ហ្វីលីពីន Archives - Kampuchea Thmey Daily

អនីតិជនជាឃាតករ បើកការបាញ់ប្រហារក្នុងសាលារៀននៅហ្វីលីពីន សម្លាប់សិស្ស៣ និងរបួស៥នាក់

Minea Neu — Mon, 22 Jun 2026 09:47:42 +0000

មន្ត្រីប៉ូលិសហ្វីលីពីន បានឱ្យដឹងថា មនុស្ស២នាក់ បានបើកការបាញ់ប្រហារក្នុងវិទ្យាល័យមួយនៅកណ្តាលប្រទេសហ្វីលីពីន នៅថ្ងៃចន្ទ នេះ ដោយបានសម្លាប់សិស្សវ័យជំទង់ ៣នាក់ និងរបួស ៥នាក់។

យោងតាមប៉ូលិស ជនសង្ស័យភេទប្រុស២នាក់ ប្រដាប់ដោយកាំភ្លើងខ្លីជាប់ខ្លួន ត្រូវបានចាប់ខ្លួន។ ក្នុងចំណោមពួកគេ ម្នាក់ជាសិស្សនៅវិទ្យាល័យជាតិ San Jose ក្នុងទីក្រុង Tacloban ខេត្ត Leyte ជាកន្លែងដែលការបាញ់ប្រហារបានកើតឡើង។

ឡានសង្រ្គោះបន្ទាន់កំពុងដឹកសិស្សទៅមន្ទីពេទ្យ។ រូបភាព៖ AZ

លោកស្រី Evalyn Diaz មន្រ្តីប៉ូលិសប្រាប់ទីភ្នាក់ងារសារព័ត៌មាន AFP ថា ហេតុការណ៍នេះ បានកើតឡើងនៅម៉ោងប្រហែល ៩ព្រឹក ចំណែកជនដៃដល់ពីរនាក់មានអាយុ១៥ និង ១៤ ឆ្នាំ បានបាញ់ប្រហារដោយចៃដន្យក្នុងសាលារៀន។

វីដេអូមួយចេញផ្សាយដោយប្រព័ន្ធផ្សព្វផ្សាយក្នុងស្រុក ផ្ទៀងផ្ទាត់ដោយ AFP បង្ហាញពីកុមារភ័យស្លន់ស្លោស្រែកយំ ខណៈពួកគេកំពុងលាក់ខ្លួននៅក្នុងថ្នាក់រៀនមួយ ដោយឮសំឡេងបាញ់កាំភ្លើង។

លោកស្រី បានសួរចម្លើយក្មេងប្រុសដែលត្រូវចាប់ខ្លួន បន្ទាប់ពីការបាញ់ប្រហារដោយខ្លួន ទទួលបានចម្លើយថា៖ « យើងកំពុងឮថាការធ្វើបាបគឺជាមូលហេតុ នៅពីក្រោយសកម្មភាពរបស់ពួកគេ ប៉ុន្តែយើងមិនទាន់បានសួរពួកគេនៅឡើយទេ។ ពួកយើងទទួលបានកាំភ្លើង ដោយពិនិត្យមើលកន្លែងទទួលកាំភ្លើងទាំងនោះ និងរបៀបដែលពួកគេអាចយកវាចូលទៅក្នុងសាលារៀន»។

លោកស្រីបន្ថែមថា៖ « យើងក៏មិនទាន់បានកំណត់លំដាប់លំដោយនៃព្រឹត្តិការណ៍នេះដែរ។ ពួកគេនៅតែស្ថិតនៅក្នុងស្ថានីយ៍ប៉ូលិស កំពុងស្ថិតក្រោមការសួរចម្លើយ នៅចំពោះមុខឪពុកម្តាយរបស់ពួកគេ ពីព្រោះពួកគេជាអនីតិជន»។

ក្រសួងអប់រំហ្វីលីពីនបានចេញសេចក្តីថ្លែងការណ៍មួយដោយហៅថាជាស្ថានភាព ប្រុងប្រយ័ត្នខ្ពស់។

ក្រសួងអប់រំបន្ថែមថា៖ « មន្ត្រីការិយាល័យកណ្តាលរបស់យើង រួមជាមួយបុគ្គលិកការិយាល័យតំបន់គ្រប់ផ្នែក កំពុងធ្វើសកម្មភាព សម្របសម្រួលយ៉ាងជិតស្និទ្ធជាមួយអាជ្ញាធរសាលា និងការអនុវត្តច្បាប់ ដើម្បីធានាសុវត្ថិភាពក្នុងបរិវេណទាំងមូល»៕

សម្រួល៖ ណឺ មិនា

The post អនីតិជនជាឃាតករ បើកការបាញ់ប្រហារក្នុងសាលារៀននៅហ្វីលីពីន សម្លាប់សិស្ស៣ និងរបួស៥នាក់ appeared first on Kampuchea Thmey Daily.

រញ្ជួយដីនៅហ្វីលីពីន សម្លាប់មនុស្សយ៉ាងហោចណាស់៣នាក់ និងបាក់អគារច្រើនខ្នង

Minea Neu — Mon, 08 Jun 2026 05:01:28 +0000

គ្រោះរញ្ជួយដីដ៏ខ្លាំងក្លា កម្រិត ៧.៨ រ៉ិចទ័រ បានវាយប្រហារភាគខាងត្បូងប្រទេសហ្វីលីពីននៅព្រឹកពីថ្ងៃចន្ទ នេះ ដោយសម្លាប់មនុស្សយ៉ាងហោចណាស់បីនាក់ និងទាញការព្រមានពីរលកយក្សស៊ូណាមិទូទាំងតំបន់។

យោងតាមសារព័ត៌មាន CNA ផ្សាយថ្ងៃទី៨ ខែមិថុនា ឆ្នាំ២០២៦ អគារជាច្រើនបានដួលរលំ នៅតំបន់ខ្លះនៃកោះ Mindanao ខណៈអាជ្ញាធរ ចាប់ផ្តើមប្រតិបត្តិការជួយសង្គ្រោះ។

