជា រួមជាមួយថ្នាក់ដឹកនាំ ក្រុមគ្រូពេទ្យ បុគ្គលិក សិល្បករ សិល្បការិនី និងភ្ញៀវកិត្តិយសជាច្រើនរូប។

ក្នុងឱកាសនោះ ឧកញ៉ា គិត លីច័ន្ទផាន់ណា តំណាងថ្នាក់ដឹកនាំសមាគមសិល្បករខ្មែរ បានលើកឡើងថា កិច្ចសហការនេះ គឺជាការបង្ហាញពីការយកចិត្តទុកដាក់ចំពោះសុខភាព និងគុណភាពជីវិតរបស់សិល្បករ សិល្បការិនី ជាពិសេសសិល្បកររៀមច្បង ដែលបានចូលរួមចំណែកអភិរក្ស និងផ្សព្វផ្សាយសិល្បៈវប្បធម៌ជាតិអស់រយៈពេលជាច្រើនឆ្នាំ។ ឧកញ៉ា គិត លីច័ន្ទផាន់ណា បញ្ជាក់ថា ៖«សិល្បករ សិល្បការិនី គឺជាធនធានដ៏មានតម្លៃរបស់សង្គម និងជាអ្នកថែរក្សាអត្តសញ្ញាណជាតិខ្មែរ។ ការយកចិត្តទុកដាក់លើសុខភាព សេចក្ដីថ្លៃថ្នូរ និងសុខុមាលភាពរបស់ពួកគាត់ គឺជាកាតព្វកិច្ចដែលយើងទាំងអស់គ្នាត្រូវរួមគ្នាគាំពារ និងថែរក្សា»។

តាមរយៈអនុស្សរណៈយោគយល់នេះ សមាជិកសមាគមសិល្បករខ្មែរ នឹងទទួលបានអត្ថប្រយោជន៍លើសេវាពិនិត្យ ព្យាបាល និងថែទាំសុខភាព ព្រមទាំងលក្ខខណ្ឌអនុគ្រោះមួយចំនួនផ្សេងទៀត។

លោក ម៉ា អ៊ែមមឺសិន ម៉ានី នាយកប្រតិបត្តិនៃមន្ទីរពេទ្យអឃីត បានបញ្ជាក់ថា កិច្ចសហប្រតិបត្តិការនេះ គឺជាជំហានដ៏សំខាន់ក្នុងការលើកកម្ពស់ការយល់ដឹងផ្នែកសុខភាពទៅកាន់សាធារណជន តាមរយៈការចូលរួមផ្សព្វផ្សាយសារសុខភាពដោយសមាគមសិល្បករខ្មែរ ដែលមានឥទ្ធិពលវិជ្ជមានដល់មហាជន។ លោកបានថ្លែងថា៖«ក្នុងនាមជាមន្ទីរពេទ្យខ្មែរ យើងមានមោទនភាពក្នុងការប្រើប្រាស់ចំណេះជំនាញ និងវិជ្ជាជីវៈ មកបម្រើជាតិមាតុភូមិ ដោយភាពស្មោះត្រង់ និងទំនុកចិត្ត។ រាល់ការខិតខំប្រឹងប្រែងរបស់យើង គឺដើម្បីធានាបាននូវសុខសុវត្ថិភាព សុខភាព និងស្នាមញញឹមសម្រាប់ប្រជាជនខ្មែរ»។

សមាគមសិល្បករខ្មែរ ក៏បានបញ្ជាក់ដែរថា នឹងបន្តស្វែងរកកិច្ចសហការនានា ដើម្បីគាំទ្រសិល្បករ សិល្បការិនី លើផ្នែកសុខុមាលភាព សង្គមកិច្ច និងការអភិវឌ្ឍជីវភាព ខណៈខាងមន្ទីរពេទ្យ ក៏នឹងបន្តបេសកកម្មផ្តល់សេវាសុខាភិបាលប្រកបដោយគុណភាព សុវត្ថិភាព និងការយកចិត្តទុកដាក់ខ្ពស់ជូនដល់ប្រជាជនកម្ពុជា៕

The post សមាគមសិល្បករខ្មែរ ពង្រឹងកិច្ចសហការលើសុខុមាលភាពសិល្បករ និងផ្សព្វផ្សារការយល់ដឹងពីសុខភាពដល់ពលរដ្ឋ appeared first on Kampuchea Thmey Daily.

