Boris Johnson Archives - Kampuchea Thmey Daily

លោកនាយករដ្ឋមន្ត្រីអង់គ្លេស Johnson ប្រឈមអស់តំណែងថ្ងៃនេះ

chean virakbot — Mon, 06 Jun 2022 08:03:19 +0000

នាយករដ្ឋមន្ត្រីអង់គ្លេស លោក Boris Johnson ប្រឈមនឹងអស់តំណែងតាមរយៈការបោះឆ្នោតមិនទុកចិត្តមួយដោយសមាជិកសភានៅក្នុងគណបក្សអភិរក្សកំពុងកាន់អំណាចនាល្ងាចថ្ងៃចន្ទ ទី៦ ខែមិថុនា។ នេះបើយោងតាមលោក Graham Brady ប្រធានគណៈកម្មាធិការ១៩២២បានប្រាប់សមាជិកសភា។

លោកបានសរសេរក្នុងសេចក្តីជូនដំណឹងមួយទៅសមាជិកសភាគណបក្សអភិរក្សថា ៖«ការកំណត់១៥%នៃសមាជិកសភាដែលកំពុងស្វែងរកសំឡេងទុកចិត្តនៅក្នុងមេដឹកនាំរបស់គណបក្សអភិរក្សត្រូវបានលើស»។

លោក Boris Johnson

«អនុលោមតាមច្បាប់ ការបោះឆ្នោតចន្លោះ១៨០០ និង២០០០ ថ្ងៃនេះ ថ្ងៃចន្ទ ទី៦ ខែមិថុនា សេចក្តីពិស្តារនឹងត្រូវបានបញ្ជាក់។ ការបោះឆ្នោតនឹងត្រូវបានរាប់ភ្លាមៗបន្ទាប់ពីបោះឆ្នោតហើយ។ សេចក្តីប្រកាសនឹងត្រូវបានធ្វើនៅពេលណាដែលទទួលបានសេចក្តីណែនាំ»។

លោក Johnson ដែលបានក្លាយជានាយករដ្ឋមន្ត្រីកាលពីឆ្នាំ២០១៩ បានកំពុងស្ថិតក្រោមសម្ពាធយ៉ាងខ្លាំង ជុំវិញរបាយការណ៍ខូចខាតពាក់ព័ន្ធនឹងពិធីជប់លៀងនៅការិយាល័យ និងគេហដ្ឋាន Downing Street ដែលពេលនោះ ចក្រភពអង់គ្លេសស្ថិតក្នុងបំរាមកូវីដ-១៩យ៉ាងតឹងរ៉ឹង។

សមាជិកសភាពគណបក្សអភិរក្សជាច្រើននាក់កំពុងព្រួយបារម្ភថាតើលោក Johnson អាយុ៥៧ឆ្នាំបាត់បង់សិទ្ធិដើម្បីគ្រប់គ្រងចក្រអង់គ្លេសដែលលោកកំពុងប្រឈមនឹងហានិភ័យនៃវិបត្តិសេដ្ឋកិច្ច ការកើនឡើងតម្លៃប្រេងឥន្ធនៈ និងម្ហូបអាហារ ព្រមទាំងភាពវឹកវរក្នុងការធ្វើដំណើរនៅទីក្រុងឡុងដ៍។

សមាជិកសភាគណបក្សអភិរក្សសរុប១៨០នាក់នឹងធ្វើការបោះឆ្នោតប្រឆាំងលើលោក Johnson ដើម្បីទម្លាក់ចេញពីតំណែង។ ប្រសិនការបោះឆ្នោតបានសម្រេច នោះនឹងមានការប្រកួតប្រជែងបន្ទាប់ដើម្បីស្វែងរកមេដឹកនាំជំនួស៕

ប្រែសម្រួល៖ វីរបុត្រ
ប្រភព៖ Reuters

The post លោកនាយករដ្ឋមន្ត្រីអង់គ្លេស Johnson ប្រឈមអស់តំណែងថ្ងៃនេះ appeared first on Kampuchea Thmey Daily.

នាយករដ្ឋមន្ត្រីអង់គ្លេស Johnson បដិសេធលាលែងពីការចោទប្រកាន់បំពានបំរាមកូវីដ

chean virakbot — Thu, 27 Jan 2022 02:15:57 +0000

លោកនាយករដ្ឋមន្ត្រីអង់គ្លេស Boris Johnson កាលពីថ្ងៃពុធម្សិលមិញបានបដិសេធនឹងការអំពាវនាវពីក្រុមប្រឆាំងឲ្យលាលែងពីតំណែង ជុំវិញការចោទប្រកាន់មានរៀបចំពិធីជប់លៀងកំឡុងពេលបំរាមបិទខ្ទប់កូវីដ-១៩។

