Antony Blinken Archives - Kampuchea Thmey Daily

គណៈកម្មាធិការសភាអាមេរិកផ្តល់អនុសាសន៍ឱ្យសភាពេញអង្គ ចោទលោក ប្ល៊ីនកែន ពីបទ«មើលស្រាល»

Rann Reuy — Wed, 25 Sep 2024 03:37:46 +0000

រដ្ឋមន្ត្រីការបរទេស អាន់តូនី ប្ល៊ីនកែន (Antony Blinken) កំពុងជាប់ភារកិច្ចក្នុងកិច្ចប្រជុំមហាសន្និបាតអង្គការសហប្រជាជាតិនៅបុរីញូវយ៉ក បានខាកខានទៅផ្តល់សក្ខីកម្មនៅមុខគណៈកម្មាធិកាសភាតាមដីកាកោះ(subpoena) ដែលចាត់ទុកជាការមើលងាយរដ្ឋសភា និងត្រូវប្រឈមទោសឧក្រិដ្ឋទៀតផង។

រដ្ឋមន្ត្រីការបរទេស អាន់តូនី ប្ល៊ីនកែន (Antony Blinken) ថ្លែងនៅសន្និបាតអង្គការសហប្រជាជាតិ។ FB/Blinken

ទីភ្នាក់ងារព័ត៌មានរ៉យទ័របានរាយការណ៍ថា គណៈកម្មាធិការកិច្ចការបរទេសរបស់រដ្ឋសភាតំណាងរាស្រ្តអាមេរិកដឹកនាំដោយគណបក្សសាធារណរដ្ឋ បានផ្តល់អនុសាសន៍កាលពីថ្ងៃទី២៤ខែកញ្ញាថា រដ្ឋមន្ត្រីការបរទេស អាន់តូនី ប្ល៊ីនកែន (Antony Blinken) ត្រូវដាក់ទោសដោយការមើលស្រាល ឬមើលងាយ (contempt) សភាចំពោះការខកខាកអនុវត្តតាមដីកាកោះ (subpoena) ដើម្បីឱ្យស្វែងរកព័ត៌មានអំពីភាពវឹកវរឆ្នាំ២០២១ ពេលដែលសហរដ្ឋអាមេរិកដកទ័ពអាមេរិកចេញពីអាហ្វហ្គានីស្ថាន។

សេចក្តីរាយការណ៍នោះ បានបន្តថា គណៈកម្មាធិកាសភាបានបោះឆ្នោតដោយសំឡេង ២៦-២៥ ក្នុងការគាំទ្ររបាយការណ៍របស់គណៈកម្មាធិការដែលផ្តល់អនុសាសន៍ថា សភាទាំងមូលរកឃើញលោក ប៊្លីនកែន ក្នុងការមើលស្រាលចំពោះការបដិសេធមិនអនុវត្តតាមដីការបស់ខ្លួនបន្ទាប់ពីលោកមិនបានបង្ហាញខ្លួននៅក្នុងសវនាការនៅព្រឹកថ្ងៃទី២៤ខែកញ្ញាស្តីពីការដកទ័ព។

ក្នុងរយៈពេលភ្លាមៗ ក្រសួងការបរទេសមិនបានឆ្លើយតបតាមការសាកសួររបស់រ៉យទ័រនោះទេ ចំពោះសំណើសុំការអត្ថាធិប្បាយលើការបោះឆ្នោតនោះទេ។

ប៉ុន្តែយោងតាមខ្លឹមសារដែលចុះផ្សាយលើគេហទំព័រក្រសួងការបរទេសសហរដ្ឋអាមេរិកកាលថ្ងៃទី៩ខែកញ្ញាជុំវិញដំណើរការផ្តល់សក្ខីកម្មនេះ ក្រសួងការបរទេសបាននិយាយថា ចាប់តាំងពីឆ្នាំ២០២១ ខ្លួនបានចំណាយពេលរាប់ពាន់ម៉ោង បំពេញតាមសំណើរបស់សភាសម្រាប់ការចងក្រងឯកសារ ការសង្ខេប និងធ្វើបទសម្ភាសន៍។ ឯកសារប្រហែល២០០០០ទំព័រត្រូវដាក់ជូនរដ្ឋសភា។

លោក ប្ល៊ីនកែន ដែលកំពុងនៅទីក្រុងញូវយ៉កក្នុងសប្តាហ៍នេះសម្រាប់មហាសន្និបាតអង្គការសហប្រជាជាតិ បាននិយាយនៅក្នុងលិខិតមួយទៅកាន់ប្រធានគណៈកម្មាធិការសភាគឺលោក Michael McCaul តំណាងមកពីគណបក្សសាធារណរដ្ឋកាលពីថ្ងៃទី២២ខែកញ្ញាថា គាត់ប្រឹងប្រែងព្យាយាមទៅដល់កន្លែងគណៈកម្មាធិការ នៅពេលណាដែលគាត់នឹងមាន ដើម្បីផ្តល់សក្ខីកម្ម និងផ្តល់សាក្សីជំនួស។

ការមើលងាយលក្ខន្តិកៈរបស់សភាអាមេរិក បញ្ជាក់ពីដំណើរការមួយសម្រាប់សភា ឬព្រឹទ្ធសភា សំដៅទៅលើសាក្សីដែលមិនគោរពតាមសម្រាប់ការកាត់ទោសព្រហ្មទណ្ឌ។ នៅទីបំផុត ក្រសួងយុត្តិធម៌អាមេរិកជាអ្នកសម្រេចថាតើត្រូវចោទប្រកាន់ពីបទឧក្រិដ្ឋដែរឬទេ។

ភ្លាមៗនោះ គេមិនទាន់ដឹងច្បាស់ថាតើនៅពេលណាដែលសភាទាំងមូលនឹងបោះឆ្នោតលើអនុសាសន៍របស់គណៈកម្មាធិការនេះ៕

ដោយ រ៉ាន់ រើយ

The post គណៈកម្មាធិការសភាអាមេរិកផ្តល់អនុសាសន៍ឱ្យសភាពេញអង្គ ចោទលោក ប្ល៊ីនកែន ពីបទ«មើលស្រាល» appeared first on Kampuchea Thmey Daily.

