ក្នុងឱកាសនៃជំនួប  ភាគីទាំងពីរបានផ្លាស់ប្តូរយោបល់លើស្ថានភាពទូទៅនៃការធ្វើដំណើរទៅមកតាមអាកាសចរណ៍ Asiana Airlines របស់ប្រជាជនកម្ពុជា និងកូរ៉េ ព្រមទាំងបានពិភាក្សាអំពីការបន្តពង្រឹងកិច្ចសហប្រតិបត្តិការរវាងស្ថាប័នទាំងពីរ ក្នុងគោលបំណងសម្រួលដល់ការធ្វើដំណើររបស់ប្រជាជនខ្មែរ ដែលតែងតែទុកចិត្ត និងប្រើប្រាស់សេវាកម្មរបស់ក្រុមហ៊ុន Asiana Airlines និងដើម្បីបង្កើនចំនួនអ្នកទេសចរកូរ៉េទៅទស្សនាប្រទេសកម្ពុជា។

លោកឯកអគ្គរាជទូត បានលើកឡើងថា មានភ្ញៀវទេសចរកូរ៉េ និងបរទេសជាច្រើនមានបំណងទៅទស្សនាប្រាសាទអង្គរវត្តរបស់កម្ពុជា ដូច្នេះសង្ឃឹមថា ក្រុមហ៊ុននឹងពិចារណាពិនិត្យលទ្ធភាពបើកជើងហោះហើរត្រង់ពីទីក្រុងសេអ៊ូល ទៅកាន់ខេត្តសៀមរាប ដើម្បីសម្រួលដល់អ្នកទេសចរ ដែលមានបំណងធ្វើដំណើរកំសាន្តដោយផ្ទាល់ទៅកាន់ខេត្តទេសចរណ៍វប្បធម៌មួយនេះ។

ជាការឆ្លើយតប លោក Song បានជម្រាបជូន លោកឯកអគ្គរាជទូត ថាក្រុមហ៊ុននឹងពិចារណាពិនិត្យលទ្ធភាពក្នុងការរៀបចំជើងហោះហើរត្រង់ទៅខេត្តសៀមរាប នាពេលអនាគត៕

The post ទូតកម្ពុជាប្រចាំសាធារណរដ្ឋកូរ៉េ ជំរុញក្រុមហ៊ុន Asiana Airlines បើកជើងហោះហើរត្រង់មកកាន់ខេត្តសៀមរាប appeared first on Kampuchea Thmey Daily.

មូលនិធិនេះ ត្រូវបានផ្តួចផ្តើមឡើងដោយស្ថានទូតកម្ពុជាប្រចាំប្រទេសកូរ៉េ ដោយមានការចូលរួមបរិច្ចាគជាថវិការពីបងប្អូនសហគមន៍ខ្មែរដែលរស់នៅ ធ្វើការ និងសិក្សារៀនសូត្រ នៅប្រទេសកូរ៉េ ក្នុងគោលបំណងសម្រាលបន្ទុករបស់រដ្ឋាភិបាល និងចូលរួមចំណែកកាត់បន្ថយការលំបាករបស់បងប្អូនជនភៀសសឹក និងគ្រួសារវិរៈកងទ័ពដែលត្រូវបានជម្លៀសពីតំបន់សមរភូមិមុខ និងត្រូវបានបង្ខំឱ្យចាកចេញពីលំនៅដ្ឋានរបស់ខ្លួន ដោយសារសង្គ្រាមឈ្លានពានរបស់ថៃ។

ថ្លែងក្នុងកម្មវិធីចែកអំណោយមនុស្សធម៍នេះ លោក ឯកអគ្គរាជទូត បានមានប្រសាសន៍ថា បើទោះបីជាជំនួយទាំងនេះមិនអាចឆ្លើយតប និងបំពេញបាននូវតម្រូវការ និងការលំបាក​ របស់បងប្អូនប្រជាជនភៀសសឹកក្តី តែវាបានបង្ហាញនូវស្មារតី សាមគ្គីភាព ស្រលាញ់ជាតិមាតុភូមិ ថែរក្សា ការពារ សុខសន្តិភាព អធិបតេយ្យ និងបូរណភាពទឹកដី​ ក្នុងនាមជាពលរដ្ឋខ្មែរតែមួយ បើទោះបីជាពួកគាត់នៅចាកឆ្ងាយពីទឹកដីកំណើតក៏ដោយ​ តែទឹកចិត្តរបស់ពួកគាត់នៅតែនឹករលឹកដល់ស្រុកកំណើត និងតែងតែចង់ចូលរួមចំណែកក្នុងបុព្វហេតុជាតិ មាតុភូមិជានិច្ច៕

