ឥណ្ឌូណេស៊ី Archives - Kampuchea Thmey Daily

ឥណ្ឌូណេស៊ីគ្រោងសាងសង់ព្រលានយន្តហោះថ្មី ៣៩ កន្លែង ទូទាំងប្រជុំកោះ

Huon Dina — Wed, 01 Jul 2026 04:44:53 +0000

ក្រសួងដឹកជញ្ជូនឥណ្ឌូណេស៊ី កំពុងរៀបចំទីតាំងចំនួន ៣៩ សម្រាប់ការសាងសង់អាកាសយានដ្ឋានថ្មីនៅទូទាំងប្រទេស ដើម្បីពង្រឹងការតភ្ជាប់ជាតិ និងជំរុញកំណើនសេដ្ឋកិច្ចក្នុងតំបន់។ នេះបើតាមការចុះផ្សាយរបស់កាសែត Antara នាថ្ងៃពុធនេះ។

ផែនការនេះ នឹងបង្កើនព្រលានយន្តហោះរបស់ឥណ្ឌូណេស៊ីដល់ ២៩៦ កន្លែង ដោយបន្ថែមពីលើ ២៥៧ កន្លែង ដែលកំពុងដំណើរការរួចហើយនៅទូទាំងប្រទេស។

អគ្គនាយកអាកាសចរណ៍ស៊ីវិលនៃក្រសួងដឹកជញ្ជូន លោក Lukman F. Laisa បាននិយាយកាលពីថ្ងៃអង្គារថា៖ «បណ្តាញនេះ(ព្រលានយន្តហោះ) ឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលដើម្បីផ្តល់ការតភ្ជាប់ស្មើភាពគ្នាទៅកាន់តំបន់ព្រំដែន តំបន់ដាច់ស្រយាលបំផុត និងតំបន់អភិវឌ្ឍន៍តិចតួច»។

លោក Lukman បានពន្យល់ថា ការអភិវឌ្ឍហេដ្ឋារចនាសម្ព័ន្ធអាកាសចរណ៍នៅឥណ្ឌូណេស៊ី ដែលជាប្រជុំកោះដ៏ធំបំផុតលើពិភពលោក បង្ហាញពីបញ្ហាប្រឈមខាងភូមិសាស្ត្រដ៏ស្មុគស្មាញ ដែលទាមទារឱ្យវិស្វករសាងសង់នៅលើវាលភក់ តំបន់ដីសើម ភ្នំរដិបរដុប និងកោះតូចៗដាច់ស្រយាល។

លោកបានសង្កត់ធ្ងន់ថា ការអភិវឌ្ឍព្រលាននាពេលអនាគត ត្រូវតែផ្តោតលើនិរន្តរភាពរយៈពេលវែងដោយនឹងផ្តល់អាទិភាពដល់សុវត្ថិភាព ការប្រើប្រាស់បច្ចេកវិទ្យាទំនើប និងភាពធន់ប្រឆាំងនឹងការប្រែប្រួលអាកាសធាតុ។

គួរគូសបញ្ជាក់ថា ឧស្សាហកម្មអាកាសចរណ៍ក្នុងស្រុកឥណ្ឌូណេស៊ីកំពុងរីកចម្រើនយ៉ាងឆាប់រហ័ស ដោយសមាគមដឹកជញ្ជូនផ្លូវអាកាសអន្តរជាតិ (IATA) បានព្យាករថា ប្រទេសនេះនឹងក្លាយជាទីផ្សារអាកាសចរណ៍ធំជាងគេទី ៤ របស់ពិភពលោកនៅឆ្នាំ ២០៣០។ ឥណ្ឌូណេស៊ីរួមចំណែកទីផ្សារអាកាសចរណ៍សរុបជាង ៤១% នៅអាស៊ីអាគ្នេយ៍ ដោយទិន្នន័យផ្លូវការរបស់ BPS-Statistics Indonesia បានកត់ត្រាតម្រូវការជាមធ្យមក្នុងស្រុកប្រមាណ ៥,៤៦ លាននាក់/ខែ៕

The post ឥណ្ឌូណេស៊ីគ្រោងសាងសង់ព្រលានយន្តហោះថ្មី ៣៩ កន្លែង ទូទាំងប្រជុំកោះ appeared first on Kampuchea Thmey Daily.

ឥណ្ឌូណេស៊ីគ្រោងអភិវឌ្ឍថាមពលពន្លឺព្រះអាទិត្យខ្នាតយក្ស ដោយចំណាយ ៧១ ប៊ីលានដុល្លារ

Huon Dina — Mon, 08 Jun 2026 04:02:59 +0000

ឥណ្ឌូណេស៊ីកំពុងរៀបចំគម្រោងអភិវឌ្ឍថាមពលពន្លឺព្រះអាទិត្យធំជាងគេបំផុតមួយរបស់ពិភពលោក ជាមួយនឹងអនុភាពផលិតថាមពល ១០០ ជីហ្គាវ៉ាត់ (GW) ក្រោមថវិកាវិនិយោគរហូតដល់ទៅ ៧១,៣ ប៊ីលានដុល្លារ ចំពេលដែលប្រទេសនេះកំពុងស្វែងរកការពន្លឿនការផ្លាស់ប្តូរថាមពល និងកាត់បន្ថយការពឹងផ្អែកលើឥន្ធនៈហ្វូស៊ីល។ នេះបើតាមការចុះផ្សាយរបស់បន្តរបស់ភ្នាក់ងារព័ត៌មាន VNA។