អាមេរិកសន្យាបង្កើនសកម្មភាពយោធានៅអូស្ត្រាលីនិងតំបន់ឥណ្ឌូប៉ាស៊ីហ្វិក

Rann Reuy — Wed, 07 Aug 2024 10:49:08 +0000

សហរដ្ឋអាមេរិកបានសន្យាជាមួយសម្ព័ន្ធមិត្តអូស្រ្តាលីក្នុងកិច្ចប្រជុំកិច្ចសហប្រតិបត្តិការសន្តិសុខប្រចាំឆ្នាំរបស់សពួកគេថា ខ្លួននឹងបង្កើនវត្តមានកងទ័ព យន្តហោះឈ្លបយកការណ៍ ក៏ដូចជា យន្តហោះទម្លាក់គ្រាប់បែកនៅតំបន់ឥណ្ឌូប៉ាស៊ីហ្វិក ខណៈមានក្តីកង្វល់ខ្លះពីការកើនឡើងឥទ្ធិពលរបស់ចិននៅក្នុងតំបន់នេះ។

ជំនួបទ្វេភាគីរវាងរដ្ឋមន្ត្រីការបរទេសនិងការពារជាតិរបស់អូស្ត្រាលី និង សហរដ្ឋអាមេរិក។ Richard Marles

សហរដ្ឋអាមេរិកនិងអូស្រ្តាលីដែលជាសម្ព័ន្ធមិត្តដ៏សំខាន់នៅតំបន់ប៉ាស៊ីហ្វិក បានចាប់ផ្តើមពង្រឹងកិច្ចសហប្រតិបត្តិការក្នុងវិស័យយោធាកាន់តែធំបន្ថែមទៀតតាមរយៈការផ្តួចផ្តើមផលិតអាវុធរួមគ្នានៅឆ្នាំ២០២៥ ដើម្បីបង្កើនការផ្គត់ផ្គង់ដល់សម្ព័ន្ធមិត្តនៅឥណ្ឌូប៉ាស៊ីហ្វិកជាទីដែលចិនកំពុងពង្រីកទំនាក់ទំនងនិងឥទ្ធិពលយ៉ាងខ្លាំង។

ពីរដ្ឋម៉ារីឡែនស្រហរដ្ឋអាមេរិកជាទីដែលរដ្ឋរដ្ឋមន្ត្រីការពារជាតិ និង រដ្ឋមន្ត្រីការបរទេសនៃប្រទេសទាំងពីរជួបគ្នា សារព័ត៌មានរ៉យទ័រ បានរាយការណ៍ថា អូស្ត្រាលី និងសហរដ្ឋអាមេរិកកំពុងធ្វើការធ្វើឱ្យប្រសើរឡើងនូវមូលដ្ឋានទ័ពអាកាសនៅភាគខាងជើង និងភាគខាងលិចប្រទេសអូស្ត្រាលី ដែលកាន់តែខិតជិតទៅនឹងចំណុចប្រឈមខ្លាំងជាមួយប្រទេសចិននៅសមុទ្រចិនខាងត្បូងជាងរដ្ឋធានីកង់បេរ៉ារបស់អូស្ត្រាលី។

រដ្ឋមន្ត្រីក្រសួងការពារជាតិអាមេរិក លោក Lloyd Austin បាននិយាយថា នឹងមានការបង្កើននៃវត្តមានកងកម្លាំងអាមេរិកវិលជុំនៅក្នុងប្រទេសអូស្ត្រាលី។ លោក និយាយថា៖«នេះនឹងមានន័យថា យន្តហោះល្បាតដែនសមុទ្រ និងយន្តហោះឈ្លបយកការណ៍កាន់តែច្រើន ដែលប្រតិបត្តិការពីមូលដ្ឋាននៅទូទាំងប្រទេសអូស្ត្រាលីភាគខាងជើង។ វាក៏នឹងមានន័យថា ការដាក់ពង្រាយយន្តហោះទម្លាក់គ្រាប់បែកប្តូរវេនញឹកញាប់ជាងនេះដែរ»។

សេចក្តីថ្លែងការណ៍រួមដែលបានចេញផ្សាយបន្ទាប់ពីកិច្ចពិភាក្សារបស់ពួកគេ បានសម្តែងការព្រួយបារម្ភចំពោះសកម្មភាពយោធារបស់ចិននៅជុំវិញកោះតៃវ៉ាន់ និងការទាមទារដែនសមុទ្រហួសហេតុរបស់ចិននៅក្នុងសមុទ្រចិនខាងត្បូង៕

The post អាមេរិកសន្យាបង្កើនសកម្មភាពយោធានៅអូស្ត្រាលីនិងតំបន់ឥណ្ឌូប៉ាស៊ីហ្វិក appeared first on Kampuchea Thmey Daily.