The post ស្ថានទូតកម្ពុជាប្រចាំប្រទេសកូរ៉េ នាំយកមូលនិធិមនុស្សធម៌របស់សហគមន៍ខ្មែរនៅកូរ៉េ​ ចែកជូនប្រជាជនភៀសសឹក និងគ្រួសារវីរកងទ័ពក្នុងខេត្តសៀមរាប appeared first on Kampuchea Thmey Daily.

​ក្នុង​ជំនួប​ជាមួយ​ប្រធាន​ក្រុម​ប្រឹក្សា​ភិបាល​ក្រុម​ហ៊ុន Daejoo KC នៅ​ស្ថានទូត​កម្ពុជា​នាទីក្រុង​សេអ៊ូល ព្រឹក​ថ្ងៃ​ទី​៩ ខែ​កុម្ភៈ ឆ្នាំ​២០២៦​ ដែល​បាន​បង្ហោះ​លើ​ហ្វេសបុក​ផេក​ស្ថាន​ឯកអគ្គរាជទូត​កម្ពុជា​ប្រចាំ​សាធារណរដ្ឋ​កូរ៉េ លោក ឃួន ផុនរតនៈ បាន​លើក​ឡើង​ពី​បំណង​របស់​​រដ្ឋាភិបាល​កម្ពុជា​ក្នុង​ការ​ស្ដារ​ទំនាក់​ទំនង​ជាមួយ​កូរ៉េ​ខាង​ត្បូង​ទៅ​រក​ភាព​ប្រក្រតី​វិញ បន្ទាប់​ពី​មាន​បញ្ហា​ឧក្រិដ្ឋកម្ម​អនឡាញ​បាន​កើត​ឡើង​កន្លង​មក​។

លោក​បាន​បញ្ជាក់​ថា កម្ពុជា​ស្វាគមន៍​ការ​ចុះ​មក​ផ្សាយ​អំពី​ការ​ពិត​នៅ​កម្ពុជា​ពី​ការ​បង្ក្រាប​បទ​ល្មើស​អនឡាញ​ទៅ​កាន់​វិនិយោគិន និង​ភ្ញៀវទេសចរ​កូរ៉េ​។

ប្រធាន​ក្រុម​ប្រឹក្សា​ភិបាល​ក្រុម​ហ៊ុន Daejoo KC លោក Park Joo Bong បាន​លើក​ឡើង​ថា​កូរ៉េ​នៅ​តែ​ផ្ដល់​សារៈសំខាន់​ដល់​ទំនាក់ទំនង​ជាមួយ​កម្ពុជា លោក​បន្ថែម​ថា​នៅ​ពាក់​កណ្ដាល​ខែ​កុម្ភៈ​នេះ​លោក​នឹង​ដឹក​នាំ​អ្នក​វិនិយោគ និង​អ្នក​កាសែត​កូរ៉េ​មក​កម្ពុជា​ផងដែរ​ដើម្បី​បង្ហាញ​ពី​បរិយាកាស​វិនិយោគ និង​ឱ្យ​អ្នក​យក​ព័ត៌មាន​បាន​រាយការណ៍​ពី​តថភាព​ក្នុង​ប្រទេស​កម្ពុជា​ដល់​ប្រជាជន​កូរ៉េ​ផង​ដែរ​។

លោក ឃួន ផុនរតនៈ ថា​បាន​បញ្ជាក់​ទៅ​ភាគី​កូរ៉េ​ថា​ស្ថានទូត​នឹង​ជួយ​សហការ​រៀបចំ​ជំនួប​រវាង​ប្រតិភូ​លោក Park ជាមួយ​ក្រសួង​ស្ថាប័ន​ពាក់ព័ន្ធ​កម្ពុជា​លើ​ករណី​នេះ​ផងដែរ​។

