មន្ត្រីជំនាញបានប្រើប្រាស់រថយន្តមន្ទីរពិសោធន៍ចល័ត ដើម្បីដកសំណាកគំរូម្ហូបអាហារចំនួន ១៦សំណាក យកមកវិភាគរកសារធាតុគីមីហាមឃាត់ដែលបង្កគ្រោះថ្នាក់ដល់សុខភាព៖ ការពិនិត្យរកសារធាតុហ្វ័រម៉ាលីន (Formalin): បានពិនិត្យលើបង្គា និងមឹក (ចំនួន ៥គំរូ) ជាលទ្ធផលគឺ “អវិជ្ជមាន”។ ការពិនិត្យរកសារធាតុបូរ៉ាក់ (Borax): បានពិនិត្យលើសាច់ក្រក, ប្រហិតសាច់គោ, ប្រហិតត្រី, ហតដក, សរសៃគុយទាវ និងលត (ចំនួន ១៣ គំរូ) ជាលទ្ធផលគឺ “អវិជ្ជមាន” ទាំងអស់។ ជារួម គំរូដែលបានដកមកធ្វើតេស្តនៅនឹងកន្លែង គឺពុំមានវត្តមានសារធាតុគីមីហាមឃាត់ឡើយ ដែលនេះ ជាសញ្ញាវិជ្ជមានសម្រាប់សុវត្ថិភាពម្ហូបអាហារនៅតំបន់កម្សាន្តដ៏សំខាន់មួយនេះ។

ក្រៅពីការធ្វើតេស្តគុណភាព លោក ហៀង ដារ៉ា និងក្រុមការងារក៏បានចុះតាមភោជនីយដ្ឋាន តូបលក់ដូរ និងរទេះរុញ ដើម្បីពង្រឹងវិធានអនាម័យ ក្នុងនោះបានណែនាំអំពីការរក្សាទុកដាក់ម្ហូបអាហារឱ្យបានត្រឹមត្រូវតាមបច្ចេកទេស។ បន្ថែមពីនេះ ក៏បានបិទស្លាកផ្សព្វផ្សាយ ដោយបិទរូបភាពអប់រំស្តីពីការជ្រើសរើសម្ហូបអាហារដែលមានសុវត្ថិភាព ដើម្បីឱ្យអ្នកលក់ និងអ្នកទិញមានការយល់ដឹងកាន់តែច្បាស់ ព្រមទាំងបានជំរុញឱ្យអាជីវករលក់ដូរក្នុងតម្លៃសមរម្យ មិនត្រូវឆ្លៀតឱកាសតម្លើងថ្លៃក្នុងថ្ងៃបុណ្យទានឡើយ។

សូមជម្រាបថា តំបន់មាត់ទន្លេវ៉ៃគោ គឺជាបេះដូងនៃលម្ហែកាយរបស់ក្រុងស្វាយរៀង។ ការចុះត្រួតពិនិត្យនេះ មិនមែនជាការរឹតត្បិតអាជីវកម្មឡើយ ប៉ុន្តែគឺជាការ “ការពារ និងលើកកម្ពស់” កិត្តិយសរបស់ខេត្ត។ លោក ហៀង ដារ៉ា បានបញ្ជាក់ថា ការធានាបាននូវម្ហូបអាហារមានគុណភាព និងសុវត្ថិភាព គឺជាកាដូដ៏ល្អបំផុតដែលមន្ត្រីជំនាញ និងអាជីវកររួមគ្នាផ្តល់ជូនប្រជាពលរដ្ឋ មុនថ្ងៃចូលឆ្នាំថ្មីចូលមកដល់។ លោកបានអំពាវនាវដល់អាជីវករទាំងអស់ ត្រូវប្រកាន់ខ្ជាប់នូវក្រមសីលធម៌វិជ្ជាជីវៈ ដោយលក់តែចំណីអាហារដែលមានគុណភាព និងសុវត្ថិភាព ព្រោះវាជាផ្នែកមួយដ៏សំខាន់ក្នុងការលើកកម្ពស់សោភណភាព និងទំនុកចិត្តសម្រាប់ភ្ញៀវទេសចរដែលមកលេងកម្សាន្តក្នុងខេត្តស្វាយរៀង ។

សកម្មភាពនេះ បានទទួលការអបអរសាទរ និងគាំទ្រយ៉ាងខ្លាំងពីសំណាក់មហាជន ដែលធ្វើឱ្យពួកគាត់កាន់តែមានទំនុកចិត្តក្នុងការមកទទួលទានអាហារ និងកម្សាន្តនៅតំបន់មាត់ទន្លេវ៉ៃគោ ប្រកបដោយភាពសប្បាយរីករាយ និងសុវត្ថិភាព៕

ដោយ​៖ ភក្ដី

The post មន្ត្រីខេត្តស្វាយរៀង ចុះត្រួតពិនិត្យសុវត្ថិភាពម្ហូបអាហារនៅមាត់ទន្លេវ៉ៃគោ ដើម្បីការពារសុខភាពពលរដ្ឋ appeared first on Kampuchea Thmey Daily.