មន្ត្រីរបស់ប្រទេសហ្វីលីពីន និងឥណ្ឌូណេស៊ីជំរុញឱ្យប្រជាជននៅតំបន់ឆ្នេរសមុទ្រជម្លៀសទៅកាន់ទីទួលខ្ពស់ ខណៈប្រទេសជប៉ុនបានចេញសេចក្តីជូនដំណឹងអំពីរលកយក្សស៊ូណាមិសម្រាប់ផ្នែកខ្លះនៃឆ្នេរសមុទ្រប៉ាស៊ីហ្វិករបស់ខ្លួន។

បាក់អគារដោយសាររញ្ជួយដីនៅហ្វីលីពីន។ រូបភាព៖ AFP

ដោយឡែក សិស្សានុសិស្ស និងគ្រូបង្រៀននៅសាលាបឋមសិក្សា Mahayahay ក្នុងខេត្ត Davao Occidental បានរត់គេចខ្លួន ដើម្បីសុវត្ថិភាព ពេលគ្រោះរញ្ជួយដីកម្រិត ៧.៨រ៉ិចទ័រ បានវាយប្រហារ អំឡុងពេលគោរពទង់ជាតិនៅព្រឹកមិញនេះ។

ចាប់តាំងពីកើតហេតុ ថ្នាក់រៀនគ្រប់កម្រិតត្រូវបានផ្អាកនៅទូទាំងតំបន់ដែលរងផលប៉ះពាល់នៅ Mindanao រហូតដល់មានការជូនដំណឹងបន្ថែម។

គួរបញ្ជាក់ថា គ្រោះរញ្ជួយដីកម្រិតធ្ងន់ បានវាយប្រហារកោះ Mindanao ភាគខាងត្បូងប្រទេសហ្វីលីពីន ដោយកម្លាំងដ៏ខ្លាំង បណ្តាលឱ្យប្រទេសជាច្រើន នៅតាមបណ្តោយឆ្នេរមហាសមុទ្រ ប៉ាស៊ីហ្វិក ទាញប្រកាសអាសន្នចំពោះរលកយក្សស៊ូណាមិ ក្នុងនោះមានទាំងជប៉ុន និងឥណ្ឌូណេស៊ីផងដែរ៕

សម្រួល៖ ណឺ មិនា

The post រញ្ជួយដីនៅហ្វីលីពីន សម្លាប់មនុស្សយ៉ាងហោចណាស់៣នាក់ និងបាក់អគារច្រើនខ្នង appeared first on Kampuchea Thmey Daily.

អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ

Minea Neu — Tue, 02 Jun 2026 11:45:00 +0000

មីស៊ីល BrahMos ត្រូវបានប្រជាជាតិអាស៊ីអាគ្នេយ៍វាយតម្លៃខ្ពស់ ព្រោះវាជាមីស៊ីលហោះហើរលឿនបំផុតមួយរបស់ពិភពលោក ដែលធ្វើដំណើរក្នុងល្បឿនជាង ៣ ៧០០គីឡូម៉ែត្រក្នុងមួយម៉ោង(Mach២.៨ ទៅ ៣.០)។

ល្បឿនដ៏មហិមានេះ រួមផ្សំជាមួយនឹងស្វ័យភាពបាញ់រហ័សនិងសមត្ថភាពហោះរំលងសមុទ្រ ធ្វើឱ្យប្រព័ន្ធការពារដែនអាកាសរបស់សត្រូវស្ទើរតែមិនអាចស្ទាក់ចាប់បាន។

មីស៊ីល BrahMos របស់ឥណ្ឌា។ រូបភាព៖ Reuters

កាសែត The Diplomat បានចេញផ្សាយដោយពណ៌នាអំពីគុណសម្បត្តិយុទ្ធសាស្ត្រជាក់លាក់ដែលជំរុញមានកិច្ចសន្យាទិញពីប្រទេសជាសមាជិករបស់សមាគមប្រជាជាតិអាស៊ីអាគ្នេយ៍ ហៅកាត់ «អាស៊ាន» មាន វៀតណាម ហ្វីលីពីននិងឥណ្ឌូណេស៊ី ដែលកំពុងចុះកុងត្រាជាមួយឥណ្ឌា នាំយកមីស៊ីលប្រភេទនេះទុកសម្រាប់វិស័យការពារជាតិរបស់ពួកគេ។

តើ មីស៊ីល BrahMos មានអានុភាពយ៉ាងណាខ្លះ? ខាងក្រោមនេះ ជាការបង្ហាញព័ត៌មានខ្លះៗអំពីអានុភាពនៃអាវុធរបស់របស់ឥណ្ឌា ដែលជាមហាអំណាចនៅអាស៊ីខាងត្បូង និងជាប្រទេសគូប្រជែងរបស់ចិនផងដែរ៖

១. កម្លាំងបំផ្លិចបំផ្លាញដែលមិនអាចប្រៀបផ្ទឹមបាន៖ ដោយសារតែល្បឿនលឿនស្លេវដូចផ្លេកបន្ទោររបស់វា មីស៊ីលនេះមានថាមពលដ៏ធំសម្បើមពេលប៉ះទង្គិច ដែលធ្វើឱ្យវាបំផ្លាញនាវាចម្បាំង ដូចជា រថពាសដែកធន់ធ្ងន់ ឬទីតាំងដីរឹង សូម្បីតែមុនពេលក្បាលគ្រាប់វាផ្ទុះក៏ដោយ។

២. របៀបបាញ់បង្ហោះអាចប្រើប្រាស់បានច្រើនយ៉ាង៖ មីស៊ីល BrahMos អាចត្រូវបានដាក់ពង្រាយនៅទូទាំងតំបន់ដីគោក អាកាស និងកងទ័ពជើងទឹក ដែលអនុញ្ញាតឱ្យប្រទេសហ្វីលីពីន វៀតណាម និងឥណ្ឌូណេស៊ី កែសម្រួលមីស៊ីលនេះជាអាគុយប្រឆាំងកប៉ាល់ចល័តដែលមានមូលដ្ឋាននៅឆ្នេរសមុទ្រ។

