ក្នុង​កិច្ចប្រជុំ​ពិភាក្សា និង​ពិនិត្យ​លើ​ស្ថានភាព​ប្រព័ន្ធ​ធារាសាស្ត្រ ប្រព័ន្ធ​លូ និង​ប្រឡាយ​សាធារណៈ ដើម្បី​រំដោះ​ទឹក និង​បញ្ចៀស​បញ្ហា​ជំនន់​ទឹកភ្លៀង​នៅ​ក្នុង​ភូមិសាស្ត្រ​ប៉ែក​ខាងកើត​ក្រុង​សៀមរាប និង​ភូមិសាស្ត្រ​ស្រុក​ប្រាសាទបាគង នៅ​ចុង​សប្ដាហ៍ ខែ​កញ្ញា ឆ្នាំ ២០២៥ នេះ លោក អ៊ឹង គឹមលាង អភិបាល​រង​ខេត្ត បាន​ជំរុញ​ឲ្យ​ប្រជាពលរដ្ឋ​រង​ផល​ប៉ះពាល់ ចូលរួម​ដាក់​លូ​ថ្មី ឬ​ពង្រីក​លូ​ដែល​មាន​ស្រាប់​នៅ​តាម​មុខ​ផ្ទះ។ ការ​ធ្វើ​ដូច្នេះ គឺជា​ការ​បន្ថែម​ប្រព័ន្ធ​បង្ហូរ​ទឹកភ្លៀង ឬ​ទឹក​ដក់​ឲ្យ​ហូរ​ចូល​ទៅ​ក្នុង​ប្រព័ន្ធ​លូ​ធំ ដើម្បី​បង្កើន​ល្បឿន និង​សមត្ថភាព​រំដោះ​ទឹក កុំ​ឲ្យ​ជន់​លិច​ទីធ្លា​សាធារណៈ ឬ​ចូល​ក្នុង​ផ្ទះ។ តាមរយៈ​ការ​ដាក់​លូ​នេះ អាច​ការពារ​ផ្ទះសម្បែង ទ្រព្យសម្បត្តិ និង​ហេដ្ឋារចនាសម្ព័ន្ធ​ផ្លូវ មិន​ឲ្យ​ខូចខាត​ដោយសារ​ទឹក​ជំនន់។

លោក អ៊ឹង គឹមលាង សង្កត់​ធ្ងន់​ថា ការ​ដោះស្រាយ​បញ្ហា​ទឹកជំនន់ មិនមែន​ជា​បន្ទុក​របស់​រដ្ឋាភិបាល ឬ​អាជ្ញាធរ​មូលដ្ឋាន​តែឯង​នោះ​ទេ តែ​គឺជា​ការងារ​រួម ដែល​តម្រូវ​ឲ្យ​ប្រជាពលរដ្ឋ​ចូលរួម​ទាំង​កម្លាំង​ពលកម្ម ឬ ថវិកា និង​ជួយ​សម្របសម្រួល​ទីតាំង។ នៅ​ពេល​ប្រជាពលរដ្ឋ​ចូលរួម​សហការ​ដាក់​លូ​នៅ​មុខ​ផ្ទះ​ខ្លួនឯង ពួកគាត់​នឹង​មាន​ស្មារតី​ថែរក្សា និង​ការពារ​ប្រព័ន្ធ​លូ​នោះ​មិន​ឲ្យ​កកស្ទះ​ដោយ​សំរាម ឬ​សម្ភារៈ​ផ្សេងៗ នាំ​ឲ្យ​ទឹក​លិច​ឡើងវិញ។ បន្ថែម​នេះ លោក​បាន​ជំរុញ​ដល់​មន្ទីរ​អង្គភាព​ជំនាញ និង​អាជ្ញាធរ​ក្រុង-ស្រុក ត្រូវ​ពង្រឹង​កិច្ចសហការ​រវាង​អាជ្ញាធរ​ពាក់ព័ន្ធ ដើម្បី​ធានា​ប្រសិទ្ធភាព​ការងារ។

