AstraZeneca Archives - Kampuchea Thmey Daily

AstraZeneca ត្រៀមសង់រោងចក្រតម្លៃ១,៥ពាន់លាននៅសិង្ហបុរី ផលិតថ្នាំព្យាបាលមហារីក

Chheang — Tue, 21 May 2024 07:26:37 +0000

ក្រុមហ៊ុន AstraZeneca មានគម្រោងសាងសង់រោងចក្រ ដោយចំណាយទុនអស់ ១,៥ពាន់លានដុល្លារ ដើម្បីផលិតប្រភេទថ្នាំជំនាន់ថ្មីព្យាបាលជំងឺមហារីក។ នេះបើយោងតាមសេចក្ដីថ្លែងការណ៍របស់ក្រុមហ៊ុនឱសថយក្សរបស់អង់គ្លេស កាលពីថ្ងៃទី២០ ខែឧសភា ឆ្នាំ២០២៤។

រោងចក្រថ្មីសង់លើទឹកដីប្រទេសសិង្ហបុរី នឹងត្រូវបញ្ចប់គម្រោងរួចរាល់នៅត្រឹមឆ្នាំ២០២៩ខាងមុខ ហើយថ្នាំដែលផលិតចេញពីរោងចក្រនេះ គឺជាប្រភេទឱសថប្រឆាំងមហារីក (Antibody-drug Conjugates) ឬហៅកាត់ថា ADC។ វាជាវិធីព្យាបាលម្យ៉ាង ដែលមានសមត្ថភាពវាយប្រហារកោសិកាមហារីក ដោយមិនចាំបាច់ត្រូវបំផ្លាញកោសិកាល្អៗដែលនៅជុំវិញ។ លោក Pascal Soriot នាយកប្រតិបត្តិក្រុមហ៊ុន AstraZeneca បានបញ្ជាក់ថា ថ្នាំ ADC នឹងបង្ហាញពីសក្ដានុពលយ៉ាងធំធេង ដើម្បីប្រើជំនួសការព្យាបាលដោយគីមីសាស្ត្រលើអ្នកជំងឺមហារីក។

គម្រោងវិនិយោគនេះ ទទួលបានការគាំទ្រពីក្រុមប្រឹក្សាអភិវឌ្ឍន៍សេដ្ឋកិច្ច (EDB) របស់រដ្ឋាភិបាលសិង្ហបុរី។ លោក Png Cheong Boon ប្រធាន EDB បានរៀបរាប់ថា លោកពិតជាស្វាគមន៍ចំពោះ AstraZeneca ដែលបង្កើតវត្តមានរបស់ខ្លួននៅលើទឹកដីសិង្ហបុរី ហើយរោងចក្រនេះនឹងក្លាយជាទីតាំងដែលមានដំណើរការផលិតថ្នាំព្យាបាលមហារីកពេញលេញដំបូងគេបង្អស់របស់ក្រុមហ៊ុន AstraZeneca។

ក្រុមហ៊ុន AstraZeneca បានប្រកាសថា ខ្លួននឹងធ្វើការជាមួយរដ្ឋាភិបាលសិង្ហបុរី ព្រមទាំងដៃគូពាក់ព័ន្ធទាំងអស់ ដើម្បីធ្វើឲ្យសង្វាក់ផលិតកម្មនៅក្នុងរោងចក្រថ្មីមិនផ្ដល់ផលប៉ះពាល់ចំពោះបរិស្ថាន ពោលគឺនៅក្នុងរោងចក្រនឹងមិនមានការសាយភាយសារធាតុកាបូននោះឡើយ។

