ក្រុមហ៊ុន AstraZeneca ដាច់ចិត្តទម្លាយថា វ៉ាក់សាំងកូវីដរបស់ខ្លួន ពិតជាអាចបណ្តាលឲ្យមនុស្សស្លាប់មែន

យោងតាមសារព័ត៌មាន Telegraph ផ្សាយកាលពីដើមសប្តាហ៍នេះ, ក្រុមហ៊ុនឱសថយក្ស AstraZeneca បានដាច់ចិត្តទទួលស្គាល់ជាលើកដំបូងថា វ៉ាក់សាំងជំងឺកូវីដ១៩របស់ខ្លួន ពិតជាអាចបណ្តាលឲ្យមានផលប៉ះពាល់កម្រ ដូចជាបង្កការកកឈាម និងស្លាប់ពិតមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការទម្លាយព័ត៌មាននេះ កើតឡើងចំពេលក្រុមហ៊ុន កំពុងប្រយុទ្ធប្រឆាំងនឹងពាក្យបណ្តឹង ដែលចោទប្រកាន់ថា វ៉ាក់សាំងរបស់ខ្លួន ដែលរួមសហការបង្កើតជាមួយសាកលវិទ្យាល័យ Oxford នៃចក្រភពអង់គ្លេស គឺអាចបណ្តាលឲ្យអ្នកចាក់បាត់បង់ជីវិតនិងរបួសធ្ងន់ធ្ងរ។

ពាក្យបណ្តឹងគឺចេញពីលោក Jamie Scott ដែលកើតមានកំណកឈាម បណ្តាលឲ្យគាត់ខូចខួរក្បាល បន្ទាប់ពីចាក់ថ្នាំបង្ការក្នុងខែមេសាឆ្នាំ២០២១ ដែលកាលនោះជំងឺកូវីដ១៩ កំពុងរាតត្បាតខ្លាំង។

ទោះបីជាយ៉ាងណាក៏ដោយ កាលនោះក្រុមហ៊ុនបានចេញមុខបដិសេធចំពោះការចោទប្រកាន់របស់លោក Scott ហើយមកដល់ខែឧសភាឆ្នាំ២០២៣, AstraZeneca ក៏ទទូចដែរថា “យើងមិនទទួលយកបានឡើយដែលថា បញ្ហាកកឈាម TTS ត្រូវបានបង្កឡើងដោយវ៉ាក់សាំង”។

TTS គឺជាស្ថានភាពដ៏កម្រមួយ ដែលមនុស្សម្នាក់វិវឌ្ឍទៅជាកើតកំណកឈាម ពោលគឺវាអាចកាត់បន្ថយលំហូរឈាមនៅពេលរួមផ្សំជាមួយនឹងចំនួនប្លាកែតទាប។ រោគសញ្ញារបស់ TTS រួមមានដូចជា ឈឺក្បាលខ្លាំងនិងឈឺពោះ ជាដើម។

យ៉ាងណាមិញ នៅក្នុងឯកសារដែលត្រូវបានបញ្ជូនទៅតុលាការចក្រភពអង់គ្លេស កាលពីខែកុម្ភៈឆ្នាំ២០២៤នេះ ក្រុមហ៊ុន AstraZeneca បានដាច់ចិត្តទទួលស្គាល់ថា វ៉ាក់សាំងរបស់ខ្លួន ពិតជាអាចបណ្តាលឲ្យកើតមាន TTS មែន ប៉ុន្តែវាជារឿងកម្របំផុត ហើយមិនមែនតែ AstraZeneca ទេ វ៉ាក់សាំងកូវីដផ្សេងទៀត ក៏អាចកើតមានបញ្ហាដូចគ្នានេះដែរ។

សូមរម្លឹកថា បណ្តាប្រទេសលោកខាងលិចមួយចំនួន បានសម្រេចចិត្តផ្អាកការចាក់វ៉ាក់សាំង AstraZeneca នៅនិទាឃរដូវឆ្នាំ២០២១ ដោយសារភ័យខ្លាចថា វាអាចបណ្តាលឲ្យអ្នកជំងឺខ្លះកើតកំណកឈាម។

ពេលនោះ ប្រធានយុទ្ធសាស្ត្រវ៉ាក់សាំងរបស់ទីភ្នាក់ងារឱសថអឺរ៉ុប (EMA) លោក Marco Cavaleri ក៏ទទួលស្គាល់ដែរថា ពិតជាមានទំនាក់ទំនងជាក់ស្តែង រវាងវ៉ាក់សាំង AstraZeneca និងកំណកឈាមក្នុងខួរក្បាលមែន ប៉ុន្តែលោកអះអាងថា អត្ថប្រយោជន៍មានច្រើនជាងហានិភ័យ។

យោងតាមទិន្នន័យរបស់អង្គការសុខភាពពិភពលោក, វ៉ាក់សាំង AstraZeneca មានប្រសិទ្ធភាពប្រឆាំងជំងឺកូវីដ១៩បាន ៧២% ហើយបើយោងតាមក្រុមហ៊ុន, គិតត្រឹមខែមេសាឆ្នាំ២០២១ មានមនុស្សជាង១៧លាននាក់ បានចាក់វ៉ាក់សាំងនេះនៅសហភាពអឺរ៉ុប និងចក្រភពអង់គ្លេស ហើយមានករណីកកឈាមមិនដល់៤០ករណីផងដែរ ដែលត្រូវបានគេរាយការណ៍៕

អត្ថបទ៖ សុខ សុវណ្ណ

ចុចអាន៖ ចាក់វ៉ាក់សាំង AstraZeneca ដូសជំរុញ បង្កើនអង់ទីគ័រខ្លាំងក្លាប្រឆាំង អូមីក្រុង