ក្នុងកិច្ច​ពិភាក្សា​កម្រិត​ខ្ពស់ នៃ​វេទិកា និង​ពិព័រណ៍​កសិកម្ម​កម្ពុជា​២០២៥ ក្រោមប្រធានបទ “ការផ្គត់ផ្គង់​ទីផ្សារ​ដើម្បី​ឆ្លើយ​តប​នឹង​កំណើន​តម្រូវការ​ក្នុង​ស្រុក និង​សម្រាប់ការនាំចេញ៖ កាលានុវត្តភាពសម្រាប់វិស័យកសិអាហារនៅកម្ពុជា ” លោក ហែម វណ្ណឌី បានលើកឡើងថា វិស័យកសិកម្ម​នៅ​តែ​ជា​វិស័យ​គន្លឹះ​នៃ​សេដ្ឋកិច្ចកម្ពុជា។

លោក​ថា មនុស្ស​នៅតែ​ត្រូវការ​ទទួល​ទាន​អាហារ ប៉ុន្តែ​ពួកគាត់​មាន​ការ​រំពឹងទុក​កាន់តែ​ខ្ពស់ថា អាហារ​ដែល​ពួកគាត់​ទទួល​ទាន​ត្រូវតែមាន​គុណភាព និង​សុវត្ថិភាព។ នេះជាបញ្ហាប្រឈម ហើយក៏ជា​ឱកាស​សម្រាប់​ការ​អភិវឌ្ឍ​វិស័យ​កសិអាហារ​ដែលផ្តល់តម្លៃបន្ថែមខ្ពស់ផងដែរ។

លោក​រដ្ឋ​មន្ត្រី​បានសង្កត់ធ្ងន់លើសារៈសំខាន់នៃការអនុវត្តស្តង់ដារ និងការធានាគុណភាព ថាជា​មូលដ្ឋានគ្រឹះ​នៃ​ភាព​ប្រកួតប្រជែង ព្រមទាំងភាពចាំបាច់នៃការប្រមូលផ្តុំ ដែលកសិករ និងសហគ្រាសផលិត អាចធានា​ចីរភាពនៃ​បរិមាណផ្គត់ផ្គង់ ដើម្បី​បំពេញលក្ខខណ្ឌតម្រូវជាក់លាក់របស់អ្នកទិញ។

លោក​រដ្ឋមន្ត្រី ហែម វណ្ណឌី បានបន្ថែមថា ដើម្បីទាក់ទាញការវិនិយោគទាំងក្នុងស្រុក និងពីបរទេស លើ​វិស័យ​កសិ​អាហារ ការងារសំខាន់ពីរដែលត្រូវពង្រឹងគឺ ការអនុវត្តកិច្ចសន្យា និងការអនុវត្តជំនាញឯកទេស ដែល​កសិករ​ផ្តោត​លើ​ការដាំដុះឱ្យត្រូវតាមស្តង់ដារ អ្នកកែច្នៃធានាថាការផលិតនិងការវេចខ្ចប់មានគុណភាព និង​សុវត្ថិភាព ហើយ​ការធ្វើទីផ្សារ លក់ និងចែកចាយ ត្រូវបានអនុវត្តដោយភ្នាក់ងារឯកទេស ក្នុង​ខ្សែច្រវាក់​តម្លៃ​ដែល​មាន​ភាព​ប្រទាក់​ក្រឡា​មួយ។

សូម​ជម្រាប​ថា វេទិកា និងពិព័រណ៍កសិកម្មកម្ពុជា២០២៥ នេះ​ត្រូវបានរៀបចំឡើងពីថ្ងៃទី១៣-១៦ ខែវិច្ឆិកា នៅមជ្ឈមណ្ឌលសន្និបាត និងពិព័រណ៍កោះពេជ្រ៕

​

The post លោក ហែម វណ្ណឌី៖ ការអនុវត្តកិច្ចសន្យា និងជំនាញឯកទេស ជាគន្លឹះសម្រាប់ភាពប្រកួតប្រជែងវិស័យកសិអាហារ appeared first on Kampuchea Thmey Daily.

កាល​ពី​ពេល​ថ្មី​ៗ​កន្លង​ទៅ​នេះ លោក ហែម វណ្ណឌី លើក​ឡើង​ថា សុវត្ថិភាពម្ហូបអាហារគឺជាអាទិភាពជាតិ ដែលទាមទារភាពជាក់លាក់ផ្នែកបច្ចេកទេស និងការសម្របសម្រួលស្ថាប័ន។ គោលដៅរបស់យើង គឺរៀបចំ​យន្តការ​ជ្រើសរើស​មន្ទីរ​ពិសោធន៍​ផ្លូវការ និង​មន្ទីរ​ពិសោធន៍​យោង សម្រាប់​វិភាគ​ម្ហូប​អាហារ ព្រម​ទាំង​អាច​ទទួល​បាន​ការគាំទ្រ និងពង្រឹងសមត្ថភាព ដើម្បី​លើក​កម្ពស់​ភាព​អនុលោមនៃមន្ទីរពិសោធន៍ទាំងនោះ។

