លោក អ៊ីសើ ជា​ពលរដ្ឋ​ខ្មែរ​ឥស្លាម រស់នៅ​ភូមិ ៤ សង្កាត់​ដងទង់ ក្រុង​ខេមរភូមិន្ទ បាន​រៀបរាប់​កាលពី​ថ្ងៃ​ទី ១៦ ខែ​មីនា ឆ្នាំ ២០២៦ ថា តម្លៃ​ប្រេងសាំង​នៅ​ត្រឹម ១ លីត្រ ជាង ៤ ០០០ រៀល អាច​រត់​រួច​លើ​ចំណាយ​ទៅ​នេសាទ​នៅ​សមុទ្រ ប៉ុន្តែ​ឥឡូវ​ប្រេងសាំង​ឡើង​ថ្លៃ​តាម​ស្ថានភាព​ប្រែប្រួល​របស់​ពិភពលោក​ធ្វើ​ឲ្យ​រូប​គាត់​លំបាក​ចេញ​ទូក​ទៅ​សមុទ្រ។

លោក អ៊ីសើ បន្ត​ថា ឆ្នាំនេះ ប្រមូល​ទិន្នផល​នេសាទ​បាន​គួរសម តែ​ការ​លក់​ចេញ​ទៅ​ឲ្យ​ឈ្មួញ​កណ្តាល​ពុំ​សូវ​បាន​ថ្លៃ​នោះ​ទេ ពោល​គឺ​ពេលខ្លះ​ខាត​ក៏​មាន​ដែរ ព្រោះ​តែ​ផាត់​ថ្លៃ​ប្រេងសាំង​មិន​គ្រប់​នោះ​ទេ។ ស្ថានភាព​បែបនេះ រូប​លោក​ផ្អាក​ចេញ​ទៅ​ជាង​កន្លះ​ខែ​ហើយ មិន​ទៅ​សមុទ្រ។

អ្នកស្រី ថុប ថាន ជា​អ្នក​រក​ក្តាម នៅ​សង្កាត់​ដងទង់ លើក​ឡើង​ថា ប្រេងសាំង​ឡើង​ថ្លៃ​បាន​ធ្វើ​ឲ្យ​ប៉ះពាល់​សេដ្ឋកិច្ច​ចំណូល​របស់​គាត់​ពី​ការ​នេសាទ​ក្តាម​នៅ​ឯ​សមុទ្រ។ ទិន្នផល​ក្តាម​ដែល​ប្រមូល​រក​បាន លក់​ចេញ​ឲ្យ​ឈ្មួញ​បាន​ទាប ដូច្នេះ​រត់​មិន​រួច​នឹង​ការ​ចំណាយ​ថ្លៃ​ទិញ​ប្រេងសាំង​ឡើយ។

អ្នកស្រី ស្នើ​ដល់​រាជរដ្ឋាភិបាល និង​ក្រសួង​ពាក់ព័ន្ធ សូម​មេត្តា​ជួយ​សម្របសម្រួល​ធ្វើ​យ៉ាងណា​ឲ្យ​តម្លៃ​ប្រេង​សាំង​ចុះ​ថយ​មក​ត្រឹម​ណា​ដែល​ទទួល​យក​បាន ប្រសិន​បើ​មិន​ដូច្នេះ​ទេ ជីវភាព​រស់នៅ​លក្ខណៈ​គ្រួសារ​កាន់តែ​លំបាក។ ធៀប​នឹង​អ្នក​មាន​ធនធាន និង​ទូក​ធំ គេ​អាច​ចេញទៅ​នេសាទ​នៅ​ចម្ងាយ​រក​ទិន្នផល​មក​លក់​នៅ​លើ​ទីផ្សារ​បាន​ប្រចាំថ្ងៃ។

ទាក់ទិន​នឹង​បញ្ហា​ប្រេងឥន្ធនៈ​ឡើង​ថ្លៃ​នេះ​ដែរ ត្រូវបាន លោក សេង ប៊ុណ្ណា នាយ​ខណ្ឌ​រដ្ឋបាល​ជលផល​ខេត្ត​កោះកុង ក៏​ទទួល​ស្គាល់​អំពី​ផល​ប៉ះពាល់​របស់​ប្រជានេសាទ ព្រោះ​តែ​តម្លៃ​ប្រេងសាំង​ឡើង​ថ្លៃ​នា​ពេល​បច្ចុប្បន្ន​នេះ​ដែរ។ ទន្ទឹម​នោះ ទិន្នផល​នេសាទ​លក់​នៅ​លើ​ទីផ្សារ ក៏​អាច​ឡើង​បន្តិចបន្តួច​ទៅ​តាម​ជាក់ស្ដែង។

