ស្រុកកំពង់ត្រាច Archives - Kampuchea Thmey Daily

រថយន្តមួយគ្រឿងត្រូវបានប្រជាពលរដ្ឋ ប្រទះឃើញ យកមកប្លុងចោលទាំងកណ្ដាលយប់ នៅស្រុកកំពង់ត្រាច

Ung Meng — Mon, 25 May 2026 04:23:56 +0000

មានការភ្ញាក់ផ្អើលមួយបានកើតឡើង បន្ទាប់ពីប្រជាពលរដ្ឋបានប្រទះឃើញរថយន្តមួយគ្រឿង ត្រូវបានជនមិនស្គាល់អត្តសញ្ញាណ បើកយកមកប្លុងចោលនៅក្នុងភូមិសាស្ត្រស្រុកកំពង់ត្រាច កាលពីវេលារំលងអធ្រាត្រ។ ហេតុការណ៍នេះ បានបង្កឱ្យមានការសង្ស័យ និងភ្ញាក់ផ្អើលឡើងកាលពីវេលាម៉ោង ៣ រំលងអធ្រាត្រ ឈានចូលថ្ងៃទី ២៥ ខែឧសភា ឆ្នាំ២០២៦ ស្ថិតនៅក្នុងភូមិបឹងធំខាងកើត ឃុំអង្គសុភី ស្រុកកំពង់ត្រាច ខេត្តកំពត។

តាមប្រភពព័ត៌មានបឋមពីប្រជាពលរដ្ឋនៅកន្លែងកើតហេតុ បានឱ្យដឹងថា នៅមុនពេលកើតហេតុ ពោលគឺស្ថិតក្នុងវេលាម៉ោង ៣ ទាបភ្លឺ មានរថយន្តមួយគ្រឿង (មិនទាន់ស្គាល់ម៉ាក និងផ្លាកលេខច្បាស់លាស់) ត្រូវបានគេបើកយកមកទុកចោលនៅក្នុងភូមិបឹងធំខាងកើត ដោយមិនឃើញមានមនុស្សនៅក្បែរនោះឡើយ លុះព្រឹកឡើង ទើបអ្នកភូមិជិតខាងជួបប្រទះ និងបានរាយការណ៍ជូនអាជ្ញាធរមូលដ្ឋានភ្លាមៗ។

ជុំវិញករណីខាងលើនេះ ប្រជាពលរដ្ឋក៏ដូចជាមជ្ឈដ្ឋានជុំវិញ បានសម្តែងការសង្ស័យថា រថយន្តមួយគ្រឿងនេះ អាចនឹងមានការពាក់ព័ន្ធទៅនឹងបទល្មើសណាមួយ ឬក៏ជាករណីលួច ហើយយកមកប្លុងចោលក៏ថាបាន។

បច្ចុប្បន្ន អាជ្ញាធរមានសមត្ថកិច្ច និងកម្លាំងនគរបាលជំនាញ កំពុងតែចុះទៅពិនិត្យកន្លែងកើតហេតុ ដើម្បីស្រាវជ្រាវរកអត្តសញ្ញាណម្ចាស់រថយន្ត ក៏ដូចជាស្វែងរកមូលហេតុពិតប្រាកដ ដែលនាំឱ្យមានការយកមកប្លុងចោលទាំងកណ្តាលអាធ្រាត្របែបនេះ ដើម្បីចាត់ការបន្តតាមនីតិវិធីច្បាប់៕ អត្ថបទ ៖ សឹង រ៉ាត់

The post រថយន្តមួយគ្រឿងត្រូវបានប្រជាពលរដ្ឋ ប្រទះឃើញ យកមកប្លុងចោលទាំងកណ្ដាលយប់ នៅស្រុកកំពង់ត្រាច appeared first on Kampuchea Thmey Daily.