បន្ទាប់​ពី​មាន​ករណី​និស្សិត​កូរ៉េ​ម្នាក់​ស្លាប់​នៅ​ភ្នំ​បូកគោ ខេត្ត​កំពត​ កាលពី​ខែ​តុលា ឆ្នាំ​២០២៥ ពាក់ព័ន្ធ​នឹង​ឧក្រិដកម្ម​ឆបោក​អនឡាញ​ សាធារណ​រដ្ឋ​កូរ៉េ​បាន​ចាត់​ថ្នាក់​តំបន់​មួយ​ចំនួន​ស្ថិត​ជា​តំបន់​ហាម​ប្រាម​​កម្រិត​ខ្ពស់​ និង​បញ្ជូន​មន្ត្រី​ជា​បន្ទាប់​មក​កម្ពុជា​ដើម្បី​ដោះស្រាយ​បញ្ហា​ជនជាតិ​កូរ៉េ​ជាប់​ក្នុង​ឧក្រិដ្ឋកម្ម​ឆបោក​អនឡាញ​នៅ​កម្ពុជា​ផងដែរ​ រហូត​ឈាន​ដល់​ការ​បង្កើត​ក្រុមការងារ​រួម​កម្ពុជា​-កូរ៉េ​នៅ​ខែ​វិច្ឆិកា ឆ្នាំ​២០២៥​ផងដែរ។ នៅ​ថ្ងៃ​ទី​១៣ ខែ​មករា ឆ្នាំ​២០២៦ នាយករដ្ឋមន្ត្រី​កម្ពុជា​សម្ដេច​ធិបតី ហ៊ុន ម៉ាណែត បាន​ប្រកាស​លើ​បណ្ដាញ​សង្គម​របស់​សម្ដេច​ថា​ «ការ​ប្រយុទ្ធ​ប្រឆាំង​នឹង​ឧក្រិដ្ឋកម្ម​ឆបោក​តាម​ប្រព័ន្ធ​បច្ចេកវិទ្យា គឺ​ជា​ចំណុច​ដ៏​សំខាន់​នា​ពេល​នេះ​»ខណៈ​កម្ពុជា​បាន​បង្ហាញ​ការ​ប្ដេជ្ញា​ចិត្ត​បោស​សម្អាត​បណ្ដាញ​ឧក្រិដ្ឋកម្ម​តាម​អនឡាញ​នៅ​កម្ពុជា​ឱ្យ​អស់​ត្រឹម​ខែ​មេសា​ខាង​មុខ៕

អត្ថបទដោយ ហ៊ុន សិរីវឌ្ឍន៍ ​​​​​

The post ទូត​ខ្មែរ​ស្វាគមន៍​អ្នក​កាសែត​កូរ៉េ​មក​រាយការណ៍​​​ពី​កម្ពុជា​បន្ទាប់បានព្យាយាមបង្ក្រាប​ឧក្រិដ្ឋកម្ម​ឆបោកអនឡាញ appeared first on Kampuchea Thmey Daily.

លោក ឃួន ផុនរតនៈ ដែលជារដ្ឋលេខាធិការក្រសួងការបរទេស ត្រូវបានតែងតាំងជាឯកអគ្គរាជទូតកម្ពុជាប្រចាំកូរ៉េខាងត្បូង ជំនួសលោកស្រី ជ្រឹង បុទុមរង្សី ដែលផុតអាណត្តិ តាមព្រះរាជក្រឹត្យចុះថ្ងៃទី២៣ ខែឧសភា ឆ្នាំ២០២៥ ហើយបានចាប់ផ្ដើមបេសកកម្មការងារ នៅពាក់កណ្ដាលខែកញ្ញា ឆ្នាំ២០២៥។ ខណៈសារតាំងត្រូវបានប្រគល់ជូនលោក លី ជេម្យ៉ង់ ប្រធានាធិបតីកូរ៉េ​ខាងត្បូង កាលពីខែធ្នូ ឆ្នាំ២០២៥។

