រដ្ឋបាល​ស្រុកកោះសូទិន​ បានជ្រេីសយកទីអារាម​ វត្តមហាលាភ​ រៀបចំសង្ក្រាន្តដ៏ធំមួយ​ ខណៈ​បច្ចុប្បន្ន​ព្រះសង្ឃ​រួមនឹងគណៈគ្រប់គ្រង​វត្ដមហាលាភ​ កំពុងមមាញឹក​រៀបចំតុបតែងផ្កាផ្ញី​ ភ្លេីងពណ៍​ ដំឡេីងរោង​ កន្លែងថតរូបប្លែកៗ​ និងបានបង្កេីតកម្មវិធីកម្សាន្តសប្បាយៗជាច្រេីន។

ព្រះគ្រូ​ ឃីម​ ស្រស់​ ចៅអធិការវត្តមហាលាភ​ បានមានសង្ឃដិកាថា ​ឆ្នាំនេះ​រដ្ឋបាល​ស្រុកកោះសូទិន​ បានជ្រេីសយកទីអារាមមួយនេះធ្វេីសង្ក្រាន្តប្រចាំស្រុក​ ដោយគណៈកម្មាធិការបានត្រៀមពោតស្ងោរចំនួន ៨៨៨៦ផ្លែ​ ដេីម្បីដាក់ផ្តល់ជូនអ្នកមកលេងកម្សាន្តសង្ក្រាន្តស្រុកកោះសូទិនពិសារដោយសេរី លេីសពីនេះទៀតរដ្ឋបាលស្រុកក៏មានកម្មវិធីសប្បាយៗជាច្រេីនដូចជា៖​ លេងល្បែងប្រជាប្រិយ​ខ្មែរ​ ក្នុងរយៈពេល​បួនថ្ងៃនៃប្រារព្ធពិធីបុណ្យចូលឆ្នាំប្រពៃណីជាតិខ្មែរ។ គ្រប់បណ្តាវត្តអារាម និងតាមតំបន់រមណីយដ្ឋានទូទាំងខេត្ត​ ក៏ត្រៀមរៀបចំតុបតែងសង្ក្រានឆ្នាំថ្មីនេះ​ តាមលក្ខណៈតូចឬធំ​ ក្នុងន័យបង្កភាពសប្បាយរីករាយ។

លោក អ៊ុន ចាន់ដា អភិបាលខេត្តកំពង់ចាម ក៏បានជំរុញឲ្យអាជ្ញាធរតាមមូលដ្ឋាននៅទូទាំងខេត្ត ត្រូវរៀបចំតាមតំបន់ដែលមានភាពទាក់ទាញ និងត្រូវដាក់ផែនការ លេងល្បែងប្រជាប្រិយ៍ខ្មែរ ដើម្បីបង្កការកម្សាន្ត និងអភិរក្សល្បែងប្រជាប្រយ៍ខ្មែរផងដូចជា៖ ទាញព្រ័ត វាយក្អម ស្ដេចចង់ បោះអង្គុញ ចាប់កូនខ្លែង រាំលេងកម្សាន្ត និងកម្មវិធី សប្បាយៗជាច្រើនទៀត ធ្វើយ៉ាងណាឲ្យប្លែក និងល្អជាងឆ្នាំមុនៗ មិនតែប៉ុណ្ណោះ អាជ្ញាធរខេត្ត ក៏ពង្រឹងការការពារសន្តិសុខ សុវត្ថិភាព សណ្តាប់ធ្នាប់ ឲ្យបានល្អប្រសើរក្នុងឱកាសពិធីបុណ្យចូលឆ្នាំខ្មែរនេះដែរ៕

អត្ថបទ​​៖​ ឡេក​ ចាន់ពេជ្រ

The post វត្តមហាលាភ ​ត្រូវបានអាជ្ញាធរស្រុកកោះសូទិនជ្រេីសធ្វេីសង្ក្រាន្តឆ្នាំថ្មី​ប្រចាំស្រុក appeared first on Kampuchea Thmey Daily.