តប​នឹង​ការ​ជូនដំណឹង​របស់​ក្រសួងកសិកម្ម រុក្ខា​ប្រមាញ់ និង​នេសាទ រដ្ឋបាល​ខណ្ឌ​ជលផល​ខេត្ត​កោះកុង កំពុង​តាមដាន​យកចិត្តទុកដាក់​លើ​ស្ថានភាព​ផ្គត់ផ្គង់ និង​តម្លៃ​ប្រេង និង​ឧស្ម័ន​ឥន្ធនៈ ត្រឹមត្រូវ​តាម​តារាង​តម្លៃ​លក់​ចេញ​របស់​ក្រសួង​រ៉ែ និង​ក្រសួង​ពាណិជ្ជកម្ម ឬ​យ៉ាងណា។ មន្រ្តី​បន្ត​ផ្សព្វផ្សាយ​ដល់​ប្រជា​នេសាទ​ពីការប្រើប្រាស់មធ្យោបាយផ្ទុកប្រេងសាំងក្នុង​ប៊ីដុង ឬកាន ក្នុង​កម្រិត​ចំណុះ​មាន​សុវត្ថិភាព និងធានាការពារកុំឲ្យមាន​ហានិភ័យ​ឆាបឆេះ​ធ្វើ​ឲ្យ​ខូចខាត​ដល់​ទ្រព្យសម្បត្តិ ឬ​អាយុជីវិតផ្ទាល់ខ្លួន និងការរស់នៅរបស់ប្រជាជនក្នុងមូលដ្ឋាន។ ករណី​ពិនិត្យ​ឃើញ​ថា មានបញ្ហា​ប្រឈម​ពាក់ព័ន្ធ​នឹង​ការ​ផ្គត់ផ្គង់​ប្រេង និង​ឧស្ម័ន​ឥន្ធនៈ និង​មាន​ការ​ដំឡើង​ថ្លៃ ខុស​ប្រក្រតី នឹង​រាយការណ៍​ជា​បន្ទាន់​មក អគ្គលេខាធិការដ្ឋាន នៃ​ក្រសួង​កសិកម្ម រុក្ខា​ប្រមាញ់ និង​នេសាទ ដើម្បី​មាន​វិធានការ​កម្រិត​ថ្នាក់​ជាតិ៕

អត្ថបទ ៖ សិរីវឌ្ឍន:

The post ប្រេងសាំងឡើងថ្លៃ អ្នកនេសាទខេត្តកោះកុងមួយចំនួន បង្ខំចិត្តមិនចេញទូកទៅសមុទ្រ appeared first on Kampuchea Thmey Daily.

រដ្ឋបាលខេត្តកោះកុង ស្រង់សម្ដីលោកស្រីអភិបាលខេត្តផ្សព្វផ្សាយលើទំព័រហ្វេសប៊ុកផ្លូវការដូច្នេះ​៖« អាជ្ញាធរ នឹងសមត្ថកិច្ចគ្រប់ថ្នាក់កំពុងធ្វើការដោះស្រាយ ហើយសូមរក្សាការសម្ងាត់ ព័ត៌មានមួយចំនួនដែលជាកិច្ចការជំនាញ។ នាងខ្ញុំសង្ឃឹមថា បងប្អូនទាំង៤នាក់ នឹងអាចវិលត្រលប់មក លំនៅឋានវិញក្នុងពេលឆាប់ៗខាងមុខនេះ។ សូមបងប្អូនមានទំនុកចិត្តនិងជឿជាក់លើការខិតខំយកចិត្តទុកដាក់របស់ថ្នាក់ដឹកនាំយើង។»។

គួរគូសបញ្ជាក់ថា កងទ័ពជើងទឹកថៃ នៅម៉ោង១១៖៣០នាទីព្រឹក ថ្ងៃទី៦ ខែមករា ឆ្នាំ២០២៦ បានចាប់យកទូកនេសាទប្រជាពលរដ្ឋខ្មែរ១គ្រឿង   ដែលមានពលរដ្ឋខ្មែរចំនួន៤នាក់ កំពុងនេសាទ​នៅក្បែរនឹងឆ្នេរកោះយ៉ នៅលើផ្ទៃព្រំដែនសមុទ្រកម្ពុជា-ថៃ ដែលមិនទាន់ថមថយកម្ដៅជម្លោះ។

លោកស្រីអភិបាលខេត្តកោះកុង ក៏បានអំពាវនាវប្រជានេសាទត្រូវនេសាទនៅតំបន់ជិតៗក្នុងដែនសមុទ្ររបស់កម្ពុជា ដោយត្រូវចៀសវាងការចូលទៅនេសាទជ្រៅ ដែលអាចធ្វើឱ្យភាគីថៃចោទប្រកាន់ថាប្រជានេសាទកម្ពុជាចូលនេសាទក្នុងដែនគ្រប់គ្រងរបស់គេ។ លោកស្រីអភិបាលខេត្តសង្កត់ធ្ងន់ដូច្នេះ៖«ក្នុងស្ថានភាពបែបនេះ សូមបងប្អូនចូលរួមទាំងអស់គ្នា កុំធ្វើអ្វីដែលបង្កឱ្យគេចោទប្រកាន់យើងបាន។ »។