ក្នុងចំណោមនោះ រួមមានលោក ប៉ែន ចាន់សិទ្ឋ អតីតតារាពាណិជ្ជកម្មដ៏មានប្រជាប្រិយ, លោក ណាឃីម សិល្បករផ្នែកចម្រៀងបុរាណ, តារាភាពយន្ត លោក អ៊ុន សិទ្ធា និងអតីតតារាចម្រៀងដែលមានឈ្មោះបោះសំឡេងជិត១០ឆ្នាំមុន លោក ម៉ារ៉ា ប៊ុណ្ណា ។

១. លោក ប៉ែន ចាន់សិទ្ឋ អតីតជ័យលាភី Freshie Boy ជំនាន់ទី៨ ឆ្នាំ២០០៩ ទទួលមរណភាពដោយរោគាពាធ ទាំងវ័យក្មេង កាលពីរសៀលថ្ងៃទី០៣ ខែមីនា ឆ្នាំ២០២៥ ។

២. លោក ណាឃីម សិល្បករចម្រៀងផ្នែកបុរាណ និងជាសមាជិកក្រុមតន្ត្រីបុរាណរបស់អ្នកនាង ខាត់ សួស្តី ស្លាប់បាត់បង់ជីវិតទាំងវ័យក្មេងដោយជំងឺដ៏កាចសាហាវ កាលពីរសៀលថ្ងៃទី១៧ ខែតុលា ព្រោះតែសភាពជំងឺរបស់លោកកាន់តែធ្ងន់ធ្ងរ ដោយមានបញ្ហាហើមខួរក្បាលផង ឯគ្រឿងក្នុងខូចខាតអស់ផង។

៣. លោក អ៊ុន សិទ្ធា ជាតារាសម្តែងប្រុសមានឈ្មោះបោះសំឡេងមួយរូប ក្នុងវិស័យភាពយន្តខ្មែរប្រមាណ ២០ឆ្នាំមកនេះ ដែលទើបនឹងមរណភាពទៅថ្មីៗកាលពីថ្ងៃទី១៩ ខែវិច្ឆិកា ឆ្នាំ២០២៥ បន្សល់ទុកនូវក្តីអាឡោះអាល័យជាពន់ពេក ដោយសារតែលោកមិនធ្លាប់បង្ហាញពីទុក្ខលំបាកខ្លួនទាល់តែសោះ ស្រាប់តែជំងឺធ្វើទុក្ខចូលពេទ្យ ៥ថ្ងៃ ក៏បាត់បង់ជីវិតតែម្តង។ គួរឱ្យដឹងដែរថា តារាប្រុសរូបនេះ ធ្លាប់ជាតួប្រុសក្នុងភាពយន្តខ្នាតធំ រឿងភាគ ភាពយន្តប្រវត្តិសាស្ត្រ ក៏ដូចជាកិច្ចការងារផ្សេងទៀតក្នុងវិស័យបង្ហាញម៉ូដ និងជាពិធីករផងដែរ។

៤. ម្ចាស់បទ “ដីថ្លៃប្រល័យស្នេហ៍” លោក ម៉ារ៉ា ប៊ុណ្ណា ក្រោយឃ្លាតឆ្ងាយពីអាជីពសិល្បៈជាយូរហើយនោះ ស្រាប់តែនៅព្រឹកថ្ងៃទី២៨ វិច្ឆិកា ឆ្នាំ២០២៥ មានដំណឹងនៃមរណភាពរបស់លោក ដោយសារគាំងបេះដូង។