គួររំឭកថា ដំណឹងពីគម្រោងវិនិយោគរបស់ក្រុមហ៊ុន AstraZeneca បានធ្វើឡើងបន្ទាប់ពីមានព័ត៌មានមិនល្អទាក់ទងនឹងវ៉ាក់សាំងកូវីដរបស់ក្រុមហ៊ុនអង់គ្លេសមួយនេះកាលពីពេលថ្មីៗកន្លងទៅ។ យោងតាមសារព័ត៌មាន Telegraph កាលពីចុងខែមេសា បានឲ្យដឹងថា AstraZeneca បានដាច់ចិត្តទទួលស្គាល់ជាលើកដំបូងថា វ៉ាក់សាំងជំងឺកូវីដ១៩របស់ខ្លួន ពិតជាអាចបណ្តាលឲ្យមានផលប៉ះពាល់កម្រ ដូចជាបង្កការកកឈាម និងស្លាប់ពិតមែន។ យោងតាមទិន្នន័យរបស់អង្គការសុខភាពពិភពលោក, វ៉ាក់សាំង AstraZeneca មានប្រសិទ្ធភាពប្រឆាំងជំងឺកូវីដ១៩បាន ៧២% ហើយបើយោងតាមក្រុមហ៊ុន, គិតត្រឹមខែមេសាឆ្នាំ២០២១ មានមនុស្សជាង១៧លាននាក់ បានចាក់វ៉ាក់សាំងនេះនៅសហភាពអឺរ៉ុប និងចក្រភពអង់គ្លេស ហើយមានករណីកកឈាមមិនដល់៤០ករណីផងដែរ ដែលត្រូវបានគេរាយការណ៍៕

ដោយ៖ ឈាង

The post AstraZeneca ត្រៀមសង់រោងចក្រតម្លៃ១,៥ពាន់លាននៅសិង្ហបុរី ផលិតថ្នាំព្យាបាលមហារីក appeared first on Kampuchea Thmey Daily.

កម្ពុជាកំពុងចរចារទិញវ៉ាក់សាំង AstraZeneca ២ ទៅ ៤ លានដូសយកមកចាក់ដូសទី៣

deth leng — Thu, 12 Aug 2021 06:31:21 +0000

គណៈកម្មការចំពោះកិច្ច នៃលទ្ធកម្មវ៉ាក់សាំងកំពុងស្វែងរកប្រទេមួយចំនួន ដែលកម្ពុជាមានលទ្ធភាពក្នុងការបញ្ជាទិញវ៉ាក់សាំង AstraZeneca ដោយកំពុងចរចារតាមរយៈស្ថានទូតជាមួយបណ្តាប្រទេសចំនួន៤ ប្រចាំកម្ពុជាមានប្រទេសជប៉ុន កូរ៉េខាងត្បូង ឥណ្ឌា និងចក្រភពអង់គ្លេស ដើម្បីចរចារជាមួយរោងចក្ររបស់AstraZeneca នៃបណ្ដារប្រទេសទាំង៤ ដើម្បីបញ្ជាទិញពីប្រទេសទាំងនោះ។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល មានប្រសាសន៍ក្នុងពេលអញ្ជើញទៅទទួលវ៉ាក់សាំង ស៊ីណូវ៉ាក់ ៣ លានដូស នៅថ្ងៃទី ១២ ខែសីហានេះថា “យើងនឹងទទួលចម្លើយពីប្រទេសទាំងនោះក្នុងសប្តាហ៍នេះ ឬសប្តាហ៍ក្រោយ ហើយបើបានចម្លើយរួចហើយ យើងនឹងពិនិត្យមើលថាតើតម្លៃនៅក្នុងប្រទេសនីមួយៗ កំណត់តម្លៃប៉ុណ្ណា ហើយចំនួនដែលនឹងត្រូវទិញនោះ ប្រមាណ ២ ទៅ ៤ លានដូស ដោយសារយើងចាក់តែមួយដូសទៀតទេ”។

ទោះយ៉ាងណា តាមគម្រោងរបស់គណៈកម្មការចំពោះកិច្ច មិនទាន់បានសម្រេចជាគោលការនៅឡើយទេ ដោយនឹងដាក់ជូនទៅ ឯកឧត្តមរដ្ឋមន្ត្រីប្រតិភូដែលជាប្រធានគណៈកម្មការចំពោះកិច្ចលទ្ធកម្មវ៉ាក់សាំង ហើយនឹងគោរពជូនទៅសម្ដេចតេជោ នាយករដ្ឋមន្ត្រីប្រមុខដឹកនាំរាជរដ្ឋាភិបាល ថាតើយើងគួសម្រេចទិញវ៉ាក់សាំង AstraZeneca ប៉ុន្មានលានដូសទៀតដើម្បីអនុវត្តនៅក្នុងកម្មវិធីចាក់ដូសជំរុញ ឬដូសទី៣នេះ៕

ដោយ៖ ណារី

The post កម្ពុជាកំពុងចរចារទិញវ៉ាក់សាំង AstraZeneca ២ ទៅ ៤ លានដូសយកមកចាក់ដូសទី៣ appeared first on Kampuchea Thmey Daily.