លោក​អភិបាល​រង​ខេត្ត ក៏បាន​ស្នើ​ដល់​អាជ្ញាធរ​ពាក់ព័ន្ធ ត្រូវ​វាយតម្លៃ​ឡើងវិញ​នូវ​ស្ថានភាព​លូ បំពង់​បង្ហូរទឹក ប្រឡាយ​ទឹក និង​ស្ថានីយ​បូម​ទឹក​ដែល​មាន​ស្រាប់ ថា​តើ​មាន​បញ្ហា​ស្ទះ ខូចខាត ឬ​តម្រូវការ​ជួសជុល និង​ពង្រីក​កម្រិត​ណា កំណត់​តំបន់​ងាយ​រងគ្រោះ​ដោយ​ជំនន់​ទឹកភ្លៀង​ខ្លាំង​ជាង​គេ?។ ត្រូវ​ដាក់​ចេញ​នូវ​វិធានការ​អាទិភាព ដូចជា ការ​ជីក​ស្តារ​ប្រឡាយ និង​ការ​បំពាក់​លូ​ធំៗ ដើម្បី​កាត់បន្ថយ​ផល​ប៉ះពាល់ នៃ​ជំនន់​ទឹកភ្លៀង​មក​លើ​ជីវភាព​រស់នៅ​របស់​ប្រជាពលរដ្ឋ ហេដ្ឋារចនាសម្ព័ន្ធ និង​សេដ្ឋកិច្ច​ក្នុង​មូលដ្ឋាន៕

អត្ថបទ ៖ គឿន វេត

The post អាជ្ញាធរខេត្តសៀមរាប ជំរុញអាជ្ញាធរមូលដ្ឋាន និងពលរដ្ឋ ចូលរួមត្រួតពិនិត្យ ស្តារប្រព័ន្ធធារាសាស្ត្រ បញ្ចៀសជំនន់ទឹកភ្លៀង appeared first on Kampuchea Thmey Daily.

លោក អ៊ុយ គុម្ភៈ ជាជាង​ជួសជុល និង​លក់​ទូរស័ព្ទ​ដៃ ក្បែរ​ផ្លូវ​ខាង​លើ បាន​លើក​ឡើង​ថា កន្លងមក មុខ​តូប​របស់​គាត់​មិន​ដែល​មាន​ទឹក​ដក់​នោះ​ទេ​បើ​ទោះបី​ជា​ភ្លៀង ត្រឹមតែ​រយៈពេល ១ ម៉ោង​ក្រោយ ក៏​ហូរ​ទៅ​អស់​ដែរ តែ​ពេលនេះ មេឃ​មិន​ភ្លៀង​ផង បែរជា​មាន​ទឹក​ស្អុយ​ដក់​ជាប់​មុខ​តូប ធ្វើ​ឲ្យ​លក់ដូរ​មិន​ដាច់ ភ្ញៀវ​ឈប់ ឬ​ដើរ​ចូល​មិន​កើត។ លោក ទទូច​ស្នើ​អាជ្ញាធរ មេត្តា​ជួយ​សម្រួល​ដល់​បញ្ហា​នេះ​ផង។

លោក​បាន​បន្ត​ថា ចំពោះ​បញ្ហា​ខាង​លើ​នេះ លោក​ក៏បាន​សួរ​ទៅ លោក ប៉ាង លីដា អភិបាល​រង​ខណ្ឌ​ពោធិ៍សែនជ័យ​តាមរយៈ​ប្រព័ន្ធ​តេ​លេ​ក្រាម​ដែរ តែ​មិន​មាន​ការ​ឆ្លើយតប​នោះ​ទេ។

ដោយឡែក លោក យ៉ាន់ ភារៈ ជា​ពលរដ្ឋ​រស់នៅ​តំបន់​ខាងលើ ក៏បាន​លើក​ឡើង​ដែរ​ថា រយៈពេល ៥ ថ្ងៃ មក​ហើយ ​ដែល​មេឃ​ភ្លៀង ហើយ ៥ ថ្ងៃក្រោយ​មកនេះ ទឹក​ស្អុយ​នៅតែ​បន្ត​ហូរ​ចេញពី​ប្រព័ន្ធ​លូ​ជះ​ក្លិនស្អុយ​ពិបាក​ក្នុង​ការ​រស់នៅ។

