សេដ្ឋកិច្ចកម្ពុជា Archives - Kampuchea Thmey Daily

អ្នកវិភាគមើលឃើញពីសក្ដានុពលពាណិជ្ជកម្មសេរីរវាងកម្ពុជានិងអឺរ៉ាស៊ីស្របគ្នានឹងបញ្ហាប្រឈមមួយចំនួន

hun sirivadh — Tue, 23 Jun 2026 05:10:49 +0000

អ្នកភូមិសាស្ត្រនយោបាយ និងសេដ្ឋកិច្ចថាការបង្កើតពាណិជ្ជកម្មសេរីរវាងកម្ពុជា និងតំបន់អឺរ៉ាស៊ីគឺជាឱកាសដ៏វិជ្ជមាននៃទំនាក់ទំនងការបរទេស ពាណិជ្ជកម្មរបស់កម្ពុជា តែក៏មានបញ្ហាប្រឈមមួយចំនួនផងដែរ រួមទាំងការឃ្លាំងមើលពីលោកខាងលិច។ អ្នកវិភាគជំរុញ ការបង្ហាញតម្លាភាពនៃទំនាក់ទំនង បង្កើតប្រព័ន្ធភស្តុភារកម្មដែលមានចម្រុះបែប ព្រមទាំងការប្រើប្រាស់យន្តការការទូតដែលមិនជ្រើសរើសជម្លោះភូមិសាស្ត្រនយោបាយ។

សម្ដេចធិបតី ហ៊ុន ម៉ាណែត និងប្រធានក្រុមប្រឹក្សាភិបាលនៃគណៈកម្មការសេដ្ឋកិច្ចអឺរ៉ាស៊ី លោក នួរឡាន យ៉ឺមេកបាយ៉េវ ថ្ងៃទី១៨ ខែមិថុនា ឆ្នាំ២០២៦ ទីក្រុងកាហ្សាន ប្រទេសរុស្ស៊ី

I. តើអ្វីជាអឺរ៉ាស៊ី?

សហភាពសេដ្ឋកិច្ចអឺរ៉ាស៊ី (Eurasian Economic Union – EAEU) គឺជាប្លុកសមាហរណកម្មសេដ្ឋកិច្ចអន្តរជាតិមួយដែលបង្កើតឡើងនៅឆ្នាំ២០១៥ ដើម្បីជំរុញការផ្លាស់ប្ដូរពាណិជ្ជកម្ម សេរីភាពនៃការហូរចូលទុន ទំនិញ សេវាកម្ម និងកម្លាំងពលកម្ម រវាងបណ្ដាប្រទេសសមាជិកតំបន់អឺរ៉ុបខាងកើត និងអាស៊ីកណ្ដាល ដែលមានប្រទេសជាសមាជិកពេញសិទ្ធិចំនួន៥ដែលធ្លាប់ជាអតីតសហភាពសូវៀត គឺ រុស្ស៊ី កាហ្សាក់ស្ថាន បេឡារូស អាមេនី និងកៀហ្ស៊ីស្ថាន។ EAEU កំពុងពង្រឹងទំនាក់ទំនងតាមរយៈកិច្ចព្រមព្រៀងពាណិជ្ជកម្មសេរីជាមួយបណ្ដាប្រទេសមួយចំនួនទៀតដូចជា វៀតណាម សិង្ហបុរី និងអ៊ីរ៉ង់ជាដើម។

អ្នកស្រាវជ្រាវសង្គម សេដ្ឋកិច្ច លោកបណ្ឌិត ជ័យ តិច បានឱ្យដឹងថា កាលពីឆ្នាំ២០១៦ កម្ពុជាក៏ធ្លាប់ចុះ MOU ជាមួយEAEU នេះដើម្បីបង្កើតក្រុមការងារជំរុញពាណិជ្ជកម្ម និងការវិនិយោគ និងសមិទ្ធិលទ្ធកម្មក្នុងការបង្កើតឱ្យមានកិច្ចព្រមព្រៀងពាណិជ្ជកម្មសេរីជាមួយគ្នាផងដែរ។ តែមកទល់ពេលនេះមិនទាន់មានការវិវត្តន៍យ៉ាងណាទេ។

II. ផលប្រយោជន៍នៃការបង្កើតពាណិជ្ជកម្មសេរីជាមួយ EARU

ក្នុងជំនួបជាមួយប្រធានក្រុមប្រឹក្សាភិបាលនៃគណៈកម្មការសេដ្ឋកិច្ចអឺរ៉ាស៊ី លោក នួរឡាន យ៉ឺមេកបាយ៉េវ អំឡុងពេលអញ្ជើញទៅចូលរួមកិច្ចប្រជុំកំពូលរុស្ស៊ី-អាស៊ាន កាលពីថ្ងៃទី១៨ ខែមិថុនា នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានស្នើឱ្យមានការសិក្សាពីលទ្ធភាពនៃកិច្ចព្រមព្រៀងពាណិជ្ជកម្មសេរីកម្ពុជា និងសហភាពសេដ្ឋកិច្ចអឺរ៉ាស៊ី ដើម្បីពង្រឹងទំនាក់ទំនងពាណិជ្ជកម្ម និងសេដ្ឋកិច្ចរវាងភាគីទាំងពីរផងដែរ។

សម្ដេចក៏បានបញ្ជាក់បែបនេះម្ដងទៀត ដោយស្នើសុំឱ្យមានការគាំទ្រពីរុស្ស៊ី ក្នុងជំនួបជាមួយប្រធានាធិបតីរុស្ស៊ីលោក វ្លាឌីមៀ ពូទីន ផងដែរ។

សម្រាប់អ្នកជំនាញភូមិសាស្ត្រនយោបាយ និងសេដ្ឋកិច្ចអន្តរជាតិ លោកបណ្ឌិត ញិល រដ្ឋា បានឱ្យដឹងថាការបង្កើតទំនាក់ទំនងពាណិជ្ជកម្មសេរីជាមួយតំបន់នេះនឹងផ្ដល់ប្រយោជន៍ចំនួន៣ដល់កម្ពុជា គឺការធ្វើពិពិធកម្មទីផ្សារ ដែលអាចឱ្យកម្ពុជាកាត់បន្ថយការពឹងផ្អែកខ្លាំងលើទីផ្សារអឺរ៉ុប និងអាមេរិក ខណៈកម្ពុជាក៏អាចទាក់ទាញអ្នកវិនិយោគ និងបច្ចេកវិទ្យាពីបណ្ដាប្រទេសនៅតំបន់នេះមកក្នុងប្រទេសផងដែរ។ ចំណុចមួយទៀតដែលលោកបណ្ឌិត ញិល រដ្ឋា មើលឃើញនោះគឺការធានាដល់សន្តិសុខថាមពល និងវត្ថុធាតុដើម ព្រោះប្រទេសរុស្ស៊ី និងកាហ្សាស្ថាន ដែលជាសមាជិកនៃតំបន់នេះគឺជាប្រភពផ្គត់ផ្គង់ប្រេង ហ្គាស និងជីកសិកម្មដ៏ធំបំផុតក្នុងពិភពលោក។

អ្នកជំនាញភូមិសាស្ត្រនយោបាយ និងសេដ្ឋកិច្ចអន្តរជាតិ លោកបណ្ឌិត ញិល រដ្ឋា

លោកបណ្ឌិត ជ័យ តិច ក៏យល់ប្រហាក់ប្រហែលគ្នានេះផងដែរជាពិសេសគឺឧស្សាហកម្មថាមពលដែលប្រទេសក្នុងតំបន់នេះមានសក្ដានុពល។