លោក Johnson ដែលកាលពីឆ្នាំ២០១៩បានជួយឲ្យគណបក្សអភិរក្សនិយមឈ្នះសំឡេងភាគច្រើនបំផុតក្នុងការបោះឆ្នោតរយៈពេលជាង៣០ឆ្នាំកន្លងទៅបានត្រៀមខ្លួននឹងការចេញផ្សាយជាផ្លូវការនៃការស៊ើបអង្កេតដែលមានការអះអាងថា មានពិធីជួបជុំ និងជប់លៀងជាច្រើននៅ Downing Street កំឡុងពេលបំរាមបិទខ្ទប់។ លោកបានប្រាប់សភាថា គ្មានច្បាប់ណាត្រូវបានបំពាននោះទេ។

ភ្លាមៗនេះមិនទាន់ច្បាស់លាស់នៅឡើយទេនៅពេលលទ្ធផលនៃការស៊ើបអង្កេតរបស់មន្ត្រីគណៈរដ្ឋមន្ត្រី លោក Sue Gray មិនទាន់ចេញផ្សាយ ជាពិសេសប៉ូលិសមិនទាន់បង្ហាញពីការស៊ើបអង្កេតផ្ទាល់របស់ពួកគេ។

មេដឹកនាំគណបក្សការងារដែលជាបក្សប្រឆាំង លោក Keir Starmer បាននិយាយថា មន្ត្រីដែលបំភាន់សភាគួរតែលាឈប់។ អនុវត្តចំពោះលោក Johnson គឺពិតណាស់។ ប្រសិនបើលោកបំភាន់សភា លោកត្រូវតែលាឈប់។ ឥឡូវនេះ តើលោកនឹងលាឈប់?

លោក Johnson បានឆ្លើយថា ៖«អត់ទេ»។

លោកបាននិយាយថា លោកមិនអាចនិយាយអំពីការស៊ើបអង្កេតជុំវិញការជួបជុំដែលត្រូវបានចោទប្រកាន់នោះទេ។ លោកថា រដ្ឋាភិបាលរបស់លោកបានផ្តោតលើការជំរុញកំណើនសេដ្ឋកិច្ច និងដឹកនាំប្រទេសលោកខាងលិចឆ្លើយតបចំពោះវិបត្តិអ៊ុយក្រែន។

លោក Johnson បានពន្យល់ហេតុផលផ្សេងគ្នាអំពីការជួបជុំ។ លោកបាននិយាយថា គ្មានច្បាប់ណាដែលត្រូវបានបំពាននោះទេ ប៉ុន្តែក្រោយមក លោកបានធ្វើការសុំទោសជាសាធារណៈដល់ប្រជាជនអង់គ្លេសសម្រាប់ការលាក់ពុតជាក់ស្តែងដូចជាការជួបជុំជាដើម។

លោកបានបដិសេធចំពោះរាល់ការចោទប្រកាន់ដែលលើកឡើងថា លោកបានយកស្រាផ្ទាល់ខ្លួនទៅក្នុងការជួបជុំគ្នាពេលបំរាមបិទខ្ទប់កាលពីថ្ងៃទី២០ ខែឧសភា ឆ្នាំ២០២០ ប៉ុន្តែលោកបានគិតថា ជាកម្មវិធីការងារ។

កាលពីដើមសប្តាហ៍នេះ សារព័ត៌មាន ITV បានចេញផ្សាយថា លោក Johnson និងភរិយាលោកស្រី Carrie បានរៀបចំពិធីខួបកំណើតភ្ញាក់ផ្អើលមួយដល់លោកដែលមានមនុស្សប្រហែល៣០នាក់នៅបន្ទប់ខុទ្ទកាល័យឯនិវេសនដ្ឋាន Downing Street ក្នុងខែមិថុនា ឆ្នាំ២០២០ ដែលជាពេលការជួបជុំត្រូវបានហាម៕

ប្រែសម្រួល៖ វីរបុត្រ
ប្រភព៖ reuters

The post នាយករដ្ឋមន្ត្រីអង់គ្លេស Johnson បដិសេធលាលែងពីការចោទប្រកាន់បំពានបំរាមកូវីដ appeared first on Kampuchea Thmey Daily.

បែកធ្លាយនាយករដ្ឋមន្ត្រីអង់គ្លេស Boris ជប់លៀងខួបកំណើតក្នុងពេលបំរាមកូវីដ

chean virakbot — Tue, 25 Jan 2022 03:14:07 +0000

នាយករដ្ឋមន្ត្រីអង់គ្លេស លោក Boris Johnson បានរៀបចំពិធីជប់លៀងខួបកំណើតកំឡុងពេលបំរាមបិទខ្ទប់កូវីដ-១៩លើកទី១ក្នុងខែមិថុនា ឆ្នាំ២០២០ ជាពេលដែលការជួបជុំសង្គមទាំងក្នុង និងក្រៅត្រូវបានហាម។ នេះបើយោងតាមការផ្សាយរបស់ទីភ្នាក់ងារសារព័ត៌មាន ITV កាលពីថ្ងៃចន្ទ ទី២៤ ខែមករានេះ។

ដំណឹងនេះបានក្លាយជាសម្ពាធបន្ថែមទៀតលើលោក Johnson បន្ទាប់ពីមានរឿងជួបជុំជប់លៀងនៅសួនច្បារ 10 Downing Street ឯនិវេសនដ្ឋានរបស់លោកត្រូវបានគេចោទពីបទបំពានច្បាប់កូវីដចេញដោយរដ្ឋាភិបាលរបស់លោក។

