ព័ត៌មានអន្ដរជាតិ

អវកាសយានិក២រូបដែលជាប់ខ្លួននៅលើយាន ISS អស់៩ខែ ត្រឡប់មកផែនដីវិញដោយជោគជ័យ

បានផុស

៤ ខែ មុន

នៅ

ថ្ងៃពុធ ១៩ មីនា ២០២៥

ដោយ

Chheang

អវកាសយានិករបស់អង្គការ NASA ចំនួន២រូបគឺ លោក Barry “Butch” Wilmore និងលោកស្រី Sunita “Suni” Williams បានធ្វើដំណើរត្រឡប់មកផែនដីដោយសុវត្ថិភាពនៅព្រឹកថ្ងៃពុធទី១៩ខែមីនានេះ បន្ទាប់ពីជាប់ខ្លួននៅលើស្ថានីយអវកាសអន្តរជាតិ (ISS) អស់រយៈពេល៩ខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើមឡើយ គម្រោងបេសកកម្មរបស់ពួកគេនៅក្នុងលំហមានរយៈពេលត្រឹមតែ៨ថ្ងៃប៉ុណ្ណោះ ដើម្បីសាកល្បងយានអវកាស Starliner របស់ក្រុមហ៊ុន Boeing។ ប៉ុន្តែ បេសកកម្មនេះត្រូវបានអូសបន្លាយពេល ដោយសារបញ្ហាបច្ចេកទេសជាមួយនឹងឧបករណ៍របស់យានអវកាស ដែលធ្វើឲ្យវាគ្មានសុវត្ថិភាពសម្រាប់ការត្រឡប់មកវិញរបស់ពួកគេ។

អាស្រ័យហេតុនេះ អង្គការ NASA បានដាក់ឲ្យលោក Wilmore និងលោកស្រី Williams ទៅក្នុងក្រុមនាវិក Expedition 71/72 របស់ ISS ជាកន្លែងដែលពួកគេបានរួមចំណែកដល់គម្រោងស្រាវជ្រាវផ្សេងៗ និងការងារថែទាំស្ថានីយ។

ការត្រឡប់មកវិញរបស់អវកាសយានិក ត្រូវបានសម្របសម្រួលដោយបេសកកម្ម Crew-9 របស់ក្រុមហ៊ុន SpaceX ដែលបានដឹកពួកគេត្រឡប់មកវិញតាមយាន Dragon។ អមដំណើរពួកគេ មានអវកាសយានិក២រូបទៀតដូចជា លោក Nick Hague និងលោក Aleksandr Gorbunov ដែលអ្នកទាំងពីរបាននៅលើ ISS តាំងពីខែកញ្ញាឆ្នាំ២០២៤។

សូមបញ្ជាក់ថា ដំណើរត្រឡប់មកផែនដីវិញនេះ ចំណាយពេលអស់ ១៧ម៉ោង ហើយការចុះចតធ្វើឡើងនៅក្នុងទឹកសមុទ្រនៃរដ្ឋ Florida។ អវកាសយានិកទាំង៤រូប ត្រូវបានក្រុមអ្នកជំនាញធ្វើការវាយតម្លៃផ្នែកវេជ្ជសាស្ត្រ ដើម្បីឲ្យស៊ាំទៅនឹងទំនាញរបស់ផែនដី ក្រោយស្នាក់នៅក្នុងលំហរយៈពេលយូរ៕

ដោយ៖ ឈាង

ចុចអាន៖ ថាទៅតែ៨ថ្ងៃទេ តែអវកាសយានិក២រូបជាប់ក្នុងលំហដល់ឆ្នាំ២០២៥ទើបត្រឡប់វិញបាន