ក្រសួងថាមពល និងធនធានរ៉ែឥណ្ឌូណេស៊ីបាននិយាយថា ខ្លួនបានសម្របសម្រួលជាមួយក្រសួងកិច្ចការកសិកម្ម និងរៀបចំដីធ្លី ដើម្បីរៀបចំដីប្រហែល ២៤ ០០០ ហិកតា នៅលើកោះជ្វាសម្រាប់គម្រោងថាមពលពន្លឺព្រះអាទិត្យទ្រង់ទ្រាយយក្ស។

ក្រសួងបន្តថា អាជ្ញាធរឥណ្ឌូណេស៊ីបានបញ្ចប់ការវាយតម្លៃដីធ្លី និងបានកំណត់តំបន់សម្រាប់គម្រោង ហើយនៅដំណាក់កាលដំបូង រដ្ឋាភិបាលនឹងផ្តល់អាទិភាពដល់គម្រោងដែលមានសមត្ថភាពផលិតថាមពលរួមគ្នា ១៧ GW។

ក្នុងពេលជាមួយគ្នានោះ ឥណ្ឌូណេស៊ីក៏មានគម្រោងអភិវឌ្ឍប្រព័ន្ធស្តុកទុកថាមពលថ្ម (BESS) ដែលមានសមត្ថភាពសរុបប្រហែល ៣៣ GW ផងដែរ ដើម្បីធានាបាននូវស្ថេរភាពបណ្តាញអគ្គិសនី ខណៈចំណែកនៃថាមពលកកើតឡើងវិញក្នុងល្បាយថាមពលជាតិ បន្តកើនឡើង។

គួរគូសបញ្ជាក់ថា គម្រោងថាមពលពន្លឺថាមពលយក្សរបស់ឥណ្ឌូណេស៊ី គឺជាផ្នែកមួយនៃយុទ្ធសាស្ត្រផ្លាស់ប្តូរថាមពលដ៏ទូលំទូលាយរបស់ប្រទេស។ កន្លងមក លោកប្រធានាធិបតី ប្រាបូវូ ស៊ូប៊ីយ៉ានតូ បានកំណត់គោលដៅអភិវឌ្ឍថាមពលពន្លឺព្រះអាទិត្យចំនួន ១០០ GW ចន្លោះឆ្នាំ ២០២៦ និង ២០២៨។

អ្នកសង្កេតការណ៍បានពិពណ៌នាអំពីគោលដៅនេះថាមានមហិច្ឆតាខ្ពស់ ដោយកត់សម្គាល់ថា គម្រោងថាមពលពន្លឺព្រះអាទិត្យដែលបានដំណើររួចហើយរបស់ឥណ្ឌូណេស៊ី មានត្រឹមតែប្រហែល ១,៥ GW ប៉ុណ្ណោះ។

គួរគូសបញ្ជាក់ថា ឥណ្ឌូណេស៊ី ដែលមានសេដ្ឋកិច្ចធំបំផុតរបស់អាស៊ីអាគ្នេយ៍ ស្ថិតក្នុងចំណោមប្រទេសដែលបញ្ចេញឧស្ម័នផ្ទះកញ្ចក់ដ៏ធំមួយរបស់ពិភពលោក ដោយសារតែការពឹងផ្អែកយ៉ាងខ្លាំងលើការផលិតថាមពលដើរដោយធ្យូងថ្ម។ ដូច្នេះ ការពង្រីកថាមពលកកើតឡើងវិញ ត្រូវបានគេមើលឃើញថាជាជំហានដ៏សំខាន់មួយឆ្ពោះទៅរកការបំពេញតាមការប្តេជ្ញាចិត្តកាត់បន្ថយការបំភាយឧស្ម័នរបស់ខ្លួន និងសម្រេចបាននូវការបំភាយឧស្ម័នសុទ្ធសូន្យក្នុងទសវត្សរ៍ខាងមុខ៕

The post ឥណ្ឌូណេស៊ីគ្រោងអភិវឌ្ឍថាមពលពន្លឺព្រះអាទិត្យខ្នាតយក្ស ដោយចំណាយ ៧១ ប៊ីលានដុល្លារ appeared first on Kampuchea Thmey Daily.

អគ្គិភ័យដ៏ធំនៅឥណ្ឌូណេស៊ី បំផ្លាញផ្ទះ ២៥០ខ្នង មនុស្ស៣នាក់របួស និងជម្លៀស ៣០០គ្រួសារ

Minea Neu — Wed, 03 Jun 2026 04:11:41 +0000

អគ្គិភ័យដ៏ធំ បានឆាបឆេះតំបន់លំនៅដ្ឋានដែលមានប្រជាជនរស់នៅច្រើនកុះករមួយកន្លែង កណ្តាលទីក្រុងហ្សាកាតា ប្រទេសឥណ្ឌូណេស៊ី នៅយប់ថ្ងៃចន្ទ បណ្តាលឱ្យមនុស្សបីនាក់រងរបួស និងគ្រួសាររាប់រយត្រូវជម្លៀស។

យោងតាមសារព័ត៌មានអង់គ្លេស The Independent ផ្សាយថ្ងៃទី០៣ ខែមិថុនា ឆ្នាំ២០២៦ ទីភ្នាក់ងារពន្លត់អគ្គិភ័យ និងជួយសង្គ្រោះក្រុងហ្សាកាតា បានឲ្យដឹងថា អគ្គិភ័យនេះបានឆាបឆេះនៅម៉ោងប្រហែល ៨:៥៥នាទីយប់ (ម៉ោងក្នុងស្រុក) ក្នុងសង្កាត់ Kebon Kosong ស្រុក Kemayoran រដ្ឋធានីឥណ្ឌូណេស៊ី។