លោក Boris Johnson និងភរិយា

ការិយាល័យរបស់លោកបានបដិសេធ និងបានអះអាងថា មិនមែនជាពិធីជប់លៀងទេ។ ការិយាល័យបានប្រាប់ ITV ថា ៖«បុគ្គលិកមួយក្រុមដែលធ្វើការនៅបន្ទប់ No 10 នោះគឺជាថ្ងៃជួបជុំគ្នាខ្លីក្នុងបន្ទប់ខុទ្ធកាល័យ បន្ទាប់ពីជួបគ្នាដើម្បីជូនពរថ្ងៃកំណើតលោកនាយករដ្ឋមន្ត្រី។

ការិយាល័យនិយាយថា ៖«លោកនៅទីនោះមិនដល់១០នាទីផង»។

ទីភ្នាក់ងារសារព័ត៌មាន ITV បានផ្សាយថា ភរិយារបស់លោកនាយករដ្ឋមន្ត្រីគឺលោកស្រី Carrie Johnson បានជួយរៀបចំពិធីជប់លៀងនារសៀលថ្ងៃទី១៩ ខែមិថុនា។ មនុស្សប្រហែលជា៣០នាក់បានចូលរួមក្នុងព្រឹត្តិការណ៍ នៅបន្ទប់លេខ១០របសខុទ្ទកាល័យ ការិយាល័យ និងនិវេសនដ្ឋានរបស់លោក។

លោកនាយករដ្ឋមន្ត្រីត្រូវបានគេជឿថា ត្រូវបានគេជូននំខួបកំណើត ស្របពេលភរិយារបស់លោកបាននាំគ្នាច្រៀងបន្ទរពីបទជូនពរថ្ងៃខួបកំណើត។

ការផ្សាយនោះបានបន្ថែមថា វត្តមានអ្នកចូលរួមមានទាំងអ្នកឌីហ្សាញផ្នែកក្នុងឈ្មោះ Lulu Lytle ដែលជាអ្នកកែច្នៃផ្ទះល្វែងរបស់លោក Johnson ក្នុងអគារនោះ។

ITV ក៏បាននិយាយថា ខ្លួនក៏បានយល់ដែរថា មិត្តភក្តិរបស់ក្រុមគ្រួសារលោកត្រូវបានអញ្ជើញឲ្យចូលរួមនៅនិវេសនដ្ឋានរបស់លោកនាយករដ្ឋមន្ត្រី។

ទោះបីជាយ៉ាងណា ការិយាល័យរបស់លោកបានបដិសេធ។ អ្នកនាំពាក្យម្នាក់បានប្រាប់ ITV ថា ៖«នោះមិនមែនជាការពិតទាល់តែសោះ។ ស្របតាមច្បាប់នៅពេលនោះ លោកនាយករដ្ឋមន្ត្រីបានទទួលសមាជិកគ្រួសារមួយចំនួនតូចនៅខាងក្រៅនាល្ងាចនោះ»។

ការចោទប្រកាន់រៀបចំពិធីជប់លៀងខួបកំណើតបានបន្ថែមលើរឿងអាស្រូវរបស់លោក Johnson។ មន្ត្រីការិយាល័យជាន់ខ្ពស់ លោក Sue Gray បានកំពុងស៊ើបអង្កេតពីការជួបជុំ និងត្រូវបានគេរំពឹងថា នឹងចេញរបាយការណ៍នាចុងសប្តាហ៍នេះ។

លោក Johnson បានពន្យល់ផ្សេងៗគ្នាអំពីពិធីជប់លៀងមុនដែលត្រូវបានរាយការណ៍។ លោកបាននិយាយថា មិនមានច្បាប់ណាដែលត្រូវបានបំពានទេ ប៉ុន្តែក្រោយមកលោកបានធ្វើការសុំទោសជាសាធារណៈដល់ពលរដ្ឋអង់គ្លេសសម្រាប់ការលាក់ពុតជាក់ស្តែងដូចជាការជួបជុំជាដើម។

មេដឹកនាំបក្សប្រឆាំង លោក Keir Starmer បាននិយាយអំពីពិធីជប់លៀងខួបកំណើតថា ៖«នេះជាភស្តុតាងបន្ថែមទៀតដែលយើងជឿជាក់ថា លោកនាយករដ្ឋមន្ត្រីមិនគោរពច្បាប់ដែលលោកជាអ្នកចេញ»។

«យើងមិនអាចទ្រាំបន្តជាមួយរដ្ឋាភិបាលច្របូកច្របល់ និងមិនយល់ការណ៍នេះបានទេ។ លោកនាយករដ្ឋមន្ត្រីគឺជាអ្នករំខានជាតិ ហើយលោកត្រូវតែទៅ»៕

ប្រែសម្រួល៖ វីរបុត្រ
ប្រភព៖ Reuters

The post បែកធ្លាយនាយករដ្ឋមន្ត្រីអង់គ្លេស Boris ជប់លៀងខួបកំណើតក្នុងពេលបំរាមកូវីដ appeared first on Kampuchea Thmey Daily.