លោក​ថា ពលរដ្ឋ​គាំទ្រ​អាជ្ញាធរ​ក្នុង​ការ​ចុះ​ឈូស​ឆាយ​កាយ​កាត់​សំយាប​ដើម្បី​ពង្រីក​ផ្លូវ​ឲ្យ​ធំ​ទូលាយ តែ​ក៏​សំណូមពរ​អាជ្ញាធរ​ជួយ​សម្រួល​ដល់​ប្រព័ន្ធ​លូ​ផង៕

អត្ថបទ ៖ សុខា

The post ពលរដ្ឋស្នើអាជ្ញាធរជួយសម្រួលប្រព័ន្ធលូនៅសង្កាត់ចោមចៅទី ១ ត្បិតមេឃមិនភ្លៀងក៏មានទឹកស្អុយហៀរចេញ appeared first on Kampuchea Thmey Daily.

ការណែនាំនេះ ធ្វើឡើងក្នុងឱកាសដឹកនាំកិច្ចប្រជុំប្រចាំខែរបស់រដ្ឋបាលខេត្តបាត់ដំបង នៅសាលប្រជុំសាលាខេត្តបាត់ដំបង នាព្រឹកថ្ងៃទី២៤ ខែមិថុនា នេះ ដែលមានការអញ្ជើញចូលរួមដោយ លោកអភិបាលរងខេត្ត លោកនាយករដ្ឋបាលសាលាខេត្ត កងកម្លាំងទាំង ៣ប្រភេទ លោក លោកស្រី ប្រធានមន្ទីរ អង្គភាពជុំវិញខេត្ត លោកអភិបាលក្រុង-ស្រុក និងអ្នកពាក់ព័ន្ធផ្សេងទៀត។

ថ្លែងនាឱកាសនោះដែរ លោកអភិបាលខេត្តថា ការរៀបចំព្រឹត្តការណ៍ផ្លែឈើបាត់ដំបង ២០២៥ នៅថ្ងៃទី២៧ ខែមិថុនា ដល់ថ្ងៃទី០៣ ខែកក្កដា ឆ្នាំ២០២៥ ខាងមុខនេះ ជាឱកាសដ៏សាកសមក្នុងលើកកម្ពស់ផលិតផល ផ្លែឈើក្នុងខេត្ត និងគាំទ្រការបង្ករបង្កើនផលដំណាំរបស់កសិករ ក្នុងពេលកំពុងមានបញ្ហាព្រំដែន។

លោកបន្តថា «ក្នុងឱកាសរៀបចំព្រឹត្តការណ៍ផ្លែឈើបាត់ដំបង ២០២៥នេះ បងប្អូនប្រជាពលរដ្ឋ ភ្ញៀវទេសចរជាតិ អន្តរជាតិ អាចចូលរួមដើម្បីបង្ហាញពីការគាំទ្រផលិតផលក្នុងស្រុក ជួយផ្សព្វផ្សាយពីផលិតផលដែលផលិតបាន ឱ្យកាន់តែទូលំទូលាយបន្ថែមទៀត»។

ជាមួយគ្នានេះ លោកបានបន្តណែនាំដល់ក្រុមការងារបន្តដាំកូនឈើ ក្នុងយុទ្ធនាការ«ផ្ទះ១ខ្នង ដើមឈើ១ដើម» បន្តទៀត ដើម្បីលើកសោភ័ណភាពទីក្រុង ទីប្រជុំជន ក្នុងខេត្តបាត់ដំបង៕

The post លោក សុខ លូ ណែនាំដល់អាជ្ញាធរមូលដ្ឋាន បន្តតាមដានសភាពការណ៍ និងដោះស្រាយបញ្ហាប្រឈមជូនពលរដ្ឋ appeared first on Kampuchea Thmey Daily.