ភ្លើងឆេះផ្ទះនៅឥណ្ឌូណេស៊ី កាលពីយប់ថ្ងៃចន្ទ។ រូបភាព៖ Reuters

យ៉ាងណាមិញ អគ្គិភ័យបានរាលដាលយ៉ាងឆាប់រហ័សពាសពេញតំបន់មនុស្សរស់នៅច្រើនកុះករ ដោយលេបត្របាក់ផ្ទះរាប់រយខ្នង។ ប៉ូលិសឥណ្ឌូណេស៊ី បានឲ្យដឹងថា អគ្គិភ័យបានបំផ្លាញផ្ទះប្រហែល ២៥០ខ្នង និងជម្លៀសគ្រួសារចំនួន ៣០០គ្រួសារ។

ប៉ូលិសបន្ថែមថា អគ្គិភ័យបានចាប់ផ្តើមឆេះដំបូងលើផ្ទះពីរខ្នងប៉ុណ្ណោះ មុនពេលរាលដាលយ៉ាងឆាប់រហ័សពាសពេញតំបន់ដ៏ធំមួយ។

ប៉ូលិសនៅតំបន់កណ្តាលទីក្រុងហ្សាកាតាបានដាក់ពង្រាយមន្ត្រីចំនួន ២០០នាក់ ដើម្បីជួយដល់ការជម្លៀសនិងធានាសុវត្ថិភាពតំបន់នោះ ខណៈរថយន្តពន្លត់អគ្គិភ័យជាង ២៥គ្រឿងបានប្រយុទ្ធនឹងអណ្តាតភ្លើង។

គួរបញ្ជាក់ថា អគ្គិភ័យបានឆាបឆេះអស់រយៈពេលជាងពីរម៉ោង មុនពេលក្រុមពន្លត់អគ្គិភ័យគ្រប់គ្រងបាននៅម៉ោងជិត ១១:៣០នាទីយប់។ អាជ្ញាធរថា ប្រតិបត្តិការស្វែងរក និងជួយសង្គ្រោះបានបន្តពេញមួយយប់ ហើយត្រូវបានបញ្ចប់នៅម៉ោងប្រហែល ៤ព្រឹកថ្ងៃអង្គារ។

វីដេអូពីលើអាកាសបង្ហាញពីអណ្តាតភ្លើងកំពុងឆាបឆេះពាសពេញតំបន់ធំមួយ ដោយមានផ្សែងក្រាស់ៗហុយលើទីក្រុង។

រូបភាពថតនៅព្រឹកថ្ងៃអង្គារបង្ហាញជួរផ្ទះ និងហាងដែលឆេះអស់ច្រើនខ្នង ខណៈប្រជាជនកំពុងស្វែងរករបស់របរ នៅសល់បន្ទាប់ពីភ្លើងឆេះ។

នាយកដ្ឋានពន្លត់អគ្គិភ័យនិងជួយសង្គ្រោះទីក្រុងហ្សាកាតា និយាយថា អគ្គិភ័យនេះសង្ស័យថាបណ្តាលមកពីការដាច់ចរន្តអគ្គិសនីក្នុងផ្ទះមួយ មុនពេលឆាបឆេះខ្លាំង៕

សម្រួល៖ ណឺ មិនា

The post អគ្គិភ័យដ៏ធំនៅឥណ្ឌូណេស៊ី បំផ្លាញផ្ទះ ២៥០ខ្នង មនុស្ស៣នាក់របួស និងជម្លៀស ៣០០គ្រួសារ appeared first on Kampuchea Thmey Daily.

អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ

Minea Neu — Tue, 02 Jun 2026 11:45:00 +0000

មីស៊ីល BrahMos ត្រូវបានប្រជាជាតិអាស៊ីអាគ្នេយ៍វាយតម្លៃខ្ពស់ ព្រោះវាជាមីស៊ីលហោះហើរលឿនបំផុតមួយរបស់ពិភពលោក ដែលធ្វើដំណើរក្នុងល្បឿនជាង ៣ ៧០០គីឡូម៉ែត្រក្នុងមួយម៉ោង(Mach២.៨ ទៅ ៣.០)។

ល្បឿនដ៏មហិមានេះ រួមផ្សំជាមួយនឹងស្វ័យភាពបាញ់រហ័សនិងសមត្ថភាពហោះរំលងសមុទ្រ ធ្វើឱ្យប្រព័ន្ធការពារដែនអាកាសរបស់សត្រូវស្ទើរតែមិនអាចស្ទាក់ចាប់បាន។

មីស៊ីល BrahMos របស់ឥណ្ឌា។ រូបភាព៖ Reuters

កាសែត The Diplomat បានចេញផ្សាយដោយពណ៌នាអំពីគុណសម្បត្តិយុទ្ធសាស្ត្រជាក់លាក់ដែលជំរុញមានកិច្ចសន្យាទិញពីប្រទេសជាសមាជិករបស់សមាគមប្រជាជាតិអាស៊ីអាគ្នេយ៍ ហៅកាត់ «អាស៊ាន» មាន វៀតណាម ហ្វីលីពីននិងឥណ្ឌូណេស៊ី ដែលកំពុងចុះកុងត្រាជាមួយឥណ្ឌា នាំយកមីស៊ីលប្រភេទនេះទុកសម្រាប់វិស័យការពារជាតិរបស់ពួកគេ។