សប្បាយក្លាយទុក្ខ នាយករដ្ឋមន្ត្រីអង់គ្លេសកំពុងប្រឈមអស់តំណែង

chean virakbot — Thu, 20 Jan 2022 01:49:07 +0000

នាយករដ្ឋមន្ត្រីអង់គ្លេស លោក Boris Johnson កំពុងប្រឈមនឹងបាត់បង់តំណែងដោយសារតែលោកមានពិធីជប់លៀងនៅសួនច្បារឯគេហដ្ឋានផ្លូវការរបស់លោកដែលត្រូវបានចោទប្រកាន់បំពានច្បាប់កូវីដ-១៩ និងចំពេលព្រះមហាក្សត្រិយ៍កាន់ទុក្ខព្រះស្វាមីសោយទិវង្គតថែមទៀត។

នៅក្នុងគ្រោះថ្នាក់មួយសម្រាប់ភាពដឹកនាំ លោក Johnson ត្រូវបានចោទប្រកាន់ពីការបំភាន់សមាជិកសភា និងសាធារណៈអំពីពិធីជប់លៀងសប្បាយរីករាយនៅ 10 Downing Street ក្នុងទីក្រុងឡុងកាលពីខែមេសា ឆ្នាំមុនជាពេលកូវីដ-១៩រាតត្បាតខ្លាំង។

លោកមិនត្រឹមតែប្រឈមនឹងការអំពាវនាវឲ្យលាលែងពីក្រុមប្រឆាំងប៉ុណ្ណោះទេ ប៉ុន្តែនៅក្នុងចំណោមសមាជិកគណបក្សអភិរក្សនិយមរបស់លោកក៏មានការបះបោរដែរ។

លើសពីការលាតត្រដាងអំពីការជួបជុំដែលបំពាន់គោលការណ៍ទប់ស្កាត់កូវីដដ៏មានឥទ្ធិពល លោកនាយករដ្ឋមន្ត្រីរូបនេះក៏ប្រឈមនឹងបញ្ហាផ្សេងទៀត ក្នុងនោះមានការប្រមូលមូលនិធិសម្រាប់ការជួសជុលផ្ទះល្វែងមួយ និងកាលពីឆ្នាំមុន រដ្ឋាភិបាលរបស់លោកបានព្យាយាមជួយសង្គ្រោះសមាជិកសភារបស់គណបក្សអភិរក្សម្នាក់ដែលជាប់ព័ន្ធនឹងរឿងអាស្រូវផ្ទាល់ខ្លួន។

អតីតទីប្រឹក្សាកំពូលរបស់លោក គឺលោក Dominic Cummings បានចោទប្រកាន់ថា លោកបានព្រមានលោកនាយករដ្ឋមន្ត្រីពិធីជប់លៀងផឹកស៊ីនៅឧទ្យាន Downing Street មុនពេលពិធីកើតឡើង ប៉ុន្តែលោកនាយករដ្ឋមន្ត្រីបាននិយាយថា គ្មាននរណាព្រមានលោកទេ។

ឥឡូវនេះ ក្រុមអភិរក្សគណបក្សលោកបានកំពុងថ្លឹងថ្លែងអំពីបុរសដែលបានជួយឲ្យឈ្នះការបោះឆ្នោត Brexit និងបង្កើនភាពខ្លាំងរហូតទទួលបានជ័យជម្នះក្នុងការបោះឆ្នោតចុងក្រោយតាមពិតគឺអាចចំណាយបាន។

មន្ត្រីរាជការជាន់ខ្ពស់ លោកស្រី Sue Gray គ្រោងនឹងបោះពុម្ពផ្សាយអំពីរបាយការណ៍មួយដែលការបំពានច្បាប់កូវីដត្រូវបានចោទប្រកាន់នៅក្នុងការបិទខ្ទប់នៅក្នុងពិធីជួបជុំគ្នានៅ Downing Street និងនាយករដ្ឋានរដ្ឋាភិបាល។ ក្រុមការងាររបស់លោកស្រី Gray បានទាក់ទងទៅលោក Cummings ដើម្បីជាផ្នែកមួយនៃការស៊ើបអង្កេតរបស់ពួកគេ។

ស្របពេលជាមួយគ្នានេះ សមាជិកសភាជាច្រើនបានលាតត្រដាងជាសាធារណៈថា ពួកគេបានដាក់ស្នើលិខិតមិនទុកចិត្តចំពោះលោកនាយករដ្ឋមន្ត្រីទៅលោក Graham Brady ដែលជាប្រធានគណកម្មាធិការ១៩២២។

លើសពីនេះទៀត ក្រុមសមាជិកសភាគណបក្សអភិរក្សនិយមប្រហែលជា២០នាក់ដែលត្រូវបានបោះឆ្នោតជ្រើសរើសមុនគេនៅឆ្នាំ២០១៩ក៏បានជួបប្រជុំគ្នាដើម្បីដាក់លិខិតទៅលោក Graham ដែរ។