ប្រជាពលរដ្ឋរស់នៅតាមដងផ្លូវ បានសម្ដែងសេចក្ដីត្រេកអរ ដោយឃើញអាជ្ញាអភិវឌ្ឍហេដ្ឋារចនាសម្ព័ន្ធ ជាពិសេសពង្រីកផ្លូវដែលមានសភាពតូចចង្អៀតបូកជាគោលដៅបែបធំទូលាយ ដើម្បីរជាពលរដ្ឋងាយស្រួលធ្វើចរាចរណ៍នៅពេលបច្ចុប្បន្ន។

អ្នកស្រី ឈិន ផា អាយុ ៦០ឆ្នាំ ជាអាជីវករលក់ដូរនៅកែងផ្សារ ស្ថិតនៅភូមិប៊ូស្រា ឃុំប៊ូស្រា ស្រុកពេជ្រាដាខេត្តមណ្ឌលគិរី បានឱ្យដឹងថា ក្រោយការជូនដំណឹងរបស់អាជ្ញាធរថា មានការពង្រីកផ្លូវដើម្បីបង្កការងាយស្រួលដល់ប្រជាពលរដ្ឋក្នុងការធ្វើដំណើរ គាត់រីករាយក្នុងការសហការជាមួយអាជ្ញាធរ ហើយក៏ចង់ឃើញផ្លូវមានភាពធំទូលាយដោយកន្លងទៅ ផ្លូវធ្វើដំណើរនៅចំណុចនេះ មានការតូចចង្អៀតងាយបង្កហានិភ័យក៏ដូចជាគ្រោះថ្នាក់ចរាចរណ៍ជាយថាហេតុផងដែរ។

ក្នុងនាមជាប្រជាពលរដ្ឋមួយរូប រស់នៅក្នុងស្រុកពេជ្រាដា អ្នកស្រី បានថ្លែងអំណរគុណដល់អាជ្ញាធរស្រុក ដែលបានយកចិត្តទុកដាក់ទៅដល់ប្រជាពលរដ្ឋ ក្នុងការស្ថាបនាអភិវឌ្ឍហេដ្ឋារចនាសម្ព័ន្ធ នៅក្នុងស្រុកពេជ្រាដា ធ្វើយ៉ាងណាដើម្បីឱ្យប្រជាពលរដ្ឋងាយស្រួលក្នុងការធ្វើដំណើរជាងមុនបន្ថែមទៀត។

ចំណែក លោក យឹម សុផាត អាយុ ៦២ឆ្នាំ ជាអាជីវករលក់បាយម្ហូបនៅក្បែដងផ្លូវដែលអាជ្ញាធរបានពង្រីកនៅចំណុចទីតាំងខាងលើនេះ ហើយបានប៉ះលំនៅឋានរបស់គាត់ ក៏បានសហការជាមួយអាជ្ញាធរដោយក្ដីរីករាយ ដោយយល់ឃើញថាកំណាត់ផ្លូវពីមុនផ្លូវមានសភាពតូចចង្អៀត លំបាកក្នុងការធ្វើដំណើរ ជាពិសេសផ្លូវមានសភាពហុយ ដែលធ្វើឱ្យប៉ះពាល់ដល់អតិថិជនដែលបានមកបរិភោគ នៅហាងរបស់គាត់។

លោកបានបញ្ជាក់ថា ក្នុងនាមអាជីវករ ដែលមានមុខរបរលក់នៅក្បែរដងផ្លូវនេះ សូមកោតសរសើរ និងថ្លែងអំណរគុណដល់អាជ្ញាធរ រដ្ឋបាលស្រុកពេជ្រាដា ដែលបានខ្នះខ្នែងក្នុងការអភិវឌ្ឍហេដ្ឋារចនាសម្ព័ន្ធ ជាពិសេសជួយសម្រួល ចរាចរណ៍ជូនប្រជាពលរដ្ឋដែលធ្វើដំណើរនៅក្នុងមូលដ្ឋាននេះផងដែរ៕

អត្ថបទ៖រៀម សុខហេង

The post អាជ្ញាធរស្រុកពេជ្រាដា គ្រោងធ្វើរង្វង់មូលចំណុចផ្លូវបំបែក និងកំពុងពង្រីកផ្លូវសាធារណៈ ដើម្បីពលរដ្ឋងាយស្រួលធ្វើដំណើរ appeared first on Kampuchea Thmey Daily.