ទូតអង់គ្លេសប្រចាំកម្ពុជា៖យើងមានសេចក្ដីសោមនស្សរីករាយបានធ្វើជាដៃគូជាមួយកម្ពុជា ដើម្បីពង្រីកកម្មវិធីចាក់វ៉ាក់សាំង

KC Virak — Thu, 05 Aug 2021 03:34:27 +0000

ឯកអគ្គរាជទូតអង់គ្លេសប្រចាំកម្ពុជាលោកស្រី Tina Redshaw បានបង្ហាញអារម្មណ៍រីករាយ ដែលវ៉ាក់សាំង AstraZeneca ចំនួន ៤១៥,០០០ ដូស ដែលជាជំនួយរបស់ប្រទតេសអង់គ្លេសនឹងមកដល់អាកាសយានដ្ឋានអន្តរជាតិកម្ពុជានៅថ្ងៃទី៥ ខែសីហា ឆ្នាំ២០២១នេះ។

លោកស្រី ឯកអគ្គរាជទូតចក្រភពអង់គ្លេស Tina Redshaw មានប្រសាសន៍ថា វ៉ាក់សាំងបានជួយសង្គ្រោះជីវិតមនុស្សរាប់ពាន់នាក់រួចទៅហើយ។ វាគឺជាវិធីល្អបំផុតដើម្បីការពារមនុស្សពីកូរូ៉ណាវីរុសក្នុងរយៈពេលវែង។

លោកស្រី មានប្រសាសន៍ថា៖ “ខ្ញុំមានអារម្មណ៍រំភើប ក្នុងការទទួលស្វាគមន៍វ៉ាក់សាំង AstraZeneca ចំនួន ៤១៥,០០០ ដូស ដែលនឹងមកដល់អាកាសយានដ្ឋានអន្តរជាតិកម្ពុជានៅថ្ងៃនេះ។ វ៉ាក់សាំងគឺជាផ្លូវចេញពីជំងឺរាតត្បាតនេះសម្រាប់យើង។ ពួកយើងនៅដោះស្រាយបញ្ហានេះជាមួយគ្នា។”

ឯកអគ្គរាជទូតចក្រភពអង់គ្លេស មានប្រសាសន៍ថា លោកស្រីមានសេចក្ដីសោមនស្សរីករាយដែលបានធ្វើជាដៃគូជាមួយប្រទេសកម្ពុជាដើម្បីពង្រីកកម្មវិធីចាក់វ៉ាក់សាំង និងការពារប្រជាជនកម្ពុជាពីជំងឺ កូវីដ-១៩ ឱ្យបានកាន់តែច្រើន។

លោកស្រីមានប្រសាសន៍ថា៖ “កម្មវិធីចាក់វ៉ាក់សាំងអនុញ្ញាតឱ្យប្រជាជនកម្ពុជាអាចស្ដារជីវភាពរស់នៅល្អប្រសើរឡើងវិញ។ គ្មានអ្នកណាម្នាក់នឹងមានសុវត្ថិភាពទេ រហូតដល់មនុស្សគ្រប់គ្នាមានសុវត្ថិភាព។”

នៅក្នុងកិច្ចប្រជុំ G7 ចក្រភពអង់គ្លេសបានប្រកាសបរិច្ចាគវ៉ាក់សាំង COVID19 ចំនួន ១០០ លានដូស។ ហើយចំនួនដូសដំបូងសម្រាប់ការបរិច្ចាគនេះក៏បានរៀបចំរួចរាល់។ ប្រទេសកម្ពុជាស្ថិតក្នុងចំណោមប្រទេសដំបូងគេដែលបានទទួលវ៉ាក់សាំង AstraZeneca ចំនួន ៤១៥,០០០ដូស តាមរយៈកិច្ចព្រមព្រៀងទ្វេភាគី។

ចក្រភពអង់គ្លេសកំពុងបរិច្ចាគវ៉ាក់សាំងរបស់សាកលវិទ្យាល័យ Oxford-AstraZeneca ដែលផលិតដោយ Oxford Biomedica នៅ Oxford និងវេចខ្ចប់នៅ Wrexham North Wales។