ជាមួយគ្នានេះ លោកស្រី ឈី វ៉ា ក៏អំពាវនាវឱ្យអ្នកប្រើប្រាស់បណ្ដាញសង្គមត្រូវផ្សព្វផ្សាយព័ត៌មានតាមបណ្តាញសង្គមដោយប្រុងប្រយ័ត្ន ពីព្រោះបើផ្សព្វផ្សាយមិនបានសមស្រប នឹងបង្កផលលំបាកដល់ប្រជានេសាទដែលត្រូវភាគីថៃចាប់ ប្រឈមនឹងការអនុវត្តវិធានការផ្នែកផ្លូវច្បាប់ពីសំណាក់អាជ្ញាធរថៃជាក់ជាមិនខាន។

 លោកស្រី សង្កត់ធ្ងន់ថា៖« កុំបង្កើតព័ត៌មានក្លែងក្លាយ ជាព័ត៌មានមិនពិតមានលក្ខណៈញុះញង់បង្កចលាចល ព្រោះវាមិនបានជួយអ្វីដល់ការរកដំណោះស្រាយនោះទេ។»៕

ដោយ៖ ង៉ិល ណារ៉ាត់

The post កម្ពុជាកំពុងធ្វើការជាមួយថៃជំរុញឱ្យដោះលែងមកវិញឆាប់រហ័សនូវអ្នកនេសាទ៤រូបដែលទ័ពជើងទឹកថៃចាប់ទៅ appeared first on Kampuchea Thmey Daily.

លោក ស្រី សំវិចិត្រ ប្រធានខណ្ឌជលផលស្ទឹងត្រែងបានបញ្ចាក់ថា៖ ការហាមប្រាមបែបនេះ មានគោលបំណងថែរជីវិតត្រីមេពូជធំៗដែលកំពូងរស់នៅ ព្រោះវា និងបន្តពូជពង្ស ពងកូនឱ្យសម្បូរបែបឡើងវិញ ព្រោះកាលពីដើមខែតុលាយើងរកឃើញត្រីមេពូជមួយប្រភេទឈ្មោះត្រីប៉ាកាណាកមានទម្ងន់ជាង៥គីឡូក្រាម ដែលជាប្រភេទត្រីកំពុងរង និងការផុតពូជផងដែរ។

លោកបន្តថា៖ នៅតាមអន្លុងហាមឃាត់ទាំងនេះបងប្អូនអ្នកនេសាទមានតួនាទីជួយការពារព្រោះវាជាធនធានរបស់យើងទាំងអស់គ្នា សូមកុំចូលទៅនេសាទ ហើយបែរមកជួយរាយការណ៍ពីបទល្មើសមកមន្ត្រីជំនាញផងប្រសិនបើជួបប្រទះ សូមបងប្អូនកុំទៅនេសាទនៅក្នុងកន្លែងអភិរក្សឬក៏អន្លង់អភិរក្សនិងតំបន់ហាមឃាត់ផ្សេងៗទៀត។ 

ទោះជាឧបករណ៍ជាប្រភេទលក្ខណៈគ្រួសារក្តីក៏នៅតែខុសច្បាប់ដែរ ក្នុងករណីដែលបងប្អូននៅតែបន្តការនេសាទ នៅកន្លែងហាមឃាត់គឺកម្លាំងខណ្ឌរដ្ឋបាលជលផលក៏ដូចជាកម្លាំងឆ្នាំទន្លេ ឬក៏បរិស្ថានុរក្ស និងកម្លាំងសហគមន៍និងធ្វើការដកហូត យកឧបករណ៍ទាំងអស់នោះ រួមផ្សំនឹងមធ្យោបាយផង ដើម្បីរក្សាទុកបណ្ដោះអាសន្ន ឬក៏បំផ្លាញចោលនូវវត្ថុតាងមួយចំនួនដែលបង្កផលប៉ះពាល់ដល់ធនធានជលផល។

លោក ជួប ផល្លា ប្រធានប្រចាំស្នាក់ការកំបោរ អភិរក្សត្រីមេពូជ ទន្លេមេគង្គលើបានបញ្ជាក់ថា៖ក្នុងរយៈពេល១៥០ថ្ងៃកន្លងមកកម្លាំងចម្រុះបានបើកយុទ្ធនាការការពារត្រីមេពូជ ក្នុងរដូវបិទនេសាទ ឆ្នាំ២០២៣បង្ក្រាបបទល្មើសឆក់បាន​ចំនូន៤ករណី និងបានកសាងសំណុំរឿងបញ្ជូនទៅតុលាការ ក្នុងនោះបញ្ជូនជនសង្ស័យចំនួន ០៣នាក់ ទៅពន្ធនាគារ និងម្នាក់គេចខ្លួន។