លោក ម៉ារ៉ា ប៊ុណ្ណា ជាអតីតតារាចម្រៀងធ្លាប់មានកេរ្តិ៍ឈ្មោះមួយរូបកាលពីប្រមាណជិត ១០ឆ្នាំមុន។ ខណៈមុនស្ងប់ស្ងាត់ពីវិថីសិល្បៈ ពោលគឺអំឡុងឆ្នាំ២០១៧ លោក ម៉ារ៉ា ប៊ុណ្ណា ធ្លាប់​បញ្ចេញចម្រៀង Original song មួយបទ​​ចំណង​ជើង​ថា “ប៉ិអើយ! អើយប៉ិ!” ដែល​​​ជា​ការ​តែ​និពន្ធ​បទ​ភ្លេង ដោយ​តារា​ចម្រៀង ណាំ ប៊ុណ្ណារ័ត្ន និពន្ធ​ទំនុក​ច្រៀង​ដោយ លោក ឡេង ណាវ៉ាត្រា ខណៈបច្ចុប្បន្នមានងារជាឧកញ៉ា និងមានផលិតកម្មជារបស់ខ្លួនទៅហើយ៕

The post ឆ្នាំ២០២៥នេះ សិល្បករខ្មែរ ៤រូប អស់សង្ខារទាំងវ័យក្មេងព្រោះបញ្ហាសុខភាព appeared first on Kampuchea Thmey Daily.

ទាហានឈ្លានពានរបស់ចោរសៀម បានប្រើប្រាស់អាវុធបាញ់រះមកលើប្រជាពលរដ្ឋស្លូតត្រង់កម្ពុជា នៅភូមិព្រៃចាន់ ឃុំអូរបីជាន់ ស្រុកអូរជ្រៅខេត្តបន្ទាយមានជ័យកាលពីរសៀលថ្ងៃទី១២ ខែវិច្ឆិកា ឆ្នាំ២០២៥ ដោយទង្វើនេះ គឺខុសច្បាប់មនុស្សធម៌អន្តរជាតិ និងច្បាប់អន្តរជាតិដែលផ្ទុយទៅនឹងស្មារតីមនុស្សធម៌។

ក្រោយមានការបាញ់រះពីសំណាក់ទាហានសៀមកាលពីរសៀលម្សិលមិញនេះ ពិធីការិនី ហ៊ិន ច័ន្ទនីរ័ត្ន , កញ្ញា សុខ ពិសី ,កញ្ញា សុខ សីឡាលីន ព្រមនិងសិល្បករជាច្រើនទៀតរូបទៀត បានបង្ហោះសារទាំងអួលព្រោងព្រាត បង្ហាញក្តីអាសូរជាពន់ពេកដល់ពលរដ្ឋនៅព្រំដែន ដែលរត់ប្រសាចគេចគ្រាប់កាំភ្លើងសៀម និងថ្កោលទោសចំពោះការបាញ់ប្រហារមកលើជនសុីវិលកម្ពុជា។

ក្នុងនោះ តារាកំប្លែងនាយក្រឹម បានលើកឡើងដែរថា “ខ្ញុំបាទតំណាងឱ្យក្រុមកំប្លែងសំណេីចចុងសប្ដាហ៍ សូមថ្កោលទោសយ៉ាងខ្លាំងបំផុតចំពោះការបាញ់ប្រហាររបស់កងកម្លាំងសៀមលេីជនសុីវិលខ្មែរ”។

តារាចម្រៀងលោក សុះ ម៉ាច បានបង្ហាញការខឹងសម្បារចំពោះទង្វើអមនុស្សធម៌នេះ និងចាត់ទុកទាហានសៀមបីដូចនឹងពពួកសត្វឧត្បាត ដែលតែងយាយីបំផ្លាញអ្នកដទៃ និងចោទសួរថា “សូម្បីតែកុមារស្ត្រីភេទពលរដ្ឋស្លូតត្រង់ក៏អ្នកឯងបាញ់ប្រហារដែរ ខ្មែរដែលធ្វើដូច្នេះដាក់ពលរដ្ឋអ្នកឯងទេ?”។ លោកសង្កត់ធ្ងន់ទៀតថា ខ្មែរសន្សំតែសុខ តែថៃមិនដែលឱ្យខ្មែរបានសុខសោះឡើយ។

