ស្ថានីយអវកាស Archives - Kampuchea Thmey Daily

អវកាសយានិក២រូបដែលជាប់ខ្លួននៅលើយាន ISS អស់៩ខែ ត្រឡប់មកផែនដីវិញដោយជោគជ័យ

Chheang — Wed, 19 Mar 2025 03:21:24 +0000

អវកាសយានិករបស់អង្គការ NASA ចំនួន២រូបគឺ លោក Barry “Butch” Wilmore និងលោកស្រី Sunita “Suni” Williams បានធ្វើដំណើរត្រឡប់មកផែនដីដោយសុវត្ថិភាពនៅព្រឹកថ្ងៃពុធទី១៩ខែមីនានេះ បន្ទាប់ពីជាប់ខ្លួននៅលើស្ថានីយអវកាសអន្តរជាតិ (ISS) អស់រយៈពេល៩ខែ។

(រូបថត៖ ណាសា)

ដើមឡើយ គម្រោងបេសកកម្មរបស់ពួកគេនៅក្នុងលំហមានរយៈពេលត្រឹមតែ៨ថ្ងៃប៉ុណ្ណោះ ដើម្បីសាកល្បងយានអវកាស Starliner របស់ក្រុមហ៊ុន Boeing។ ប៉ុន្តែ បេសកកម្មនេះត្រូវបានអូសបន្លាយពេល ដោយសារបញ្ហាបច្ចេកទេសជាមួយនឹងឧបករណ៍របស់យានអវកាស ដែលធ្វើឲ្យវាគ្មានសុវត្ថិភាពសម្រាប់ការត្រឡប់មកវិញរបស់ពួកគេ។

អាស្រ័យហេតុនេះ អង្គការ NASA បានដាក់ឲ្យលោក Wilmore និងលោកស្រី Williams ទៅក្នុងក្រុមនាវិក Expedition 71/72 របស់ ISS ជាកន្លែងដែលពួកគេបានរួមចំណែកដល់គម្រោងស្រាវជ្រាវផ្សេងៗ និងការងារថែទាំស្ថានីយ។

ការត្រឡប់មកវិញរបស់អវកាសយានិក ត្រូវបានសម្របសម្រួលដោយបេសកកម្ម Crew-9 របស់ក្រុមហ៊ុន SpaceX ដែលបានដឹកពួកគេត្រឡប់មកវិញតាមយាន Dragon។ អមដំណើរពួកគេ មានអវកាសយានិក២រូបទៀតដូចជា លោក Nick Hague និងលោក Aleksandr Gorbunov ដែលអ្នកទាំងពីរបាននៅលើ ISS តាំងពីខែកញ្ញាឆ្នាំ២០២៤។

សូមបញ្ជាក់ថា ដំណើរត្រឡប់មកផែនដីវិញនេះ ចំណាយពេលអស់ ១៧ម៉ោង ហើយការចុះចតធ្វើឡើងនៅក្នុងទឹកសមុទ្រនៃរដ្ឋ Florida។ អវកាសយានិកទាំង៤រូប ត្រូវបានក្រុមអ្នកជំនាញធ្វើការវាយតម្លៃផ្នែកវេជ្ជសាស្ត្រ ដើម្បីឲ្យស៊ាំទៅនឹងទំនាញរបស់ផែនដី ក្រោយស្នាក់នៅក្នុងលំហរយៈពេលយូរ៕

ដោយ៖ ឈាង

ចុចអាន៖ ថាទៅតែ៨ថ្ងៃទេ តែអវកាសយានិក២រូបជាប់ក្នុងលំហដល់ឆ្នាំ២០២៥ទើបត្រឡប់វិញបាន

The post អវកាសយានិក២រូបដែលជាប់ខ្លួននៅលើយាន ISS អស់៩ខែ ត្រឡប់មកផែនដីវិញដោយជោគជ័យ appeared first on Kampuchea Thmey Daily.