តើ មីស៊ីល BrahMos មានអានុភាពយ៉ាងណាខ្លះ? ខាងក្រោមនេះ ជាការបង្ហាញព័ត៌មានខ្លះៗអំពីអានុភាពនៃអាវុធរបស់របស់ឥណ្ឌា ដែលជាមហាអំណាចនៅអាស៊ីខាងត្បូង និងជាប្រទេសគូប្រជែងរបស់ចិនផងដែរ៖

១. កម្លាំងបំផ្លិចបំផ្លាញដែលមិនអាចប្រៀបផ្ទឹមបាន៖ ដោយសារតែល្បឿនលឿនស្លេវដូចផ្លេកបន្ទោររបស់វា មីស៊ីលនេះមានថាមពលដ៏ធំសម្បើមពេលប៉ះទង្គិច ដែលធ្វើឱ្យវាបំផ្លាញនាវាចម្បាំង ដូចជា រថពាសដែកធន់ធ្ងន់ ឬទីតាំងដីរឹង សូម្បីតែមុនពេលក្បាលគ្រាប់វាផ្ទុះក៏ដោយ។

២. របៀបបាញ់បង្ហោះអាចប្រើប្រាស់បានច្រើនយ៉ាង៖ មីស៊ីល BrahMos អាចត្រូវបានដាក់ពង្រាយនៅទូទាំងតំបន់ដីគោក អាកាស និងកងទ័ពជើងទឹក ដែលអនុញ្ញាតឱ្យប្រទេសហ្វីលីពីន វៀតណាម និងឥណ្ឌូណេស៊ី កែសម្រួលមីស៊ីលនេះជាអាគុយប្រឆាំងកប៉ាល់ចល័តដែលមានមូលដ្ឋាននៅឆ្នេរសមុទ្រ។

៣. វិសាលភាពពង្រីក៖ កម្លាំងមីស៊ីល Brahmos នឹងអនុញ្ញាតឱ្យប្រទេសទាំងបីវាយប្រហារគោលដៅលើដីគោក និងដែនសមុទ្រនៅចម្ងាយរហូតដល់ ២៩០គីឡូម៉ែត្រ អាចដាក់គោលដៅដល់តំបន់ដ៏ធំទូលាយនៃសមុទ្រចិនខាងត្បូងដែលមានជម្លោះឱ្យស្ថិតនៅក្នុងជួរការពារ និងរារាំងរបស់ពួកគេ។

៤. ទម្រង់លាក់ខ្លួន៖ គន្លងហោះហើររបស់វា អាចត្រូវបានលៃតម្រូវជាកម្លាំង រួមទាំងការហោះហើររយៈកម្ពស់ខ្ពស់បន្តដោយដំណាក់កាលចុងក្រោយ ដែលធ្លាក់ទាបដល់កម្ពស់ ៥-១០ម៉ែត្រលើផ្ទៃទឹក ដើម្បីគេចពីការរកឃើញដោយរ៉ាដារបស់សត្រូវ៕

សម្រួល៖ ណឺ មិនា

The post អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ appeared first on Kampuchea Thmey Daily.

សំណល់គ្រាប់បែកពីសង្រ្គាមលោកទី២ ផ្ទុះបណ្តាលឲ្យស្លាប់៥ របួសជិត២០នាក់ និងបំផ្លាញផ្ទះ៩ខ្នងនៅឥណ្ឌូណេស៊ី

Minea Neu — Mon, 01 Jun 2026 13:30:00 +0000

ប៉ូលិសឥណ្ឌូណេស៊ី បានឱ្យដឹងនៅថ្ងៃចន្ទនេះ ថា គ្រាប់បែកដែលសង្ស័យថា នៅសេសសល់តាំងពីសង្គ្រាមលោកលើកទី២ បានផ្ទុះនៅក្រោមតំបន់ផ្ទះឈើក្នុងភូមិនេសាទ ប្រទេសឥណ្ឌូណេស៊ី ដោយសម្លាប់មនុស្ស៥នាក់ និងរបួសជិត ២០នាក់។

យោងតាមវីដេអូមួយផ្សាយដោយទូរទស្សន៍ Kompas TV ការផ្ទុះនេះគឺ នៅតំបន់ Papua ភាគខាងកើតប្រទេសឥណ្ឌូណេស៊ី បង្កឱ្យអ្នកស្រុកភ្ញាក់ផ្អើលជាមួយនឹងសំឡេងផ្ទុះយ៉ាងខ្លាំង នៅរសៀលថ្ងៃអាទិត្យ ដោយបញ្ចេញអណ្តាតភ្លើងមួយដុំ បន្ទាប់មកមានផ្សែងក្រាស់ៗ ជាពិសេសបំផ្លាញផ្ទះចំនួន ៩ខ្នង។

ផ្ទុះគ្រាប់បែកនៅឥណ្ឌូណេស៊ី។ រូបភាព៖ People.com

អ្នកនាំពាក្យប៉ូលិសនៅតំបន់ Papua លោក Cahyo Sukarnito ប្រាប់ ភ្នាក់ងារសារព័ត៌មាន AFP នៅថ្ងៃទី០១ ខែមិថុនា ថា៖ « ប្រភពនៃការផ្ទុះនេះត្រូវបានគេសង្ស័យថាជាគ្រាប់បែក ឬកាំភ្លើងត្បាល់ដែលសេសសល់ពីសង្គ្រាមលោកលើកទី២»។