ប្រទេសច្រើននៅអឺរ៉ុប អាស៊ី និងអាមេរិក ប្រាប់ពលរដ្ឋខ្លួនចាកចេញពីលីបង់ ខណៈសង្គ្រាមអាចផ្ទុះ

Rann Reuy — Mon, 05 Aug 2024 08:43:38 +0000

មហាអំណាចបច្ចឹមប្រទេសប្រាប់ប្រជាជនខ្លួនឱ្យចាក់ចេញពីប្រទេសលីបង់ អ៊ីស្រាអែល អ៊ីរ៉ង់ ជាបន្ទាន់ ខណៈមានការព្រមានពីការវាយបកសងសឹករបស់អ៊ីរ៉ង់និងក្រុមហេសបូឡាលើប្រទេសអ៊ីស្រាអែល ក្នុងយៈពេលដ៏ខ្លីខាងមុខនេះ សូម្បីរដ្ឋមន្ត្រីការបរទេសសហរដ្ឋអាមេរិកក៏ប្រាប់រដ្ឋមន្ត្រីក្រុមប្រទេស G7 ថាអ៊ីរ៉ុងអាចបើកការវាយប្រហារក្នុងរង្វង់មិនដល់២ថ្ងៃទៀត។

ការធ្វើឃាតលោក Haniyeh បង្កការខឹងសម្បាពីអ៊ីរ៉ង់និងក្រុមសកម្មប្រយុទ្ធជាច្រើន ដែលនឹងសងសឹកលើអ៊ីស្រាអែល។ AP

សហរដ្ឋអាមេរិក ចក្រភពអង់គ្លេស បារាំង និងអ៊ីតាលី បានជំរុញប្រជាជនរបស់ខ្លួនឱ្យចាកចេញពីប្រទេសលីបង់ឱ្យបានឆាប់កាន់តែឆាប់កាន់តែល្អ ហើយប្រទេសឥណ្ឌូណេស៊ីនៅតំបន់អាស៊ីអាគ្នេយ៍ ក៏បានព្រមានថា ឱ្យពលរដ្ឋខ្លួនចាកចេញឱ្យបានឆាប់។

សហរដ្ឋអាមេរិក បានបញ្ជូននាវាចម្បាំងបន្ថែមទៅកាន់មជ្ឈិមបូព៌ា ហើយស្ថានទូតអាមេរិកប្រាប់ប្រជាពលរដ្ឋខ្លួនឱ្យចាកចេញ ខណៈអង់គ្លេសបានជូនដំណឹងដល់ពលរដ្ឋខ្លួនថា «ចាកចេញឥឡូវនេះ( Leave now)។ នេះយោងតាម CNN។

សារព័ត៌មានតួកគី Anadolu របស់ប្រទេសតួកគី បានផ្សាយថា ប្រទេសអ៊ីតាលី ឥណ្ឌូណេស៊ី បានចេញនូវការណែនាំព្រមានលើការធ្វើដំណើរ ដោយជំរុញឱ្យប្រជាជនខ្លួនត្រឡប់ទៅប្រទេសវិញ ឬក៏ជៀសវាងការធ្វើដំណើរទៅមជ្ឈិមបូព៌ា។

ឥណ្ឌូនេស៊ីបានចេញសេចក្តីព្រមានចំៗដល់ប្រជាជនខ្លួនដោយមិនទៅកាន់ប្រទេស លីបង់ អ៊ីរ៉ង់ និង អ៊ីស្រាអែល និងផ្តល់អនុសាសន៍ឲ្យចាកចេញពីលីបង់ជាបន្ទាន់។

ប្រទេសស៊ុយអ៊ែតនៅតំបន់អឺរ៉ុបនិងប្រទេសតំបន់អារ៉ាប់ជាច្រើនទៀត បានបិទស្ថានទូតក្នុងប្រទេសលីបង់។

ការកើនឡើងភាពតានតឹងរវាងក្រុមហេសបូឡានៅលីបង់និងអ៊ីស្រាអែល ក្រោយអ៊ីស្រាអែលបាញ់សម្លាប់មេបញ្ជាការយោងធាក្រុមហេសបូឡា លោក Fauad Shukr កាលពីថ្ងៃអង្គារសប្តាហ៍មុន ហើយ នៅ១ថ្ងៃក្រោយមក អ៊ីស្រាអែលក៏បានសម្លាប់មេដឹកនាំក្រុមសកម្មប្រយុទ្ធហាម៉ាស លោក Ismail Haniyeh ក្នុងទឹកដីអ៊ីរ៉ង់ដែលបង្កការខឹងសម្បាទូទាំងតំបន់មជ្ឈិមបូព៌ា។

ព្រលានយន្តហោះរបស់ប្រទេសលីបង់។

ដោយសារស្ថានការណ៍កាន់តែតានតឹងខ្លាំង នៅថ្ងៃចន្ទនេះប្រធានាធិបតីសហរដ្ឋអាមេរិក លោក ចូ បៃដិន នឹងដឹកនាំប្រជុំក្រុមសន្តិសុខជាតិ ព្រមទាំងនិយាយតាមទូរស័ព្ទជាមួយមហាក្សត្ររបស់ប្រទេសហ្ស៊កដានី Abdullah II ដែលជាសម្ព័ន្ធមិត្តរបស់ខ្លួននៅតំបន់មជ្ឈិមបូព៌ាជាប់នឹងប្រទេសអ៊ីស្រាអែល។

សង្គ្រាមនៅតំបន់ហ្គាហ្សារយៈពេលជិត១០ខែ បានសម្លាប់ជនជាតិប៉ាឡេស្ទីនប្រហែល ៣៩៦០០ ចាប់តាំងពីអ៊ីស្រាអែលបានចាប់ផ្តើមការវាយប្រហារយ៉ាងចាស់ដៃបំផុតប្រឆាំងនឹងក្រុមហាម៉ាសដែលរស់នៅតំបន់ហ្គាហ្សាចាប់តាំងពីថ្ងៃទី៧ខែតុលាដែលជាការសងសឹកលើក្រុមហាម៉ាសដែលវាយឆ្មក់ចូលសម្លាប់ប្រជាជនអ៊ីស្រាអែលជិត១២០០នាក់ ព្រមទាំំងចាប់ចំណាប់ខ្មាំងជិត២៤០នាក់ផ្សេងទៀត។