សុវត្ថិភាព​ម្ហូបអាហារប៉ះ​ពាល់​ផ្ទាល់​ដល់​សុខភាពអ្នកប្រើប្រាស់ និងទំនុកចិត្តទីផ្សារ ហើយការវាយ​តម្លៃ​ទទួល​ស្គាល់មន្ទីរ​ពិសោធន៍​វិភាគម្ហូប​អាហារ ដោយផ្អែកលើស្តង់ដារបច្ចេកទេស មានសារៈសំខាន់ ដើម្បីធានា​ថា​មន្ទីរពិសោធន៍​ទាំងនោះ​ដំណើរ​ការ និង​ផ្តល់​លទ្ធផល​វិភាគ​ប្រកប​ដោយ​គុណភាព ភាពជឿជាក់ និងប្រសិទ្ធភាព។

លោក​រដ្ឋមន្ត្រី ក៏​បាន​កោត​សរសើរ​ដល់​សមាជិក​គណៈកម្មាធិការ​មន្ទីរ​ពិសោធន៍​វិភាគ​ម្ហូបអាហារ ចំពោះ​ការ​ប្តេជ្ញាចិត្ត ព្រម​ទាំង​បាន​ណែនាំ​ឱ្យ​លេខាធិការដ្ឋាន​នៃ​គណៈកម្មាធិការ​ រៀបចំផែនការប្រចាំឆ្នាំ និងរបបប្រជុំទៀងទាត់ ដើម្បីតាមដានវឌ្ឍនភាពការងារ។

លោក​រដ្ឋមន្ត្រី បានរំលឹកថា ការវាយតម្លៃទទួលស្គាល់ជាតិ និងអន្តរជាតិ​នឹង​ដើរ​តួនាទី​សំខាន់​ក្នុង​ការ​ពង្រឹង​សមត្ថភាព​មន្ទីរ​ពិសោធន៍​វិភាគ​ម្ហូប​អាហារ​នៅ​កម្ពុជា ដែលនឹង​បម្រើ​ជា​សសរស្តម្ភ​សម្រាប់​ការពារ​សុខភាព​សាធារណៈ និង​កសាង​ទំនុក​ចិត្ត​របស់​អ្នកប្រើប្រាស់លើផលិតផលម្ហូបអាហារនៅកម្ពុជា៕

The post សុវត្ថិភាពម្ហូបអាហារ ជាអាទិភាពជាតិទាមទារភាពជាក់លាក់ផ្នែកបច្ចេកទេស ​ appeared first on Kampuchea Thmey Daily.

ជាង​ពេលណា​ៗទាំងអស់ ប្រធាន​បទសុវត្ថិភាព​ម្ហូបអាហារ​ ត្រូវបាន​រាជរដ្ឋាភិបាល​ចាត់ទុកជា​បញ្ហាសំខាន់ទី១ ក្នុង​ចំណោម​​អតុល្យភាព​ទាំង ១២ ដែល​ត្រូវយក​ចិត្តទុកដាក់ និង​ស្វែងរក​ដំណោះ​ស្រាយ ដែល​គ្រប់​ក្រសួងស្ថាប័ន​ពាក់ព័ន្ធ​នឹង​គុណភាព សុវត្ថិភាពម្ហូបអាហារ (ចាប់​ពីកសិដ្ឋាន ដល់​កន្លែងបរិភោគ)។ ​រដ្ឋមន្រ្តីក្រសួង​ពាណិជ្ជកម្ម​ លោកស្រី ចម និម្មល បាន​គូស​បញ្ជាក់​មុន​បន្ថែម​ថា គ្រប់​ភាគីពាក់ព័ន្ធទាំងអស់ក៏ត្រូវសហការ និង​ផ្ដល់​ព័ត៌មាន​ដល់គ្នាទៅ​វិញ​ទៅ​មក​ ដើម្បី​សម្រួល​ដល់​ការ​ធ្វើផែនការ និង​រៀបចំកម្មវិធីជា​តិសម្រាប់ការអនុវត្ត និងការវិភាគ ដើម្បីគ្រប់គ្រង​ហានិភ័យ​ដែល​អាចកើត​​មាននៅ​គ្រប់ខ្សែច្រវាក់ផលិតកម្មម្ហូបអាហារ និងធានាថា​រាល់គោលការណ៍​ណែនាំស្តីពី​សុវត្ថិភាពម្ហូប​អាហារត្រូវបានអនុវត្ត និង​ផ្សព្វផ្សាយ​ជាសាធារណៈ ដោយមានការចូលរួមពីគ្រប់ភាគីពាក់ព័ន្ធ និង​អ្នក​ប្រើប្រាស់។