សូមបញ្ជាក់ថា កាលនាថ្ងៃទី១២ វិច្ឆិកា យោធាថៃបានបាញ់រះមកលើអ្នកភូមិព្រៃចាន់ និងកងកម្លាំងកម្ពុជាដែលគ្មានអាវុធជាប់ខ្លួន បណ្តាលឱ្យពលរដ្ឋខ្មែរ ស្លាប់ម្នាក់ និងរបួស៣នាក់ ខណៈពលរដ្ឋជាច្រើនគ្រួសារត្រូវបានជម្លៀសចេញពីតំបន់នោះជាថ្មី៕ អត្ថបទ៖ ចាន់រ៉ា

The post សិល្បករខ្មែរ ថ្កោលទោសទង្វើព្រៃផ្សៃយោធាសៀម ដែលបាញ់ប្រហារមកលើជនសុីវិលកម្ពុជា appeared first on Kampuchea Thmey Daily.

តាមរយៈវីដេអូ និងសារពីទំព័រហ្វេសប៊ុកផ្លូវការតារាចម្រៀងជួរមុខកម្ពុជាជាច្រើនរូប បានសម្តែងការថ្កោលទោសចំពោះសកម្មភាពរំលោភបទឈប់បាញ់ម្តងហើយម្តងទៀតរបស់យោធាថៃ ឈ្លានពានកម្ពុជា។

ដោយមើលឃើញសកម្មភាពឈ្លានពានអធិបតេយ្យភាពជាតិកម្ពុជាមិនញញើតច្បាប់អន្តរជាតិបែបនេះ តារាជួរមុខជាច្រើនរូប រួមមាន ព្រាប សុវត្ថិ, ខេមរ: សិរីមន្ត ក៏ដូចជា ខាត់ សួស្តី រួមនិងអ្នកមានឥទ្ធិពលលើប្រព័ន្ធផ្សព្វផ្សាយផងដែរនោះ បានចេញមុខនាំសារនៃការពិតប្រាប់សហគមន៍អន្តរជាតិ ដោយបញ្ជាក់ថា ប្រទេសកម្ពុជាប្រកាន់ខ្ជាប់ជានិច្ចនូវការរក្សាសន្តិភាព និងគោរពច្បាប់អន្តរជាតិ។ ជាមួយគ្នានេះ ក៏ស្នើសុំឱ្យមេដឹកនាំប្រទេសមហាអំណាចលើពិភពលោក និងប្រទេសដែលជាប្រធានអាស៊ាន ជួយចាត់វិធានការដើម្បីឱ្យដំណើរការនៃបទឈប់បាញ់នេះមានប្រសិទ្ធភាព។

ជាមួយគ្នានេះ លោក ហេង វិសាល ក្នុងចំណោមអ្នកមានឥទ្ធិពលលើបណ្តាញទំនាក់ទំនងសង្គម ក៏ចេញសារមួយភ្លាមផងដែរ ដោយស្នើរសុំឲ្យអន្តរជាតិចាត់វិធានការអ្វីមួយដើម្បីដោះស្រាយ ដើម្បីបញ្ឈប់គំរូឈ្លានពានដូចជាថៃកំពុងធ្វើមកលើកម្ពុជា។

គួររំលឹកនៅក្នុងសេចក្តីប្រកាសព័ត៌មានរបស់ ក្រសួងការពារជាតិកម្ពុជា បញ្ជាក់ថា នៅព្រឹកថ្ងៃទី២៧ ខែកញ្ញា ឆ្នាំ២០២៥ វេលាម៉ោងប្រមាណ ១១:៥២នាទី យោធាថៃបានបើកការបាញ់ប្រហារ ដោយបានបាញ់កាំភ្លើងត្បាល់ និងកាំភ្លើងដៃជាច្រើនគ្រាប់ លើមូលដ្ឋានកងទ័ពកម្ពុជានៅតំបន់អានសេះ។ តែយ៉ាងណា ការបង្កហេតុនេះក៏បញ្ចប់ទៅវិញ ក្រោយកងទ័ពកម្ពុជា មិនបានឆ្លើយតប និងឈរលើស្មារតីបន្តតាមដានលើការវិវត្តន៍យ៉ាងប្រុងប្រយ័ត្ន និងត្រៀមលក្ខណៈរួចជាស្រេច ដើម្បីការពារបូរណភាពទឹកដី៕ ចាន់រ៉ា

The post សិល្បករល្បីៗ រួមគ្នាបញ្ជាក់ការពិតឱ្យអន្តរជាតិដឹងថា កម្ពុជា ពិតជាប្រកាន់ខ្ជាប់នូវការរក្សាសន្តិភាព និងគោរពច្បាប់អន្តរជាតិ appeared first on Kampuchea Thmey Daily.