បើ​តាម​ការ​រៀបរាប់​របស់​អ្នកជំងឺ ពួកគាត់​បាន​ទិញ​នំ​បញ្ចុក​ពី​អ្នកលក់​តាម​ភូមិ​នៅ​តំបន់​ផ្សេងៗ ដូចជា ភូមិ​វាល ទួល​កំពត ទួល​ធាតុ ទួល​ក្តុល ផ្សារ​ថ្មី ប៉ាក់ណាម និង​ដំណាក់​ស្វាយ។ បន្ទាប់ពី​ទទួលទាន​បាន​ប្រហែល ២ ម៉ោង ពួកគាត់​ចាប់ផ្តើម​មាន​អាការ​ក្អួត រាគ​ជាច្រើនលើក និង​ខ្សោយ​ខ្លួន ដែល​ជា​សញ្ញា​ច្បាស់​ នៃ​ការ​ពុល​អាហារ។ អាការ​ទាំង​នេះ បាន​បង្ខំ​ឱ្យ​អ្នកជំងឺ​ជាច្រើន ត្រូវ​ស្វែងរក​ការ​ព្យាបាល​ជាបន្ទាន់។

ភ្លាមៗ បន្ទាប់ពី​ទទួល​បាន​ដំណឹង អាជ្ញាធរ​ស្រុក​កោះសូទិន ដឹកនាំ​ដោយ​លោក ហេង ហ៊ុន ប្រធាន​ក្រុមប្រឹក្សា​ស្រុក និង​អភិបាលរង​ស្រុក លោក លឿង រ៉ា​ម៉ូ និង​លោក ហ៊ុល សារ៉ន បាន​ចុះ​អន្តរាគមន៍​ភ្លាមៗ។ ពួកគាត់ បាន​រៀបចំ​ជួល​រោង និង​ទិញ​ប៉ៅអ៊ី ដើម្បី​សម្រួល​ដល់​ការ​ព្យាបាល​អ្នកជំងឺ និង​ទប់ស្កាត់​ការ​កកស្ទះ​នៅ​មន្ទីរពេទ្យ។ បច្ចុប្បន្ន អ្នកជំងឺ​ចំនួន ២០ នាក់ កំពុង​សម្រាក​ព្យាបាល​នៅ​មន្ទីរពេទ្យ​បង្អែក​ស្រុក​កោះសូទិន ដើម្បី​ទទួល​ការ​ថែទាំ​ជា​បន្ត។

អាជ្ញាធរ បាន​អំពាវនាវ​ឱ្យ​ប្រជាពលរដ្ឋ​បង្កើន​ការប្រុងប្រយ័ត្ន​នៅ​ពេល​ទិញ​អាហារ​ពី​អ្នកលក់​តាម​ភូមិ និង​ណែនាំ​ឱ្យ​ជ្រើសរើស​អ្នក​ផលិត​ដែល​អនុវត្ត​ស្តង់ដារ​អនាម័យ​ខ្ពស់។ ទន្ទឹម​នឹង​នេះ អាជ្ញាធរ កំពុង​បន្ត​ស៊ើបអង្កេត​ ដើម្បី​កំណត់​មូលហេតុ​ច្បាស់លាស់​ នៃ​ករណី​នេះ និង​ចាត់វិធានការ​ចាំបាច់ ​ដើម្បី​ការពារ​កុំ​ឱ្យ​មាន​ហេតុការណ៍​បែបនេះ​កើតឡើង​ជាថ្មី៕

អត្ថបទ និង រូបភាព ៖ ឡេក ចាន់ពេជ្រ

The post ករណីពុលនំបញ្ចុកនៅស្រុកកោះសូទិន បណ្តាលឲ្យមនុស្សរាប់សិបនាក់រងគ្រោះ appeared first on Kampuchea Thmey Daily.

ប្រជាពលរដ្ឋជាច្រេីនគ្រួសារ ក៏ដូចអ្នកធ្វេីដំណេីរឆ្លងកាត់ផ្លូវបេតុងមួយខ្សែតភ្ជាប់ពីឃុំពាមប្រធ្នោះ ស្រុកកោះសូទិន ឆ្ពោះទៅស្រុកស្រីសន្ធរ ខេត្តកំពង់ចាម បានលេីកឡេីងថា បេីសិនមានស្ពានថ្មីមួយមកជំនួសស្ពានថ្មចាស់ទ្រុឌទ្រោម នៅចំណុចភូមិវាល ឃុំពាមប្រធ្នោះ ស្រុកកោះសូទិននេះមិនដឹងល្អយ៉ាងណាទេ ព្រោះបច្ចុប្បន្នរថយន្តតូចធំ និងរម៉ក់ពុំអាចធ្វេីដំណេីរឆ្លងកាត់ពីលេីបានទេ ខណៈតួស្ពានបានបែកចេញសសៃដែកស្ទេីទាំងអស់ហេីយ និងចំណុចខ្លះទៀតស្រុតបាក់ទៀតផង។

