តាមការផ្សាយរបស់ BBC, ខ្មាន់កាំភ្លើងជាឪពុកកូន បានបាញ់រះសម្លាប់មនុស្សយ៉ាងរង្គាល ស្របពេលដែលមនុស្សជាង ១ ០០០នាក់ កំពុងជួបជុំគ្នាដើម្បីអបអរពិធីបុណ្យ Hanukkah។

ប៉ូលិសបានកំណត់អត្តសញ្ញាណខ្មាន់កាំភ្លើងទាំងពីរនាក់​ ដែលម្នាក់ជាឪពុក ឈ្មោះ Sajid Akram ​អាយុ៥០ឆ្នាំ ដែលត្រូវប៉ូលិសបាញ់ស្លាប់នៅនឹងកន្លែងកើតហេតុ។ ចំណែកកូនប្រុស ឈ្មោះ Naveed Akram អាយុ២៤ឆ្នាំ បច្ចុប្បន្នស្ថិតក្នុងការឃុំឃាំងរបស់ប៉ូលិសក្នុងស្ថានភាពធ្ងន់ធ្ងរ។

Sajid គឺជាអ្នកកាន់អាជ្ញាប័ណ្ណអាវុធស្របច្បាប់ដែលមានកាំភ្លើងចុះបញ្ជីចំនួន ប្រាំមួយដើម។ គេជឿថា កាំភ្លើងទាំងប្រាំមួយដើមនោះ ត្រូវបានប្រើប្រាស់ទាំងអស់ នៅក្នុងការវាយប្រហារនេះ។

ប៉ូលិសរដ្ឋ New South Wales បានប្រកាសថា នេះគឺជាការវាយប្រហារភេរវកម្ម ដែលកំណត់គោលដៅលើជនជាតិជ្វីហ្វ ហើយប៉ូលិសក៏បានបើកការស៊ើបអង្កេតផងដែរនិងស្វែងរកខ្មាន់កាំភ្លើងទី៣៕

អត្ថបទ៖ សុខ សុវណ្ណ

The post បាញ់រះដ៏រន្ធត់នៅឆ្នេរ Bondi ប្រទេសអូស្រ្តាលី មនុស្សស្លាប់កើនដល់១៦នាក់ របួស ៤០នាក់ appeared first on Kampuchea Thmey Daily.

យោង​សេចក្តី​រាយការណ៍​របស់​ Sky News ​រដ្ឋមន្ត្រី​​ដឹកជញ្ជូន​អង់គ្លេស​ លោកស្រី Heidi Alexander បានពណ៌នា​ថា​ហេតុការ​ណ៍​​​​​​​ចាក់​ដោយ​កាំបិទ​ជា «​ឧប្បត្តិហេតុដ៏គួរឱ្យតក់ស្លុត»​ ហើយ​លោកស្រី ​បាន​បញ្ជាក់​ពីចំនួន​វត្តមានប៉ូលិស​​ច្រើននៅ​តាម​បណ្តា​ស្ថានីយ៍ និងនៅលើរថភ្លើង ដើម្បីធានាសុវត្ថិភាព​ដល់សាធារណជន។

​ក្រោយ​ផ្ទុះ​អំពើ​ហិង្សា ជនរងគ្រោះ​​​២​នាក់​​​​ក្នុង​ចំណោម​​១០នាក់​ កំពុងតែ​​​ប្រឹង​ជម្នះ​ដើម្បី​​​មាន​ជីវិត​រស់​រាន​ ​​​ក្នុង​អំពើ​​វាយ​ប្រហារ​​​​ដោយ​កាំបិទ​​ចាក់ដ៏សាហាវ​​​​​​​ក្នុង​​​ការ​ធ្វើដំណើរ​​​​​តាម​រថភ្លើង​​​​ពី Doncaster ​នៃ​​ទីក្រុង​ Cambridge ទៅ King’s Cross នៅទីក្រុងឡុងដ៍នៅ​​ថ្ងៃទី​​២​ខែវិច្ឆិកា​នេះ​។