គួររំលឹកថា លោកស្រី ឯកអគ្គរាជទូតចក្រភពអង់គ្លេស Tina Redshaw បានចុះកិច្ចព្រមព្រៀង ជាមួយរដ្ឋមន្រ្តីក្រសួងសុខាភិបាល ឯកឧត្តមសាស្រ្តាចារ្យ ម៉ម ប៊ុនហេង អំពីការបរិច្ចាគវ៉ាក់សាំង Oxford AstraZeneca របស់ចក្រភពអង់គ្លេស ចំនួន ៤១៥.០០០ ដូស ដល់ប្រទេសកម្ពុជាកាលពីសប្ដាហ៍មុន៕

អត្ថបទ៖ ច័ន្ទ វីរៈ

The post ទូតអង់គ្លេសប្រចាំកម្ពុជា៖យើងមានសេចក្ដីសោមនស្សរីករាយបានធ្វើជាដៃគូជាមួយកម្ពុជា ដើម្បីពង្រីកកម្មវិធីចាក់វ៉ាក់សាំង appeared first on Kampuchea Thmey Daily.

ក្រុមហ៊ុន AstraZeneca ផលិតថ្នាំព្យាបាលកូវីដ-១៩អត់ទាន់ជោគជ័យទេ

chean virakbot — Tue, 15 Jun 2021 23:25:00 +0000

នៅថ្ងៃអង្គារ៍ ទី១៥ ខែមិថុនា ម្សិលមិញនេះ ក្រុមហ៊ុនផលិតវ៉ាក់សាំង AstraZeneca បានបង្ហាញពីឧបសគ្គក្នុងការសាកល្បងព្យាបាលជំងឺកូវីដ-១៩ដោយឱសថរបស់ខ្លួន។

ក្រុមហ៊ុន AstraZeneca បាននិយាយក្នុងសេចក្តីថ្លែងការណ៍មួយថា ឱសថដែលត្រូវបានផលិតដោយការបញ្ចូលគ្នាអង់ទីគ័រពីរប្រភេទមិនបានជោគជ័យតាមគោលបំណងសំខាន់របស់ខ្លួនសម្រាប់ការព្យាបាលអ្នកជំងឺកូវីដ-១៩ឡើយ។

ការព្យាបាលបានកំពុងធ្វើឡើងដល់ដំណាក់កាលទី៣ ឬការសាកល្បងព្យាបាលដំណាក់កាលចុងក្រោយដើម្បីវាយតម្លៃពីសុវត្ថិភាព និងប្រសិទ្ធភាពរបស់ថ្នាំ។

ក្រុមហ៊ុនផលិតឱសថ AstraZeneca

ក្រុមហ៊ុន AstraZeneca បានឲ្យដឹងថា មនុស្សធំពេញវ័យដែលមិនទាន់បានចាក់វ៉ាក់សាំង ១១២១នាក់ដែលបានប៉ះពាល់ជាមួយអ្នកឆ្លងកូវីដ-១៩ក៏ជាផ្នែកមួយនៃការសាកល្បងក្នុងការព្យាបាលនេះដែរ។

សេចក្តីថ្លែងការណ៍បានបន្តថា ការព្យាបាលថ្នាំដោយ AZD7442 បានកាត់បន្ថយហានិភ័យនៃអាការរោគកំពុងវិវត្តបានតែ៣៣%ប៉ុណ្ណោះដែលមិនត្រូវបានលទ្ធផលដែលចង់បានឡើយ។

ទោះជាយ៉ាងណា ក្រុមហ៊ុននៅតែបន្តសាកល្បងព្យាបាលទៀតដើម្បីវាយតម្លៃថាតើថ្នាំរបស់ខ្លួនអាចការពារកូវីដ-១៩ ឬព្យាបាលរោគសញ្ញាធ្ងន់ធ្ងរបានអត់។

រដ្ឋាភិបាលអាមេរិកបានឧបត្ថម្ភចំពោះការអភិវឌ្ឍថ្នាំ AZD7442 និងមានកិច្ចព្រមព្រៀងដើម្បីទទួលយកចំនួន ៧០០ ០០០ដូស។

ទន្ទឹមជាមួយគ្នានេះ វ៉ាក់សាំងការពារកូវីដ-១៩របស់ AstraZeneca ដែលបានផលិតជាមួយសាកលវិទ្យាល័យ Oxford នៅតែបន្តមានបញ្ហាជុំវិញសុវត្ថិភាពដែរ។

វ៉ាក់សាំងត្រូវបានផ្អាកការប្រើប្រាស់នៅបណ្តាប្រទេសអឺរ៉ុបជាច្រើនដោយសារតែមានរបាយការណ៍ពាក់ព័ន្ធនឹងឈាមកកដ៏កម្រ។