ប្រសិនបើសមាជិកសភា៥៤នាក់ដាក់លិខិតទៅលោក Graham បង្ហាញពីការមិនទុកចិត្តរបស់ពួកគេចំពោះលោកនាយករដ្ឋមន្ត្រី ដូច្នេះអ្នកដឹកនាំរបស់លោកនាយករដ្ឋមន្ត្រីនឹងកាន់តែពិបាកឈរជើង។

តាមពិតទៅ លោកនាយករដ្ឋមន្ត្រី Johnson បានធ្វើការសុំទោសជាសាធារណៈទៅព្រះមហាក្សត្រិយ៍អំពីពិធីជប់លៀង No 10 មុនថ្ងៃបុណ្យព្រះរាជសពព្រះអង្គ Duke of Edinburgh កាលពីខែមេសា ឆ្នាំមុន៕

ប្រែសម្រួល៖ វីរបុត្រ
ប្រភព៖ BBC

The post សប្បាយក្លាយទុក្ខ នាយករដ្ឋមន្ត្រីអង់គ្លេសកំពុងប្រឈមអស់តំណែង appeared first on Kampuchea Thmey Daily.

នាយករដ្ឋមន្ត្រីអង់គ្លេសថា «គ្មាននរណាព្រមានខ្ញុំពីការជប់លៀងបំពានច្បាប់កូវីដនោះទេ»

chean virakbot — Wed, 19 Jan 2022 05:37:46 +0000

លោកនាយករដ្ឋមន្ត្រីអង់គ្លេស Boris Johnson បានបញ្ជាក់យ៉ាងខ្លាំងថា គ្មាននរណាម្នាក់បានព្រមានលោកនៅពិធីជប់លៀងមួយនៅឧទ្យាន No 10 ដែលបំពានបំរាមបិទខ្ទប់កូវីដ-១៩ឡើយ។

លោកនាយករដ្ឋមន្ត្រីបាននិយាយថា ៖«គ្មាននរណាម្នាក់ព្រមានខ្ញុំទេថា វាខុសនឹងច្បាប់។ ខ្ញុំចងចាំច្បាស់ណាស់»។

អតីតជំនួយការ Dominic Cummings បាននិយាយថា លោកបានព្រមានលោកនាយករដ្ឋមន្ត្រីនៅពេលនោះ និងបានចោទលោកថា បានបំភាន់សមាជិកសភាអំពីរឿងព្រមាននោះ។

នៅពេលសួរថា លោកអាចនឹងលាលែងពីតំណែងនាយករដ្ឋមន្ត្រី ប្រសិនបើលោកត្រូវបានគេរកឃើញថា បានបំភាន់សមាជិកសភា លោក Johnson បាននិយាយថា ៖«ចាំមើលសិន របាយការណ៍និយាយយ៉ាងណា»។

ក្រុមការងាររបស់លោកស្រី Gray បានទាក់ទងទៅលោក Cummings ដើម្បីជាផ្នែកមួយនៃការស៊ើបអង្កេតរបស់ពួកគេ។ លោក Cummings បាននិយាយថា លោកមានឆន្ទៈដើម្បីឆ្លើយរាល់សំនួររបស់ពួកគេ។

សមាជិកសភា៦រូបគេបានបង្ហាញជាសាធារណៈថា ពួកគេបានដាក់លិខិតមិនទុកចិត្តចំពោះលោកនាយករដ្ឋមន្ត្រី Johnson ហើយប្រព័ន្ធផ្សព្វផ្សាយ BBC ត្រូវបានគេប្រាប់ថា សមាជិកសភាទី៧ លោក Christian Wakeford ក៏បានសរសេរលិខិតមិនទុកចិត្តទៅលោក Graham Brady ដែលជាប្រធានគណកម្មាធិការ១៩២២។

តាមបុគ្គលិករបស់ BBC អ្នកស្រី Laura Kuenssberg បាននិយាយថា ក្រុមសមាជិកសភាគណបក្សអភិរក្សនិយមប្រហែលជា២០នាក់ដែលត្រូវបានបោះឆ្នោតជ្រើសរើសមុនគេនៅឆ្នាំ២០១៩ក៏បានជួបប្រជុំគ្នាដើម្បីដាក់លិខិតទៅលោក Graham ដែរ។

ប្រសិនបើសមាជិកសភា៥៤នាក់ដាក់លិខិតទៅលោក Graham បង្ហាញពីការមិនទុកចិត្តរបស់ពួកគេចំពោះលោកនាយករដ្ឋមន្ត្រី ដូច្នេះវានឹងបង្កើតជាការប្រកួតប្រជែងភាពជាអ្នកដឹកនាំ។

លោកនាយករដ្ឋមន្ត្រី Johnson បានធ្វើការសុំទោសជាសាធារណៈទៅព្រះមហាក្សត្រិយ៍ពិធីជប់លៀង No 10 មុនថ្ងៃព្រះរាជពិធីបុណ្យសពព្រះអង្គ Duke of Edinburgh កាលពីខែមេសា ឆ្នាំមុន។

