អំពើហិង្សា Archives - Kampuchea Thmey Daily

អាជ្ញាធរឃុំកាចូន សហការជាមួយអង្គការនារីដើម្បីសន្តិភាព ជំរុញការលុបបំបាត់អំពើហិង្សាក្នុងគ្រួសារ និងការរើសអើង

Samean Lay — Tue, 19 May 2026 04:15:13 +0000

អាជ្ញាធរឃុំកាចូន ស្រុកវើនសៃ ខេត្តរតនគិរី សហការជាមួយអង្គការនារីដើម្បីសន្តិភាព បានរៀបចំវគ្គបណ្តុះបណ្តាលក្រៅប្រព័ន្ធ ស្តីពីការកែប្រែផ្នត់គំនិតយេនឌ័រ ការគោរពសិទ្ធិបុគ្គល និងការលុបបំបាត់អំពើហិង្សាក្នុងគ្រួសារ និងសហគមន៍ នៅថ្ងៃទី១៩ ខែឧសភា ឆ្នាំ២០២៦ ។

ក្នុងវគ្គបណ្តុះបណ្តាលនេះមានចូលរួមពី លោក ផាន់ថង លៀន ជំទប់ទី១ និងលោក ខាំ ភុនខុន ជំទប់ទី២ រួមជាមួយលោក គង់ ប៊ុនលី អ្នកសម្របសម្រួលអង្គការនារីដើម្បីសន្តិភាព បានពិភាក្សាអំពីផ្នត់គំនិតបុរាណទាក់ទងនឹងតួនាទីយេនឌ័រ ដែលតែងកំណត់ថា ការងារផ្ទះ និងការថែទាំកុមារ គឺជាតួនាទីរបស់ស្ត្រី ខណៈបុរសត្រូវធ្វើជាអ្នករកប្រាក់ផ្គត់ផ្គង់គ្រួសារ។ តាមរយៈកិច្ចពិភាក្សានេះ បានលើកទឹកចិត្តឱ្យមានការចែករំលែកការងារក្នុងគ្រួសារដោយស្មើភាព ដើម្បីកាត់បន្ថយជម្លោះ និងអំពើហិង្សាក្នុងគ្រួសារ។

ជាមួយគ្នានេះ ការពិភាក្សាក៏បានផ្តោតលើការយល់ដឹងអំពីអត្តសញ្ញាណយេនឌ័រ និងសិទ្ធិរបស់អ្នកស្រឡាញ់ភេទដូចគ្នា ដោយបញ្ជាក់ថា មនុស្សគ្រប់រូបមានសិទ្ធិស្មើគ្នាក្នុងការរស់នៅ បញ្ចេញមតិ និងអភិវឌ្ឍខ្លួន ដោយមិនគួររងការរើសអើង ឬមើលងាយពីសង្គមឡើយ។

លោក គង់ ប៊ុនលី បានលើកឡើងថា អត្តសញ្ញាណយេនឌ័រ គឺជាអារម្មណ៍ និងការកំណត់អត្តសញ្ញាណផ្ទាល់ខ្លួនរបស់មនុស្សម្នាក់ៗ ដែលអាចខុសពីភេទកំណើត ហើយការស្រឡាញ់ភេទដូចគ្នា មិនមែនជាទង្វើខុសច្បាប់ ឬផ្ទុយនឹងសីលធម៌សង្គមនោះទេ។ លោកបានសង្កត់ធ្ងន់ថា ការរើសអើង ការប្រមាថ ឬការយកបុគ្គលណាម្នាក់ធ្វើជាកម្មវត្ថុនៃការលេងសើច ដោយសារអត្តសញ្ញាណភេទ គឺជាទង្វើដែលប៉ះពាល់ដល់សិទ្ធិ និងសេចក្តីថ្លៃថ្នូររបស់មនុស្ស។

វគ្គបណ្តុះបណ្តាលនេះ ក៏បានបង្ហាញអំពីក្របខ័ណ្ឌច្បាប់ពាក់ព័ន្ធនឹងអំពើហិង្សា និងការរំលោភបំពានផ្លូវភេទ ដោយពន្យល់ពីផលប៉ះពាល់ផ្លូវចិត្ត សង្គម និងផ្លូវច្បាប់ ដែលកើតឡើងពីការប្រើអំពើហិង្សា ការបង្ខិតបង្ខំ និងការរំលោភសិទ្ធិបុគ្គលនៅក្នុងគ្រួសារ កន្លែងការងារ និងសហគមន៍។

សូមជម្រាបថា វគ្គបណ្តុះបណ្តាលនេះមានគោលបំណងជំរុញឱ្យសហគមន៍ បង្កើនការគោរពគ្នាទៅវិញទៅមក ប្រើប្រាស់ពាក្យសម្តី និងអាកប្បកិរិយាប្រកបដោយសីលធម៌ និងរួមគ្នាលុបបំបាត់អំពើហិង្សា ក៏ដូចជាការរើសអើងគ្រប់ទម្រង់នៅក្នុងសង្គម៕

ដោយ៖ ខៀវ ចាប

The post អាជ្ញាធរឃុំកាចូន សហការជាមួយអង្គការនារីដើម្បីសន្តិភាព ជំរុញការលុបបំបាត់អំពើហិង្សាក្នុងគ្រួសារ និងការរើសអើង appeared first on Kampuchea Thmey Daily.