ភាពតានតឹងបំផុតឆ្ពោះទៅរកសង្គ្រាមតំបន់នេះ កើតឡើងក្រោយការវាយប្រហារចុងក្រោយបំផុតបានកើតឡើងកាលពីថ្ងៃពុធសប្តាហ៍មុន នៅពេលដែលប្រធាននយោបាយក្រុមហាម៉ាស់ Ismail Haniyeh ត្រូវបានគេធ្វើឃាតនៅក្នុងរដ្ឋធានីតេហេរ៉ង់របស់អ៊ីរ៉ង់មួយថ្ងៃបន្ទាប់ពីការវាយប្រហាររបស់អ៊ីស្រាអែលនៅតំបន់ជាយក្រុង Beirut បានសម្លាប់មេបញ្ជាការយោធាជាន់ខ្ពស់មកពីក្រុមហេសបូឡាមានមូលដ្ឋាននៅប្រទេសលីបង់។ .

មេដឹកនាំកំពូលរបស់អ៊ីរ៉ង់ Ayatollah Ali Khamenei តាមសេចក្តីរាយការណ៍បានបញ្ជាឱ្យធ្វើការវាយប្រហារលើអ៊ីស្រាអែល ដើម្បីជាការសងសឹកចំពោះការសម្លាប់របស់លោក Haniyeh ។

មន្ទីរបញ្ចកោណបានប្រកាសកាលពីថ្ងៃសុក្រថា សហរដ្ឋអាមេរិកនឹងដាក់ពង្រាយយោធានិងយុទ្ធោបករណ៍បន្ថែមទៅកាន់មជ្ឈិមបូព៌ាក្នុងពេលមានភាពតានតឹងកើនឡើងនៅក្នុងតំបន់៕

ដោយ រ៉ាន់ រើយ

The post ប្រទេសច្រើននៅអឺរ៉ុប អាស៊ី និងអាមេរិក ប្រាប់ពលរដ្ឋខ្លួនចាកចេញពីលីបង់ ខណៈសង្គ្រាមអាចផ្ទុះ appeared first on Kampuchea Thmey Daily.

ការទូតមហាអំណាចជួបគ្នាលើកនេះ អាចជាច្រកចេញបញ្ចប់ជម្លោះរុស្ស៊ី-អ៊ុយក្រែន ឆាប់ៗ

Rann Reuy — Sat, 27 Jul 2024 04:59:07 +0000

រដ្ឋមន្ត្រីការបរទេសសហរដ្ឋអាមេរិក អាន់តូនី ប៊្លីនកែន ( Antony Blinken) គ្រោងជួបពិភាក្សាជាមួយសមភាគីចិន លោក វ៉ាង យី (Wang Yi) នៅថ្ងៃសៅរ៍ទី២៧ខែកក្កដានេះ នៅទីក្រុងវៀងចន្ទន៍ប្រទេសឡាវ ដែលធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីការបរទេសអាស៊ាន។

រដ្ឋមន្ត្រីការបរទេសសហរដ្ឋអាមេរិក អាន់តូនី ប៊្លីនកែន (ឆ្វេង) និង សមភាគីចិន វ៉ាង យី ក្នុងជំនួបកន្លងមក។ GT

មិនត្រឹមតែប្រមុខការទូតនៃប្រទេសមហាអំណាចទាំងពីរដែលកំពុងប្រជែងឥទ្ធិពលគ្នាប៉ុណ្ណោះទេ សូម្បីប្រមុខការទូតរុស្ស៊ីក៏បានជួបពិភាក្សាជាមួយសមភាគីចិន មុនពេលលោក វ៉ាង យី ជួបលោក ប្ល៊ីនកែន។ កាន់តែសំខាន់ទៀតនោះ មុនប្រមុខការទូតចិនហោះមកកាន់ប្រទេសឡាវ លោក វ៉ាង យី បានទទួលជួប លោក Dmitro Kuleba រដ្ឋមន្ត្រីការបរទេសអ៊ុយក្រែនដ៏កម្រមួយនៅដើមសប្តាហ៍នេះ។

ត្បិតថា លទ្ធផលនៃជំនួបនិមួយៗមិនត្រូវបានបង្ហាញ ប៉ុន្តែមានការវិភាគជាច្រើនអះអាងពីការរីកចម្រើននៃដំណើរការចរចាសន្តិភាពអ៊ុយក្រែន ដែលមានមហាអំណាចចិនដើរតួនាទីយ៉ាងសំខាន់បំផុត។ រុស្ស៊ីស្ទើរតែមិនស្តាប់អ្នកផ្សេងណា និងជាទីទុកចិត្តក្រៅពីចិនឡើយរហូតដល់ពេលនេះ។

ក្នុងរយៈពេលចុងក្រោយនេះ ចិនកំពុងដើរតួនាទីនាទីយ៉ាងសំខាន់ក្នុងការសម្របសម្រួលភាគីគីជម្លោះ អ៊ុយក្រែននិងរុស្ស៊ីឱ្យខិតទៅរកការចរចាបញ្ចប់សង្គ្រាមដែលបានអូសបន្លាយពេលជាង២កន្លះ។