មន្ត្រីកំពូលម្នាក់នៅទីភ្នាក់ងារឱសថអឺរ៉ុបកាលពីថ្ងៃអាទិត្យបានឲ្យដឹងថា វាគួរតែមានតម្លៃក្នុងការបោះចោលវ៉ាក់សាំងកូវីដ-១៩ AstraZeneca សម្រាប់ក្រុមមនុស្សគ្រប់វ័យដែលមានជម្រើសផ្សេងទៀត។

ទោះបីជាយ៉ាងណា ការសិក្សាមួយរបស់អាជ្ញាធរសុខាភិបាលចក្រភពអង់គ្លេសបានបង្ហាញនៅថ្ងៃចន្ទថា ការចាក់វ៉ាក់សាំង AstraZeneca ឬ Pfizer ពីរដូសអាចបញ្ឈប់តម្រូវការព្យាបាលអ្នកជំងឺកូវីដ-១៩រហូតដល់ជាង៩០%នៃវីរុសបំប្លែងខ្លួន Delta៕

ប្រែសម្រួល៖ វីរបុត្រ
ប្រភព៖ AFP

The post ក្រុមហ៊ុន AstraZeneca ផលិតថ្នាំព្យាបាលកូវីដ-១៩អត់ទាន់ជោគជ័យទេ appeared first on Kampuchea Thmey Daily.

ឥណ្ឌាទំនងពន្យារពេលការចែកចាយវ៉ាក់សាំង AstraZeneca ខែមីនា និងមេសា

chean virakbot — Thu, 25 Mar 2021 01:42:57 +0000

ប្រទេសឥណ្ឌានឹងពន្យារពេលការផ្គត់ផ្គង់វ៉ាក់សាំងបង្ការកូវីដ-១៩ AstraZeneca ទៅមជ្ឈមណ្ឌល COVAX ដែលគាំទ្រដោយ GAVI/WHO សម្រាប់ខែមីនា និងមេសា។ នេះជាការឲ្យដឹងរបស់ក្រុមហ៊ុនជាដៃគូផ្គត់ផ្គង់របស់ UNICEF ដល់ Reuters នៅព្រឹកថ្ងៃព្រហស្បតិ៍នេះ។

UNICEF បាននិយាយតាមអ៉ីមែលថា ៖«យើងយល់ថា ការផ្គត់ផ្គង់វ៉ាក់សាំងការពារកូវីដ-១៩ដល់ប្រទេសមានប្រាក់ចំណូលទាបដែលចូលរួមជាមួយ COVAX ទំនងជានឹងប្រឈមនឹងការពន្យារពេល បន្ទាប់ពីការរាំងស្ទះក្នុងការទទួលបានអាជ្ញាប័ណ្ណធានានាំចេញសម្រាប់វ៉ាក់សាំងបន្ថែមដែលត្រូវបានផលិតដោយវិទ្យាស្ថានឥណ្ឌា Serum Institute of India (SII) ដែលរំពឹងថា នឹងទទួលបាននៅខែមីនា និងមេសា។

«COVAX កំពុងពិភាក្សាជាមួយរដ្ឋាភិបាលឥណ្ឌាក្នុងគោលបំណងធានាការចែកចាយឲ្យបានលឿនតាមដែលអាចធ្វើទៅបាន»។

កាលពីថ្ងៃពុធ ម្សិលមិញ ទីភ្នាក់ងារសារព័ត៌មាន Reuters បានផ្សាយថា ប្រទេសឥណ្ឌាបានផ្អាកជាបណ្តោះអាសន្នចំពោះការនាំចេញវ៉ាក់សាំង AstraZeneca ធំៗទាំងអស់ដែលផលិតដោយ SII ដែលជាអ្នកផលិតវ៉ាក់សាំងធំជាងគេបំផុតក្នុងពិភពលោក ដើម្បីបំពេញតម្រូវការក្នុងស្រុកដែលកំពុងឆ្លងរីករាលដាលខ្លាំង។

UNICEF ក៏បានលើកឡើងដែរថា បណ្តាប្រទេសដែលចូលរួមជាមួយ COVAX ក៏ត្រូវបានជូនដំណឹងអំពីការផ្គត់ផ្គង់ទាបជាងការរំពឹងទុកចំពោះវ៉ាក់សាំង AstraZeneca ដែលផលិតនៅកូរ៉េខាងត្បូងសម្រាប់ខែមីនា។