បុរសម្នាក់បែកថ្នាំប្រើហិង្សា ក្នុងគ្រួសារនិងដុតផ្ទះខ្លួនឯង ត្រូវអាវុធហត្ថរាជធានី ចុះបង្ក្រាបទាន់ពេលវេលា

Ung Meng — Tue, 05 May 2026 02:23:08 +0000

បន្ទាប់ពីទទួលបានព័ត៌មាន សុំកិច្ចអន្តរាគមន៍ តាមរយៈលេខទូរស័ព្ទបន្ទាន់ ១២៩១ កាលពីវេលាម៉ោង១៦:៣០នាទី ថ្ងៃទី០៤ ខែឧសភា ឆ្នាំ២០២៦ មានករណីបុរសម្នាក់ឈ្មោះ ម៉ៅ ចំណាប់ ភេទប្រុស អាយុ៣៦ឆ្នាំ មានសភាពបែកថ្នាំ ធ្វើសកម្មភាពបង្កហិង្សាបំផ្លិចបំផ្លាញទ្រព្យសម្បត្តិក្នុងក្រុមគ្រួសារ ព្រមទាំងដុតផ្ទះខ្លួនឯង

នៅចំណុចផ្ទះលេខ៤២ ផ្លូវលេខ១៩ ភូមិ០៩ សង្កាត់ជ័យជំនះ ខណ្ឌដូនពេញ រាជធានីភ្នំពេញ កម្លាំងកងរាជអាវុធហត្ថរាជធានីភ្នំពេញ បានចុះដល់ទីតាំងកើតហេតុភ្លាមៗធ្វើអន្តរាគមន៍ ជួយពន្លត់ភ្លើងដែលឆាបឆេះ បានទាន់ពេលវេលា ព្រមទាំងបានធ្វើការទប់ស្កាត់និងឃាត់ខ្លួនជនបង្ក ផងដែរ។

ក្រោយហេតុការណ៍ ដ៏ភ្ញាក់ផ្អើលនេះត្រូវបានបញ្ចប់ ប្រជាពលរដ្ឋក្បែរខាងដែលទទួលរងនូវការភ័យខ្លាច និងបារម្ភពី ទង្វើដុតផ្ទះរបស់ជនបង្ក អាចនឹងឆេះរាលដាលដល់ផ្ទះពួកគាត់ បានសម្តែងការថ្លែងអំណរគុណ ដោយក្តីរំភើបបំផុត ចំពោះកម្លាំងអាវុធហត្ថរាជធានីភ្នំពេញ ដែលបានចុះជួយអន្តរាគមន៍ទាន់ពេលវេលា។

លោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ ក៏សូមអំពាវនាវដល់បងប្អូនប្រជាពលរដ្ឋ នៅក្នុងរាជធានីភ្នំពេញផងដែរ ប្រសិនបើបងប្អូន បានជួបហេតុការណ៍ណាមួយ ត្រូវការអន្តរាគមន៍បន្ទាន់ ពីកងរាជអាវុធហត្ថរាជធានីភ្នំពេញ សូមបងប្អូនហៅទូរស័ព្ទទៅកាន់លេខ១២៩១ ឬ អាចទាក់ទងតាមបណ្តាញ Telegram, WhatsApp, CoolApp របស់កងរាជអាវុធហត្ថរាជធានីភ្នំពេញ ដែលមានលេខ 031 5555 669 ឬអាចឆាតទៅកាន់ផេកហ្វេសប៊ុករបស់កងរាជអាវុធហត្ថរាជធានីភ្នំពេញ ដែលមានឈ្មោះថា Phnom Penh Gendarmerie៕

The post បុរសម្នាក់បែកថ្នាំប្រើហិង្សា ក្នុងគ្រួសារនិងដុតផ្ទះខ្លួនឯង ត្រូវអាវុធហត្ថរាជធានី ចុះបង្ក្រាបទាន់ពេលវេលា appeared first on Kampuchea Thmey Daily.