ហេតុការណ៍នេះ មនុស្សបីនាក់នៅតែបាត់ខ្លួន ប៉ុន្តែ លោក Cahyo និយាយថា ផ្នែកខ្លះនៃរាងកាយជាច្រើនមិនទាន់ត្រូវបានកំណត់អត្តសញ្ញាណនៅឡើយទេ។

លោកបន្ថែមថា យ៉ាងហោចណាស់មានមនុស្ស ១៩នាក់ត្រូវបានយកទៅព្យាបាលទាន់ពេល ព្រោះរងរបួសស្រាល។លោក Cahyo បន្ថែមថា៖ « យើងនឹងផ្តល់ព័ត៌មានថ្មីៗបន្ថែមទៀត ពេលស្វែងរកជនរងគ្រោះ និងស៊ើបអង្កេតបញ្ចប់»។

គួរបញ្ជាក់ថា កាលពីឆ្នាំមុន ជនស៊ីវិល ៩នាក់ស្ថិតក្នុងចំណោម ១៣នាក់ត្រូវបានសម្លាប់នៅក្នុងខេត្ត Java ពេលមានការផ្ទុះគ្រាប់បែកមួយបានកើតឡើង។ ប្រទេសឥណ្ឌូណេស៊ីគឺជាតំបន់សមរភូមិដ៏សំខាន់មួយ អំឡុងសង្គ្រាមលោកលើកទី២ ៕

សម្រួល៖ ណឺ មិនា

The post សំណល់គ្រាប់បែកពីសង្រ្គាមលោកទី២ ផ្ទុះបណ្តាលឲ្យស្លាប់៥ របួសជិត២០នាក់ និងបំផ្លាញផ្ទះ៩ខ្នងនៅឥណ្ឌូណេស៊ី appeared first on Kampuchea Thmey Daily.

ស្ងាត់ៗ វៀតណាមចុះកុងត្រាទិញមីស៊ីលលឿនជាងសំឡេងពីឥណ្ឌាតម្លៃជិត ៦១០លាន ហើយ ឥណ្ឌូណេស៊ីក៏ទិញដែរ

Minea Neu — Mon, 01 Jun 2026 04:07:32 +0000

ស្របពេលពិភពលោកកំពុងមានភាពតានតឹងផ្នែកភូមិសាស្រ្ត ជម្លោះប្រដាប់អាវុធពីមួយថ្ងៃទៅមួយថ្ងៃក៏ចេះតែកើនឡើងដូចគ្នា រដ្ឋមន្រ្តីការពារជាតិឥណ្ឌា បានបញ្ជាក់ថា ប្រទេសខ្លួនបានចុះហត្ថលេខាលើកិច្ចព្រមព្រៀងនាំចេញមីស៊ីលល្បឿនលឿនជាងសំឡេង BrahMos ទៅកាន់ប្រទេសវៀតណាម ខណៈកិច្ចព្រមព្រៀងស្រដៀងគ្នានេះ ក៏ឥណ្ឌាបានធ្វើជាមួយប្រទេសឥណ្ឌូណេស៊ី ។ នេះបើយោងតាមរដ្ឋមន្ត្រីក្រសួងការពារជាតិ លោក Rajesh Kumar Singh អំឡុងពេលទស្សនកិច្ចនៅប្រទេសសិង្ហបុរី។

យោងតាមសារព័ត៌មាន NDTV World ផ្សាយថ្ងៃទី៣១ ខែឧសភា ឆ្នាំ២០២៦ ថ្លែងក្នុងកិច្ចប្រជុំវេទិកាសន្តិសុខ Shangri-La នៅប្រទេសសិង្ហបុរី រដ្ឋមន្ត្រីការពារជាតិឥណ្ឌា លោក Singh និយាយថា កិច្ចព្រមព្រៀងជាមួយវៀតណាមត្រូវបានចុះហត្ថលេខារួចហើយ ទោះបីជាមិនទាន់ត្រូវបានប្រកាសជាសាធារណៈក៏ដោយ។

មីស៊ីលល្បឿនលឿនជាងសំឡេងរបស់ឥណ្ឌា។ រូបភាព៖ NDTV world

លោក បន្ថែមថា៖ « ការចរចាជាមួយឥណ្ឌូណេស៊ីក៏ជិតដល់ទីបញ្ចប់ដែរ ដែលកិច្ចព្រមព្រៀងនេះអាចត្រូវបានបញ្ចប់ក្នុងពេលឆាប់ៗនេះ! ទាំងប្រទេសឥណ្ឌូណេស៊ី និងវៀតណាម កិច្ចព្រមព្រៀងកំពុងស្ថិតក្នុងដំណាក់កាលចុងក្រោយ។ តាមពិតទៅ សម្រាប់ប្រទេសវៀតណាម វាត្រូវបានចុះហត្ថលេខារួចហើយ គ្រាន់តែមិនទាន់ត្រូវបានប្រកាសជាសាធារណៈប៉ុណ្ណោះ ប៉ុន្តែចុះហត្ថលេខារួចហើយ»។

គួរបញ្ជាក់ថា កិច្ចព្រមព្រៀងជាមួយវៀតណាមមានតម្លៃជាង ៦១០លានដុល្លារ រួមបញ្ចូលទាំងអាគុយមីស៊ីលការពារឆ្នេរសមុទ្រ មីស៊ីលក្រុមដំបូង ការបណ្តុះបណ្តាល និងការគាំទ្រផ្នែកភស្តុភារ។

មិនតែប៉ុណ្ណោះ វៀតណាមអាចគ្រោងទិញមីស៊ីល BrahMos ជំនាន់បាញ់ចេញពីទីតាំងលើអាកាស នៅពេលក្រោយទៀត។