យោងតាមសារព័ត៌មានទាំងក្នុងនិងក្រៅស្រុកជាច្រើន បានចុះផ្សាយនូវហេតុការណ៍ដ៏អាក្រក់នៃគ្រោះរញ្ជួយដីកម្រិតខ្ពស់នេះព្រោងព្រាត ដោយបញ្ជាក់ថា ក្នុងនោះមានការបាក់រលំអគារកំពុងសាងសង់ធ្វើឱ្យមនុស្សជាច្រើននាក់ជាប់នៅក្នុងនោះ។ តួយ៉ាង អគារ​ខ្ពស់​ៗ​ជាច្រើនក្នុងទីក្រុងដ៏សុីវិល័យរបស់ថៃ រងផលប៉ះពាល់មិនតិចនោះទេ ខណៈហេតុការណ៍អាក្រក់ម្សិលមិញនេះ ក៏មានសិល្បករសិល្បការិនីខ្មែរមួយចំនួនកំពុងស្ថិតនៅទីនោះផងដែរ។

១. តារាចម្រៀងលោក ងួន ចាន់ដេវីត ហៅ G-Devith
ខណ:ពេលកំពុងនៅប្រទេសថៃ កំពូលតារាចម្រៀងរ៉េបរូបនេះ បានបញ្ចេញសារអរគុណអ្នកដែល​បារម្ភ​ពីខ្លួន កំឡុងពេលស្វែងរកផ្លូវវិលមកមាតុភូមិវិញ ធ្វើឱ្យអ្នកគាំទ្រ មានក្តីភ្ញាក់ផ្អើលនិងសម្តែងក្តីព្រួយបារម្ភ។ យ៉ាងណា ជាច្រើនម៉ោងក្រោយមក លោកក៏បានបញ្ជាក់សុខទុក្ខខ្លួនជាថ្មីថា លោកបានធ្វើដំណើរមកដល់មាតុភូមិកំណើតដោយសុវត្ថិភាព។

២. តារាកំប្លែង និងសម្តែង ម៉ា ដូណា កំឡុងពេលនោះលោកក៏មានវត្តមាននៅប្រទេសថៃ ។ លោករៀបរាប់ទាំងអារម្មណ៍ភ័យខ្លាចថា “ស្ទះខ្លាំងណាស់ យន្តហោះក៏ពេញ ឡានក៏ពេញ វគ្គម៉ៅតាក់សុីចាក់កខ្លាំង បាយបាយបាងកក”។

៣. តារាចម្រៀងម្ចាស់បទស្រលាញ់អូនដល់កាន់ឈើច្រត់ “លោក ជ័យ សុវ៉ាត ភ្លាមៗនោះបានបង្ហោះថា កំឡុងពេលរញ្ជួយដីលោកក៏កំពុងស្ថិតនៅប្រទេសថៃជាមួយម្តាយផងដែរ”។

៤. តារាសម្តែង ញឹម ច័ន្ទថន ក៏មិនខុសពីតារាប្រុស ៣ដួងខាងលើដែរ គឺនាងក៏ស្ថិតនៅប្រទេសថៃ អំឡុងជួបហេតុការណ៍ដ៏រន្ធតខាងលើនេះដែរ។ បន្ទាប់មកនាងបញ្ជាក់ថា “ខ្ញុំមកដល់មាតុភូមិខ្ញុំហេីយ អរគុណអ៊ុំពូមីងនិងបងប្អូនសិល្បៈបានបារម្ភហេីយសួរពីសុខទុក្ខនាងខ្ញុំ”៕ អត្ថបទ៖ ចាន់រ៉ា

The post តារាខ្មែរណាខ្លះ ដែលស្ថិតនៅប្រទេសថៃពេលកំពុងជួបគ្រោះ​រញ្ជួយ​ដី​? appeared first on Kampuchea Thmey Daily.