៣. វិសាលភាពពង្រីក៖ កម្លាំងមីស៊ីល Brahmos នឹងអនុញ្ញាតឱ្យប្រទេសទាំងបីវាយប្រហារគោលដៅលើដីគោក និងដែនសមុទ្រនៅចម្ងាយរហូតដល់ ២៩០គីឡូម៉ែត្រ អាចដាក់គោលដៅដល់តំបន់ដ៏ធំទូលាយនៃសមុទ្រចិនខាងត្បូងដែលមានជម្លោះឱ្យស្ថិតនៅក្នុងជួរការពារ និងរារាំងរបស់ពួកគេ។

៤. ទម្រង់លាក់ខ្លួន៖ គន្លងហោះហើររបស់វា អាចត្រូវបានលៃតម្រូវជាកម្លាំង រួមទាំងការហោះហើររយៈកម្ពស់ខ្ពស់បន្តដោយដំណាក់កាលចុងក្រោយ ដែលធ្លាក់ទាបដល់កម្ពស់ ៥-១០ម៉ែត្រលើផ្ទៃទឹក ដើម្បីគេចពីការរកឃើញដោយរ៉ាដារបស់សត្រូវ៕

សម្រួល៖ ណឺ មិនា

The post អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ appeared first on Kampuchea Thmey Daily.

ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា

Minea Neu — Wed, 06 May 2026 10:04:58 +0000

ទីភ្នាក់ងារអវកាសហ្វីលីពីន (PhilSA) បានចេញផ្សាយផែនទីមួយ បង្ហាញតំបន់គ្របដណ្តប់ដោយស្រទាប់ផេះពីចរន្តដង់ស៊ីតេ «pyroclastic» ក្នុងភ្នំភ្លើង Mayon កាលពីថ្ងៃសៅរ៍ថា មានផ្ទៃដីយ៉ាងហោចណាស់ ៨ ៥៤៤ហិកតា ឬជាងពាក់កណ្តាលនៃទីក្រុង Quezon ត្រូវបានគ្របដណ្តប់ដោយផេះពីសកម្មភាពរបស់ភ្នំភ្លើង ហៅថា «uson» ។

យោងតាមសារព័ត៌មាន The Star ចុះផ្សាយថ្ងៃទី៦ ខែឧសភា ឆ្នាំ២០២៦ ឱ្យដឹងថា ចរន្តដង់ស៊ីតេ «pyroclastic» គឺជាលំហូរលឿននៃឧស្ម័នភ្នំភ្លើងក្តៅ ផេះ និងបំណែកថ្មធ្លាក់ចុះពីជម្រាលភ្នំភ្លើង អំឡុងពេលផ្ទុះ។

ភ្នំភ្លើងរបស់ហ្វីលីពីនកំពុងផ្ទុះ។ រូបភាព៖ NG

វិទ្យាស្ថានភ្នំភ្លើងនិងរញ្ជួយដីហ្វីលីពីនលើកឡើងថា៖ «ផេះដែលផ្សំឡើងពីភាគល្អិតភ្នំភ្លើងមានអង្កត់ផ្ចិតតិចជាង ២មីលីម៉ែត្រនោះ គឺគ្រោះថ្នាក់ដល់សុខភាព។ វាក៏គ្រោះថ្នាក់ដល់យន្តហោះ និងគ្រឿងចក្រឧស្សាហកម្មផ្សេងទៀតផងដែរ ដូចជាគ្រឿងចក្រសម្រាប់ដឹកជញ្ជូន និងផលិតថាមពលជាដើម»។

ទីភ្នាក់ងារស្ទង់មតិភូមិសាស្ត្រសហរដ្ឋអាមេរិក អះអាងថា៖ « ផេះដែលធ្លាក់អាចរំខានសកម្មភាពនានា ដោយបំផ្លាញអគារ ការដឹកជញ្ជូន ប្រព័ន្ធទឹក ការផ្គត់ផ្គង់ថាមពល ឧបករណ៍ទំនាក់ទំនង កសិកម្ម និងផលិតកម្មបឋមយ៉ាងសំខាន់ សូម្បីតែកម្រាស់ត្រឹមតែពីរបីមីលីម៉ែត្រ ឬត្រឹមអ៊ីញក៏ដោយ»។

យ៉ាងណា រហូតមកដល់ពេលនេះ ផេះដែលធ្លាក់ពីភ្នំភ្លើង Mayon បានប៉ះពាល់ដល់គ្រួសារចំនួន ៣០ ៥២២គ្រួសារ ឬមនុស្ស ១០២ ៤០៦នាក់ នៅក្នុងភូមិចំនួន៨៧ ក្នុងតំបន់ Bicol គិតត្រឹមថ្ងៃចន្ទ ថ្ងៃទី៤ ខែឧសភា ឆ្នាំ២០២៦។ នេះបើយោងតាមការិយាល័យការពារជនស៊ីវិលហ្វីលីពីន។

ប្រែសម្រួល៖ ណឺ មិនា

The post ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា appeared first on Kampuchea Thmey Daily.