យ៉ាងណាមិញ ប្រទេសហ្វីលីពីនបានក្លាយជាអ្នកទិញប្រព័ន្ធមីស៊ីល BrahMos ពីបរទេសដំបូងគេ បន្ទាប់ពីបានចុះហត្ថលេខាលើកិច្ចព្រមព្រៀងមួយមានតម្លៃជិត ៣៧៥លានដុល្លារ ក្នុងឆ្នាំ ២០២២។

ចំណែកប្រទេសឥណ្ឌូណេស៊ី ត្រូវបានគេរំពឹងថា នឹងក្លាយជាប្រទេសបន្ទាប់ដែលទទួលបានមីស៊ីលប្រភេទនេះ ពេលកិច្ចព្រមព្រៀងត្រូវបានបញ្ចប់។

ការវិវឌ្ឍទាំងនេះកើតឡើង ពេលភាពតានតឹងនៅតែបន្តកើតមានក្នុងសមុទ្រចិនខាងត្បូង។ ប្រទេសវៀតណាម ឥណ្ឌូណេស៊ី និងហ្វីលីពីនសុទ្ធតែមានជម្លោះដែនសមុទ្រជាមួយប្រទេសចិនលើផ្នែកខ្លះនៃសមុទ្រ។

មិនតែប៉ុណ្ណោះ មីស៊ីល BrahMos ត្រូវបានចាត់ទុកថាជាមីស៊ីលលឿនបំផុតមួយក្នុងពិភពលោក មានល្បឿនជាងសំឡេងប្រហែលបីដង។

ការនាំចេញសម្ភារៈការពារជាតិរបស់ឥណ្ឌាឈានដល់កម្រិតខ្ពស់បំផុតមិនធ្លាប់មាន នៅក្នុងឆ្នាំហិរញ្ញវត្ថុ ២០២៤-២៥ ហើយរដ្ឋាភិបាលកំណត់គោលដៅបង្កើនរហូតដល់ ៥.២៧ប៊ីលាន នៅឆ្នាំ ២០៣០ ៕

សម្រួល៖ ណឺ មិនា

The post ស្ងាត់ៗ វៀតណាមចុះកុងត្រាទិញមីស៊ីលលឿនជាងសំឡេងពីឥណ្ឌាតម្លៃជិត ៦១០លាន ហើយ ឥណ្ឌូណេស៊ីក៏ទិញដែរ appeared first on Kampuchea Thmey Daily.

ឥណ្ឌូណេស៊ីរៀបចំបង្កើតប្រព័ន្ធនាំចូលពិសេស ដើម្បីនាំចូលប្រេងរុស្ស៊ី ១៥០ លានបារ៉ែល ឆ្នាំនេះ

Huon Dina — Mon, 25 May 2026 06:38:43 +0000

ឥណ្ឌូណេស៊ីកំពុងរៀបចំប្រព័ន្ធនាំចូល និងក្របខ័ណ្ឌបទប្បញ្ញត្តិពិសេស ដើម្បីបំពេញផែនការនាំចូលប្រេងរុស្ស៊ីប្រមាណ ១៥០ លានបារ៉ែល នៅឆ្នាំនេះ ខណៈទិន្នន័យបង្ហាញថា រហូតដល់ខែឧសភា ប្រទេសនេះទើបតែទទួលបានការដឹកជញ្ជូនប្រេងតែមួយជើងពីរុស្ស៊ីប៉ុណ្ណោះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីសប្ដាហ៍មុន ដោយស្រង់សម្ដីប្រភពមន្រ្តីជាន់ខ្ពស់ឥណ្ឌូណេស៊ីម្នាក់។

ការឱ្យដឹងយ៉ាងដូច្នេះ ធ្វើឡើងក្រោយឥណ្ឌូណេស៊ី និងរុស្ស៊ី បានសម្រេចលើកិច្ចព្រមព្រៀងផ្គត់ផ្គង់ប្រេងមួយកាលពីខែមុន ដែលនោះជាផ្នែកមួយនៃកិច្ចប្រឹងប្រែងរបស់ឥណ្ឌូណេស៊ីទប់ទល់នឹងវិបត្តិកង្វះខាតប្រេងសកលដោយសារតែជម្លោះអាមេរិក-អ៊ីរ៉ង់ ក្រោយប្រធានាធិបតី លោក ប្រាបូវូ ស៊ូប៊ីយ៉ានតូ ជួបជាមួយសមភាគីរុស្ស៊ី លោក វ្ល៉ាឌីមៀរ ពូទីន នៅក្រុងមូស្គូ។

ទោះបីជាមានក្របខ័ណ្ឌក៏ដោយ គោលដៅរបស់ឥណ្ឌូណេស៊ីមានមហិច្ឆតាខ្លាំងពេក។ ដើម្បីនាំចូលប្រេងចំនួន ១៥០ លានបារ៉ែល រវាងពាក់កណ្តាលឆ្នាំឆ្នាំនេះ ដល់ចុងខែមករាឆ្នាំក្រោយ រុស្ស៊ីត្រូវដឹកជញ្ជូនប្រេងប្រហែល ៧០០ ០០០ បារ៉ែល/ថ្ងៃ ដែលជិតបរិមាណដែលរុស្ស៊ីផ្ដល់ឱ្យតួកគី។