លោកថា៖ «ខ្ញុំមើលឃើញជាពិសេសថារុស្ស៊ីដែលជាប្រទេសមានសក្ដានុពលពាក់ព័ន្ធនឹងឧស្សាហកម្មថាមពលដូចជាការខួងប្រេង ផលិតកម្មប្រេង ឧស្ម័ន ហើយក៏ដូចជាផលិតផលសព្វាវុធដែលរុស្ស៊ីជាមហាអំណាចទី២លើលោក ហើយជាប្រទេសដែលមានបទពិសោធន៍ក្រាស់ក្រែលផលិតចេញនូវឧស្ម័នក្នុងលោកផងដែរ។ ក៏ដូចជាការកសាងនូវរោងចក្រថាមពលនុយក្លេអ៊ែរស៊ីវិលដើម្បីវិស័យថាមពលរបស់យើងប្រកបដោយភាពធន់ និងកុំឱ្យរងនូវសម្ពាធពីភូមិសាស្ត្រនយោបាយពីសង្គ្រាមដែលកើតឡើងជាពិសេសដូចករណីចុងក្រោយនៅតំបន់មជ្ឈិមបូព៌ា ដែលប៉ះពាល់ដល់វិស័យថាមពល អតិផរណា ប៉ះពាល់ដល់សេដ្ឋកិច្ចនិងការប្រកួតប្រជែងរបស់កម្ពុជា»។

III. បញ្ហាប្រឈម និងដំណោះស្រាយ

បើទោះបីជាមានភាពវិជ្ជមានក្ដីតែសម្រាប់អ្នកតាមដានក៏បានបង្ហាញនូវការបារម្ភមួយចំនួនផងដែរទាក់ទងនឹងការឃ្លាំមើល ឬសម្ពាធការទូតខ្លះពីលោកខាងលិច បញ្ហាទាក់ទងនឹងប្រព័ន្ធទូទាត់ប្រាក់ និងប្រព័ន្ធភស្តុភារកម្ម ដឹកជញ្ជូនជាដើម។

លោកបណ្ឌិត ញិល រដ្ឋា បានឱ្យដឹងថារុស្ស៊ីដែលជាអ្នកដឹកនាំឈានមុខគេរបស់តំបន់នេះកំពុងតែប្រឈមមុខនឹងទណ្ឌកម្មពីលោកខាងលិច ដូច្នេះការបង្កើតពាណិជ្ជកម្មសេរីជាមួយតំបន់នេះក្នុងពេលបច្ចុប្បន្នក៏អាចរងការឃ្លាំមើល ឬសម្ពាធការទូតខ្លះពីលោកខាងលិចដែរតែលោកថាភាគរយតិចប៉ុណ្ណោះ។

លោកបណ្ឌិតថា៖ «ការបង្កើត FTA ជាមួយ EAEU មិនខុសច្បាប់អន្តរជាតិ ឬរំលោភលើទណ្ឌកម្មរបស់លោកខាងលិចឡើយ។ EAEU គឺជាអង្គការសេដ្ឋកិច្ចតំបន់ (ដូច ASEAN ដែរ) មិនមែនជាបុគ្គល ឬអង្គភាពដែលរងទណ្ឌកម្មផ្ទាល់នោះទេ។ ប្រទេសជិតខាងយើងដូចជា វៀតណាម ក៏មាន FTA ជាមួយ EAEU តាំងពីឆ្នាំ ២០១៦ ហើយសិង្ហបុរីក៏បានចុះហត្ថលេខារួចហើយដែរ ប៉ុន្តែពួកគេនៅតែអាចរក្សាពាណិជ្ជកម្មល្អជាមួយអាមេរិក និងអឺរ៉ុបបាន។ [..] ការដើរតួនាទីការទូតរបស់កម្ពុជាបច្ចុប្បន្ន គឺផ្អែកលើ “ច្បាប់អន្តរជាតិ និងពហុភាគីនិយម“។ ការដែលសម្ដេចធិបតី ហ៊ុន ម៉ាណែត ជំរុញការសិក្សានេះ គឺធ្វើឡើងក្នុងនាមជាប្រមុខរដ្ឋបាលសេដ្ឋកិច្ច ដែលស្វែងរកផលប្រយោជន៍ជាតិជាធំ ដោយមិនជ្រើសរើសខាងក្នុងជម្លោះភូមិសាស្ត្រនយោបាយឡើយ»។

ទោះជាយ៉ាងណាលោកក៏មើលឃើញបញ្ហាមួយចំនួនដែលអាចកើតមានក្នុងពេលបង្កើតបានកិច្ចព្រមព្រៀងសេរីជាមួយអឺរ៉ាស៊ីនោះដែរគឺ ប្រព័ន្ធទូទាត់ប្រាក់ព្រោះតំបន់នេះបានកាត់ផ្ដាច់ប្រព័ន្ធ SWIFT ដោយមិនអាចទូទាត់ជាលុយដុល្លារបាន ខណៈចម្ងាយដឹកជញ្ជូនពីកម្ពុជាទៅតំបន់អឺរ៉ាស៊ីគឺមានចម្ងាយឆ្ងាយ និងចំណាយខ្ពស់ថែមទៀត។

លោកបណ្ឌិតបានឱ្យជាយោបល់ថា កម្ពុជាគូរគិតគូរពីការប្រើប្រាស់រូបិយប័ណ្ណជាតិដើម្បីទូទាត់ទំនិញផ្ទាល់ ឬទូទាត់តាមរយៈធនាគារនៃប្រទេសទី៣ដូចជា ចិន ឬកាហ្សាក់ស្ថាន។ ដោយឡែកចំពោះបញ្ហាទាក់ទងនឹងប្រព័ន្ធភស្តុភារកម្មវិញលោកថា ការប្រើប្រាស់ច្រករបៀងដឹកជញ្ជូនពហុទម្រង់ដោយប្រើប្រាស់ផ្លូវសមុទ្រ និងផ្លូវរត់ភ្លើងឆ្លងកាត់ប្រទេសចិនដើម្បីកាត់បន្ថយថ្លៃដឹកជញ្ជូន។

អ្នកស្រាវជ្រាវសង្គម សេដ្ឋកិច្ច លោកបណ្ឌិត ជ័យ តិច

សម្រាប់លោកបណ្ឌិត ជ័យ តិច វិញបានឱ្យជាយោបល់បន្ថែមថាក្រៅពីការបញ្ជូនទំនិញទៅលក់កម្ពុជាក៏គួរតែព្យាយាមបង្កើតឱ្យមានការបញ្ជូននិស្សិតទៅសិក្សានៅប្រទេសក្នុងតំបន់នេះទាក់ទងនឹងបច្ចេកវិទ្យាយោធា យន្តហោះចម្បាំង និងប្រព័ន្ធផ្កាយរណបជាដើម។

បន្ថែមលើនេះការបង្កើតពាណិជ្ជកម្មសេរីនេះក៏អាចឱ្យកម្ពុជាទិញនូវសម្ភារៈយោធាពីរុស្ស៊ី ក៏ដូចជាទាក់ទាញអ្នកវិនិយោគពីរុស្ស៊ីដើម្បីធ្វើរោងចក្រផលិតសម្ភារៈយោធានៅកម្ពុជា និងវិនិយោគលើប្រេងផងដែរ ជាពិសេសគឺលទ្ធភាពនៃការកសាងរោងចក្រថាមពលនុយក្លេអ៊ែរស៊ីវិលសម្រាប់សន្តិសុខថាមពលរបស់កម្ពុជាផងដែរ៕

អត្ថបទដោយ ហ៊ុន សិរីវឌ្ឍន៍

The post អ្នកវិភាគមើលឃើញពីសក្ដានុពលពាណិជ្ជកម្មសេរីរវាងកម្ពុជានិងអឺរ៉ាស៊ីស្របគ្នានឹងបញ្ហាប្រឈមមួយចំនួន appeared first on Kampuchea Thmey Daily.