អំពើ​វាយប្រហារ​​ដ៏ហិង្សានិង​សាហាវ​​នេះ​កើតឡើង​ដោយសារ​​បុរស​ជន​ជាតិអង់គ្លេស​២រូប ដោយ​បុរស​ម្នាក់​អាយុ​៣២​ឆ្នាំ និង ម្នាក់​ទៀត​អាយុ​៣៥ឆ្នាំ។ ក្នុង​​ដំណាក់​កាល​ដំបូង​ ប៉ូលិស​អង់គ្លេស​​ បាន​ដាក់​ការសង្ស័យ​​ចំពោះ​​​អំពើ​ភេរវកម្ម​ ប៉ុន្តែ​តាមសេក្តីរាយការណ៍​​ក្រោយ​ៗ​មក​​ទៀត​របស់សារព័ត៌មាន​អង់គ្លេស គ្មាន​សញ្ញា​​​ណា​មួយ​​សង្ស័យ​ពាក់​ព័ន្ធ​អំពើ​ភេរវកម្ម​នោះទេ​។

​យោង​សេចក្តីរាយការណ៍​របស់​ ​Sky News ​​​មហាក្សត្រ​អង់គ្លេស​​​និង​ម្ចាស់ក្សត្រី ​​បាន​ចេញ​រាជសារ​​បង្ហាញ​​​ការ​«រន្ធត់​ចិត្ត​ខ្លាំង​ណាស់» ដោយ​ការ​វាយ​ប្រហារ​ដោយ​កាំបិត​ដ៏​គួរ​ឲ្យ​ខ្លាច​ ខណៈ​នាយករដ្ឋមន្ត្រី​អង់គ្លេស Keir Starmer បាន​ពណ៌នា​​ថា អំពី​ចាក់​សម្លាប់នេះ ជា​ការ​ព្រួយបារម្ភ​ដ៏​ខ្លាំ​។​​

​​​ជន​បង្ក្​ទាំងពីរ​នាក់​​​​នោះ​​ជាជន​ជាតិអង់គ្លេស ដោយ​ម្នាក់​​​អាយុ​​៣២​ឆ្នាំជា​ជនជាតិស្បែកខ្មៅ និង​ម្នាក់​ទៀត​អាយុ​​៣៥ឆ្នាំ​មាន​ដើម​កំណើត​ពី​​តំបន់​សមុទ្រ​ការ៉ា​បៀន។ ​​ជន​បង្កទាំងពីរ​​ត្រូវបាន​ចាប់ខ្លួន​បញ្ជូន​ទៅឃុំឃាំង​នៅប៉ុស្តិ៍​ប៉ូលិស។ ​

​សេចក្តីរាយការណ៍​​របស់ 9news ​បាន​ដកស្រង់​សម្តី​មន្ត្រី​ជំនាញ​​​ភេរវកម្ម​​ ដែល​បាននិយាយថា នៅក្នុងដំណាក់កាលនេះ មិនមានអ្វីអាចបង្ហាញថានេះជាឧបទ្ទវហេតុភេរវកម្មទេ។ ក្នុង​​ឧបទ្ទវហេតុនេះ​ មានសេចក្តីរាយការណ៍ថា ​មនុស្ស​​១១​នាក់​​​​ ក្នុងនោះ​​១០​ត្រូវបានបញ្ជូន​ទៅមន្ទីរពេទ្យដោយរថយន្តសង្គ្រោះ​ ហើយជនរងគ្រោះម្នាក់​បានទៅ​​មន្ទីរពេទ្យដោយខ្លួនឯង​។ មិន​មានសេចក្តីរាយការណ៍ថា​ មានជនរងគ្រោះស្លាប់ក្នុងអំពើហិង្សានេះ​ទេ​៕​

រ៉ាន់ រើយ​

The post ​អង់គេ្លស​បង្កើន​ចំនួន​ប៉ូលិស ​ក្រោយ​កើត​អំពើ​ចាក់​ប្រហារតាមរថភ្លើង​​ appeared first on Kampuchea Thmey Daily.