ដល់រដូវសត្វក្រៀល បន្លាស់ទីមកដល់អន្លង់ព្រីង ខណៈសត្វកម្រទម្លាប់ដេកជាប់ដី ក្លាយជាទស្សនីយភាពទាក់ទាញទេសចរឆ្ងាយជិតមកទស្សនា

Dy Bunnara — Sat, 25 Jan 2025 08:35:48 +0000

សត្វក្រៀលដែលជាប្រភេទសត្វទេសន្តរប្រវេសក៍ បានបន្លាស់ទីមករស់នៅតំបន់ការពារទេសភាពអន្លង់ព្រីងស្ថិតនៅក្នុងស្រុកកំពង់ត្រាចខេត្តកំពត ជាប់ព្រំដែនប្រទេសវៀតណាម។

លោក ឃឹម សាមី អភិបាលរងស្រុកកំពង់ត្រាចខេត្តកំពតបានឲ្យកម្ពុជាថ្មីដឹងថា ចាប់ពីខែវិច្ឆិកា សត្វក្រៀលបានចាប់ផ្ដើមបន្លាស់ទីមករស់នៅតំបន់អន្លង់ព្រីង ដែលមានចម្ងាយមិនដល់ ៥០០ ម៉ែត្រពីខ្សែបន្ទាត់ព្រំដែនប្រទេសវៀតណាម។

«ពេលនេះជាដើមរដូវនៃវដ្តធ្វើដំណើររបស់សត្វក្រៀលក្នុងការរកចំណី និងមករស់នៅក្នុងដែនអភិរក្សបឹងអន្លង់ព្រីង។ នៅរដូវប្រាំងចាប់ពីខែវិច្ឆិកា សត្វនេះបានបន្លាស់ទីពីតំបន់ភាគខាងជើងខេត្តព្រះវិហារ និងស្ទឹងត្រែង មករស់នៅនិងរកចំណីនៅតំបន់ការពារទេសភាពអន្លង់ព្រីង»។ លោក ឃឹម សាមី បានបញ្ជាក់។

លោក ឃឹម សាមី បានបន្តថា តាមការចុះទិន្នន័យ មកដល់ពេលនេះសត្វក្រៀលបានហើរមករស់នៅ និងរកចំណីនៅតំបន់អភិរក្សអន្លង់ព្រីងមានជិត ៧០ ក្បាល ខណៈខែមីនា និងមេសាអាចកើនដល់ ១០០ ក្បាល។

សត្វក្រៀលមានជីវសាស្ត្ររស់នៅខុសពីសត្វស្លាបដទៃ ដោយមានទម្លាប់ដេកនៅលើដីខុសពីសត្វស្លាបដទៃទៀតដែលមានទម្លាប់ដេកទុំនៅលើចុងឈើ។

នៅតំបន់ការពារទេសភាពអន្លង់ព្រីង អាជ្ញាធរបានរៀបចំផ្ទៃដីជាង ២១៩ ហិកតា ដើម្បីអភិរក្សការពារសត្វក្រៀល ខណៈមានអង្គការជាដៃគូមួយបានបង្កើតគម្រោងស្រូវមិត្តក្រៀល ដោយរៀបចំផ្ទៃដីស្រែរាប់រយហិកតានៅជុំវិញតំបន់អភិរក្ស ដើម្បីទុកជាចំណីរបស់វាផងដែរ។

លោក សាមី បានបញ្ជាក់ថា តាមរយៈគម្រោងស្រូវមិត្តក្រៀល គឺកសិករច្រូតស្រូវតែ ៧០% ហើយទុក ៣០% ដើម្បីធ្វើជាចំណីរបស់សត្វក្រៀល។

តំបន់អន្លង់ព្រីងជាតំបន់ដីសើមដែលសំបូរចំណី ជាពិសេសមានប្រភេទមើមម្យ៉ាងដែលជាចំណីចូលចិត្តរបស់សត្វក្រៀល។