កិច្ចសំណេះសំណាលនេះ ត្រូវបានរៀបចំឡើងកាលពីដើមខែកុម្ភៈ ឆ្នាំ ២០២៥ ដោយមានការចូលរួមពីលោក ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ និងលោក ហ៊ឺ វីរៈ តំណាងរាស្ត្រមណ្ឌលកំពង់ឆ្នាំង និងជាប្រធានក្រុមការងារសហភាពសហព័ន្ធយុវជនកម្ពុជាវិស័យវប្បធម៌ និងវិចិត្រសិល្បៈ។

នាឱកាសនោះ លោក ទិត ថាវរិទ្ធ បានបង្ហាញនូវមោទនភាពយ៉ាងក្រៃលែងចំពោះបងប្អូនសិល្បករ ដែលតែងតែលះបង់កម្លាំងកាយចិត្ត រួមទាំងធនធានផ្ទាល់ខ្លួន ចូលរួមជាមួយក្រសួងវប្បធម៌លើកិច្ចការវប្បធម៌នាពេលកន្លងមក ដោយពុំដែលគិតអំពីការតបស្នងអ្វីទាំងអស់ ដើម្បីសម្រេចគោលដៅរួម គឺការលើកកម្ពស់វិស័យសិល្បៈវប្បធម៌ជាតិ។ ជាមួយគ្នានេះ លោកបានអំពាវដល់បងប្អូនសិល្បករទាំងអស់ ជាពិសេសសិល្បករជំនាន់ក្រោយ ខិតខំចូលរួមថែរក្សារម្លៃរបស់ខ្លួនឯងក្នុងនាមជាសិល្បករមួយរូប តាមរយៈការស្លៀកពាក់ និងការនិយាយស្ដីជាសាធារណៈឱ្យបានសមរម្យជាដើម។ លោកបញ្ជាក់ថា៖«ព្រោះយើងជាគំរូសម្រាប់អ្នកគាំទ្រផង ហើយក៏ដើម្បីគេចចេញពីការរិះគន់ ឬជេរប្រមាថដោយពាក្យសម្ដីមិនគួរគប្បីមកលើបងប្អូនសិល្បករផងដែរ»។

លោកបញ្ជាក់ថា ការជួបគ្នានៅពេលនេះដើម្បីស្វែងយល់អំពីសុខទុក្ខ ចែករំលែកបទពិសោធ និងស្វែងរកមធ្យោបាយ ដើម្បីបន្តអភិរក្ស និងអភិវឌ្ឍសិល្បៈវប្បធម៌ជាតិបន្ថែមទៀត។

ចំណែកលោក ហ៊ឺ វីរៈ បានកោតសរសើរសារជាថ្មីចំពោះបងប្អូនសិល្បករទាំងអស់ដែលតែងតែចូលរួមជាមួយនឹងក្រសួងវប្បធម៌លើកិច្ចការវប្បធម៌ជាច្រើននាពេលកន្លងមក ជាពិសេសនៅក្នុងអន្តរកាលដែលលោកកាន់តួនាទីជារដ្ឋលេខាធិការក្រសួងវប្បធម៌។ លោកកត់សម្គាល់ថា៖«ចាប់តាំងពីឆ្នាំ២០១៩មក មានបងប្អូនសិល្បករក្រៅប្រព័ន្ធជាច្រើន បានចូលរួមជាមួយនឹងក្រសួងវប្បធម៌ក្នុងដំណើរការរៀបចំព្រឹត្តិការណ៍វប្បធម៌ធំៗទាំងកម្រិតជាតិ និងអន្តរជាតិដូចជាកម្មវិធីរាត្រីចងចាំ និងស្នាមញញឹមនៃកម្ពុជា ជាដើម»។ 