លោកបន្តថា ជាមួយគ្នានេះបានដកហូតវត្ថុតាំងពីបទល្មើសមាន ទូកម៉ាស៊ីនចំននួន ០៤គ្រឿង, ថ្នងដងត្រី ០៤គ្រឿង, ក្បាលឆក់ ០៣គ្រឿង និងអាគុយ ០១គ្រឿង។

គួរំលឹកដែរថា៖ ក្នុងរដូវបិទនេសាទ១៥០ថ្ងៃខណ្ឌជលផល ដកហូតបាន ប្រវែង ៣៦.៩៤០ម៉ែត្រ, សន្ទូចរនង ចំនួន ៦.៨៩៨ផ្លែ និងលូស្បៃមុងប្រវែង ៥០០ម៉ែត្រ។

អាជ្ញាធរបានអប់រំប្រជានេសាទដាក់មងបណ្តែត ក្នុងអន្លុងអភិរក្សបានចំនួន ២១១ នាក់ និងឱ្យធ្វើកិច្ចសន្យាបានចំនួន ៥៦នាក់ និងអាជីវករប្រមូលទិញត្រី ដែលបានពីការនេសាទខុសច្បាប់ ឬប្រើឧបករណ៍ខុសច្បាប់បានចំនួន ០៨នាក់។

សូមបញ្ជាក់ថា៖កន្លែងអភិរក្សធនធានជលផល នៅទន្លេមេគង្គលើក្នុងខេត្តស្ទឹងត្រែង ក្នុងអន្លុងទាំង ៧៩ កន្លែង មន្ត្រីខណ្ឌជលផលបានបោះពោងបាន ១៦កន្លែង ស្មើនឹង ៥៧ ពោង និងបោះបង្គោលព្រំប្រទល់កន្លែងអភិរក្សជលផលចំនួន ០១ បង្គោលបន្ថែមទៀត ដើម្បីធ្វើជាសញ្ញាហាមឃាត់៕

អត្ថបទ៖ ងិនលីម

The post ហាមពលរដ្ឋចូលនេសាទនៅអន្លុងអភិរក្សចំនួន ៧៩ កន្លែងតាមដងទន្លេមេគង្គ appeared first on Kampuchea Thmey Daily.

លោក ថា ប្រជានេសាទ អាចរកបានក្តាមសេះ ក្នុងមួយថ្ងៃពីចន្លោះ៣០ ទៅ៥០គីឡូក្រាម សម្រាប់ទូកមធ្យម ខណៈតម្លៃលក់ទៅឱ្យឈ្មួញកណ្តាល បានតម្លៃពី២០,០០០រៀល ទៅ២៥,០០០រៀល សម្រាប់តម្លៃម៉ៅសរុប។

លោក សុខ ញ៉ាង បន្តថា អ្នកនេសាទនៅភូមិអួរក្រសារ ឃុំអូរក្រសារ ក្រុងកែប ខេត្តកែប លើកឡើងថា ការនេសាទនៅក្នុងរដូវវស្សាទទួលបានផលច្រើនជាងរដូវប្រាំង នៅរដូវវស្សាអាចរកក្តាមបានក្នុងមួយថ្ងៃ ៣០គីឡូក្រាម ទៅ៥០គីឡូក្រាម ឬលើសពីនេះ សម្រាប់ក្តាមសេះ។ ប៉ុន្តែទោះជាយ៉ាងណា ក៏ដោយការរកផលសមុទ្រនៅរដូវវស្សាមិនងាយស្រួលប៉ុន្មាននោះទេ។

ជាមួយគ្នានោះដែរ ឈ្មួញកណ្តាលមួយរូប បានសុំមិនបញ្ជេញឈ្មោះដែលកំពុងប្រមូលទិញក្តាមនៅកំពង់ទូកក្បែរផ្សារក្តាម បានបញ្ជាក់ឱ្យដឹងថា នៅពេលដែលប្រមូលទិញក្តាមពីប្រជានេសាទរួចហើយ គាក់យកក្តាមទាំងនោះ ទៅបែងចែកទៅតាមទំហំរបស់វា ក្នុងនោះសម្រាប់ក្តាមលេខ១ លក់បាន៦ម៉ឹនរៀលក្នុង១គឺឡូ រីឯក្តាមលេខ២ និងលេង៣ លក់បានចន្លោះពី ៣ម៉ឺនរៀល ទៅ៥ម៉ឹនរៀលក្នុង១គីឡូក្រាម៕

អត្ថបទ៖ សឹង រ៉ាត់

The post ប្រជានេសាទថា រដូវវស្សាអាចរកក្តាមសេះបានច្រើនជាងពេលណាៗ តែប្រឈមនឹងអាកាសធាតុ appeared first on Kampuchea Thmey Daily.