សត្វក្រៀលបានក្លាយជាគោលដៅទេសចររបស់ទេសចរជាតិនិងអន្តរជាតិ មកទស្សនាចាប់ពីខែវិច្ឆិកាដល់ឧសភា ដែលជារដូវពួកវាបន្លាស់ទីពីតំបន់ភាគខាងជើង មករស់នៅនិងរកចំណីនៅតំបន់ទេសភាពអន្លង់ព្រីង។

លោក ឃឹម សាមី បានបញ្ជាក់ថា ក្នុងចំណោមស្រុកក្នុងខេត្តកំពត មានតែនៅអន្លង់ព្រីងក្នុងស្រុកកំពង់ត្រាចដែលមានសត្វក្រៀលមកតាំងទីរស់នៅតាមរដូវកាល។

បើតាមលោកអភិបាលរងស្រុកកំពង់ត្រាច នៅដើមឆ្នាំ ២០២៥ មានភ្ញៀវទេសចរជាតិមកលេងយ៉ាងច្រើន ខណៈតំបន់អភិរក្សសត្វក្រៀលនេះមានហេដ្ឋារចនាសម្ព័ន្ធតភ្ជាប់ សម្រួលដល់ភ្ញៀវទេសចរឆ្ងាយជិតអាចធ្វើដំណើរមកទស្សនាសត្វក្រៀលបានងាយស្រួល។

សម្រាប់ការធ្វើដំណើរមកតំបន់អន្លង់ព្រីង ភ្ញៀវទេសចរអាចមានជម្រើសផ្លូវចំនួន ៣ ខ្សែធំៗ ដោយអាចធ្វើដំណើរបំបែកពីផ្លូវជាតិលេខ ៣១ មកតាមបឹងសាលាខាងត្បូងនិងខាងជើង, ធ្វើដំណើរបំបែកពីផ្លូវលេខ ១១៧ វត្តព្រែកក្រើស មកតាមវត្តខ្វែងអំពារ ឬអាចធ្វើដំណើរបំបែកពីផ្លូវជាតិលេខ ៣៣ ពីច្រកអន្តរជាតិព្រែកចាកតាមភ្នំទឹកធំ ក៏អាចមកដល់តំបន់អន្លង់ព្រីងតាមគ្រប់មធ្យោបាយមិនថាឡានតូចឬឡានធំ។

សត្វក្រៀល ជាប្រភេទបក្សីដែលមានទម្ងន់ធ្ងន់ និងខ្ពស់ជាងគេ អាចហើរបានក្នុងរយៈចម្ងាយឆ្ងាយ ដែលបច្ចុប្បន្នកំពុងតែទទួលរងការគំរាមកំហែងឈានទៅជិតផុតពូជ។ នៅឆ្នាំ២០២១ ប្រទេសកម្ពុជាបានកត់ត្រាចំនួនសត្វក្រៀលសរុបចំនួន ១៥៦ ក្បាល៕

The post ដល់រដូវសត្វក្រៀល បន្លាស់ទីមកដល់អន្លង់ព្រីង ខណៈសត្វកម្រទម្លាប់ដេកជាប់ដី ក្លាយជាទស្សនីយភាពទាក់ទាញទេសចរឆ្ងាយជិតមកទស្សនា appeared first on Kampuchea Thmey Daily.

សត្វក្រៀល ប្រមាណ ៧០ ក្បាល កំពុងបង្ហាញខ្លួននៅតំបន់ទេសភាពអន្លង់ព្រីង

Sous Sith — Thu, 01 Feb 2024 07:39:24 +0000

កាលពីថ្ងៃទី ៣១ ខែមករា ឆ្នាំ ២០២៤ មានវត្តមានហ្វូងសត្វក្រៀលប្រមាណ ៧០ ក្បាល កំពុងបង្ហាញខ្លួននៅតំបន់ទេសភាពអន្លង់ព្រីង ស្ថិតក្នុងឃុំបឹងសាលាខាងត្បូង ស្រុកកំពង់ត្រាច ខេត្តកំពត។