លោកបាននិយាយថា ៖«ទូលបង្គំពិតជាសុំព្រះរាជទានទោសចំពោះព្រះមហាក្សត្រិយ៍ និងសុំទោសជនរួមជាតិ សម្រាប់ការវិនិច្ឆ័យខុសដែលត្រូវបានធ្វើ និងសម្រាប់ការទទួលខុសត្រូវរបស់ទូលបង្គំទាំងស្រុង»។ រឿងហេតុនេះពាក់ព័ន្ធនឹងពិធីជប់លៀងដែលលោកនាយករដ្ឋមន្ត្រីបានចូលរួមចំពេលដែលព្រះមហាក្សត្រិយ៍កាន់ទុក្ខព្រះស្វាមីសោយទិវង្គតចំពេលកំពុងបិទខ្ទប់កូវីដថែមទៀត៕

ប្រែសម្រួល៖ វីរបុត្រ
ប្រភព៖ BBC

The post នាយករដ្ឋមន្ត្រីអង់គ្លេសថា «គ្មាននរណាព្រមានខ្ញុំពីការជប់លៀងបំពានច្បាប់កូវីដនោះទេ» appeared first on Kampuchea Thmey Daily.

វិធានការកូវីដនៅអង់គ្លេស ហាមរួមភេទរហូតដល់ពាក់កណ្តាលខែឧសភា

Sok Sovann — Tue, 23 Feb 2021 07:46:17 +0000

នៅចក្រភពអង់គ្លេស ប្រសិនបើអ្នកនៅលីវ ហើយចង់បានទំនាក់ទំនងជាមួយមនុស្សមួយចំនួនបន្ទាប់ពីវិធានការរឹតត្បិតដ៏យូរ នេះពិតជាដំណឹងអាក្រក់ណាស់។

រហូតដល់ពាក់កណ្តាលខែឧសភា មនុស្សមកពីគ្រួសារផ្សេងគ្នានឹងមិនត្រូវបានអនុញ្ញាតឲ្យ ជួបជុំក្នុងផ្ទះឡើយ។

កាលពីថ្ងៃចន្ទ នាយករដ្ឋមន្ត្រីអង់គ្លេសលោក Boris Johnson បានបង្ហាញគោលការណ៍ចាកចេញពីវិធានការរឹតត្បិតដោយសារវីរុសកូរ៉ូណា ដែលបានសម្លាប់មនុស្សជាង១២០,០០០នាក់ នៅក្នុងចក្រភពអង់គ្លេស ហើយបានបំផ្លាញសេដ្ឋកិច្ចនិងធ្វើឲ្យក្រុមគ្រួសារនិងមិត្តភក្តិត្រូវបែកគ្នាអស់រយៈពេលជាច្រើនខែ។

លោកនាយករដ្ឋមន្រ្តីបានប្រាប់រដ្ឋសភាថា ការបើកសាលារៀន ហាងសាឡន ហាងស្រានិងភោជនីយដ្ឋានឡើងវិញ នឹងចាប់ផ្តើមអនុវត្តក្នុងរយៈពេលប៉ុន្មានខែខាងមុខ ដែលនេះផ្តល់ក្តីសង្ឃឹមយ៉ាងពិតប្រាកដថា ចុងបញ្ចប់នៃវិធានការរឹតត្បិតបានមកដល់ហើយ។

ទោះបីជាយ៉ាងណាក៏ដោយ លោកមិនបានបញ្ជាក់ទេថាតើ ពេលណាទើបមនុស្សពេញវ័យដើរលេងដាច់យប់រួមភេទនៅខាងក្រៅ អាចត្រូវបានអនុញ្ញាតនៅក្នុងគោលការណ៍បួនចំណុចរបស់លោកប៉ុន្តែ យើងអាចអានសេចក្តីណែនាំដើម្បីយល់ឲ្យកាន់តែច្បាស់នៅពេលដែលក្លិបរាត្រីបើកឡើងវិញ។

គួរឲ្យស្តាយ អ្នកដែលចង់រកសេវាផ្លូវភេទនៅខាងក្រៅ នឹងមិនត្រូវបានអនុញ្ញាតនោះទេ រហូតដល់ទីបញ្ចប់នៃចំណុចទី៣នៃវិធានការនេះ ដែលចូលជាធរមានយ៉ាងហោចណាស់ក៏ថ្ងៃទី១៧ខែឧសភាដែរ។

ត្រង់ចំណុចនេះ “ច្បាប់ទំនាក់ទំនងសង្គមភាគច្រើន” នឹងត្រូវបានដកនៅប្រទេសអង់គ្លេស ដែលមានន័យថា ប្រជាជនលែងគោរពតាមវិធានជួបជុំគ្នានៅក្រៅផ្ទះទៀតហើយ៕

ប្រែសម្រួលដោយ៖ Vann Vann

ប្រភព៖ Daily Star

ចុចអាន៖ ច្បាស់ៗអំពីរោគសញ្ញាជំងឺកូវីដ ១៩ គ្រប់គ្នាគួរដឹង

ចុចអាន៖ អ្នកជំងឺកូវីដអាចបាត់បង់ក្លិននិងរសជាតិរហូតដល់ ៥ ខែ បន្ទាប់ពីការឆ្លងមេរោគ

The post វិធានការកូវីដនៅអង់គ្លេស ហាមរួមភេទរហូតដល់ពាក់កណ្តាលខែឧសភា appeared first on Kampuchea Thmey Daily.