«ស្របនឹងបញ្ហាប្រឈមនៃបរិយាកាសផ្គត់ផ្គង់ជាសកលនាពេលបច្ចុប្បន្ន នេះគឺដោយសារបញ្ហាប្រឈមរបស់ក្រុមហ៊ុនដែលជួបបញ្ហាក្នុងការពង្រីកនៃការផ្គត់ផ្គង់បរិមាណខ្ពស់ និងបង្កើនប្រសិទ្ធភាពដំណើរការផលិតសម្រាប់ការចែកចាយមុនៗ »។ UNICEF បានបញ្ជាក់៕

ប្រែសម្រួល៖ វីរបុត្រ
ប្រភព៖ Reuters

The post ឥណ្ឌាទំនងពន្យារពេលការចែកចាយវ៉ាក់សាំង AstraZeneca ខែមីនា និងមេសា appeared first on Kampuchea Thmey Daily.

EU ពិចារណាផ្ទេរបច្ចេកវិទ្យាផលិតវ៉ាក់សាំងកូវីដទៅឲ្យ វៀតណាម

Sok Sovann — Wed, 24 Mar 2021 09:18:11 +0000

ប្រេសិតសហភាពអឺរ៉ុប (EU) ប្រចាំនៅទីក្រុងហាណូយបាននិយាយថា EU អាចពិចារណាផ្ទេរបច្ចេកវិទ្យាផលិតវ៉ាក់សាំងទៅឲ្យប្រទេសវៀតណាម។

លោក Giorgio Aliberti ឯកអគ្គរដ្ឋទូត EU ប្រចាំនៅវៀតណាមបាននិយាយថា ប្រធានបទនេះអាចត្រូវបានពិភាក្សា ចាប់តាំងពីប្រទេសជាច្រើនគ្រោងនឹងផលិតវ៉ាក់សាំងកូវីដ ហើយវៀតណាមក៏មានសក្តានុពលក្នុងការផលិតវ៉ាក់សាំងនេះផងដែរ។

លោកបាននិយាយទៅកាន់អ្នកព័ត៌មានកាលពីថ្ងៃអង្គារថា វិទ្យាស្ថាន Serum របស់ឥណ្ឌា បានចុះកិច្ចសន្យាជាមួយក្រុមហ៊ុនអង់គ្លេស-ស៊ុយអែត AstraZeneca ដើម្បីផលិតវ៉ាក់សាំងកូវីដចំនួន ៧០លានដូសក្នុងមួយខែ ដែលនេះធ្វើឲ្យឥណ្ឌាក្លាយជាប្រទេសសំខាន់ក្នុងការប្រយុទ្ធប្រឆាំងនឹងជំងឺរាតត្បាត។

ពេលសួរដោយអ្នកឆ្លើយឆ្លងព័ត៌មានអំពីក្តីព្រួយបារម្ភចំពោះសុវត្ថិភាពវ៉ាក់សាំង AstraZeneca និងវ៉ាក់សាំងផ្សេងទៀតដែលចែកចាយតាមរយៈយន្តការទទួលវ៉ាក់សាំងសកល Covax, លោកបាននិយាយថា គណៈកម្មាធិការវាយតម្លៃហានិភ័យ Pharmacovigilance ដែលជាគណៈកម្មាធិការរបស់ទីភ្នាក់ងារថ្នាំអឺរ៉ុបទទួលបន្ទុកវាយតម្លៃនិងតាមដានសុវត្ថិភាពថ្នាំពេទ្យរបស់មនុស្ស បានសន្និដ្ឋានថា វ៉ាក់សាំងនេះ មានគុណប្រយោជន៍ច្រើនជាងហានិភ័យ ហើយករណីមានកំណកឈាមគឺកម្រណាស់។

លោកនិយាយថា វ៉ាក់សាំង AstraZeneca គួរតែបន្តប្រើប្រាស់ ហើយការសម្រេចចិត្តគឺផ្អែកលើភស្តុតាងវិទ្យាសាស្ត្រ។

