គួឱ្យសរសើរ! Mbappe យកប្រាក់រង្វាន់របស់ខ្លួនទាំងអស់បរិច្ចាគជួយកុមារក្រីក្រ

បន្ទាប់ពីបញ្ចប់រដូវកាល World Cup 2022 កីឡាករវ័យក្មេង Kylian Mbappe បានសម្រេចចិត្តយកប្រាក់រង្វាន់របស់ខ្លួន ផ្ដល់ជូនដល់មូលនិធិដើម្បីជួយដល់កុមារនៅអាហ្វ្រិក។

ក្រោយការប្រកួតវគ្គផ្តាច់ព្រ័ត្រដ៏ក្ដៅគគុកជាមួយអាហ្សង់ទីន Mbappe បានធ្វើឱ្យអ្នកគាំទ្ររាប់សិបលាននាក់សប្បាយចិត្ត និងមានមោទកភាពជាខ្លាំង នៅពេលដែលខ្សែប្រយុទ្ធបារាំងរូបនេះសម្រេចចិត្តបរិច្ចាគប្រាក់រង្វាន់ទាំងអស់ ក្នុងរដូវកាល World Cup ទៅជួយដល់កុមារក្រីក្រ។

យោងតាមការចែករំលែករបស់ Mbappe ជាមួយអ្នកសារព័ត៌មានក្នុងសន្និសីទសារព័ត៌មានក្រោយការប្រកួត លោកបាននិយាយថា លោកនឹងប្រើប្រាស់ប្រាក់រង្វាន់ចំនួន ៤សែនដុល្លារអាមេរិក ដើម្បីបរិច្ចាគដល់មូលនិធិសប្បុរសធម៌ផ្គត់ផ្គង់កុមារខ្សត់ខ្សោយនៅអាហ្វ្រិក។

នេះមិនមែនជាលើកទីមួយទេ ដែលកីឡាករវ័យ ២៣រូបនេះ សុខចិត្តប្រើប្រាស់ប្រាក់រង្វាន់ទាំងអស់ ដើម្បីបរិច្ចាគដល់សប្បុរសធម៌។ កាលពីឆ្នាំ២០១៨កន្លងទៅ បន្ទាប់ពីឈ្នះ World Cup 2018 ជាមួយក្រុមបារាំង Mbappe ក៏បានប្រើប្រាស់ទឹកប្រាក់សរុបចំនួន ៥សែនដុល្លារអាមេរិក ដើម្បីឧបត្ថម្ភដល់អង្គការមួយដែលធ្វើការដើម្បីសិទ្ធិការកែលម្អជីវិតកុមារនៅអាហ្វ្រិកផងដែរ។

ដោយសារតែខ្លួនធ្លាប់ធំធាត់ឡើងក្នុងគ្រួសារក្រខ្សត់ Mbappe តែងតែយល់ពីបញ្ហាលំបាករបស់ក្មេងៗក្រីក្រដូចខ្លួនពីអតីតកាល ហើយលោកតែងតែផ្ដល់ប្រាក់ឧបត្ថម្ភដល់មូលនិធិជារៀងរាល់ឆ្នាំ។ ទង្វើដ៏បរិសុទ្ធជាមួយសកម្មភាពមនុស្សធម៌របស់ Mbappe បានយកឈ្នះបេះដូងអ្នកគាំទ្ររាប់លាននាក់ ទោះបីរដូវកាលនេះ លោកមិនអាចលើកពាន FIFA World Cup 2022 ក៏ដោយ៕

ប្រែសម្រួល៖ សន្យា

ចុចអាន៖ Kylian Mbappe ពីក្មេងក្រីក្រនៅសំណង់អនាធិបតេយ្យ ក្លាយជាកំពូលកីឡាករបាល់ទាត់ពិភពលោក

ចុចអាន៖ Neymar ខឹងសម្បារនឹងមិត្តរួមក្រុម ដែលសាក់រូបលោកអាក្រក់មើលពេក