រដ្ឋាភិបាលថាឆ្នាំ២០២៦នេះ កម្ពុជាជួបរឿងអវិជ្ជមាន៣ដែលធ្វើឱ្យប៉ះពាល់ដល់សេដ្ឋកិច្ចជាតិ

hun sirivadh — Fri, 22 May 2026 04:21:00 +0000

រដ្ឋាភិបាលកម្ពុជាបញ្ជាក់ថាក្នុងឆ្នាំ២០២៦នេះ សេដ្ឋកិច្ចកម្ពុជាមិនអាចសម្រេចបាន៥%ដូចការគ្រោងទុកនោះទេ ដោយសារតែ បញ្ហាប្រេងឡើងថ្លៃ ឥទ្ធិពលសាយភាពពីបញ្ហាព្រំដែនកម្ពុជា-ថៃ និងការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា។

យោងតាមសារាចរស្ដីពីការរៀបចំផែនការយុទ្ធសាស្ត្រថវិកាឆ្នាំ២០២៧-២០២៩ និងការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧ រាជរដ្ឋាភិបាលកម្ពុជាបានវាយតម្លៃថាសេដ្ឋកិច្ចជាតិមានកំណើតត្រឹម ៤,២% ប៉ុណ្ណោះដោយសារកម្មវិបាកផ្ទួនៗគ្នាជាអវិជ្ជមានពីបញ្ហាធំៗ៣ខាងលើ។

ការឡើងថ្លៃប្រេងបានប៉ះពាល់ដល់កត្តាផលិតកម្ម តួយ៉ាង កសិកម្ម ដឹកជញ្ជូន និងទេសចរណ៍ជាដើមគួបផ្សំនឹងសម្ពាធអតិផរណា បានបន្ទច់បង្អាក់ដល់សកម្មភាពចាយ និងប្រើប្រាស់ជារួម ហើយឥទ្ធិពលសាយភាពពីបញ្ហាព្រំដែនកម្ពុជា-ថៃ បានប៉ះពាល់ដល់ប្រាក់បង្វែរឯកជន ទេសចរណ៍ដែលពឹងផ្អែកច្រកព្រំដែនអន្តរជាតិកម្ពុជា-ថៃ និងការនាំចេញកសិផលជាដើម។ ដោយឡែកការបង្ក្រាបបទល្មើសឆបោកអនឡាញក៏បានបង្កផលប៉ះពាល់រយៈពេលខ្លីផងដែរ គឺប៉ះពាល់ដល់វិស័យសំណង់ អចលនទ្រព្យ និងការប្រើប្រាស់ក្នុងស្រុក ដោយសារការបាត់ចំណូលពីសកម្មភាពនេះ។

ទោះជាយ៉ាងណារាជរដ្ឋាភិបាលក៏បានព្យាករណ៍ផងដែរថាកំណើនសេដ្ឋកិច្ចនឹងងើបឡើងវិញក្នុងអត្រា៥%ក្នុងឆ្នាំ២០២៧ តែត្រូវបានហ៊ុមព័ទ្ធដោយហានិភ័យ និងភាពមិនប្រាកដប្រជានៅឡើយ ដោយហេតុនេះទើបរដ្ឋាភិបាលបានសម្រេចដាក់ចេញឯកសារក្របខ័ណ្ឌហិរញ្ញវត្ថុសាធារណៈ ២០២៧-២០២៩ ដើម្បីដោះស្រាយបញ្ហាចំពោះមុខ វិធានការគោលនយោបាយហិរញ្ញវត្ថុសាធារណៈ វិធានការគោលនយោបាយរូបិយវត្ថុ និងហិរញ្ញវត្ថុ និងវិធានការដោះស្រាយបញ្ហាជារចនាសម្ព័ន្ធ។

ដោយឡែកសម្រាប់ក្នុងឆ្នាំ២០២៥កន្លងទៅ រាជរដ្ឋាភិបាលឱ្យដឹងថាសេដ្ឋកិច្ចកម្ពុជាបានទទួលរងព្យុះកំបុតត្បូងចំនួន២ចម្បងគឺ ការដាក់ឱ្យអនុវត្តនពន្ធគយបដិការរបស់សហរដ្ឋអាមេរិក និងភាពតានតឹងនៃបញ្ហាព្រំដែនកម្ពុជា-ថៃ៕

អត្ថបទដោយ ហ៊ុន សិរិវឌ្ឍន៍

The post រដ្ឋាភិបាលថាឆ្នាំ២០២៦នេះ កម្ពុជាជួបរឿងអវិជ្ជមាន៣ដែលធ្វើឱ្យប៉ះពាល់ដល់សេដ្ឋកិច្ចជាតិ appeared first on Kampuchea Thmey Daily.

មន្ត្រីជាន់ខ្ពស់អះអាង សេដ្ឋកិច្ចកម្ពុជាស្ទុះឡើងឆាប់រហ័ស និងមានកំណើនរឹងមាំ

deth leng — Fri, 06 Feb 2026 03:23:49 +0000

ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា សេដ្ឋកិច្ចកម្ពុជាបានស្ទុះងើបឡើងវិញយ៉ាងឆាប់រហ័ស និងបន្តឈរលើមាគ៌ា នៃកំណើនរឹងមាំ បន្ទាប់ពីវិបត្តិជំងឺកូវីដ-១៩ ទោះបីជាត្រូវបន្តពុះពារជម្នះនូវបញ្ហាប្រឈម និងភាពមិនប្រាកដប្រជាខ្ពស់ នៃស្ថានភាពតំបន់ និងសកល ដោយសារការបន្តប្រឈមមុខ ខាងភូមិ សាស្ត្រនយោបាយកាន់តែស្រួចស្រាល់។

ឧបនាយករដ្ឋមន្ត្រី អូន ព័ន្ធមុនីរ័ត្ន មានប្រសាសន៍នៅក្នុងវេទិកាពន្ធដារកម្ពុជា នៅថ្ងៃទី ០៥ ខែកុម្ភៈ ឆ្នាំ ២០២៦ ថា ការបែកខ្ញែក នៃសេដ្ឋកិច្ចសកលបានធ្វើឱ្យប៉ះពាល់ដល់កិច្ចសហប្រតិបត្តិការ និងពាណិជ្ជកម្មអន្តរជាតិ។ ការងើបឡើងវិញ នៃនិន្នាការឯកតោភាគីនិយម ភាពមិនច្បាស់លាស់នៃ ទស្សនវិស័យកំណើនសេដ្ឋកិច្ច នៃបណ្ដាប្រទេស និងតំបន់ជាដៃគូពាណិជ្ជកម្មសំខាន់ៗ របស់កម្ពុជា ការប្រែប្រួលអាកាសធាតុ។

ឧបនាយករដ្ឋមន្ត្រី អូន ព័ន្ធមុនីរ័ត្ន បញ្ជាក់ថា៖ «ទោះបីជាត្រូវប្រឈម នឹងភាពមិនប្រាកដប្រជាកាន់តែស្រួចស្រាល់ ក្នុងបរិការណ៍សកល ក៏ដូចជាត្រូវប្រឈមនឹងភាពការរំលោភលើអធិបតេយ្យជាតិ និងបូរណភាពទឹកដី ក៏សេដ្ឋកិច្ចកម្ពុជា ត្រូវបានរំពឹងថា អាចសម្រេចកំណើនក្នុងរង្វង់ ៥,២% ក្នុងឆ្នាំ ២០២៥ និងសម្រេចបានកំណើន ៥% សម្រាប់ឆ្នាំ ២០២៦»។

កិច្ចខិតខំរបស់រាជរដ្ឋាភិបាល ក្នុងការកែលម្អបរិយាកាសសម្រាប់ធុរកិច្ច និងការវិនិយោគ បានជំរុញឱ្យការវិនិយោគផ្ទាល់ពីក្រៅប្រទេសបន្តកើនឡើងខ្ពស់។

យោងតាមក្រុមប្រឹក្សាអភិវឌ្ឍន៍កម្ពុជា នៅក្នុងឆ្នាំ ២០២៥ ការចុះបញ្ជីគម្រោងវិនិយោគពីបរទេស មានទំហំទុនប្រមាណ ១០ ពាន់លានដុល្លារ កើន ៤៥% ធៀបនឹងឆ្នាំ ២០២៤។

ការនាំចេញរបស់កម្ពុជា បន្តរក្សាកំណើនល្អដែលសម្រេចបាន ១៧% កាលពីឆ្នាំ ២០២៥ ខណៈ រំហូរទេសចរបរទេសមកកម្ពុជា ជាពិសេស កញ្ចប់ទេសចរទីផ្សារឆ្ងាយ ក៏នៅតែដំណើរការល្អ ដូចជាភ្ញៀវទេសចរអឺរ៉ុប អូស្ត្រាលី និងឥណ្ឌា៕

The post មន្ត្រីជាន់ខ្ពស់អះអាង សេដ្ឋកិច្ចកម្ពុជាស្ទុះឡើងឆាប់រហ័ស និងមានកំណើនរឹងមាំ appeared first on Kampuchea Thmey Daily.

