អាហ្សង់ទីន Archives - Kampuchea Thmey Daily

ភ្លើងឆេះព្រៃនៅអាហ្សង់ទីនរីករាលដាលខ្លាំង ប៉ះពាល់ដល់តំបន់បេតិកភណ្ឌពិភពលោក

Minea Neu — Wed, 04 Feb 2026 05:30:00 +0000

ភ្លើងឆេះព្រៃកំពុងរាលដាលពាសពេញតំបន់ Patagonia នៃប្រទេសអាហ្សង់ទីន រួមទាំងព្រៃឈើដែលមានអាយុកាលយូរមកហើយ មានទំហំ៤៥០គីឡូម៉ែត្រការ៉េ រួមទាំងផ្នែកខ្លះនៃតំបន់បេតិកភណ្ឌពិភពលោក របស់អង្គការ UNESCO នៃឧទ្យានជាតិ Los Alerces ។

ភ្លើងឆេះព្រៃនៅអាហ្សង់ទីន។ Reuters

យោងតាម Al Jazeera, មនុស្សរាប់ពាន់នាក់ត្រូវបានជម្លៀសចេញ ខណៈដែលអណ្តាតភ្លើងបានរាលដាលពាសពេញខេត្ត Chubut គំរាមកំហែងដល់ដើមឈើ ដែលមានអាយុកាលជាង ៣ ៦០០ ឆ្នាំ ទៀតផង។

វិបត្តិនេះបានធ្វើឱ្យមានការរិះគន់កាន់តែខ្លាំងទៅលើគោលនយោបាយតឹងរ៉ឹងរបស់ប្រធានាធិបតី លោក Javier Milei ។

ចំណែកការកាត់បន្ថយការចំណាយ «ខ្សែច្រវាក់» របស់រដ្ឋបាលរបស់លោកបានកាត់បន្ថយថវិកាសេវាគ្រប់គ្រងអគ្គិភ័យជាតិ ចំនួន៧១ភាគរយ ក្នុងលក្ខខណ្ឌជាក់ស្តែង បើធៀបនឹងឆ្នាំមុន។ នេះបើយោងតាមក្រុមបរិស្ថាន FARN ។

លោក Ariel Slipak ប្រធានក្រុមបរិស្ថាននៅ FARN បានលើកហេតុផលថា៖ «ភ្លើងទាំងនេះពិតជាអាចព្យាករណ៍បាន។ លោក Milei គួរតែផ្តល់អាទិភាពដល់សមតុល្យសារពើពន្ធ នៅគ្រប់ការចំណាយទាំងអស់ ដើម្បីត្រៀមលក្ខណៈសង្គ្រោះបន្ទាន់»។

គួរឱ្យដឹងថា តំបន់ដែលឆេះបានកើនលើសពីការខូចខាតនៃរដូវភ្លើងឆេះ កាលពីរដូវក្ដៅឆ្នាំមុន ដែលមានទំហំ ៣២៥ គីឡូម៉ែត្រការ៉េ ។ ខណៈដែលអ្នកពន្លត់អគ្គិភ័យកំពុងប្រយុទ្ធនឹងខ្យល់បក់ខ្លាំង និងសីតុណ្ហភាពក្តៅខ្លាំង។

លោក Milei បានប្រកាសដាក់រដ្ឋក្នុងភាពអាសន្ន កាលពីថ្ងៃព្រហស្បតិ៍ ដោយបែងចែកប្រាក់ប្រហែល ៦៩ លានដុល្លារ លើផ្នែកពន្លត់អគ្គិភ័យ។

យ៉ាងណា លោក Hernan Giardini អ្នកតស៊ូមតិផ្នែកបរិស្ថាននៅអង្គភាព Greenpeace បានចង្អុលថា៖ «ការប្រែប្រួលអាកាសធាតុជាកត្តាកាន់តែធ្ងន់ធ្ងរ បង្កឱ្យមានការឆេះបែបនេះជាបន្តបន្ទាប់។ ចំណែកការមើលស្រាលពីផលប៉ះពាល់នៃការប្រែប្រួលអាកាសធាតុក៏ជាអ្វីដែលគួរតែយល់ដឹងដែរ។ អ្នកវិទ្យាសាស្ត្រ និងក្រុមចលនាអេកូឡូស៊ីបានព្រមានជាយូរមកហើយ ថាភាពគ្មានទំនួលខុសត្រូវរបស់អ្នកនយោបាយ វាអាចបាត់បង់ព្រៃឈើ និងផ្ទះពលរដ្ឋនេះឯង»។

លោក Milei ដែលតែងតែហៅការប្រែប្រួលអាកាសធាតុថា « ជាការកុហករបស់សង្គម» នឹងកំពុងពិចារណាដកខ្លួនចេញពីកិច្ចព្រមព្រៀងទីក្រុងប៉ារីស ប្រឈមនឹងសម្ពាធកាន់តែខ្លាំង ខណៈភ្លើងបានបំផ្លាញតំបន់មួយច្រើនជាងទំហំរបស់តំបន់ Buenos Aires ពីរដង៕

ប្រែសម្រួល៖ ណឺ មិនា

The post ភ្លើងឆេះព្រៃនៅអាហ្សង់ទីនរីករាលដាលខ្លាំង ប៉ះពាល់ដល់តំបន់បេតិកភណ្ឌពិភពលោក appeared first on Kampuchea Thmey Daily.