តាមការចុះផ្សាយរបស់ CNN, ជនសង្ស័យបានគប់គ្រាប់បែកសាំងទៅលើហ្វូងមនុស្សដែលប្រមូលផ្តុំគ្នាទាមទារឲ្យក្រុមហាម៉ាសដោះលែងចំណាប់ខ្មាំង បណ្តាលឲ្យមនុស្សច្រើននាក់របួសរលាកពេញខ្លួនប្រាណ។

ដ្បិតមិនមានរបាយការណ៍ច្បាស់លាស់អំពីតួលេខជនរងគ្រោះ ប៉ុន្តែគេដឹងថា មានមនុស្សរងរបួសស្រាលធ្ងន់ ខ្លះព្យាបាលនៅនឹងកន្លែង រីឯខ្លះទៀតចាំបាច់ ត្រូវបញ្ជូនទៅមន្ទីពេទ្យ។

FBI ចាត់ទុកការវាយប្រហារនេះថាជាអំពើភេរវកម្ម ហើយក៏ចាប់ខ្លួននបុរសម្នាក់ និងបើកការស៊ើបអង្កេតផងដែរ។ យ៉ាងណាក្តី ភ្លាមៗ FBI មិនទាន់រកឃើញឡើយថាតើ មូលហេតុអ្វីទើបជំរុញឲ្យបុរសម្នាក់នេះ បើកការវាយប្រហារ។

ជុំវិញរឿងនេះដែរ អភិបាលរដ្ឋ Colorado លោក Jared Polis បានហៅការវាយប្រហារថាជា «អំពើភេរវកម្មដ៏កាចសាហាវ» ដោយចេញសេចក្តីថ្លែងការណ៍ថា៖ «ខ្ញុំកំពុងតាមដានស្ថានភាពនៅក្នុងទីក្រុង Boulder យ៉ាងដិតដល់ជាទីបំផុត ហើយសោកស្តាយចំពោះអ្នកដែលរងរបួស និងប៉ះពាល់ដោយអំពើភេរវកម្មដ៏សាហាវនេះ។ អំពើដែលពោរពេញទៅដោយការស្អប់ខ្ពើមគ្រប់ប្រភេទ គឺមិនអាចទទួលយកបានទេ»។

សូមជម្រាបថា ការវាយប្រហារបានកើតឡើងនៅឯព្រឹត្តិការណ៍ Boulder Run for Their Lives ដែលជាការជួបជុំប្រចាំសប្តាហ៍នៃសមាជិកសហគមន៍ជ្វីហ្វ មានគោលបំណងគាំទ្រចំណាប់ខ្មាំងដែលត្រូវបានចាប់ខ្លួនក្នុងអំឡុងការវាយប្រហាររបស់ក្រុមហាម៉ាស ថ្ងៃទី៧ខែតុលាឆ្នាំ២០២៣ នៅអ៊ីស្រាអែល៕

អត្ថបទ៖ សុខ សុវណ្ណ

ចុចអាន៖ ការវាយប្រហារ​នៅ​អាមេរិក បង្ក​ក្តីកង្វល់​សន្តិសុខ​​​នៅថ្ងៃ​​ឡើង​កាន់អំណាច​របស់​ត្រាំ​

The post ផ្ទុះការវាយប្រហារភេរវកម្មនៅ សហរដ្ឋអាមេរិក appeared first on Kampuchea Thmey Daily.