ប្រជាពលរដ្ឋនៅតំបន់នោះបានឲ្យដឹងដែរថា ប្រសិនខែវស្សាទឹកចូល ផ្លូវវៀងខាងក្រោមស្ពានត្រូវឆ្លងដោយទូកដរជំនួសវិញ ដូច្នោះជាការបំពេញតម្រូវការជួយសម្រួលការលំបាករបស់ប្រជាពលរដ្ឋផងនោះ ពួកគាត់ស្នេីសុំឲ្យរាជរដ្ឋាភិបាល ជាពិសេសក្រសួងអភិវឌ្ឍន៍ជនបទជួយពន្លឿនកសាងស្ពានថ្មីមួយនេះផង។

ទន្ទឹមនឹងនេះដែរ លោក យី វណ្ណៈ អភិបាលស្រុកកោះសូទិន បានឲ្យដឹងដែរថា ចំពោះស្ពានថ្មដែលរងការខូចខាត និងចាស់ទ្រុឌទ្រោមនេះ រដ្ឋបាលស្រុកបានសហការជាមួយអាជ្ញាធរឃុំ ឲ្យដាក់បារាយ និងសញ្ញាគ្រោះថ្នាក់ កុំឲ្យរថយន្តតូច-ធំបេីកបរឆ្លងកាត់ពីលេី ដេីម្បីបញ្ចៀសគ្រោះថ្នាក់ផ្សេងៗ។ លោកអភិបាលស្រុក បានបញ្ជាក់ទៀតថា ចំពោះគម្រោងស្ថាបនាស្ពានត្រង់ចំណុចនេះ គឺមានក្នុងផែនការរួចមកហេីយ រង់ចាំតែការសម្រេចរបស់ថ្នាក់លេីតែប៉ុណ្ណោះ៕

អត្ថបទ៖ ឡេក ចាន់ពេជ្រ

The post ប្រជាពលរដ្ឋឃុំពាមប្រធ្នោះ ស្នេីសុំរាជរដ្ឋាភិបាល​សាងសង់ស្ពានថ្មី ខណៈស្ពានចាស់ទ្រុឌទ្រោមខ្លាំងឆ្លងកាត់លែងកើត appeared first on Kampuchea Thmey Daily.

លោក យី វណ្ណៈ អភិបាល នៃ​គណៈ​អភិបាលស្រុក​កោះសូទិន បាន​ឲ្យ​ដឹង​ថា រយៈពេល​ប៉ុន្មាន​ថ្ងៃនេះ ទឹកទន្លេ​មេគង្គ​បាន​ហក់​ឡើង​ជា​គំហុក បណ្ដាល​ឲ្យ​ផ្លូវ​បេតុង​មួយ​ចំនួន ត្រូវ​ជន់​លិច ហើយ​ប្រជាពលរដ្ឋ​ធ្វើដំណើរ​តាម​ទូក​ចម្លង ឬ​សាឡាង​ជំនួស​វិញ។ ដោយឡែក​នៅ​ឃុំ​កោះសូទិន មាន​ផ្ទះ​សម្បែង​របស់​ប្រជាពលរដ្ឋ​ត្រូវ​ប្រឈម​ការ​បាក់​ស្រុត​ច្រាំងទន្លេ។

លោក​អភិបាលស្រុក​កោះសូទិន បន្ត​ទៀត​ថា ក្រោយពី​មាន​ការ​ស្នើសុំ និង​រាយការណ៍​ពី​អាជ្ញាធរ​មូលដ្ឋាន​មក គណៈ​បញ្ជា​ឯកភាព​ស្រុក បាន​សហការ​ជាមួយ​កងកម្លាំង​នគរបាល​ស្រុក ប្រជា​ការពារ និង​ប្រជាពលរដ្ឋ ជួយ​រុះរើ​ផ្ទះ​ដែល​ប្រឈម​រង​ការ​បាក់​ស្រុត ត្រូវ​ជម្លៀស​ទៅ​រក​ទី​សុវត្ថិភាព​ជំនួស​វិញ។