អ្នកជំនាញពាណិជ្ជកម្មបានលើកឡើងថា រុស្ស៊ីបច្ចុប្បន្ននាំចេញប្រេង ៥ លានបារ៉ែល/ថ្ងៃ ទៅចិន និងឥណ្ឌា ហើយការបែងចែកប្រេងទៅឱ្យអតិថិជនថ្មី មានន័យថា រុស្ស៊ីត្រូវបំបែកប្រេងខ្លះពីអតិថិជនចាស់ ដែលនោះអាចជាបញ្ហាលំបាក។

លោក Laode Sulaeman មន្ត្រីជាន់ខ្ពស់ក្រសួងថាមពលឥណ្ឌូណេស៊ី បានប្រាប់អ្នកយកព័ត៌មានកាលពីសប្ដាហ៍មុនថា មិនទាន់មានក្រុមហ៊ុនណាមួយ ត្រូវបានកំណត់ឱ្យធ្វើការនាំចូលនៅឡើយទេ។

លោក Sulaeman បន្តថា៖ «ក្រុមហ៊ុន(ថាមពលរដ្ឋ) Pertamina មានមូលបត្របំណុលសកល ហើយវាត្រូវតែជៀសវាងរឿងដែលអាចរំលោភលើលក្ខខណ្ឌនៃមូលបត្របំណុលសកលរបស់ក្រុមហ៊ុន។ នោះហើយជាមូលហេតុដែលយើងកំពុងស្ថិតក្នុងដំណើរការនៃការបង្កើតគម្រោងមួយ»។

ពេលសួរអំពីផែនការនាំចូល អ្នកនាំពាក្យរបស់ Pertamina លោក Muhammad Baron បាននិយាយកាលពីថ្ងៃសុក្រថា៖ «ដំណើរការទាំងមូលនឹងត្រូវបានអនុវត្តស្របតាមការណែនាំរបស់រដ្ឋាភិបាល ខណៈផ្តល់អាទិភាពដល់គោលការណ៍នៃអភិបាលកិច្ចសាជីវកម្មល្អ និងបទប្បញ្ញត្តិដែលអាចអនុវត្តបាន»។

អ្នកជំនាញពាណិជ្ជកម្មបាននិយាយថា ចំនួនមានកំណត់នៃនាវាដឹកប្រេងដោយសារតែទណ្ឌកម្មរបស់លោកខាងលិច និងរយៈចម្ងាយដឹកជញ្ជូនដ៏ឆ្ងាយ នឹងធ្វើឱ្យការដឹកជញ្ជូនប្រេងរុស្ស៊ីទៅឥណ្ឌូណេស៊ីមានការលំបាក និងចំណាយច្រើន។

គេមើលឃើញថា ឥណ្ឌូណេស៊ី ដែលនាំចូលប្រហែល ១ លានបារ៉ែល/ថ្ងៃ កំពុងស្វែងរកការផ្គត់ផ្គង់បន្ថែមពីប្រភពផ្សេងៗ រួមទាំងសហរដ្ឋអាមេរិក ដើម្បីពង្រឹងសន្តិសុខថាមពលរបស់ខ្លួន៕

The post ឥណ្ឌូណេស៊ីរៀបចំបង្កើតប្រព័ន្ធនាំចូលពិសេស ដើម្បីនាំចូលប្រេងរុស្ស៊ី ១៥០ លានបារ៉ែល ឆ្នាំនេះ appeared first on Kampuchea Thmey Daily.

រដ្ឋាភិបាលឥណ្ឌូណេស៊ី បំពាក់យន្តហោះចម្បាំងដល់យោធា និងប្តេជ្ញាពង្រឹងសមត្ថភាពវិស័យការពារជាតិ

Minea Neu — Mon, 18 May 2026 12:31:00 +0000

ប្រធានាធិបតីឥណ្ឌូណេស៊ី លោក Prabowo Subianto បានលើកឡើងនៅថ្ងៃចន្ទនេះ ថា ប្រទេសធំបំផុតនៅអាស៊ីអាគ្នេយ៍មួយនេះនឹងបន្តកសាងសមត្ថភាពការពារជាតិ ខណៈរដ្ឋាភិបាលបានប្រគល់សម្ភារយោធា រួមទាំងយន្តហោះចម្បាំង Rafale ចំនួន៦គ្រឿងផលិតនៅប្រទេសបារាំងឱ្យយោធាប្រើប្រាស់។

យោងតាមសារព័ត៌មាន The Star ផ្សាយថ្ងៃទី១៨ ខែឧសភា ឆ្នាំ២០២៦ លោក Prabowo បានធ្វើជាអធិបតីក្នុងពិធីប្រគល់យន្តហោះចម្បាំងនៅមូលដ្ឋានទ័ពអាកាសមួយក្នុងទីក្រុងហ្សាកាតា ជាកន្លែងដែលលោកបានត្រួតពិនិត្យឧបករណ៍ការពារជាតិទើបនឹងទទួលថ្មីៗនេះ រួមទាំងយន្តហោះ Dassault Falcon ៨x ចំនួន៦គ្រឿង និងយន្តហោះសម្រាប់ដឹកយោធាម៉ាក Airbus A៤០០M Atlas ចំនួន ២គ្រឿង។

លោក Prabowo កំពុងចុះពេលឧបករណ៍យោធា។ រូបភាព៖ Reuters

ទីក្រុងហ្សាកាតា បានចុះហត្ថលេខាលើកិច្ចព្រមព្រៀងចំនួន ៨.១ប៊ីលានដុល្លារអាមេរិកក្នុងឆ្នាំ២០២២ ក្រោមការដឹកនាំ លោក Prabowo ដើម្បីទិញយន្តហោះចម្បាំង Rafale ចំនួន ៤២គ្រឿង ផលិតនៅប្រទេសបារាំង។