លោក​ ប៊ុន​ ស៊ុន្ធី​ ប្រជាលរដ្ឋដែលរស់នៅទីនោះ បានលេីក​ឡេីង​ថា​ ការជួសជុលកាយដាក់ប្រព័ន្ធលូ​ ដេីម្បីបញ្ជៀសទឹកជំនន់នារដូវវស្សា​ ប្រជាពលរដ្ឋទាំងអស់​សាទរ​ និងរីករាយជាខ្លាំង​ ពីព្រោះតំបន់នោះឱ្យតែភ្លៀងមកម្តងៗតែងតែជន់លិចទឹកត្រឹមក្បាលជង្គន់ពិបាកក្នុងការធ្វេីដំណេីរក៏ដូចជាប្រកបរបរផ្សេងៗ។ ប៉ុន្តែអ្វីដែលធ្វេីឱ្យពួកគាត់មានការបារម្ភនោះគឺថា​ ក្រោយពីកាយផ្លូវដាក់ប្រព័ន្ធលូរួចហេីយជាង១០ថ្ងៃមកហេីយ អាជ្ញាធរមិនទាន់រៀបចំដាក់គម្របលូនិងឈូសឆាយផ្លូវឱ្យស្អាត​និងត្រឹមត្រូវពិបាកដល់ពលរដ្ឋក្នុងការធ្វេីដំណេីរ​ទុកចោលបែបនេះ តេីមកពីមូលហេតុអ្វី?

ដូច្នេះ ទេីបពួកគាត់សំណូមពរដល់អាជ្ញាធរ​ ពាក់ពន្ធ័មេត្តាជួយពន្លឿនក្នុងការ​ធ្វេីគម្របគ្របលូ​ (រឺហ្គ័រ) និងលប់ផ្លូវ​ ចាក់បេតុងឡេីងវិញផង​ ដេីម្បីការពារគ្រោះថ្នាក់​ ណាមួយពេលដែលផ្លូវលិចទឹកម្តងៗ​។

ជំវិញករណីខាងលេីនេះ ក្រុមការងារយេីងបានទាក់ទងទៅលោក​ តាន់​ ណាវិន​ ចៅសង្កាត់ទឹកថ្លា​ ដោយលោកបានបញ្ជាក់ថា លោកបានជួបជាមួយមេភូមិ​ និងថៅកែម៉ៅការរួចរាល់ហេីយ​ នឹងជំរុញឱ្យក្រុមជាងចាក់រឺហ្គ័រមាត់លូឱ្យហេីយក្នុងរយៈពេលមួយថ្ងៃ ឬពីរថ្ងៃ​​ រួចនឹងចាក់ថ្មមិចជាបន្ទាន់បង្ហាប់រយៈពេល២ថ្ងៃទៀត​ និងបន្តចាក់បេតុងតែម្តង៕

ដោយ៖សុខា

The post ពលរដ្ឋ ថា អាជ្ញាធរកាយផ្លូវដាក់លូជាង១០ថ្ងៃហើយ តែលូមិនទាន់មានគម្រប appeared first on Kampuchea Thmey Daily.

ការលើកឡើងនេះ បន្ទាប់ពីមានក្រុមអង្គការសង្គមស៊ីវិលមួយចំនួន បានត្អូញត្អែរថា សកម្មភាពរបស់ពួកគេនៅមូលដ្ឋាន បានរងការរំខានពីសំណាក់អាជ្ញាធរ ដោយមានការសួរនាំជុំវិញការស្នើសុំច្បាប់អនុញ្ញាតជាដើម។ ជាក់ស្ដែងសមាគម​អាដហុក បានបង្ហោះសារនៅលើទំព័រហ្វេសប៊ុករបស់ខ្លួនថា សមត្ថកិច្ចនៅតែបន្តការតាមដាន និងរឹតត្បិតសេរីភាពមូលដ្ឋាន តម្រូវឲ្យអង្គការសង្គមស៊ីវិលដាក់លិខិតជូនដំណឹងទៅអាជ្ញាធរមូលដ្ឋាន។

ពាក់ព័ន្ធនឹងបញ្ហានេះ លោក កត្តា អ៊​ន ​អ្នក​នាំ​ពាក្យ​គណៈកម្មាធិការ​សិទ្ធិមនុស្ស​កម្ពុជា មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២៧ ខែកក្កដានេះថា បញ្ហានេះកើតឡើងដោយសារតែការមិនយល់គ្នា រវាងអាជ្ញាធរដែនដី និងក្រុមអង្គការសង្គមស៊ីវិល នៅក្នុងការធ្វើសកម្មភាពនៅតាមមូលដ្ឋាន។ មិនយល់គ្នាត្រង់ថា អាជ្ញាធរដែនដី មានតួនាទីភារកិច្ច ធានាសន្តិសុខសណ្ដាប់ធ្នាប់សាធារណៈក្នុងដែនដីរបស់ខ្លួន ហើយអង្គការសង្គមស៊ីវិល ធ្វើសកម្មភាពរបស់ខ្លួនតាមលក្ខន្តិកៈ ដែលបានចុះបញ្ជីនៅក្រសួងមហាផ្ទៃ។