មនុស្សរាប់ពាន់នាក់ស្លៀកពាក់ជា មនុស្សពីងពាង ប្រមូលផ្តុំគ្នានៅអាហ្សង់ទីន

Boa Sokunveary — Tue, 31 Oct 2023 07:17:02 +0000

មនុស្សប្រហែល ២,០០០ នាក់ស្លៀកពាក់ជាមនុស្សពីងពាង ប្រមូលផ្តុំគ្នានៅអាហ្សង់ទីន ដើម្បីបំបែកកំណត់ត្រាពិភពលោក Guinness ។

លោក Uki Deane អ្នករៀបចំព្រឹត្តិការណ៍ជឿជាក់ថា មនុស្សស្លៀកពាក់ជា “មនុស្សពីងពាង” ក្នុងទីក្រុង Buenos Aires មានប្រហែល ៣,០០០ នាក់ឯណោះ តែគាត់មិនអាចរាប់អស់ ។

ការជួបជុំនេះមានគោលបំណងបំបែកកំណត់ត្រាពិភពលោក Guinness បន្ទាប់ពីប្រទេសម៉ាឡេស៊ីនាំគ្នាស្លៀកពាក់ជាមនុស្សពីងពាង ៦៨៥ នាក់ កាលពីខែមិថុនា ឆ្នាំ ២០២៣ ។

មិនតែប៉ុណ្ណោះ អ្នកចូលរួមបានបរិច្ចាគអាហារដល់អង្គការសប្បុរសធម៌ក្នុងតំបន់ទៀតផង ។ យ៉ាងណាមិញ ពួកគេនៅរង់ចាំ Guinness World Records ពិនិត្យព័ស្តុតាងសិន ដើម្បីជាប់កំណត់ត្រា ៕

ប្រែសម្រួល៖ វារី

ប្រភព៖ UPI

ចុចអាន៖ បុរសជនជាតិហ្សកហ្ស៊ីប្រមូលថ្នាំដុញធ្មេញរសជាតិប្លែកៗ ទុកបំបែកកំណត់ត្រាពិភពលោក

The post មនុស្សរាប់ពាន់នាក់ស្លៀកពាក់ជា មនុស្សពីងពាង ប្រមូលផ្តុំគ្នានៅអាហ្សង់ទីន appeared first on Kampuchea Thmey Daily.

ស្ថានទូតអាមេរិក និងអ៊ីស្រាអែល នៅអាហ្សង់ទីន រងការគំរាមកំហែងដោយគ្រាប់បែក

Sonya — Wed, 18 Oct 2023 14:40:47 +0000

យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា សមាជិក និងបុគ្គលិកនៃស្ថានទូតអាមេរិក និងអ៊ីស្រាអែល នៅក្នុងប្រទេសអាហ្សង់ទីន ត្រូវបានជម្លៀសចេញ បន្ទាប់ពីមានការគម្រាមកំហែងដោយគ្រាប់បែក។

មនុស្សនៅនៅក្នុងស្ថានទូតអាមេរិក និងអ៊ីស្រាអែល នៅក្នុងប្រទេសអាហ្សង់ទីន ត្រូវបានជម្លៀសចេញ នៅថ្ងៃពុធនេះ ក្រោយរងការគម្រាមកំហែងគ្រាប់បែកចំនួនពីរ ដែលទទួលបានតាមរយៈអ៊ីម៉ែល។ នេះបើតាមការរាយការណ៍ពីគេហទំព័រសារព័ត៌មានក្នុងស្រុក Clarin និង La Nacion នៅថ្ងៃទី១៨ ខែតុលា ឆ្នាំ២០២៣ វេលាម៉ោង ១០:០៧ នាទីព្រឹក នៅទីក្រុង BUENOS AIRES ៕

ប្រែសម្រួល៖ សន្យា

ប្រភព៖ Reuters

ចុចអាន៖ អ៊ីរ៉ង់ អំពាវនាវឱ្យដាក់ទណ្ឌកម្មប្រេងប្រឆាំងអ៊ីស្រាអែល

The post ស្ថានទូតអាមេរិក និងអ៊ីស្រាអែល នៅអាហ្សង់ទីន រងការគំរាមកំហែងដោយគ្រាប់បែក appeared first on Kampuchea Thmey Daily.