​ចាប់​យក​ឱកាស​នោះ រដ្ឋមន្ត្រី​ក្រសួងពាណិជ្ជកម្ម​ លើក​ឡើង ៤ ចំណុច ដើម្បីបំផុសជាយោបល់​សំដៅ​លើកកម្ពស់​គុណ​ភាព​ សុវត្ថិភាព​ចំណី​អាហារ​ដូច​ជា​៖ (១). ពង្រឹងគុណភាព សុវត្ថិភាពម្ហូបអាហារ «ចាប់ពីកសិដ្ឋានដល់កន្លែងបរិភោគ ដើម្បីអាចធានាបាននូវសន្តិសុខស្បៀងអាហារនិងការផ្គត់ផ្គង់តម្រូវការទីផ្សារក្នុងស្រុក (២). ការអនុវត្តភាព​ជា​ដៃគូ​រវាងរាជរដ្ឋាភិបាល វិស័យ​ឯកជន និងដៃគូអភិវឌ្ឍន៍ រឹតតែដើរ​តួនាទី​សំខាន់​ក្នុងការជួយគាំទ្រ​ដល់រាជរដ្ឋាភិបាលក្នុងការពង្រឹងសមត្ថភាព ក្នុងការអនុវត្តឱ្យបានពេញលេញ និងមានប្រសិទ្ធភាពនូវ “កិច្ចព្រមព្រៀងស្ដីពីវិធានការអនាម័យនិងភូតគាមអនាម័យ” របស់អង្គការ WTO

(៣). ភាពចាំបាច់ក្នុងការធានាបានថា វិធានការនានាពាក់ព័ន្ធគុណភាព សុវត្ថិភាព ជាពិសេស វិធានការ SPS មិនត្រូវបានអនុវត្តក្នុងលក្ខណៈ រើសអើងដោយគ្មានយុត្តិកម្ម ឬ ភ័ស្តុតាង​បែប​វិទ្យាសាស្រ្ត និងការវាយតម្លៃហានិភ័យត្រឹមត្រូវ ឬជាវិធានការរឹតត្បិតពាណិជ្ជកម្មអន្តរជាតិបែបបំភាន់ ដែល​អាចប៉ះពាល់​ដល់​សន្តិសុខស្បៀង​អាហារ​ក្នុងតំបន់ និង​សកលលោក និង ​(៤). ការពង្រឹងគុណភាព សុវត្ថិភាពម្ហូបអាហារ គ្រង់ក្រសួង ស្ថាប័នពាក់ព័ន្ធ ត្រូវបង្កើនកិច្ចប្រឹងប្រែងបន្ថែមទៀតផងដែរ ក្នុងការកាត់បន្ថយការបាត់បង់ស្បៀងអាហារ និងការខ្ជះខ្ជាយម្អូបអាហារ និងការគ្រប់គ្រងហានិភ័យដែលអាចកើតមាន តាមខ្សែចង្វាក់ផលិតកម្មកែច្នៃ និងវេចខ្ចប់ម្ហូបអាហារ។

ក្នុងពិធីបើកសិក្ខាសាលាថ្នាក់ជាតិ ស្តីពី “ការលើកកម្ពស់កិច្ចសហការ​សម្រាប់ការអនុវត្តប្រព័ន្ធត្រួតពិនិត្យម្ហូបអាហារនៅកម្ពុជាប្រកបដោយប្រសិទ្ធភាព” លោក​ស្រី ចម​ និម្មល​ បានបង្ហាញក្តីសង្ឃឹម​ថា តាម​រយៈ​សិក្ខា​សាលាថ្នាក់ជាតិនេះ នឹងបង្កើន​​ការយល់ដឹងដល់​គ្រប់ភាគីអ្នកចូលរួម ឱ្យបានកាន់តែស៊ីជម្រៅបន្ថែមទៀត លើក្របខណ្ឌ​ច្បាប់ និង​គោល​នយោបាយ​​សុវត្ថិភាព​ម្ហូបអាហារ តាមរយៈ​កិច្ចពិភាក្សា និង​ចែករំលែក​បទពិសោធន៍​ពីវាគ្មិន​ជាតិ និងអន្តរជាតិ លើ​​ប្រធានបទ​ដែល​ពាក់ព័ន្ធ៕

The post រដ្ឋមន្ត្រីក្រសួងពាណិជ្ជកម្ម ផ្តល់ការ​ណែនាំ​ ៤ ចំណុច ពង្រឹងគុណភាពសុវត្ថិភាពម្ហូបអាហារ appeared first on Kampuchea Thmey Daily.

ការិយាល័យការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) សាខារាជធានីភ្នំពេញ បានខិតខំយ៉ាងសស្រាក់សស្រាំក្នុងការចុះត្រួតពិនិត្យទីតាំងផលិត និងចែកចាយផលិតផលម្ហូបអាហារនៅទីផ្សារនានា។

ជាក់ស្ដែងនាថ្ងៃទី២១ ខែមីនា ឆ្នាំ២០២៣ ដឹកនាំដោយលោកប្រធានសាខា ក.ប.ប. រាជធានីភ្នំពេញ កម្លាំងមន្ត្រីជំនាញ បានខិតខំអនុវត្តតួនាទីរបស់ខ្លួនស្របតាមច្បាប់ជាធរមាន ដោយបានចុះត្រួតពិនិត្យជាក់ស្តែងនៅតាមបណ្តាទីផ្សារ និងតាមទីតាំង ឬសិប្បកម្មផលិតផលិតផលម្ហូបអាហារចំនួន ១ទីតាំង ក្នុងភូមិសាស្ត្រខណ្ឌទួលគោក និងទីតាំងផលិត ស្តុកទុកនំបាយក្តាំង និងគ្រឿងសមុទ្របង្កក ចំនួន២កន្លែង ក្នុងភូមិសាស្ត្រខណ្ឌដង្កោ។