សមយុទ្ធទ្រង់ទ្រាយធំ អាមេរិក-ជប៉ុន និងប្រទេសមួយចំនួនទៀតនៅហ្វីលីពីនចាប់ផ្តើមថ្ងៃនេះ

Minea Neu — Mon, 20 Apr 2026 11:24:00 +0000

កងទ័ពសហរដ្ឋអាមេរិក-ហ្វីលីពីនរាប់ពាន់នាក់ រួមទាំងការចូលរួមដោយកងទ័ពសាមូរ៉ៃរបស់ជប៉ុន បានចាប់ផ្តើមលំហាត់សមយុទ្ធយោធាទ្រង់ទ្រាយធំប្រចាំឆ្នាំជាលើកដំបូងនៅថ្ងៃចន្ទនេះ ខណៈជម្លោះនៅមជ្ឈិមបូព៌ាកំពុងបន្ត។

យោងតាមសារព័ត៌មាន AFP និង CNA ផ្សាយថ្ងៃទី២០ ខែមេសា ឆ្នាំ២០២៦ សមយុទ្ធដ៏ធំមួយនេះនឹងមានការបាញ់គ្រាប់ពិត នៅភាគខាងជើងនៃច្រកសមុទ្រតៃវ៉ាន់ក៏ដូចជាខេត្តមួយនៅសមុទ្រចិនខាងត្បូង ជាកន្លែងដែលប្រទេសហ្វីលីពីននិងចិនតែងតែប្រឈមមុខដាក់គ្នាម្តងហើយម្តងទៀត។

អ្នកនាំពាក្យសមយុទ្ធហ្វីលីពីន លោក Dennis Hernandez លើកឡើងថា៖ « យោធាជប៉ុនកំពុងចូលរួមជាមួយបុគ្គលិកចំនួន ១ ៤០០នាក់ ដោយប្រើប្រាស់មីស៊ីលប្រភេទ Type-៨៨ ដើម្បីបាញ់ពន្លិចនាវាគោលដៅមួយគ្រឿង នៅភាគខាងជើងនៃតំបន់ Paoay» ។

នាវាចម្បាំងរបស់ហ្វីលីពីន។ រូបភាព៖ Reuters

មិនតែប៉ុណ្ណោះ មានទាំងទាហាន អាកាសយានិក និងនាវិកជាង ១៧ ០០០នាក់ កំពុងចូលរួមក្នុងសមយុទ្ធ « Balikatan ឬ ស្មាទល់ស្មា» វាមានរយៈពេល ១៩ថ្ងៃ ដែលចំនួននេះប្រហាក់ប្រហែលនឹងសមយុទ្ធកាលពីឆ្នាំមុន រួមទាំងកងទ័ពមកពីប្រទេសអូស្ត្រាលី នូវែលសេឡង់ បារាំង និងកាណាដា ផងដែរ។

អ្នកនាំពាក្យសមយុទ្ធអាមេរិក លោក Robert Bunn ថា៖ «សមយុទ្ធ Balikatan […] តំណាងឱ្យឱកាសមួយ ដើម្បីបង្ហាញពីសម្ព័ន្ធភាពដ៏រឹងមាំរបស់យើងជាមួយប្រទេសហ្វីលីពីននិងបង្ហាញពីការប្តេជ្ញាចិត្តរបស់យើងចំពោះតំបន់ឥណ្ឌូ-ប៉ាស៊ីហ្វិកដ៏សេរីនិងបើកចំហ»។

លោក Bunn បន្ថែមថា៖ «កម្រិតកងទ័ពអាមេរិកដែលដាក់ពង្រាយគឺជាចំនួនធំបំផុតមួយក្នុងរយៈពេលជាច្រើនឆ្នាំមកនេះ ហើយវាក៏មិនរងផលប៉ះពាល់ដោយសារសង្គ្រាមមជ្ឈិមបូព៌ាដែលសហរដ្ឋអាមេរិកកំពុងបន្តនោះដែរ»។ យ៉ាងណា លោកបដិសេធមិនផ្តល់ចំនួនទាហានជាក់លាក់ទេ។

គួរបញ្ជាក់ថា សមយុទ្ធ Balikatan កើតឡើងពេលដែលអ៊ីរ៉ង់ និងសហរដ្ឋអាមេរិក រួមជាមួយអ៊ីស្រាអែលជិតបញ្ចប់បទឈប់បាញ់រយៈពេលពីរសប្តាហ៍របស់ពួកគេ។

ក្នុងរយៈពេលពីរឆ្នាំកន្លងមកនេះ ទីក្រុងម៉ានីលបានចុះហត្ថលេខាលើកងកម្លាំងទស្សនកិច្ច ឬកិច្ចព្រមព្រៀងសមមូលជាមួយប្រទេសជប៉ុន នូវែលសេឡង់ កាណាដា និងបារាំង ជាកិច្ចព្រមព្រៀងដែលមានគោលបំណងសម្រួលដល់ការចូលរួមសមយុទ្ធយោធារួមគ្នាក្នុងប្រទេសហ្វីលីពីន។

លោក Hernandez ថា ប្រព័ន្ធការពារដែនអាកាស និងមីស៊ីក៏នឹងត្រូវធ្វើតេស្តផងដែរ រួមទាំងបច្ចេកវិទ្យាសម្រាប់ទប់ទល់នឹងដ្រូន។

ដោយឡែកប្រទេសជប៉ុនកំពុងដាក់ពង្រាយនាវាចុះចតរថក្រោះ នាវាពិឃាត និងនាវាពិឃាតឧទ្ធម្ភាគចក្រ ខណៈសហរដ្ឋអាមេរិកនឹងប្រើប្រាស់នាវាក្តោង និងនាវាចុះចត។ ប្រទេសទាំងនោះនឹងចូលរួមជាមួយនាវាចម្បាំងហ្វីលីពីនពីរគ្រឿង និងនាវាមួយទៀតមកពីប្រទេសកាណាដា៕

ប្រែសម្រួល៖ ណឺ មិនា

The post សមយុទ្ធទ្រង់ទ្រាយធំ អាមេរិក-ជប៉ុន និងប្រទេសមួយចំនួនទៀតនៅហ្វីលីពីនចាប់ផ្តើមថ្ងៃនេះ appeared first on Kampuchea Thmey Daily.