លោក​បញ្ជាក់​ទៀត​ថា ផ្ទះសម្បែង​របស់​ប្រជាពលរដ្ឋ​ដែល​ត្រូវ​បាន​អាជ្ញាធរ និង​កងកម្លាំង​សមត្ថកិច្ច ជួយ​អន្តរាគមន៍ និង​រុះរើ​នោះ គិត​មកដល់​ថ្ងៃ​ទី ១៩ ខែ​កញ្ញា ឆ្នាំ ២០២៤ មាន​បី​ខ្នង​ផ្ទះ​ហើយ ត្រូវ​បន្ត​រៀបចំ​ត្រៀម​រុះរើ​បន្ថែម​ទៀត ក្នុង​ភូមិ​ទី ៩ ភូមិ​ទី ១២ នៃ​ឃុំ​កោះសូទិន។

ជាមួយ​គ្នា​នេះ​ដែរ លោក អ៊ុន ចាន់ដា អភិបាលខេត្ត​កំពង់ចាម និង​ជា​គណៈ​បញ្ជា​ឯកភាព​ខេត្ត ក៏​បាន​ណែនាំ​ឲ្យ​អាជ្ញាធរ​មូលដ្ឋាន​ទាំងអស់​យកចិត្តទុកដាក់​តាមដាន​ពី​ស្ថានភាព​ទឹកជំនន់ ដែល​អាច​បង្ក​ឲ្យ​ជន់​លិច​លំនៅឋាន​របស់​ពលរដ្ឋ និង​ត្រៀម​រៀបចំ​ទី​ទួល​សុវត្ថិភាព​ជូន​ពួកគាត់ ជាពិសេស​នោះ​រដ្ឋបាល​ខេត្ត បាន​ឲ្យ​ក្រុម​គ្រូពេទ្យ​ត្រៀម​ថ្នាំសង្កូវ ក៏​ដូចជា​ផ្សព្វផ្សាយ ណែនាំ​បន្ថែម​ឲ្យ​ប្រជាពលរដ្ឋ​ដែល​ប្រឈម​រងគ្រោះ​ដោយ​ទឹកជំនន់​ជន់ ត្រូវ​បង្កើន​ការ​យកចិត្តទុកដាក់​មើល​ថែទាំ​កូនចៅ​តូចៗ ប្រយ័ត្ន​លង់ទឹក និង​ថែទាំ​សុខភាព អនាម័យ​ខ្លួនប្រាណ​ជាប្រចាំ ដើម្បី​ជៀស​ឆ្ងាយ​ពី​ការ​ឆ្លង​ទាំងឡាយ៕

អត្ថបទ និង រូបភាព ៖ ឡេក ចាន់ពេជ្រ

The post ផ្ទះពលរដ្ឋ ៣ ខ្នងហើយ ក្នុងឃុំកោះសូទិន ត្រូវរុះរើដោយរងការ​គំរាមកំហែងពីជំនន់ទឹកទន្លេមេគង្គ appeared first on Kampuchea Thmey Daily.

ដេីម្បីដោះស្រាយភាពលំបាក​ និងជួយលេីកស្ទួយជីវភាពប្រជាពលរដ្ឋនៅតាមមូលដ្ឋាន​នោះ​ រាជរដ្ឋាភិបាល​កម្ពុជា​ បានផ្តល់ថវិកាជាច្រេីនសម្រាប់កសាងអភិវឌ្ឍន៍ភូមិឃុំ​ឲ្យកាន់តែរីកចម្រេីន​។ នៅថ្ងៃទី២១​ ខែសីហា​ ឆ្នាំ​២០២៤​ លោក​ យី​ វណ្ណៈ​ អភិបាលនៃគណអភិបាលស្រុកកោះសូទិន​ បានបើកការដ្ឋានសាងសង់ផ្លូវបេតុងអាមេចំនួន៣ខ្សែ ក្នុងឃុំពាមប្រធ្នោះ។ ទន្ទឹមនឹងនេះដែរ​ លោក​ យី វណ្ណៈ បានជំរុញឲ្យ​ប្រជាពលរដ្ឋ​នៅតាមមូលដ្ឋានត្រូវជឿជាក់លេីរាជរដ្ឋាភិបាលកម្ពុជា​ដែលដឹកនាំដោយ​សម្តេច​មហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ ព្រោះសម្តេចបានខិតខំដោះស្រាយរាល់បញ្ហាដែលប្រឈម ​និងជួយលេីកកម្ពស់ជីវភាពរបស់បងប្អូនប្រជាពលរដ្ឋឲ្យកាន់តែល្អប្រសេីរ​ តាមរយៈ​ការកសាងអភិវឌ្ឍន៍ហេដ្ឋារចនាសម្ពន្ធ័នានាជូនតាមតម្រូវការរបស់ពលរដ្ឋ។