តាមជីវប្រវត្តិ ដែលចេញដោយក្រសួងការបរទេសកម្ពុជា លោក ឃួន ផុនរតនៈ គឺជាអ្នកការទូតដែលបានវិវត្តខ្លួនចេញពីការងារជាគ្រូបង្រៀនកម្រិតឧត្តមសិក្សា ដោយលោក គឺជាសាស្ត្រាចារ្យដែលបានបង្រៀននៅតាមសាកលវិទ្យាល័យធំៗមួយចំនួនក្នុងរាជធានីភ្នំពេញ ដូចជា សាកលវិទ្យាល័យបញ្ញាសាស្ត្រកម្ពុជា សាកលវិទ្យាល័យកម្ពុជា សាកលវិទ្យាល័យអន្តរជាតិ ជាដើម។

មុនក្លាយជាគ្រូបង្រៀន លោក ឃួន ផុនរតនៈ ធ្វើជាជំនួយការរបស់សម្ដេចក្រុមព្រះ នរោត្តម រណឫទ្ធិ ដែលកាលណោះ ក្នុងឋានៈសម្ដេចក្រុមព្រះ ជាប្រធានរដ្ឋសភាជាតិ នៅចន្លោះឆ្នាំ២០០៤ រហូតដល់ឆ្នាំ២០០៦ ទើបមានការផ្លាស់ប្ដូរថ្នាក់ដឹកនាំថ្មី ដោយសម្ដេចចក្រី ហេង សំរិន ត្រូវឡើងកាន់ជាប្រធានរដ្ឋសភាថ្មី។

ក្នុងអាណត្តិរាជរដ្ឋាភិបាល នីតិកាលទី៥ ឆ្នាំ២០១៣ លោក ឃួន ផុនរតនៈ បានផ្ដើមឈានជើងចូលបម្រើកិច្ចការក្នុងជួររាជរដ្ឋាភិបាល ដោយទទួលបានការតែងតាំងមុខតំណែងជាអនុរដ្ឋលេខាធិការរបស់ក្រសួងការបរទេស ហើយក្រោយមក លោក ក៏ត្រូវបានចាត់តាំងឱ្យទៅបំពេញបេសកកម្មនៅឯក្រៅប្រទេសជាលើកដំបូង ក្នុងតួនាទីជាឯកអគ្គរាជទូតប្រចាំនៅអារ៉ាប់ អេហ្ស៊ីប អាល់ហ្សេរី ម៉ារ៉ុក អេត្យូពី អារ៉ាប៊ីសាអូឌីត និងសហភាពអាហ្វ្រិក។

បេសកកក្មការទូត រយៈពេល៤ឆ្នាំ ត្រូវបានបញ្ចប់ លោក ឃួន ផុនរតនៈ បានវិលមកកាន់មុខតំណែងចាស់របស់លោក ជាអនុរដ្ឋលេខាធិការក្រសួងការបរទេស ហើយមិនបានមួយឆ្នាំផង គឺនៅក្នុងឆ្នាំ២០២៣ លោក ក៏ត្រូវបានដំឡើងជារដ្ឋលេខាធិការ មុនពេលលោកចេញទៅកាន់តួនាទីជាឯកអក្គរាជទូតជាថ្មីម្ដងទៀតពេលនេះ។

ទាំងនេះជាបទពិសោធកាងាររបស់លោក ឃួន ផុនរតនៈ លើកិច្ចការងារការទូត និងសហប្រតិបត្តិការអន្តរជាតិ ហើយបើនិយាយដល់ការសិក្សា កូនអ្នកខេត្តបាត់ដំបងរូបនេះ ទទួលបានការសិក្សារៀនសូត្រ ទាំងនៅក្នុងប្រទេសកម្ពុជា និងនៅឯក្រៅប្រទេស ជាអាទិ៍ ថ្នាក់បរិញ្ញាបត្រអក្សរអង់គ្លេស នៅសកលវិទ្យាល័យបញ្ញាសាស្ត្រកម្ពុជា បរិញ្ញាបត្រជាន់ខ្ពស់ផ្នែកសេដ្ឋកិច្ចអប់រំ និងគ្រប់គ្រងអប់រំ នៃ Northeast normal university ប្រទេសចិន រួមទាំងទទួលបានវិញ្ញាបនបត្រអន្តរជាតិមួយចំនួនទៀតពីសាកលវិទ្យាល័យក្នុងប្រទេសសិង្ហបុរី និងនូវែលហ្សេឡង់ ជាដើម។ ខណៈភាសាបរទេស គឺ លោកអាចប្រើប្រាស់បាននូវភាសាអង់គ្លេស និងភាសាចិន៕

អត្ថបទ៖ ធឿន វ៉ាន់សុង

The post ឯកអគ្គរាជទូតកម្ពុជានៅកូរ៉េខាងត្បូង លោក ឃួន ផុនរតនៈ មានប្រវត្តិបែបណា? appeared first on Kampuchea Thmey Daily.