ជនជាតិចិន ១ ក្រុម បិទផ្លូវសាធារណៈ នៅមុខធនាគារជាតិ នៃកម្ពុជា និងវាយអាជ្ញាធរ

អ៊ិន ពិសី — Mon, 27 Apr 2026 09:07:05 +0000

ជនជាតិចិន ១ ក្រុម ដែលជាអតិថិជនក្រុមហ៊ុន ហួយវ័ន បានបង្កភាពអនាធិបតេយ្យ ដោយបិទផ្លូវសាធារណៈ នៅមុខធនាគារជាតិ នៃកម្ពុជា មិនឲ្យពលរដ្ឋធ្វើដំណើរបាន ថែមទាំងប្រើប្រាស់អំពើហិង្សាវាយទៅលើអាជ្ញាធរមានសមត្ថកិច្ចថែមទៀត ខណៈចុះទៅអន្តរាគមន៍បើកផ្លូវ។

អំពើហិង្សា និងបិទផ្លូវសាធារណៈនេះកើតឡើងនាថ្ងៃទី ២៧ ខែមេសា ឆ្នាំ ២០២៦ នេះ នៅមុខធនាគារជាតិ នៃកម្ពុជា លើបណ្តោយផ្លូវហាណូយ សង្កាត់គោកឃ្លៀង ខណ្ឌសែនសុខ រាជធានីភ្នំពេញ។

សមត្ថកិច្ច បានឲ្យដឹងថា មូលហេតុដែលក្រុមអតិថិជនក្រុមហ៊ុន ហួយវ័ន មកប្រមូលផ្តុំ នៅមុខធនាគារជាតិ នៃកម្ពុជា គឺ ដើម្បីដាក់បន្ទុក និងជំរុញឲ្យធនាគារជាតិ ដោះស្រាយសងប្រាក់ត្រឡប់មកពួកគេវិញ ទើបពួកគេធ្វើការបិទផ្លូវសាធារណៈដោយខុសច្បាប់ បើទោះបីជាអាជ្ញាធរមានការហាមឃាត់យ៉ាងណាក៏ដោយ ក៏មិនព្រមស្តាប់ ថែមទាំងប្រើហិង្សាមកលើសមត្ថកិច្ចថែមទៀត។

កន្លងមក ធនាគារជាតិ នៃកម្ពុជា បានជូនដំណឹងថា ក្រុមហ៊ុន ហួយវ័ន ផេ ពុំស្ថិតក្រោមសមត្ថកិច្ចរបស់ធនាគារជាតិទៀតឡើយ តែសម្រាប់បុគ្គលដែលរងគ្រោះក្នុងក្រុមហ៊ុន អេច ផេ ត្រូវទៅចុះឈ្មោះផ្តល់ព័ត៌មានជូនក្រុមហ៊ុនកំពុងជម្រះបញ្ជី៕
អត្ថបទ ៖ ស្រីរ័ត្ន

The post ជនជាតិចិន ១ ក្រុម បិទផ្លូវសាធារណៈ នៅមុខធនាគារជាតិ នៃកម្ពុជា និងវាយអាជ្ញាធរ appeared first on Kampuchea Thmey Daily.

បាត់កូនស្រីជិតមួយសប្តាហ៍តាមទាន់មកដេកផ្ទះសំណាក់ជាមួយសង្សារបង្កហិង្សាមកលើស្ត្រីជាម្តាយ

Ung Meng — Wed, 31 Dec 2025 02:22:24 +0000

ម្នាក់បានបាត់កូនស្រីចេញពីផ្ទះអស់រយះពេលជិតមួយសប្តាហ៍ទៅហើយ តាមរកគ្រប់ទីកន្លែងបែជាមកប្រទះឃើញកំពុងតែនៅក្នុងផ្ទះសំណាក់មួយកន្លែង ជាមួយសង្សារ ខណៈកំពុងសួរនាំបែជាមិត្តភក្តិរបស់សង្សារកូនស្រីបង្កហិង្សា វាយទៅស្រ្ដីជាម្ដាយ ហើយរត់គេចខ្លួនបាត់។

ហេតុការណ៍នេះបានកើតឡើងនៅវេលាម៉ោង ៨និង៤០នាទីយប់ ថ្ងៃទី៣០ខែធ្នូ ឆ្នាំ២០២៥ នៅចំនុចផ្ទះសំណាក់យីហោ ដេវីតថ្មី ដែលស្ថិតតាមបណ្ដោយផ្លូវ២៧១ សង្កាត់ផ្សាដើមថ្កូវ ខណ្ឌចំការមន។