សម្រែកទាមទាររបស់ប្រជានេសាទភូមិស្រែថ្មី និងភូមិស្រែត្រាវ ត្រូវបានគេមើលឃើញថា មាន្រសិទ្ធភាពជាងមុនឆ្ងាយ ដោយមានការចាត់តាំងរបស់លោកស្រី មិថុនា ភូថង អភិបាលខេត្ត ណែនាំដល់អភិបាលរងខេត្ត ព្រមទាំងអ្នកពាក់ព័ន្ធចុះដោះស្រាយភ្លាមៗ។

លោកស្រី អ៉ី នារីនេត អភិបាលរងខេត្តកោះកុង ថ្លែងក្នុងកិច្ចប្រជុំបន្ទាន់មួយរវាងប្រជានេសាទ និងម្ចាស់ស៊ុមគ្រែងឈាមដែលរងការចោទប្រកាន់ថា បានពង្រីកទំហំអាជីវកម្មស៊ុមគ្រែងថា បញ្ហានេះមិនមែនជាថ្មីនោះទេ ពោលវាបានកើតយូរឆ្នាំមកហើយ ព្រោះតែមិនបានកំនត់ដែនទឹកសម្រាប់ការអាស្រ័យផលរួមគ្នាទើបបង្កជាជម្លោះមិនចេះចប់មិនចេះហើយបែបនេះ។

លោកស្រីអភិបាលរងខេត្ត ក៏បានសុំចិត្តដល់ប្រជានេសាទទាំងអស់រៀនចេះគោរពស្រឡាញ់យោគយល់គ្នាទៅវិញទៅមកអំពីការប្រមូលគ្រែងឈាមនេះប្រកបដោយតម្លាភាព ចៀសវាងបន្តពង្រីកបង្គោលស៊ុមគ្រែងឈាមលើផ្ទៃរបស់រដ្ឋបន្ត។ ទន្ទឹមនោះ លោកស្រីដឹកនាំក្រុមការងារជំនាញចុះចុចនិយាមកាផែនទី ដើម្បីកំនត់ដែននេសាទឱ្យច្បាស់លាស់ជាងមុនសំដៅដល់ការបញ្ចប់ទំនាស់ឈរលើនយោបាយឈ្នះឈ្នះក្រៅប្រព័ន្ធតុលាការ។

រដ្ឋបាលខេត្តកោះកុង មន្ទីរកសិកម្ម និងរដ្ឋបាលស្រុកបូទុមសាគរ បានសុំដកអូសស៊ុមគ្រែងរបស់លោក ផល្លី ដែលមានទំហំជាង៦ហិចតា ដោយកាត់៤ហិចតាចេញទៅឱ្យប្រជានេសាទទុកអាស្រ័យរួមគ្នា ព្រោះទំនាស់កើតចេញពីការច្រណែនគ្នា។

ប្រជានេសាទចំនួន២០០គ្រួសារនៅឃុំថ្មស កាលពីថ្ងៃទី២៤ ខែសីហា ឆ្នាំ២០២៣ ថ្មីៗនេះ លើកគ្នាមកមុខសាលាខេត្តកោះកុង សុំប្តឹងទៅលោកជំទាវអភិបាលខេត្ត អំពីបាតុភាពមិនល្អមួយចំនួនរឿងវិវាទការទទួលផលគ្រែងឈាមមិនស្មើគ្នា។

លោកស្រី ណាវី និង សៀត សុខន តំណាងប្រជានេសាទមកពីភូមិស្រែថ្មី និងភូមិស្រែត្រាវ ឃុំថ្មស ដាក់ញ្ញាត្តិសុំប្តឹងដកប្រធានសហគមន៍ និងមន្រ្តីជលផលដែលមានទីស្នាក់នៅក្នុងភូមិស្រែថ្មី ដោយពួកគាត់ចោទថាបានបើកដៃឱ្យអ្នកមាន​លុយបោះបង្គោលវាទយកដែននេសាទធ្វើជាកម្មសិទ្ធិពីបុគ្គលឈ្មោះ ផល្លី រស់នៅក្នុងភូមិស្រែត្រាវ ក្រោមរូបភាពថាចិញ្ចឹមគ្រែងឈាមធ្វើឱ្យដែននេសាទក្នុងសហគមន៍កាន់តែរួមតូចទៅៗប៉ះពាល់ដល់កត្តាជីវភាពរបស់ពួកគាត់។

ទម្រង់អាជីវកម្មពង្រីកស៊ុមគ្រែងឈាមលើផ្ទៃសមុទ្រស្ថិតនៅក្នុងមូលដ្ឋានឃុំថ្មស ពុំមានមន្ទីរស្ថាប័នណាចេញច្បាប់អនុញ្ញាត្តនោះទេ ដូច្នេះការមានទំនាស់គ្នារវាងប្រជានេសាទនិងប្រជានេសាទដូចគ្នាសុទ្ធតែខុសច្បាប់ទាំងអស់។ ប៉ុន្តែមើលឃើញពីជីវភាពរស់នៅមិនដឹងពួកគាត់ទៅប្រកបមុខរបរអ្វីក្រៅពីនេសាទ ក៏រដ្ឋបាលខេត្ត និងមន្ទីរជំនាញ រមែងតែមានការយោគយល់ពីមនោសញ្ចេតនាសម្រាប់ការអាស្រ័យផល។