លើកឡើងនៅក្នុងឱកាសអញ្ជើញជាតំណាងសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងពិធីបិទសន្និបាតត្រួតពិនិត្យការងាររបស់ក្រសួងមហាផ្ទៃ និងបូកសរុបលទ្ធផលប្រឡងប្រណាំងចលនា «ភូមិ ឃុំសង្កាត់ មានសុវត្ថិភាព» នារសៀលថ្ងៃទី១៣ ខែកុម្ភៈ ឆ្នាំ២០២៥នេះ ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានគូសបញ្ជាក់ថា កម្លាំងនគរបាលជាតិមិនអាចធ្វេសប្រហែសបានឡើយចំពោះបញ្ហាសន្ដិសុខជាតិ និងសណ្ដាប់ធ្នាប់សង្គម ត្រូវតែពង្រឹងស្មារតីទទួលខុសត្រូវខ្ពស់ជាទីបំផុត។

បទបញ្ជារបស់ប្រមុខក្រសួងមហាផ្ទៃដូច្នេះ ចំពេលដែលមានការលេចឡើងនូវផែនការភេរវកម្មប៉ុនប៉ងធ្វើឃាតទៅលើសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងក្រុមគ្រួសារ។ បើតាមការទម្លាយឱ្យដឹងដោយសម្តេចតេជោ ហ៊ុន សែន នៅថ្ងៃទី១៣ ខែកុម្ភៈ ឆ្នាំ២០២៥នេះ គឺមានក្រុមជ្រុលនិយមបានរៀបចំផែនការភេរវកម្មប៉ុនប៉ងធ្វើឃាតលើសម្តេច និងគ្រួសារ តាមរយៈការវាយប្រហារដោយបញ្ជាដ្រូន ចូលភូមិគ្រឹះរបស់សម្តេច។

សម្ដេចតេជោ ហ៊ុន សែន បានប្រកាសកំចាត់ចោលអ្នកដែលចង់សម្លាប់សម្ដេច និងគ្រួសារ ដោយថា សម្ដេចបានដឹងមេខ្លោងជាអ្នកណាហើយ តែពេលនេះ «ត្រូវកំចាត់ពួកជ្រុលនិយម និងហិង្សាឱ្យអស់សិន»៕

ដោយ៖ ធឿន វ៉ាន់សុង

The post រដ្ឋមន្ត្រីមហាផ្ទៃ បញ្ជាកម្លាំងឱ្យបង្កើនកិច្ចការពារសន្តិសុខ ខណៈក្រុមជ្រុលនិយមមានផែនការភេរវកម្មលើសម្ដេចតេជោ appeared first on Kampuchea Thmey Daily.

កាលពីថ្ងៃទី១ខែមករាឆ្នាំ២០២៥ ភេរវករមានឈ្មោះ Shamsud-Din Jabbar ជាពលរដ្ឋអាមេរិកនិងជាអតីតយុទ្ធជន មកពីរដ្ឋ Texas បានបើករថយន្តបុករះសម្លាប់មនុស្សចំនួន១៥នាក់ ក្នុងទីក្រុង New Orleans នៃរដ្ឋ Louisiana។

ដូច្នេះហើយ មកដល់ថ្ងៃចន្ទទី១៣ខែមករាឆ្នាំ២០២៥ ទាំង FBI និង DHS បានចេញសេចក្តីប្រកាសរួមដល់ភ្នាក់ងារអនុវត្តច្បាប់ប្រហែល ១៨ ០០០ភ្នាក់ងារនៅទូទាំងប្រទេស ត្រូវប្រុងប្រៀបខ្លួនជានិច្ច ដើម្បីធានាសុវត្ថិភាពដល់សាធារណជននិងឆ្លើយតបឲ្យបានទាន់ពេលចំពោះអំពើហិង្សាដែលយកលំនាំតាមការវាយប្រហារនៅ New Orleans។

