WHO ជំរុញឲ្យបន្តចាក់វ៉ាក់សាំង AstraZeneca ព្រោះថា គ្មានភស្តុតាងអំពីការកកឈាម

អង្គការសុខភាពពិភពលោក (WHO) បានជំរុញឲ្យប្រទេសនានា កុំបញ្ឈប់ការចាក់វ៉ាក់សាំងកូវីដអី។ ការជំរុញនេះបានកើតឡើង បន្ទាប់ពីប្រទេសជាសមាជិកសហភាពអ៊ឺរ៉ុបធំៗមួយចំនួន បានផ្អាកការចាក់វ៉ាក់សាំង Oxford-AstraZeneca។

WHO និយាយថា មិនមានភស្តុតាងណាមួយដែលផ្សារភ្ជាប់ វ៉ាក់សាំងនេះទៅនឹងការកកឈាមនោះទេ។

អ្នកនាំពាក្យ WHO លោក Christian Lindmeier បាននិយាយថា ស្ថាប័ននេះកំពុងស៊ើបអង្កេតលើរបាយការណ៍នេះ។

លោកបានឲ្យដឹងថា “ពេល WHO ដឹងច្បាស់អំពីព្រឹត្តិការណ៍ទាំងនេះភ្លាម ការរកឃើញនិងការផ្លាស់ប្តូរចំពោះអនុសាសន៍បច្ចុប្បន្ន នឹងត្រូវផ្សព្វផ្សាយជាសាធារណៈ”។

រហូតមកដល់សព្វថ្ងៃនេះ មិនមានភស្តុតាងណាមួយបញ្ជាក់ថា ឧប្បត្តិហេតុនេះបណ្តាលមកពីវ៉ាក់សាំងនោះទេ ហើយវាសំខាន់ណាស់ដែលយុទ្ធនាការចាក់វ៉ាក់សាំងនៅតែបន្ត ដូច្នេះយើងអាចជួយសង្គ្រោះជីវិតនិងទប់ស្កាត់ជំងឺធ្ងន់ធ្ងរពីវីរុសបាន។

ប្រទេសអាល្លឺម៉ង់ បារាំង អ៊ីតាលីនិងអេស្ប៉ាញបានចូលរួមជាមួយប្រទេសតូចៗ បញ្ឈប់ការចាក់វ៉ាក់សាំងដើម្បីជាការប្រុងប្រយ័ត្ន ខណៈពេលកំពុងធ្វើការត្រួតពិនិត្យបន្ថែមទៀត។

អ្នកជំនាញសុវត្ថិភាពថ្នាំបង្ការរបស់ WHO បានកោះប្រជុំនៅថ្ងៃអង្គារនេះដើម្បីពិភាក្សាអំពីវ៉ាក់សាំង។

ទីភ្នាក់ងារថ្នាំអឺរ៉ុប (EMA) នឹងជួបប្រជុំគ្នានៅថ្ងៃដដែលនេះ ហើយគ្រោងនឹងធ្វើការសន្និដ្ឋាននៅថ្ងៃព្រហស្បតិ៍។ EMA ក៏បាននិយាយផងដែរថា វ៉ាក់សាំងនេះគួរតែបន្តប្រើ។

មានករណីកកឈាមមួយចំនួននៅអ៊ឺរ៉ុប បន្ទាប់ពីការចាក់វ៉ាក់សាំងរួច។

ទោះបីជាយ៉ាងណាក៏ដោយ អ្នកជំនាញនិយាយថា ករណីទាំងនេះគឺមានតិចតួច ហើយតិចជាងករណីដែលកើតឡើងលើប្រជាជនទូទៅ។

ស្របពេលជាមួយគ្នានោះ ក្រុមហ៊ុន AstraZeneca បាននិយាយថា មនុស្សប្រមាណ១៧លាននាក់នៅសហភាពអ៊ឺរ៉ុបនិងចក្រភពអង់គ្លេស បានទទួលវ៉ាក់សាំងដូសទីមួយរួចទៅហើយ ខណៈមានករណីកកឈាមតិចជាង៤០ករណីប៉ុណ្ណោះ ត្រូវបានគេរាយការណ៍កាលពីសប្តាហ៍មុន៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖​ អឺរ៉ុប ងាកទៅរកវ៉ាក់សាំង Sputnik V របស់រុស្ស៊ី ចោល AstraZeneca ខណៈកូវីដរលកទី៣ផ្ទុះឡើង

ចុចអាន៖ ដំណឹង​​ល្អ​​ WHO​ បញ្ជាក់​​រឿង​​​វ៉ាក់​សាំង​​ AstraZeneca​ ដែល​​ប្រទេស​មួយ​ចំនួន​បារម្ភ