មិនត្រឹមបញ្ជូនសហការលើវិស័យកងទ័ពទេ ជប៉ុនក៏ជួយផ្តល់ប្រេងដល់ហ្វីលីពីនក្នុងគ្រាវិបត្តិ

Minea Neu — Thu, 02 Apr 2026 13:00:00 +0000

ប្រទេសហ្វីលីពីនកំពុងប្រឈមមុខនឹងវិបត្តិប្រេងឥន្ធនៈធ្ងន់ធ្ងរគិតត្រឹមខែមីនា ឆ្នាំ២០២៦ ដោយមានស្តុកប្រេងមានត្រឹមតែជាង ៤៥ថ្ងៃប៉ុណ្ណោះ។ ប្រទេសនេះមានប្រជាជនជាង១១៥លាននាក់ និងជាប់ជាប្រទេសមានប្រជាជនច្រើនជាងគេទី១២នៅលើពិភពលោក ថែមទាំងប្រកាសអាសន្នលើវិស័យថាមពលបន្ទាប់ពីការផ្គត់ផ្គង់នាំចូលបានធ្លាក់ចុះ ដោយសារសង្រ្គាមនៅមជ្ឈិមបូព៌ា។

យោងតាម CNN និងរ៉យទ័រផ្សាយចុងខែមីនា ឆ្នាំ២០២៦ ប្រទេសហ្វីលីពីននាំចូលប្រេងឆៅ ៩៨% ពីខាងក្រៅ ភាគច្រើនមកពីមជ្ឈិមបូព៌ាតែត្រូវបានរំខានដោយជម្លោះនៅអ៊ីរ៉ង់។

យ៉ាងណាប្រទេសជប៉ុនកំពុងផ្តល់ប្រេងម៉ាស៊ូតដល់ប្រទេសនេះ ក្នុងនាមជាដៃគូដ៏សំខាន់មួយដើម្បីធានាពីស្ថិរភាពខ្សែសង្វាក់ផ្គត់ផ្គង់ក្នុងតំបន់។

នាយករដ្ឋមន្រ្តីជប៉ុន លោកស្រី ណាសាអេ តាកាអ៊ិឈិ។ រូបភាព៖ Reuters

ស្ថានភាពនិងកង្វះខាតប្រេងនៅហ្វីលីពីន

ភាពអាសន្នរបស់ជាតិ៖ ប្រទេសហ្វីលីពីនបានប្រកាសអាសន្នថាមពលជាតិ ដោយសារតែបញ្ហាផ្គត់ផ្គង់ប្រេងឥន្ធនៈធ្ងន់ធ្ងរកើតចេញពីជម្លោះអ៊ីរ៉ង់ រំខានដល់ការដឹកជញ្ជូននៅមជ្ឈិមបូព៌ា។

វិបត្តិផ្គត់ផ្គង់៖ របាយការណ៍មួយបង្ហាញថាការផ្គត់ផ្គង់ប្រេងនៅហ្វីលីពីនមានកំណត់ក្នុងរយៈពេល ៤៥ថ្ងៃ នាំឱ្យមានការនាំចូលប្រេងម៉ាស៊ូតចំនួន ១៤២ ០០០ បារ៉ែលពីប្រទេសជប៉ុននៅចុងខែមីនា ឆ្នាំ ២០២៦។

ការពឹងផ្អែកខ្ពស់៖ ប្រទេសនេះពឹងផ្អែកយ៉ាងខ្លាំងលើការនាំចូល ដោយប្រេងឆៅ ៩៨% មកពីមជ្ឈិមបូព៌ា។

ផលប៉ះពាល់នៃការខ្វះខាតក្នុងតំបន់៖ ទោះបីជាប្រទេសអាស៊ីអាគ្នេយ៍មួយចំនួនរងផលប៉ះពាល់ក៏ដោយ តែហ្វីលីពីនស្ថិតក្នុងចំណោមប្រទេសរងផលប៉ះពាល់ខ្លាំងបំផុត ដែលនាំឱ្យកូដករដឹកជញ្ជូនតវ៉ាប្រឆាំងនឹងតម្លៃហក់ឡើងខ្ពស់។

+ ហេតុអ្វីបានជាប្រទេសជប៉ុនផ្គត់ផ្គង់ប្រេងក្នុងប្រទេសហ្វីលីពីន? មានហេតុផល៤ យ៉ាងដែលទីក្រុងតូក្យូបញ្ចេញស្តុងប្រេងរបស់ខ្លួន ជួយហ្វីលីពីន!

ទី១. សាមគ្គីភាពខ្សែសង្វាក់ផ្គត់ផ្គង់៖ ប្រទេសជប៉ុនមានគោលបំណងរក្សាសន្តិសុខថាមពលសម្រាប់ប្រទេសអាស៊ាន ជាកន្លែងដែលជប៉ុនបង្កើតខ្សែសង្វាក់ផ្គត់ផ្គង់។

ទី២. ការចេញស្តុកប្រេងជាយុទ្ធសាស្ត្រ៖ ប្រទេសជប៉ុនមានទុនបម្រុងយ៉ាងច្រើនដែលគ្របដណ្តប់លើការប្រើប្រាស់ជាង ៨ខែ ដែលកំពុងទាញយកទុនបម្រុងទាំងនេះ ដើម្បីរក្សាស្ថិរភាពការផ្គត់ផ្គង់ក្នុងតំបន់។

ទី៣. ពង្រឹងចំណងមិត្តភាព៖ ជប៉ុនកំពុងជួយប្រទេសដូចជាហ្វីលីពីន និងវៀតណាម ដើម្បីទប់ទល់នឹងអស្ថិរភាពក្នុងតំបន់ដែលកំពុងកើនឡើង និងធានាការផ្គត់ផ្គង់ថាមពល អំឡុងសង្គ្រាមនៅអ៊ីរ៉ង់។

ទី៤. ការគាំទ្រយ៉ាងសកម្ម៖ ក្រៅពីប្រេងម៉ាស៊ូតជាង ១៤០ ០០០ បារ៉ែលដឹកជញ្ជូនទៅហ្វីលីពីន ប្រទេសជប៉ុនក៏គាំទ្រវិធានការសន្សំសំចៃថាមពលផងដែរ៕

ប្រែសម្រួល៖ ណឺ មិនា

The post មិនត្រឹមបញ្ជូនសហការលើវិស័យកងទ័ពទេ ជប៉ុនក៏ជួយផ្តល់ប្រេងដល់ហ្វីលីពីនក្នុងគ្រាវិបត្តិ appeared first on Kampuchea Thmey Daily.