ក្នុងសេចក្តីប្រកាសនោះបានព្រមានថា FBI និង DHS ពិតជាព្រួយបារម្ភអំពីការវាយប្រហារចម្លងតាមគ្នា ឬការវាយប្រហារសងសឹក ដោយជនជ្រុលនិយមយករថយន្តធ្វើជាឧបករណ៍វាយប្រហារ។ ពួកគេត្រូវអង្គការភេរវករបរទេស បញ្ចុះបញ្ចូលឲ្យប្រព្រឹត្តអំពើភេរវកម្មតាមរយៈយានជំនិះ ហើយអ្នកវាយប្រហារនឹងប្រើអាវុធផ្សេងទៀតដូចជាកាំភ្លើងនិងកាំបិត ដើម្បីធ្វើសកម្មភាពបន្ត។

លើសពីនេះ FBI និង DHS បានព្រមានដល់ប្រជាជនអាមេរិក ឲ្យប្រុងប្រយ័ត្នឬចៀសវាងកន្លែងមានមនុស្សច្រើនឬការប្រមូលផ្តុំនានា ហើយបើអាច ត្រូវរាយការណ៍ទៅសមត្ថកិច្ចបើមានអ្វីគួរឲ្យសង្ស័យ៕

អត្ថបទ៖ សុខ សុវណ្ណ

ចុចអាន៖ ចូលឆ្នាំថ្មី អាមេរិក ផ្ទុះការវាយប្រហារភេរវកម្មផ្ទួនៗ ស្លាប់មនុស្សច្រើននាក់

The post អាមេរិក ព្រមានអំពីការវាយប្រហារថ្មីៗ ដែលយកលំនាំតាមអំពើភេរវកម្មនៅថ្ងៃឆ្លងឆ្នាំ appeared first on Kampuchea Thmey Daily.

១. អំពើភេរវកម្មនៅអាមេរិក ថ្ងៃទី១ខែមករា

មនុស្សចំនួន១៥នាក់ត្រូវបាត់បង់ជីវិតក្នុងវាយប្រហារភេរវកម្មនៅទីក្រុង New Orleans នៃរដ្ឋ Louisiana ដោយភេរវករបានបើករថយន្តភីកអាប់មួយគ្រឿង បុករះមនុស្ស។ បូលិសបញ្ជាក់ថា ភេរវករមានឈ្មោះ Shamsud-Din Jabbar ជាពលរដ្ឋអាមេរិកនិងជាអតីតយុទ្ធជន មកពីរដ្ឋ Texas ប៉ុន្តែរូបគេមានទំនាក់ទំនងជាមួយក្រុមរដ្ឋឥស្លាម។

២. រញ្ជួយដីនៅទីបេ ថ្ងៃទី៧ខែមករា

រញ្ជួយដីកម្រិតធ្ងន់៧.១រ៉ិចទ័រ បានវាយប្រហារទីក្រុង Shigatse បណ្តាលឲ្យមនុស្សស្លាប់១២៦នាក់ និងជាង១៨៨នាក់រងរបួស។ រញ្ជួយដីនេះមានចំណុចកណ្តាល ក្នុងទីប្រជុំជន Tsogo ជាមួយជម្រៅ១០គីឡូម៉ែត្រ។

៣. ភ្លើងឆេះព្រៃនៅ Los Angeles ថ្ងៃទី៨ខែមករា

ភ្លើងឆេះព្រៃសកម្មចំនួន៥ ដូចជា Palisades, Eaton, Kenneth, Hurst និង Lidia បានវាយប្រហារទីក្រុង Los Angeles ខណៈតួលេខមនុស្សស្លាប់ កើនដល់១១នាក់ ចំណែកមនុស្ស​​ជិត​​២០ម៉ឺន​នាក់ ​ត្រូវ​បង្ខំ​​ជម្លៀស​​ចាក​ចេញ​ពី​ផ្ទះ​​សម្បែង។ អគ្គិភ័យដ៏កាចសាហាវនេះ បានឆាបឆេះលើផ្ទៃដីសរុប ១១ ៧៥៧ហិកតា និងដុតកម្ទេចសំណង់ហេដ្ឋារចនាសម្ព័ន្ធជាង ១០ ០០០៕

