ព័ត៌មានអន្ដរជាតិ

អវកាសយានិករុស្ស៊ី ក្លាយជាមនុស្សដំបូងគេរស់នៅក្នុងលំហបាន ១០០០ថ្ងៃ

បានផុស

១០ ខែ មុន

នៅ

ថ្ងៃសុក្រ ៧ មិថុនា ២០២៤

ដោយ

Chheang

ក្រោយឆ្លងកាត់ដំណើរទៅកាន់លំហអវកាសចំនួន៥ដងរួចមក លោក Oleg Kononenko បានក្លាយខ្លួនជាអវកាសយានិកដំបូងគេបង្អស់នៅលើពិភលោក ដែលបានរស់នៅក្នុងលំហអស់រយៈពេល ១០០០ថ្ងៃ។ នេះបើយោងតាមការប្រកាសរបស់ទីភ្នាក់ងារអវកាសរុស្ស៊ី Roscosmos កាលពីថ្ងៃទី៥ ខែមិថុនាកន្លងទៅ។

លោក Oleg Kononenko អវកាសយានិករុស្ស៊ី (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អវកាសយានិករុស្ស៊ីវ័យ៥៩ឆ្នាំ បានចាប់ផ្ដើមបេសកកម្មនៅស្ថានីយអវកាសអន្តរជាតិ ISS លើកដំបូង នៅក្នុងឆ្នាំ២០០៨ ហើយបេសកកកម្មចុងក្រោយរបស់លោកបានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២៣កន្លងទៅ ដែលគ្រោងនឹងបញ្ចប់នៅក្នុងថ្ងៃទី២៣ ខែកញ្ញាខាងមុខ។ ដំណើរទៅលំហរបស់លោក Kononenko លើកនេះ មានការចូលរួមពីអវកាសយានិកអាមេរិកមកពីអង្គការ NASA គឺអ្នកស្រី Lora O’Hara និងអវកាសយានិកសញ្ជាតិរុស្ស៊ីដូចគ្នាគឺលោក Nikolai Chub។

លោក Kononenko ធ្លាប់បានបំបែកកំណត់ត្រាម្ដងរួចមកហើយកាលពីខែកុម្ភៈ ឆ្នាំ២០២៤ ដោយកាលណោះ រយៈពេលដែលលោករស់នៅលំហមានចំនួន ៨៧៨ថ្ងៃ តាមទាន់មិត្តរួមអាជីពសញ្ជាតិរុស្ស៊ីដូចគ្នាគឺលោក Gennady Padlka ដែលធ្លាប់បំំបែកកំណត់ត្រានេះបាននៅក្នុងឆ្នាំ២០១៥។

បន្ថែមពីនេះ ប្រសិនបើបេសកកម្មលើកទី៥របស់លោក Kononenko សម្រេចដូចការគ្រោងទុក នោះរយៈពេលសរុបនៅលើលំហរបស់លោកនឹងកើនដល់ចំនួន ១ ១១០ថ្ងៃ។

ស្ថានីយអវកាសអន្តរជាតិ ISS (រូបភាព៖ NASA)

សូមបញ្ជាក់ថា ស្ថានីយអវកាសអន្តរជាតិ ISS មានការចូលរួមសហការគ្នាយ៉ាងជិតស្និទ្ធរវាងសហរដ្ឋអាមេរិក និងរុស្ស៊ី បើទោះជាលើបញ្ហាភូមិសាស្ត្រនយោបាយរវាងមហាអំណាចទាំង២ហាក់មានភាពរកាំរកូសខ្លាំងក៏ដោយ ក្រោយពីផ្ទុះសង្គ្រាមនៅអ៊ុយក្រែន កាលពីខែកុម្ភៈ ឆ្នាំ២០២២។ ទីភ្នាក់ងារអវកាសរុស្ស៊ី Roscosmos ធ្លាប់ប្រកាសកាលពីខែធ្នូកន្លងទៅថា កម្មវិធីអវកាសរួមគ្នាជាមួយអង្គការ NASA ក្នុងការបញ្ជូនអវកាសយានិកទៅស្ថានីយអវកាសអន្តរជាតិ ISS នឹងនៅតែបន្តរហូតដល់ឆ្នាំ២០២៥ខាងមុខឯណោះ៕

ដោយ៖ ឈាង