មុនជួបលោក ប្ល៊ីនកែន រដ្ឋមន្ត្រីការបរទេសចិន វ៉ាង យី បានជួបពិភាក្សាជាមួយរដ្ឋមន្ត្រីការបរទេសរុស្ស៊ី លោក សឺហ្គេយ ឡាវរ៉ូវ (Sergei Lavrov) ដែលបានប្រាប់អ្នកសារព័ត៌មានកាលពី២ថ្ងៃមុនថា ចិននិងរុស្ស៊ីព្រមព្រៀងគ្នា «ប្រយុទ្ធប្រឆាំងការប៉ុនប៉ងដោយកម្លាំងខាងក្រៅតំបន់ដើម្បីជ្រៀតជ្រែកចូលក្នុងកិច្ចការអាស៊ីអាគ្នេយ៍»។

ការចរចារវាងអ៊ុយក្រែននិងរុស្ស៊ីបានជាប់គាំងរកច្រកចេញមិនឃើញចាប់តាំងពីខែមេសាឆ្នាំ២០២២ក្រោយសង្គ្រាម២ខែ ដោយសាររុស្ស៊ីទាមទារការចរចាជាមួយសហរដ្ឋអាមេរិក ដែលខ្លួនជឿថា ជាបងធំរបស់អ៊ុយក្រែននិងអង្គការណាតូបានញាក់អ៊ុយក្រែនឲ្យធ្វើសង្គ្រាមជាមួយខ្លួន។ ចំណែកអ៊ុយក្រែនដែលទទួលបានការផ្គត់ផ្គង់អាវុធយ៉ាងច្រើនសន្ធឹកសន្ធប់ពីសហរដ្ឋអាមេរិកនិងសម្ព័ន្ធមិត្តអឺរ៉ុបនិងអង្គការណាតូ បានទាមទារឲ្យរុស្ស៊ីដកកងទ័ពរបស់ខ្លួនចេញពីទឹកដីអ៊ុយក្រែន មុនមានការចរចា«សន្តិភាព»។

លោក ប្ល៊ីនកែន ទទួលបដិសណ្ឋារកិច្ចដោយអគ្គលេខាធិការអាស៊ាននៅប្រទេសឡាវ។ ASEAN

ភាគីចិននៅតែរក្សាទំនាក់ទំនងល្អជាមួយភាគីរុស្ស៊ីដែលរងទណ្ឌកម្មយ៉ាងធ្ងន់ធ្ងរពីបច្ចឹមប្រទេសដោយសារតែការលើកទ័ពចូលលុកលុយប្រទេសអ៊ុយក្រែន ហើយ ចិនក៏រងការចោទថា បានសម្របសម្រួលកិច្ចក្នុងសង្គ្រាមនៅអ៊ុយក្រែន។ ទោះបីរងការចោទប្រកាន់ជាហូរហែរ ភាគចិនតែងតែបដិសេធ ហើយ នៅប៉ុន្មានថ្ងៃចុងក្រោយនេះ បន្ទាប់ពីរដ្ឋមន្ត្រីការបរទេសអ៊ុយក្រែនជួបភាគីចិន ប្រធានាធិបតីអ៊ុយក្រែន វ៉ូឡូឌីមៀ ហ្សេឡេនស្គី បានអះអាងថា ចិនមិនបានផ្គត់ផ្គង់អាវុធដល់រុស្ស៊ីក្នុងសង្គ្រាមនៅអ៊ុយក្រែនឡើយ។

តាមរយៈជំនួបជាញឹកញាប់និងប្រទាក់ក្រឡាគ្នារបស់ប្រមុខការទួតនៃប្រទេសមហាអំណាចក្នុងរយៈពេលចុងក្រោយនេះ ក្រុមអ្នកវិភាគមើលឃើញថា ដំណើរការចរចាសន្តិភាពក្នុងសង្គ្រាម រុស្ស៊ី-អ៊ុយក្រែន អាចកើតឡើងឆាប់ៗ ដោយសារតែភាគីទាំងអស់បង្ហាញនូវការហត់នឿយក្នុងសង្គ្រាម ហើយរូបភាពនៃសង្គ្រាមទៀតសោត ភាគីរុស្ស៊ីដែលផ្តើមលើកទ័ពឈ្លានពានមុន ក៏មិនបង្ហាញពីភាពមានប្រៀបឈ្នះនោះដែរ៕

ដោយ រ៉ាន់ រើយ

The post ការទូតមហាអំណាចជួបគ្នាលើកនេះ អាចជាច្រកចេញបញ្ចប់ជម្លោះរុស្ស៊ី-អ៊ុយក្រែន ឆាប់ៗ appeared first on Kampuchea Thmey Daily.

លោក Blinken នឹងជជែកពីបញ្ហាភូមា និងជម្លោះរុស្ស៊ី-អ៊ុយក្រែន ក្នុងកិច្ចប្រជុំរដ្ឋមន្រ្តីការបរទេសអាស៊ាននៅកម្ពុជា

Thoeun Vansong — Wed, 03 Aug 2022 09:08:25 +0000

ក្នុងឱកាសចូលរួមកិច្ចប្រជុំពាក់ព័ន្ធក្របខណ្ឌអាស៊ាននៅកម្ពុជា លោក អាន់តូនី ប្លីងខេន (Antony Blinken) រដ្ឋមន្ត្រីការបរទេសអាមេរិក នឹងលើកយកបញ្ហានៅមីយ៉ាន់ម៉ា និងជម្លោះរវាងរុស្ស៊ី-អ៊ុយក្រែន ជាប្រធានបទក្ដៅសម្រាប់ការជ ជែកពិភាក្សាជាមួយបណ្ដារដ្ឋមន្ត្រីការបរទេសអាស៊ាន។ នេះបើតាមការបញ្ជាក់របស់ក្រសួងការបរទេសសហរដ្ឋអាមេរិក កាលពីថ្ងៃទី២ ខែសីហា។