លោក ប៊ិច ថុនា មន្ត្រីសម្របសម្រួល នៃអង្គការជីវិតធម្មជាតិកម្ពុជា បានប្រាប់ឱ្យដឹងថា នាពេលថ្មីៗនេះ គេបានប្រទះឃើញវត្តមានសត្វក្រៀលនៅតំបន់ការពារទេសភាពអន្លង់ព្រីង ស្ថិតក្នុងឃុំបឹងសាលាខាងត្បូង ស្រុកកំពង់ត្រាច មានចំនួន ៧០ ក្បាល ហើយចំណោមសត្វទាំងនោះ សត្វក្រៀលជំទង់មាន ៨ ក្បាល ផងដែរ។

មន្ត្រីអង្គការជីវិតធម្មជាតិនៅកម្ពុជា បានឱ្យដឹងទៀតថា វត្តមានសត្វក្រៀលប្រមាណ ៧០ ក្បាល ដែលកំពុងរស់នៅក្នុងតំបន់ទេសភាពអន្លង់ព្រីង កំពុងមានការចាប់អារម្មណ៍ខ្លាំងពីសំណាក់មហាជន និងភ្ញៀវទេសចរ ខណៈតំបន់នេះ មានចំនួនសត្វកៀលច្រើនជាងប្រភេទសត្វក្រៀលផ្សេងទៀត ដែលរស់នៅក្នុងខេត្តបន្ទាយមានជ័យ និងខេត្តតាកែវ។

លោក ប៊ិច ថុនា បានបន្តថា មូលហេតុដែលសម្បូរនៅប្រភេទសត្វកៀលក្នុងតំបន់ការពារទេសភាពអន្លង់ព្រីង ក៏ដោយសារតែក្រុមការងារអភិរក្សសត្វក្រៀលរបស់អង្គការជីវិតធម្មជាតិនៅកម្ពុជា និង ក្រោមកិច្ចសហការជាមួយក្រសួងបរិស្ថាន បានកំពុងអនុវត្ដគម្រោង «ស្រូវមិត្ដក្រៀល» ដែលធ្វើឡើងក្នុងគោលបំណងធ្វើឱ្យប្រសើរឡើងបន្ថែមទៀតនូវរបបអាហារសម្រាប់មនុស្ស និង សត្វក្រៀល ដោយលើកទឹកចិត្តឱ្យមានការចូលរួមពីភាគីពាក់ព័ន្ធក្នុងការងារអភិរក្សជីវចម្រុះ។

លោក ប៊ិច ថុនា បានបញ្ជាក់ទៀតថា យើងកំពុងដំណើរការគម្រោងដើម្បីធ្វើឱ្យប្រសើរឡើងនូវប្រព័ន្ធអេកូឡូស៊ីនៅក្នុងតំបន់ដីសើម ដោយកាត់បន្ថយការប្រើប្រាស់ជីគីមីកសិកម្ម ដែលវាមានផលប៉ះពាល់ដល់សត្វស្លាប ជាពិសេសនោះមិត្តសត្វក្រៀលដែលជាប្រភេទសត្វងាយរងគ្រោះជាសកល។ ក្រៅពីនេះ លោកបានបន្តឱ្យដឹងទៀតថា ចំពោះតំបន់ការពារទេសភាពអន្លង់ព្រីង ការអភិរក្សសត្វក្រៀលបានធ្វើឡើងក្នុងសកម្មភាពសំខាន់ៗមានដូចជា ៖ ការអង្កេត និងតាមដានចំនួនសត្វក្រៀលជាប្រចាំ និងការធ្វើសកម្មភាពអប់រំផ្សព្វផ្សាយទៅដល់ប្រជាសហគមន៍មូលដ្ឋានដែលរស់នៅជុំវិញក៍ដូចជានៅតំបន់ការពារទេសភាពបឹងព្រែកល្ពៅ ដោយផ្ដោតសំខាន់ទៅលើការទុកដាក់ការសំណល់សារធាតុគីមីកសិកម្ម ជាដើម។