ជប៉ុនផ្អាកបាញ់បង្ហោះរ៉ុក្កែតភ្លាមៗ បន្ទាប់ពីបរាជ័យ ដោយសារការផ្ទុះឆេះ

Rann Reuy — Tue, 26 Nov 2024 06:30:13 +0000

បណ្តាញសារព័ត៌មានជប៉ុន NHK បានផ្សាយថា ទីភ្នាក់ងាររុករកអវកាសរបស់ប្រទេសជប៉ុន (JAXA) បានសម្រេចផ្អាកការបាញ់សាកល្បងរ៉ុក្កែត Epsilon S នៅមជ្ឈមណ្ឌលអវកាស Tanegashima នៅភាគនិរតីនៃខេត្ត Kagoshima បន្ទាប់ពីមានការផ្ទុះឆេះស្ថានីយអវកាសនោះ។

ខ្សែវីដេអូពីប្រព័ន្ធផ្សព្វផ្សាយ ដោយទូរទស្សន៍ NHK បានបង្ហាញនូវអណ្តាតភ្លើងឆាបឆេះយ៉ាងខ្លាំង បន្ទាប់ពីការធ្វើតេស្តដោយចាប់ផ្តើមពីក្នុងដីនៅវេលាម៉ោង៨និង៣០នាទី ម៉ោងនៅក្នុងតំបន់ ស្រាប់តែភ្លាមៗនោះក៏មានសំឡេងផ្ទុះបានកើតឡើងក្រោយការដុតប្រហែល៤៩វិនាទី។ មិនមានសេចក្តី រាយការណ៍ ពីការរងរបួសណាមួយក្នុងឧបទ្ទវហេតុ នៅតំបន់ ដាច់ស្រយាល Kagoshima ភាគខាងត្បូងប្រទេសជប៉ុនឡើយ។

ការសាកល្បងត្រូវបានគេរំពឹងថា នឹងមានរយៈពេល១២០វិនាទី។

JAXA បានចាប់ដៃគូជាមួយអង្គភាពអវកាសនៃ IHI Corp ដើម្បីបង្កើត Epsilon S ដែលជាម៉ូដែលជំនាន់បន្ទាប់នៃស៊េរីរ៉ុក្កែតធុនតូច Epsilon របស់ប្រទេសជប៉ុន។ ករណីផ្ទុះបែបនេះក៏ធ្លាប់កើតមានកាលខែកក្កដាឆ្នាំមុន អំឡុងពេលការធ្វើតេស្តសាកល្បងបាញ់បង្ហោះរុក្កែត នៅទីតាំងភាគឦសាន្តនៃខេត្ត Akita។ កាលនោះការផ្ទុះបានកើតឡើងក្រោយការដុតប្រហែល៥៧វិនាទី៕

ដោយ រ៉ាន់ រើយ

The post ជប៉ុនផ្អាកបាញ់បង្ហោះរ៉ុក្កែតភ្លាមៗ បន្ទាប់ពីបរាជ័យ ដោយសារការផ្ទុះឆេះ appeared first on Kampuchea Thmey Daily.

រុស្ស៊ីបាញ់បង្ហោះរ៉ុក្កែតនាំយកយានអវកាសនិងផ្កាយរណបរបស់ខ្លួននិងអ៊ីរ៉ង់ក្នុងថ្ងៃអាមេរិកបោះឆ្នោត

Rann Reuy — Tue, 05 Nov 2024 10:15:33 +0000

ដូចការគ្រោងទុកកាលពីប៉ុន្មានថ្ងៃមុន នៅចំថ្ងៃបោះឆ្នោតប្រធានាធិបតីសហរដ្ឋអាមេរិក រុស្ស៊ីបានបាញ់បង្ហោះរ៉ុក្កែត Soyuz-2.1b ចេញពីស្ថានីយអវកាស Vostochny នៅតំបន់ចុងបូព៌ា (Far East) របស់ប្រទេសរុស្ស៊ី ដោយនាំយកយានអវកាសពីគ្រឿងនិងផ្កាយរណបចំនួន៥៣ របស់រុស្ស៊ីនិងរបស់ប្រទេសអ៊ីរ៉ង់។

តាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS ក្រោយការបាញ់បង្ហោះប្រហែលប្រាំបួននាទីកន្លះ គ្រាប់រ៉ុក្កែតនឹងត្រូវផ្តាច់ចេញជាបី ហើយផ្កាយរណប Ionosphere-M ដែលផ្ទុកផ្កាយរណបនិងយានអវកាស ត្រូវបានកំណត់ឱ្យចូលទៅក្នុងគន្លងព្រះអាទិត្យ ក្នុងរយៈពេលមួយម៉ោង។