លោក អ៉ី ម៉េងលាង ពន្យល់ទៀតថា ការនេសាទខ្យងស និងពង្រីកស៊ុមគ្រែងឈាម រដ្ឋបាលជលផលស្រុកបូទុមសាគរតែងចុះបង្រ្កាបទប់ស្កាត់ជាប្រចាំការ ពិេសសមេឈ្នួញដែលឃុបឃិតទិញលក់នាំចេញទៅក្រៅខេត្ត ឬទៅប្រទេសជិតខាង។ លោកបន្តថា ពេលតាមដានបង្រ្កាបឈ្នួញ បែរជាប្រជានេសាទនិយាយចង់សម្លាប់ដោយនេសាទបានហើយមិនដឹងលក់នៅណា លុះដល់ពេលមិនបង្រ្កាបរិះគន់មកកាន់មន្រ្តីជំនាញថាមិនបង្រ្កាបទៅវិញ។ តែទោះយ៉ាងណា លោកជឿជាក់ថា ទំនាស់បញ្ហាខាងលើនឹងត្រូវបានបញ្ចប់ ក្រោយកំណត់ដែននេសាទច្បាស់លាស់ជំនួសមកវិញនូវការស់នៅសុខុមរមនាក្នុងមូលដ្ឋាន។

ចំពោះលោក ក្រូច សីហា អភិបាលស្រុកបូទុមសាគរ ឯកភាពចំពោះចំណាត់ការរដ្ឋបាលខេត្ត និងមន្ទីរជំនាញ ដោយលោកយល់ថា ចាំបាច់ត្រូវតែមានការកំណត់តំបន់ជាឡូតិ៍ និងដាក់ឈ្មោះប្រជានេសាទកុំឱ្យបន្តទន្រ្ទានវាទទីបន្ថែមដែលនាំឱ្យបញ្ហាកើតមានមិនចេះឈប់មិនចេះឈរ ដោយ១គ្រួសារអាចទទួលបាន១ហិចតាកន្លះសម្រាប់មើលថែចិញ្ចឹមគ្រែងឈាមរបស់ខ្លួន។

លោកអភិបាលស្រុកបូទុមសាគរ មើលឃើញថា នៅពេលបានដោះស្រាយបែបនេះហើយ ការរស់នៅប្រមូលគ្រែងឈាមរបស់ប្រជានេសាទនឹងស្ងប់ចិត្ត និងឈប់ច្រណែនគ្នា៕

អត្តបទ៖ សិរីវឌ្ឍនៈ

The post វិវាទទំនាស់នេសាទគ្រែងឈាមនៅឃុំថ្មស ត្រូវបានអាជ្ញាធរកំណត់ដែនជាថ្មី appeared first on Kampuchea Thmey Daily.

លោក ចេង មុនីរិទ្ធិ អភិបាលស្រុកគិរីសាគរ បានប្រាប់កម្ពុជាថ្មីនៅរសៀលថ្ងៃទី ២២ ខែមេសានេះថា បន្ទាប់ពីទទួលបានការរាយការពីវត្តមានទូកនេសាទទាំង២គ្រឿង ចូលមកក្នុងមូលដ្ឋាន អាជ្ញាធរសមត្ថិកច្ចក៏ចុះត្រួតពិនិត្យ ដោយរកឃើញអ្នកនេសាទទាំង ១៤ នាក់ទើបមកនេសាទក្បែរព្រំដែនទឹកកម្ពុជា-ថៃ នៅព្រឹកថ្ងៃនេះ។

អាជ្ញាធរដាក់កំហិតហាមប្រាមដាច់ខាតពុំអនុញ្ញាតឱ្យពួកគេឡើងលើគោកចូលភូមិកោះស្តេចទេ ពោលគឺតម្រូវអនុវត្តសុខាភិបាលទប់ស្កាត់ជំងឺកូវីដឆ្លងចូលសហគមន៍ជាមុនសិន។ ទោះបីជាពួកគេជាពលរដ្ឋរស់នៅក្នុងភូមិកោះស្តេចក៏ដោយចុះ។

លោក ចេង មុនីរិទ្ធិ បានចាត់ឱ្យលោកដឹកនាំដោយលោក ទួន ឪទី អភិបាលរងស្រុកបញ្ជាប្រាប់ពួកគេចតទូកមុខកោះស្តេច​បណ្តោះអាសន្ន គឺរង់ចាំ ក្រុមការងារខេត្តចុះមកយកសំណាកធ្វើតេស្តរកវីរុសកូវីដ១៩។