ជាលទ្ធផល តាមការបញ្ជាក់របស់មន្ត្រីជំនាញ ទីតាំងផលិត ស្តុកទុក និងចែកចាយ ទាំង៣ខាងលើ ត្រូវបានមន្ត្រីជំនាញ រកឃើញថា មិនបានអនុលោមតាមបទដ្ឋានព័ត៌មានអ្នកប្រើប្រាស់ ហើយការផលិត ស្តុកទុក ចែកចាយ មិនស្របតាមស្តង់ដារបច្ចេកទេស និងបទប្បញ្ញត្តិជាធរមាននោះទេ។ ក្រោយរកឃើញនេះ មន្ត្រីជំនាញបានដកយកសំណាកគំរូមួយចំនួនពីទីតាំងទាំង៣នោះ រួចបញ្ជូនទៅនាយកដ្ឋានមន្ទីរពិសោធន៍ នៃអគ្គនាយកដ្ឋាន ក.ប.ប. ដើម្បីធ្វើការវិភាគលម្អិតបន្ថែម ក្រែងមានវត្តមានសារធាតុគីមីហាមឃាត់លើទំនិញទាំងនោះ៕

The post ទីតាំងចែកចាយនំបាយក្តាំង និងគ្រឿងសមុទ្របង្កក៣ទីតាំង ត្រូវបានរកឃើញថា គ្មានស្តង់ដារបច្ចេកទេសត្រឹមត្រូវ appeared first on Kampuchea Thmey Daily.

លោក មាន សុភា រដ្ឋលេខាធិការនៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថា សម្រាប់គម្រោង TASK Program ដំណាក់កាលទី១ បានចាប់ផ្តើមដំណើរការនៅឆ្នាំ ២០១៨ ដល់ ២០២០ ដោយ ផ្តោតគោលដៅតែនៅរាធានីភ្នំពេញប៉ុណ្ណោះ ហើយដែលបានជ្រើសរើសសហគ្រាសម្ហូបអាហារឲ្យចូលរួមចំនួន ១១ មូលដ្ឋាន ជ្រើសចេញពីសហគ្រាសប្រមាណ ១៥០ មូលដ្ឋាន។

ភាពជោគជ័យនៃ គម្រោង TASK Program-I ភាគីកូរ៉េ តាមរយៈ វិទ្យាស្ថានស្រាវជ្រាវម្ហូបអាហារកូរ៉េ (KFRI) បានបន្តផ្តល់ការគាំទ្រ និងអនុវត្តគម្រោង TASK PROGRAM ដំណាក់កាលទី ២ ចាប់ពីឆ្នាំ ២០២១ ដល់២០២៣ ដោយបានពង្រីកវិសាល ភាពទៅកាន់ខេត្តគោលដៅ បាត់ដំបង សៀមរាប និងរាជធានីភ្នំពេញ  ក្នុងនោះមានការចូលរួមពីសហគ្រាស ពីខេត្ត បាត់ដំបងចំនួន ៥ មូលដ្ឋាន ខេត្តសៀមរាប ចំនួន៥ មូលដ្ឋាន  ដោយជ្រើសចេញពីសហគ្រាសប្រមាណ ៧០ មូលដ្ឋានក្នុងខេត្តនីមួយៗ និងសហគ្រាសចំនួន ២មូលដ្ឋាន ទៀតក្នុងរាជធានីភ្នំពេញ ដែលធ្លាប់បានទទួលការអនុវត្តក្នុង គម្រោង TASK PROGRAM-I ដោយសហគ្រាសទាំង២ នោះបានកំពុងបន្តពង្រីកមុខផលិតផលរបស់ខ្លួន ដែល តម្រូវឲ្យមានការគាំទ្រពីគម្រោងបន្ត។នេះជាការបញ្ជាក់របស់លោក មាន​ សុភា។

បន្ថែមពីលើនេះរដ្ឋលេខាធិការនៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានបញ្ជាក់ទៀតថា ដោយភាពជោគជ័យនៃការអនុវត្តគម្រោង TASK Program ទាំងពីរដំណាក់កាលនេះហើយ ទើបនៅពេលដ៏ខ្លីនេះ ភាគីកូរ៉េ នឹងបន្តកិច្ចគាំទ្រតាមរយៈការផ្តល់ជំនួយអភិវឌ្ឍផ្លូវការតាមរយៈរដ្ឋាភិបាលនៃសាធារណរដ្ឋកូរ៉េ ដល់រដ្ឋាភិបាល នៃព្រះរាជាណាចក្រកម្ពុជា ក្នុងការរៀបចំបង្កើតជា មជ្ឈមណ្ឌលស្រាវជ្រាវម្ហូបអាហារកម្ពុជា ហៅកាត់ថា FTC ដែលនឹង ចេញជារូបរាងពិតប្រាកដនាពេលខាងមុខដ៏ខ្លី ក្នុងការបម្រើសេវាកម្ម និងការចែករំលែកចំណេះដឹង ចំណេះធ្វើ និង អភិវឌ្ឍន៍សហគ្រាសប្រកបដោយចីរភាព តាមរយៈការផ្តល់នូវសម្ភារៈបច្ចេកទេស  គ្រឿងចក្រ គ្រឿងម៉ាស៊ីន សម្រាប់ ផលិត និងអនុវត្តផ្ទាល់ រួមផ្សំ និងការបង្ហាត់បង្រៀន ការស្រាវជ្រាវ  ការពិសោធន៍ ជូនដល់សហគ្រាសផលិត និងកែច្នៃ ម្ហូបអាហារនៅកម្ពុជា។