កាលពីថ្ងៃសៅរ៍កន្លងទៅ ទីភ្នាក់ងារព័ត៌មានរុស្ស៊ី TASS បានផ្សាយថា សាជីវកម្មអវកាសរដ្ឋ Roscosmos បានចេញសេចក្តីថ្លែងការណ៍មួយបានឱ្យដឹងថា រ៉ុក្កែកនាំផ្លូវ Soyuz-2.1b ផ្ទុកយានអវកាស២គ្រឿង ប្រភេទ Ionosfera-M និងផ្កាយរណបតូចៗចំនួន៥៣។

នៅថ្ងៃទី៥ខែវិច្ឆិកា ជាថ្ងៃបោះឆ្នោតប្រធានាធិបតីសហរដ្ឋអាមេរិក ដែលមានបេក្ខជន២រូបគឺ អនុប្រធានាធីបតី លោកស្រី កាម៉ាឡា ហារីស និង អតីតប្រធានាធិបតី លោក ដូណាល់ ត្រាំ ប្រណាំងប្រជែងយកកៅអីសេតវិមានសម្រាប់ការដឹកនាំរយៈពេល៤ឆ្នាំ៕

The post រុស្ស៊ីបាញ់បង្ហោះរ៉ុក្កែតនាំយកយានអវកាសនិងផ្កាយរណបរបស់ខ្លួននិងអ៊ីរ៉ង់ក្នុងថ្ងៃអាមេរិកបោះឆ្នោត appeared first on Kampuchea Thmey Daily.

អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច?

Chheang — Tue, 05 Nov 2024 08:56:42 +0000

ពលរដ្ឋអាមេរិក បានចាប់ផ្ដើមនាំគ្នាទៅបោះឆ្នោតជ្រើសរើសមេដឹកនាំថ្មី នាថ្ងៃទី៥ខែវិច្ឆិកាឆ្នាំ២០២៤នេះ ហើយសូម្បីតែអវកាសយានិក២រូបដែលកំពុងជាប់គាំងខ្លួននៅលើស្ថានីយអវកាសអន្តរជាតិ (ISS) ក៏អាចចូលរួមនៅក្នុងការបោះឆ្នោតនេះផងដែរ។

លោកស្រី Sunita “Suni” Williams និងលោក Barry “Butch” Wilmore (រូបភាព៖ NASA)

លោក Barry “Butch” Wilmore និងលោកស្រី Sunita “Suni” Williams ដែលបានជួបប្រទះនឹងបញ្ហាបច្ចេកទេស ហើយកំពុងជាប់ខ្លួននៅលើស្ថានីយ ISS នឹងត្រូវធ្វើការបោះឆ្នោតពីលើអវកាសដូចទៅនឹងពលរដ្ឋអាមេរិកផ្សេងអ៊ីចឹងដែរ។

តាមរយៈសន្និសីទកាសែតជាមួយអង្គការណាសា (NASA) លោកស្រី Williams បាននិយាយថា លោកស្រីមានសេចក្ដីរំភើបដែលអាចបោះឆ្នោតពីលើគន្លងផែនដី។

ដំណើរការបោះឆ្នោតរបស់អវកាសយានិក នឹងធ្វើឡើងដោយសម្ងាត់ និងតាមរយៈប្រព័ន្ធផ្កាយរណប។ មុនដំបូង អវកាសយានិកត្រូវដាក់ពាក្យស្នើសុំ «សន្លឹកឆ្នោតអវត្តមាន» ដែលពួកគេអាចធ្វើការបំពេញតាមរយៈសារអេឡិចត្រូនិចខណៈកំពុងស្ថិតនៅលើស្ថានីយអវកាសអន្តរជាតិ។ NASA នឹងរៀបចំទុកដាក់ទិន្នន័យនេះលើកុំព្យូទ័រ ហើយបញ្ជូនវាតាមភ្នាក់ងារប្រព័ន្ធរ៉ាដា Near Space Network របស់ខ្លួន។ បន្ទាប់មក ទិន្នន័យនេះ នឹងផ្ញើបន្តតាមប្រព័ន្ធផ្កាយរណប Tracking and Data Relay Satellite System (TDRSS) ទៅកាន់មជ្ឈមណ្ឌល White Sands Test Facility របស់ NASA នៅរដ្ឋ New Mexico មុនផ្ញើបន្តទៅកាន់មជ្ឈមណ្ឌល Mission Control នៅទីក្រុង Houston រដ្ឋតិចសាស់។ ចុងក្រោយ ទិន្នន័យនៃសន្លឹកឆ្នោតរបស់អវកាសយានិក នឹងត្រូវបញ្ជូនទៅកាន់មណ្ឌលបោះឆ្នោតរបស់ពួកគេរៀងៗខ្លួន។