នាយករដ្ឋមន្រ្តីអង់គ្លេសត្រូវដាក់ខ្លួននៅដាច់ពីគេក្រោយប៉ះពាល់ជាមួយសមាជិកសភាឆ្លងកូវីដ

Sok Sovann — Mon, 16 Nov 2020 00:00:51 +0000

លោក Boris Johnson ត្រូវដាក់ខ្លួនឯងនៅដាច់ដោយឡែកបន្ទាប់ពីជួបជាមួយសមាជិកសភាម្នាក់ដែលក្រោយមកបានធ្វើតេស្តវិជ្ជមានជំងឺកូវីដ១៩។

នាយករដ្ឋមន្រ្តីរូបនេះនិយាយថា គាត់ត្រូវបានទាក់ទងដោយ NHS Test and Trace កាលពីថ្ងៃអាទិត្យប៉ុន្តែមិនបង្ហាញរោគសញ្ញាអ្វីទេ។

កាលពីថ្ងៃព្រហស្បតិ៍ លោក Johnson បានចំណាយពេលប្រហែល៣៥នាទីជាមួយសមាជិកសភា Ashfield លោក Lee Anderson ដែលក្រោយមកបានធ្វើតេស្តវិជ្ជមានវីរុសកូរ៉ូណា។

ព័ត៌មាននេះបានកើតឡើងនៅពេលការិយាល័យ Downing Street និយាយថា លោក Johnson នឹងធ្វើការប្រកាសដ៏សំខាន់មួយអំពីវីរុសកូរ៉ូណានិងបង្កើនកម្រិតវិធានការរបស់ចក្រភពអង់គ្លេសក្នុងរយៈពេលប៉ុន្មានសប្តាហ៍ខាងមុខនេះ។

លោក Johnson បានសរសេរនៅលើបណ្តាញសង្គម Twitter កាលពីយប់ថ្ងៃអាទិត្យថា “ថ្ងៃនេះខ្ញុំត្រូវបានជូនដំណឹងដោយ NHS Test and Trace ថា ខ្ញុំត្រូវតែញែកខ្លួននៅដាច់ពីគេដោយសារខ្ញុំបានទាក់ទងជាមួយមនុស្សម្នាក់ដែលបានធ្វើតេស្តវិជ្ជមានជំងឺកូវីដ១៩”។

លោកបន្តថា “ខ្ញុំមិនមានរោគសញ្ញាអ្វីទេប៉ុន្តែខ្ញុំកំពុងអនុវត្តតាមច្បាប់ហើយនឹងធ្វើការពីការិយាល័យ Downing Street ខណៈពេលខ្ញុំបន្តដឹកនាំការឆ្លើយតបរបស់រដ្ឋាភិបាលចំពោះជំងឺរាតត្បាតនេះ”។

គួរបញ្ជាក់ថា ក្នុងខែមេសា លោក Johnson បានព្យាបាលក្នុងបន្ទប់សង្គ្រោះបន្ទាន់រយៈពេល៣យប់បន្ទាប់ពីធ្លាក់ខ្លួនឈឺដោយសារជំងឺនេះ។

ក្រោយមក គាត់បានអរគុណដល់បុគ្គលិកសុខាភិបាលដែលជួយសង្គ្រោះជីវិតរបស់គាត់៕

ប្រែសម្រួលដោយ៖ Vann Vann

The post នាយករដ្ឋមន្រ្តីអង់គ្លេសត្រូវដាក់ខ្លួននៅដាច់ពីគេក្រោយប៉ះពាល់ជាមួយសមាជិកសភាឆ្លងកូវីដ appeared first on Kampuchea Thmey Daily.

អង់គ្លេសប្រកាសបិទប្រទេស៤សប្តាហ៍ទៀតដោយសារកូវីដ១៩

Sok Sovann — Sun, 01 Nov 2020 00:10:25 +0000

លោកនាយករដ្ឋមន្រ្តី Boris Johnson បានប្រកាសបិទប្រទេសអង់គ្លេសជាលើកទី២ដើម្បីការពារគ្រោះមហន្តរាយខាងវេជ្ជសាស្ត្រនិងសីលធម៌លើសេវាកម្មសុខភាពជាតិ (NHS)។

លោកនិយាយថា បុណ្យណូអែលឆ្នាំនេះប្រហែលជាខុសគ្នាខ្លាំងប៉ុន្តែលោកសង្ឃឹមថា ការចាត់វិធានការឥឡូវនេះនឹងមានន័យថា ក្រុមគ្រួសារអាចជួបជុំគ្នាបាន។

