សេដ្ឋកិច្ច

រដ្ឋាភិបាលថាឆ្នាំ២០២៦នេះ កម្ពុជាជួបរឿងអវិជ្ជមាន៣ដែលធ្វើឱ្យប៉ះពាល់ដល់សេដ្ឋកិច្ចជាតិ

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

រដ្ឋាភិបាលកម្ពុជាបញ្ជាក់ថាក្នុងឆ្នាំ២០២៦នេះ សេដ្ឋកិច្ចកម្ពុជាមិនអាចសម្រេចបាន៥%ដូចការគ្រោងទុកនោះទេ ដោយសារតែ បញ្ហាប្រេងឡើងថ្លៃ ឥទ្ធិពលសាយភាពពីបញ្ហាព្រំដែនកម្ពុជា-ថៃ និងការបង្ក្រាបសកម្មភាពឆបោកតាមប្រព័ន្ធបច្ចេកវិទ្យា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារាចរស្ដីពីការរៀបចំផែនការយុទ្ធសាស្ត្រថវិកាឆ្នាំ២០២៧-២០២៩ និងការរៀបចំសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៧ រាជរដ្ឋាភិបាលកម្ពុជាបានវាយតម្លៃថាសេដ្ឋកិច្ចជាតិមានកំណើតត្រឹម ៤,២% ប៉ុណ្ណោះដោយសារកម្មវិបាកផ្ទួនៗគ្នាជាអវិជ្ជមានពីបញ្ហាធំៗ៣ខាងលើ។

ការឡើងថ្លៃប្រេងបានប៉ះពាល់ដល់កត្តាផលិតកម្ម តួយ៉ាង កសិកម្ម ដឹកជញ្ជូន និងទេសចរណ៍ជាដើមគួបផ្សំនឹងសម្ពាធអតិផរណា បានបន្ទច់បង្អាក់ដល់សកម្មភាពចាយ និងប្រើប្រាស់ជារួម ហើយឥទ្ធិពលសាយភាពពីបញ្ហាព្រំដែនកម្ពុជា-ថៃ បានប៉ះពាល់ដល់ប្រាក់បង្វែរឯកជន ទេសចរណ៍ដែលពឹងផ្អែកច្រកព្រំដែនអន្តរជាតិកម្ពុជា-ថៃ និងការនាំចេញកសិផលជាដើម។ ដោយឡែកការបង្ក្រាបបទល្មើសឆបោកអនឡាញក៏បានបង្កផលប៉ះពាល់រយៈពេលខ្លីផងដែរ គឺប៉ះពាល់ដល់វិស័យសំណង់ អចលនទ្រព្យ និងការប្រើប្រាស់ក្នុងស្រុក ដោយសារការបាត់ចំណូលពីសកម្មភាពនេះ។

ទោះជាយ៉ាងណារាជរដ្ឋាភិបាលក៏បានព្យាករណ៍ផងដែរថាកំណើនសេដ្ឋកិច្ចនឹងងើបឡើងវិញក្នុងអត្រា៥%ក្នុងឆ្នាំ២០២៧ តែត្រូវបានហ៊ុមព័ទ្ធដោយហានិភ័យ និងភាពមិនប្រាកដប្រជានៅឡើយ ដោយហេតុនេះទើបរដ្ឋាភិបាលបានសម្រេចដាក់ចេញឯកសារក្របខ័ណ្ឌហិរញ្ញវត្ថុសាធារណៈ ២០២៧-២០២៩ ដើម្បីដោះស្រាយបញ្ហាចំពោះមុខ វិធានការគោលនយោបាយហិរញ្ញវត្ថុសាធារណៈ វិធានការគោលនយោបាយរូបិយវត្ថុ និងហិរញ្ញវត្ថុ និងវិធានការដោះស្រាយបញ្ហាជារចនាសម្ព័ន្ធ។

ដោយឡែកសម្រាប់ក្នុងឆ្នាំ២០២៥កន្លងទៅ រាជរដ្ឋាភិបាលឱ្យដឹងថាសេដ្ឋកិច្ចកម្ពុជាបានទទួលរងព្យុះកំបុតត្បូងចំនួន២ចម្បងគឺ ការដាក់ឱ្យអនុវត្តនពន្ធគយបដិការរបស់សហរដ្ឋអាមេរិក និងភាពតានតឹងនៃបញ្ហាព្រំដែនកម្ពុជា-ថៃ៕