បើតាមការរៀបរាប់ពីស្ត្រីជាម្ដាយ បានឲ្យដឹងថា កូនស្រីរបស់គាត់ បានបាត់ចេញពីផ្ទះរយៈពេល៦ថ្ងៃ៧យប់មកហើយ ដោយសារ រូបគាត់ដឹងថា មានបុរសម្នាក់ឈ្មោះ ថា បាននាំកូនស្រីរបស់គាត់ទៅ តែមិនដឹងទៅទីណានោះទេ។

ប្រភពដដែល បន្តទៀតថា ដោយមិនឃើញកូនស្រីត្រលប់មកផ្ទះវិញ រូបគាត់បានតាម រករហូត ឃើញកូនរបស់គាត់កំពុងតែនៅក្នុងបន្ទប់ផ្ទះសំណាក់ជាមួយនិងសង្សារ ទើបផ្អើលឆោឡោសួរនាំរកខុសត្រូវ ពេលនោះ អ្នកមើលការខុសត្រូវផ្ទះសំណាក់ បានឲ្យពួកគាត់ចុះមកក្រោមនិយាយគ្នា ស្រាប់តែបុរសមានម្នាក់ទៀតត្រូវជាមិត្តភក្ដិខាងប្រុស ដែលនៅក្នុងផ្ទះសំណាក់នោះដែរ បានប្រើហិង្សាវាយទៅរូបគាត់ជាម្ដាយ បណ្តាលឲ្យរបួសតិចតួច ហើយក៏នាំគ្នីគ្នារត់ចេញផ្លូវក្រោយបាត់អស់ទៅ។

ស្ត្រីជាម្ដាយបានឲ្យដឹងទៀតថា បន្ទាប់ពីរត់គេចអស់ហើយ រូបគាត់បាននាំកូនស្រីរបស់គាត់ ទៅរកបុរសជាសង្សារ ដល់ផ្ទះនៅក្រោមវត្តច្បារអំពៅ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ដើម្បីសួរនាំរកខុសត្រូវ តែពេលទៅដល់មិនឃើញបុរសជាសង្សារនោះទេ ជួបតែក្រុមគ្រួសារតែប៉ុណ្ណោះ។

ចុងក្រោយតំណាងក្រុមគ្រួសារទាំងសងខាងបានសម្របសម្រួល គ្នាដោយខាងស្រីឲ្យសងថ្លៃក្រវិលនិងចិញ្ចៀន តំលៃ៦០០ដុល្លារ ដែលខាងប្រុសលួងលោមយកទៅលក់ស៊ីចាយ តែខាងប្រុសសុំសង៣០០ដុល្លារតែប៉ុណ្ណោះ។ បន្ទាប់មកទើបខាងប្រុសបានសងសំណងទៅខាងស្រីចំនួន៤០០ដុល្លារ បញ្ចប់រឿងដោយមិនប្តឹងផ្តល់អ្វីទៅខាងប្រុសនោះទេ៕អត្ថបទ៖សុខា

The post បាត់កូនស្រីជិតមួយសប្តាហ៍តាមទាន់មកដេកផ្ទះសំណាក់ជាមួយសង្សារបង្កហិង្សាមកលើស្ត្រីជាម្តាយ appeared first on Kampuchea Thmey Daily.

យុទ្ធនាការ១៦ថ្ងៃ បញ្ឈប់អំពើហិង្សាលើស្រ្តី និងក្មេងស្រី នៅវិទ្យាល័យ ហ៊ុន សែនតាខ្មៅ

Ung Meng — Fri, 05 Dec 2025 09:15:42 +0000

មន្ទីរកិច្ចការនារីខេត្តកណ្ដាល និងវិទ្យាល័យ ហ៊ុន សែនតាខ្មៅ បានរៀបចំ យុទ្ធនាការ ១៦ថ្ងៃបញ្ឈប់អំពើហិង្សាលើស្រ្តី និងក្មេងស្រី ក្រោមប្រធានបទ «រួមគ្នាបញ្ឈប់អំពើហិង្សាតាមបច្ចេកវិទ្យាលើស្រ្តី និងក្មេងស្រី» ដោយមានការចូលរួមពីសិស្សានុសិស្ស លោកគ្រូ អ្នកគ្រូ ប្រមាណជាង ១០០០នាក់។

នៅថ្ងៃទី៥ ខែធ្នូ ឆ្នាំ២០២៥ លោកស្រី ជុំ ស៊ីណាត ប្រធានមន្ទីរកិច្ចការនារីខេត្តកណ្ដាល បានរៀបចំពិធីយុទ្ធនាការ១៦ថ្ងៃ បញ្ឈប់អំពើហិង្សាលើស្រ្តី និងក្មេងស្រី ដល់សិស្សានុសិស្ស លោកគ្រូ អ្នកគ្រូ នៅវិទ្យាល័យ ហ៊ុន សែន តាខ្មៅ ប្រមាណជាង ១០០០នាក់។