EU គឺជាអ្នកឧបត្ថម្ភរបស់ Covax ដែលគ្រោងនឹងបរិច្ចាគវ៉ាក់សាំងប្រមាណ ៤.១លានដូសទៅឲ្យប្រទេសវៀតណាមនៅត្រឹមខែមេសា។ ប៉ុន្តែលោក Dang Duc Anh នាយកវិទ្យាស្ថានជាតិអនាម័យនិងរោគរាតត្បាតបាននិយាយថា ដោយសារតែភាពលំបាកក្នុងការផលិតវ៉ាក់សាំងនៅជុំវិញពិភពលោក ការប្រគល់នេះអាចត្រូវពន្យារពេល៕

ប្រែសម្រួលដោយ៖ Vann Vann

ប្រភព៖ VN Express

The post EU ពិចារណាផ្ទេរបច្ចេកវិទ្យាផលិតវ៉ាក់សាំងកូវីដទៅឲ្យ វៀតណាម appeared first on Kampuchea Thmey Daily.

ពលរដ្ឋអាយុចាប់ពី៦០ឆ្នាំ នៅស្រុកព្រៃនប់ អាចចុះឈ្មោះចាក់វ៉ាក់សាំង Astrazeneca បានហើយ

Sorn Phanith — Wed, 24 Mar 2021 03:40:55 +0000

ប្រជាពលរដ្ឋអាយុ៦០ឆ្នាំឡើងទៅ ដែលរស់នៅស្រុកព្រៃនប់ ខេត្តព្រះសីហនុ អាចមកចុះឈ្មោះចាក់វ៉ាក់សាំង Astrazeneca ចាប់ពីថ្ងៃនេះតទៅបានហើយ។

នេះបើតាមសេចក្ដីជូនដំណឹងរបស់រដ្ឋបាលស្រុកព្រៃនប់ បានឲ្យដឹងថា រដ្ឋបាលស្រុកព្រៃនប់ បានរៀបចំទីតាំងសម្រាប់ការចុះឈ្មោះចាក់វ៉ាក់សាំង ចំពោះប្រជាពលរដ្ឋដែលមានអាយុចាប់ពី៦០ឆ្នាំឡើងទៅ ទទួលការចាក់វ៉ាក់សាំង Astrazeneca ដើម្បីបង្ការជំងឺកូវីដ១៩។

សេចក្ដីជូនដំណឹងបានឲ្យដឹងថា រដ្ឋបាលស្រុកព្រៃនប់ មានកិត្តិយសសូមជូនដំណឹងដល់បងប្អូនប្រជាពលរដ្ឋ ដែលរស់នៅក្នុងស្រុកព្រៃនប់ ខេត្តព្រះសីហនុ ជ្រាបថា រដ្ឋបាលស្រុកព្រៃនប់ នឹងរៀបចំទីតាំងសម្រាប់ការចុះឈ្មោះចាក់វ៉ាក់សាំង Astrazeneca បង្ការជំងឺកូវីដ១៩ ជូនបងប្អូនប្រជាពលរដ្ឋ ដែលរស់នៅក្នុងស្រុកព្រៃនប់ ខេត្តព្រះសីហនុ មានអាយុ៦០ឆ្នាំឡើង ចាប់ពីថ្ងៃទី២៤ ខែមីនា ឆ្នាំ២០២១ តទៅ។ សូមបងប្អូនប្រជាពលរដ្ឋក្នុងស្រុកព្រៃនប់ ដែលមានបំណងទទួលការចាក់វ៉ាក់សាំង Astrazeneca បង្ការជំងឺកូវីដ១៩ ដោយស្ម័គ្រចិត្ត សូមមកចុះឈ្មោះ។

អានពិស្ដារ៖

The post ពលរដ្ឋអាយុចាប់ពី៦០ឆ្នាំ នៅស្រុកព្រៃនប់ អាចចុះឈ្មោះចាក់វ៉ាក់សាំង Astrazeneca បានហើយ appeared first on Kampuchea Thmey Daily.

EU រកឃើញថា វ៉ាក់សាំង AstraZeneca មិនមានហានិភ័យខ្ពស់នៃការកកឈាមនោះទេ

Sok Sovann — Fri, 19 Mar 2021 00:59:41 +0000

រដ្ឋឈានមុខរបស់សហភាពអ៊ឺរ៉ុប (EU) គ្រោងនឹងចាប់ផ្តើមការចាក់វ៉ាក់សាំងកូវីដ Oxford-AstraZeneca ឡើងវិញបន្ទាប់ពីនិយតករឱសថអឺរ៉ុបបានសន្និដ្ឋានថា វ៉ាក់សាំងនេះមានសុវត្ថិភាពនិងប្រសិទ្ធភាព។