គួរបញ្ជាក់ថា នេះមិនមែនជាលើកដំបូងទេ ដែលអវកាសយានិកអាមេរិកធ្វើការបោះឆ្នោតពីលំហ។ ការបោះឆ្នោតពីលំហបែបនេះ កើតមានតាំងពីឆ្នាំ១៩៩៧មកម៉្លេះ ហើយអវកាសយានិកដំបូងគេដែលបានបោះឆ្នោតពីលំហ គឺ លោក David Wolf។ ការបោះឆ្នោតពីលំហចុងក្រោយគេ គឺនៅអំឡុងឆ្នាំ២០២០ នៅពេលដែលលោកស្រី Kate Rubins កំពុងបំពេញបេសកកម្មនៅលើ ISS៕

ដោយ៖ ឈាង

The post អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច? appeared first on Kampuchea Thmey Daily.

រុស្ស៊ីតំឡើងរ៉ុក្កែតត្រៀមបាញ់បង្ហោះផ្កាយរណបនិងយានអវកាស ចំថ្ងៃអាមេរិកបោះឆ្នោត

Rann Reuy — Sat, 02 Nov 2024 12:36:16 +0000

រុស្ស៊ីបានតំឡើងរ៉ុក្កែតនាំផ្លូវដោយមានផ្ទុកយានអវកាសនិងផ្កាយរណបតូចៗចំនួន៥៣ នៅឯកន្លែងបង្ហោះយានអវកាស Vostochny នៅតំបន់ចុងបូព៌ា (Far East) របស់ប្រទេសរុស្ស៊ី ខណៈដែលអ៊ីរ៉ង់ក៏បានបញ្ជូនផ្កាយរណប២គ្រឿងសម្រាប់ការបាញ់បង្ហោះនៅថ្ងៃទី៥ខែវិច្ឆិកានេះ។

យោងតាមការផ្សាយរបស់ទីភ្នាក់ងាររុស្ស៊ី TASS កាលពីថ្ងៃសៅរ៍ សាជីវកម្មអវកាសរដ្ឋ Roscosmos បានចេញសេចក្តីថ្លែងការណ៍មួយបានឱ្យដឹងថា រ៉ុក្កែតនាំផ្លូវ Soyuz-2.1b ផ្ទុកយានអវកាស២គ្រឿង ប្រភេទ Ionosfera-M និងផ្កាយរណបតូចៗចំនួន៥៣។

សេចក្តីថ្លែងការណ៍នោះ លើកឡើងថា៖«ថ្ងៃនេះ រ៉ុក្កែតអវកាសប្រភេទ Soyuz-2.1b ជាមួយយានអវកាស Ionosfera-M លេខ 1 និង Ionosfera-M លេខ 2 ដែលជាប្រភេទយានអវកាសរុករកស្រាវជ្រាវភពផែនដីនិងទីអាវកាស (heliogeophysical) និងផ្កាយរណបតូចៗចំនួន៥៣ របស់រុស្ស៊ី និងបរទេស ត្រូវបានដឹកជញ្ជូនដើម្បីបាញ់បង្ហោះ pad 1S ស្ថានីយអវកាស Vostochny នៃសាជីវកម្ម Roscosmos»។

រ៉ុក្កែតដឹកជញ្ជូន Soyuz-2.1b ជាមួយផ្កាយរណប គ្រោងនឹងបាញ់បង្ហោះនៅម៉ោង ២:១៨ នាទីព្រឹក ម៉ោងនៅទីក្រុងមូស្គូ ថ្ងៃទី៥ខែវិច្ឆិកា។ យោងការចេញផ្សាយរបស់សារព័ត៌មានរុស្ស៊ី។