អាហ្សង់ទីន ឈីលី ប៉ារ៉ាហ្គាយ អ៊ុយរូហ្គាយ ដេញថ្លៃធ្វើម្ចាស់ផ្ទះ World Cup 2030 រួមគ្នា ជាផ្លូវការ

អ៊ិន ពិសី — Wed, 08 Feb 2023 23:00:00 +0000

ប្រទេសនៅទ្វីបអាមេរិកខាងត្បូង ចំនួន ៤ នឹងប្រកួតប្រជែងលើការដេញថ្លៃរួមគ្នា ជាមួយ អេស្ប៉ាញ ព័រទុយហ្គាល់ និងអ៊ុយក្រែន ដើម្បីធ្វើជាម្ចាស់ផ្ទះការប្រកួតបាល់ទាត់ពិភពលោក (FIFA World Cup) ក្នុងឆ្នាំទី ១០០ របស់ខ្លួន។

បណ្ដាប្រទេសនៅអាមេរិកខាងត្បូង អាហ្សង់ទីន ឈីលី ប៉ារ៉ាហ្គាយ និងអ៊ុយរូហ្គាយ បានដាក់ដេញថ្លៃរួមគ្នា ដើម្បីធ្វើជាម្ចាស់ផ្ទះព្រឹត្តិការណ៍ FIFA World Cup ឆ្នាំ ២០៣០ ដែលនឹងប្រព្រឹត្តទៅ ១០០ ឆ្នាំ បន្ទាប់ពីការប្រកួតលើកដំបូងត្រូវបានធ្វើឡើងនៅទីក្រុង Montevideo ប្រទេសអ៊ុយរូហ្គាយ ឆ្នាំ ១៩៣០។

មន្ត្រីមកពីប្រទេសទាំង ៤ បានជួបប្រជុំគ្នាកាលពីថ្ងៃអង្គារ ជាមួយ លោក Alejandro Dominguez ប្រធានសហព័ន្ធបាល់ទាត់ទ្វីបអាមេរិកខាងត្បូង (CONMEBOL) ដើម្បីប្រកាសពីការខិតខំប្រឹងប្រែងរបស់ពួកគេក្នុងការនាំយកការប្រកួតត្រឡប់ទៅ “កន្លែងដែលបាល់ទាត់បានកើត”។

លោក Dominguez បាននិយាយក្នុងអំឡុងពេលពិធីនៅឯទីស្នាក់ការកណ្ដាលសមាគមបាល់ទាត់អាហ្សង់ទីន នាទីក្រុង Ezeiza ភាគខាងត្បូង នៃទីក្រុង Buenos Aires ថា “ការប្រកួតបាល់ទាត់ពិភពលោក ឆ្នាំ ២០៣០ មិនមែនគ្រាន់តែជាការប្រកួតបាល់ទាត់ពិភពលោកមួយផ្សេងទៀតនោះទេ វាសមនឹងទទួលបានការអបអរសាទរជាមួយនឹងការទទួលស្គាល់រយៈពេល ១០០ ឆ្នាំ”។

“យើងជឿជាក់ថា FIFA មានការគោរពដល់ការចងចាំរបស់អ្នកដែលបានមកមុន ហើយជឿជាក់លើភាពអស្ចារ្យ និងបានបង្កើតការប្រកួតបាល់ទាត់ពិភពលោកជាលើកដំបូង”។

ជាមួយនោះ FIFA គ្រោងនឹងជ្រើសរើសម្ចាស់ផ្ទះសម្រាប់ការប្រកួតបាល់ទាត់ពិភពលោក ឆ្នាំ ២០៣០ នៅឆ្នាំក្រោយ ការប្រកួតប្រជែងរវាងប្រទេសដែលសង្ឃឹមថានឹងរៀបចំការប្រកួតកីឡាដ៏ពេញនិយមបំផុតរបស់ពិភពលោកកាន់តែមានកាន់តែខ្លាំង។

ប្រទេសអេស្ប៉ាញ ព័រទុយហ្គាល់ និងអ៊ុយក្រែន ក៏បានយល់ព្រមលើការដេញថ្លៃរួមគ្នាដែលមានការគាំទ្រពីស្ថាប័នគ្រប់គ្រងបាល់ទាត់ទ្វីបអឺរ៉ុប UEFA ផងដែរ ខណៈប្រទេសផ្សេងទៀតរួមមាន អារ៉ាប៊ីសាអូឌីត ម៉ារ៉ុក ក្រិច និងអេហ្ស៊ីប ត្រូវបានគេរាយការណ៍ថា កំពុងពិចារណាដាក់សំណើនេះ។

ការប្រកួតបាល់ទាត់ពិភពលោកត្រូវបានប្រារព្ធឡើងរៀងរាល់ ៤ ឆ្នាំម្ដង ដោយកាតា បានក្លាយជាប្រទេសដំបូងគេនៅមជ្ឈិមបូព៌ាដែលធ្វើម្ចាស់ផ្ទះការប្រកួតកាលពីចុងឆ្នាំមុន។

ការប្រកួតបន្ទាប់ នឹងត្រូវធ្វើជាម្ចាស់ផ្ទះរួមគ្នាដោយ សហរដ្ឋអាមេរិក ម៉ិកស៊ិក និងកាណាដា ក្នុងឆ្នាំ២០២៦ ដែលជាលើកទី ១ ហើយដែលប្រទេសចំនួន ៣ នឹងធ្វើជាម្ចាស់ផ្ទះរួមគ្នា។