អត្ថបទ៖ សុខ សុវណ្ណ

ចុចអាន៖ កំពុងភ្លើងឆេះព្រៃធ្ងន់ធ្ងរផង, រដ្ឋកាលីហ្វ័រញ៉ា ស្រាប់តែកើតរញ្ជួយដីផ្ទួនៗទៀត

The post ទើបដើមឆ្នាំ២០២៥ ពិភពលោកជួបគ្រោះកាចផ្ទួនៗ ស្លាប់មនុស្សរាប់រយនាក់ appeared first on Kampuchea Thmey Daily.

ការ​វាយ​ប្រហារ​​​​ដ៏សាហាវ​មួយ​បាន​កើត​ឡើង​នៅ​​​​យប់ឆ្លង​ឆ្នាំ​២០២៤ នៅ​​​ទីក្រុង​ New Orleans រដ្ឋ​ Louisiana ​ភាគ​អាគ្នេយ៍​​សហរដ្ឋ​អាមេរិក ដែលបណ្តាល​ឲ្យ​មនុស្ស​១៥​នាក់​ស្លាប់​និង​របួស​​ជាង​​៣០នាក់ បាន​​ធ្វើឲ្យសមត្ថកិច្ច FBI និង​ អាជ្ញាធរសមត្ថកិច្ច​ក្រុង New Orleans ដាក់​ការ​​​សង្ស័យ​​​បឋម​លើអំពើ​ភេរវកម្ម។

ក្រោយ​មក​ទៀត​​ ក៏​មាន​ការ​ផ្ទុះ​រថយន្ត​ដាច់​ដោយ​ឡែក​មួយ​នៅ​ទីក្រុង Las Vegas ជិត​​​សណ្ឋាគារ​​របស់​​លោក​ដូណាល់​ ត្រាំ ដែល​មាន​ការ​ចូលរួម​ពី​ទាហាន​អាមេរិក​ម្នាក់​ផង​ដែរ និង​មាន​ហេតុការណ៍​​អសន្តិសុខ​ជាច្រើន​ទៀត​ដែល​បង្ក​ក្តី​បារម្ភ​មុន​ការ​ឡើង​កាន់​អំណាច​របស់​លោក ដូណាល់​ ត្រាំ នៅ​រយៈពេល​​២សប្តាហ៍​ទៀត​។

តាមសេចក្តីរាយការណ៍​របស់​ទីភ្នាក់ងារ​ព័ត៌មានរ៉យទ័រ មន្ត្រី​សេតវិមាន​បាននិយាយ​នៅ​ថ្ងៃទី​ខែមករាថា ខ្លួនកំពុងធ្វើការយ៉ាងជិតស្និទ្ធជាមួយក្រុម​ផ្លាស់ប្តូរ​អំណាច​របស់ប្រធានាធិបតីជាប់ឆ្នោត​ដូណាល់ ត្រាំ ដើម្បីការពារប្រឆាំងនឹងការវាយប្រហារដែលអាចកើតមានក្នុងពិធីសម្ពោធថ្ងៃទី២០ខែមករា។

លោក John Kirby អ្នកនាំពាក្យសន្តិសុខជាតិរបស់ប្រធានាធិបតី​ជិត​ផុត​អាណត្តិ លោក ចូ បៃ​ដិន​ បាននិយាយថា សេតវិមានក៏កំពុងរក្សាទីប្រឹក្សាសន្តិសុខជាតិរបស់លោក ត្រាំ​ គឺលោក Mike Waltz ផងដែរ ចំពោះ​ការស៊ើបអង្កេតលើការវាយប្រហារថ្ងៃចូលឆ្នាំសកលនៅទីក្រុង New Orleans។