ផ្កាយរណប Ionosfera-M ចំនួនបួន និងផ្កាយរណប Zond-M មួយនឹងបង្កើតជាផ្នែកនៃក្រុមតារានិករ Ionozond ដែលរុស្ស៊ីកំពុងបង្កើត ដើម្បីតាមដានដំណើរការភូមិសាស្ត្រ (អាកាសធាតុក្នុងលំហ) និងដោះស្រាយកិច្ចការជាច្រើន ហើយជាពិសេសគឺដើម្បីសង្កេតមើលអ៊ីយ៉ុង និងព្រះអាទិត្យ។

ជាមួយគ្នានេះ អ៊ីរ៉ង់ដែលជាបច្ចាមិត្តរបស់សហរដ្ឋអាមេរិកក៏បានបញ្ជូនផ្កាយរណប២គ្រឿងទៅកាន់ទីអាវកាសរុស្ស៊ីសម្រាប់ការបាញ់បង្ហោះលើកនេះផងដែរ៕

ដោយ រ៉ាន់ រើយ

The post រុស្ស៊ីតំឡើងរ៉ុក្កែតត្រៀមបាញ់បង្ហោះផ្កាយរណបនិងយានអវកាស ចំថ្ងៃអាមេរិកបោះឆ្នោត appeared first on Kampuchea Thmey Daily.

អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

Chheang — Fri, 07 Jun 2024 04:23:52 +0000

ក្រោយឆ្លងកាត់ដំណើរទៅកាន់លំហអវកាសចំនួន៥ដងរួចមក លោក Oleg Kononenko បានក្លាយខ្លួនជាអវកាសយានិកដំបូងគេបង្អស់នៅលើពិភលោក ដែលបានរស់នៅក្នុងលំហអស់រយៈពេល ១០០០ថ្ងៃ។ នេះបើយោងតាមការប្រកាសរបស់ទីភ្នាក់ងារអវកាសរុស្ស៊ី Roscosmos កាលពីថ្ងៃទី៥ ខែមិថុនាកន្លងទៅ។

លោក Oleg Kononenko អវកាសយានិករុស្ស៊ី (រូបភាព៖ Reuters)

អវកាសយានិករុស្ស៊ីវ័យ៥៩ឆ្នាំ បានចាប់ផ្ដើមបេសកកម្មនៅស្ថានីយអវកាសអន្តរជាតិ ISS លើកដំបូង នៅក្នុងឆ្នាំ២០០៨ ហើយបេសកកកម្មចុងក្រោយរបស់លោកបានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២៣កន្លងទៅ ដែលគ្រោងនឹងបញ្ចប់នៅក្នុងថ្ងៃទី២៣ ខែកញ្ញាខាងមុខ។ ដំណើរទៅលំហរបស់លោក Kononenko លើកនេះ មានការចូលរួមពីអវកាសយានិកអាមេរិកមកពីអង្គការ NASA គឺអ្នកស្រី Lora O’Hara និងអវកាសយានិកសញ្ជាតិរុស្ស៊ីដូចគ្នាគឺលោក Nikolai Chub។

លោក Kononenko ធ្លាប់បានបំបែកកំណត់ត្រាម្ដងរួចមកហើយកាលពីខែកុម្ភៈ ឆ្នាំ២០២៤ ដោយកាលណោះ រយៈពេលដែលលោករស់នៅលំហមានចំនួន ៨៧៨ថ្ងៃ តាមទាន់មិត្តរួមអាជីពសញ្ជាតិរុស្ស៊ីដូចគ្នាគឺលោក Gennady Padlka ដែលធ្លាប់បំំបែកកំណត់ត្រានេះបាននៅក្នុងឆ្នាំ២០១៥។

បន្ថែមពីនេះ ប្រសិនបើបេសកកម្មលើកទី៥របស់លោក Kononenko សម្រេចដូចការគ្រោងទុក នោះរយៈពេលសរុបនៅលើលំហរបស់លោកនឹងកើនដល់ចំនួន ១ ១១០ថ្ងៃ។