នាឱកាសនេះដែរ លោក Kim Youngchan នាយកគម្រោង TASK Program និង FTC បានលើកឡើងដូច្នេះ ថាសម្រាប់គម្រោង TASK បានចុះទៅជាក់ស្ដែងតាមមូលដ្ឋានដូចជា ខេត្តបាត់ដំបង, សៀមរាប និងភ្នំពេញផងដែរ។ ជាងនេះទៅ សម្រាប់សហគ្រាសជាសមាជិក ត្រូវបានអញ្ជើញឱ្យចូលរួមទស្សនៈកិច្ចនៅសាធារណៈរដ្ឋកូរ៉េ ដើម្បីដកស្រង បច្ចេកទេស និងដំណើរផ្សេងទៀត។

លោកបន្ថែមថា បើទោះបីជាគម្រោងនេះបានបញ្ចប់នៅចុងឆ្នាំនេះក៏ដោយ តែតាមរយៈគម្រោងបង្កើតមជ្ឈមណ្ឌល ស្រាវជ្រាវម្ហូបអាហារកម្ពុជា ភាគីកូរ៉េ នឹងបន្តចូលរួមចំណែកលើកកម្ពស់ឧស្សាហកម្មចំណីអាហារនៅក្នុងប្រទេសកម្ពុជា បន្ត៥ឆ្នាំទៀត។

លោកលើកឡើងថា «យើងទាំងអស់គ្នានឹងព្យាយាមបង្កើតជាឱកាស ក៏ដូចជាជំរុញការងារនៅក្នុងគម្រោងនេះ ដើម្បីផ្តល់ ផលប្រយោជន៍ដល់ប្រជាជនកម្ពុជា ក៏ដូចជាសហគ្រាសនានាឱ្យត្រូវតាមតម្រូវការជាក់ស្តែង»។

សូមគូរបញ្ជាក់ថា នៅថ្ងៃទី ១៩ ដល់ ២៥ ខែវិច្ឆិកា ខាងមុខនេះ តាមរយះគម្រោង TASK Program នឹងផ្តល់ឱកាស សម្រាប់សហគ្រាសទាំង ១២មូលដ្ឋាន បានទៅធ្វើទស្សនៈកិច្ចសិក្សា និងចូលរួមការរៀបចំការតាំងពិពណ៍ជាលក្ខណៈ អន្តរជាតិ ផ្នែកឧស្សាហកម្មម្ហូបអាហារ ក៏ដូចជាមានការបង្ហាញផលិតផលបច្ចេកទេស និងបច្ចេកវិទ្យាថ្មីៗ នៅសាធារណៈ រដ្ឋកូរ៉េ មុននឹងគម្រោងត្រូវបានបញ្ចប់នាចុងឆ្នាំ២០២៣ ខាងមុខ៕

អត្ថបទ៖ ផល ធារិត

The post កម្ពុជា ជំរុញសហគ្រាសផលិតកែច្នៃអាហារ​ឱ្យស្របតាម​ស្តង់ដារសម្រាប់ទីផ្សារជាតិ និងអន្តរជាតិ​ appeared first on Kampuchea Thmey Daily.

នៅ​ក្នុង​ការ​ដឹក​នាំ​អ្នក​សារព័ត៌មាន​ទស្សនកិច្ច​សហគ្រាស​ជលផល​ក្រោយ​ប្រមូល​ផលនៅ​តាម​បណ្ដា​រាជធានី-ខេត្តចំនួន ៣ ដែល​ទទួល​បាន​ការ​គាំទ្រ​ពី​គម្រោង CAP-Fish លោក​ស្រី អ៉ឹម រចនា បាន​ចង្អុល​បង្ហាញ​ថា ការ​គិត​គូរ​ទៅ​ដល់​សុវត្ថិភាព​ម្ហូប​អាហារ គឺ​ពិត​ជា​មាន​សារៈសំខាន់​ណាស់​សម្រាប់​សុខភាព​របស់​មនុស្ស​គ្រប់រូប ព្រោះ​មនុស្ស​ជា​ច្រើន​នៅ​ក្នុង​ពិភព​លោក​ សុទ្ធ​តែ​ត្រូវ​ការ​អាហារ ១​ ថ្ងៃ ៣ ​ពេល​មិន​អាច​ខ្វះ​បាន​។