ជាមួយគ្នានេះដែរ​ លោក​ ដន​ ខន​ ជាប្រជាពលរដ្ឋ​រស់នៅក្នុងភូមិជីហែ​ ឃុំពាមប្រធ្នោះ​ ស្រុកកោះសូទិន​ បានបង្ហាញអារម្មណ៍សប្បាយរីករាយ​ ខណៈ​បច្ចុប្បន្ន​តាមបណ្តាភូមិក្នុងឃុំមួយនេះ​ មានផ្លូវដីក្រួសប្រែក្លាយជាផ្លូវបេតុងល្អស្អាត​ ហេីយផ្លូវខ្លះប្រែពីផ្លូវដីសមកផ្លូវគ្រួសក្រហម​ ដែលជួយសម្រួលការធ្វេីដំណេីរយ៉ាងងាយស្រួល​ លឿនរហ័ស​ទាន់ពេល​ដល់អ្នកភូមិរស់នៅតំបន់នេះ។

ប្រជាពលរដ្ឋ​ក្នុងភូមិត្រពាំងជីនាង​ ឃុំល្វា​ បានថ្លែងប្រាប់ឲ្យដឹងថា​ ភូមិពួកគាត់ពីមុនមកមិនមានផ្លូវល្អស្អាតជិះទេ​ ហេីយពិបាកធ្វេីដំណេីរទៀតផង​ ពោលគឺខែវស្សាបែកភួករអិលពេញផ្លូវ​ និងខែប្រាំងវិញហ៊ុយដីពេញភូមិ​។ ពលរដ្ឋ​រូបនេះ​ បន្ថែមទៀតថា​ ពេលទទួលបានផលប្រយោជន៍ពីផ្លូវគម្រោងមូលនិធិឃុំ-សង្កាត់នៅពេលនេះចង់ឲ្យ​ប្រជាពលរដ្ឋ​ និងជាពិសេសសិស្សសាលាកុំបេីកបរលឿនៗពេក​ ដេីម្បីកាត់បន្ថយការគ្រោះថ្នាក់​ និងរួមគ្នាថែរក្សាសមិទ្ធផលមួយនេះឲ្យបានយូរអង្វែង។

គូសបញ្ជាក់ផងដែរថា​ ផ្លូវបេតុងអាមេ​ ចំនួនបីខ្សែដែលបានបេីកការដ្ឋានសាងសង់នេះ​ មានប្រវែងសរុប​ ១០៣៧ម៉ែត្រ​ ក្នុងនោះ​ ផ្លូវបេតុងក្នុងភូមិជីហែ មានប្រវែង៧០៣ម៉ែត្រ ដែលទទឹង ៣,៥ម៉ែត្រ, និងផ្លូវបេតុងក្នុងភូមិទួលក្ដុលប្រវែង១៦៧ម៉ែត្រ និងមានទទឹង៤ម៉ែត្រ, និងផ្លូវបេតុងក្នុងភូមិទួលធាតុប្រវែង១៦៧ម៉ែត្រ និងមានទទឹង ៤ម៉ែត្រ៕​

អត្ថបទ​៖​ ឡេក​ ចាន់ពេជ្រ

The post ពលរដ្ឋ​ក្នុងស្រុកកោះសូទិន​ សាទរ​ពេលទទួលបានផ្លូវបេតុងសម្រាប់ប្រេីប្រាស់ appeared first on Kampuchea Thmey Daily.

ក្រូចថ្លុងជា​ដំណាំហូបផ្លែ​ដ៏​ពេញនិយម​ដែលពលរដ្ឋ​នៅឃុំកោះសូទិន​ដាំ​ដុះ​តាម​របង​ផ្ទះ​ ស្រប​ពេល​ទឹកដី​ជាប់​ដង​ទន្លេ​នេះ​អំណោយ​ផល​សម្រាប់​ការ​ធ្វើ​ដំណាំ​កសិកម្ម។

ពលរដ្ឋ​មួយ​រូប​រស់នៅ​ក្នុង​ឃុំ​កោះសូទិន​ ស្រុក​កោះសូទិន​ ខេត្ត​កំពង់ចាម​បាន​ឲ្យ​ដឹង​ថា នៅ​ឃុំ​កោះសូទិន​ក្រៅ​ពី​​ធ្វើ​កសិកម្ម ពលរដ្ឋ​ក៏​និយម​ដាំ​ដំណាំ​ហូប​ផ្លែ​ផ្សេងៗជាពិសេស​ដំណាំក្រូច​ថ្លុង​។