ស្ថានីយអវកាសអន្តរជាតិ ISS (រូបភាព៖ NASA)

សូមបញ្ជាក់ថា ស្ថានីយអវកាសអន្តរជាតិ ISS មានការចូលរួមសហការគ្នាយ៉ាងជិតស្និទ្ធរវាងសហរដ្ឋអាមេរិក និងរុស្ស៊ី បើទោះជាលើបញ្ហាភូមិសាស្ត្រនយោបាយរវាងមហាអំណាចទាំង២ហាក់មានភាពរកាំរកូសខ្លាំងក៏ដោយ ក្រោយពីផ្ទុះសង្គ្រាមនៅអ៊ុយក្រែន កាលពីខែកុម្ភៈ ឆ្នាំ២០២២។ ទីភ្នាក់ងារអវកាសរុស្ស៊ី Roscosmos ធ្លាប់ប្រកាសកាលពីខែធ្នូកន្លងទៅថា កម្មវិធីអវកាសរួមគ្នាជាមួយអង្គការ NASA ក្នុងការបញ្ជូនអវកាសយានិកទៅស្ថានីយអវកាសអន្តរជាតិ ISS នឹងនៅតែបន្តរហូតដល់ឆ្នាំ២០២៥ខាងមុខឯណោះ៕

ដោយ៖ ឈាង

The post អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ appeared first on Kampuchea Thmey Daily.

ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង

Chheang — Sat, 27 Apr 2024 03:29:04 +0000

ការដាក់យានគ្មានមនុស្សបើកនៅលើភពព្រះចន្ទ ត្រូវបានមហាយក្សចិនធ្វើបេសកកម្មបញ្ចប់ដោយជោគជ័យចំនួន៣លើកមកហើយ ប៉ុន្តែសម្រាប់ការបញ្ជូនមនុស្សទៅទីនោះនៅមិនទាន់បានធ្វើនោះឡើយ។

ទីភ្នាក់ងារអវកាសចិន China Manned Space Agency (CMSA) បានបញ្ជាក់ថា គម្រោងខាងលើកំពុងស្ថិតនៅក្នុងដំណើរការ ហើយនឹងសម្រេចបានមុនចុងឆ្នាំ២០៣០ខាងមុខ។ គម្រោងនេះ នឹងបញ្ជូនអវកាសយានិក ២នាក់ឲ្យទៅលើភពព្រះចន្ទរយៈពេល ៦ម៉ោង មុនវិលត្រឡប់ចូលទៅគន្លងព្រះចន្ទវិញ។ នៅលើយាននឹងមានអវកាសយានិក ១រូបផ្សេងទៀត ដែលជាអ្នករ៉ាប់រងបើកយានហោះចូលមកផែនដីវិញ។

លោក Lin Xiqiang អនុប្រធាន CMSA បានឲ្យដឹងថា ផលិតផលសំខាន់ៗនៃកម្មវិធីអភិវឌ្ឍន៍នេះ ត្រូវបានធ្វើរួចរាល់ហើយ ដែលមានដូចជា រ៉ុកកែត Long March 10, យានអវកាសយានិក Mengzhou, យានសម្រាប់ចុះចត Lanyue និងឈុតសម្លៀកបំពាក់អវកាសយានិក។ លោក Lin បានបន្តថា ទីតាំងដែលនឹងត្រូវបាញ់បង្ហោះរ៉ុកកែតនៃបេសកកម្មដ៏ធំនេះ កំពុងស្ថិតក្នុងការសាងសង់ ដែលមានទីតាំងនៅក្បែរកន្លែងបាញ់បង្ហោះអវកាសរាល់ដង ក្នុងកោះ Wenchang Hainan ប្រមាណជាង ២ ២០០គីឡូម៉ែត្រពីក្រុងប៉េកាំង។

បើនិយាយពីមហិច្ឆតាបន្ត ប្រទេសចិនក៏គ្រោងនឹងសង់ស្ថានីយស្រាវជ្រាវអន្តរជាតិអចិន្ត្រៃយ៍ផងដែរនៅលើប៉ូលខាងត្បូងនៃភពព្រះចន្ទ ឲ្យបានត្រឹមឆ្នាំ២០៤០ខាងមុខ។