ទីភ្នាក់ងារថ្នាំអឺរ៉ុប (EMA) បានពិនិត្យឡើងវិញនូវវ៉ាក់សាំងនេះ បន្ទាប់ពីរដ្ឋ EU ចំនួន១៣បានផ្អាកការប្រើប្រាស់ ដោយសារការភ័យខ្លាចពាក់ព័ន្ធទៅនឹងកំណកឈាម។

EMA បានរកឃើញថា វ៉ាក់សាំងនេះមិនត្រូវបានផ្សារភ្ជាប់ជាមួយនឹងហានិភ័យខ្ពស់នៃការកកឈាមនោះទេ។

ប្រទេសអាល្លឺម៉ង់ បារាំង អ៊ីតាលីនិងអេស្ប៉ាញនិយាយថា ពួកគេនឹងបន្តប្រើប្រាស់វ៉ាក់សាំងនេះវិញ។

វាអាស្រ័យលើរដ្ឋនីមួយៗរបស់ EU ក្នុងការសម្រេចថាតើពេលណាត្រូវចាប់ផ្តើមចាក់វ៉ាក់សាំង AstraZeneca ឡើងវិញ។ ទោះបីជាយ៉ាងណាក៏ដោយ ប្រទេសស៊ុយអែតបាននិយាយថា ខ្លួនត្រូវការពេលវេលាពីរបីថ្ងៃដើម្បីសម្រេចចិត្ត។

កាលពីថ្ងៃព្រហស្បតិ៍ អង្គការសុខភាពពិភពលោក (WHO) បានអំពាវនាវដល់បណ្តាប្រទេសនានាឲ្យបន្តប្រើប្រាស់វ៉ាក់សាំងនេះ ហើយគ្រោងនឹងចេញផ្សាយលទ្ធផលនៃការពិនិត្យរបស់ខ្លួនទៅលើសុវត្ថិភាពរបស់វ៉ាក់សាំងនេះនៅថ្ងៃសៅរ៍។

ការស៊ើបអង្កេតរបស់ទីភ្នាក់ងារនេះ គឺផ្តោតលើករណីមួយចំនួនតូចនៃជំងឺឈាមមិនធម្មតា។ ជាពិសេស ទីភ្នាក់ងារនេះបានសម្លឹងមើលករណីនៃការកកឈាមនៅក្នុងក្បាល។

ការសម្រេចចិត្តផ្អាកប្រើប្រាស់វ៉ាក់សាំងនេះ បានធ្វើឲ្យមានការព្រួយបារម្ភអំពីល្បឿននៃយុទ្ធនាការចាក់វ៉ាក់សាំងក្នុងតំបន់ ដែលកំពុងរងផលប៉ះពាល់រួចទៅហើយដោយសារតែកង្វះការផ្គត់ផ្គង់៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ នាយករដ្ឋមន្ត្រីថៃជាបុគ្គលទី១ចាក់វ៉ាក់សាំង AstraZeneca នៅថៃ

ចុចអាន៖ WHO ជំរុញឲ្យបន្តចាក់វ៉ាក់សាំង AstraZeneca ព្រោះថា គ្មានភស្តុតាងអំពីការកកឈាម

The post EU រកឃើញថា វ៉ាក់សាំង AstraZeneca មិនមានហានិភ័យខ្ពស់នៃការកកឈាមនោះទេ appeared first on Kampuchea Thmey Daily.

AstraZeneca Archives - Kampuchea Thmey Daily

AstraZeneca ត្រៀម​សង់​រោងចក្រ​តម្លៃ១,៥​ពាន់​លាន​នៅ​សិង្ហបុរី ផលិត​ថ្នាំ​ព្យាបាល​មហារីក

កម្ពុជាកំពុងចរចារ​ទិញវ៉ាក់សាំង AstraZeneca ​២ ទៅ ៤ លាន​ដូស​យកមកចាក់ដូសទី៣

ក្រុម​ហ៊ុន​ AstraZeneca​ ផលិត​ថ្នាំ​ព្យាបាល​កូវីដ​-​១៩​អត់ទាន់ជោគជ័យទេ

ឥណ្ឌា​ទំនង​ពន្យារ​ពេល​ការ​ចែក​ចាយ​វ៉ាក់​សាំង​ Astra​Zeneca​ ខែ​មីនា​ និង​មេសា