ការប្រកួតបាល់ទាត់ពិភពលោកលើកទីមួយត្រូវបានធ្វើឡើងនៅឆ្នាំ ១៩៣០ នៅប្រទេសអ៊ុយរូហ្គាយ ជាកន្លែងដែលប្រទេសម្ចាស់ផ្ទះបានផ្ដួលគូប្រជែងអាហ្សង់ទីន ក្នុងលទ្ធផល ៤-២ ដើម្បីក្លាយជាជើងឯកពិភពលោកដំបូងគេ។ អាហ្សង់ទីន បានគ្រងតំណែងជើងឯកក្នុងប្រទេសកាតា បន្ទាប់ពីការប្រកួតវគ្គផ្ដាច់ព្រ័ត្រដ៏រំភើបជាមួយនឹងបារាំង ដែលបានបញ្ចប់ដោយបាល់ប៉េណាល់ទីកាលពីខែធ្នូ៕

ប្រភព ៖ aljazeera.com

អត្ថបទ ៖ មន្នីរ័ត្ន

The post អាហ្សង់ទីន ឈីលី ប៉ារ៉ាហ្គាយ អ៊ុយរូហ្គាយ ដេញថ្លៃធ្វើម្ចាស់ផ្ទះ World Cup 2030 រួមគ្នា ជាផ្លូវការ appeared first on Kampuchea Thmey Daily.

អ្នកចាំទីអាហ្សង់ទីន កាន់រូបតុក្កតា Mbappe ពេលដង្ហែក្បួន ដើម្បីចំអកឱ្យបារាំង

Sonya — Wed, 21 Dec 2022 14:35:18 +0000

អ្នកចាំទីល្អបំផុតនៃការប្រកួតបាល់ទាត់ពិភពលោក ឆ្នាំ២០២២ បានធ្វើឱ្យអ្នកគាំទ្របាល់ទាត់ជាច្រើន ជាពិសេសអ្នកគាំទ្រអឺរ៉ុបរាប់សិបនាក់ សម្ដែងការមិនពេញចិត្ត ក្រោយឃើញកីឡាកររូបនេះឱបតុក្កតាដែលមានមុខខ្សែប្រយុទ្ធបារាំង Kylian Mbappe ខណៈពេលកំពុងដង្ហែក្បួនដើម្បីអបអរជ័យជម្នះអាហ្សង់ទីន។

បន្ទាប់ពីជ័យជម្នះជាប្រវត្តិសាស្ត្រ ក្រុមអាហ្សង់ទីនបានប្រារព្ធពិធីអបអរយ៉ាងគគ្រឹកគគ្រេងនៅក្នុងប្រទេសកាតា និងប្រទេសកំណើតរបស់ខ្លួន ប៉ុន្តែក្នុងឱកាសដ៏រីករាយ អ្នកចាំទីល្អបំផុតនៅក្នុងព្រឹត្តិការណ៍ World Cup 2022 គឺកីឡាករ Emi Martinez បានធ្វើឱ្យអ្នកគាំទ្រជាច្រើនមិនសប្បាយចិត្តទាល់តែសោះ ដោយសារពួកគេរបានឃើញរូបថត Mbappe នៅក្នុងដៃរបស់លោក ក្នុងន័យឡកឡាយ។

ក្នុងអំឡុងពេលក្បួនដង្ហែក្បួនដើម្បីអបអរជ័យជម្នះរបស់ក្រុមអាហ្សង់ទីន អ្នកចាំទីបុរសវ័យ ៣០ឆ្នាំរូបនេះ បានកាន់តុក្កតាមុខរបស់តារាបាល់ទាត់វ័យ ២៤ឆ្នាំ Kylian Mbappe ជាប់នឹងដៃ ដែលសកម្មភាពនេះទទួលបានការគាំទ្រពីប្រជាជនអាហ្សង់ទីន ប៉ុន្តែអ្នកគាំទ្រផ្សេងមិនពេញចិត្តនោះទេ។

ចំពោះមូលហេតុដែល Emi Martinez ធ្វើបែបនេះ គឺដោយសារតែនៅមុនខែឧសភា តារាបាល់ទាត់ Kylian Mbappe ធ្លាប់និយាយថា កីឡាករបាល់ទាត់នៅអាមេរិកខាងត្បូងពុំមានការអភិវឌ្ឍន៍ដូចបណ្តាប្រទេសនៅអឺរ៉ុបទេ ដូច្នេះក្រុមដែលឈ្នះក្នុង World Cup 2022 សក្តិសមណាស់ដែលបានទៅលើក្រុមចាស់។ ទស្សនៈរបស់ Mbappe ធ្វើឱ្យមនុស្សជាច្រើនមិនយល់ស្រប រួមទាំងអ្នកចាំទី Emi Martinez ផងដែរ។ ដូច្នេះការកាន់រូបកីឡាកររូបនេះដង្ហែជាមួយ មិនមែនជាការស្រឡាញ់គាំទ្រអ្វីឡើយ តែជាការចំអកផ្ចាញ់ផ្ចាលប៉ុណ្ណោះ។

