អ្នកឧកញ៉ា លឹម ហេង Archives - Kampuchea Thmey Daily

អ្នកឧកញ៉ា លឹម ហេង៖ សូមកុំឲ្យ “ច្រកចេញចូលតែមួយ” ក្លាយជា “ច្រកជាប់គាំងតែមួយ”

Dy Bunnara — Sat, 02 May 2026 08:40:35 +0000

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងកត់សម្គាល់ពីភាពស្មុគស្មាញនៃប្រព័ន្ធការិយាធិបតេយ្យ លើការស្នើដាក់ឯកសារតាមប្រព័ន្ធអនឡាញ និងការទាមទារសេវាក្រៅផ្លូវការ។

នៅក្នុងវេទិកាសារព័ត៌មានលើប្រធានបទ «AI ក្រមសីលធម៌ និងវិជ្ជាជីវៈ៖ តើយើងគួរដើរទៅមុខដោយរបៀបណា?» ដែលរៀបចំឡើងកាលពីព្រឹកថ្ងៃទី ១ ខែឧសភា ឆ្នាំ២០២៦ នៅមជ្ឈមណ្ឌលអភិវឌ្ឍធុរកិច្ច (BDC) អ្នកឧកញ៉ា លឹម ហេង បានរៀបរាប់ពីប្រព័ន្ធការិយាធិបតេយ្យនៅកម្ពុជា និងស្នើឱ្យមានដំណោះស្រាយប្រកបដោយប្រសិទ្ធភាព។

លោកបញ្ជាក់ថា វិស័យឯកជនតែងតែប្រឈមមុខនឹងបញ្ហានៅពេលមានរដ្ឋមន្ត្រីថ្មីឡើងកាន់តំណែង ដែលជារឿយៗតែងតែបង្កើតបញ្ហា និងភាពស្មុគស្មាញថ្មីៗ។

អ្នកឧកញ៉ា លឹម ហេង បានប្រដូច ”ច្រកចេញចូលតែមួយ” បានក្លាយជា “ច្រកជាប់គាំងតែមួយ” ទៅវិញ ខណះការផ្តល់សេវាតាមអនឡាញត្រូវបានជំរុញ តែការអនុវត្តជាក់ស្តែងហាក់គ្មានប្រសិទ្ធភាព។

ក្នុងឱកាសនោះ អ្នកឧកញ៉ាក៏លើកឡើងពីបញ្ហាតម្លៃសេវាសាធារណៈដែលវិស័យឯកជនទាមទារឱ្យមានការកំណត់តម្លៃឱ្យបានច្បាស់លាស់ ដើម្បីកុំឱ្យខាតពេលរត់ការពីការិយាល័យមួយទៅការិយាល័យមួយ។

បន្ថែមពីនេះ អ្នកឧកញ៉ាក៍ស្នើឲ្យមានតម្លាភាព និងភាពស្មោះត្រង់ រវាងមន្ត្រីជាអ្នកអនុវត្តច្បាប់ និងផ្នែកវិស័យឯកជន។ លោកចង់ឃើញការអនុវត្តបច្ចេកវិទ្យាដំណើរការបានរលូនពិតប្រាកដ ដោយមិនមានការរំខានឬបង្កការលំបាក។

អ្នកឧកញ៉ា លឹម ហេង បានបញ្ជាក់ថា លោកនឹងលើកយកបញ្ហាទាំងអស់នេះទៅជជែកបន្ថែមជាមួយអន្តរក្រសួងពាក់ព័ន្ធនានា ដើម្បីជំរុញឱ្យដំណើរការរដ្ឋបាលប្រព្រឹត្តទៅដោយរលូន៕

The post អ្នកឧកញ៉ា លឹម ហេង៖ សូមកុំឲ្យ “ច្រកចេញចូលតែមួយ” ក្លាយជា “ច្រកជាប់គាំងតែមួយ” appeared first on Kampuchea Thmey Daily.

បណ្តាពាណិជ្ជករថៃបង្វែរទិសនាំចូលទំនិញមកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក

Din Thary — Wed, 09 Jul 2025 06:52:09 +0000

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានលើកឡើងថាពាក់ព័ន្ធនិងការបិទព្រំដែនគោកទាំងអស់ជាមួយកម្ពុជា ជាឯកតោភាគីរបស់ភាគីថៃ បច្ចុប្បន្ននេះ សភាពការពាណិជ្ជកម្ម ក៏ដូចជាភាគីថៃ ជាពិសេសអ្នករកស៊ី បានបង្វែរទិសការនាំចូលទំនិញគ្រឿងឧបភោគបរិភោគដទៃទៀតមកកម្ពុជាទៅតាមផ្លូវទឹកវិញ លើកលែងតែប្រភេទទំនិញដែលកម្ពុជាបិទការនាំចូលពីថៃប៉ុណ្ណោះ។

ថ្លែងប្រាប់«កម្ពុជាថ្មី» នៅថ្ងៃទី០៩ ខែកក្កដា ឆ្នាំ២០២៥ លោក ប៉ែន សុវិជាតិ បានមានប្រសាសន៍ថា៖«ជាការពិតណាស់ការបិទព្រំដែនរវាងប្រទេសនីមួយៗ ការដឹកជញ្ជូនផ្លូវគោករវាងប្រទេសជិតខាង គឺមានតម្លៃថោកជាងការដឹកជញ្ជូនតាមផ្លូវទឹក ក៏ប៉ុន្តែបន្ទាប់ពីការបិទព្រំដែននៅតាមច្រកទាំង ៧ ព្រំដែនកម្ពុជា-ថៃ នេះមក សូមបញ្ជាក់ថា កម្ពុជាបិទនេះមិនមែនជាចេតនានោះទេ ក៏ប៉ុន្តែដោយសារតែភាគីថៃបិទព្រំដែនដោយខ្លួនឯងជាឯកតោភាគី»។

លោក បានមានប្រសាសន៍ថា តាមរយៈព័ត៌មានដែលទទួលបាន ខាងសមាគមពាណិជ្ជកម្មថៃ ក៏ដូចជាសភាពាណិជ្ជកម្មថៃ បានដាក់ញត្តិស្នើទៅកាន់រាជរដ្ឋាភិបាល ក៏ដូចជាយោធាថៃឱ្យមកចរចាជាមួយកម្ពុជាម្តងហើយម្តងទៀត ដើម្បីសុំបើកច្រកព្រំដែនទាំងអស់ជាមួយកម្ពុជាឡើងវិញ ដើម្បីដោះដូរសកម្មភាពពាណិជ្ជកម្មឡើងវិញ។ យ៉ាងណាមិញ ជុំវិញបញ្ហានេះ ជំហររបស់រាជរដ្ឋាភិបាលកម្ពុជា ថៃបានបិទជាឯកតោភាគី ដូច្នេះថៃមានកាតព្វកិច្ចត្រូវបើកឡើងវិញ ហើយកម្ពុជានឹងតាមក្រោយនៅរយៈពេល ៥ ម៉ោងក្រោយពីថៃបានបើកព្រំដែនឱ្យដំណើរការទាំងដូចដើមវិញ។

លោក ប៉ែន សុវិជាតិ បានបញ្ជាក់ថា «សូមជម្រាបថា សភាពការពាណិជ្ជកម្មនាពេលបច្ចុប្បន្ននេះ ទាំងភាគីថៃ ជាពិសេសអ្នករកស៊ីបានបង្វែរការនាំចូលទៅតាមផ្លូវទឹកវិញ ពីព្រោះកម្ពុជាបិទការនាំចូលពីថៃទាំងស្រុងទៅលើប្រភេទ ប្រេងឥន្ធនៈ ឧស្ម័ន អគ្គិសនី និងបន្លែ ផ្លែឈើប៉ុណ្ណោះ ហើយគ្រឿងឧបភោគបរិភោគដទៃទៀត នៅដំណើរការជាធម្មតា គឺដឹកជញ្ជូនតាមផ្លូវទឹកឆ្ពោះមកកម្ពុជាតាមកំពង់ផែក្រុងព្រះសីហនុ»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ក៏បានឱ្យ«កម្ពុជាថ្មី» ដឹងបន្ថែមថា រហូតមកដល់ពេលនេះទំនិញនាំចូលពីថៃដូចជាមិនទាន់មានការឡើងថ្លៃអ្វីគួរឱ្យកត់សម្គាល់នោះ គឺអាចឡើងថ្លៃទៅដោយមុខទំនិញមួយចំនួន ហើយកម្ពុជាយើងមានការខ្វះខាតលើបញ្ហាទឹកដោះគោជាដើម។

ក្រៅពីនេះ ពាក់ព័ន្ធបន្លែ ផ្លែឈើ អ្នកឧកញ៉ា មើលឃើញថា បច្ចុប្បន្នមានតែចង់លើសតម្រូវការនៅក្នុងស្រុកទៅទៀត ហើយបន្លែ ត្រីសាច់បែរជាមានការចុះថោកទៅវិញ ហេតុដូចនេះហើយអ្នកផលិតនៅក្នុងស្រុកនៅតែមិនទាន់មានឱកាសផលិត ដើម្បីអាចប្រកួតប្រជែងទៅនិងទីផ្សារនាំចូលពីបណ្តាប្រទេសវៀតណាម ក៏ដូចជាបណ្តាប្រទេសផ្សេងៗក្នុងអាស៊ានដូចគ្នាដែរ។