កងទ័ពជប៉ុនវិលទៅធ្វើសមយុទ្ធយោធាទ្រង់ទ្រាយធំនៅហ្វីលីពីន ក្រោយសង្គ្រាមលោកទី២

Minea Neu — Mon, 30 Mar 2026 06:06:21 +0000

ជាលើកដំបូងចាប់តាំងពីការបញ្ចប់នៃសង្គ្រាមលោកលើកទី២ កងទ័ពសាមូរ៉ៃរបស់ជប៉ុនដែលមានសមត្ថភាពប្រយុទ្ធនឹងវិលត្រឡប់ទៅប្រទេសហ្វីលីពីនវិញ វាមិនមែនជាអ្នកកាន់កាប់ទឹកដីនោះទេ ប៉ុន្តែជាដៃគូជិតស្និទ្ធ ជាមួយកងទ័ពនៃប្រទេសសម្ព័ន្ធមិត្ត។

យោងតាម The Japan Daily ផ្សាយថ្ងៃទី២៩ខែមីនា កងទ័ពកងកម្លាំងស័្វយការពារ (SDF) រាប់រយនាក់នឹងចូលរួមប្រតិបត្តិការ រួមមានការចួលរួមពីភាគីពីកងកម្លាំង ហ្វីលីពីន សហរដ្ឋអាមេរិក និងអូស្ត្រាលី ដែលត្រូវបានកំណត់ថា ជាការធ្វើសមយុទ្ធយោធាប្រចាំឆ្នាំដ៏ធំបំផុត ឈ្មោះថា «Balikatan» មិនធ្លាប់មានពីមុនមក និងជាព្រឹត្តិការណ៍សំខាន់ថ្មីមួយនៅក្នុងកិច្ចសហប្រតិបត្តិការសន្តិសុខក្នុងតំបន់។

កងទ័ពអាមេរិកចូលរួមធ្វើសមយុទ្ធជាមួយជប៉ុនកាលពីឆ្នាំមុន។ រូបភាព៖ US Army

យ៉ាងណា អ្នកសារព័ត៌មានមិនអាចបញ្ជាក់បានទេថា ជប៉ុននឹងបញ្ជូនកងទ័ពចំនួនប៉ុន្មាននាក់ ដើម្បីចូលរួមសមយុទ្ធនេះនោះទេ ប៉ុន្តែឧត្តមសេនីយ៍ លោក Romeo Brawner Jr. អគ្គមេបញ្ជាការកងកម្លាំងប្រដាប់អាវុធហ្វីលីពីន លើកឡើងកាលពីដើមខែថា កងទ័ពជាង ១ ០០០នាក់អាចត្រូវដាក់ពង្រាយ។

ចំណែកក្រសួងការពារជាតិទីក្រុងតូក្យូបដិសេធមិនធ្វើអត្ថាធិប្បាយលើចំនួនកងទ័ពខ្លួននោះទេ។

ខណៈប្រទេសជប៉ុនបានបញ្ជូនអ្នកសង្កេតការណ៍ទៅកាន់កន្លែងធ្វើសមយុទ្ធ Balikatan ចាប់តាំងពីឆ្នាំ ២០១២ និងបានចូលរួមកាលពីឆ្នាំមុន តែសម្ភារៈមានកំណត់ រួមទាំងនាវាចម្បាំងតែមួយគ្រឿង និងកងនាវាតូចៗប៉ុណ្ណោះ ប៉ុន្តែតួនាទីរបស់ខ្លួននៅក្នុងសមយុទ្ធឆ្នាំ ២០២៦ នេះ តំណាងឱ្យការផ្លាស់ប្តូរដ៏សំខាន់បំផុត។

គួរបញ្ជាក់ថាការដាក់ពង្រាយនេះនឹងបញ្ចប់ការផ្លាស់ប្តូររបស់កងទ័ពកងកម្លាំងការពារខ្លួនពីអ្នកសង្កេតការណ៍ទៅជាអ្នកចូលរួមពេញលេញនៅក្នុងសមយុទ្ធវិញ។

សមយុទ្ធពហុជាតិសាសន៍ត្រូវបានគ្រោងនឹងចាប់ផ្តើមនៅថ្ងៃទី២០ ខែមេសា និងបញ្ចប់នៅខែឧសភា ដោយមានសកម្មភាពមួយចំនួនដែលគ្រោងនឹងធ្វើឡើងនៅទូទាំងប្រជុំកោះហ្វីលីពីន។

លោក Brawner លើកឡើងកាលពីសប្តាហ៍មុន ដោយបញ្ជាក់ពីសារៈសំខាន់នៃចលនានេះថា៖ « បន្ទាប់ពីឆ្នាំ១៩៤៥ នេះជាលើកដំបូង យើងនឹងមានកងទ័ពប្រយុទ្ធរបស់ជប៉ុនម្តងទៀតនៅលើដីហ្វីលីពីន។ វាជារឿងសំខាន់ណាស់ ព្រោះពីមុនយើងរកឃើញថាភាគីម្នាក់ៗនៅក្នុងផ្នែកផ្សេងគ្នានៃសង្គ្រាម ប៉ុន្តែលើកនេះយើងឃើញភាគីម្នាក់ៗនៅកន្លែងតែមួយ»។

លោក Brawner បន្ថែមថា៖ « សមយុទ្ធ Balikatan ឆ្នាំនេះនឹងធ្វើឡើងជាភាសាតាហ្គាឡុក( Tagalog) ហើយសកម្មភាពស្មាទល់នឹងស្មា វានឹងក្លាយជាសមយុទ្ធដ៏ធំបំផុត ដែលកំណត់ពីវិសាលភាព និងអាំងតង់ស៊ីតេ ដែលពាក់ព័ន្ធនឹងកងទ័ពកាន់តែច្រើន និងសកម្មភាពជាច្រើនប្រភេទទៀត»៕

ប្រែសម្រួល៖ ណឺ មិនា

The post កងទ័ពជប៉ុនវិលទៅធ្វើសមយុទ្ធយោធាទ្រង់ទ្រាយធំនៅហ្វីលីពីន ក្រោយសង្គ្រាមលោកទី២ appeared first on Kampuchea Thmey Daily.