ធនាគារជាតិ ព្យាករថា ឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុងរង្វង់ ៥%

Din Thary — Tue, 27 Jan 2026 07:06:51 +0000

យោងតាមរបាយការណ៍ចុងក្រោយរបស់ធនាគារជាតិនៃកម្ពុជា បានព្យាករថា ក្នុងឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុង រង្វង់ ៥% និងអត្រាអតិនរណា ២,៣% ទោះបីជាកម្ពុជា និងបណ្តាប្រទេសនានានៅតែបន្តប្រឈមនឹងបញ្ហានៃការអូសបន្លាយពេលនៃកត្តភូមិសាស្រ្តនយោបាយ និងសង្រ្គាមពាណិជ្ជកម្មនៃប្រទេសមហាអំណាចនៅលើពិភពលោកក្តី។

លោកស្រី ជា សិរី ទេសាភិបាលធនាគារជាតិនៃកម្ពុជា បានមានប្រសាសន៍ថា ទស្សនវិស័យនៅឆ្នាំ២០២៦ កម្ពុជានឹងត្រូវខិតខំប្រឹងប្រែងដោះស្រាយបញ្ហាប្រឈម និងទាញយកអត្ថប្រយោជន៍ពីឱកាសថ្មីៗ។ ពហុភាគីកម្មសេដ្ឋកិច្ច ការវិនិយោគបន្តបន្ទាប់លើហេដ្ឋាចេនាសម្ព័ន្ធ និងការជ្រៀតចូលកាន់តែស៊ីជម្រៅទៅក្នុងតំបន់ និងសេដ្ឋកិច្ចពិភពលោក បានផ្តល់ជាមូលដ្ឋានរឹងមាំសម្រាប់កំណើនរយៈពេលមធ្យម។

ស្រមតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា កិច្ចខិតខំប្រឹងប្រែងក្នុងការលើកកម្ពស់ផលិតភាព ការពង្រឹងធនធានមនុស្ស ការកែលម្អបរិយាកាសអាជីវកម្ម និងវិនិយោគ និងការធ្វើទំនើបកម្មស្ថាប័នសេដ្ឋកិច្ច និងជួយគាំទ្រដល់ការអភិវឌ្ឍសកម្មភាពសេដ្ឋកិច្ចដែលមានតម្លៃបន្ថែម និងកំណើនដែលមានភាពធន់កាន់តែខ្លាំង។

«ជាក់ស្តែង នៅឆ្នាំ២០២៦ នេះ ធនាគារនៃកម្ពុជា បានព្យាករថា សេដ្ឋកិច្ចកម្ពុជានឹងអាចសម្រេចបានក្នុង រង្វង់ ៥% និងអត្រាអតិនរណា ២,៣%។ នយោបាយរូប័យវត្ថុនឹងត្រូវបន្តអនុវត្តប្រកបដោយ ភាពប្រុងប្រយ័ត្ន ក្នុងគោលដៅរក្សាស្ថិរភាពថ្លៃនិងអត្រាប្តូរប្រាក់ ដែលនឹងគាំទ្រដល់ការអាក្សាស្តីការ រាំត្រសេដ្ឋកិច្ច»។ លោកស្រី ជា សិរី បន្ថែមបែបនេះ។

ជាមួយគ្នានេះ ធនគារជាតិនៃកម្ពុជានឹងបន្តដាក់ចេញនូវគោលនយោបាយ និងវិធានការបុរេសកម្មស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០២៥-២០៣០ សំដៅរួមចំណែកសម្រេចបាននូវចក្ខុវិស័យកម្ពុជាឆ្នាំ២០៥០។ ក្នុងទិសដៅនេះ ការរក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុ ការពង្រឹងភាពរឹងមាំប្រព័ន្ធធនគារ និងប្រសិទ្ធភាពប្រព័ន្ធទូទាត់ ការលើកកម្ពស់បរិយាបន្ន និងនវានវត្តន៍ហិរញ្ញវត្ថុ និងការអភិវឌ្ឍហិរញ្ញប្បទានបៃតងនឹងត្រូវបន្តយកចិត្តទុកដាក់អនុវត្តឱ្យមានប្រសិទ្ធភាព។

លោកស្រី ជា សិរី បានបន្តថា ធនាគារជាតិនៃកម្ពុជានឹងបន្តពង្រឹងភាពធន់ប្រព័ន្ធធនាគារ តាមរយៈការពង្រឹងក្របខណ្ឌបទប្បញ្ញត្តិ និងការត្រួតពិនិត្យផ្អែកលើហានីភ័យ និងទស្សនៈអនាគត ដើម្បីបន្តការពារស្ថិរភាពហិរញ្ញវត្ថុ។ លើសពីនេះ ប្រព័ន្ធទូទាត់នឹងត្រូវបានធ្វើទំនើបកម្មជាលំដាប់ សំទៅរួមកំណែក លើកកម្ពស់ការអភិវឌ្ឍសេដ្ឋកិច្ចឌីជីថល ស្របតាមយុទ្ធសាស្ត្របញ្ចកោណ ដំណាក់កាលទី១។

ទន្ទឹមនឹងនេះ ធនាគារជាតិនៃកម្ពុជា ក៏នឹងបន្តពង្រឹងក្របខណ្ឌច្បាប់ និងបទប្បញ្ញត្តិ ព្រមទាំងបន្តពង្រឹង និងពង្រីកកិច្ចសហប្រតិបត្តិការក្នុងស្រុក និងអន្តរជាតិ ព្រមទាំងការផ្សព្វផ្សាយ និងបណ្តុះបណ្តាល ក្នុងគោលដៅពង្រឹងការយល់ដឹង ជំរុញការចូលរួមទប់ស្កាត់និងបង្ការ ក៏ដូចជាបង្កើនប្រសិទ្ធភាពនៃការប្រឆាំងការសម្អាតប្រាក់ និងហិរញ្ញប្បទានភេវកម្ម។

លោកស្រីទេសាភិបាល ជឿជាក់ថា គ្រប់ភាគីពាក់ព័ន្ធនានា និងបន្តគាំទ្រ និងរួមចំណែកសម្រេចបាននូវសមិទ្ធផលថ្មីៗ បន្ថែមទៀត ក្នុងការអភិវឌ្ឍសេដ្ឋកិច្ចនិងប្រព័ន្ធធនាគារ ដែលនឹងបម្រើជាប្រយោជន៍រួមសម្រាប់ជាតិ មាតុភូមិ និងប្រជាជនកម្ពុជា។

គួរគូសបញ្ជាក់ថា ស្ថានភាពសេដ្ឋកិច្ចពិភពលោកនៅឆ្នាំ២០២៥ នៅតែស្ថិតក្រោមភាពមិនប្រាកដប្រជាខ្ពស់ ដោយសារតែស្ថានភាពភូមិសាស្ត្រនយោបាយដែលបន្តមានភាពតានតឹង លក្ខខណ្ឌហិរញ្ញវត្ថុសកលដែលតឹងរឹង និងអត្រាកំណើនសេដ្ឋកិច្ចសម្រេចក្នុងល្បឿនទិសដៅផ្សេងគ្នា។