លោកស្រី ជុំ ស៊ីណាត ប្រធានមន្ទីរកិច្ចការនារីខេត្តកណ្ដាល បានថ្លែងថា យុទ្ធនាការ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី គឺជាយុទ្ធនាការរួមគ្នាមួយ ដែលប្រារព្ធឡើងដើម្បីឲ្យប្រជាជនកម្ពុជា បានដឹងអំពីផលប៉ះពាល់ នៃអំពើហិង្សាលើស្ត្រី និងកុមារី និងការប្រយុទ្ធប្រឆាំងលើអំពើហិង្សា ព្រមទាំងលើកកម្ពស់ការយល់ដឹងជាសាធារណៈពី កាតព្វកិច្ចរបស់ប្រជាពលរដ្ឋគ្រប់រូប និងស្ថាប័នពាក់ព័ន្ធ ក្នុងការអនុវត្តច្បាប់ដែលការពារ និងលុបបំបាត់នូវរាល់ទម្រង់ នៃការរើសអើងលើស្ត្រី និងកុមារ។

លោកស្រី ប្រធានមន្ទីរ បានលើកឡើងថា ដើម្បីឆ្លើយតបយុទ្ធសាស្ត្ររបស់រាជរដ្ឋាភិបាលគ្រប់នីតិកាល ការបន្តជំរុញអនុវត្តផែនការសកម្មភាពជាតិ ស្តីពីការទប់ស្កាត់អំពើហិង្សាលើស្ត្រី គឺសំដៅលុបបំបាត់ឥរិយាបថប្រើអំពើហិង្សាលើ ស្ត្រី និងពង្រីកវប្បធម៌ អហិង្សា ដើម្បីរួមចំណែកលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ក៏ដូចជាកសាងគ្រួសារមានសុភមង្គល សហគមន៍ និងសង្គមជាតិ។

លោកស្រីបន្ថែមថា ការបញ្ឈប់អំពើហិង្សាលើស្ត្រី និងក្មេងស្រី គឺអាចធ្វើទៅបានតាមរយៈការឆ្លើយតបជាពហុវិស័យទាមទារឱ្យមានការចូលរួមរបស់អ្នកពាក់ព័ន្ធ រួមទាំងស្ត្រីខ្លួនឯងផងដែរ។ លោកស្រីបានសង្កត់ធ្ងន់ថា សម្រាប់យុទ្ធនាការ ១៦ថ្ងៃ គឺធ្វើឡើងតាមរយៈសកម្មភាពនៃការជួបជុំនាពេលនេះ ពិតជាមានសារៈសំខាន់ ក្នុងការចូលរួមកាត់បន្ថយអំពើហិង្សាទាក់ទងនឹងយេនឌ័រ ដើម្បីឆ្លើយតប ទៅនឹងផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាលកម្ពុជា និងផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ត្រី ក្នុងគោលបំណង ជំរុញឱ្យមានសមភាព និងសមធម៌យេនឌ័រនៅក្នុងសង្គម និងធ្វើឪ្យប្រសើរឡើងនូវក្នុងទំនាក់ទំនងផ្នែកយេនឌ័រដើម្បីកាត់បន្ថយរាល់ទម្រង់អំពើហិង្សាលើស្ត្រី។ ដូច្នេះការផ្លាស់ប្ដូរ និងការប្រកាន់ភ្ជាប់នូវការប្រព្រឹត្តិ និងឥរិយាបថជាវិជ្ជមាន គឺជាមធ្យោបាយដ៏មានប្រសិទ្ធភាពក្នុងការលើកកម្ពស់សមភាព និងសមធម៌យេនឌ័រ រវាងបុរស និងស្ត្រី៕

The post យុទ្ធនាការ១៦ថ្ងៃ បញ្ឈប់អំពើហិង្សាលើស្រ្តី និងក្មេងស្រី នៅវិទ្យាល័យ ហ៊ុន សែនតាខ្មៅ appeared first on Kampuchea Thmey Daily.