គួរបញ្ជាក់ថា នៅក្នុងការប្រកួត World Cup ឆ្នាំ២០២២ កីឡាករ Mbappe បានស៊ុតបញ្ចូលទីចំនួន ៨គ្រាប់ និងក្លាយជាអ្នកស៊ុតបញ្ចូលទីច្រើនជាងគេប្រចាំរដូវកាល រហូតធ្វើឱ្យលោកឈ្នះពានស្បែកជើងមាស។ ទោះយ៉ាងណា ក្នុងការស៊ុតបញ្ចូលទីខុស ៣គ្រាប់ សុទ្ធសឹងត្រូវអ្នកចាំទី Emi Martinez ចាប់បានទាំងអស់៕

ប្រែសម្រួល៖ សន្យា

ចុចអាន៖ អាហ្សង់ទីន គ្រោងបោះពុម្ពរូប Messi លើក្រដាសប្រាក់ធំជាងគេរបស់ប្រទេស

ចុចអាន៖ FIFA កើបលុយ ពី World Cup នៅ កាតា

The post អ្នកចាំទីអាហ្សង់ទីន កាន់រូបតុក្កតា Mbappe ពេលដង្ហែក្បួន ដើម្បីចំអកឱ្យបារាំង appeared first on Kampuchea Thmey Daily.

អាហ្សង់ទីន គ្រោងបោះពុម្ពរូប Messi លើក្រដាសប្រាក់ធំជាងគេរបស់ប្រទេស

Sonya — Tue, 20 Dec 2022 12:39:00 +0000

បន្ទាប់ពីទទួលជ័យជម្នះដ៏ត្រចះត្រចង់ នាំមកនូវភាពរុងរឿងដល់ប្រទេសជាតិ ធនាគារកណ្តាលនៃប្រទេសអាហ្សង់ទីន កំពុងពិចារណាបោះពុម្ពរូបរបស់ Lionel Messi នៅលើក្រដាសប្រាក់ធំជាងគេ ដើម្បីសម្ដែងការអរគុណដល់កីឡាករឆ្នើមរូបនេះ។

យោងតាមសារព័ត៌មានក្នុងស្រុក ក្រោយពេល អាហ្សង់ទីន ដណ្ដើមបានពានមាស World Cup 2022 ធនាគារកណ្តាលនៃប្រទេសបានបើកកិច្ចប្រជុំបន្ទាន់មួយទាក់ទងនឹងការដឹងគុណចំពោះការរួមចំណែក និងសមិទ្ធិផលរបស់ក្រុមជម្រើសជាតិ បន្ទាប់ពីពួកគេបាននាំយកភាពរុងរឿងជូនមាតុភូមិ។ ជាពិសេស ធនាគារគ្រោងនឹងបោះពុម្ពរូបរបស់ Lionel Messi នៅលើក្រដាសប្រាក់ធំជាងគេ នៅក្នុងប្រទេសអាហ្សង់ទីន ដែលមានតម្លៃ ១០០០ ប៉េសូ (ស្មើនឹង ៥០ ដុល្លារ) ហើយក្រដាសប្រាក់នេះ ពួកគេមានបំណងបោះពុម្ពដោយផ្នែកខាងមុខដាក់រូប Lionel Messi និងផ្នែកខាងក្រោយដាក់រូបរបស់គ្រូបង្វឹកអាហ្សង់ទីន លោក Lionel Scaloni ។

ដោយឡែកចំពោះឥស្សរជនដ៏មានឥទ្ធិពលទាំងពីររូបគឺទេសាភិបាលនៃធនាគាររដ្ឋអាហ្សង់ទីន លោក Lisandro Cleri និងប្រធានធនាគារកណ្តាលនៃប្រទេសអាហ្សង់ទីន លោក Eduardo Hecker បានសម្តែងការគាំទ្ររបស់ពួកគេចំពោះសំណើនេះ ខណៈប្រជាជនអាហ្សង់ទីនភាគច្រើនក៏យល់ស្របនឹងសំណើរបស់ធនាគារកណ្ដាលដូចគ្នា។

យ៉ាងណាក៏ដោយ នេះគ្រាន់តែជាចេតនាមួយប៉ុណ្ណោះ នៅមិនទាន់ឈានដល់ការសម្រេចចិត្តចុងក្រោយនោះទេ ព្រោះស្ថានភាពសេដ្ឋកិច្ចរបស់ប្រទេសអាហ្សង់ទីនបច្ចុប្បន្នកំពុងប្រឈមនឹងបញ្ហាមួយចំនួន៕

ប្រែសម្រួល៖ សន្យា

ចុចអាន៖ គួឱ្យសរសើរ! Mbappe យកប្រាក់រង្វាន់របស់ខ្លួនទាំងអស់បរិច្ចាគជួយកុមារក្រីក្រ

The post អាហ្សង់ទីន គ្រោងបោះពុម្ពរូប Messi លើក្រដាសប្រាក់ធំជាងគេរបស់ប្រទេស appeared first on Kampuchea Thmey Daily.