សូមបញ្ជាក់ថា ទាំងចិន ទាំងអាមេរិក កំពុងនាំគ្នាស្វះស្វែងរកមើលប្រភពទឹកនៅលើភពព្រះចន្ទ ដែលអាចប្រែក្លាយវាទៅជាចំហេះថាមពល សម្រាប់ប្រើបញ្ឆេះរ៉ុកកែត។ បើបានសម្រេចមែននោះ រ៉ុកកែតនឹងអាចបង្ហោះបន្តចេញពីព្រះចន្ទផ្ទាល់តែម្ដងទៅលំហ កាន់តែបានជ្រៅថែមទៀត។ ការបាញ់រ៉ុកកែតចេញពីព្រះចន្ទទៅលំហ មានសភាពងាយស្រួយជាងការបាញ់ចេញពីផែនដី ក៏ព្រោះតែភាពអំណោយផលនៃទំនាញខ្សោយនៅលើភពព្រះចន្ទ៕

ដោយ៖ ឈាង

The post ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង appeared first on Kampuchea Thmey Daily.

ចិន ត្រៀមបញ្ជូនក្រុមអវកាសយានិកថ្មីទៅកាន់ស្ថានីយអវកាស Tiangong

Chheang — Thu, 25 Apr 2024 03:00:25 +0000

ក្រុមអវកាសយានិកថ្មីរបស់ចិន នឹងត្រូវបញ្ជូនទៅកាន់ស្ថានីយអវកាស Tiangong នាយប់ថ្ងៃព្រហស្បតិ៍ ទី២៥ ខែមេសា នេះ ដោយធ្វើដំណើរចេញពីមជ្ឈមណ្ឌលបាញ់បង្ហោះផ្កាយរណប Jiuquan ស្ថិតនៅភាគពាយ័ព្យប្រទេស។ នេះបើយោងតាមការប្រកាសរបស់ទីភ្នាក់ងារអវកាសចិន China Manned Space Agency (CMSA)។

បេសកកម្មលើកនេះ នឹងត្រូវដឹកនាំដោយលោក Ye Guangfu ដែលជាអ្នកបើកយន្តហោះចម្បាំង និងជាអវកាសយានិកមួយរូប ធ្លាប់ចូលរួមក្នុងក្រុមអវកាសយានិក Shenzhou-13 កាលពីឆ្នាំ២០២១កន្លងទៅ។ កូនក្រុមរបស់លោក Guangfu មានអវកាសយានិកពីររូបដូចជា លោក Li Cong និងលោក Li Guangsu ដែលនឹងត្រូវបញ្ជូនទៅលំហអវកាសជាលើកដំបូង។

ចាប់តាំងពីស្ថានីយអវកាស Tiangong ត្រូវបានសាងសង់រួចនៅឆ្នាំ២០២២មក ចិនតែងបញ្ជូនក្រុមអវកាសយានិកផ្លាស់វេនគ្នាជានិច្ចទៅប្រចាំការ។ ក្នុងមួយលើកៗមានអវកាសយានិកចំនួន ៣រូប ដែលតម្រូវឲ្យនៅទីនោះរយៈពេល ៦ខែ។ ក្រុមអវកាសយានិកថ្មីលើកនេះ នឹងត្រូវជំនួសក្រុមចាស់ (Shenzhou-17) ដែលត្រូវបានគេបញ្ជូនទៅស្ថានីយ Tiangong កាលពីខែតុលា ឆ្នាំ២០២៣កន្លងមក។

បេសកកម្មរបស់ក្រុមថ្មី Shenzhou-18 មានដូចជាការអនុវត្តពិសោធន៍លើរូបវិទ្យា និងទំនាញ ព្រមទាំងវិទ្យាសាស្ត្រជីវិត។

លោក Lin Xiqiang អគ្គនាយករងទីភ្នាក់ងារអវកាសចិន CMSA បានប្រាប់សារព័ត៌មានក្នុងស្រុក Xinhua ថា ក្រុម Shenzhou-18 ក៏នឹងអនុវត្តផងដែរនូវគម្រោងស្រាវជ្រាវឧស្ម័នផ្ទះកញ្ចក់សកលកម្រិតខ្ពស់។