សមត្ថកិច្ចឃាត់ខ្លួន នាយករងសាលាអាវុធហត្ថ ដែលស្រវឹងស្រាដកកាំភ្លើងភ្ជង់ រួចវាយក្បាលយុវតីម្នាក់ឱ្យរបួស២កន្លែង ដើម្បីអនុវត្តច្បាប់ ទណ្ឌកម្ម

Ngoeul Narath — Thu, 23 Oct 2025 06:59:04 +0000

សមត្ថកិច្ចចម្រុះ បានឃាត់ខ្លួននាយករងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ដែលបង្កគ្រោះថ្នាក់ចរាចរណ៍រួចដកកាំភ្លើងភ្ជង់គំរាមបាញ់សម្លាប់ និងវាយក្បាលយុវតីម្នាក់ឱ្យរបួសត្រង់ក្បាលចំនួន២កន្លែង កាលពីយប់ថ្ងៃទី២២ ខែតុលា នៅខណ្ឌសែនសុខ រាជធានីភ្នំពេញ ដើម្បីបន្តអនុវត្តច្បាប់ និងទណ្ឌកម្ម។ នេះបើតាមសេចក្តីប្រកាសព័ត៌មានរបស់អ្នកនាំពាក្យកងរាជអាវុធហត្ថលើផ្ទៃប្រទេស ចេញនៅថ្ងៃទី២៣ ខែតុលា ឆ្នាំ២០២៥។

បើតាមសម្ដីរបស់យុវតីរងគ្រោះ ដែលរៀបរាប់តាមរយៈប្រព័ន្ធផ្សព្វផ្សាយព័ត៌មាន គឺជនបង្កស្រវឹងស្រាបើករថយន្តមកប៉ះម៉ូតូដែលខ្លួនជិះបណ្ដាលឱ្យខូចខាតតិចតួច ខណៈនោះយុវតីរងគ្រោះ និងបងប្រុសរបស់ខ្លួន បានសុំសំណងចំនួន ២ ម៉ឺនរៀល ពីជនបង្ក ប៉ុន្តែជនបង្ក ឈឹម ឆែម មិនព្រមផ្ដល់សំណងតិចតួចនេះឡើយ ផ្ទុយទៅវិញជនបង្កបានហៅយុវតី និងយុវជនទាំងពីរនាក់ ទៅក្បែររថយន្តរបស់ខ្លួន រួចដកកាំភ្លើងចេញពីរថយន្ត ស្លាកលេខ រដ្ឋ០៦ ២-៨៦៨៨ ភ្ជង់ក្បាលយុវជនរូបនោះ។ ដោយឃើញជនបង្ករូបនេះភ្ជង់កាំភ្លើង និងប្រុងដេញបាញ់ខ្លួន យុវជនក៏បានរត់ចោលប្អូនស្រី។យុវជនដែលត្រូវមន្ត្រីកងរាជអាវុធហត្ថដកកាំភ្លើងភ្ជង់ អះអាងថា ក្នុងពេលដែលខ្លួនរត់គេច ជនបង្កបានស្រែកថា៖« អាពៅឈប់ៗ …សូមផ្ញើគ្រាប់កាំភ្លើងលើក្បាលពីរគ្រាប់ផង»។

បន្ទាប់ពីស្រែកគំរាមបែបនេះ ជនបង្កក៏បានយកកាំភ្លើងវាយក្បាលយុវតី បណ្ដាលឱ្យបែកក្បាលចំនួនពីរកន្លែង ម្ខាងត្រង់ចំហៀងខាងឆ្វេង និងម្ខាងចំហៀងខាងស្ដាំ។ យុវតីរងគ្រោះ រៀបរាប់ទៀតថា ក្រោយពីយកកាំភ្លើងវាយក្បាលខ្លួនហើយ ជនបង្កក៏ឡើងរថយន្តរួចបើកគេចខ្លួន បន្ទាប់ពីមហាជនមកដល់កន្លែងកើតហេតុ។

អ្នកនាំពាក្យកងរាជអាវុធហត្ថបានឱ្យដឹងថា បន្ទាប់ពីកើតហេតុ ក្រោមការសហការជាមួយស្នងការដ្ឋាននគរបាលរាជធានីភ្នំពេញ សមត្ថកិច្ចបានធ្វើការឃាត់ខ្លួន បុគ្គលឈ្មោះ ឈឹម ឆែម ឋានន្តរសក្តិឧត្តមសេនីយ៍ត្រី មុខតំណែងនាយករង មជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ រួចនាំខ្លួនមកបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីបន្តអនុវត្តនីតិវិធី។

អ្នកនាំពាក្យអះអាងថា កងរាជអាវុធហត្ថនឹងអនុវត្តច្បាប់ ទណ្ឌកម្មវិន័យចំពោះបុគ្គលនេះ ស្របតាមទិសស្លោក “ប្រទេសជាតិត្រូវតែការពារ ប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប”។

បន្ថែមពីនវ អ្នកនាំពាក្យឱ្យដឹងថា កងរាជអាវុធហត្ថ ក៏បានទំនាក់ទំនងទៅកាន់យុវតីរងរបួស ដើម្បីទទួលខុសត្រូវចេញថ្លៃព្យាបាលរបួស។ អ្នកនាំពាក្យសន្យាថា នៅពេលបញ្ចប់នីតិវិធី កងរាជអាវុធហត្ថ នឹងប្រកាសព័ត៌មានអំពីចំណាត់ការនីតិវិធីលម្អិតជូនសាធារណជនជ្រាប៕

ដោយ៖ ង៉ិល ណារ៉ាត់

The post សមត្ថកិច្ចឃាត់ខ្លួន នាយករងសាលាអាវុធហត្ថ ដែលស្រវឹងស្រាដកកាំភ្លើងភ្ជង់ រួចវាយក្បាលយុវតីម្នាក់ឱ្យរបួស២កន្លែង ដើម្បីអនុវត្តច្បាប់ ទណ្ឌកម្ម appeared first on Kampuchea Thmey Daily.

