អាជ្ញាធរកោះកុងឃាត់អ្នកនេសាទ១៤នាក់សង្ស័យទើប​វិលត្រឡប់មកពីប្រទេសថៃ

អាជ្ញាធរស្រុកគិរីសាគរ ខេត្តកោះកុង បានធ្វើការឃាត់ទុក២គ្រឿង និងក្រុមអ្នកនេសាទចំនួន ១៤ នាក់មិនឱ្យពួកគេចូលចតនៅកំពង់ផែ ដោយសង្ស័យអ្នកទាំងនោះទើបមកពីប្រទេសថៃ។

លោក ចេង មុនីរិទ្ធិ អភិបាលស្រុកគិរីសាគរ បានប្រាប់កម្ពុជាថ្មីនៅរសៀលថ្ងៃទី ២២ ខែមេសានេះថា បន្ទាប់ពីទទួលបានការរាយការពីវត្តមានទូកនេសាទទាំង២គ្រឿង ចូលមកក្នុងមូលដ្ឋាន អាជ្ញាធរសមត្ថិកច្ចក៏ចុះត្រួតពិនិត្យ ដោយរកឃើញអ្នកនេសាទទាំង ១៤ នាក់ទើបមកនេសាទក្បែរព្រំដែនទឹកកម្ពុជា-ថៃ នៅព្រឹកថ្ងៃនេះ។

អាជ្ញាធរដាក់កំហិតហាមប្រាមដាច់ខាតពុំអនុញ្ញាតឱ្យពួកគេឡើងលើគោកចូលភូមិកោះស្តេចទេ ពោលគឺតម្រូវអនុវត្តសុខាភិបាលទប់ស្កាត់ជំងឺកូវីដឆ្លងចូលសហគមន៍ជាមុនសិន។ ទោះបីជាពួកគេជាពលរដ្ឋរស់នៅក្នុងភូមិកោះស្តេចក៏ដោយចុះ។

លោក ចេង មុនីរិទ្ធិ បានចាត់ឱ្យលោកដឹកនាំដោយលោក ទួន ឪទី អភិបាលរងស្រុកបញ្ជាប្រាប់ពួកគេចតទូកមុខកោះស្តេច​បណ្តោះអាសន្ន គឺរង់ចាំ ក្រុមការងារខេត្តចុះមកយកសំណាកធ្វើតេស្តរកវីរុសកូវីដ១៩។

ក្រោយពីយកសំណាកទៅ លោក ចេង មុនីរិទ្ធិ ក៏កំពុងពិភាក្សាបន្ថែមជាមួយថ្នាក់ដឹកនាំ និងក្រុមការងារជំនាញខេត្តថាតើត្រូវដឹកជញ្ចូនពួកគេទៅធ្វើចត្តាឡីស័កនៅមណ្ឌលចត្តាឡីស័កទីរួមខេត្តឬឱ្យស្នាក់នៅលើទូក។ ហើយ១៤ថ្ងៃ៕

អត្ថបទៈ សិរីវឌ្ឍនៈ