អ្នកឧកញ៉ា បានបញ្ជាក់ថា «បើទោះបីជាកម្ពុជាមិនមានការនាំចូលពីប្រទេសថៃក៏ពិតមែន ប៉ុន្តែកម្ពុជានៅមានបណ្តាប្រទេសក្នុងអាស៊ានដែលជាសហគមន៍សេដ្ឋកិច្ចអាស៊ាន ដូច្នេះហើយប្រសិនបើថៃបង្វែរទិសក្នុងការដឹកជញ្ជូនមកកាន់កម្ពុជា ដូច្នេះប្រាកដណាស់ថានិងបង្កើនថ្លៃដើម។

ក្រោយយោធាថៃបិទព្រំដែនទាំងជាមួយកម្ពុជាជាឯកតោភាគីអស់រយៈពេលជាង ១ខែ កាលពីថ្ងៃទី០៧ ខែកក្កដា កន្លងទៅ អាជីវករនិងពាណិជ្ជករថៃបានចាប់ផ្តើមប្រមូលផ្តុំគ្នាតវ៉ាដ៏កម្រមួយនៅច្រកទ្វារព្រំដែនអន្តរជាតិក្នុងទឹកដីថៃ ទាមទារឲ្យបើកច្រកព្រំដែនឡើងវិញ។

ក្នុងការបិទច្រកព្រំដែននេះ យោធារបស់ថៃបានចេញបញ្ជាឲ្យបិទច្រកព្រំដែនជាឯកតោភាគីជាលើកដំបូងកាលថ្ងៃទី៧ខែមិថុនា ក្រោយពីការផ្ទុះអាវុធដែលបង្កឡើងដោយយោធាថៃនៅតំបន់មុំបីនៅឯខេត្តព្រះវិហារ ហើយ ការប្រឈមមុខដាក់គ្នារវាងកងទ័ពនៃប្រទេសថៃនិងកម្ពុជាក៏បានកើនឡើងជាបន្តបន្ទាប់ និងបានរីករាលដាលដល់វិស័យផ្សេងៗទៀត ដែលភាគីថៃមានទំនាស់ផ្ទៃក្នុងនោះចង់បង្វែរស្ថានការផ្ទៃក្នុងងាកមកទម្លាក់កំហុសដាក់កម្ពុជា។

ជុំវិញការបិទព្រំដែននេះដែរសម្ដេចនាយករដ្ឋមន្ត្រី ហ៊ុន ម៉ាណែត បានបញ្ជាក់ជំហរមិនចរចាជាមួយភាគីថៃ ពាក់ព័ន្ធនឹងការបិទបើកច្រកព្រំដែនរវាងប្រទេសទាំងពីរឡើយ ដោយសម្ដេច ប្រាប់ឱ្យថៃបើកច្រកព្រំដែនមុន ហើយកម្ពុជានឹងបើកតាមក្រោយ ព្រោះថៃជាអ្នកបិទជាឯកតោភាគីមុន។ សម្ដេចធិបតី បានគូសបញ្ជាកថា កម្ពុជាមានសិទ្ធិគ្រប់គ្រាន់ក្នុងការបិទព្រំដែនជាមួយថៃជាអចិន្រ្តៃយ៍ ប៉ុន្តែកម្ពុជាមិនធ្វើដូច្នោះទេ គឺកម្ពុជាធ្វើសម្បទានឱ្យថៃបើកវិញមុន កម្ពុជាក៏បើកព្រំដែនវិញដែរ៕

ដោយ៖ ឌិន ថារី

The post បណ្តាពាណិជ្ជករថៃបង្វែរទិសនាំចូលទំនិញមកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក appeared first on Kampuchea Thmey Daily.

អ្នកឧកញ៉ា លឹម ហេង អះអាង ថៃបិទព្រំដែន ថៃខាតច្រើនជាងកម្ពុជា

Din Thary — Wed, 25 Jun 2025 03:32:27 +0000

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានឱ្យដឹងថា ជុំវិញការបិទព្រំដែនជាឯកតោភាគីរបស់ថៃជាមួយកម្ពុជា នៅមិនទាន់អាចសន្និដ្ឋានបានថា វានឹងប៉ះពាល់ដល់កម្រិតណានោះទេ ប៉ុន្តែថៃអាចនឹងខាតច្រើនជាងកម្ពុជា ដោយសារថៃនាំចូលមកច្រើនជាងកម្ពុជានាំចេញទៅថៃ។

ថ្លែងប្រាប់ «កម្ពុជាថ្មី» អ្នកឧកញ៉ា លឹម ហេង បានមានប្រសាសន៍ បញ្ហាព្រំដែនរវាងកម្ពុជា-ថៃ ហាក់កើនឡើងកម្តៅពីរពីមួយថ្ងៃ ទៅមួយថ្ងៃ ដែលឈានដល់ការបិទព្រំដែន បិទការនាំចូលអគ្គិសនី ការនាំចូលប្រេងឥន្ធនៈ បន្លែ ផ្លែឈើ ជាបន្តបន្ទាប់។

ជាមួយគ្នានោះ ចំពោះការបិទព្រំដែននៅក្នុងការនាំចេញ-នាំចូលនេះទៀតសោត យើងនៅមិនអាចស្មានដឹងផងដែរពីទំហំពាណិជ្ជកម្មរវាងប្រទេសទាំងពីរថានឹងអាចធ្លាក់ចុះដល់កម្រិតណា លុះត្រាតែការបិទនោះមានរយៈពេលដល់ណា នៅកន្លះឆ្នាំក្រោយ ឬនៅខែក្រោយ ទើបយើងអាចវាយតម្លៃបានថាវានឹងប៉ះពាល់ក្នុងទំហំប៉ុណ្ណា ព្រោះអ្វីគ្រប់យ៉ាងយើងមិនអាចនិយាយមុនបាន វាអាចទៅជាការបំប៉ោងព័ត៌មាន ឬទៅជាព័ត៌មានក្លែងក្លាយ។

អ្នកឧកញ៉ា លឹម ហេង បានមានប្រសាសន៍ថា ក្នុងស្ថានភាពបែបនេះវាអាចជាគ្រោះ នៅក្នុងលាភរបស់កម្ពុជាទាំងផ្នែកនយោបាយ និងសេដ្ឋកិច្ច ព្រោះចំណុចទាំងពីរនេះគឺដើរទន្ទឹមគ្នា។

ក្នុងនោះដែរផ្នែកនយោបាយ អ្នកឧកញ៉ា លឹម ហេង មើលឃើញថា «កម្ពុជាមានផលចំណេញច្រើនពីឯករាជភាព ពីជាតិនិយមរបស់ខ្មែរ គឺកម្ពុជាចំណេញច្រើនណាស់។ សម្រាប់សេដ្ឋកិច្ចវិញ គឺអាចជំរុញផលិតកម្មនៅក្នុងស្រុកព្យាយាមផលិតឱ្យបានច្រើន ដើម្បីព្យាយាមផ្គត់ផ្គង់ផលិតកម្ម និងតម្រូវការនៅក្នុងស្រុក»។

អ្នកឧកញ៉ា លឹម ហេង បន្ថែមថា ក្រៅពីនេះក៏មានបញ្ហាប្រឈមដូចគ្នាដែរ ប្រសិនបើតម្លៃទំនិញដែលហូរចូលពីប្រទេសផ្សេងៗ ជាពិសេសពីប្រទេសជិតខាងកម្ពុជាយើង ដូចជាវៀតណាម ហើយតម្លៃទំនិញនៅតែដដែល គឺបញ្ហាប្រឈមនៅតែមានសម្រាប់អ្នកផលិតដដែល ព្រោះថា ថ្លៃដើមនៅតែមានកម្រិតខ្ពស់នៅឡើយ ដូច្នេះទាល់តែមានតម្លៃឡើងថ្លៃ ឬតម្លៃសមរម្យណាមួយដែលអាចទទួលយកបានទាំងអ្នកផលិត និងអ្នកទិញ ទើបយើងអាចបង្កើនការផលិតឱ្យបានកាន់តែច្រើន ប៉ុន្តែទោះបីជាយ៉ាងណាក៏ដោយអ្នកផលិតនៅក្នុងស្រុក គឺនៅតែព្យាយាមផលិតនៅក្នុងស្រុកឱ្យបានកាន់តែច្រើន។

លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ មាននប្រសាសន៍ថា ការបិទព្រំដែន ថៃអាចខាតពីពាណិជ្ជកម្ម ១៦ លានដុល្លារ ក្នុងមួយថ្ងៃ ឬ ៥ ពាន់លានដុល្លារ ក្នុងមួយឆ្នាំ។