លោក ស្រី បាន​គូស​បញ្ជាក់​ថា «​ករណី​នេះ រដ្ឋបាល​ជលផលបាន​សហការ​ជាមួយ CAP FISH-Capture គម្រោង​អភិវឌ្ឍន៍​ជលផល​ក្រោយ​ប្រមូល​ផល អនុវត្ត​រួមគ្នា​ដោយ FiA និង UNIDO ក្រោម​សហហិរញ្ញប្បទាន​ពី​សហភាព​អឺរ៉ុប ជំរុញ​ឱ្យ​ដៃ​គូ​ពាក់ព័ន្ធ​ផលិត​ម្ហូបអាហារ​ឱ្យ​មាន​សុវត្ថិភាព មាន​ស្តង់ដារ លក់​ក្នុង​តម្លៃ​សមរម្យ ឱ្យ​អ្នក​ប្រើប្រាស់​មាន​លទ្ធភាព​ទិញ​បរិភោគ  ដើម្បី​កាត់​បន្ថយ​ការ​ចំណាយ  ទើប​អាច​ប្រកួត​ប្រជែង​​នៅ​លើ​ទីផ្សារ​ជាតិ និង​អន្តរជាតិ»។

លោក ពុំ សុថា ប្រតិភូ​​រាជរដ្ឋាភិបាល​ទទួល​បន្ទុក​ជា​អគ្គនាយក​រដ្ឋបាល​ជលផលបាន​ថ្លែង​ដែរ​ថា ដើម​ចម​ដែល​រដ្ឋបាល​ជលផល​សហការ​ជា​មួយ​អង្គការ UNIDO ផលិត​អាហារ​សុវត្ថិភាព​លក់​នៅ​លើ​ទីផ្សារ​ជាតិ និង​អន្តរជាតិ​ក៏​ដើម្បី​ជា​ផ្នែក​មួយ​ជួយ​ពង្រឹង​វិស័យ​ឯកជន និង​គិត​ពី​សុខភាព​របស់​អ្នក​ប្រើប្រាស់។

បច្ចុប្បន្ន​នេះ មាន​សហគ្រាស​ចំនួន​ ២៨ ដែល​បាន​ចូល​រួម​អនុវត្ត​ក្នុង​គម្រោង​នេះ ដែល​ក្នុង​នោះ​មាន​សហគ្រាស​ចំនួន ៨ ទទួល​បាន​វិញ្ញាបនបត្រ​បញ្ជាក់​គុណភាព CQS ពេញ​លេញ និង​សហគ្រាស​ចំនួន ៤ ទទួល​បាន​វិញ្ញាបនបត្រ​បញ្ជាក់​គុណភាព CQS ខណៈ​សហគ្រាស​ចំនួន ៦ ទៀត បាន​ស្នើ​សុំ​ចុះ​ពិនិត្យ​វាយតម្លៃ ដើម្បី​ទទួល​បាន​វិញ្ញាបនបត្រ CQS ពី​សំណាក់ FiA/DFPTQ ។  

ទៀត​សោត រដ្ឋបាល​​ជលផល និង​​ក្រសួង​កសិកម្មក៏​បាន​យកចិត្ត​ទុកដាក់​នៅ​ក្នុង​ការ​ផ្តល់​ពូជ​ល្អ កាត់​បន្ថយ​ថ្លៃ​ដើម  ចំណេញ​ពេលវេលា ខណៈ​ធនធាន​ជលផល​ក្រោយ​ប្រមូល​ផល​ពី​ធម្មជាតិ និង​ផល​ដែល​ទទួល​បាន​ពី​វារីវប្បកម្ម ត្រូវ​បាន​រក្សា និង​យក​ទៅ​កែច្នៃ​អាហារ​សុវត្ថិភាព​បន្ថែមដើម្បី​ប្រកួត​​ប្រជែង​លើ​ទីផ្សារ​ជាតិ និង​អន្តរជាតិ។  

ដោយ​ឡែក លោក​បណ្ឌិត សេតធី ស៊ីថារ៉ាម៉ា ថមបាធូ ប្រធាន​ទី​ប្រឹក្សា​បច្ចេកទេសអង្គការយូនីដូ (UNIDO) មាន​ប្រសាសន៍​ថា ផលិត​ជន​ផល​ក្រោយ​ប្រមូល​ផល​ស្តី​ពី​អាហារ​សុវត្ថិភាព រួម​មាន ត្រីឆ្អើរ ត្រីងៀត ទឹកត្រី  និង​បង្គា​ក្រៀម មាន​សារៈសំខាន់​ណាស់ ក្នុង​ប្រកួត​ប្រជែង​ជា​មួយ​ផលិតផល​ក្នុង​ស្រុក និង​ប្រទេស​ជិតខាង។ ជាពិសេសអាហារ​សុវត្ថិភាព​​នេះ នឹង​ត្រូវ​យក​ទៅ​ប្រកួតប្រជែង​នៅ​លើ​ទីផ្សារ​ជាតិ អន្តរជាតិ រួម​​ទាំង​សហភាព​អឺរ៉ុប​ផង​ដែរ៕  

The post លោកស្រី អ៊ឹម រចនា៖ មនុស្ស​ជាតិសុទ្ធ​តែ​​​ត្រូវ​ការ​អាហារ ១​ ថ្ងៃ ៣ ​ពេល​ ត្រូវ​គិតគូរ​ពី​សុវត្ថិភាពផលិត​ appeared first on Kampuchea Thmey Daily.

