រាជរដ្ឋាភិបាល អនុញ្ញាតឱ្យបន្តផ្ដល់សេវាធ្វើលិខិតឆ្លងដែនជូនពលរដ្ឋខ្មែរនៅកូរ៉េ​ ដល់ដើមខែវិច្ឆិកា

រាជរដ្ឋាភិបាល អនុញ្ញាតឱ្យបន្តផ្ដល់សេវាស្នើសុំលិខិតឆ្លងដែនថ្មីជូនប្រជាពលរដ្ឋនៅកូរ៉េខាងត្បូង សម្រាប់វគ្គ៣ រហូតដល់ដើមខែវិច្ឆិកា ឆ្នាំ២០២៤ ក្រោយការផ្តល់សម្រាប់វគ្គ២ នឹងត្រូវបញ្ចប់នៅថ្ងៃទី២៦ ខែសីហា នាចុងសប្ដាហ៍នេះ។ នេះបើតាមការថ្លែងឱ្យដឹងដោយលោកស្រី ជ្រឹង បុទុមរង្សី ឯកអគ្គរាជទូតកម្ពុជាប្រចាំកូរ៉េខាងត្បូង។

តាមរយៈឃ្លីបវីដេអូ នៅថ្ងៃទី២៣ ខែសីហា ឆ្នាំ២០២៤ លោកស្រី ជ្រឹង បុទុមរង្សី បានឱ្យដឹងថា ដោយពិនិត្យឃើញថា ប្រជាពលរដ្ឋខ្មែរមួយចំនួនមិនទាន់បានមកដាក់ពាក្យស្នើសុំនៅឡើយ, សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតជាគោលការណ៍ឱ្យស្ថានឯកអគ្គរាជទូតកម្ពុជាប្រចាំកូរ៉េខាងត្បូង ​និងក្រុមការងារក្រសួងមហាផ្ទៃ បន្តនីតិវិធីស្នើសុំលិខិតឆ្លងដែនសម្រាប់វគ្គ៣ ដល់ប្រជាពលរដ្ឋបន្តទៀត។ បើតាមលោកស្រីឯកអគ្គរាជទូត គឺវគ្គទី៣នេះ នឹងចាប់ពីថ្ងៃទី៤ ខែកញ្ញា ដល់ថ្ងៃទី២​ ខែវិច្ឆិកា ឆ្នាំ២០២៤ ។

លោកស្រីឯកអគ្គរាជទូត បានទទូចដល់ប្រជាពលរដ្ឋខ្មែរឱ្យរួសរាន់មកដាក់ពាក្យស្នើសុំលិខិតឆ្លងដែនធម្មតាថ្មីឱ្យបានគ្រប់ៗគ្នា ដើម្បីឆ្លើយតបនឹងសេចក្ដីត្រូវការរបស់ខ្លួន។

ជាការកត់សម្គាល់ កន្លងមក ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានសម្រេចអនុញ្ញាតឱ្យក្រសួង-ស្ថាប័ន ក៏ដូចជាភាគីពាក់ព័ន្ធ រៀបចំទីតាំងធ្វើលិខិតឆ្លងដែននៅក្រៅប្រទេសតែម្ដង ដោយចាប់ផ្ដើមពីប្រទេសកូរ៉េមុនគេ ដើម្បីកុំឱ្យប្រជាពលរដ្ឋខ្មែរដែលកំពុងរស់នៅ និងធ្វើការនៅក្រៅប្រទេសមានការលំបាកធ្វើដំណើរមកកម្ពុជាក្នុងការធ្វើលិខិតឆ្លងដែន ដែលបានចាប់ដំណើរការ ពីថ្ងៃទី១០ ខែមករា ឆ្នាំ២០២៤ ដល់ថ្ងៃទី៣០ ខែមេសា ឆ្នាំ២០២៤។

នៅក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋ ពលករ និងនិស្សិតកម្ពុជានៅក្នុងប្រទេសកូរ៉េខាងត្បូង កន្លងមក សម្ដេចធិបតី ហ៊ុន ម៉ាណែត ក៏បានប្រកាសពន្យារការធ្វើលិខិតឆ្លងដែននេះ សម្រាប់វគ្គទី២ ចាប់ផ្ដើមថ្ងៃទី២០ ខែឧសភា ដល់ថ្ងៃទី២៥ ខែសីហា ឆ្នាំ២០២៤​ ដែលនឹងត្រូវផុតកាលកំណត់ចុងសប្ដាហ៍នេះតែម្ដង។ ក៏ប៉ុន្តែ ដោយមានសំណើ និងពិនិត្យឃើញថា នៅមានប្រជាពលរដ្ឋ និស្សិត ពិសេសពលករមួយចំនួនមិនបានស្នើធ្វើលិខិតឆ្លងដែនថ្មីនេះ សម្ដេចធិបតី បានអនុញ្ញាតឱ្យស្ថានទូតកម្ពុជាប្រចាំកូរ៉េខាងត្បូង ពន្យារពេលបន្ថែមទៀត ដែលជាវគ្គទី៣ រហូតដល់ដើម ខែវិច្ឆិកា ឆ្នាំ២០២៤។

បើតាមលោកស្រីឯកអគ្គរាជទូត គិតមកដល់ពេលនេះ ស្ថានទូតទទួលបានពាក្យស្នើសុំខ្ទង់ ៤ ៣៦៥ពាក្យហើយ ខណៈស្ថានទូត ក៏បានផ្ដល់នូវលិខិតឆ្លងដែនទៅកាន់ប្រជាពលរដ្ឋជាបន្តបន្ទាប់ផងដែរ៕

អត្ថបទ៖ ធឿន វ៉ាន់សុង