លោក ប៊ិច ថុនា បានបញ្ជាក់បន្ថែមទៀតថា ក្នុងឆ្នាំ ២០២៣ កន្លងទៅ មានសត្វក្រៀល១ ក្បាលងាប់តែប៉ុណ្ណឹង នេះបើតាមស្រាវជ្រាវពីអ្នកជំនាញក្នុងស្រុកថា ប្រហែលមកពីសត្វក្រៀលនោះចាស់ពេក ទើបបណ្ដាលឱ្យងាប់។

ចំណែក លោក ប៊ូ វរសក្ស នាយកអង្គការជីវិតធម្មជាតិនៅកម្ពុជា ក៏បានប្រាប់ឱ្យដឹងថា តាមលទ្ធផលជំរឿនចាប់ពីចុងឆ្នាំ ២០២២ ដល់ឆ្នាំ ២០២៣ រាប់បានសត្វក្រៀលចំនួន ១៨០ ក្បាល ខណៈដែលជំរឿនសត្វក្រៀលចុងឆ្នាំ ២០២៣ ដល់ឆ្នាំ ២០២៤ នេះ កំពុងចាប់ផ្ដើមរាប់ជាបណ្ដើរៗហើយ។

នាយកអង្គការនេះ ក៏បានបន្ថែមទៀតថា ចំពោះចំនួនសត្វក្រៀល នៅក្នុងខេត្តទាំង ៣ នេះដែរ បើធៀបជាមួយប្រទេសឡាវ និងវៀតណាម គឺកម្ពុជា នៅមានចំនួនសត្វក្រៀលដែលនៅសេសសល់ច្រើនជាងគេ។

លោកថាវត្តមាន សត្វក្រៀល គឺមានសារៈសំខាន់ជួយដល់ប្រព័ន្ធអេកូឡូស៊ី និងជួយទាក់ទាញទេសចរមកពីប្រទេសនានាចូលកម្ពុជាដើម្បីទស្សនា និងជាផ្នែកមួយលើកស្ទួយកម្រិតជីវភាពសម្រាប់សហគមន៍មូលដ្ឋាន ផងដែរ។

លោក ប៊ូ វរសក្ស បញ្ជាក់ទៀតថា ប្រទេសកម្ពុជានៅសេសសល់វត្តមានសត្វក្រៀលច្រើនជាងប្រទេសជិតខាង ដែលវាជាទីមោទនភាពសម្រាប់កម្ពុជា ដូច្នេះហើយ សូមចូលរួមក្នុងកិច្ចការងារអភិរក្សប្រភេទសត្វកៀល និងប្រភេទសត្វស្លាប ផ្សេងទៀត ដោយគ្រាន់តែកុំជាវទំនិញ ឬ ផលិតផលដែលផលិតចេញពីសត្វព្រៃ ទាំងអស់នេះ។

សូមបញ្ជាក់ដែរថា តំបន់ការពារទេសភាពអន្លង់ព្រីង មានផ្ទៃដីសរុប ២១៧ ហិកតា ត្រូវបានរាជរដ្ឋាភិបាលបង្កើតឡើងជាតំបន់អភិរក្សធនធានធម្មជាតិមួយ ដោយអនុក្រឹត្យលេខ ៨៤ អនក្រ-បក ចុះថ្ងៃទី ៩ ខែឧសភា ឆ្នាំ ២០១៦។ តំបន់នេះ បានផ្តល់ជាទីជម្រក និងប្រភពចំណីដ៏សំខាន់សម្រាប់សត្វស្លាបទេសន្តរប្រវេសន៍ជាច្រើនប្រភេទ ជាពិសេសសត្វក្រៀល។ បន្ថែមពីនេះ តំបន់ការពារទេសភាពអន្លង់ព្រីង វាក៏ជាជម្រករបស់សត្វស្លាបផ្សេងទៀត ដូចជា ៖ សត្វខ្វែកសមុទ្រស្លាបឆ្នូតស ទាព្រៃក្បាលឆ្នូតស ផងដែរ៕

អត្ថបទ ៖ សឹង រ៉ាត់

The post សត្វក្រៀល ប្រមាណ ៧០ ក្បាល កំពុងបង្ហាញខ្លួននៅតំបន់ទេសភាពអន្លង់ព្រីង appeared first on Kampuchea Thmey Daily.