យោងតាមក្រសួងពាណិជ្ជកម្ម នៅក្នុងរយៈពេល ៥ ខែ (មករា-ឧសភា) ឆ្នាំ ២០២៥ ការដោះដូរទំនិញរវាងកម្ពុជា-ថៃ មានទំហំទឹកប្រាក់ជិត ១,៨៨ ពាន់លានដុល្លារ ខណៈកម្ពុជានាំចេញទៅថៃ ៣៩៦ លានដុល្លារ កើន ១,១% ចំណែកឯថៃនាំទំនិញចូលមកវិញ មានទំហំទឹកប្រាក់ ១,៤៨ ពាន់លានដុល្លារ កើនឡើង ១០,៤%។

ប្រភពដដែលបង្ហាញថា នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ។

សូមជម្រាបថា នៅយប់ថ្ងៃទី២៣ ខែមិថុនា ថៃបានសម្រេចបិទព្រំដែនជាមួយកម្ពុជាទាំងអស់ លើកលែងគោលការណ៍មនុស្សធម៌ និងសិស្សានុសិស្ស ក្រោមលេសកម្ពុជាឈ្លានពាន និងការឆបោកតាមអនឡាញ។

ក្នុងនោះដែរមុនសម្រេចបិទច្រកព្រំដែនជាមួយកម្ពុជា ថៃបានគំរាមកំហែងមកលើកម្ពុជាច្រើនលើកជាច្រើនសារ ដូចជាការផ្ដាចការផ្គត់ផ្គង់ចរន្តអគ្គិសនី អ៊ីនធើណិត ការបន្ថយម៉ោងចេញចូលតាមព្រំដែន គំរាមឈប់ផ្គត់ផ្គង់ប្រេងឥន្ធនៈ និងចោទប្រកាន់កម្ពុជាថាជាទីតាំងជម្រកនៃការឆបោកតាមអនឡាញ។

ជាការឆ្លើយតបរាជរដ្ឋាភិបាលកម្ពុជាក្រោមការដឹកនាំរបស់សម្ដេច ហ៊ុន ម៉ាណែត បានបិទការនាំចូលបន្លែផ្លែឈើពីប្រទេសថៃគ្រប់ច្រកព្រំដែន កាត់ផ្ដាច់ចរន្តអគ្គិសនី អ៊ីនធើណិត និងឈប់នាំចូលប្រេងឥន្ធនៈពីប្រទេសថៃ និងបានបិទព្រំដែនចំនួនពីរនៅខេត្តឧត្ដរមានជ័យផងដែរ៕

The post អ្នកឧកញ៉ា លឹម ហេង អះអាង ថៃបិទព្រំដែន ថៃខាតច្រើនជាងកម្ពុជា appeared first on Kampuchea Thmey Daily.

ក្រសួងពាណិជ្ជកម្ម ត្រៀមខ្លួនរួចជាស្រេចក្នុងការបង្វែរទិសទំនិញធ្លាប់លក់ឱ្យថៃ ទៅកាន់ទីផ្សារក្នុង និងក្រៅស្រុក

Din Thary — Mon, 16 Jun 2025 09:29:49 +0000

ជុំវិញប្រសាសន៍សម្តេចតេជោ ហ៊ុន សែន ព្រមានបិទច្រកព្រំដែនកម្ពុជា-ថៃ ទាំងអស់ ហាមលើការនាំចូលបន្លែ ផ្លែឈើ ចូលមកកម្ពុជា ដូចមុនពេលមានជម្លោះព្រំដែន លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានមានអះអាងថា ក្រសួងពាណិជ្ជកម្មបានត្រៀមខ្លួនរួចជាស្រេចនៅក្នុងការដោះស្រាយបញ្ហានេះដល់ពលរដ្ឋ ជាពិសេសការបង្វែរទិសទំនិញដែលប្រជាពលរដ្ឋធ្លាប់លក់ទៅឱ្យថៃ ទៅកាន់ទីផ្សារផ្សេងទាំងក្នុង និងក្រៅស្រុកដែលគេត្រូវការ។

ថ្លែងប្រាប់«កម្ពុជាថ្មី» នៅថ្ងៃទី១៦ ខែមិថុនា នេះ លោក ប៉ែន សុវិជាតិ បានមានប្រសាសន៍ថា បច្ចុប្បន្នយើងបានដឹងស្រាប់ហើយថា ទីផ្សារក្នុងស្រុកមួយចំនួន ក៏ទទួលទិញទំនិញសម្រាប់ប្រើប្រាស់ដូចគ្នាដែរ ដូច្នេះជាជាងនាំចេញយកទៅលក់ឱ្យថៃ កម្ពុជាក៏អាចជំនួសការទិញទំនិញក្នុងស្រុកសម្រាប់ការប្រើប្រាស់ដូចគ្នាដែរ។ ក្នុងនោះទំនិញដែលល្អ អាចទទួលទិញដោយប្រទេសចិន និងវៀតណាម ក្រសួងនឹងព្យាយាមជំរុញការនាំចេញឱ្យស្របតាមប្រសាសន៍សម្ដេចតេជោក្នុងការខិតខំរកទីផ្សារនៅក្រៅស្រុកបន្ថែមទៀត។

ក្រសួងពាណិជ្ជកម្ម ក៏បានត្រៀមលក្ខណៈរួចជាស្រេចក្នុងការប្រើប្រាស់រូបភាពរបស់ខ្លួននៅក្នុងទំនាក់ទំនងទ្វេភាគីជាមួយប្រទេសផ្សេងទៀត ក្រៅតែពីប្រទេសថៃ ពីព្រោះកម្ពុជាជាមួយប្រទេសជិតខាង ក៏មានទំនាក់ទំនងទ្វេភាគីដែរ ជាពិសេសនៅទីផ្សារនៅក្នុងអាស៊ាននេះ ដោយយើងមានទីផ្សារធំមួយដែលហៅថា ASEAN Market ហើយទីផ្សារនេះក៏ធ្លាប់ស្រូបទាញទំនិញពីកម្ពុជាដែរ។

លោក ប៉ែន សុវិជាតិ បានអះអាងថា៖ «ការបញ្ជាទំនិញទៅតាមទីផ្សារនានា និងការបង្វែរទិសទំនិញពីទីផ្សារប្រទេសថៃដែលធ្លាប់នាំចេញកាលពីពេលកន្លងទៅ ក៏មិនមែនជាគឺមិនមែនជាការលំបាកអ្វីទេ ហើយក៏មិនមែនជាបញ្ហាអ្វីចម្លែកដែរសម្រាប់ក្រសួង ព្រោះក្រសួងពាណិជ្ជកម្មក៏ធ្លាប់ធ្វើការងារនេះម្តងរួចមកហើយ ក្រសួងនឹងប្រឹងប្រែងបន្តទៀតនៅក្នុងការបញ្ជ្រាបកសិករផលទាំងអស់នោះយកទៅលក់ឱ្យទីផ្សារផ្សេងទៀតដែលគេត្រូវការ»។

ស្របពេលកម្ពុជាកំពុងមានបញ្ហាព្រំដែនលើការនាំចូលបន្លែ ផ្លែឈើ ពីប្រទេសថៃ លោក ប៉ែន សុវិជាតិ ជឿជាក់ថា ពលរដ្ឋខ្មែរនឹងស្មារតីស្នេហាជាតិខ្ពស់ដោយមិនដំឡើងថ្លៃទំនិញ ស្របពេលវេលាដែលកម្ពុជា កំពុងមានបញ្ហាជាមួយថៃ និងត្រៀមខ្លួនងាកទៅរកទីផ្សារផ្សេង នេះដូចគ្នាដែរ។

«ក្រសួងពាណិជ្ជកម្ម ក៏បានត្រៀមផងដែរ ជាពិសេសកសិករផលមួយចំនួនដែលត្រូវការប្រើប្រាស់ចាំបាច់ និងទំនិញសម្រាប់ប្រើប្រាស់ប្រចាំថ្ងៃរបស់ពលរដ្ឋ ក្រសួងបានត្រៀមខ្លួននៅក្នុងការចុះអន្តរាគមន៍ និងចាត់ជាមន្ត្រីជំនាញធ្វើការតាមដានតម្លៃទំនិញជាប្រចាំទៅលើប្រភេទទំនិញ ១៩៩មុខ ជាប់ជាប្រចាំរាល់ថ្ងៃ។ ប្រសិនជាមានទំនិញណាឡើងថ្លៃ ក្រសួងនិងចុះធ្វើអន្តរាគមន៍ភ្លាមៗ ដោយក្រសួងមិនត្រឹមតែធ្វើអន្តរាគមន៍លើទំនិញជីវសាស្ត្រប៉ុណ្ណោះទេ គឺក្រសួងអាចនឹងធ្វើអន្តរាគមន៍លើទំនិញប្រើប្រាស់ប្រចាំថ្ងៃជាដើម។» លោក ប៉ែន សុវិជាតិ បន្ថែមយ៉ាងដូច្នេះ។

