ផ្ទុះការវាយប្រហារភេរវកម្មនៅ សហរដ្ឋអាមេរិក

ប៉ូលិសបានបញ្ជាក់ពីការវាយប្រហារភេរវកម្ម លើក្បួនដង្ហែគាំទ្រអ៊ីស្រាអែលមួយ នៅទីក្រុង Boulder ក្នុងរដ្ឋ Colorado សហរដ្ឋអាមេរិក កាលពីថ្ងៃអាទិត្យទី១ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ CNN, ជនសង្ស័យបានគប់គ្រាប់បែកសាំងទៅលើហ្វូងមនុស្សដែលប្រមូលផ្តុំគ្នាទាមទារឲ្យក្រុមហាម៉ាសដោះលែងចំណាប់ខ្មាំង បណ្តាលឲ្យមនុស្សច្រើននាក់របួសរលាកពេញខ្លួនប្រាណ។

ដ្បិតមិនមានរបាយការណ៍ច្បាស់លាស់អំពីតួលេខជនរងគ្រោះ ប៉ុន្តែគេដឹងថា មានមនុស្សរងរបួសស្រាលធ្ងន់ ខ្លះព្យាបាលនៅនឹងកន្លែង រីឯខ្លះទៀតចាំបាច់ ត្រូវបញ្ជូនទៅមន្ទីពេទ្យ។

FBI ចាត់ទុកការវាយប្រហារនេះថាជាអំពើភេរវកម្ម ហើយក៏ចាប់ខ្លួននបុរសម្នាក់ និងបើកការស៊ើបអង្កេតផងដែរ។ យ៉ាងណាក្តី ភ្លាមៗ FBI មិនទាន់រកឃើញឡើយថាតើ មូលហេតុអ្វីទើបជំរុញឲ្យបុរសម្នាក់នេះ បើកការវាយប្រហារ។

ជុំវិញរឿងនេះដែរ អភិបាលរដ្ឋ Colorado លោក Jared Polis បានហៅការវាយប្រហារថាជា «អំពើភេរវកម្មដ៏កាចសាហាវ» ដោយចេញសេចក្តីថ្លែងការណ៍ថា៖ «ខ្ញុំកំពុងតាមដានស្ថានភាពនៅក្នុងទីក្រុង Boulder យ៉ាងដិតដល់ជាទីបំផុត ហើយសោកស្តាយចំពោះអ្នកដែលរងរបួស និងប៉ះពាល់ដោយអំពើភេរវកម្មដ៏សាហាវនេះ។ អំពើដែលពោរពេញទៅដោយការស្អប់ខ្ពើមគ្រប់ប្រភេទ គឺមិនអាចទទួលយកបានទេ»។

សូមជម្រាបថា ការវាយប្រហារបានកើតឡើងនៅឯព្រឹត្តិការណ៍ Boulder Run for Their Lives ដែលជាការជួបជុំប្រចាំសប្តាហ៍នៃសមាជិកសហគមន៍ជ្វីហ្វ មានគោលបំណងគាំទ្រចំណាប់ខ្មាំងដែលត្រូវបានចាប់ខ្លួនក្នុងអំឡុងការវាយប្រហាររបស់ក្រុមហាម៉ាស ថ្ងៃទី៧ខែតុលាឆ្នាំ២០២៣ នៅអ៊ីស្រាអែល៕

អត្ថបទ៖ សុខ សុវណ្ណ

ចុចអាន៖ ការវាយប្រហារ​នៅ​អាមេរិក បង្ក​ក្តីកង្វល់​សន្តិសុខ​​​នៅថ្ងៃ​​ឡើង​កាន់អំណាច​របស់​ត្រាំ​