ក្រោយពីយកសំណាកទៅ លោក ចេង មុនីរិទ្ធិ ក៏កំពុងពិភាក្សាបន្ថែមជាមួយថ្នាក់ដឹកនាំ និងក្រុមការងារជំនាញខេត្តថាតើត្រូវដឹកជញ្ចូនពួកគេទៅធ្វើចត្តាឡីស័កនៅមណ្ឌលចត្តាឡីស័កទីរួមខេត្តឬឱ្យស្នាក់នៅលើទូក។ ហើយ១៤ថ្ងៃ៕

អត្ថបទៈ សិរីវឌ្ឍនៈ

The post អាជ្ញាធរកោះកុងឃាត់អ្នកនេសាទ១៤នាក់សង្ស័យទើប​វិលត្រឡប់មកពីប្រទេសថៃ appeared first on Kampuchea Thmey Daily.

​ជនរងគ្រោះ​រស់នៅ​ភូមិ​ព្រៃ​ផ្គាំ​(​គ​) ស្រុក​អង្គរបុរី ខេត្តតាកែវ ត្រូវ​បាន​ក្រុម​មន្ត្រីជលផល​ដឹកយក​ទៅកាន់​មន្ទីរពេទ្យបង្អែក​ខេត្តតាកែវ ក្រោយពី​រងរបួស​យ៉ាងធ្ងន់ធ្ងរ ដោយ​ក្រុម​មន្ត្រីជលផល ​ដែល​ដឹកនាំ​ដោយ​លោក គឹម សារិទ្ធ និយាយ​ថា ជនរងគ្រោះ​បាន​ជួប​គ្រោះថ្នាក់​ចរាចរណ៍ ដោយ​ទូក​ជនរងគ្រោះ​បាន​បុក​ជាមួយ​ទូក​មន្ត្រីជលផល នៅ​ចំណុច​កោះ​អញ្ចាញ ស្ថិតក្នុង​ឃុំ​ទ្រា ស្រុក​សំរោង កាលពី​យប់​ថ្ងៃទី​៦ ខែមករា ឆ្នាំ​២០២១​។ លុះ​បញ្ជូន​ទៅដល់​មន្ទីរពេទ្យ​បង្អែក​ខេត្តតាកែវ ក៏បាន​ទូរសព្ទ​ឲ្យ​ក្រុម​គ្រួសារ​ទៅ​មើល​ជនរងគ្រោះ​ នៅ​មន្ទីរពេទ្យ តែ​ដោយ​ស្ថានភាព​ជនរងគ្រោះ​ធ្ងន់ធ្ងរ​ពេក ទើប​ក្រុម​គ្រួសារ​បញ្ជូន​ជនរងគ្រោះ​បន្ត​មកកាន់​មន្ទីរពេទ្យ​កាល់​ម៉ែត្រ​រាជធានី​ភ្នំពេញ​។

ក្រោយ​ការព្យាយាម​ជួយសង្គ្រោះ​ពី​សំណាក់​ក្រុមគ្រូពេទ្យ​មួយរយៈ គ្រូពេទ្យ​ក៏បាន​ឲ្យ​ក្រុម​គ្រួសារ​យក​ជនរងគ្រោះ​ត្រឡប់​មកផ្ទះ​វិញ ព្រោះតែ​អស់​លទ្ធភាព​ព្យាបាល ដោយសារ​ជនរងគ្រោះ​មាន​ឈាមកក​ក្នុង​ខួ​រក្បាល និង​បាន​ស្លាប់​បាត់​បង់ជីវិត​ពេល​ដឹក​មកដល់​ផ្ទះ​។

ចំពោះ​ករណីនេះ លោក ជីវ ចាន់​តារា ព្រះរាជអាជ្ញា​អម​សាលាដំបូង​ខេត្តតាកែវបាន​បញ្ជាក់​ថា លោក​បានស្នើ​ដល់​ស្នង​ការរង​ទទួល​ផែន​ព្រហ្មទណ្ឌ នៃ​ស្នងការ​នគរបាល​ខេត្ត​តាកែវ បើក​ការស៊ើបអង្កេត​បឋម ចំពោះ​ករណី​នេះ​ហើយ​៕

អត្ថបទ៖ វីរៈ

សូមចុចអាន៖ ​សំណុំរឿង​មន្ត្រី​ជលផល​ប្រើ​ហិង្សា​លើ​ពលរដ្ឋ ពេលនេះ​ធ្លាក់​ដល់ដៃ​តុលាការ​ហើយ

The post ជនរងគ្រោះ​រងហិង្សា​ពី​មន្ត្រីជលផល​ បាន​​​ស្លាប់​ទៅ​ហើយ ក្រោយ​ត្រឡប់​មកពី​មន្ទីរពេទ្យ appeared first on Kampuchea Thmey Daily.