រ៉យទ័រ​បាន​ដកស្រង់​​ពីការចេញ​ផ្សាយ​នៅក្នុងព្រឹត្តិបត្រស៊ើបការណ៍សម្ងាត់ដែលបានចេញផ្សាយនៅថ្ងៃទី៣ ខែមករា ឲ្យ​ដឹង​ថា ភ្នាក់ងារអនុវត្តច្បាប់ និងទីភ្នាក់ងារស៊ើបការណ៍សម្ងាត់របស់សហរដ្ឋអាមេរិកបានលើកឡើងពីការព្រួយបារម្ភអំពីការវាយប្រហារដោយរថយន្ត បន្ទាប់ពីការវាយប្រហារនេះ។

លោក Kirby បាននិយាយថា មន្ត្រីអនុវត្តច្បាប់ និងចារកម្មកំពុងឃ្លាំមើលស្ថានការណ៍ «យ៉ាងដិត​ដល់​» ហើយ​សន្តិសុខនៅក្នុងពិធីសម្ពោធនាពេលខាងមុខនៅតែជាអាទិភាពសម្រាប់ទាំងអស់គ្នា។

​​ព្រឹត្តិបត្រស៊ើប​អង្កេត​នោះ​ត្រូវបានចេញផ្សាយមួយថ្ងៃ បន្ទាប់ពីការិយាល័យស៊ើបអង្កេតសហព័ន្ធបាននិយាយថា បុរស​​ឈ្មោះ​ Shamsud-Din Jabbar អាយុ៤២​ឆ្នាំមានដើមកំណើតនៅរដ្ឋតិចសាស់ត្រូវបាន  «បំផុសគំនិត»​យ៉ាងពិតប្រាកដ​ ដោយក្រុមសកម្មប្រយុទ្ធ ISIS ឱ្យបើកឡានដឹកទំនិញចូលទៅក្នុងហ្វូងមនុស្សនៅ New Orleans ។ Jabbar ដែលបានដោត​​ទង់ ISIS ពីខាងក្រោយឡានដែលគាត់បានជួលនោះ ត្រូវបានសម្លាប់នៅក្នុងការបាញ់ប្រហារជាមួយប៉ូលីស។

លោក Kirby បាននិយាយថា «សុវត្ថិភាពនៃពិធី​ឡើង​កាន់​អំណាច​​ និងមនុស្សដែលចូលរួម វានៅតែជាអាទិភាពខ្ពស់សម្រាប់យើងទាំងអស់គ្នានៅក្នុងសាខាប្រតិបត្តិ។ យើងកំពុងយកចិត្តទុកដាក់​យ៉ា​ងខ្លាំង​ជារៀងរាល់ថ្ងៃ ដើម្បីធានាសុវត្ថិភាពនៃ​​ពិធីឡើង​កាន់​អំណាច​ពីការវាយប្រហារគ្រប់ប្រភេទ»។

ពិធីសម្ភោធប្រធានាធិបតីធ្វើឡើងនៅខាងក្រៅវិមាន​រដ្ឋសភា​ ឬ​ហៅ​ថា «វិមានកាពីតូល»​ របស់សហរដ្ឋអាមេរិក ហើយបន្តដោយក្បួនដង្ហែទៅកាន់សេតវិមានដោយប្រធានាធិបតីថ្មី និងគ្រាប់បាល់សម្ពោធជាបន្តបន្ទាប់ជុំវិញទីក្រុងវ៉ាស៊ីនតោន៕​

ដោយ រ៉ាន់ រើយ​

The post ការវាយប្រហារ​នៅ​អាមេរិក បង្ក​ក្តីកង្វល់​សន្តិសុខ​​​នៅថ្ងៃ​​ឡើង​កាន់អំណាច​របស់​ត្រាំ​ appeared first on Kampuchea Thmey Daily.