រឿងរ៉ាវខ្លះៗរបស់វីរបុរស Julian Alvarez ដែលទើបជួយអាហ្សង់ទីន យកឈ្នះលើក្រូអាត

Sonya — Wed, 14 Dec 2022 13:25:00 +0000

វេទិកាបណ្តាញទំនាក់ទំនងសង្គមពេលនេះកំពុងផ្ទុះល្បីរូបថតពីរសន្លឹករបស់ “វីរបុរស” អាហ្សង់ទីន Lionel Messi និង Julian Alvarez កាលពីជាង ១០ឆ្នាំមុន និងក្នុងពេលបច្ចុប្បន្ន។

កាលពី ១១ឆ្នាំមុន នៅឯការប្រកួតបាល់ទាត់ក្នុងស្រុកមួយ នៅពេលអ្នកសារព័ត៌មានបានសួរក្មេងប្រុសម្នាក់នូវគោលបំណងទៅថ្ងៃអនាគត គេបានឆ្លើយថា សុបិនរបស់គេគឺចង់លេងនៅក្នុងព្រឹត្តិការណ៍ World Cup ហើយកីឡាករបាល់ទាត់ដែលក្មេងប្រុសរូបនេះគោរពស្រឡាញ់ជាងគេគឺ Lionel Messi ។ លុះជាង ១០ឆ្នាំក្រោយ ក្មេងប្រុសម្នាក់នេះមិនត្រឹមតែក្លាយជាកីឡាករនៅក្នុងការប្រកួតបាត់ទាត់ពិភពលោក World Cup 2022 ប៉ុណ្ណោះទេ គេថែមទាំងបានក្លាយជាមិត្តរួមក្រុមរបស់ Lionel Messi ដែលជួយឱ្យអាហ្សង់ទីនឡើងដល់វគ្គផ្តាច់ព្រ័ត្រទៀតផង។

ខាងក្រោមជារឿងរ៉ាវគួរឱ្យចាប់អារម្មណ៍របស់កីឡាករអាហ្សង់ទីន Julian Alvarez!

កាលពីយប់មិញ ក្នុងវគ្គពាក់កណ្តាលផ្តាច់ព្រ័តទល់នឹងក្រូអាត អាហ្សង់ទីនបានយកឈ្នះដោយពិន្ទុ ៣-០ ឈ្នះទៅវគ្គផ្តាច់ព្រ័ត្រនៃព្រឹត្តិការណ៍ World Cup 2022។ ក្នុងនោះការសហការគ្នាដ៏ល្អរវាងតារាបាល់ទាត់ Lionel Messi ជាមួយកីឡាករវ័យក្មេង Julian Alvarez ត្រូវបានគេហៅថា ជាការរួមបញ្ចូលគ្នានៃ “វីរបុរស” ពីររូប។ ជាពិសេស ទំនាក់ទំនងរវាង Messi និង Julian មិនត្រឹមតែជាមិត្តរួមក្រុមប៉ុណ្ណោះទេ ថែមទាំងរវាងអ្នកគាំទ្រ និង Idol ទៀតផង។

ក្នុងនាមជាវីរបុរសបាល់ទាត់ឈានមុខគេរបស់ពិភពលោក នរណាក៏ដឹងដែរថា Messi បានក្លាយជាអាយដលដ៏អស្ចារ្យសម្រាប់កីឡាករបាល់ទាត់ជាច្រើននាក់ សឹងនៅគ្រប់ទីកន្លែងទូទាំងពិភពលោក ហើយក្នុងនោះក៏មាន Julian ម្នាក់ផងដែរ។

កីឡាករ Julian Alvarez កើតនៅឆ្នាំ២០០០ រស់នៅក្នុងប្រទេសអាហ្សង់ទីន។ តាំងពីកុមារភាពមក គេជាមនុស្សស្រឡាញ់វិស័យកីឡាបាល់ទាត់ខ្លាំងបំផុត ហើយបានចាត់ទុក Messi ជា Idol របស់គេតាំងពីតូចៗមកម្ល៉េះ។ នៅអាយុ ១២ ឆ្នាំ Julian មានឱកាសបានជួប និងថតរូបជាមួយ Messi ។ ក្នុងបទសម្ភាសន៍មួយ Julian បាននិយាយថា ក្តីសុបិនដ៏ធំបំផុតរបស់គេគឺការចូលរួមប្រកួតនៅ World Cup។

បន្ទាប់ពីលេងជាច្រើនឆ្នាំនៅលីគយុវជន ក្នុងឆ្នាំ ២០១៨ Julian បានលេងជាផ្លូវការក្នុងលីគអាជីពក្នុងនាមជាសមាជិកក្លឹប River Plate ។ បន្ទាប់មកគេបានចូលរួមជាមួយក្រុម Manchester City ។ ក្នុងរយៈពេល ១០ ឆ្នាំនៃការប្រឡូកក្នុងវិស័យបាល់ទាត់ Julian Alvarez បានទាក់ទាញចំណាប់អារម្មណ៍របស់អ្នកជំនាញជាមួយនឹងការលេងប្រកបដោយភាពច្នៃប្រឌិត និងបត់បែនរបស់គេ។ លុះមកដល់ឆ្នាំ ២០២២ ក្តីស្រមៃក្នុងវ័យកុមារភាពរបស់ Julian បានក្លាយជាការពិត នៅពេលដែលគេបានក្លាយជាសមាជិកនៃក្រុមអាហ្សង់ទីន ហើយក្លាយជាមិត្តរួមក្រុមជាផ្លូវការជាមួយ Messi ។