ស្ថានីយអវកាស Tiangong ប្រៀបដូចជាគ្រាប់ត្បូងដ៏មានតម្លៃមួយរបស់ចិននៅក្នុងកម្មវិធីរុករកលំហ ដែលធ្លាប់បានបញ្ជូនយានគ្មានមនុស្សបើកនៅលើភពអង្គារ និងផ្ទៃព្រះចន្ទ។ កាន់តែពិសេសជាងនេះ ស្ថានីយអវកាស Tiangong បានជួយលើកមុខមាត់មហាយក្សចិនឲ្យក្លាយជាប្រទេសឈរនៅលេខរៀងទី៣លើពិភពលោក ដែលមានសមត្ថភាពដាក់មនុស្សឲ្យប្រចាំការក្នុងគន្លងតារាវិថីបាន។

ស្ថានីយអវកាស Tiangong ត្រូវគេរំពឹងថា នឹងស្ថិតនៅក្នុងគន្លងកម្រិតទាបចន្លោះពី ៤០០ ទៅ ៤៥០គីឡូម៉ែត្រពីផែនដី យ៉ាងហោចក៏១០ឆ្នាំទៀតដែរ៕

ដោយ៖ ឈាង

The post ចិន ត្រៀមបញ្ជូនក្រុមអវកាសយានិកថ្មីទៅកាន់ស្ថានីយអវកាស Tiangong appeared first on Kampuchea Thmey Daily.

ស្ថានីយអវកាស Archives - Kampuchea Thmey Daily

អវកាសយានិក​២រូប​ដែល​ជាប់ខ្លួន​នៅ​លើ​យាន ISS អស់​៩ខែ ត្រឡប់​មក​ផែនដីវិញ​ដោយ​ជោគជ័យ

ជប៉ុន​ផ្អាក​​បាញ់​បង្ហោះ​រ៉ុក្កែត​​ភ្លាមៗ​ បន្ទាប់​ពី​​បរាជ័យ ​​​ដោយសារ​ការ​ផ្ទុះ​ឆេះ​

អវកាសយានិក​អាមេរិក​២​រូប ដែល​ជាប់​ខ្លួន​ក្នុង​លំហ បោះឆ្នោត​យ៉ាង​ដូចម្ដេច?

​រុស្ស៊ី​តំឡើង​រ៉ុក្កែត​​​​ត្រៀម​បាញ់បង្ហោះ​ផ្កាយរណប​និង​យាន​អវកាស​ ចំថ្ងៃអាមេរិក​បោះឆ្នោត​

អវកាសយានិក​រុស្ស៊ី ក្លាយ​ជា​មនុស្ស​ដំបូង​គេ​រស់នៅ​​ក្នុង​លំហ​បាន ១០០០​ថ្ងៃ

ចិន​កំណត់​ពេល​ដាក់​មនុស្ស​ឲ្យ​ជាន់​ដី​ឋាន​ព្រះ​ចន្ទ​ជា​លើក​ដំបូង

ចិន​ ត្រៀម​បញ្ជូន​ក្រុម​អវកាសយានិក​ថ្មី​ទៅ​កាន់​ស្ថានីយ​អវកាស Tiangong

អវកាសយានិក២រូបដែលជាប់ខ្លួននៅលើយាន ISS អស់៩ខែ ត្រឡប់មកផែនដីវិញដោយជោគជ័យ

ជប៉ុនផ្អាកបាញ់បង្ហោះរ៉ុក្កែតភ្លាមៗ បន្ទាប់ពីបរាជ័យ ដោយសារការផ្ទុះឆេះ

អវកាសយានិកអាមេរិក២រូប ដែលជាប់ខ្លួនក្នុងលំហ បោះឆ្នោតយ៉ាងដូចម្ដេច?

រុស្ស៊ីតំឡើងរ៉ុក្កែតត្រៀមបាញ់បង្ហោះផ្កាយរណបនិងយានអវកាស ចំថ្ងៃអាមេរិកបោះឆ្នោត

អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

ចិនកំណត់ពេលដាក់មនុស្សឲ្យជាន់ដីឋានព្រះចន្ទជាលើកដំបូង

ចិន ត្រៀមបញ្ជូនក្រុមអវកាសយានិកថ្មីទៅកាន់ស្ថានីយអវកាស Tiangong