ក្រសួងការបរទេសសហរដ្ឋអាមេរិក បានឲ្យដឹងថា លោក អាន់តូនី ប្លីងខេន នឹងធ្វើដំណើរទស្សនកិច្ចនៅប្រទេសកម្ពុជា ចាប់ពីថ្ងៃទី៣ ដល់ថ្ងៃទី៥ ខែសីហា ដើម្បីចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាន- អាមេរិក កិច្ចប្រជុំរដ្ឋមន្ត្រីការបរទេសអាស៊ីបូព៌ា និងវេទិកាតំបន់អាស៊ាន។

នៅក្នុងកិច្ចប្រជុំនៅកម្ពុជានេះ ប្រមុខការទូតអាមេរិក នឹងលើកឡើងពីជំងឺរាតត្បាត COVID-19 កិច្ចសហប្រតិបត្តិការសេដ្ឋកិច្ច ការប្រយុទ្ធប្រឆាំងនឹងការបម្រែបម្រួលអាកាសធាតុ ជាពិសេស ផ្ដោតជាសំខាន់លើបញ្ហាប្រឈមដែលជាក្ដីព្រួយបារម្ភរួមរបស់ពិភពលោក គឺវិបត្តិនយោបាយនៅមីយ៉ាន់ម៉ា និងសង្គ្រាមរបស់រុស្ស៊ីជាមួយអ៊ុយក្រែន។

ជាមួយគ្នានេះដែរ លោក ប្លីងខេន ក៏នឹងមានជំនួបទ្វេភាគីជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសមភាគីរបស់លោក គឺលោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ដោយពិភាក្សាអំពីការគាំទ្ររបស់សហរដ្ឋអាមេរិកសម្រាប់អាស៊ាន និងការពង្រឹងទំនាក់ទំនងទ្វេភាគីរវាងប្រទេសទាំងពីរ កម្ពុជា-អាមេរិក៕

ដោយ ៖ ធឿន វ៉ាន់សុង

The post លោក Blinken នឹងជជែកពីបញ្ហាភូមា និងជម្លោះរុស្ស៊ី-អ៊ុយក្រែន ក្នុងកិច្ចប្រជុំរដ្ឋមន្រ្តីការបរទេសអាស៊ាននៅកម្ពុជា appeared first on Kampuchea Thmey Daily.

អាមេរិក ច្រានចោលការទាមទាររបស់រុស្ស៊ី កុំឲ្យអ៊ុយក្រែន ចូល ណាតូ

Sok Sovann — Thu, 27 Jan 2022 00:22:46 +0000

កាលពីថ្ងៃពុធទី២៦ខែមករា សហរដ្ឋអាមេរិកបានច្រានចោលការទាមទាររបស់រុស្ស៊ី ដែលឲ្យរារាំងអ៊ុយក្រែនពីអង្គការណាតូ ហើយបាននិយាយថា ខ្លួនជឿថា ទីក្រុងមូស្គូបានត្រៀមខ្លួនរួចជាស្រេចដើម្បីវាយចូលអ៊ុយក្រែន ប៉ុន្តែបានផ្តល់នូវអ្វីដែលខ្លួនហៅថាជា ផ្លូវថ្មីមួយចេញពីវិបត្តិ។

លោក ចូ បៃដិន (ឆ្វេង) និងលោក វ្លាឌីមៀរ ពូទីន

រដ្ឋមន្ត្រីការបរទេសអាមេរិក លោក Antony Blinken បាននិយាយថា នៅក្នុងលិខិតឯកជនមួយទៅកាន់រដ្ឋាភិបាលរុស្ស៊ី, ទីក្រុងវ៉ាស៊ីនតោនបានបញ្ជាក់ទៅទីក្រុងមូស្គូនូវ “ផ្លូវការទូតដ៏សំខាន់” ដើម្បីដោះស្រាយការប្រឈមមុខដាក់គ្នា។

ទោះបីជាយ៉ាងណាក៏ដោយ លោកបានសង្កត់ធ្ងន់ថា “យើងសូមបញ្ជាក់ឲ្យច្បាស់ថា មានគោលការណ៍ស្នូលដែលយើងប្តេជ្ញារក្សា និងការពារ រួមទាំងអធិបតេយ្យភាព និងបូរណភាពទឹកដីរបស់អ៊ុយក្រែន និងសិទ្ធិរបស់រដ្ឋក្នុងការជ្រើសរើសការរៀបចំសន្តិសុខ និងសម្ព័ន្ធភាពរបស់ពួកគេផងដែរ”។

រដ្ឋមន្ត្រីការបរទេសអាមេរិក លោក Antony Blinken

លោក Blinken បានប្រាប់អ្នកសារព័ត៌មានថា សំបុត្រនេះនឹងមិនត្រូវបានបង្ហាញជាសាធារណៈឡើយ ពីព្រោះយើងគិតថា ផ្នែកការទូតគឺមានឱកាសល្អបំផុតដើម្បីជោគជ័យ។

លោកនឹងនិយាយទៅកាន់រដ្ឋមន្ត្រីការបរទេសរុស្ស៊ីលោក Sergei Lavrov នៅប៉ុន្មានថ្ងៃខាងមុខនេះ សម្រាប់ការឆ្លើយតបរបស់ខ្លួនចំពោះជំហររបស់សហរដ្ឋអាមេរិក។

យើងបានលើកឡើងនូវលទ្ធភាព នៃវិធានការតម្លាភាពទៅវិញទៅមក ទាក់ទងនឹងការដាក់កម្លាំង និងបញ្ហាអ៊ុយក្រែន ក៏ដូចជាវិធានការដើម្បីបង្កើនទំនុកចិត្តទាក់ទងនឹងសមយុទ្ធយោធា និងសមយុទ្ធនៅអឺរ៉ុបផងដែរ។

លិខិតនេះ ថែមទាំងបានបើកទ្វារឆ្ពោះទៅរកការជំរុញកិច្ចចរចាគ្រប់គ្រងអាវុធជាមួយរុស្ស៊ីជុំវិញបញ្ហាមីស៊ីលយុទ្ធសាស្ត្រ និងអាវុធនុយក្លេអ៊ែរដែលមានទីតាំងនៅអឺរ៉ុបទៀតផង៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ រុស្ស៊ី កំពុងពិចារណា បញ្ឆេះសង្គ្រាមនុយក្លេអ៊ែរ

The post អាមេរិក ច្រានចោលការទាមទាររបស់រុស្ស៊ី កុំឲ្យអ៊ុយក្រែន ចូល ណាតូ appeared first on Kampuchea Thmey Daily.