នៅក្នុងព្រឹត្តិការណ៍ World Cup 2022 អ្នកគាំទ្របាល់ទាត់ពេញចិត្តនឹងសមត្ថភាពនៃការបញ្ជូនបាល់យ៉ាងរហ័សរបស់ខ្សែប្រយុទ្ធវ័យ ២២ឆ្នាំរូបនេះខ្លាំងបំផុត។ សូម្បីតែគ្រូបង្វឹកអាហ្សង់ទីន Lionel Scaloni បានទុកឱកាស Julian លេងជាខ្សែប្រយុទ្ធដ៏សំខាន់ទៀតផង។ បន្ទាប់ពីជ័យជម្នះ ៣-០ លើក្រូអាតក្នុងវគ្គពាក់កណ្តាលផ្តាច់ព្រ័ត្រ អ្នកជំនាញបាននិយាយថា កីឡាករអាហ្សង់ទីន លេខ ៩ និង លេខ ១០ គឺជាកីឡាករប្រកួតដ៏ល្អឥតខ្ចោះនៅក្នុងព្រឹត្តិការណ៍ World Cup 2022 ។ បច្ចុប្បន្ន ទាំង Messi និង Julian ត្រូវបានប្រជាជនអាហ្សង់ទីនកោតសរសើរ និងចាត់ទុកជាវីរបុរសគ្រប់គ្នា សូម្បីអ្នកគាំទ្រក្រុមអាហ្សង់ទីនផ្សេងទៀតនៅលើពិភពលោក ក៏ស្ញើចសរសើរសមត្ថភាពកីឡាករទាំងពីររូបនេះយ៉ាងពេញទំហឹងផងដែរ៕

ប្រែសម្រួល៖ សន្យា

ចុចអាន៖ Messi បង្កើតកំណត់ត្រាអស្ចារ្យយ៉ាងច្រើន ត្រឹមមួយប្រកួតជាមួយក្រូអាត

The post រឿងរ៉ាវខ្លះៗរបស់វីរបុរស Julian Alvarez ដែលទើបជួយអាហ្សង់ទីន យកឈ្នះលើក្រូអាត appeared first on Kampuchea Thmey Daily.

សុភាពបុរសពិតៗ! Messi ខ្លាចចិត្តប្រពន្ធខ្លាំង សូម្បីរឿងតូចតាចមួយនេះ

Sonya — Fri, 09 Dec 2022 12:31:00 +0000

ក្រោយពីទទួលជ័យជម្នះក្នុងការប្រកួត World Cup 2022 ជាបន្តបន្ទាប់ Messi ត្រូវបានអ្នកគាំទ្រអបអរសាទរយ៉ាងសន្ធឹកសន្ធាប់ និងនាំគ្នាបញ្ចេញមតិ (Comment) សរសើរមិនដាច់ពីមាត់លើសមត្ថភាព ក៏ដូចជាភាពស្រស់សង្ហារបស់លោក ប៉ុន្តែតារាបាល់ទាត់វ័យ ៣៥ឆ្នាំរូបនេះបែរជាប្រាប់មិត្តរួមក្រុមកុំឱ្យអានមតិសរសើរ ព្រោះលោកខ្លាចប្រពន្ធមិនសប្បាយចិត្ត។ សកម្មភាពរបស់កំពូលតារាបាល់ទាត់អាហ្សង់ទីនរូបនេះ បានធ្វើឲ្យមហាជនរំភើបចិត្ត និងនាំគ្នានិយាយលេងថា Messi ចេះខ្លាចចិត្តប្រពន្ធដូចគេដូចឯងដែរ។

កាលពីល្ងាចថ្ងៃទី៧ ខែធ្នូ កីឡាករ Messi បានជជែកផ្ទាល់ជាមួយអតីតមិត្តរួមក្រុមអាហ្សង់ទីន អតីតខ្សែប្រយុទ្ធ Sergio Aguero ។ Aguero បានចូលនិវត្តន៍ កាលពីឆ្នាំមុន ដោយសារគាត់មានបញ្ហាចង្វាក់បេះដូង។ នៅលើការផ្សាយផ្ទាល់ (Live) មិត្តជិតស្និទ្ធទាំងពីរនាក់បានសន្ទនាគ្នាយ៉ាងកក់ក្តៅ និងសប្បាយរីករាយជុំវិញប្រធានបទបាល់ទាត់ ព្រមទាំងជីវិតរស់នៅបច្ចុប្បន្នរបស់ពួកគេ។