ចំពោះការវាយប្រហារនៅ New Orleans, តាមការចុះផ្សាយរបស់ BBC នៅថ្ងៃព្រហស្បតិ៍ទី១ខែមករាឆ្នាំ២០២៥ ភេរវករបានបើករថយន្តភីកអាប់មួយគ្រឿង បុករះសម្លាប់មនុស្ស១៥នាក់ និងបណ្តាលឲ្យ៣៥នាក់ទៀតរងរបួស មុនពេលប៉ូលិសបាញ់សម្លាប់គាត់នាវេលាម៉ោង៣ទាបភ្លឺ។

បូលិសបញ្ជាក់ថា ភេរវករមានឈ្មោះ Shamsud-Din Jabbar ជាពលរដ្ឋអាមេរិកនិងជាអតីតយុទ្ធជន មកពីរដ្ឋ Texas។ ក្រោយមក FBI បានរកឃើញទង់ក្រុមរដ្ឋឥស្លាម អាវុធនិងគ្រាប់បែកនៅក្នុងរថយន្ត ព្រមទាំងនៅកន្លែងផ្សេងទៀតក្នុងតំបន់ ដូច្នេះក្រុមស៊ើបអង្កេតហ៊ានសន្មត់ថា បុរសវ័យ៤២ឆ្នាំរូបនេះ មិនមែនធ្វើសកម្មភាពតែម្នាក់ឯងនោះទេ។

បន្ទាប់ពីការវាយប្រហារនេះ អភិបាលក្រុង New Orleans បានប្រកាសលុបចោលព្រឹត្តិការណ៍ធំៗជាច្រើន ជាពិសេសកម្មវិធី Sugar Bowl ដើម្បីសុវត្ថិភាព។

ចំណែកហេតុការណ៍មួយទៀតនៅទីក្រុង Las Vegas ឯណោះ, រថយន្ត Cybertruck មួយគ្រឿង បានផ្ទុះនៅខាងក្រៅសណ្ឋាគាររបស់លោក ត្រាំ បណ្តាលឲ្យស្លាប់អ្នកបើក និងបង្ខំឲ្យមានការជម្លៀសមនុស្សជាប្រញាប់។

ករណីនេះកំពុងត្រូវបានគេស៊ើបអង្កេត ខណៈមានការសង្ស័យថា នេះជាសារព្រមានទៅលោក Elon Musk ដែលជាម្ចាស់ក្រុមហ៊ុន Tesla ព្រោះតែលោកមានទំនាក់ទំនងស្អិតរមួតជាមួយលោក ត្រាំ និងបានជួយអ្នកសាធារណរដ្ឋឲ្យឈ្នះការបោះឆ្នោតអាមេរិក។

សម្រាប់ការវាយប្រហារភេរវកម្មទាំងពីរខាងលើនេះ បានចោទជាក្តីកង្វល់ចំពោះសន្តិសុខអាមេរិកសម្រាប់ឆ្នាំ២០២៥ ជាពិសេសក្រោយពេលលោក ត្រាំ ចូលកាន់តំណែងជាផ្លូវការនៅប៉ុន្មានសប្តាហ៍ទៀត។ សូម្បីតែអំឡុងពេលឃោសនាបោះឆ្នោត លោកក៏ត្រូវគេលបធ្វើឃាតមួយលើកជាពីរលើកផងដែរ ដូច្នេះហើយគេបារម្ភថា តើទៅថ្ងៃខាងមុខ សហរដ្ឋអាមេរិកនិងលោក ត្រាំ មានរឿងអ្វីកើតឡើងទៀត៕ 

អត្ថបទ៖ សុខ សុវណ្ណ

ចុចអាន៖ ​សមត្ថកិច្ច​​អាមេរិក​​បាញ់សម្លាប់​​បុរស​ម្នាក់​សង្ស័យ​បង្កភេរវកម្ម​​នៅថ្ងៃ​​បុណ្យ​ឆ្លងឆ្នាំ​

The post ចូលឆ្នាំថ្មី អាមេរិក ផ្ទុះការវាយប្រហារភេរវកម្មផ្ទួនៗ ស្លាប់មនុស្សច្រើននាក់ appeared first on Kampuchea Thmey Daily.