​សំណុំរឿង​មួយ​នេះ គ្រួសារ​ជនរងគ្រោះ​បាន​ប្តឹង​លោក គឹម សារិទ្ធ នាយរង​អធិការកិច្ច​ចតុមុខ និង​បក្ខពួក​ចំនួន​៩​នាក់​ផ្សេងទៀត ថា​បាន​ប្រើ​ហិង្សា​ដោយ​វាយដំ​ជនរងគ្រោះ នៅ​ពេល​ក្រុម​មន្ត្រី​ជលផល​ទាំងនេះ​បាន​បើក​ប្រតិបត្តិ​ការ​បង្ក្រាប​បទល្មើស​នេសាទ កាលពី​យប់​ថ្ងៃទី​៦ ខែ​មករា ឆ្នាំ​២០២១ នៅ​ចំណុច​កោះ​អញ្ចាញ ក្នុង​ឃុំ​ទ្រា ស្រុក​សំរោង ខេត្ត​តាកែវ​។

​តាម​ការ​រៀប​រាប់​រប​ស់បង​ថ្លៃ​ជនរងគ្រោះ​ថា នៅ​យប់​កើតហេតុ​នោះ ជនរងគ្រោះ​ឈ្មោះ ភឹម វី អាយុ​៤០​ឆ្នាំ រស់នៅ​ភូមិ​ព្រៃ​ផ្គាំ​(​គ​) ស្រុក​អង្គរបុរី ខេត្តតាកែវ និង​អ្នកភូមិ​ចំនួន​២​នាក់​ទៀត បានចេញ​ទូក​ទៅ​ឆក់​ត្រី​នៅ​ចំណុច​កោះ​អញ្ចាញ ស្ថិតនៅក្នុង​ឃុំ​ទ្រា ស្រុក​សំរោង ហើយ​នៅពេលនោះ ក៏មាន​ទូក​របស់​មន្ត្រីជលផល មាន​មនុស្ស​ចំនួន​១០​នាក់ ដឹកនាំ​ដោយ​លោក គឹម សារិទ្ធ នាយរង​អធិការកិច្ច​ចតុមុខ បាន​មក​ដល់​ពេលនោះ អ្នកភូមិ​២​នាក់​ដែល​ទៅជា​មួយ​ក៏បាន​លោត​ចូល​ទឹក ហើយក៏​រត់​រួច ដោយ​នៅសល់តែ​ជនរងគ្រោះ​ត្រូវបាន​មន្ត្រីជលផល និង​បក្ខពួក​វាយ​បណ្តាល​ឲ្យ​រងរបួស​ធ្ងន់ ទើប​គេ​ក៏​បញ្ជូន​ទៅកាន់​មន្ទីរពេទ្យបង្អែក​ខេត្តតាកែវ និង​បាន​ទូរស័ព្ទ​ឲ្យ​ក្រុមគ្រួសារ​ទៅ​មើល​ជនរងគ្រោះ​នៅ​មន្ទីរពេទ្យ ហើយដោយ​ស្ថានភាព​ជនរងគ្រោះ​ធ្ងន់ធ្ងរ​ពេក ទើប​ក្រុមគ្រួសារ​បញ្ជូន​ជនរងគ្រោះ​បន្ត​មកកាន់​មន្ទីរពេទ្យ​កាល់​ម៉ែត្រ​ក្នុង​រាជធានី​ភ្នំពេញ​។​ រហូតមកដល់​ពេលនេះ ជនរងគ្រោះ​នៅ​មិនទាន់​ដឹងខ្លួន​នៅឡើយ​ទេ ហើយ​ក្រុមគ្រូពេទ្យ​ក៏​អស់​លទ្ធភាព​ព្យាបាល​ដែរ ដោយ​ឲ្យ​ក្រុមគ្រួសារ​យក​ជនរងគ្រោះ​មក​ផ្ទះ​វិញ ព្រោះតែ​ជនរងគ្រោះ​មាន​ឈាមកក​នៅ​ក្នុង​ខួរក្បាល​។ តែ​យ៉ាងណាក៏ដោយ ចំពោះ​ករណី​នេះ លោក គឹម សារិទ្ធ បានធ្វើ​ការបដិសេធ ដោយ​ថា ករណី​នេះ គឺជា​ករណី​គ្រោះថ្នាក់​ចរាចរណ៍ ទូក​បុក​គ្នា​នោះ​ទេ​៕

អត្ថបទ៖ វីរៈ

សូមចុចអាន៖ ​ជនរងគ្រោះ​ត្រូវពឹង​អ្វី​? បើ​នគរបាល​មិនអាច​បើក​ការស៊ើបអង្កេត​បាន​ ករណី​មន្ត្រី​ជលផល វាយ​ពលរដ្ឋ​របួសធ្ងន់​

The post សំណុំរឿង​មន្ត្រី​ជលផល​ប្រើ​ហិង្សា​លើ​ពលរដ្ឋ ពេលនេះ​ធ្លាក់​ដល់ដៃ​តុលាការ​ហើយ appeared first on Kampuchea Thmey Daily.