ក្នុងឱកាសនោះ សិល្បករចាស់ក្មេងជាច្រើនរូប ត្រូវបានផ្ដល់ឱកាសឡើងថ្លែងចំណាប់អារម្មណ៍ជុំវិញកិច្ចការងារសិល្បៈក៏ដូចជាបទពិសោធន៍ធ្លាប់បានជួបប្រទះក្នុងអាជីពរបស់ខ្លួននាពេលកន្លងមក។ ជាពិសេសការបង្កលក្ខណៈចូលរួមជាមតិយោបល់នានា សំដៅចូលរួមថែរក្សានូវតម្លៃ និងសេចក្ដីថ្លៃថ្នូរបស់សិល្បករ-សិល្បការិនី ក៏ដូចជាមុខមាត់នៃវិស័យសិល្បៈវប្បធម៌ជាតិទាំងមូល កាត់បន្ថយការរិះគន់ពីស្រទាប់មហាជន និងការផ្លាស់ប្ដូរយោបល់អំពីការយ៉ាងណាដើម្បីឱ្យសិល្បៈជាតិយើងកាន់តែមានការរីកចម្រើន ព្រមទាំងលើកឡើងជាសំណូមពរទៅកាន់ក្រសួងវប្បធម៌ និងវិចិត្រសិល្បៈផងដែរ។

តាមរយៈកិច្ចសំណេះសំណាលនេះ ក៏មានការប្រគល់ប័ណ្ណថ្លែងអំណរគុណជូនដល់សិល្បករ សិល្បការិនី និងក្រុមការងារដែលបានចូលរួមជាមួយនឹងក្រសួងវប្បធម៌នាពេលកន្លងមក ព្រមទាំងពិសារអាហារសាមគ្គីប្រកបដោយភាពសប្បាយរីករាយ។ ចំពោះសិល្បកររៀមច្បងដែលមានវ័យចាប់៦០ឆ្នាំឡើង ក៏ទទួលបានថវិកាឧបត្ថមក្នុងម្នាក់២០ម៉ឺនរៀលផងដែរ៕

The post សិល្បករ-សិល្បការិនី ចែករំលែកបទពិសោធដើម្បីថែរក្សានូវតម្លៃ និងសេចក្ដីថ្លៃថ្នូរ appeared first on Kampuchea Thmey Daily.

នៅ​រសៀលថ្ងៃទី២៤ ខែកុម្ភៈ ឆ្នាំ ២០២៥ លោក វ៉ាន់ តារ៉ាផាន់ ហៅនាយត្រដក់ និងលោកស្រី ជុំ រស្មី ហៅស្រីទូច ជាសមាជិក-សមាជិកា បាន​ទៅ​ដល់​ទីតាំង​ផ្ទាល់នៃសមាគមសិល្បករខ្មែរ ដើម្បីថ្លែងអំណរគុណដល់លោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ដែលបានជួយសម្របសម្រួល ផ្ដល់​មេធាវី​ការពារ​ក្តី​ប្រចាំ​សមាគមសិល្បករខ្មែរ ជួយដោះស្រាយវិវាទ ដែល​កើត​ឡើង​នៅ​ក្នុង​គ្រួសាររបស់អ្នកនាង កាទូច និងនាយត្រដក់ តាំងពីឆ្នាំ ២០២១ មកម្ល៉េះ និង​បាន​ធ្វើ​តាម​សេចក្តី​សម្រេច​របស់តុលាការ។

ក្នុងឱកាស​នោះ​ លោកស្រី ជុំ រស្មី ហៅស្រីទូច បាននិយាយថា” ខ្ញុំសូមគោរពថ្លែងអំណរគុណ និងដឹងគុណយ៉ាងជ្រាលជ្រៅចំពោះលោកជំទាវ អ្នកឧកញ៉ា ម៉ៅ ចំណាន គិតម៉េង ជាប្រធានសមាគមសិល្បករខ្មែរ ដែលបានជួយនៅក្នុងរឿងក្ដីរបស់នាងខ្ញុំ ដោយសមាគមបាន ផ្តល់សេវាមេធាវីតាមរយៈលោកស្រី ឈីវ ភិរម្យ ដែលជាសមាជិកក្រុមប្រឹក្សាភិបាល នៃសមាគមសិល្បករខ្មែរ “។