ស្របពេលជាមួយគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងដែរថា កន្លងមកថៃបានបិទច្រកព្រំដែនជាមួយកម្ពុជាជាឯកតោភាគី ដូច្នេះសម្តេចតេជោមានប្រតិកម្មជារឿងដែលសមស្រប ព្រោះជាការពិតប្រសិនបើកម្ពុជានាំចូលទៅមិនបាន កម្ពុជាក៏មិនអាចឱ្យគេនាំចូលមកវិញដូចគ្នាដែរ ប៉ុន្តែតាមប្រសាសន៍សម្តេចតេជោ គឺគ្រាន់តែការបិទទៅលើការនាំចូលប្រភេទបន្លែ និងផ្លែឈើ មិនមែនលើមុខទំនិញគ្រប់មុខ និងបិទច្រកព្រំដែនតែម្តងនោះទេ។

ដូច្នេះ ចំពោះការបិទនេះ អ្នកឧកញ៉ា លឹម ហេង មើលឃើញថា មិនមានការខ្វះខាតអ្វីនោះទេ ព្រោះសព្វថ្ងៃបន្លែ ផ្លែឈើ កម្ពុជាក៏មានសមត្ថភាពផលិតនៅក្នុងស្រុកបានមួយចំនួនផងដែរ ដែលជាការលើកស្ទួយការហូបចុក និងការផលិតរបស់ខ្មែរនៅក្នុងស្រុកឱ្យមានភាពល្អប្រសើរ។

មួយវិញទៀត ប្រសិនមានការខ្វះខាត កម្ពុជាក៏នៅមានការនាំចូលបន្លែ និងផ្លែឈើ ពីវៀតណាម និងចិន ដូច្នេះមិនមានការប៉ះពាល់អ្វីធំនោះ តែវាអាចបង្កើននៃការផលិតក្នុងស្រុក ឬអាចមានការឡើងថ្លៃតិចតួច។ មួយវិញទៀត នេះក៏ជាភាពប្រកួតប្រជែងក្នុងការពង្រឹងខ្លួនឯងនៅក្នុងការផលិតនូវផលិតផលកសិកម្ម ដើម្បីធ្វើការនាំចេញបើទោះបីជាមិនមានការនាំចូលពីថៃ។

អ្នកឧកញ៉ា បានបន្តថា កន្លងមក ចេកអំបូងលឿង ស្រូវ-អង្ករ ដំឡូងមុី ស្វាយចន្ទីរ ពោត មួយចំនួន គឺកម្ពុជា ឈានដល់ការផលិត និងចេញ ដែលប្រទេសជិតខាងមិនអាចនាំចូលមកបាន នេះហើយដែលកម្ពុជាអាចប្រកួតប្រជែងជាមួយប្រទេសជិតខាង និងពង្រឹងខ្លួនឯង។

សូមជម្រាបថា ក្រោយមានការប៉ះទង្កិចគ្នាកាលពីថ្ងៃទី២៨ ខែឧសភា កន្លងទៅដោយភាគីថៃបានបាញ់ចូលលេណដ្ឋានកម្ពុជា បណ្តាលឱ្យទាហានខ្មែរម្នាក់ពលីជីវិតមក បានធ្វើឱ្យវិវាទព្រំដែនរវាងប្រទេសទាំងពីរឡើងកម្តៅ ដែលឈានដល់ភាគីថៃបានបិទច្រកព្រំដែនជាមួយកម្ពុជាជាឯកតោភាគីផងដែរ។

ឆ្លើយតបការធ្វើឡើងរបស់ភាគីថៃ អញ្ជើញថ្លែងសារពិសេស ពីវិមានព្រឹទ្ធសភា នៅព្រឹកថ្ងៃទី ១៦ ខែមិថុនានេះ សម្តេចតេជោហ៊ុន សែន ប្រធានព្រឹទ្ធសភាកម្ពុជា ព្រមានបិទច្រកព្រំដែនកម្ពុជា-ថៃ ទាំងអស់ ចាប់ពីស្អែកនេះតទៅហាមលើការនាំចូលបន្លែ ផ្លែឈើ ចូលមកកម្ពុជា បើសិនជាថៃមិនព្រមបើកច្រកព្រំដែនឱ្យដំណើរការធម្មតាវិញ ដូចមុនពេលមានជម្លោះព្រំដែន៕

The post ក្រសួងពាណិជ្ជកម្ម ត្រៀមខ្លួនរួចជាស្រេចក្នុងការបង្វែរទិសទំនិញធ្លាប់លក់ឱ្យថៃ ទៅកាន់ទីផ្សារក្នុង និងក្រៅស្រុក appeared first on Kampuchea Thmey Daily.

ការបិទច្រកព្រំដែនជាបណ្តោះអាសន្ន មកដល់បច្ចុប្បន្ន កម្ពុជានៅមិនទាន់មានអ្វីជាបញ្ហាចោទ ប៉ុន្តែអ្នកប៉ះពាល់មុនគេ គឺភាគីថៃ

Din Thary — Mon, 09 Jun 2025 09:23:00 +0000

លោក ឈឹម វជិរា ប្រធានមន្ទីរកសិកម្មខេត្តបាត់ដំបង បានឱ្យ«កម្ពុជាថ្មី»ដឹងថា ចំពោះការបិទជាបណ្តោះអាសន្ននៃច្រកព្រំដែនកម្ពុជា-ថៃកន្លងនៅមិនទាន់មានជាបញ្ហាអ្វីចោទដល់កសិផលកម្ពុជាននៅឡើយទេ ប៉ុន្តែអ្នកដែលប៉ះពាល់មុនគេគឺជាភាគីថៃ។

លោក ឈឹម វជិរា បានមានប្រសាសន៍ថា តាមរបាយការណ៍តាមច្រកដែលទទួលបាន និងអ្វីដែលថ្នាក់ដឹកនាំបានសម្រេច គឺភាគីកម្ពុជាយើងបើកនៅម៉ោង ៩:០០នាទីព្រឹក និងបិទវិញនៅម៉ោង ៤:០០នាទីល្ងាច ក្នុងនោះចំពោះកសិករកម្ពុជានៅតែចេញចូលជាធម្មតា។ ប៉ុន្តែជុំវិញបញ្ហានេះ ភាគីថៃអាចនិងមានចាល់ច្រើននៅក្នុងការនាំចេញពាក់ព័ន្ធទៅនិងផលិតផលមួយចំនួនដែលត្រូវនាំចូលមកកាន់ប្រទេសកម្ពុជា។

លោកបានឱ្យដឹងថា៖« សព្វថ្ងៃនេះសម្រាប់កម្ពុជា គឺនាំចេញតែផលិតផលមួយចំនួនប៉ុណ្ណោះទៅកាន់ទីផ្សារប្រទេសថៃដូចជា ដំឡូងមី ស្វាយកែវរមៀត និងពោតក្រហមប៉ុណ្ណោះ ប៉ុន្តែឈានចូលមកដល់ខែមិថុនា ការនាំចេញមិនសូវមានច្រើនដូចមុនទេ»។

ទោះជាបែបនេះក្តី លោកបានអះអាងថា «មកទល់ពេលបច្ចុប្បន្ននេះ កម្ពុជានៅមិនទាន់មានជាបញ្ហាចោទនោះទេ ដោយសារតែភាគីកម្ពុជា-ថៃ គ្រាន់តែដូរម៉ោង នៅក្នុងការបិទ បើក ច្រកព្រំដែនតែប៉ុណ្ណោះ ដោយថៃគេបើកនៅម៉ោង ៨:០០ នាទីព្រឹក បិត នៅម៉ោង ៤:០០នាទីល្ងាច ហើយកម្ពុជាយើង បើកនៅម៉ោង ៩:០០នាទីព្រឹក ហើយបិទនៅម៉ោង ៤:០០នាទីល្ងាច»។

ជាមួយគ្នានេះ ជុំវិញការផ្លាស់ប្តូរពេលវេលានេះទៀតសោទ លោក ឈឹម វជិរា បានលើកឡើងថា «ពាក់ព័ន្ធទៅនិងបន្លែមួយចំនួនដែលលួចនាំចូលក្រៅផ្លូវការពីថៃចូលមកកាន់កម្ពុជានោះ អ្នកដែលប៉ះពាល់មុនគេច្បាស់ណាស់គឺជាប្រទេសថៃនេះឯង ព្រោះភាគច្រើនរបស់ទាំងអស់នេះសុទ្ធសឹងតែជាទំនិញក្រៅផ្លូវការ»។

«លើសពីនេះទៀត ដូចសម្តេចនាយករដ្ឋមន្ត្រីបានមានប្រសាសន៍ហើយថា អ្នកដែលប៉ះពាល់ខ្លាំងគឺជាភាគីថៃ ព្រោះទំនិញកម្ពុជានាំចេញទៅកាន់ទីផ្សារប្រទេសថៃមានទំហំជាង ១ ពាន់លានដុល្លារប៉ុណ្ណោះ ប៉ុន្តែប្រទេសថៃវិញនាំចូលមកកម្ពុជាមានទំហំប្រមាណជាង ៥ ពាន់ដុល្លារឯណោះ ដូច្នេះទំហំនៃការនាំចេញខុសគ្នារហូតដល់ទៅ ៤ ដង»។ លោក ឈឹម វជិរា បន្ថែមបែបនេះ។