សហគមន៍អន្តរជាតិបញ្ជាក់ជាថ្មីពីការគាំទ្រចំពោះដំណោះស្រាយដោយសន្តិវិធីលើបញ្ហាព្រំដែនកម្ពុជា-ថៃ

Thoeun Vansong — Tue, 24 Feb 2026 06:41:54 +0000

មន្ត្រីការទូតរបស់ហ្វីលីពីន ចក្រភពអង់គ្លេស និងជប៉ុន បានបញ្ជាក់ជាថ្មីនូវការគាំទ្រលើដំណោះស្រាយដោយសន្តិវិធីចំពោះបញ្ហាជម្លោះព្រំដែនរវាងកម្ពុជា និងថៃ។ តាមមន្ត្រីការទូតទាំងនោះ រដ្ឋាភិបាលរបស់ពួកគេនឹងចូលរួមជួយពង្រឹងបទឈប់បាញ់ដែលកំពុងមានភាពផុយស្រួយ ដោយជំរុញឲ្យមានការអនុវត្តដ៏ពេញលេញ។

ឯកអគ្គរដ្ឋទូតហ្វីលីពីនប្រចាំកម្ពុជា លោកស្រី Flerida Ann Camille P. Mayo បានបញ្ជាក់ជាថ្មីពីការប្តេជ្ញាចិត្តរបស់ទីក្រុងម៉ានីល ក្នុងនាមជាប្រធានអាស៊ាន នឹងបន្តគាំទ្រការឃ្លាំងមើលនូវបទឈប់បាញ់ និងលើកកម្ពស់ការដោះស្រាយបញ្ហាព្រំដែនដោយសន្តិវិធី តាមរយៈកិច្ចសន្ទនា។

លោកស្រីឯកអគ្គរដ្ឋទូត និយាយថា ប្រទេសហ្វីលីពីន ក្នុងនាមជាប្រធានអាស៊ាន ឆ្នាំ២០២៦នេះ បានប្តេជ្ញាថា នឹងពង្រឹងក្រុមអ្នកសង្កេតការណ៍អាស៊ាន (AOT) ដើម្បីជួយដល់ការអនុវត្តបទឈប់បាញ់ដ៏ផុយស្រួយរវាងកម្ពុជា និងថៃ។
ការបញ្ជាក់ដូច្នេះ ធ្វើឡើងក្នុងពេលលោកស្រីឯកអគ្គរដ្ឋទូតហ្វីលីពីន រួមជាមួយបណ្ដាអង្គទូតបរទេស និងតំណាងទីភ្នាក់ងារអង្គការអន្តរជាតិប្រចាំកម្ពុជា បានចុះពិនិត្យនៅភូមិជោគជ័យ ភូមិព្រៃចាន់ និងតំបន់បឹងត្រកួន ក្នុងខេត្តបន្ទាយមានជ័យ ដែលទីតាំងទាំងនោះយោធាថៃបានឈ្លានពានកាន់កាប់ដោយខុសច្បា់ ហើយកំពុងបន្តដាក់ពង្រាយទូកុងតឺន័រ និងបន្លាលួស។

លោកស្រី ថា៖«ក្នុងនាមជាគ្រួសារអាស៊ានតែមួយ យើង សង្ឃឹមថានឹងមានដំណោះស្រាយដោយសន្តិវិធីចំពោះបញ្ហាព្រំដែនកម្ពុជា-ថៃ»។

ថ្លែងប្រាប់សារព័ត៌មាន ក្នុងដំណើរចុះពិនិត្យទីតាំងជាក់ស្តែងទាក់ទងនឹងស្ថានការណ៍ព្រំដែនជាមួយគ្នានោះ ទីប្រឹក្សាអមស្ថានទូតជប៉ុន លោក Matsuda Junsaku បានបញ្ជាក់ពីកិច្ចខិតខំប្រឹងប្រែងគ្រប់បែបយ៉ាងរបស់រដ្ឋាភិបាលជប៉ុន ដើម្បីជំរុញការអនុវត្តយ៉ាងប្រាកដប្រជានៃកិច្ចព្រមព្រៀងបទឈប់បាញ់ ដោយសហការជាមួយបណ្តាប្រទេសពាក់ព័ន្ធ។
លោក Matsuda Junsaku និយាយថា ជប៉ុននឹងបន្តជំនួយមនុស្សធម៌ និងធ្វើការជាមួយដៃគូអាស៊ាន ដើម្បីគាំទ្រយន្តការឈប់បាញ់ និងកិច្ចខិតខំប្រឹងប្រែងកាត់បន្ថយភាពតានតឹង។

រីឯលោក Dominic Williams ឯកអគ្គរាជទូតអង់គ្លេសប្រចាំកម្ពុជា បន្ទាប់ពីបានចុះមើលជាក់ស្ដែងទីតាំងនៅភូមិព្រៃចាន់ ភូមិជោគជ័យ និងតំបន់ត្រកួន ក៏ដូចជាឃើញពលភៀសសឹកកំពុងស្នាក់នៅមណ្ឌលស្នាក់នៅបណ្ដោះអាសន្ន លោកបានសម្តែងការអាណិតអាសូរដល់ពលរដ្ឋកម្ពុជាដែលរងផលប៉ះពាល់ដោយសារសង្រ្គាមឈ្លានពានរបស់ថៃមកលើកម្ពុជា។