អ្នកកាសែតធ្វើដំណើរជាមួយលោក Blinken តេស្តវិជ្ជមានកូវីដ មុនទៅដល់ ថៃ

Sok Sovann — Thu, 16 Dec 2021 00:49:03 +0000

សមាជិកម្នាក់នៃអង្គភាពសារព័ត៌មាន ដែលធ្វើដំណើរជាមួយរដ្ឋមន្ត្រីការបរទេសអាមេរិកលោក Antony Blinken ក្នុងដំណើរទស្សនកិច្ចទៅកាន់តំបន់អាស៊ីអាគ្នេយ៍ បានធ្វើតេស្តវិជ្ជមានជំងឺកូវីដ១៩ នៅពេលមកដល់ទីក្រុងគូឡាឡាំពួ ហើយពេលនេះកំពុងធ្វើចត្តាឡីស័ក។

រដ្ឋមន្ត្រីការបរទេសអាមេរិកលោក Antony Blinken

អ្នកនាំពាក្យក្រសួងការបរទេសលោក Ned Price បាននិយាយថា លោក Blinken និងបុគ្គលិកជាន់ខ្ពស់ត្រូវបានធ្វើតេស្ត រាល់ការឈប់នៃដំណើរជាអន្តរជាតិនេះ រួមទាំងពេលមកដល់ទីក្រុង គូឡាឡាំពួផងដែរ កាលពីល្ងាចថ្ងៃអង្គារ ហើយអ្នកទាំងអស់សុទ្ធតែអវិជ្ជមាន។

កាលពីថ្ងៃអង្គារ អ្នកការទូតកំពូលអាមេរិករូបនេះ ស្ថិតនៅក្នុងទីក្រុងហ្សាកាតា នៃប្រទេស ឥណ្ឌូណេស៊ី មុនពេលចេញដំណើរទៅកាន់ប្រទេសម៉ាឡេស៊ី។ លោកត្រូវបន្តទៅទីក្រុងបាងកកនៅល្ងាចថ្ងៃពុធ មុនជំនួបជាមួយមន្ត្រីថៃនៅថ្ងៃបន្ទាប់។

លោក Blinken ធ្វើសន្និសីទសារព័ត៌មានរួមគ្នា ជាមួយរដ្ឋមន្ត្រីការបរទេសម៉ាឡេស៊ីលោក Saifuddin Abdullah

លោក Blinken បានធ្វើសន្និសីទសារព័ត៌មានរួមគ្នា ជាមួយរដ្ឋមន្ត្រីការបរទេសម៉ាឡេស៊ី លោក Saifuddin Abdullah កាលពីថ្ងៃពុធ។

អ្នកនាំពាក្យក្រសួងការបរទេសម៉ាឡេស៊ី បាននិយាយថា ខ្លួនត្រូវបានជូនដំណឹងអំពីករណី កូវីដ ដោយស្ថានទូតអាមេរិកកាលពីព្រឹកថ្ងៃពុធ ហើយបុគ្គលរូបនោះត្រូវបានគេដាក់ឲ្យនៅដាច់ដោយឡែកភ្លាមៗ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ លោក Blinken ព្រមានឥតលាក់លៀម អំពីសិទ្ធិមនុស្ស និងលទ្ធិប្រជាធិបតេយ្យរបស់ ឥណ្ឌា

The post អ្នកកាសែតធ្វើដំណើរជាមួយលោក Blinken តេស្តវិជ្ជមានកូវីដ មុនទៅដល់ ថៃ appeared first on Kampuchea Thmey Daily.

រដ្ឋមន្ត្រីការបរទេសអាមេរិក មកអាស៊ីអាគ្នេយ៍លើកដំបូង ធ្វើទស្សនកិច្ច ៣ប្រទេស

Sok Sovann — Mon, 13 Dec 2021 01:34:58 +0000

នៅថ្ងៃចន្ទទី១៣ខែធ្នូនេះ រដ្ឋមន្ត្រីការបរទេសអាមេរិក លោក Antony Blinken បានចាប់ផ្តើមធ្វើទស្សនកិច្ចទៅកាន់ប្រទេសឥណ្ឌូណេស៊ី ក្នុងដំណើរនៅអាស៊ីអាគ្នេយ៍ជាលើកដំបូងរបស់លោក មុនពេលបន្តទៅប្រទេសម៉ាឡេស៊ី និងថៃ។

លោក Blinken ត្រូវបានគេរំពឹងថានឹងដោះស្រាយបញ្ហាសុខភាព ការវិនិយោគ និងហេដ្ឋារចនាសម្ព័ន្ធនៅក្នុងតំបន់ឥណ្ឌូប៉ាស៊ីហ្វិកជាមួយសមភាគីរបស់លោក។