ជាមួយគ្នានេះ លោកក៏បានបន្ថែមថា សម្រាប់បញ្ហានេះក៏ជាឱកាសមួយដែរសម្រាប់ប្រទេសកម្ពុជានៅក្នុងការពង្រឹងខ្លួនឯង ព្រោះយើងមិនអាចទៅអង្គុយចាំពឹងផ្អែកទៅលើផលិតផលរបស់គេទាំងស្រុងនោះដែរ។ សំខាន់នៅម៉ោងនេះអាចជាឱកាសមួយដែលអាចឱ្យកម្ពុជាពង្រឹងខ្លួនឯងកាន់តែរឹងមាំជាងមុន។

លោកថា សព្វថ្ងៃតាមរបាយការណ៍ត្រួតពិនិត្យតាមច្រកព្រំដែនមួយចំនួន នៅថ្ងៃទី០៨ ខែមិថុនា នេះកម្ពុជានាំចេញពោតក្រហមប្រមាណ ៣០០តោន និងស្វាយកែវរមៀតប្រមាណ ៣០គីឡូ ប៉ុណ្ណោះទៅកាន់ទីផ្សារប្រទេសថៃដែលបាននាំចេញតាមច្រកព្រំដែន។ ហេតុដូចនេះ ខែមិថុនា មិនជាមានផលប៉ះពាល់អ្វីទេ ព្រោះការនាំចេញច្រើនទៅកាន់ថៃ ដូចជាដំឡូងមី ពោតក្រហម ជាដើមនោះ គឺសម្រុកច្រើននៅចន្លោះពីខែធ្នូ រហូតដល់ខែកុម្ភៈ។

ទន្ទឹមនេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងដែរថា កាលណាបិទច្រកព្រំដែនហើយច្បាស់ណាស់ថាវានិងប៉ះពាល់ តែប៉ះពាល់តិច ឬច្រើន គឺអាស្រ័យទៅលើអ្នកណានាំចេញតិច ឬអ្នកណានាំចេញច្រើន ប៉ុន្តែយើងមិនចង់ឱ្យមានរឿងបែបនេះឡើយ ព្រោះការខាតបង់គឺផលប្រយោជន៍ទាំងសងខាងរវាងប្រទេសទាំងពីរ។

លោកថា «ដូចរាជរដ្ឋាភិបាលកម្ពុជាបានអំពាវនាវរួចមកហើយថា ជុំវិញការប៉ះទង្កិចគ្នាតាមព្រំដែននេះ គួរកុំពង្រីកទំនាស់ទៅលើវិស័យផ្សេងៗទៀត ជាពិសេសវិស័យសេដ្ឋកិច្ចពាណិជ្ជកម្ម ការផ្លាស់ប្តូរប្រជាជន និងប្រជាជន កុំឱ្យមានការរើសអើង និងប្រកាន់ពូជសាសន៍គ្នាទៅវិញទៅមក ដូច្នេះការបិទច្រកព្រំដែននេះ ច្បាស់ណាស់ថាវានិងផ្តល់ផលអវិជ្ជមានដល់ប្រទេសទាំងពីរ។

«ដូចយើងបានដឹងស្រាប់ហើយជុំវិញទំហំពាណិជ្ជកម្មរវាងប្រទេសទាំងពីរ ត្បិតថាកម្ពុជាមានទំហំតូចមែន ប៉ុន្តែមិនមែនតូចធម្មតានោះទេ គឺស្ថិតក្នុងរង្វង់ទឹកប្រាក់ប្រមាណជាង ១ពាន់លានដុល្លារក្នុងមួយឆ្នាំ ដូច្នេះខ្ញុំគិតថា អ្នកដែលអំពាវនាវឱ្យមានការធ្វើពហិការមិនឱ្យប្រើប្រាស់ទំនិញ ឬឱ្យប៉ះពាល់ដល់ប្រទេសទាំងពីរ សូមមេត្តាបញ្ឈប់សកម្មភាពទាំងនេះ គឺទុកឱ្យថ្នាក់ដឹកនាំរាជរដ្ឋាភិបាលជាអ្នកដោះស្រាយបញ្ហានេះ»។ អ្នកឧកញ៉ាបន្ថែមយ៉ាងដូច្នេះ។

អ្នកឧកញ៉ា បានសង្កត់ធ្ងន់ថា «អ្នកនៅក្នុងបណ្តាញសង្គម និងអ្នករស់នៅកណ្តាលទីក្រុងមិនយល់ពីទុក្ខវេទនាអ្នកដែលរស់នៅតាមព្រំដែនកម្ពុជា-ថៃ នោះទេ ព្រោះប្រទេសណាក៏ដោយឱ្យតែមានការបិទច្រកព្រំដែន អ្នករងផលប៉ះពាល់ខ្លាំង គឺ អ្នករស់នៅតាមច្រកព្រំដែន។ ដូច្នេះការបិទច្រកព្រំដែននេះ វានិងជិះជាផលអវិជ្ជមានច្រើន ហើយក៏មិនមានផលវិជ្ជមាននោះទេសម្រាប់ប្រទេសទាំងពីរ បើទោះបីជាយើងបិទពីថៃ ដោយបង្កើត ឬផលិតដោយខ្លួនឯង ដាំដុះខ្លួនឯង បង្កើនសមត្ថភាពដាំដុះខ្លួនឯង ប៉ុន្តែទំនិញពីប្រទេសវៀតណាម ចិន និងប្រទេសផ្សេងៗ ទំនិញនៅតែហូរចូល ដូច្នេះភាពអវិជ្ជមានរវាងថៃ-កម្ពុជាទទួលបានដូចគ្នា មិនមានផលវិជ្ជមាននោះទេ»។

ទន្ទឹមនេះ បើតាមការចុះផ្សាយរបស់កាសែតក្នុងស្រុកថៃកាលពីថ្ងៃ ៨ មិថុនា កន្លងទៅនេះ បានឱ្យដឹងថា សភាពាណិជ្ជកម្មថៃប្រចាំខេត្តច័ន្ទបុរី បានសម្តែងការព្រួយបារម្ភចំពោះការបិទជាបណ្តោះអាសន្ននៃច្រកព្រំដែនជាមួយប្រទេសកម្ពុជា ដោយព្រមានថា វិធានការបែបនេះអាចបណ្តាលឱ្យមានការខាតបង់ផ្នែកសេដ្ឋកិច្ច «រាប់ពាន់លានបាត»។

អ្នកជំនាញជាច្រើនបានមើលឃើញពីការខាតបង់ ឬរំខានផ្នែកសេដ្ឋកិច្ចចំពោះការបិទព្រំដែន ជាពិសេសសម្រាប់ភាគីថៃ ដែលមានអតិរេកពាណិជ្ជកម្មជាមួយកម្ពុជាប្រមាណ ៤,១ ប៊ីលានដុល្លារ កាលពីឆ្នាំ ២០២៤។ ប្រធានព្រឹទ្ធសភាកម្ពុជា លោក ហ៊ុន សែន បានបង្ហោះសារមួយកាលពីថ្ងៃសៅរ៍ ដោយស្រង់តួលេខពាណិជ្ជកម្មរបស់រដ្ឋាភិបាលកម្ពុជា ថា កម្ពុជានាំចេញទៅថៃជាង ១,១ ប៊ីលានដុល្លារ នៅឆ្នាំមុន ខណៈថៃនាំចូលមកកម្ពុជាវិញប្រមាណ ៥,២ ប៊ីលានដុល្លារ៕

The post ការបិទច្រកព្រំដែនជាបណ្តោះអាសន្ន មកដល់បច្ចុប្បន្ន កម្ពុជានៅមិនទាន់មានអ្វីជាបញ្ហាចោទ ប៉ុន្តែអ្នកប៉ះពាល់មុនគេ គឺភាគីថៃ appeared first on Kampuchea Thmey Daily.

