ព័ត៌មានអន្ដរជាតិ

លោក ណេតាន់យ៉ាហ៊ូ ប្រកាសគាំទ្រក្រុមអាហ្សង់ទីន នៅវគ្គផ្តាច់ព្រ័ត្រ World Cup យប់នេះ

បានផុស

៤ ម៉ោង មុន

នៅ

ថ្ងៃអាទិត្យ ១៩ កក្កដា ២០២៦

ដោយ

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសថាខ្លួន គាំទ្រក្រុមអាហ្សង់ទីន ចំពោះការប្រកួតវគ្គផ្តាច់ព្រ័ត្រ FIFA World Cup ២០២៦ ដោយលើកឡើងដោយផ្ទាល់ជាមួយ លោក Rabbi Shimon Axel Wajnis ឯកអគ្គរដ្ឋទូតអាហ្សង់ទីនប្រចាំនៅអ៊ីស្រាអែល ហើយក៏បានប្រើប្រាស់វេទិការនេះ ដើម្បីផ្ញើសារគាំទ្រ ចំពោះការដឹកនាំរបស់ប្រធានាធិបតីអាហ្សង់ទីន លោក Javier Milei ព្រមទាំងក្រុមបាល់ទាត់ មុនការប្រកួតបាល់ទាត់ពិភពលោក នៅថ្ងៃអាទិត្យនេះ។ នេះបើយោងតាមការចុះផ្សាយរបស់សារព័ត៌មាន Turkiye Today នៅថ្ងៃទី១៨ ខែកក្កដា ឆ្នាំ២០២៦ ។

នាយករដ្ឋមន្រ្តីអ៊ីស្រាអែលនិង មេដឹកនាំអាហ្សង់ទីន។ រូបភាព៖ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណេតាន់យ៉ាហ៊ូ ប្រាប់អ្នកកាទូតអាហ្សង់ទីន ថា៖ « លោក Javier គឺជាមិត្តពិត។ យើងគាំទ្រអ្នក និងគាំទ្រអាហ្សង់ទីនតាមវិធីជាច្រើន រួមទាំងការប្រកួតថ្ងៃស្អែកផងដែរ។ សូមជូនពរឱ្យមានសំណាងល្អ»!

គួរបញ្ជាក់ថា ក្រុមអាហ្សង់ទីននឹងចួបជាមួយអេស្ប៉ាញ នៅវគ្គផ្តាច់ព្រ័ត្រ នៅព្រឹកថ្ងៃទី២០ ខែកក្កដា ម៉ោងនៅកម្ពុជា ក្រោយក្រុមទាំងពីរនេះបានយកឈ្នះក្រុមជាច្រើន ក្នុងចំណោមប្រទេសចូលរួមប្រកួតទាំងអស់ចំនួន ៤៨ មកពីជុំវិញពិភពលោក។

ឯកអគ្គរដ្ឋទូតអាហ្សង់ទីន លោក Wajnis បាននាំយកការសួរសុខទុក្ខពី លោក Milei ទៅកាន់នាយករដ្ឋមន្ត្រីអ៊ីស្រាអែល ដោយដកស្រង់សម្តីប្រធានាធិបតីអាហ្សង់ទីនថា៖ « អ្នក[អ៊ីស្រាអែល] គឺជាមិត្តរបស់ខ្ញុំ ហើយតែងតែគាំទ្រយើង។ ខ្ញុំរីករាយដែលបានឮថាអ្នក កំពុងគាំទ្រក្រុមអាហ្សង់ទីនដោយសារតែខ្ញុំ»។

ពាក្យសម្ដីដ៏កក់ក្តៅទាំងនេះបានកើតឡើង ក្នុងបរិបទនៃទំនាក់ទំនងទ្វេភាគីដែលបានរីកចម្រើនទៅជាទំនាក់ទំនងដ៏លេចធ្លោបំផុតមួយក្នុងរយៈពេលប៉ុន្មានឆ្នាំចុងក្រោយនេះ។

លោក Milei ចូលកាន់តំណែងក្នុងខែធ្នូ ឆ្នាំ២០២៣ បានធ្វើឱ្យសម្ព័ន្ធភាពរបស់ខ្លួនជាមួយអ៊ីស្រាអែលក្លាយជាមូលដ្ឋានគ្រឹះនៃគោលនយោបាយការបរទេសរវាងប្រទេសទាំងពីរតាំងពីដំបូង ដោយពណ៌នាអំពីប្រទេសអ៊ីស្រាអែលថា ជាសម្ព័ន្ធមិត្តយុទ្ធសាស្ត្ររបស់អាហ្សង់ទីនដែលមានតម្លៃរួម៕

សម្រួល៖ ណឺ មិនា