លោក កត្តា អ៊​ន បានលើកឡើងថា «ដូច្នេះនៅពេលដែលមានមនុស្សប្លែក ចូលកាន់តំបន់ទីតាំងដែលអាជ្ញាធរដែនដីគ្រប់គ្រង គាត់តែងសួរនាំថា មកពីណា? ធ្វើអ្វី? ការសួរនាំនេះ យើងមិនអាចចាត់ទុកថា ជាការគំរាមកំហែង រារាំង ឬក៏រំលោភសិទ្ធិមនុស្សទេ នេះគ្រាន់តែជាសមត្ថកិច្ចនៅក្នុងការអនុវត្តភារកិច្ចរបស់គាត់»។

អ្នក​នាំ​ពាក្យ​គណៈកម្មាធិការ​សិទ្ធិមនុស្ស​កម្ពុជា បានបន្ថែមថា រាជរដ្ឋាភិបាលកម្ពុជា បានបើកទូលាយឲ្យអង្គការសង្គមស៊ីវិល ធ្វើសកម្មភាពរបស់ខ្លួនដោយសេរី មិនបាច់សុំច្បាប់អនុញ្ញាតនោះទេ។ ដូច្នេះ អង្គការសង្គមស៊ីវិល មិនចាំបាច់សុំច្បាប់អនុញ្ញាតជាមុនទេ នៅពេលដែលខ្លួនចុះធ្វើសកម្មភាពក្នុងមូលដ្ឋាន គ្រាន់តែបង្ហាញជំហររបស់ខ្លួននៅក្នុងការធ្វើសកម្មភាពនោះ តែប៉ុណ្ណោះ។

ប្រសិនបើមានករណីគំរាមកំហែងណាមួយ ទៅលើក្រុមអង្គការសង្គមស៊ីវិល គឺពួកគេអាចប្ដឹងទៅអាជ្ញាធរសាធារណៈ​ពាក់ព័ន្ធដើម្បីដោះស្រាយជូន ជាពិសេសនៅក្នុងវេទិការបស់រាជរដ្ឋាភិបាល​ និងក្រសួងមហាផ្ទៃ ដែលរៀប​ចំឡើងដើម្បីពិគ្រោះយោបល់ ជាមួយអង្គការសង្គមស៊ីវិលប្រចាំឆ្នាំ ហើយពួកគេអាចលើកយកករណីទាំងនោះបាន។ នេះបើតាមលោក កត្តា អ៊​ន ដដែល។

មន្ត្រីនាំពាក្យ​គណៈកម្មាធិការ​សិទ្ធិមនុស្ស​កម្ពុជារូបនេះ ក៏បានបញ្ជាក់ដែរថា លំហលទ្ធិប្រជាធិបតេយ្យ សិទ្ធិមនុស្ស និងសេរីភាពនៅកម្ពុជាមានការបើកទូលាយ តាមរយៈការកើនឡើងពីមួយថ្ងៃទៅមួយ នៃចំនួនអង្គការសង្គមស៊ីវិល ដែលមកដល់ពេលនេះមានជាង ៥ពាន់ ហើយអង្គការអន្តរជាតិមានជាង ៤រយ សហជីពមានជាង ៥ពាន់ និងអង្គភាពសារព័ត៌មានមានជាង ៥ពាន់ផងដែរ។