តាមខ្លឹមសារនៅលើបណ្ដាញសង្គមរបស់សម្ដេចធិបតី ហ៊ុន ម៉ាណែត នៅព្រឹកថ្ងៃទី០៣ ខែវិច្ឆិកា ឆ្នាំ២០២៤នេះ បានឱ្យដឹងថា គិតចាប់តាំងពីពេលបើកដំណើរការនាថ្ងៃទី១០ ខែមករា ឆ្នាំ២០២៤ មកដល់ថ្ងៃទី២ ខែវិច្ឆិកា ឆ្នាំ២០២៤ ស្ថានឯកអគ្គរាជទូតកម្ពុជាប្រចាំកូរ៉េខាងត្បូង បានទទួលពាក្យស្នើសុំផ្តល់លិខិតឆ្លងដែនសរុបចំនួន ៦ ២៥២ច្បាប់ និងបានបើកលិខិតឆ្លងដែនជូនប្រជាពលរដ្ឋ និងពលករខ្មែរបានសរុបចំនួន ៤ ៩៧១នាក់។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអំណរគុណចំពោះថ្នាក់ដឹកនាំ​ មន្ត្រីនគរបាលជាតិ​ ​នៃអគ្គនាយកដ្ឋានអត្តសញ្ញាណកម្ម​​​ ក្រសួងមហាផ្ទៃ, មន្ត្រី និងបុគ្គលិក នៃស្ថានឯកអគ្គរាជទូតកម្ពុជាប្រចាំកូរ៉េ ព្រមទាំងនិស្សិត និងសហគមន៍ខ្មែរស្ម័គ្រចិត្តទាំងអស់ ដែលបានខិតខំប្រឹងប្រែងរៀបចំ និងសម្របសម្រួលការផ្តល់សេវាលិខិតឆ្លងដែនជូនប្រជាពលរដ្ឋ និងពលករខ្មែរដែលកំពុងស្នាក់នៅ និងធ្វើការនៅក្នុងប្រទេសកូរ៉េ នៅស្ថានឯកអគ្គរាជទូតកម្ពុជារហូតឈានសម្រេចបាននូវការបិទបញ្ចប់ដំណើរការនៃការផ្តល់សេវាដោយជោគជ័យគួរជាទីមោទនៈ។

សម្ដេចធិបតី ថា ការណ៍នេះពិតជាបានជួយសម្រួលដល់ការលំបាក និងកាត់បន្ថយបន្ទុកចំណាយរបស់ប្រជាពលរដ្ឋ និងពលករយើងនៅក្នុងប្រទេសកូរ៉េបានយ៉ាងច្រើន។

សម្ដេចធិបតី នាយករដ្ឋមន្ត្រី ក៏បានសម្តែងនូវក្តីរីករាយសាទរចំពោះទំនុកចិត្ត និងភាពកក់ក្តៅរបស់ប្រជាពលរដ្ឋ និងពលករខ្មែររស់នៅក្នុងប្រទេសកូរ៉េ ដែលបានមកទទួលសេវាផ្តល់លិខិតឆ្លងដែននេះ៕

The post សេវាលិខិតឆ្លងដែនផ្ដល់ដោយស្ថានទូតខ្មែរនៅកូរ៉េ បានបញ្ចប់ ទទួលបានពាក្យស្នើជាង៦ពាន់ច្បាប់ appeared first on Kampuchea Thmey Daily.