បញ្ហាប្រឈមទាំងនេះ កំណើនសេដ្ឋកិច្ចពិភពលោកឆ្នាំ២០២៥ ត្រូវបានព្យាករថា មានកម្រិត ៣,២% (៣,៣% នាឆ្នាំ២០២៨) ក្នុងនោះសេដ្ឋកិច្ចប្រទេសអភិវឌ្ឍន៍មានកំណើន ១,៦% និងប្រទេសកំពុងលូតលាស់ និងកំពុងអភិវឌ្ឍ ៤,២% ។

រីឯក្នុងតំបន់សេដ្ឋកិច្ចអាស៊ានបានថមថយបន្តិចមកត្រឹម ៨,៣%។ អត្រាអតិផរណាពិភពលោកបានថមថយមកត្រឹម៤,២% ដែលបានអនុញ្ញាតឱ្យធនាគារកណ្តាលនៃប្រទេសចម្បងៗបន្ទាបអត្រាការប្រាក់គោល ដើម្បីជំរុញកំណើនសេដ្ឋកិច្ច។ ទន្ទឹមនេះ ការពន្លឿនការបញ្ជាទិញមុនសុពលភាពនៃពន្ធគយបដិការ បានជំរុញឱ្យទំហំពាណិជ្ជកម្មជាតិមានកំណើន ៣,៦%៕

The post ធនាគារជាតិ ព្យាករថា ឆ្នាំ២០២៦ សេដ្ឋកិច្ចកម្ពុជាអាចនឹងសម្រេចបានក្នុងរង្វង់ ៥% appeared first on Kampuchea Thmey Daily.

កម្ពុជាទម្លាក់ការព្យាករកំណើនសេដ្ឋកិច្ចត្រឹម ៥,២% នៅឆ្នាំ ២០២៥

deth leng — Thu, 28 Aug 2025 04:33:46 +0000

ក្រសួងសេដ្ឋកិច្ច និងហិរញ្ញវត្ថុ បានទម្លាក់ការព្យាករកំណើនសេដ្ឋកិច្ចកម្ពុជាមកនៅត្រឹម ៥,២% ដោយសារការបិទខ្ទប់ព្រំដែនកម្ពុជា-ថៃ និងឥទ្ធិពលនៃពន្ធបដិកាអាមេរិក។ សម្រាប់អ្នកជំនាញសេដ្ឋកិច្ចយល់ឃើញថា ដំណើរការសេដ្ឋកិច្ចកម្ពុជានៅតែមានភាពល្អប្រសើរទាំងវិស័យពាណិជ្ជកម្ម ឧស្សាហកម្ម និងទេសចរណ៍។

សេដ្ឋកិច្ចកម្ពុជា នៅមុនពេលអាមេរិកប្រកាសដាក់ចេញគោលនយោបាយពន្ធគយបដិការ ត្រូវបានវាយតម្លៃថា នឹងបន្តរក្សាភាពរឹងមាំ ជាមួយនឹងអត្រាកំណើន ៦,៣% នៅឆ្នាំ ២០២៥ និង២០២៦ ប្រមាណ ៦,៥%។

របាយការណ៍របស់ក្រសួងសេដ្ឋកិច្ចបង្ហាញថា កំណើនសេដ្ឋកិច្ចត្រូវបានវាយតម្លៃជាថ្មីថា នឹងថមថយមកនៅត្រឹម ៥,២% សម្រាប់ឆ្នាំ ២០២៥ និងចំនួន ៥% សម្រាប់ឆ្នាំ ២០២៦ ដោយសារគោលនយោបាយពន្ធគយបដិការ លើវិស័យបម្រើការនាំចេញ ដូចជាវិស័យកាត់ដេរ និងកម្មន្តសាលមិនមែនកាត់ដេរ និងផលជះលើវិស័យគាំទ្រកំណើនផ្សេងទៀត ដូចជាវិស័យដឹកជញ្ជូន និងស្តុក លក់ដុំ និងលក់រាយ។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជា ប្រាប់កម្ពុជាថ្មីនៅថ្ងៃទី ២៨ ខែសីហា ឆ្នាំ ២០២៥ថា លទ្ធផលវាយតម្លៃនេះ មិនមានផលប៉ះពាល់ធ្ងន់ធ្ងរដល់កំណើនសេដ្ឋកិច្ចកម្ពុជានោះទេ បើប្រៀបធៀបទៅនឹងសម័យកូវីដ១៩។

លោកបណ្ឌិត ហុង វណ្ណៈ យល់ឃើញថា៖ «សេដ្ឋកិច្ចកម្ពុជាមិនមានផលប៉ះពាល់ធំដុំទេ ខ្ញុំសង្កេតឃើញព្រឹត្តិការណ៍ក្នុងសម័យកូវីដ១៩ សេដ្ឋកិច្ចកម្ពុជា មិនត្រដាបត្រដួសរហូតដល់គ្រប់គ្រងមិនបានទេ នៅពេលនោះប្រទេសត្រូវ Lockdown ហើយមិនមានចរន្តពាណិជ្ជកម្ម ហើយវិស័យទេសចរណ៍សឹងតែបិទទាំងស្រុង យើងមានតែរោងចក្រសហគ្រាសមួយចំនួន និងសិប្បកម្មខ្លះៗប៉ុណ្ណោះ សរុបទៅ សេដ្ឋកិច្ចកម្ពុជានៅតែដំណើរការ គ្រាន់តែយឺត ខ្ញុំគិតថា ស្ថានភាពពេលនេះ គឺល្អជាងពេលនោះ ដោយសារយើងមើលឃើញវិស័យពាណិជ្ជកម្ម ទេសចរណ៍ វិស័យឧស្សាហកម្ម និងវិស័យនាំចេញរបស់កម្ពុជានៅតែដំណើរការប្រក្រតី»។

លោកបណ្ឌិត ហុង វណ្ណៈ បន្ថែមថា ទោះបីអាមេរិកដាក់ពន្ធបដិការ ១៩% លើទំនិញកម្ពុជា តែដំណើរការផលិតកម្មកម្ពុជានៅតែដំណើរការល្អព្រមជាមួយការបញ្ជាទិញពីអាមេរិកមានកំណើននៅក្នុងរយៈពេល ៧ ខែ ឆ្នាំ ២០២៥ មានជាង ៥ ពាន់លានដុល្លារ។

លោកបណ្ឌិត ហុង វណ្ណៈ បន្ថែមថា៖ «ពន្ធគយថមថយ ប៉ុន្តែដំណើរការនាំចេញទៅបណ្ដាប្រទេសជាដៃគូ និងការបង្កើតទីផ្សារថ្មីៗ នៅតែល្អប្រសើរ ដែលនាំឱ្យដំណើរការផលិតកម្មកម្ពុជាល្អ»។

ស្ថាប័នស្រាវជ្រាវសេដ្ឋកិច្ច ASEAN+3 (AMRO) ដែលមានមូលដ្ឋានៅប្រទេសសិង្ហបុរី បានព្យាករណ៍ថាកំណើនសេដ្ឋកិច្ចកម្ពុជានៅក្នុងឆ្នាំ២០២៥ និង២០២៦ នឹងមានកំណើនក្នុងអត្រា៦% ដោយសារតែការជះឥទ្ធិពលនៃពន្ធបដិការរបស់អាមេរិក កម្សោយនៃសកម្មភាពក្នុងវិស័យអចលទ្រព្យ បើទោះបីជាភាពប្រសើរឡើងក្នុងវិស័យសេវាកម្ម និងបញ្ហាប្រឈមសកល។