បុរស​វ័យជាង ៧០ ឆ្នាំ​បាន​អះអាង​ថា ក្រូចថ្លុងនៅឃុំ​កោះ​សូទិន​​​​ជា​ដំណាំដាំ​​តាម​ធម្មជាតិ​ឲ្យផល​តាម​រដូវកាល​។

នៅក្នុងបរិវេណ​ផ្ទះ​ខណៈ​ដែល​ដើម​ក្រូចថ្លុង​ជាច្រើន​ដើមក៏​កំពុង​ហុចផល បុរស​​រូបនេះបាន​ឲ្យ​ដឹង​ថា ដំណាំ​ក្រូច​ថ្លុង​ប្រើ​​ពេលដាំ​ប្រហែល ៤ ទៅ ៥ ឆ្នាំ ហើយ​​ប្រមូលផលជាពិសេស​ចាប់​ពី​ខែ​តុលា និង​​វិច្ឆិកា។

ទោះបី​​ដំណាំ​ក្រូច​ថ្លុង​មានការនិយម​ដាំ​តាម​ផ្ទះប្រជាពលរដ្ឋ​​ ​បើតាម​បុរស​រូបនេះបានបញ្ជាក់ថា ​ការ​ដាំ​​នោះ​ភាគច្រើន​ពលរដ្ឋ​ដាំ​​សម្រាប់តែ​​ហូប​​ក្នុងក្រុម​គ្រួសារ​និងលក់ដូរ​បន្តិចបន្តួច​​ប៉ុណ្ណោះ​មិនមាន​​ជា​ចម្ការ​ធំៗ​នោះ​ទេ៕

The post ក្រូច​ថ្លុង​ឃុំ​កោះសូទិន ដល់​រដូវ​ប្រមូល​ផលពលរដ្ឋ​​បេះ​​​លក់​រហង់តាម​ដងផ្លូវ appeared first on Kampuchea Thmey Daily.

​លោក យី វណ្ណៈ អភិបាលស្រុកកោះសូទិន បានប្រាប់ឱ្យដឹងថា ​ស្រុកកោះសូទិនមានសក្ដានុពល​លើវិស័យ​កសិកម្ម​ ដែលមានដំណាំពោត ស្រូវ សណ្ដែក និងថ្នាំជក់។

លោកអភិបាលស្រុកបញ្ជាក់ឱ្យដឹងថា ប៉ុន្មានឆ្នាំកន្លងមកនេះ ​ការអភិវឌ្ឍក្នុងស្រុក​មានការរីក​ចម្រើនដោយសារមានការគិតគូពីថ្នាក់ដឹកនាំរដ្ឋាភិបាល ដែលមានហេដ្ឋារចនាសម្ព័ន្ធ ផ្លូវ ទឹក ភ្លើង និងសំណង់អាគារជាដើម។

ជាក់ស្ដែង សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានផ្ដល់ផ្លូវបេតុង ២ ខ្សែ នៅស្រុក កោះសូទិន ពីភូមិផ្សារថ្មីទៅ ព្រំប្រទល់​ស្រុក​ស្រីសន្ធរ ខាងជើងពីភូមិផ្សារថ្មី រហូតដល់ភូមិ ព្រែក ចង្ក្រាន ឃុំល្វេ ដែលសមិទ្ធិផលនេះ​បានជួយសម្រួលដល់ការធ្វើដំណើរ និងជីវភាពរស់នៅ​ដល់ពលរដ្ឋ​។

របាយការណ៍ខេត្តកំពង់ចាម បង្ហាញថា សក្ដានុពលសេដ្ឋកិច្ចក្នុងខេត្តកំពង់ចាមពឹងផ្អែកលើវិស័យចំនួន ៣ គឺវិស័យកសិកម្ម មានចំណែក ៤១ ភាគរយ សេវាកម្ម មានចំណែក ៣៧,៧ ភាគរយ និងឧស្សាហកម្ម ២១ ភាគរយ។ ទំហំសេដ្ឋកិច្ចខេត្តកំពង់ចាម សរុប ១ ៨០៥ លានដុល្លារ ដែលចំណូលមនុស្សម្នាក់មានប្រមាណ ១ ៧០០ ដុល្លារ នៅក្នុងឆ្នាំ ២០២៣៕

អត្ថបទ៖ ឡេង ដេត

The post ​វិស័យកសិកម្មជាសក្ដានុពលចម្បងនៅស្រុកកោះសូទិន​ appeared first on Kampuchea Thmey Daily.