កម្ពុជាប្រាប់អន្តរជាតិថា ពលរដ្ឋខ្មែររស់នៅលើដីថៃ ទទួលរងការរើសអើង រងអំពើហិង្សាពីសំណាក់ជនជាតិថៃ

Ngoeul Narath — Fri, 03 Oct 2025 03:19:11 +0000

តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិប្រចាំនៅទីក្រុងហ្សឺណែវ លោក អ៉ិន តារា បានប្រាប់អន្តរជាតិថា ពលរដ្ឋកម្ពុជា ដែលកំពុងសិក្សារៀនសូត្រ ប្រកបនៅលើទឹកដីថៃ បាននិងកំពុងទទួលរងការរើសអើងជាតិសាសន៍ ការប្រើអំពើហិង្សាពីសំណាក់ជនជាតិថៃ។ ឯកអគ្គរាជទូត អុិន តារា ថ្លែងដូច្នេះ ក្នុងបទអន្តរាគមន៍ អំឡុងកិច្ចពិភាក្សាទូទៅ ក្នុងរបៀបវារៈស្តីពីការប្រកាន់ជាតិសាសន៍ ការរើសអើងពូជសាសន៍ និងការស្អប់ខ្ពើមជនបរទេស នៃក្នុងសម័យប្រជុំលើកទី៦០ នៃក្រុមប្រឹក្សាសិទ្ធិមនុស្ស កាលពីថ្ងៃទី២ ខែតុលា ឆ្នាំ២០២៥។

ក្នុងកិច្ចអន្តរាគមន៍ ឯកអគ្គរាជទូត អ៉ិន តារា បានបញ្ជាក់ជាថ្មីអំពីការប្តេជ្ញាចិត្តមិនងាករេរបស់កម្ពុជាក្នុងការលើកកម្ពស់ និងការពារសិទ្ធិមនុស្សទាំងអស់ ដោយផ្អែកលើគោលការណ៍សកលនៃសមភាព សេចក្តីថ្លៃថ្នូរ និងសកល។ ភាពស្ងៀមស្ងាត់មិនមែនជាជម្រើសទេនៅពេលដែលមូលគ្រឹះទាំងនេះត្រូវបានគំរាមកំហែង។

លោក អ៉ិន តារា បានទាក់ទាញការយកចិត្តទុកដាក់ចំពោះការរីករាលដាលនៃការស្អប់ខ្ពើមជនបរទេស និងអំពើហិង្សារើសអើងជាតិសាសន៍លើពលរដ្ឋកម្ពុជាក្នុងប្រទេសថៃ ជាពិសេស ពលករ និងនិស្សិត ដែលងាយរងគ្រោះដោយសារស្ថានភាពរបស់ពួកគេ បានក្លាយទៅជាគោលដៅនៃការវាយប្រហារដោយស្អប់ ការយាយី និងវោហាសាស្ត្ររើសអើង។ ទង្វើបែបនេះបំពុលទំនាក់ទំនងរវាងប្រជាជន និងបំផ្លាញស្មារតីនៃសាមគ្គីភាពដែលទ្រទ្រង់ពហុភាគីនិយម។

តំណាងកម្ពុជា ក៏បានព្រមានបន្ថែមទៀតប្រឆាំងនឹងការរីកសាយនៃយុទ្ធនាការផ្សព្វផ្សាយព័ត៌មានមិនពិត ដែលបំភ្លៃការពិត ការរើសអើង និងបង្ករឱ្យសហគមន៍ស្លូតត្រង់ទទួលរងហានិភ័យមិនសមហេតុផលទាំងនេះ។ ការអនុវត្តបែបនេះគឺមិនសមស្របនឹងកាតព្វកិច្ចអន្តរជាតិរបស់រដ្ឋក្នុងការធានាការមិនរើសអើង សមភាពចំពោះមុខច្បាប់ និងសន្តិសុខ និងសេចក្តីថ្លៃថ្នូររបស់មនុស្សគ្រប់រូប ក្នុងដែនយុត្តាធិការរបស់ប្រទេសខ្លួន។