លោកឯកអគ្គរាជទូត បានបញ្ជាក់ពីការបន្តអំពាវនាវរបស់ចក្រភពអង់គ្លេសឱ្យមានដំណោះស្រាយដោយសន្តិវិធីនៅតាមព្រំដែន ដែលលោកចាត់ទុកថា នេះជាមធ្យោបាយប្រកបដោយនិរន្តរភាពតែមួយគត់សម្រាប់សហគមន៍នៅក្នុងប្រទេសទាំងពីរ ដើម្បីកសាងផ្ទះសម្បែង និងជីវភាពរស់នៅរបស់ពួកគាត់ឡើងវិញ។ លោក Dominic Williams សរសេរដូច្នេះលើទំព័រហ្វេសប៊ុករបស់លោក។

គួរជម្រាបថា កាលពីរសៀលថ្ងៃទី២៣ ខែកុម្ភៈ ឆ្នាំ២០២៦ ក្រសួងការបរទេសកម្ពុជា បានដឹកនាំបណ្តាអង្គទូតបរទេស និងអង្គការអន្តរជាតិប្រចាំកម្ពុជា ចុះទៅទីតាំងចំនួន៣ ដែលយោធាថៃបានរាយបន្លាលួស និងដាក់ទូកុងតឺន័រព័ទ្ធយកដោយខុសច្បាប់នៅភូមិជោគជ័យ ភូមិព្រៃចាន់ និងតំបន់បឹងត្រកួន ក្នុងខេត្តបន្ទាយមានជ័យ។

ក្នុងដំណើរចុះពិនិត្យនេះ លោកស្រី អ៊ាត សោភា រដ្ឋមន្ត្រីស្ដីទីក្រសួងការបរទេស បានគូសបញ្ជាក់ថា រាជរដ្ឋាភិបាលកម្ពុជានៅតែប្តេជ្ញាចិត្តយ៉ាងមុតមាំក្នុងការដោះស្រាយបញ្ហាព្រំដែនទាំងអស់តាមសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគីដែលពាក់ព័ន្ធ ព្រមទាំងប្រកាន់ខ្ជាប់យ៉ាងម៉ឺងម៉ាត់នូវសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី ២៧ ខែធ្នូ ឆ្នាំ២០២៥៕

អត្ថបទដោយ ធឿន វ៉ាន់សុង

The post សហគមន៍អន្តរជាតិបញ្ជាក់ជាថ្មីពីការគាំទ្រចំពោះដំណោះស្រាយដោយសន្តិវិធីលើបញ្ហាព្រំដែនកម្ពុជា-ថៃ appeared first on Kampuchea Thmey Daily.

ហ្វីលីពីន​ Archives - Kampuchea Thmey Daily

អនីតិជន​​ជា​ឃាតករ​ ​បើក​ការ​បាញ់​ប្រហារ​ក្នុង​សាលារៀន​នៅ​ហ្វី​លីពីន​ សម្លាប់​សិស្ស​៣ និង​របួស​៥នាក់​

រញ្ជួយ​ដី​នៅ​ហ្វី​លីពីន​ សម្លាប់​មនុស្ស​យ៉ាង​ហោច​ណាស់​៣នាក់ និង​បាក់​អគារ​ច្រើន​ខ្នង​

​អានុភាព​មីស៊ីល BrahMos របស់​ឥណ្ឌា ទាក់​ចិត្ត​វៀត​ណាម ហ្វីលីពីន​ និង​ឥណ្ឌូណេស៊ី​​ ​ចុះកុងត្រាទិញ​

ផេះ​​​ផ្ទុះ​ចេញ​ពី​ភ្នំភ្លើង​ Mayon នៅ​ហ្វីលីពីន​ គ្រប់​ដណ្តប់​លើ​ផ្ទៃ​ដីជាង ៨ ៥០០ហិកតា

សមយុទ្ធ​ទ្រង់​ទ្រាយ​ធំ ​អាមេរិក-ជប៉ុន​ និង​ប្រទេស​មួយ​ចំនួន​ទៀត​នៅ​ហ្វីលីពីន​ចាប់​ផ្តើម​ថ្ងៃ​នេះ​

មិនត្រឹមបញ្ជូន​សហការលើវិស័យកងទ័ពទេ ជប៉ុន​​ក៏ជួយ​ផ្តល់​ប្រេង​ដល់​ហ្វីលីពីន​ក្នុងគ្រាវិបត្តិ​

កងទ័ព​ជប៉ុនវិល​​​ទៅ​​ធ្វើសមយុទ្ធ​​យោធា​ទ្រង់​ទ្រាយ​ធំ​​​នៅហ្វីលីពីន ក្រោយ​សង្គ្រាមលោក​ទី​២​

សហគមន៍អន្តរជាតិបញ្ជាក់ជាថ្មីពីការគាំទ្រចំពោះដំណោះស្រាយដោយសន្តិវិធីលើបញ្ហាព្រំដែនកម្ពុជា-ថៃ

ហ្វីលីពីន Archives - Kampuchea Thmey Daily

អនីតិជនជាឃាតករ បើកការបាញ់ប្រហារក្នុងសាលារៀននៅហ្វីលីពីន សម្លាប់សិស្ស៣ និងរបួស៥នាក់

រញ្ជួយដីនៅហ្វីលីពីន សម្លាប់មនុស្សយ៉ាងហោចណាស់៣នាក់ និងបាក់អគារច្រើនខ្នង

អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ

ផេះផ្ទុះចេញពីភ្នំភ្លើង Mayon នៅហ្វីលីពីន គ្រប់ដណ្តប់លើផ្ទៃដីជាង ៨ ៥០០ហិកតា

សមយុទ្ធទ្រង់ទ្រាយធំ អាមេរិក-ជប៉ុន និងប្រទេសមួយចំនួនទៀតនៅហ្វីលីពីនចាប់ផ្តើមថ្ងៃនេះ

មិនត្រឹមបញ្ជូនសហការលើវិស័យកងទ័ពទេ ជប៉ុនក៏ជួយផ្តល់ប្រេងដល់ហ្វីលីពីនក្នុងគ្រាវិបត្តិ

កងទ័ពជប៉ុនវិលទៅធ្វើសមយុទ្ធយោធាទ្រង់ទ្រាយធំនៅហ្វីលីពីន ក្រោយសង្គ្រាមលោកទី២