តំណាងវិស័យឯកជនគាំទ្រឱ្យមានការសាងសង់រោងចក្រផលិតជី ផ្គង់ផ្គង់ក្នុងស្រុក

deth leng — Wed, 04 Jun 2025 06:10:24 +0000

វិស័យឯកជនគាំទ្រការលើកឡើងរបស់រាជរដ្ឋាភិបាលក្នុងការលើកទឹកចិត្តឱ្យមានការវិនិយោគលើរោងចក្រកែច្នៃជីកសិកម្មក្នុងស្រុក ដើម្បីធានាបានទាំងគុណភាព និងទំនុកចិត្តពីប្រជាកសិករ ជាពិសេសមិនប៉ះពាល់ដល់គុណភាពផលិតផលកសិកម្ម។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថានៅថ្ងៃទី ០៣ ខែមិថុនា ឆ្នាំ ២០២៥ថា រាជរដ្ឋាភិបាលកម្ពុជា បន្តលើកទឹកចិត្តក្នុងការវិនិយោគផ្នែកឧស្សាហកម្មកែច្នៃ ផលិតផលកសិកម្ម និងជំរុញបង្កើតរោងចក្រជីកសិកម្មក្នុងស្រុក។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា គាំទ្រថ្នាក់ដឹកនាំរាជរដ្ឋាភិបាលកម្ពុជា ដែលមានគម្រោងសហការជាមួយផ្នែកឯកជនផលិតជីលក់ក្នុងស្រុក ដើម្បីពង្រឹងឯករាជ្យភាពផ្នែកកសិកម្ម។

អ្នកឧកញ៉ា លឹម ហេង បានឱ្យដឹងថា រដ្ឋាភិបាលបានសហការជាមួយវិស័យឯកជន ក្នុងការនាំចូលវត្ថុធាតុដើម ដើម្បីផលិតជី ដែលមានតម្លៃធូរថ្លៃ ជួយដល់កសិករដែលកំពុងតែជួបបញ្ហាជំពាក់ថ្លៃជី ថ្លៃផលកសិកម្មថ្លៃដើមខ្ពស់ ខណៈសម្ដេចធិបតីបានយកចិត្តទុកដាក់លើរឿងនេះហើយបានជជែកជុំទី១ ម្ដងហើយ ដើម្បីរកវិធីកែច្នៃផលិតជីក្នុងស្រុក ជារបៀបរដ្ឋឧបត្ថម្ភធន ក្នុងការបង្កើតក្រុមហ៊ុន ដែលមានក្រុមប្រឹក្សាភិបាលផ្នែកឯកជន ជាអ្នកគ្រប់គ្រង។

អ្នកឧកញ៉ា លឹម ហេង បន្ថែមថា៖ «ខ្ញុំគិតថា នេះជាគម្រោងដ៏ល្អ ក្នុងការបង្កើតរោងចក្រដើម្បីផលិតជីក្នុងស្រុក ដើម្បីមានឯករាជ្យភាពក្នុងការផ្គត់ផ្គង់ជីក្នុងស្រុក»។

អ្នកឧកញ៉ា លឹម ហេង បញ្ជាក់ថា កម្ពុជាត្រូវកំណត់ឯករាជ្យភាពមួយក្នុងការផ្គត់ផ្គង់ជីក្នុងស្រុក និងបន្ធូរបន្ថយដល់ប្រជាកសិករជំពាក់ថ្លៃជី ដែលមានតម្លៃថ្លៃ និងគុណភាពមិនច្បាស់លាស់។

លោក អិល ឈិញ ប្រធានសមាគមកសិករដំឡូងមីខ្មែរយល់ថា៖ «កាលណាយើងមានរោងចក្រជីក្នុងស្រុក ចាត់ទុកថាយើងបានគុណភាពជីល្អ ព្រោះយើងទិញមករាល់ថ្ងៃនេះ មិនដឹងជាស្អីទៅស្អីទេ វាអត់ច្បាស់លាស់ ដូចជីយកមកមានតម្លៃថោក មានតម្លៃថ្លៃ មិនដឹងថា គេលាយអ្វី ជួនកាលយើងយកជីមកដាក់ស្រូវ ដាក់ដំឡូង វាអត់បានផល បើយើងមានរោងចក្រក្នុងស្រុក ទី១ យើងបានគុណភាពជីពិតប្រាកដ ទី២ តម្លៃទាបជាងខាងក្រៅ និងអាចបង្កើតការងារក្នុងស្រុក»។

អ្នកឧកញ៉ា ម៉ុង ឫទ្ធី ស្នើសុំឱ្យរាជរដ្ឋាភិបាលជួយត្រួតពិនិត្យគុណភាព នៃការនាំចូលជី កុំឱ្យប្រទេសជិតខាងយកជីដែលគ្មានគុណភាពមកឱ្យកសិករយើង ធ្វើឱ្យកសិករ យកមកដាក់ស្រែចម្ការទៅទទួលផលបានតិច ហើយតម្លៃផលិតខ្ពស់។

កន្លងមក អ្នកឧកញ៉ា ម៉ុង ឫទ្ធី បានអះអាងថា នៅដើមឆ្នាំ២០២៦ខាងមុខ កម្ពុជានឹងមានរោងចក្រផលិតជីដោយខ្លួនឯង ចំណែកឯដើមទុន ដែលគ្រោងចំណាយទៅលើរោងចក្រផលិតជីនេះផងដែរ នឹងត្រូវចំណាយអស់ជា២០លានដុល្លារ៕

អត្ថបទ៖ ឡេង ដេត

The post តំណាងវិស័យឯកជនគាំទ្រឱ្យមានការសាងសង់រោងចក្រផលិតជី ផ្គង់ផ្គង់ក្នុងស្រុក appeared first on Kampuchea Thmey Daily.

វិស័យឯកជន និងអ្នកជំនាញមើលឃើញសញ្ញាវិជ្ជមានរបស់កម្ពុជាក្នុងការចរចាពន្ធជាមួយអាមេរិក

Din Thary — Fri, 30 May 2025 09:08:00 +0000

ស្របពេលដែលបញ្ហាចំរូងចំរាស់រវាងរដ្ឋបាលរបស់លោកប្រធានាធិបតីដូណាល់ ត្រាំ និងតុលាការពាណិជ្ជកម្មអាមេរិកជុំវិញការអនុវត្តពន្ធគោល ១០% និងការចរចាពន្ធគយបដិការជាមួយប្រទេសដែលជាដៃគូរពាណិជ្ជកម្មរួមទាំងកម្ពុជា អ្នកតំណាងពីវិស័យឯកជន និងអ្នកជំនាញសេដ្ឋកិច្ច នៅតែមើលឃើញពីសញ្ញាវិជ្ជមាននៃការចរចាដែលនឹងអាចឈានទៅដល់ការបន្ធូរបន្ថយពន្ធនាពេលដ៏ខ្លីខាងមុខ។

កាលពីថ្ងៃពុធកន្លងទៅនេះ តុលាការអាមេរិកសម្រាប់ពាណិជ្ជកម្មអន្តរជាតិ បានសម្រេចថា ការដំឡើងពន្ធលើដៃគូពាណិជ្ជកម្មរបស់អាមេរិក គឺជាតួនាទីរបស់សភាផ្ដាច់មុខ ហើយថា អ្វីដែលលោក ត្រាំ ធ្វើគឺខុសរដ្ឋធម្មនុញ្ញ និងលើសពីអំណាចប្រធានាធិបតីរបស់ខ្លួន។

យ៉ាងណាមិញកាលពីព្រហស្បត្តិ៍ រដ្ឋបាលលោក ត្រាំ បានប្តឹងឧទ្ធរណ៍ចំពោះសេចក្តីសម្រេចនេះរបស់តុលាការពាណិជ្ជកម្ម ដោយនិយាយថា តុលាការបានជំទាស់នឹងសិទ្ធិអំណាចរបស់ប្រធានាធិបតីដោយខុស ហើយអាចបញ្រ្ចាសការចរចាពាណិជ្ជកម្មយ៉ាងស្វិតស្វាញអស់រយៈពេលជាច្រើនខែមកនេះ។

រដ្ឋបាល ត្រាំ បានប្រកែកក្នុងបណ្ដឹងឧទ្ធរណ៍របស់ខ្លួនថា៖ «គោលនយោបាយការបរទេស និងសេដ្ឋកិច្ចគួរតែត្រូវបានសម្រេចដោយមន្ត្រីជាប់ឆ្នោត មិនមែនតុលាការទេ»។

លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជាបានបញ្ជាក់ប្រាប់ «កម្ពុជាថ្មី» នៅថ្ងៃទី៣០ ខែឧសភា នេះថា ក្រោយតុលាការពាណិជ្ជកម្មអាមេរិកសម្រេចហាមឃាត់ការអនុវត្តពន្ធរបស់លោក ដូណាល់ ត្រាំ ទោះជាចេតនា ឬមិនមែនជាចេតនា ប៉ុន្តែយើងអាចមើលឃើញពីលទ្ធផលផ្លែផ្កា ដែលកម្ពុជានឹងអាចទទួលបានពីសហរដ្ឋអាមេរិកក្នុងការបន្ធូរបន្ថយពន្ធ ជាពិសេសសម្រាប់ទំនិញកម្ពុជាទៅលក់នៅទីផ្សារអាមេរិក។

ជុំវិញការប្រកាសរបស់តុលាការពាណិជ្ជកម្មមួយរបស់សហរដ្ឋអាមេរិក បានសម្រេចហាមឃាត់ការអនុវត្តពន្ធរបស់លោក ដូណាល់ ត្រាំ លោកបណ្ឌិត ហុង វណ្ណៈ បានមានប្រសាសន៍ថា កិច្ចការនេះស្ថិតនៅក្នុងដំណាក់កាលអន្តរកាលនៅឡើយដោយសារតែឱសានវាទនៃតុលាការពាណិជ្ជកម្មអាមេរិកទុករយៈពេល ១០ ថ្ងៃ ដើម្បីឱ្យលោក ដូណាល់ ត្រាំ រៀបចំខ្លួនដើម្បីតវារឿងក្តីអ្វីដែលជា កិច្ចការរបស់លោក ដូណាល ត្រាំ ដែលត្រូវលើកឡើង។