អភិបាលរងស្រុកកំពង់ត្រាច ៖ កសិករលែងបារម្ភបញ្ហាកង្វះទឹកស្រោចស្រពដំណាំស្រូវរដូវប្រាំង

Sous Sith — Mon, 29 Jan 2024 09:13:18 +0000

នាថ្ងៃទី ២៩ ខែមករា ឆ្នាំ ២០២៤ នេះ លោក ង៉ែត សុផល អភិបាលរងស្រុកកំពង់ត្រាច បានលើកឡើងថា ដោយសារមានការយកចិត្តទុកដាក់ពីរាជរដ្ឋាភិបាល និងក្រសួងពាក់ព័ន្ធនានា ជាពិសេសនោះក្រោមការដឹកនាំចង្អុលបង្ហាញពី លោក ម៉ៅ ធនិន អភិបាលខេត្តកំពត បានជួយស្តារប្រឡាយផ្លូវទឹកពីព្រែកអន្សា ដល់ស្រុកបន្ទាយមាសដើម្បីយកមកចែកជូនប្រជាកសិករនៅក្នុងស្រុកកំពង់ត្រាច ដែលប្រជាកសិកទើបនឹងធ្វើស្រែរដូវប្រាំងស្រោចស្រពស្រូវប្រាំងរបស់ប្រជាកសិកនៅដើមរដូវបានទាន់ពេលវេលា។

លោក ង៉ែត សុផល អភិបាលរងស្រុកកំពង់ត្រាច បានបញ្ជាក់ឱ្យដឹងថា ស្រូវរដូវប្រាំង និងដើមរដូវឆ្នាំ២០២៤នេះ ប្រជាកសិករអនុវត្តធ្វើស្រូវរដូវប្រាំងបានជាង២ពាន់ហិកតា មានឃុំចំនួន ៦ នៅក្នុងស្រុកកំពង់ត្រាច ដោយសារអាកាសធាតុគ្មានភ្លៀងកក់ខែ កត្តាក្តៅខ្លាំង ធ្វើឱ្យដំណាំស្រូវរដូវប្រាំងក្នុងឃុំចំនួនពីរ បានជួបនឹងកង្វះទឹក ប៉ុន្តែក្រោយមានការចូលរួមអន្តរាគមន៍ពីមន្ទីរជំនាញពាក់ព័ន្ធ មកដល់ពេលនេះ អាជ្ញាធរស្រុកអស់ក្តីបារម្ភរឿងបញ្ហាកង្វះទឹកស្រោចស្រពទៀតហើយ។

លោក ង៉ែត សុផល អភិបាលរងស្រុកកំពង់ត្រាច បានបន្ថែមថា បើតាមផ្នែកលើផ្ទៃដីដែលប្រជាកសិករកំពុងតែបង្កបង្កើនផលធ្វើស្រូវរដូវប្រាំងមានចំនួន ១,៣០០ ហិកតា គ្របដណ្តប់លើឃុំចំនួន៦ ដែលជាប់ប្រព័ន្ធស្រោចស្រព ប៉ុន្តែការអនុវត្តជាក់ស្តែងបានដល់រហូត ២,៣៩២ ហិកតា ស្មើនឹង ១៨៤%នៃ ផែនការ។

លោកអភិបាលរងស្រុក បញ្ជាក់ថា គិតមកដល់ថ្ងៃនេះ អាជ្ញាធរអស់ក្តីបារម្ភរឿងកង្វះទឹកក្នុងប្រឡាយដើម្បីឱ្យពលរដ្ឋបូមស្រោចស្រពដំណាំស្រូវ និងការធ្វើស្រែប្រាំងរបស់ពួកគាត់ទៀតហើយ។