បើតាមលោក ឌិត ទីណា ដើម្បីសម្រេចគោលដៅនេះបាន ត្រូវការកិច្ចសហការចូលរួមពីអ្នកពាក់ព័ន្ធទាំងឡាយ ទើបអាចទទួលបានជោគជ័យក្នុងការអនុវត្តសុវត្ថិភាពចំណីអាហារ។ អ្នកពាក់ព័ន្ធទាំងនោះ រួមមាន វិស័យឯកជន អ្នកប្រើប្រាស់ និងស្ថាបនរាជរដ្ឋាភិបាលទាំងថ្នាក់ជាតិ និងក្រោមជាតិជាដើម។

វេជ្ជបណ្ឌិត ណាហ្គីស្សា ខូជេវ៉ា តំណាងស្តីទីអង្គការសុខភាពពិភពលោកប្រចាំនៅកម្ពុជា បានលើកឡើងថា ចំពោះ​សុវត្ថិភាពម្ហូបអាហារចាំបាច់ណាស់ ដើម្បីធានាបាននូវសន្តិសុខស្បៀង និងអាហារូបត្ថម្ភ លុះត្រាតែអាហារ​មាន​សុវត្ថិភាព ទើបអាចបំពេញតម្រូវការអាហារូបត្ថម្ភបាន និងជួយមនុស្សពេញវ័យរស់នៅប្រកបដោយសុខុមាលភាព និងជីវិតកាន់តែប្រសើរ ព្រមទាំងជួយកុមារលូតលាស់ និងអភិវឌ្ឍរាង្គកាយ ផងដែរ។  

ជាមួយគ្នានេះ លោក សុខ ណារិន តំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) បានឱ្យដឹង​ដែរថា ឧស្សាហកម្មកែច្នៃម្ហូបអាហាររបស់កម្ពុជា មានសក្តានុពលក្នុងការរួមចំណែកអភិវឌ្ឍន៍សេដ្ឋកិច្ចជាតិ ដូច្នេះ​រដ្ឋាភិបាល​បានខិតខំពង្រឹងសុវត្ថិភាព និងស្តង់ដារម្ហូបអាហារ ស្របពេលដែលប្រទេសនេះ កំពុងបោះជំហាន​ចូលទៅក្នុងទីផ្សារពិភពលោក។ បច្ចុប្បន្ន កម្ពុជា កំពុងជួយចងក្រងក្របខណ្ឌច្បាប់ និងប្រព័ន្ធត្រួតពិនិត្យម្ហូប​អាហារ​ជាច្រើន តាមរយៈការកសាងសមត្ថភាព ដើម្បីធានាបាននូវស្តង់ដារម្ហូបអាហារកាន់តែប្រសើរ និងឆ្លើយតបទៅ​នឹងតម្រូវការសុខភាពសាធារណៈ។

ជាងនេះទៅទៀត តាមរយៈការផ្តល់មូលនិធិរបស់សហភាពអឺរ៉ុប (EU) កម្ពុជា កំពុងអនុវត្តប្រព័ន្ធសុវត្ថិភាព​ម្ហូបអាហារ​ក្នុងវិស័យជលផល ដោយធ្វើយ៉ាងណាឱ្យមានភាពស៊ីសង្វាក់គ្នាជាមួយលក្ខខ័ណ្ឌតម្រូវនានារបស់សហភាពអឺរ៉ុប ព្រម​ទាំង​អាចយកទៅប្រើក្នុងវិស័យផ្សេងទៀតផង។ 

ក្នុងនោះលោកស្រី គ្លែ ខូណន នាយិកាកម្មវិធីស្បៀងអាហារពិភពលោក (WFP) មានមតិលើកឡើងថា «យើងជឿការ​ទទួលបាន​អាហារដែលមានសុវត្ថិភាព និងសារជាតិចិញ្ចឹមគ្រប់គ្រាន់ គឺជាសិទ្ធិមូលដ្ឋានរបស់មនុស្សម្នាក់ៗ។ តាមរយៈ​ការ​ធ្វើការលើសុវត្ថិភាពម្ហូបអាហារក្នុងបរិបទនៃកម្មវិធីផ្តល់អាហារតាមសាលារៀន ដោយប្រើប្រាស់កសិផល​ក្នុងសហគមន៍ យើងមិនត្រឹមតែផ្តល់អាហារដល់កុមារដែលខ្វះខាតម្ហូបអាហារប៉ុណ្ណោះទេ ប៉ុន្តែថែមទាំងធានាថា ម្ហូបអាហារ ដែលពួកគេបរិភោគមានសុវត្ថិភាព និងប្រកបដោយផាសុខភាពផងដែរ»៕

អត្ថបទ ៖ ផល ធារិត

The post កម្ពុជា បានបោះជំហានទៅមុខ ក្នុងការអភិវឌ្ឍស្តង់ដារម្ហូបអាហារ​នៅគ្រប់ដំណាក់កាល​នៃខ្សែចង្វាក់​ផលិតកម្ម appeared first on Kampuchea Thmey Daily.