លោក កត្តា អ៊​ន បានគូសបញ្ជាក់ទៀតថា «ដូច្នេះហើយ កំណើនហ្នឹងឯង ដោយសារអី ដោយសារកម្ពុជាមានលំហប្រជាធិបតេយ្យ កម្ពុជាគោរពសិទ្ធិមនុស្ស និងសេរីភាព ទើបពួកគាត់មានលទ្ធភាពនៅក្នុងការចុះបញ្ជី នៅក្នុងការដំណើរការសកម្មភាពរបស់ខ្លួន កម្ពុជាយើងបានគោរពគោលការណ៍ ស្មារតីរដ្ឋធម្មនុញ្ញ បានគោរពគោលការណ៍ ដែលមានចែងក្នុងកតិកាសញ្ញា អនុសញ្ញាអន្តរជាតិ ពាក់ព័ន្ធសិទ្ធិមនុស្ស ហើយកម្ពុជាបានបតិបត្តដ៏ត្រឹមត្រូវ ដ៏ទូលំទូលាយ និងគោរពសិទ្ធិសេរីភាពបងប្អូនទាំងនោះ ជាពិសេសប្រជាពលរដ្ឋយើង ក៏ដូចអង្គការសង្គមស៊ីវិលផងដែរ»៕

អត្ថបទ៖ ឃួន សុភ័ក្រ

The post លោក កត្តា អ៊​ន ៖ អាជ្ញាធរសួរនាំសង្គមស៊ីវិលមកពីណា? ធ្វើអ្វី? មិនអាចចាត់ទុកថា ជាការគំរាមកំហែង ឬរារាំងឡើយ appeared first on Kampuchea Thmey Daily.

ប្រជាពលរដ្ឋរៀបរាប់ឲ្យដឹងថា ការបាក់ច្រាំងទន្លេសាប នៅចំណុចភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ គឺចាប់ផ្តើមបាក់តាំងពីរសៀលថ្ងៃទី ២៧ ខែមីនា ឆ្នាំ ២០២២ មកម៉្លេះ ដែលធ្វើឲ្យពួកគាត់រស់នៅតំបន់នោះ មានការព្រួយបារម្មណ៍យ៉ាងខ្លាំង ដោយសារមានផ្ទះប្រមាណ ៣ខ្នងមកហើយ ត្រូវបានបាក់ធ្លាក់ចូលទឹកទន្លេ តែសំណាងល្អ មិនមានប៉ះពាល់អាយុជីវិតប្រជាពលរដ្ឋឡើយ។

ប្រជាពលរដ្ឋរៀបរាប់បន្តឲ្យដឹងទៀតថា ការច្រាំងទន្លេនេះ គឺមានរយះពេលជិត ៤ខែមកហើយ ដោយបច្ចុប្បន្នពួកគាត់រស់នៅទាំងភ័យខ្លាចបំផុត ដោយខ្លាចបាក់បន្តមកទៀតប៉ះពាល់ដល់លំនៅដ្ឋានរបស់ពួកគាត់។ ដោយសារបញ្ហានេះ អ្នកភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ សូមទទូចស្នើទៅដល់អាជ្ញាធរ ស្ថាប័ន មន្ទីរ ពាក់ព័ន្ធ ជាពិសេសមន្ត្រីជំនាញសាលារាជធានីភ្នំពេញ សូមមេត្តារួសរាន់ជួយដោះស្រាយ ស្ថាបនាឲ្យបានលឿន ជៀសវាងបាក់ប៉ះពាល់លំនៅដ្ឋានរបស់ពួកគាត់។

ជុំវិញទុក្ខកង្វល់របស់ប្រជាពលរដ្ឋ នៃការបាក់ច្រាំងទន្លេនេះ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឆ្លើយតបតាមរយះ Telegram កាលពីថ្ងៃទី ១១ ខែកក្កដា ឆ្នាំ ២០២២ ថា ក្រុមការងារជំនាញបានចុះសិក្សា ២ដងមកហើយ។ ចំពោះមុខអាជ្ញាធរបានដាក់របាំងការពារ និងជូនដំណឹងដល់ផ្ទះជាប់កន្លែងបាក់ ត្រូវជម្លៀសចេញជាបណ្តោះអាសន្នសិន។