ជាមួយគ្នានេះ លោក ង៉ែត សុផល ក៏បានអំពាវនាវដល់ប្រជាកសិករទាំងអស់ សូមមេត្តារក្សាប្រភពទឹកទុកសម្រាប់ប្រើប្រាស់ប្រចាំថ្ងៃ និងការចិញ្ចឹមសត្វ ក្នុងករណីដែលគ្មានភ្លៀងកក់ខែនាពេលខាងមុខនេះ។ ជាក់ស្ដែង មន្ទីរជំនាញធនធានទឹក និងឧតុនិយម ក៏បានស្នើសុំឱ្យពលរដ្ឋកាត់បន្ថយការធ្វើស្រូវប្រាំងលើកទី ២ ពិសេសតំបន់នៅឆ្ងាយពីប្រភពទឹក៕

អត្ថបទ ៖ សឹង រ៉ាត់

The post អភិបាលរងស្រុកកំពង់ត្រាច ៖ កសិករលែងបារម្ភបញ្ហាកង្វះទឹកស្រោចស្រពដំណាំស្រូវរដូវប្រាំង appeared first on Kampuchea Thmey Daily.

កសិករធ្វើស្រូវប្រាំងក្នុងស្រុកមួយចំនួន នៃខេត្ដកំពត កំពុងខ្វះខាតទឹកស្រោចស្រព

Sous Sith — Fri, 19 Jan 2024 09:16:25 +0000

កាលពីថ្ងៃទី១៨ ខែមករា ឆ្នាំ២០២៤ នេះ លោកអភិបាលស្រុកបន្ទាយមាស បានចុះពិនិត្យមើលស្រូវប្រាំង និងម៉ាស៊ីនបូមទឹកជាច្រើនគ្រឿងរបស់ប្រជាកសិករ ស្ថិតនៅឃុំស្ដេចគង់ខាងត្បូង និងឃុំស្ដេចគង់ខាងជើង ស្រុកបន្ទាយមាស ខេត្តកំពត ខណៈកសិកររស់នៅតំបន់ទាំងនោះ កំពុងតែខ្វះខាតទឹកសម្រាប់ស្រោចស្រពក្នុងការធ្វើស្រែប្រាំង។

លោក នូ ច័ន្ទដា អភិបាលស្រុកបន្ទាយមាស បានឱ្យដឹងថា ពាក់ពន្ធ័ការខ្វះទឹកបូមស្រោចស្រពស្រូវរដូវប្រាំង ប្រជាកសិករ កំពុងប្រឈមនឹងការខ្វះខាតទឹកបូមដាក់សន្ទូង និងស្រូវរបស់ពួកគាត់។ ហើយការដាក់ម៉ាស៊ីនទឹករាប់រយគ្រឿងដាក់បូមចេញពីប្រឡាយនេះ ដូចជាដណ្ដើមទឹកគ្នាដែរធ្វើឱ្យមានការទាស់ពាក្យសម្ដីគ្នាព្រោះអ្នកខ្លះមិនបានយកម៉ាស៊ីនមកដាក់បូមពីប្រភពដែលមានទឹកទេ ពួកគាត់ចាំតែបូមបន្តឡើងទៅដាក់ស្រែប្រាំងតែប៉ុណ្ណោះ។

បើតាមប្រជាកសិករ បាននិយាយប្រាប់ឱ្យដឹងថា ស្រូវរដូវប្រាំងរបស់កសិករជិតបានប្រមូលផលហើយ ប្រសិនបើគ្មានទឹកសម្រាប់ស្រោចស្រពនោះទេ ស្រូវប្រាំងពួកគាត់ពិតជាខូចអស់ជាមិនខាន។

ដោយឡែក លោកមេឃុំ ស្ដេចគង់ខាងត្បូង បានលើកឡើងថា ស្រូវប្រាំងប្រជាពលរដ្ឋក្នុងឃុំលោក មានប្រហែលជា ៥០០ ហិតា កំពុងតែប្រឈមនឹងការខ្វះខាតទឹកសម្រាប់ស្រោចស្រព ដែលនេះជាកង្វល់របស់កសិករក្នុងមូលដ្ឋាននេះ។