AMRO៖ «សេដ្ឋកិច្ចកម្ពុជាប្រឈមនឹងភាពមិនប្រាកដប្រជាកើនឡើង ដែលភាគច្រើនត្រូវបានជំរុញដោយកត្តាខាងក្រៅ រួមជាមួយនឹងបញ្ហាប្រឈមដែលកំពុងកើតមាននៅក្នុងវិស័យហិរញ្ញវត្ថុក្នុងស្រុក។ មុនពេលការប្រកាសពន្ធបដិការរបស់អាមេរិកនៅខែមេសា សេដ្ឋកិច្ចរបស់ប្រទេសកម្ពុជាបានបង្ហាញពីកំណើនដ៏រឹងមាំពីមួយក្នុងអត្រា ៦ ភាគរយក្នុងឆ្នាំ ២០២៤ កើនឡើងពី ៥ ភាគរយនៅក្នុងឆ្នាំ ២០២៣»។

AMRO ក៏បានគូសរំលេចផងដែរថា សម្រាប់ទស្សនវិស័យកំណើនរបស់កម្ពុជាគឺនៅមានភាពរសើបខ្លាំងចំពោះទំហំនៃពន្ធគយបដិការ ភាពយឺតនៃតម្លៃទំនិញប្រើប្រាស់ និងផលប៉ះពាល់ជាយថាហេតុ ដោយសារការនាំចេញដ៏សំខាន់របស់កម្ពុជាទៅកាន់សហរដ្ឋអាមេរិក៕

អត្ថបទ៖ ឡេង ដេត

The post កម្ពុជាទម្លាក់ការព្យាករកំណើនសេដ្ឋកិច្ចត្រឹម ៥,២% នៅឆ្នាំ ២០២៥ appeared first on Kampuchea Thmey Daily.

ទោះចាកចេញពីចំណាត់ថ្នាក់ប្រទេសអភិវឌ្ឍតិចតួច តែកម្ពុជានៅបន្តហ៊ុមព័ទ្ធបញ្ហាចម្បង ៥

Din Thary — Fri, 04 Jul 2025 01:15:57 +0000

លោក អូន ព័ទ្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា បើទោះបីជា កម្ពុជា ចាក់ចេញពីចំណាត់ថ្នាក់ប្រទេសអភិវឌ្ឍតិចតួចក៏ពិតមែន តែកម្ពុជានៅតែបន្តហ៊ុមព័ទ្ធដោយកត្តាហានិភ័យចម្បង ៥ ដែលត្រូវគិតគូរបន្តទៀត។

លើកឡើងក្នុងទិវាជាតិសហគ្រាសធុនមីក្រូ តូច និងមធ្យម លើកទី២ កាលពីពេលថ្មីៗកន្លងទៅនេះ លោកឧបនាយករដ្ឋមន្ត្រី អូន ព័ទ្ធមុនីរ័ត្ន បានមានប្រសាសន៍ថា ក្នុងរយៈពេលជាង ៣ ឆ្នាំចុងក្រោយ សេដ្ឋកិច្ចកម្ពុជា ក៏បានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំ បន្ទាប់ពីវិបត្តិជាសកលនានាដែលបានកើតឡើង និងកំពុងកើតឡើង។

កម្ពុជាក៏កំពុងត្រៀមខ្លួនចាកចេញពី «ចំណាត់ថ្នាក់នៃក្រុមប្រទេសអភិវឌ្ឍតិចតួច» នៅឆ្នាំ ២០២៩ ខាងមុខផងដែរ ស្របតាមសន្ទុះជាក់ស្តែងនៃការអភិវឌ្ឍរបស់ខ្លួនផងដែរ។

ជុំវិញសន្ទុះងើបឡើងវិញយ៉ាងឆាប់រហ័សនៃសេដ្ឋកិច្ច និងការចាកចេញពីចំណាត់ថ្នាក់នៃក្រុមប្រទេសអភិវឌ្ឍតិចតួច របស់កម្ពុជា លោកឧបនាយករដ្ឋមន្ត្រី បានអះអាងថា ការណ៍នេះគឺជា សមិទ្ធផលគួរជាទីមោទនៈប៉ុន្តែទន្ទឹមនេះ កម្ពុជា នៅតែបន្តហ៊ុមព័ទ្ធដោយកត្តាហានិភ័យចម្បង ៥ ដែលត្រូវគិតគូរបន្តទៀត។

ក្នុងនោះ រួមមាន ១. ការរិចរិលនៃប្រព័ន្ធអនុគ្រោះ និងទីផ្សារពាណិជ្ជកម្ម, ២. ការថមថយនូវជំនួយអភិវឌ្ឍន៍ផ្លូវការពីដៃគូ ទាំងក្នុងទម្រង់ជាជំនួយឥតសំណង និងជាហិរញ្ញប្បទានដែលមានកម្រិតសម្បទានខ្ពស់, ៣. ភាពងាយរងគ្រោះទៅនឹងហានិភ័យពីកត្តាខាងក្រៅ, ៤. ភាពមានកម្រិតនៃលំហថវិកា, ក្នុងករណីមានភាពចាំបាច់នៃតម្រូវការចំណាយអន្តរាគមន៍ ក្នុងទ្រង់ទ្រាយធំ ដោយប្រើប្រាស់ថវិការដ្ឋ និង ៥. ភាពមានកម្រិតនៃសមត្ថភាពស្ថាប័ន ទាំងក្នុងវិស័យសាធារណៈ និងវិស័យឯកជន ក្នុងការឆ្លើយតបទៅនឹងតម្រូវការ និងនិន្នាការថ្មី។

ទន្ទឹមនេះ លោកឧបនាយករដ្ឋមន្ត្រី អូន ព័ទ្ធមុនីរ័ត្ន ក៏បានបន្ថែមដែរថា កម្ពុជា ក៏ត្រូវបានបន្តហ៊ុមព័ទ្ធដោយកត្តាហានិភ័យចម្បងៗខាងក្រៅ ដែលពុំចំណុះនឹងការគ្រប់គ្រងរបស់ខ្លួនឡើយ ក្នុងនោះរួមមានជាអាទិ៍ ភាពមិនប្រាកដប្រជាខ្ពស់នៃស្ថានភាពសកល ដោយសារការបន្តប្រឈមមុខខាងភូមិសាស្ត្រនយោបាយ កាន់តែស្រួចស្រាល់។

ការបែកខ្ញែកនៃសេដ្ឋកិច្ចសកល ដែលប៉ះពាល់ដល់កិច្ចសហប្រតិ-បត្តិការ និង ពាណិជ្ជកម្មអន្តរជាតិ ព្រមទាំងការងើបមកវិញនៃនិន្នាការឯកតោភាគីនិយមជាដើម។

លើសពីនេះទៀត ក៏នៅមានភាពមិនច្បាស់លាស់នៃទស្សនវិស័យនៃកំណើនសេដ្ឋកិច្ច នៃបណ្តាប្រទេស និងតំបន់ជាដៃគូពាណិជ្ជកម្មសំខាន់ៗរបស់កម្ពុជា និងកម្មវិបាកនៃគោលនយោបាយពន្ធបដិការរបស់សហរដ្ឋអាម៉េរិក ក៏ដូចជាជម្លោះព្រំដែនដែលបង្កឡើងដោយប្រទេសជិតខាងរបស់កម្ពុជានាពេលថ្មីៗនេះផងដែរ។

គួរគូសបញ្ជាក់ថា រាជរដ្ឋាភិបាលកម្ពុជា បានដាក់ចក្ខុវិស័យត្រៀមខ្លួនក្នុងការចាកចេញពីប្រទេសអភិវឌ្ឍតិចតូច (LDC) ទៅជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ ២០៥០។

ទន្ទឹមនេះ អ្នកវិភាគសេដ្ឋកិច្ចជាន់ខ្ពស់នៃធនាគារពិភពលោកប្រចាំនៅកម្ពុជា លោក លី សូដេត បានលើកឡើងដែរថា នៅពេលដែលកម្ពុជាឈានជើងចាកចេញពីប្រទេសអភិវឌ្ឍតិចតូច (LDC) កម្ពុជានឹងបាត់បង់នូវការអនុគ្រោះពន្ធមួយចំនួន ទៅលើផលិតផលនាំចេញទៅក្រៅប្រទេស ជាពិសេសទៅប្រទេសអ្នកមាន។