តាមរយៈឃ្លីបវីដេអូ នៅថ្ងៃទី២៣ ខែសីហា ឆ្នាំ២០២៤ លោកស្រី ជ្រឹង បុទុមរង្សី បានឱ្យដឹងថា ដោយពិនិត្យឃើញថា ប្រជាពលរដ្ឋខ្មែរមួយចំនួនមិនទាន់បានមកដាក់ពាក្យស្នើសុំនៅឡើយ, សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតជាគោលការណ៍ឱ្យស្ថានឯកអគ្គរាជទូតកម្ពុជាប្រចាំកូរ៉េខាងត្បូង ​និងក្រុមការងារក្រសួងមហាផ្ទៃ បន្តនីតិវិធីស្នើសុំលិខិតឆ្លងដែនសម្រាប់វគ្គ៣ ដល់ប្រជាពលរដ្ឋបន្តទៀត។ បើតាមលោកស្រីឯកអគ្គរាជទូត គឺវគ្គទី៣នេះ នឹងចាប់ពីថ្ងៃទី៤ ខែកញ្ញា ដល់ថ្ងៃទី២​ ខែវិច្ឆិកា ឆ្នាំ២០២៤ ។

លោកស្រីឯកអគ្គរាជទូត បានទទូចដល់ប្រជាពលរដ្ឋខ្មែរឱ្យរួសរាន់មកដាក់ពាក្យស្នើសុំលិខិតឆ្លងដែនធម្មតាថ្មីឱ្យបានគ្រប់ៗគ្នា ដើម្បីឆ្លើយតបនឹងសេចក្ដីត្រូវការរបស់ខ្លួន។

ជាការកត់សម្គាល់ កន្លងមក ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានសម្រេចអនុញ្ញាតឱ្យក្រសួង-ស្ថាប័ន ក៏ដូចជាភាគីពាក់ព័ន្ធ រៀបចំទីតាំងធ្វើលិខិតឆ្លងដែននៅក្រៅប្រទេសតែម្ដង ដោយចាប់ផ្ដើមពីប្រទេសកូរ៉េមុនគេ ដើម្បីកុំឱ្យប្រជាពលរដ្ឋខ្មែរដែលកំពុងរស់នៅ និងធ្វើការនៅក្រៅប្រទេសមានការលំបាកធ្វើដំណើរមកកម្ពុជាក្នុងការធ្វើលិខិតឆ្លងដែន ដែលបានចាប់ដំណើរការ ពីថ្ងៃទី១០ ខែមករា ឆ្នាំ២០២៤ ដល់ថ្ងៃទី៣០ ខែមេសា ឆ្នាំ២០២៤។

នៅក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋ ពលករ និងនិស្សិតកម្ពុជានៅក្នុងប្រទេសកូរ៉េខាងត្បូង កន្លងមក សម្ដេចធិបតី ហ៊ុន ម៉ាណែត ក៏បានប្រកាសពន្យារការធ្វើលិខិតឆ្លងដែននេះ សម្រាប់វគ្គទី២ ចាប់ផ្ដើមថ្ងៃទី២០ ខែឧសភា ដល់ថ្ងៃទី២៥ ខែសីហា ឆ្នាំ២០២៤​ ដែលនឹងត្រូវផុតកាលកំណត់ចុងសប្ដាហ៍នេះតែម្ដង។ ក៏ប៉ុន្តែ ដោយមានសំណើ និងពិនិត្យឃើញថា នៅមានប្រជាពលរដ្ឋ និស្សិត ពិសេសពលករមួយចំនួនមិនបានស្នើធ្វើលិខិតឆ្លងដែនថ្មីនេះ សម្ដេចធិបតី បានអនុញ្ញាតឱ្យស្ថានទូតកម្ពុជាប្រចាំកូរ៉េខាងត្បូង ពន្យារពេលបន្ថែមទៀត ដែលជាវគ្គទី៣ រហូតដល់ដើម ខែវិច្ឆិកា ឆ្នាំ២០២៤។

បើតាមលោកស្រីឯកអគ្គរាជទូត គិតមកដល់ពេលនេះ ស្ថានទូតទទួលបានពាក្យស្នើសុំខ្ទង់ ៤ ៣៦៥ពាក្យហើយ ខណៈស្ថានទូត ក៏បានផ្ដល់នូវលិខិតឆ្លងដែនទៅកាន់ប្រជាពលរដ្ឋជាបន្តបន្ទាប់ផងដែរ៕

អត្ថបទ៖ ធឿន វ៉ាន់សុង  

The post រាជរដ្ឋាភិបាល អនុញ្ញាតឱ្យបន្តផ្ដល់សេវាធ្វើលិខិតឆ្លងដែនជូនពលរដ្ឋខ្មែរនៅកូរ៉េ​ ដល់ដើមខែវិច្ឆិកា appeared first on Kampuchea Thmey Daily.