លោកស្រី ជុំ រស្មី ហៅស្រីទូច បាន​ឱ្យដឹងថា ចាប់តាំងពីថ្ងៃទី០៩ ខែកក្កដា ឆ្នាំ២០២៤ លោក​មេធាវី ធួន សុធា បានខិតខំជួយនាងខ្ញុំរកដំណោះស្រាយសះជា និងឈានបានដល់លទ្ធផលជាទីគាប់ចិត្ត និងបានបញ្ចប់ជាស្ថាពរ​កាលពីថ្ងៃទី២៣ ខែមករា ឆ្នាំ២០២៥។

ក្នុងឱកាសនោះ លោក វ៉ាន់ តារ៉ាផាន់ ហៅនាយត្រដក់ និងលោកស្រី ជុំ រស្មី ហៅស្រីទូច ក៏បានប្រសិទ្ធពរ បវរសួស្តីមហាប្រសើរ ជូនចំពោះលោកជំទាវ អ្នកឧកញ៉ា សូមសមប្រកបតែនឹង ពុទ្ធពរទាំង ៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

The post តារា​កំប្លែងជើងចាស់ ស្រីទូច និងនាយត្រដក់ ថ្លែង​អំណរគុណ លោក​ជំទាវ​អ្នកឧកញ៉ា ម៉ៅចំណាន គិតម៉េង ដែល​បញ្ចប់​វិវាទ​ដ៏​រ៉ាំរ៉ៃ​ចប់​ជាស្ថាពរ appeared first on Kampuchea Thmey Daily.

គួរជម្រាបថា ដើម្បីរួមចំណែករក្សាស្ថិរភាពតម្លៃស្រូវអង្ករ និងសន្តិសុខស្បៀងរបស់កម្ពុជា កាលពី​រសៀល​ថ្ងៃ​ទី ១៥ ខែ​មករា ម្សិលមិញនេះ កំពូលតារាចម្រៀង ឧកញ៉ា ព្រាប សុវត្ថិ និងឧកញ៉ា ខេមរៈ សិរីមន្ត បានប្រកាសជួយទិញស្រូវពីប្រជាកសិករចំនួន ៥០តោន ពីប្រជាពលរដ្ឋ​ដែល​កំពុង​មាន​ជីវភាព​ខ្វះខាត។

ដោយឡែក លោក ខាន់ ជេមស៌ ក៏បានប្រកាសជួយទិញស្រូវពីប្រជាកសិករចំនួន ២០ តោន ដោយយល់ឃើញថា ការរួមចំណែកជួយទិញស្រូវពីកសិករ ជាយុទ្ធសាស្ត្រដ៏ល្អមួយ។

ក្រៅពីសិល្បករទាំង ៣រូប ក៏នៅមានអ្នកធនធានមួយចំនួនទៀត ប្រកាសប្រមូលទិញស្រូវពីប្រជាកសិករផងដែរ។ ខណៈជំទាវឧកញ៉ា សុខ រស្មី ដែលមហាជនតែងស្គាល់តាមរយៈសកម្មភាពកម្សាន្តផ្សព្វផ្សាយពីការប្រកបរបររបស់ប្រជាពលរដ្ឋនោះ ក៏បានទៅកាន់ទឹកដីខេត្តបាត់ដំបងហើយ នៅព្រឹកថ្ងៃទី១៦ មករានេះ ដោយបានប្រមូលទិញស្រូវចំនួន ១០តោន​ ពីបងប្អូនប្រជាកសិករខ្មែរនៅទីនោះ ដើម្បីត្រៀមចែកជូនអ្នកដែលខ្វះខាត។ ក្នុងនោះ ក៏នៅមានក្រុមហ៊ុន និងឃ្លាំងស្រូវអង្ករ ជួយប្រមូលទិញស្រូវអង្ករពីប្រជាកសិករផងដែរ៕

The post អ្នកសិល្បៈ និងអ្នកមានធនធាន ស្រាក់ដៃគ្នាជួយប្រមូលទិញស្រូវពីកសិករ appeared first on Kampuchea Thmey Daily.