កម្ពុជាត្រូវបង្កើនភាពប្រកួតប្រជែងឱ្យខ្លាំងជាងមុន ដើម្បីឱ្យបានស្មើមុខស្មើមាត់ដូចគេ ហើយកម្ពុជាគួរកែទម្រង់ផ្ទៃក្នុង ដើម្បីឱ្យការវិនិយោគក្នុងស្រុកមានភាពទាក់ទាញ រួមផ្សំនឹងតម្លៃពលកម្មកម្ពុជានៅទាប ដែលជំរុញដល់ការចូលមកវិនិយោគពីក្រៅប្រទេស៕

ដោយ៖ ឌិន ថារី

The post ទោះចាកចេញពីចំណាត់ថ្នាក់ប្រទេសអភិវឌ្ឍតិចតួច តែកម្ពុជានៅបន្តហ៊ុមព័ទ្ធបញ្ហាចម្បង ៥ appeared first on Kampuchea Thmey Daily.

រដ្ឋមន្ត្រីសេដ្ឋកិច្ច៖ សេដ្ឋកិច្ចកម្ពុជាបានស្ទុះងើបឡើងវិញយ៉ាងរហ័ស និងរឹងមាំក្នុងរយៈពេល៣ឆ្នាំចុងក្រោយ

Din Thary — Fri, 27 Jun 2025 05:20:03 +0000

លោក អូន ព័ទ្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា ក្នុងរយៈពេលជាង ៣ ឆ្នាំចុងក្រោយ សេដ្ឋកិច្ចកម្ពុជា ក៏បានស្ទុះងើបឡើងវិញយ៉ាងរហ័ស និងបន្តឈរ លើមាគ៌ានៃកំណើនដ៏រឹងមាំ បន្ទាប់ពីវិបត្តិជាសកលនានាដែលបានកើតឡើង និងកំពុងកើតឡើង ទោះបីជាត្រូវបន្តពុះពារជម្នះនូវបញ្ហាប្រឈម និងភាពមិនប្រាកដប្រជាខ្ពស់ នៃស្ថានភាពភូមិសាស្ត្រនយោបាយ និងភូមិសាស្ត្រសេដ្ឋកិច្ចជាសកលយ៉ាងណាក្តី។

ក្នុងពិធីបើក ទិវាជាតិសហគ្រាសធុនមីក្រូ តូច និងមធ្យម លើកទី២ នៅថ្ងៃទី២៦ ខែមិថុនា លោកឧបនាយករដ្ឋមន្ត្រី បានមានប្រសាសន៍ថា ស្ថិតក្រោមដំបូលដ៏ត្រជាក់នៃសុខសន្តិភាពដ៏ពេញលេញ កម្ពុជាបន្តសម្រេចបាន នូវសមិទ្ធផលដ៏ធំធេងជាច្រើន ជាពិសេសការរក្សាបានយ៉ាងល្អ នូវស្ថិរភាពម៉ាក្រូសេដ្ឋកិច្ច និង ហិរញ្ញវត្ថុសាធារណៈ ពោលគឺ កម្ពុជាបានក្លាយជាប្រទេសមួយ ក្នុងចំណោមប្រទេសដែលមានកំណើន សេដ្ឋកិច្ចខ្ពស់ ក្នុងអត្រាកំណើន ជាមធ្យមជាង ៧ ភាគរយ ក្នុងមួយឆ្នាំ ក្នុងរយៈពេលជាងពីរទសវត្សរ៍ នៃដំណាក់កាលមុនវិបត្តិនៃជំងឺកូវីដ-១៩។

លោក ឧបនាយករដ្ឋមន្ត្រី បានអះអាងថា៖« ផ្លែផ្កានៃកំណើនសេដ្ឋកិច្ចនេះ ក៏ត្រូវបានឆ្លុះបញ្ចាំងតាមរយៈការរីកលូតលាស់នៃមូលដ្ឋានគ្រឹះនៃសង្គម-សេដ្ឋកិច្ច លើគ្រប់វិស័យ និងការអភិវឌ្ឍសង្គម-ប្រជាសាស្ត្រ (Socio-demographic Development) ជាពិសេសការកាត់បន្ថយភាពក្រីក្រ និងការរីកចម្រើននៃសន្ទស្សន៍អភិវឌ្ឍមនុស្ស (HDI) ទាំងកម្រិតជីវភាព ការអប់រំ និងសុខុមាលភាពរបស់ប្រជាជន»។

«ការណ៍នេះ បានរុញច្រានឱ្យកម្ពុជាចេញផុតពីឋានៈជាប្រទេសមានចំណូលទាប និងបានប្រែក្លាយទៅជា «ប្រទេសមានចំណូលមធ្យមកម្រិត ទាប» ចាប់ពីឆ្នាំ ២០១៥ មកម៉្លេះ ហើយបច្ចុប្បន្ន កម្ពុជាក៏កំពុងត្រៀមខ្លួនចាកចេញពី «ចំណាត់ថ្នាក់នៃក្រុមប្រទេសអភិវឌ្ឍតិចតួច» នៅឆ្នាំ ២០២៩ ខាងមុខផងដែរ ស្របតាមសន្ទុះជាក់ស្តែងនៃការអភិវឌ្ឍរបស់ខ្លួន»។ លោក អូន ព័ទ្ធមុន្នីរ័ត្ន បន្ថែមបែបនេះ។

កាលពីពាក់កណ្តាលខែឧសភា ធនាគារពិភពលោក (WB) បានកាត់បន្ថយកំណើនសេដ្ឋកិច្ចកម្ពុជា ត្រឹម ៤,០% ក្នុងឆ្នាំ២០២៥ និង ៤,៥% ក្នុងឆ្នាំ២០២៦ ពីការព្យាករណ៍កាលពីដើមឆ្នាំ២០២៥ ក្នុងអត្រា៥,៣% ក្នុង២០២៥ និង ៥% ក្នុងឆ្នាំ២០២៦ ដោយសារបញ្ហាប្រឈមសកល និងក្នុងស្រុក រួមមាន ស្ថានភាពមិនប្រាកដប្រជាសកល, ការផ្លាស់ប្តូរគោលនយោបាយពាណិជ្ជកម្ម, ភាពជាប់គាំងក្នុងវិស័យអចលនទ្រព្យ និងការរឹតបន្តឹងនៃវដ្តឥណទាន។

គិតចាប់ពីខែមករា ដល់ខែឧសភា ឆ្នាំ ២០២៥ ការដោះដូរទំនិញអន្តរជាតិរបស់កម្ពុជា សម្រេចបាននូវទំហំទឹកប្រាក់ជាង ២៥,២៩ ពាន់លានដុល្លារ កើនឡើង ១៨,៥% ធៀបរយៈពេលដូចគ្នានឹងឆ្នាំ ២០២៤។ សម្រាប់ ការនាំចេញទំនិញរបស់កម្ពុជា មានទំហំទឹកប្រាក់ ១១,៨០ ពាន់លានដុល្លារ កើនឡើង ១៧,២% ចំណែកឯការនាំទំនិញចូលមកវិញមានទំហំទឹកប្រាក់ ១៣,៤៨ ពាន់លានដុល្លារ កើនឡើង ១៩,៧%។។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ ខែមិថុនា ឆ្នាំ ២០២៥៕

ដោយ៖ ឌិន ថារី

The post រដ្ឋមន្ត្រីសេដ្ឋកិច្ច៖ សេដ្ឋកិច្ចកម្ពុជាបានស្ទុះងើបឡើងវិញយ៉ាងរហ័ស និងរឹងមាំក្នុងរយៈពេល៣ឆ្នាំចុងក្រោយ appeared first on Kampuchea Thmey Daily.