ការធ្វើដំណើរលើកដំបូងរបស់លោក Blinken ទៅកាន់តំបន់នេះ គឺធ្វើតាមការអត្ថាធិប្បាយរបស់លោកនៅឯមហាសន្និបាតអង្គការសហប្រជាជាតិក្នុងខែកញ្ញា ដែលកាលនោះលោកសន្យាថា នឹងបង្កើតយុទ្ធសាស្ត្រថ្មីគាំទ្រលទ្ធិប្រជាធិបតេយ្យ និងសន្តិសុខនៅក្នុងតំបន់នេះ។

ដំណើរទស្សនកិច្ចរបស់អ្នកការទូតកំពូលរូបនេះ បានបង្ហាញពីកិច្ចខិតខំប្រឹងប្រែងរបស់សហរដ្ឋអាមេរិក ដើម្បីប្រឆាំងនឹងការកើនឡើងនៃឥទ្ធិពលក្នុងតំបន់របស់ប្រទេសចិន និងការឈរជើងនៅសមុទ្រចិនខាងត្បូង។

អាស៊ាន កំពុងចាប់ផ្តើមមានអារម្មណ៍ថារងសម្ពាធយោធាពីចិន ខណៈទីក្រុងប៉េកាំងបានបង្ហាញពីសមត្ថភាពយោធាកាន់តែខ្លាំងឡើង ដូចជាការហោះហើរជុំវិញកោះតៃវ៉ាន់ជាដើម។

បន្ថែមពីលើការចូលរួមក្នុងកិច្ចពិភាក្សាការទូតកម្រិតខ្ពស់ជាច្រើន សហរដ្ឋអាមេរិកក៏កំពុងបង្កើតក្របខណ្ឌសេដ្ឋកិច្ចមួយផងដែរ ដើម្បីបង្កើនកិច្ចសហប្រតិបត្តិការជាមួយអាស៊ានលើបញ្ហាមួយចំនួនដូចជា សេដ្ឋកិច្ចឌីជីថល សង្វាក់ផ្គត់ផ្គង់ ថាមពលស្អាត និងពាណិជ្ជកម្ម។

ថ្វីបើដំណើរទស្សនកិច្ចអាស៊ីអាគ្នេយ៍នេះ ផ្តល់នូវការសន្យាសម្រាប់កិច្ចសហប្រតិបត្តិការរវាងសហរដ្ឋអាមេរិក និងអាស៊ាននាពេលអនាគតក៏ដោយ ប៉ុន្តែការចងចាំនៃការដកខ្លួនរបស់សហរដ្ឋអាមេរិកចេញពីភាពជាដៃគូអន្តរប៉ាស៊ីហ្វិក និងការបង្កើតភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ដែលដឹកនាំដោយប្រទេសចិន អាចធ្វើឲ្យមានភាពស្មុគស្មាញដល់កិច្ចព្រមព្រៀងពាណិជ្ជកម្មពហុភាគីនាពេលអនាគត៕

ប្រែសម្រួល៖ Vann Vann

ប្រភព៖ Foreign Brief

The post រដ្ឋមន្ត្រីការបរទេសអាមេរិក មកអាស៊ីអាគ្នេយ៍លើកដំបូង ធ្វើទស្សនកិច្ច ៣ប្រទេស appeared first on Kampuchea Thmey Daily.

Antony Blinken Archives - Kampuchea Thmey Daily

គណៈកម្មាធិការសភាអាមេរិក​ផ្តល់​អនុសាសន៍​ឱ្យ​សភា​ពេញ​អង្គ​ ចោទ​លោក ប្ល៊ីនកែន​​​ ពីបទ«មើលស្រាល»​

អាមេរិក​សន្យា​​បង្កើន​​សកម្មភាព​យោធា​នៅ​​អូស្ត្រាលី​និង​តំបន់ឥណ្ឌូប៉ាស៊ីហ្វិក

ប្រទេស​​ច្រើន​នៅ​អឺរ៉ុប អាស៊ី​ និង​អាមេរិក​ ប្រាប់​ពល​រដ្ឋ​ខ្លួន​ចាកចេញ​ពីលីបង់ ខណៈសង្គ្រាម​អាចផ្ទុះ

ការទូត​មហាអំណាច​ជួប​គ្នាលើក​នេះ​ អាច​ជាច្រកចេញ​បញ្ចប់ជម្លោះ​​រុស្ស៊ី​-អ៊ុយក្រែន ឆាប់ៗ​

អាមេរិក ច្រានចោលការទាមទាររបស់រុស្ស៊ី កុំឲ្យអ៊ុយក្រែន ចូល ណាតូ

អ្នកកាសែតធ្វើដំណើរជាមួយលោក Blinken តេស្តវិជ្ជមានកូវីដ មុនទៅដល់ ថៃ

រដ្ឋមន្ត្រីការបរទេសអាមេរិក មកអាស៊ីអាគ្នេយ៍លើកដំបូង ធ្វើទស្សនកិច្ច ៣ប្រទេស

គណៈកម្មាធិការសភាអាមេរិកផ្តល់អនុសាសន៍ឱ្យសភាពេញអង្គ ចោទលោក ប្ល៊ីនកែន ពីបទ«មើលស្រាល»

អាមេរិកសន្យាបង្កើនសកម្មភាពយោធានៅអូស្ត្រាលីនិងតំបន់ឥណ្ឌូប៉ាស៊ីហ្វិក

ប្រទេសច្រើននៅអឺរ៉ុប អាស៊ី និងអាមេរិក ប្រាប់ពលរដ្ឋខ្លួនចាកចេញពីលីបង់ ខណៈសង្គ្រាមអាចផ្ទុះ

ការទូតមហាអំណាចជួបគ្នាលើកនេះ អាចជាច្រកចេញបញ្ចប់ជម្លោះរុស្ស៊ី-អ៊ុយក្រែន ឆាប់ៗ