ឯកអគ្គរាជទូតបានបញ្ចប់ដោយសង្កត់ធ្ងន់ថា ការប្រយុទ្ធប្រឆាំងនឹងការរើសអើងជាតិសាសន៍ ការស្អប់ខ្ពើមជនបរទេស និងការមិនអត់ឱន មិនមែនជាជម្រើសនយោបាយទេ ប៉ុន្តែជាការចាំបាច់ខាងច្បាប់ និងសីលធម៌ ដោយអំពាវនាវឱ្យក្រុមប្រឹក្សាសិទ្ធិមនុស្សបង្កើនការយកចិត្តទុកដាក់លើបញ្ហាទាំងនេះ៕

The post កម្ពុជាប្រាប់អន្តរជាតិថា ពលរដ្ឋខ្មែររស់នៅលើដីថៃ ទទួលរងការរើសអើង រងអំពើហិង្សាពីសំណាក់ជនជាតិថៃ appeared first on Kampuchea Thmey Daily.

ក្រុមបះបោរនៅខេត្តភាគខាងត្បូងថៃបំផ្ទុះគ្រាប់បែករបួសមនុស្សពីរនាក់

Bun sopheap — Thu, 08 May 2025 10:38:37 +0000

ក្រុមបះបោរបំផ្ទុះគ្រាប់បែកតាមដងផ្លូវក្នុងស្រុកមួយក្នុង ខេត្ត Yala បណ្ដាលឲ្យ វិស្វករពីនាក់រងរបួស កាលពីថ្ងៃពុធ ស្របពេលរដ្ឋាភិបាលថៃរឹតបន្តឹងសន្តិសុខនៅតាមខេត្តភាគខាងត្បូងថៃដោយសារអំពើហិង្សាកើនឡើង។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី០៨ខែឧសភានេះ។

(រូបភាព៖ Bangkok Post)

គ្រាប់បែកនេះបានផ្ទុះនៅលើផ្លូវតាមបណ្តោយផ្លូវរថភ្លើង ក្នុងភូមិ Kotortuera ស្រុក Raman នៅម៉ោងប្រហែល ៥ល្ងាច ខណៈដែលក្បួនរថយន្តចំនួន ៥ គ្រឿងដឹកទាហាន ២១នាក់កំពុងឆ្លងកាត់។ ពួកគេកំពុងធ្វើដំណើរត្រឡប់ទៅមូលដ្ឋានវិញ បន្ទាប់ពីពួកគេបញ្ចប់ការបូមខ្សាច់ប្រឡាយនៅភូមិមួយផ្សេងទៀត។

ហេតុការណ៍នេះបាន បណ្តាលឲ្យវិស្វករយោធា២នាក់រងរបួស ម្នាក់រងរបួសត្រចៀកនិងម្នាក់ទៀត រងរបួសដើមទ្រូង និងចិញ្ចើម និងត្រូវបានបញ្ជូនទៅកាន់មន្ទីរពេទ្យ Raman។

ប៉ូលិសបានជឿថា ការវាយប្រហារនេះអាចជាស្នាដៃរបស់ក្រុមបះបោរដែលចង់បង្កើតភាពចលាចល ខណៈឧប្បត្តិហេតុហិង្សាបាននិងកំពុងកើនឡើងក្នុងប៉ុន្មានសប្តាហ៍ថ្មីៗនេះក្នុងខេត្តភាគខាងត្បូងដូចជាខេត្ត Narathiwat, Pattani និង Yalaជាកន្លែងដែលក្រុមបំបែកខ្លួនស្វែងរកឯករាជ្យភាពកាន់តែខ្លាំងចំពោះតំបន់ដែលមានអ្នកកាន់សាសនាឥស្លាម។

កាលពីសប្តាហ៍មុនមនុស្ស ០៤ នាក់ រួមទាំងក្មេងស្រីអាយុ ៩ ឆ្នាំម្នាក់ និងស្ត្រីពិការភ្នែកអាយុ៧៦ឆ្នាំម្នាក់ត្រូវបានសម្លាប់ដោយខ្មាន់កាំភ្លើងនៅក្នុងស្រុក Tak Bai និង Chanae ក្នុងខេត្ត Narathiwat ។ មនុស្សជាង ៧,០០០ នាក់បានស្លាប់ចាប់តាំងពីឆ្នាំ ២០០៤ ដោយសារការបះបោរបានចាប់ផ្តើមឡើងវិញបន្ទាប់ពីបានស្ងប់ស្ងាត់អស់រយៈពេលជាច្រើនឆ្នាំ៕

(រូបភាព៖ Khaosod)

អត្ថបទ៖ ប៊ុន សុភាព