ADB ប្តេជ្ញាបន្តជួយធ្វើពិពិធកម្មសេដ្ឋកិច្ចកម្ពុជា និងអភិវឌ្ឍន៍វិស័យឯកជន

May Kunmakara — Fri, 21 Mar 2025 02:09:39 +0000

លោក Masato Kanda ប្រធានធនាគារអភិវឌ្ឍន៍អាស៊ី (ADB) កាលពីថ្ងៃទី២០ ខែមីនា បានបង្ហាញការប្តេជ្ញាចិត្តរបស់ខ្លួនក្នុងការបន្តចួលរួមអភិវឌ្ឍន៍វិស័យសេដ្ឋកិច្ច ការអភិវឌ្ឍវិស័យឯកជន និងការវិនិយោគលើប្រជាពលរដ្ឋ ដើម្បីរក្សាកំណើនប្រកបដោយចីរភាពរបស់កម្ពុជា។

ការតាំងចិត្តរបស់ថ្នាក់ដឹកនាំនៃធនាគារដែលមានមូលដ្ឋាននៅទីក្រុងម៉ានីឡាប្រទេសហ្វីលីភីន ធ្វើឡើងក្នុងជំនួបផ្លូវការជាមួយសម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាកាលពីថ្ងៃទី២០ ខែមីនានៅវិមានសន្តិភាព។ ភាគីទាំងពីរបានពិភាក្សាគ្នាដោយសង្កត់ធ្ងន់លើសារៈសំខាន់នៃការធ្វើឱយមានតុល្យភាពកំណើនសេដ្ឋកិច្ច ជាមួយនឹងនិរន្តរភាពអេកូឡូស៊ី និងការអភិរក្សវប្បធម៌ និងក៏បានទទួលស្គាល់ពីសារៈសំខាន់នៃកិច្ចសហប្រតិបត្តិការក្នុងវិស័យថាមពលក្នុងតំបន់ រួមទាំងការចូលរួមរបស់កម្ពុជានៅក្នុងបណ្តាញថាមពលអាស៊ាន ដើម្បីបង្កើនលទ្ធភាពទទួលបាន និងសន្តិសុខថាមពល។

លោក Kanda បានមានប្រសាសន៍ថា៖« ខណៈពេលដែលមានការប្រកួតប្រជែងជាសកលកាន់តែខ្លាំង ភាពជាអ្នកដឹកនាំដ៏រឹងមាំ និងការប្តេជ្ញាចិត្តចំពោះការអភិវឌ្ឍដែលផ្តោតលើពលរដ្ឋជាមូលដ្ឋានគឺជាការចាំបាច់។ ADB ប្តេជ្ញាជួយកម្ពុជា ក្នុងការពង្រឹងសេដ្ឋកិច្ច និងបង្កើតឱកាសថ្មីៗ ជាពិសេសសម្រាប់ប្រជាពលរដ្ឋក្រីក្រ និងងាយរងគ្រោះបំផុត។

សម្ដេចធិបតី ហ៊ុន ម៉ាណែតបានសាទរចំពោះការគាំទ្ររបស់ ADB ក្នុងរយៈពេលជាច្រើនទសវត្សរ៍កន្លងមកនេះ ដែលបានចូលរួមចំណែកនៅក្នុងការអភិវឌ្ឍសង្គម-សេដ្ឋកិច្ចកម្ពុជា។

សម្ដេចបវរធិបតីក៏បានគូសបញ្ជាក់អំពីសារៈសំខាន់ក្នុងការដាក់ចេញនូវគោលដៅលើកកម្ពស់កំណើនសេដ្ឋកិច្ច, ការបង្កើតការងារ, និងការអភិវឌ្ឍប្រកបដោយចីរភាព ព្រមទាំងការដាក់ចេញនូវគោលនយោបាយអាទិភាពនានា របស់រាជរដ្ឋាភិបាល ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ សំដៅដល់ការលើកកម្ពស់វិស័យសុខាភិបាល, វិស័យអប់រំ និងឱកាសការងារ ជាដើម។

សម្ដេចបវរធិបតីក៏បានលើកឡើង អំពីការដាក់ចេញនូវវិធានការ និងយន្តការគន្លឹះដើម្បីគាំទ្រទៅដល់សហគមន៍មូលដ្ឋាននៅក្នុងការអភិវឌ្ឍសក្ដានុពលររបស់ខ្លួននៅតាមមូលដ្ឋាន តាមរយៈការដាក់ចេញនូវការគាំទ្រលើការកសាងហេដ្ឋារចនាសម្ព័ន្ធ ក៏ដូចជាការបណ្ដុះបណ្ដាលពង្រឹងសមត្ថភាពសហគមន៍មូលដ្ឋាន សំដៅធានាដល់ការផ្តល់ផលប្រយោជន៍ផ្ទាល់របស់សហគមន៍។ សម្ដេចធិបតីក៏បានលើកទឹកចិត្តដល់ ADB បន្តផ្សារភ្ជាប់ទំនាក់ទំនង និងសហការជាមួយនឹងអាជ្ញាធរមូលដ្ឋាន និងក្រសួង-ស្ថាប័នរបស់រាជរដ្ឋាភិបាល ដើម្បីបន្តជំរុញនូវកិច្ចសហប្រតិបត្តិការក្នុងភាពជាដៃគូរវាង ADB និង កម្ពុជា ឱ្យកាន់តែរីកចម្រើន និងរឹងមាំបន្ថែមទៀតផងដែរ។

ក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក Kanda បានលើកឡើងពីការគាំទ្ររបស់ ADB លើកំណែទម្រង់សំខាន់ៗក្រោមយុទ្ធសាស្ត្រជាតិរបស់កម្ពុជា ដែលរួមមាន ការពង្រឹងឧស្សាហកម្មដែលមានតម្លៃខ្ពស់ ការគាំទ្រសហគ្រាសធុនមីក្រូ តូច និងមធ្យម (MSMEs) ការលើកកម្ពស់បរិយាកាសវិនិយោគ និងការពន្លឿនអន្តរកម្មឌីជីថល។

លោក Kanda ក៏បានជួបជាមួយលោកស្រីបណ្ឌិត ជា សិរី អគ្គទេសាភិបាល ធនាគារជាតិ នៃកម្ពុជា អំពីការពង្រីកលទ្ធភាពទទួលបានសេវាធនាគារ ការបង្កើនជម្រើសនៃការទូទាត់តាមប្រព័ន្ធឌីជីថល និងការអនុវត្តគោលនយោបាយដែលជួយសហគមន៍ជនបទ និងអាជីវកម្មបង្កើតថ្មីឱ្យរីកចម្រើន។

គម្រោង ADB មានការកើនឡើងនៅកម្ពុជាដែលមានតម្លៃសរុបប្រមាណ ២,២ ពាន់លានដុល្លាររហូតមកដល់ពេលនេះ។ ក្នុងរយៈពេល ៣ ឆ្នាំកន្លងមក ការសន្យាផ្តល់ហិរញ្ញប្បទានរបស់ ADB សម្រាប់វិស័យសាធារណៈនៅកម្ពុជា មានជាមធ្យមប្រហែល ៣៥០ លានដុល្លារក្នុងមួយឆ្នាំ។ យុទ្ធសាស្ត្រភាពជាដៃគូសម្រាប់អភិវឌ្ឍន៍កម្ពុជារបស់ ADB ឆ្នាំ ២០២៤-២០២៨ គូសបញ្ជាក់ការប្តេជ្ញាចិត្តជាយុទ្ធសាស្ត្ររបស់ខ្លួនចំពោះការអភិវឌ្ឍរបស់ប្រទេស៕

The post ADB ប្តេជ្ញាបន្តជួយធ្វើពិពិធកម្មសេដ្ឋកិច្ចកម្ពុជា និងអភិវឌ្ឍន៍វិស័យឯកជន appeared first on Kampuchea Thmey Daily.