ហេតុដូចនេះ កិច្ចការនេះក្លាយទៅជាកិច្ចការមួយដែលយើងពិបាកនៅក្នុងការធ្វើសេចក្តីសន្និដ្ឋានថាតើ ស្ថានភាពនិងទៅជាយ៉ាងណា ទាក់ទងទៅនិងការដាក់ពន្ធគយទៅវិញទៅមករវាងសហរដ្ឋអាមេរិក ជាមួយបណ្តាប្រទេសផ្សេងៗដែលលោក ដូណាល់ ត្រាំ សម្រេចកាលពីខែមុននេះ។ ប៉ុន្តែលោកយល់ឃើញថា ការប្រកាសរបស់តុលាការពាណិជ្ជកម្មអាមេរិកនេះ ទំនងជាអាចចូលជាធរមាន គឺ ដូណាល់ ត្រាំ អាចមិនមានការតវ៉ាអ្វីទេ ព្រោះវាជាសិល្បៈនយោបាយមួយនៅពេលដែលលោក ដូណាល់ ត្រាំ អនុវត្តទៅក៏មានផលចំណេញ ដោយលោកអាចស្ទង់ដឹងនៃកម្លាំងសេដ្ឋកិច្ចរបស់ខ្លួន ព្រមទាំងសេដ្ឋកិច្ចរបស់បណ្តាប្រទេសជុំវិញសកលលោក ជាពិសេសប្រទេសមហាអំណាចនៅចិន និងបណ្តាប្រទេសនៅអឺរ៉ុបជាដើមដែលមិនចុះញមជាមួយសហរដ្ឋអាមេរិក។

ដោយឡែកទាក់ទងកម្ពុជាវិញ នៅមានបញ្ហាត្រង់ថា តើវាស្ថិតនៅក្នុងកម្រិតណាមួយនៅក្រោមបន្ទាត់នៃ WTO ស្ថានភាពនៃការដាក់ពន្ធគយទៅវិញទៅមកនៅតែត្រូវបានអនុវត្តជាធរមាន ឬក៏ការអនុវត្តរបស់ប្រទេសជាដៃគូររបស់សហរដ្ឋអាមេរិកនៅឡើយ។

ស្របពេលជាមួយគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានបញ្ជាក់ដែរថា ចំពោះការដាក់ពន្ធគោល ១០% និងពន្ធបដិការ ៤៩% ពីសហរដ្ឋអាមេរិក គិតមកដល់ពេលបច្ចុប្បន្ននេះ គឺកម្ពុជានៅមិនទាន់រងសម្ពាធអ្វីធ្ងន់ធ្ងរនោះទេសម្រាប់ការនាំចេញពីកម្ពុជាទៅកាន់ទីផ្សារអាមេរិក។

ទន្ទឹមនេះ អ្នកឧកញ៉ាថា កម្ពុជាក៏ដឹងហើយថាតុលាការពាណិជ្ជកម្មអាមេរិកហាមឃាត់មិនឱ្យអនុវត្តនូវពន្ធដែលលោក ដូណាល់ ត្រាំ បានដាក់កាលពីពេលកន្លងមកនោះ ដូច្នេះកម្ពុជានៅរងចាំលទ្ធផលនៃការចរចា រវាងកម្ពុជា ជាមួយសហរដ្ឋអាមេរិកពីបញ្ហាពន្ធនេះ។

អ្នកឧញ៉ាបានថ្លែងបញ្ជាក់ថា «នៅពេលដែលកម្ពុជាបានចរចារួចរាល់ ហើយលទ្ធផលបែបណានោះទើបអាចសន្និដ្ឋានបានថា តើកម្ពុជារងសម្ពាធអ្វីពីអាមេរិក ដែលនេះគ្រាន់តែជាជំហានដំបូងនៃការសន្និដ្ឋានប៉ុណ្ណោះ។ មួយវិញទៀត ការប៉ះពាល់លើការនាំចេញនៃផលិតផលរបស់កម្ពុជាក៏នៅរងចាំអនុវត្តពន្ធដែលកម្ពុជាចរចាពន្ធនេះដែរ នៅក្នុងរយៈពេលណាមួយដែលយើងអាចវាយតម្លៃបានថា តើវានឹងប៉ះពាល់ដល់ការនាំចេញ និងការកែច្នៃនាំចេញពីកម្ពុជាទៅកាន់ទីផ្សារអាមេរិកក្នុងកម្រិតណា»។

ប៉ុន្តែ ចំពោះការប៉ះពាល់នេះ អ្នកឧកញ៉ាសង្ឃឹមថា វាមិនធ្វើឱ្យប៉ះពាល់ខ្លាំងណាស់ណានោះទេ ព្រោះបណ្តាប្រទេសនៅក្នុងតំបន់ ក៏ដូចជានៅលើសកលលោក ក៏ជាប់ពាក់ព័ន្ធនិងការដំឡើងពន្ធនេះដូចគ្នាដែរ ប្រសិនបើកម្ពុជាអត្រាពន្ធឡើងខ្ពស់ បណ្តាប្រទេសទាំងអស់នោះក៏ឡើងដូចគ្នា ដូច្នេះបញ្ហានេះវាធ្វើឱ្យប៉ះពាល់ចំពោះតែក្រុមហ៊ុនដែលធ្វើការផលិតនាំចេញទៅកាន់សហរដ្ឋអាមេរិក។

អ្នកឧកញ៉ា បានអះអាងថា «សម្រាប់កម្ពុជាយើងជាពហុទីផ្សារ ដូច្នេះកម្ពុជានៅមាន EBA ក៏ដូចជាកិច្ចព្រមព្រៀងសេរីពាណិជ្ជកម្មកម្ពុជា-ចិន កម្ពុជា-កូរ៉េ អ៊ីមេរ៉ាត-អារ៉ាប់រួម ក៏ដូចជាកិច្ចព្រមព្រៀងថ្នាក់តំបន់ អសិប ដែលកម្ពុជានៅតែអាចមានទីផ្សារនាំចេញទៅកាន់បណ្តាប្រទេសនៅក្នុងសកលលោកផងដែរ»។

អ្នកឧកញ៉ា បានពន្យល់ថា ជាធម្មតានោះទេ នៅពេលដែលកម្ពុជាយើងបាត់បង់ទីផ្សារណាមួយ យើងត្រូវតែស្វែងរកទីផ្សារមួយផ្សេងទៀត ប៉ុន្តែអ្វីដែលយើងមាន គឺកម្ពុជាយើងមានទីផ្សារថ្មីស្រាប់ទៅហើយ ដូច្នេះលោកជឿថា ការសន្និដ្ឋានណាមួយត្រូវរងចាំពេលដែលកំពុងអនុវត្តសិន ព្រោះសព្វថ្ងៃនេះយើងមិនអាចសន្និដ្ឋាន និងវាយតម្លៃបាននោះទេ។

យ៉ាងណាមិញ លោកបណ្ឌិត ហុង វណ្ណៈ នៅតែសង្ឃឹមថា កម្ពុជានិងអាចធ្វើការចរចាបានជាមួយភាគីសហរដ្ឋអាមេរិកដែលនិងមានការបន្ធូរបន្ថយលើការដាក់ពន្ធ ដូច្នេះលទ្ធផលនៃការចរចាជាក់ស្តែង និងសេចក្តីព្រាងទាំងឡាយដែលគណៈប្រតិភូកម្ពុជានិងទៅចរចានោះនឹងមានផលផ្លែផ្កា និងផលវិជ្ជមានជាច្រើននាំមកឱ្យកម្ពុជា។ ព្រោះ សហរដ្ឋអាមេរិកក៏ទទួលបានផលប្រយោជន៍ជាច្រើនពីកម្ពុជា ជាពិសេសផលិតផលកាត់ដេរ សំលៀកបំពាក់ សម្ភារៈសម្រាប់ធ្វើដំណើរផ្សេងៗដែលរួមចំណែកដល់ការប្រើប្រាស់របស់ប្រជាជនសហរដ្ឋអាមេរិក ទាំងតម្លៃ និងគុណភាព។

លោកបណ្ឌិតថា «អាមេរិកនិងមានការបន្ធូរបន្ថយពន្ធច្រើនមកដល់កម្ពុជា ឬអាចថាវិលទៅដល់ស្ថានភាពដើមវិញក៏ថាបាន ក្នុងរង្វង់ប្រមាណ ១០%ជាង នៅក្នុងកិច្ចការដាក់ពន្ធទៅវិញទៅមកនេះ។ មួយវិញទៀត កម្ពុជាផ្ទាល់ក៏បានដាក់ចេញចំណុចបន្ធូរបន្ថយពន្ធដល់ទៅ ៥% លើមុខទំនិញ ១៩មុខ ដែលនាំចូលមកលក់នៅក្នុងប្រទេសកម្ពុជា ដូច្នេះចំណុចនេះហើយដែលយើងអាចមានចំណុចដែលត្រូវតវ៉ាជាមួយអាមេរិក»។

