កំពុងភ្លើងឆេះព្រៃធ្ងន់ធ្ងរផង, រដ្ឋកាលីហ្វ័រញ៉ា ស្រាប់តែកើតរញ្ជួយដីផ្ទួនៗទៀត

រដ្ឋកាលីហ្វ័រញ៉ា ត្រូវរងការវាយប្រហារដោយគ្រោះរញ្ជួយដីផ្ទួនៗ ស្របពេលដែលភ្លើងឆេះព្រៃនៅ Los Angeles ក៏បន្តកញ្ជ្រោលខ្លាំង មិនទាន់មើលឃើញសញ្ញាធូរស្រាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Daily Mail កាលពីថ្ងៃសុក្រទី១០ខែមករាឆ្នាំ២០២៥, រញ្ជួយដីដំបូងកើតឡើងនៅឈូងសមុទ្រ San Francisco ដោយចំណុចកណ្តាលមានចម្ងាយប្រហែល៨គីឡូម៉ែត្រ ភាគនិរតីស្ពាន Golden Gate ហើយក្រោយមកក៏មានការរញ្ជួយកម្រិត២.២រ៉ិចទ័រ និង២.៥រ៉ិចទ័រជាបន្តបន្ទាប់។

ទោះបីជាយ៉ាងណាក៏ដោយ ព្រោះតែការរញ្ជួយនេះមានកម្រិតស្រាល វាមិនបង្កឲ្យមានការខូចខាតអ្វីនោះទេ ហើយក៏មិនប៉ះពាល់ដល់មនុស្សដែរ។

រញ្ជួយដីនេះកើតឡើងចំពេល ភ្លើងឆេះព្រៃដ៏កាចសាហាវនៅទីក្រុង Los Angeles បានឆាបឆេះលើផ្ទៃដីសរុប ១១ ៧៥៧ហិកតា ដុតកម្ទេចសំណង់ហេដ្ឋារចនាសម្ព័ន្ធជាង ១០ ០០០។

ភ្លើង​​​​ឆេះ​ព្រៃ​​​នៅ​ទីក្រុង​ Los Ageles ឈាន​ចូល​ដល់​ថ្ងៃទី​៤​ហើយគិតត្រឹមថ្ងៃ​សុក្រ ខណៈកងពន្លត់អគ្គិភ័យ កំពុងប្រយុទ្ធជាមួយភ្លើងឆេះព្រៃសកម្មចំនួន៥ ដូចជា Palisades, Eaton, Kenneth, Hurst និង Lidia រីឯតួលេខមនុស្សស្លាប់ កើនដល់១១នាក់ ចំណែកមនុស្ស​​ជិត​​២០ម៉ឺន​នាក់ ​ត្រូវ​បង្ខំ​​ជម្លៀស​​ចាក​ចេញ​ពី​ផ្ទះ​​សម្បែង។

ដំបូងឡើយ អាជ្ញាធរចង្អុលទៅបម្រែបម្រួល​អាកាសធាតុ គ្រោះរាំងស្ងួត​យូរនិងខ្យល់បកខ្លាំងជាដើមហេតុបង្កឲ្យមានមហន្តរាយនេះ ប៉ុន្តែក្រោយមក ប៉ូលិសបានចាប់ខ្លួនជនសង្ស័យម្នាក់ ពាក់ព័ន្ធការដុតព្រៃ។

ជុំវិញបញ្ហានេះដែរ​ យោង​តាម​​​ការ​ប៉ាន់ស្មាន​របស់​ក្រុមហ៊ុន AccuWeather, ការ​ខាតបង់​​សេដ្ឋកិច្ច​ជា​បឋម​នៃ​ករណី​ភ្លើង​ឆេះ​ព្រៃ​ដ៏​អាក្រក់ និង​សាហាវ​​​បំផុត​នៅ​​ទី​ក្រុង Los Angeles រដ្ឋ​កាលីហ្វ័រញ៉ា អាច​ស្ថិត​​ក្នុង​​ចន្លោះ​ពី ៥២​ពាន់​លាន​ដុល្លារ ដល់​ ៥៧​ពាន់​លាន​ដុល្លារ៕

អត្ថបទ៖ សុខ សុវណ្ណ

ចុចអាន៖ ចំនួនមនុស្សស្លាប់ដោយសារភ្លើងឆេះព្រៃនៅ LA កើនឡើងទ្វេដង