ចំណែក លោក អ៊ូ គឹន មេឃុំស្ដេចគង់ខាងជើង ក៏បានលើកឡើងដែរថា ស្រូវប្រាំងរបស់ពលរដ្ឋនៅក្នុងមូលដ្ឋានលោក មានចំនួន ១ពាន់ហិកតា ក៏កំពុងតែប្រឈមនឹងការខ្វះខាតទឹកសម្រាប់ស្រោចស្រព ខណៈពលរដ្ឋខ្លះទៀត ក៏បានច្រូតកាត់ រួចរាល់ហើយដែរ។

យ៉ាងណាមិញ លោក នូ ច័ន្ទដា បានបញ្ជាក់ថា លោកមិនទាន់ហ៊ានសន្យាជាមួយប្រជាពលរដ្ឋថា នឹងត្រូវដាក់ម៉ាស៊ីនទឹកខ្នាតធំជួយអន្តរាគមន៍បូមទឹកសង្រោះស្រូវប្រាំងជូនដល់ប្រជាពលរដ្ឋ បាននៅឡើយទេ។ ប៉ុន្តែ លោកអភិបាលស្រុករូបនេះ បាននិយាយប្រាប់ពលរដ្ឋវិញថា លោកនឹងខិតខំនិយាយជាមួយមន្ត្រីធនធានទឹកខេត្តកំពត ដើម្បីយកម៉ាស៊ីនបូមទឹកមកដាក់ឱ្យកសិករប្រើប្រាស់បានរួចមួយគ្រាសិន។

លោក នូ ចន្ទ័ដា បានបន្ថែមថា លោកនឹងជួយឧបត្តមថវិការជូនដល់ប្រជាពលរដ្ឋទាំងពីឃុំដែលមានម៉ាស៊ីនទឹកបូមដាក់ស្រូវក្នុងឃុំទទួលបានប្រាក់ ៥០ម៉ឺនរៀល សម្រាប់ទិញប្រេងបូមទឹក និងឃុំផ្សេងទៀតនៅស្រុកកំពង់ត្រាច ក៏កំពុងជួបប្រទះការខ្វះខាតទឹកសម្រាប់បូមដាក់ស្រូវសន្ទូងរបស់ពួកគាត់ផងដែរ៕

អត្ថបទ ៖ សឹង រ៉ាត់

The post កសិករធ្វើស្រូវប្រាំងក្នុងស្រុកមួយចំនួន នៃខេត្ដកំពត កំពុងខ្វះខាតទឹកស្រោចស្រព appeared first on Kampuchea Thmey Daily.

ស្រុកកំពង់ត្រាច Archives - Kampuchea Thmey Daily

រថយន្តមួយគ្រឿងត្រូវបានប្រជាពលរដ្ឋ ប្រទះឃើញ យកមកប្លុងចោលទាំងកណ្ដាលយប់ នៅស្រុកកំពង់ត្រាច

សត្វ​ក្រៀល​ ប្រមាណ ៧០​ ក្បាល កំពុងបង្ហាញខ្លួននៅតំបន់​ទេសភាព​អន្លង់​ព្រីង ​

អភិបាលរងស្រុកកំពង់ត្រាច ៖ កសិករលែងបារម្ភបញ្ហាកង្វះទឹកស្រោចស្រពដំណាំស្រូវរដូវប្រាំង

កសិករធ្វើស្រូវប្រាំងក្នុងស្រុកមួយចំនួន នៃខេត្ដកំពត កំពុងខ្វះខាតទឹកស្រោចស្រព

សត្វក្រៀល ប្រមាណ ៧០ ក្បាល កំពុងបង្ហាញខ្លួននៅតំបន់ទេសភាពអន្លង់ព្រីង