លោកបណ្ឌិតបានថ្លែងអះអាងថា កម្ពុជាក៏ធ្លាប់មានទំនាក់ទំនងល្អ និងធ្លាប់ជួយអាមេរិក ដូច្នេះចំណុចទាំងអស់នេះក៏ជាកិច្ចការមួយដែលរដ្ឋបាលលោក ដូណាល់ ត្រាំ យកទៅគិតពិចារណា ព្រោះយើងអាចមើលឃើញលក្ខណជាច្រើនរបស់អាមេរិក ពិសេសសុខុមាលភាពរបស់កម្មករនិយោជិកនៅកម្ពុជាដែលមានប្រមាណជាង ១លាននាក់ បូកជាមួយការបង្កើតការងារយ៉ាងច្រើនសម្រាប់ជួយដល់ជីវភាពរស់នៅរបស់ប្រជាជនកម្ពុជា និងការយកចិត្តរបស់រាជរដ្ឋាភិបាលកម្ពុជា ជាពិសេសកន្លងទៅក៏មានការទទួលស្គាល់ និងលើកទឹកចិត្តពីស្ថានទូតផ្សេងៗ ដែលបានគាំទ្រដល់ផលិតកម្មកាត់ដែរ សំលៀកបំពាក់ ផលិតផលធ្វើដំណើរផ្សេងៗជាដើម។

ទន្ទឹមនេះ លោកក៏បានបន្ថែមដែរថា «តាមរយៈការហាមឃាត់ពីតុលាការពាណិជ្ជកម្មអាមេរិក ទោះជាចេតនា ឬមិនចេតនាក៏ដោយ ក៏កម្ពុជអាចទទួលបានផ្លែផ្កាពីការសម្រេចរបស់តុលាការពាណិជ្ជកម្មនេះដែរ ដោយសារតែពេលវេលានេះជាពេលវេលាល្អសម្រាប់កម្ពុជា ដែលកម្ពុជាកំពុងតែមានការបារម្ភក្នុងការចរចានៅជុំទី២ ជាមួយភាគីសហរដ្ឋអាមេរិកផង ដូច្នេះនេះហាក់ដូចជាឱកាសសម្រាប់កម្ពុជា ដែលនេះអាចទាញជាលទ្ធផលផ្លែផ្កា និងអាចទទួលការដូរពីសហរដ្ឋអាមេរិកក្នុងការបន្ធូរបន្ថយពន្ធ ជាពិសេសសម្រាប់ទំនិញកម្ពុជា ឬលើទំនិញសំលៀកបំពាក់ កាត់ដេរ ស្បែកជើង និងផលិតផលធ្វើដំណើររបស់កម្ពុជាទៅលក់នៅទីផ្សារអាមេរិក»។

អត្ថបទ៖ ឌិន ថារី

The post វិស័យឯកជន និងអ្នកជំនាញមើលឃើញសញ្ញាវិជ្ជមានរបស់កម្ពុជាក្នុងការចរចាពន្ធជាមួយអាមេរិក appeared first on Kampuchea Thmey Daily.

ពាណិជ្ជកម្មអន្តរជាតិរបស់កម្ពុជាសម្រេចបានជាង ៩,៤៤ពាន់លានដុល្លារ នៅក្នុង២ខែដំបូង

May Kunmakara — Mon, 10 Mar 2025 03:02:06 +0000

ទំហំពាណិជ្ជកម្មអន្តរជាតិរបស់កម្ពុជាសម្រេចបានទឹកប្រាក់ជាង៩,៤៤ពាន់លានដុល្លាក្នុងរយៈពេល២ខែដើមឆ្នាំ ២០២៥ កើនឡើងជាង ១៦ ភាគរយ បើប្រៀបធៀបនឹងរយៈពេលដូចគ្នានៅឆ្នាំ ២០២៤ ដែលមានចំនួនជាង ៨,១២ ពាន់លានដុល្លារ។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ ខែមីនា ឆ្នាំ ២០២៥។

ទិន្នន័យដដែលបង្ហាញថា ទំហំនៃការនាំចេញ-នាំចូលសរុបនេះ ក្នុងនោះទំនិញរបស់កម្ពុជានាំចេញមានទំហំទឹកប្រាក់ជាង ៤,៤៦០ ពាន់លានដុល្លារ កើនឡើងជិត ១២ ភាគរយចំណែកឯទំនិញនាំចូលពីក្រៅប្រទេសមានទំហំទឹកប្រាក់ចំនួន ៤,៩៨៧ ពាន់លានដុល្លារ កើន ២០,៦ ភាគរយ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាប្រាប់កម្ពុជាថ្មីថា ស្របពេលដែលស្ថានភាពសេដ្ឋកិច្ចសកលហាក់មានសភាពល្អប្រសើរជាងមុន ធ្វើឱ្យការបញ្ជាទិញលើមុខទំនិញរបស់កម្ពុជាមានកំណើន ស្របពេលដែលបញ្ហាឡើងកំដៅនៃសង្គ្រាមពាណិជ្ជកម្មរវាងប្រទេសមហាអំណាចក៏ផ្តល់ផលវិជ្ជមានដល់កម្បុជាំផងដែរ។

អ្នកឧកញ៉ា លឹម ហេង បញ្ជាក់ថា៖ «យើងមើលឃើញថាសម្រាប់ឆ្នាំនេះ ការធ្វើពាណិជ្ជកម្មរបស់កម្ពុជាមានសភាពល្អប្រសើរចាប់ពីតាំងពីដើមឆ្នាំ ដោយសារតែកត្តាអំណោយផលនៃខ្សែច្រវ៉ាក់ផលិតកម្ម និងការកើនឡើងនៃតម្រូវការសកល»។
អ្នកឧកញ៉ាថា កត្តាដែលនាំឱ្យអ្នកវិនិយោគ និងការនាំចេញកើនឡើងដោយសារស្ថិរភាពនយោបាយ ច្បាប់វិនិយោគថ្មីមានការលើកទឹកចិត្តច្រើន ព្រមទាំងកត្តាទីផ្សារដែលកម្ពុជាយើងមានទីផ្សារសេរីពាណិជ្ជកម្មកម្ពុជា-ចិន កម្ពុជា-កូរ៉េ ក៏ដូចជា RCEP ទន្ទឹមសង្គ្រាមពាណិជ្ជកម្មអាមេរិក-ចិន កំពុងដំឡើងពន្ធដាក់គ្នាក៏ជាឱកាសសម្រាប់កម្ពុជាទាក់ទាញអ្នកវិនិយោគដើម្បីផលិតក្នុងការនាំចេញ»។

លោកស្រីបណ្ឌិត ជា សិរី ទេសាភិបាលធនាគារជាតិ នៃកម្ពុជាបានលើកឡើងថា ការអនុវត្តដោយប្រសិទ្ធភាពនូវយុទ្ធសាស្រ្តបញ្ចកោណ-ដំណាក់កាលទី១ បានជួយជំរុញសេដ្ឋកិច្ចកម្ពុជាឱ្យបន្តងើបឡើងក្នុងអត្រា ៦ ភាគរយ នៅឆ្នាំ២០២៤ ដែលគាំទ្រជាចម្បងដោយកំណើនខ្ពស់នៃការនាំចេញ ជាពិសេសផលិតផលកាត់ដេរ និងការបន្តងើបឡើងជាលំដាប់នៃវិស័យទេសចរណ៍ ទោះបីវិស័យសំណង់ និងអចលនទ្រព្យ និងកសិកម្ម បន្តមានកំណើនទាប។

យោងតាមក្រសួងពាណិជ្ជកម្មនៅក្នុងឆ្នាំ ២០២៤ ការដោះដូរទំនិញអន្តរជាតិរបស់កម្ពុជា សម្រេចបាននូវទំហំទឹកប្រាក់ជាង ៥៤,៧៤ ពាន់លានដុល្លារ មានការកើនឡើង ១៦,៩% ធៀបនឹងឆ្នាំ ២០២៣។

ទំនិញដែលកម្ពុជា នាំចេញទៅទីផ្សារអន្តរជាតិ រួមមាន សម្លៀកបំពាក់ ស្បែកជើង ម៉ាស៊ីន និងឧបករណ៍អគ្គិសនី វត្ថុធាតុធ្វើអំពីស្បែក បរិក្ខារធ្វើពីរោមសត្វ ធញ្ញជាតិ កៅស៊ូ និងផលិតផលធ្វើអំពីកៅស៊ូ និងគ្រឿងសង្ហារឹមជាដើម៕

The post ពាណិជ្ជកម្មអន្តរជាតិរបស់កម្ពុជាសម្រេចបានជាង ៩,៤៤ពាន់លានដុល្លារ នៅក្នុង២ខែដំបូង appeared first on Kampuchea Thmey Daily.

អ្នកឧកញ៉ា លឹម ហេង Archives - Kampuchea Thmey Daily

អ្នក​ឧកញ៉ា ​លឹម ហេង៖ សូម​កុំ​ឲ្យ​ “ច្រក​ចេញ​ចូល​តែមួយ” ក្លាយ​ជា “ច្រក​ជាប់​គាំង​តែមួយ”

បណ្តាពាណិជ្ជករថៃបង្វែរទិសនាំចូលទំនិញ​មកកម្ពុជាតាមផ្លូវទឹក ក្រោយការបិទច្រកទ្វារព្រំដែនគោក