លោក Prabowo លើកឡើងនៅថ្ងៃចន្ទថា ប្រទេសឥណ្ឌូណេស៊ីនឹងបន្តពង្រឹងសមត្ថភាពការពារជាតិរបស់ខ្លួន។

លោក បានប្រាប់អ្នកយកព័ត៌មានថា៖ « យើងត្រូវតែបន្តកែលម្អសមត្ថភាពការពារជាតិរបស់យើង ដើម្បីបម្រើផលប្រយោជន៍ជាតិ។ យើងគ្មានផលប្រយោជន៍អ្វីក្រៅពីការការពារទឹកដីរបស់យើងទេ។ យើងសង្កេតឃើញថា ភូមិសាស្ត្រនយោបាយសកលលោកពោរពេញដោយភាពមិនប្រាកដប្រជា ហើយយើងទទួលស្គាល់ថា ការការពារជាតិគឺជាតម្រូវការជាមុនសម្រាប់ស្ថិរភាព»។

មិនតែប៉ុណ្ណោះ លោក Rico Ricardo Sirait អ្នកនាំពាក្យក្រសួងការពារជាតិ និយាយថា ប្រទេសឥណ្ឌូណេស៊ីបានទទួលយន្តហោះចម្បាំង Rafale ចំនួន ៣គ្រឿងដំបូងនៅក្នុងខែមករា ហើយកម្មពិធីដាក់ឱ្យដំណើរការនៅថ្ងៃចន្ទ រួមមានយន្តហោះបន្ថែមចំនួន៣គ្រឿងសម្រាប់យោធា។

លោកគូសបញ្ជាក់ពីសារៈសំខាន់នៃយន្តហោះចម្បាំងទាំងនោះ ក្នុងការពង្រឹងប្រព័ន្ធការពារដែនអាកាសរបស់ប្រទេសឥណ្ឌូណេស៊ី និងធ្វើទំនើបកម្មឧបករណ៍ការពារជាតិក៏ដូចជាការវិនិយោគមួយ ដើម្បីការពារអធិបតេយ្យភាពរបស់ប្រទេសផងដែរ។

លោកថា៖ « រដ្ឋាភិបាលចាត់ទុកការពង្រឹងឧបករណ៍ការពារជាតិ មិនត្រឹមតែជាការផ្គត់ផ្គង់វេទិកាប្រយុទ្ធប៉ុណ្ណោះទេ ប៉ុន្តែជាការវិនិយោគជាយុទ្ធសាស្ត្រ មានគោលបំណងការពារអធិបតេយ្យភាព កិត្តិយសជាតិ និងការត្រៀមខ្លួនការពារជាតិ»៕

សម្រួល៖ ណឺ មិនា

The post រដ្ឋាភិបាលឥណ្ឌូណេស៊ី បំពាក់យន្តហោះចម្បាំងដល់យោធា និងប្តេជ្ញាពង្រឹងសមត្ថភាពវិស័យការពារជាតិ appeared first on Kampuchea Thmey Daily.

ឥណ្ឌូណេស៊ី Archives - Kampuchea Thmey Daily

ឥណ្ឌូណេស៊ីគ្រោងសាងសង់ព្រលានយន្តហោះថ្មី ៣៩ កន្លែង ទូទាំងប្រជុំកោះ

ឥណ្ឌូណេស៊ី​​គ្រោងអភិវឌ្ឍថាមពលពន្លឺព្រះអាទិត្យខ្នាតយក្ស​ ដោយចំណាយ​ ៧១ ប៊ីលានដុល្លារ​

អគ្គិភ័យ​ដ៏​ធំ​នៅ​ឥណ្ឌូណេស៊ី ​​បំផ្លាញ​ផ្ទះ​​ ២៥០​ខ្នង ​មនុស្ស​៣នាក់​របួស​​ និង​ជម្លៀស​ ៣០០គ្រួសារ​

​អានុភាព​មីស៊ីល BrahMos របស់​ឥណ្ឌា ទាក់​ចិត្ត​វៀត​ណាម ហ្វីលីពីន​ និង​ឥណ្ឌូណេស៊ី​​ ​ចុះកុងត្រាទិញ​

ឥណ្ឌូណេស៊ីរៀបចំ​បង្កើតប្រព័ន្ធ​នាំចូលពិសេស ដើម្បីនាំចូលប្រេងរុស្ស៊ី​ ១៥០ លានបារ៉ែល ឆ្នាំនេះ

ឥណ្ឌូណេស៊ីគ្រោងអភិវឌ្ឍថាមពលពន្លឺព្រះអាទិត្យខ្នាតយក្ស ដោយចំណាយ ៧១ ប៊ីលានដុល្លារ

អគ្គិភ័យដ៏ធំនៅឥណ្ឌូណេស៊ី បំផ្លាញផ្ទះ ២៥០ខ្នង មនុស្ស៣នាក់របួស និងជម្លៀស ៣០០គ្រួសារ

អានុភាពមីស៊ីល BrahMos របស់ឥណ្ឌា ទាក់ចិត្តវៀតណាម ហ្វីលីពីន និងឥណ្ឌូណេស៊ី ចុះកុងត្រាទិញ

ឥណ្ឌូណេស៊ីរៀបចំបង្កើតប្រព័ន្ធនាំចូលពិសេស ដើម្បីនាំចូលប្រេងរុស្ស៊ី ១៥០ លានបារ៉ែល ឆ្នាំនេះ