ក្នុងអំឡុងពេលសន្ទនា អ្នកទាំងពីរបានចែករំលែករឿងរ៉ាវគួរឱ្យអស់សំណើចមួយចំនួន និងគួរឱ្យចាប់អារម្មណ៍អំពីគ្នាទៅវិញទៅមក។ ក្នុងចំណោមរឿងទាំងនោះ អ្នកគាំទ្របានកត់សម្គាល់ជាពិសេស នៅពេលដែលកំពូលតារាអាហ្សង់ទីនបានបង្ហាញការក្រែងចិត្តចំពោះប្រពន្ធ នៅលើការផ្សាយបន្តផ្ទាល់។

នៅលើការផ្សាយផ្ទាល់ ពួកគេបានទទួលការឆ្លើយឆ្លង និងការចូលមើលយ៉ាងច្រើនពីអ្នកគាំទ្រទូទាំងពិភពលោក ព្រោះភាពទាក់ទាញទស្សនិកជនភាគច្រើនគឺដោយសារតែរូបរាងរបស់ Lionel Messi ។ អ្នកគាំទ្រជាច្រើនបានបញ្ចេញមតិសរសើរពីភាពសង្ហា និងភាពជាបុរសរបស់ខ្សែប្រយុទ្ធអាហ្សង់ទីន ហើយពេលនោះ Aguero បានអានមតិសរសើរឮៗដើម្បីឱ្យអតីតមិត្តរួមក្រុមស្តាប់។ ភ្លាមៗឪពុកកូនបីរូបនេះ បានអង្វរអតីតមិត្តរួមក្រុមឱ្យឈប់អាន ដោយលោកនិយាយថា “កុំអានមតិទាំងនោះអី បើមិនដូច្នេះទេ ខ្ញុំនឹងត្រូវប្រពន្ធប្រចណ្ឌ”។

អាកប្បកិរិយារបស់ Messi បានបង្ហាញយ៉ាងច្បាស់ថា លោកជាមនុស្សម្នាក់ដែលក្រែងចិត្តប្រពន្ធខ្លាំង ព្រោះមិនចង់ឱ្យប្រពន្ធអាក់អន់ចិត្ត សូម្បីរឿងតូចតាចក៏ដោយ ហើយអាកប្បកិរិយានេះរឹតតែធ្វើឱ្យហ្វេនស្រឡាញ់គាំទ្រតារាបាល់ទាត់រូបនេះ កាន់តែខ្លាំងទ្វេដង៕

ប្រែសម្រួល៖ សន្យា

ចុចអាន៖ ជីវិតដ៏ប្រណិតរបស់ Messi តារាបាល់ទាត់រកចំណូលច្រើនជាងគេក្នុងពិភពលោក

ចុចអាន៖ ថ្ងៃមុន ព័រទុយហ្គាល់ ឈ្នះស្វីសពិតមែន តែមិត្តស្រី Ronaldo បែរជាបន្ទោសគ្រូបង្វឹកចាស់ដៃ

The post សុភាពបុរសពិតៗ! Messi ខ្លាចចិត្តប្រពន្ធខ្លាំង សូម្បីរឿងតូចតាចមួយនេះ appeared first on Kampuchea Thmey Daily.

អាហ្សង់ទីន Archives - Kampuchea Thmey Daily

ភ្លើង​ឆេះ​ព្រៃ​នៅ​អាហ្សង់​ទីន​រីក​រាល​ដាល​​ខ្លាំង​​ ប៉ះពាល់​ដល់​​​តំបន់​បេតិកភណ្ឌ​ពិភពលោក

មនុស្សរាប់ពាន់នាក់ស្លៀកពាក់ជា មនុស្សពីងពាង ប្រមូលផ្តុំគ្នានៅអាហ្សង់ទីន

ស្ថានទូតអាមេរិក និងអ៊ីស្រាអែល នៅអាហ្សង់ទីន រងការគំរាមកំហែងដោយគ្រាប់បែក

អាហ្សង់ទីន ឈីលី ប៉ារ៉ាហ្គាយ អ៊ុយរូហ្គាយ ដេញថ្លៃធ្វើម្ចាស់ផ្ទះ World Cup 2030 រួមគ្នា ជាផ្លូវការ

អ្នកចាំទីអាហ្សង់ទីន កាន់រូបតុក្កតា Mbappe ពេលដង្ហែក្បួន ដើម្បីចំអកឱ្យបារាំង

អាហ្សង់ទីន គ្រោងបោះពុម្ពរូប Messi លើក្រដាសប្រាក់ធំជាងគេរបស់ប្រទេស

រឿងរ៉ាវខ្លះៗរបស់វីរបុរស Julian Alvarez ដែលទើបជួយអាហ្សង់ទីន យកឈ្នះលើក្រូអាត

សុភាពបុរសពិតៗ! Messi ខ្លាចចិត្តប្រពន្ធខ្លាំង សូម្បីរឿងតូចតាចមួយនេះ

ភ្លើងឆេះព្រៃនៅអាហ្សង់ទីនរីករាលដាលខ្លាំង ប៉ះពាល់ដល់តំបន់បេតិកភណ្ឌពិភពលោក