លោក សាំ ពិសិដ្ឋ បានបញ្ជាក់ថា ការបាក់ច្រាំងនេះ មានទំហំការខូចខាតធ្ងន់ធ្ងរ មិនអាចសាងសង់ក្នុងពេលទឹកទន្លេឡើង និងភ្លៀងបានទេ។ ការសាងសង់ ត្រូវរង់ចាំពេលវេលាទឹកទន្លេស្រកចុះដល់ទាបបាតទន្លេ ទើបអាចយកគ្រឿងចក្រ ចុះបុកគ្រឹះសាងសង់ជញ្ជាំងទន្លេបេតុងបាន ហើយគម្រោងក៏នឹងចំណាយថវិកាអស់ច្រើន ដែលអាជ្ញាធរត្រូវរកថវិកា និងសិក្សាដាក់បញ្ចូលក្នុងផែនការឆ្នាំ៕

អត្ថបទ៖ រ៉ាវុទ្ធ

The post ពលរដ្ឋ​ស្នើ​អាជ្ញាធរពន្លឿនការស្ថាបនា ទីតាំងបាក់ច្រាំងទន្លេនៅភូមិព្រែកតាគង់ សង្កាត់ព្រែកតាសេក ខណៈ​រយៈពេល ៤ខែហើយ មិនទាន់ស្ថាបនា   appeared first on Kampuchea Thmey Daily.

ការអំពាវនាវ ដែលស្មើនឹងបទបញ្ជាខាងលើនេះ គ្រាដែលសម្ដេចតេជោនាយករដ្ឋមន្ត្រី បានអញ្ជើញសម្ពោធដាក់ឲ្យប្រើប្រាស់ស្ពាន ៧កន្លែង ស្ថិតនៅក្នុងខេត្តក្រចេះ និងព្រៃវែង នាព្រឹកថ្ងៃទី ១៦ ខែកុម្ភៈ ឆ្នាំ ២០២២នេះ។

សម្ដេចតេជោ ហ៊ុន សែន បានថ្លែងថា នៅសល់តែប៉ុន្មានខែទៀតប៉ុណ្ណោះ ការបោះឆ្នោតជ្រើសរើសក្រុមប្រឹក្សាប្រឹក្សាឃុំ-សង្កាត់អាណត្តិទី៥ នឹងឈានចូលមកដល់។ ដូច្នេះសម្ដេចតេជោ បានអំពាវនាវដល់បណ្ដាអាជ្ញាធរគ្រប់រាជធានី-ខេត្ត ត្រូវបង្កលក្ខណៈងាយស្រួល ដល់គ្រប់គណបក្សនយោបាយ ដែលបានចុះបញ្ជីត្រឹមត្រូវ នៅក្រសួងមហាផ្ទៃ ធ្វើសកម្មភាពនយោបាយនៅមូលដ្ឋាន ឲ្យបានល្អ។

សម្ដេចតេជោនាយករដ្ឋមន្ត្រី បានលើកឡើងថា​ ការបោះឆ្នោតមិនទាន់មកដល់ក៏ពិតមែន តែបណ្ដាគណបក្សនយោបាយ ត្រូវជួបសំណេះសំណាល ជាមួយសមាជិក-សមាជិការបស់ពួកគេ។

សម្ដេចតេជោ ហ៊ុន សែ បាន​បញ្ជាក់ទៀតថា «យុទ្ធនាការបោះឆ្នោត មិនទាន់មកដល់ទេ ក៏ប៉ុន្តែគេមានឱកាស ជួបជុំសមាជិក-សមាជិការបស់គេ គេមានឱកាសជួបជុំ មិនមែនចាំបាច់ទៅដល់ឃោសនាបោះឆ្នោតទេ គេមានលទ្ធភាព ដើម្បីសុំការអនុញ្ញាត ដើម្បីនឹងលើកផ្លាក មូលដ្ឋានក៏ត្រូវបង្កលក្ខណៈសម្បត្តិ មិនមែនមានតែបក្សកាន់អំណាចមួយ ដែលមានសិទ្ធិលើកផ្លាកនោះ បក្សដទៃទៀត ក៏សិទ្ធិលើកផ្លាកដូចយើង»៕

អត្ថបទ៖ ឃួន សុភ័ក្រ

The post នាយករដ្ឋមន្ត្រី បញ្ជាឲ្យអាជ្ញាធរមូលដ្ឋាន បង្កលក្ខណៈងាយស្រួល ដល់បណ្ដាគណបក្សនយោបាយ appeared first on Kampuchea Thmey Daily.