ឯកអគ្គរាជទូតកម្ពុជាប្រចាំកូរ៉េខាងត្បូង លោកស្រី ជ្រឹង បុទុមរង្សី បានសរសេរលើបណ្ដាញទំនាក់ទំនងសង្គមហ្វេសប៊ុករបស់លោកស្រី នៅថ្ងៃទី២១ ខែសីហា ឆ្នាំ២០២៤នេះ ថា៖ «សូមបងប្អូនប្រជាពលរដ្ឋខ្មែរដែលកំពុងរស់នៅ និងធ្វើការនៅសាធារណរដ្ឋកូរ៉េ សូមមេត្តារួសរាន់មកស្នើសុំលិខិតឆ្លងដែនថ្មី ដោយសារសេវានេះ នឹងបិទបញ្ចប់នៅថ្ងៃអាទិត្យ ទី២៥ ខែសីហា ឆ្នាំ២០២៤ សប្តាហ៍នេះហើយ»។

លោកស្រីឯកអគ្គរាជទូត បានបញ្ជាក់ឱ្យដែរថា សេវាស្នើធ្វើលិខិតឆ្លងដែនថ្មីនេះនឹងមិនមានធ្វើទៀតទេនៅថ្ងៃមុខ ប្រសិន​បើប្រជាពលរដ្ឋដែលមានបំណងធ្វើលិខិតឆ្លងដែនថ្មី នៅថ្ងៃអនាគត ត្រូវទៅធ្វើនៅនាយកដ្ឋានអត្តសញ្ញាណកម្ម ឬសាខានានានៅប្រទេសកម្ពុជាដោយផ្ទាល់ ព្រោះតម្រូវឱ្យមានការថតរូប និងផ្តិតខ្ចៅដៃដោយផ្ទាល់។

ជាការកត់សម្គាល់ កន្លងមក ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានសម្រេចអនុញ្ញាតឱ្យក្រសួង-ស្ថាប័ន ក៏ដូចជាភាគីពាក់ព័ន្ធ រៀបចំទីតាំងធ្វើលិខិតឆ្លងដែននៅក្រៅប្រទេសតែម្ដង ដោយចាប់ផ្ដើមពីប្រទេសកូរ៉េមុនគេ ដើម្បីកុំឱ្យប្រជាពលរដ្ឋខ្មែរដែលកំពុងរស់នៅ និងធ្វើការនៅក្រៅប្រទេសមានការលំបាកធ្វើដំណើរមកកម្ពុជាក្នុងការធ្វើលិខិតឆ្លងដែន ដែលសេវានេះ បានបើកឱ្យដំណើរការ កាលពីថ្ងៃទី១ ខែមករា ឆ្នាំ២០២៤ ដែលមានរយៈពេល ៨ខែ។

ជាថ្មីម្តងទៀត តាងនាមប្រជាពលរដ្ឋខ្មែរទាំងអស់ដែលកំពុងរស់នៅ និងធ្វើការនៅកូរ៉េខាងត្បូង លោកស្រីឯកអគ្គរាជទូត ជ្រឹង បុទុមរង្សី បានគោរពថ្លែងអំណរគុណចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលតែងតែយកចិត្តទុកដាក់ និងរៀបចំឱ្យមានសេវាស្នើសុំលិខិតឆ្លងដែនថ្មីជូនប្រជាពលរដ្ឋនៅកូរ៉េ អស់រយៈពេល៨ខែនេះ ដើម្បីសម្រួលដល់ការលំបាករបស់ប្រជាពលរដ្ឋ៕  អត្ថបទ៖ ធឿន វ៉ាន់សុង

The post អគ្គរាជទូត ប្រាប់ពលរដ្ឋខ្មែរនៅកូរ៉េ ប្រញាប់មកធ្វើលិខិតឆ្លងដែនថ្មី ខណៈជិតផុតថ្ងៃកំណត់ appeared first on Kampuchea Thmey Daily.

ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានឱ្យដឹងថា ដោយអនុវត្តតាមប្រសាសន៍ដឹកនាំដ៏ខ្ពង់ខ្ពស់របស់សម្តេចមហាបបរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងយោងសេចក្តីជូនដំណឹងលេខ ០៥២ សជណ របស់ក្រសួងមហាផ្ទៃ ចុះថ្ងៃទី៥ ខែមករា ឆ្នាំ២០២៣ រាជរដ្ឋាភិបាលកម្ពុជា បានសម្រេចដាក់ឱ្យដំណើរការសេវាផ្តល់លិខិតឆ្លងដែនធម្មតាជូនប្រជាពលរដ្ឋ និងពលករកម្ពុជា ដែលកំពុងស្នាក់នៅ និងធ្វើការនៅសាធារណរដ្ឋកូរ៉េ ចាប់ពីថ្ងៃទី១០ ខែមករា ឆ្នាំ២០២៤ តទៅ។

សម្រាប់ព័ត៌មានផ្សេងៗ ពាក់ព័ន្ធនឹងការផ្ដល់សេវា គឺទីតាំងផ្តល់សេវា ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ ដែលមានអាសយដ្ឋាន 55 Sejong Daero, Jung-gu, Seoul 04513; Tel. +82 2 3785 1041។ ពេលវេលានៃការផ្តល់សេវា ពីថ្ងៃចន្ទ ដល់ថ្ងៃសុក្រ (លើកលែងថ្ងៃសម្រាក ឬការកំណត់ដោយឡែក) ពេលព្រឹកចាប់ពីម៉ោង ០៩៖០០-១២៖០០ និងរសៀលចាប់ពីម៉ោង ១៤៖០០-១៧៖០០នាទី។ រីឯ បែបបទ និងនីតិវិធី ក្នុងករណីពលរដ្ឋដែលមានអាយុចាប់ពី១៥ឆ្នាំឡើង ត្រូវមានឯកសារលិខិតឆ្លងដែនច្បាប់ដើម។

ក៏ប៉ុន្តែ ក្នុងករណីដែលបាត់ ឬខូចលិខិតឆ្លងដែនច្បាប់ដើម ត្រូវមានលិខិតបញ្ជាក់ពីស្ថានទូត (ដើម្បីទទួលបានលិខិតបញ្ជាក់ពីស្ថានទូត សាម៉ីខ្លួនត្រូវមានលិខិតរាយការណ៍ពីប៉ូលីស ឬអាជ្ញាធរកូរ៉េ និងភ្ជាប់មកជាមួយនូវលិខិតឆ្លងដែនថតចម្លង ឬអត្តសញ្ញាណប័ណ្ណសញ្ជាតិខ្មែរ ឬសេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត ឬឯកសារផ្សេងទៀតដែលបញ្ជាក់អំពីសញ្ជាតិខ្មែរ)។

ចំពោះប័ណ្ណស្នាក់នៅរបស់ប្រទេសកូរ៉េ (Residence card) ដែលមានសុពលភាព ក្នុងករណីប័ណ្ណស្នាក់នៅនេះបាត់ ឬមិនមានសុពលភាព ត្រូវមានលិខិតបញ្ជាក់ពីស្ថានទូត (ដើម្បីទទួលបានលិខិតបញ្ជាក់ពីស្ថានទូត សាម៉ីខ្លួន ត្រូវមានលិខិតបញ្ជាក់ពីស្ថាប័នពាក់ព័ន្ធ ដូចជា សមត្ថកិច្ចភូមិ-ឃុំ គ្រឹះស្ថានសិក្សា ឬនិយោជក -ល-។

ដោយឡែក ករណីទារក ឬកុមារដែលមានអាយុក្រោម១៥ឆ្នាំ ត្រូវមានឯកសារដូចករណីខាងលើ ត្រូវភ្ជាប់បន្ថែមនូវឯកសារដូចជាលិខិតអនុញ្ញាតជាលាយលក្ខណ៍អក្សរពីឪពុក ឬម្តាយ ឬអាណាព្យាបាល និងលិខិតបញ្ជាក់កំណើត ឬលិខិតស្នើសុំពីស្ថានទូត៕

The post ស្ថានទូតខ្មែរនៅកូរ៉េខាងត្បូង នឹងផ្តល់សេវាធ្វើលិខិតឆ្លងដែនដល់ពលរដ្ឋខ្មែរចាប់ពីថ្ងៃទី១០ ស្អែកនេះ appeared first on Kampuchea Thmey Daily.