លោកបន្តថា ហាងស្រា ភោជនីយដ្ឋាន ក្លិបហាត់ប្រាណនិងហាងមិនចាំបាច់នានានឹងត្រូវបិទរយៈពេល៤សប្តាហ៍ ចាប់ពីថ្ងៃព្រហស្បតិ៍ទៅ។ ប៉ុន្តែមិនដូចការរឹតបន្តឹងកាលពីនិទាឃរដូវទេ សាលារៀន មហាវិទ្យាល័យនិងសាកលវិទ្យាល័យនៅតែអាចបើកទ្វារបាន។

លោកបន្ថែមថា ក្រោយថ្ងៃទី២ខែធ្នូ ការរឹតបន្តឹងនឹងត្រូវបានបន្ធូរបន្ថយហើយតំបន់នានានឹងវិលត្រឡប់ទៅរកប្រព័ន្ធស្មើភាពគ្នាវិញ។

នាយករដ្ឋមន្រ្តីអង់គ្លេសលោក Boris Johnson

ក្រោមការរឹតត្បិតថ្មីនេះមានដូចជា៖

ពលរដ្ឋត្រូវស្នាក់នៅក្នុងផ្ទះលើកលែងតែពួកគេមានហេតុផលជាក់លាក់ក្នុងការចាកចេញដូចជាទៅធ្វើការងារដែលមិនអាចធ្វើពីផ្ទះបាននិងការអប់រំជាដើម។
ប្រជាជនក៏ត្រូវបានអនុញ្ញាតឲ្យចាកចេញពីផ្ទះដើម្បីហាត់ប្រាណសម្រាប់ហេតុផលសុខភាព អាហារនិងការដើរទិញឥវ៉ាន់សំខាន់ៗដទៃទៀតនិងផ្តល់ការថែទាំដល់មនុស្សងាយរងគ្រោះឬសម្រាប់ការស្ម័គ្រចិត្តផងដែរ។
មិនអនុញ្ញាតឲ្យជួបជុំក្នុងផ្ទះឬនៅក្នុងសួនច្បារឯកជនទេ
ប៉ុន្តែបុគ្គលម្នាក់ៗអាចជួបមនុស្សម្នាក់ទៀតមកពីគ្រួសារផ្សេងនៅខាងក្រៅតាមកន្លែងសាធារណៈបាន
ហាងស្រា បារ ភោជនីយដ្ឋាននិងការលក់រាយដែលមិនចាំបាច់នៅទូទាំងប្រទេសនឹងត្រូវបិទទ្វារប៉ុន្តែការទិញទំនិញតាមអនឡាញនៅបើកដដែល។
កន្លែងលំហែកាយនិងការកម្សាន្តរួមទាំងកន្លែងហាត់ប្រាណក៏នឹងត្រូវបិទផងដែរ
ការដ្ឋានសំណង់និងទីតាំងឧស្សាហកម្មនៅតែអាចបើកដំណើរការ
កុមារអាចចេញពីផ្ទះមួយទៅផ្ទះមួយបានប្រសិនបើឪពុកម្តាយនៅដាច់ពីគ្នា
អ្នកដែលងាយរងគ្រោះខាងសុខភាពត្រូវបានគេស្នើសុំឲ្យមានការប្រុងប្រយ័ត្នជាពិសេស។

គួរបញ្ជាក់ថា ចក្រភពអង់គ្លេសបានកត់ត្រាករណីឆ្លងជំងឺកូវីដ១៩ចំនួន២១,៩១៥ករណីទៀតកាលពីថ្ងៃសៅរ៍ដោយធ្វើឲ្យចំនួនសរុបកើនដល់១,០១១,៦៦០៕

ប្រែសម្រួលដោយ៖ Vann Vann

ប្រភព៖ BBC

The post អង់គ្លេសប្រកាសបិទប្រទេស៤សប្តាហ៍ទៀតដោយសារកូវីដ១៩ appeared first on Kampuchea Thmey Daily.

Boris Johnson Archives - Kampuchea Thmey Daily

លោក​នាយក​​រដ្ឋ​​មន្ត្រី​​អង់គ្លេស​ Johnson​ ប្រឈម​​អស់​​តំណែង​​​​ថ្ងៃ​​នេះ

នាយក​​រដ្ឋ​​មន្ត្រី​​អង់គ្លេស​ Johnson បដិសេធ​​លា​លែង​ពី​​ការ​​ចោទ​ប្រកាន់​បំពាន​​បំរាម​​កូវីដ

បែក​ធ្លាយ​នាយក​រដ្ឋ​មន្ត្រី​អង់គ្លេស​ Boris​ ជប់​លៀង​ខួបកំណើត​ក្នុង​ពេល​បំរាម​កូវីដ

សប្បាយ​ក្លាយ​ទុក្ខ​ នាយក​រដ្ឋ​មន្ត្រី​អង់គ្លេស​កំពុង​ប្រឈម​អស់តំណែង

នាយក​រដ្ឋ​មន្ត្រី​អង់គ្លេស​ថា​ «គ្មាន​នរណា​ព្រមានខ្ញុំពីការ​ជប់​លៀង​បំពាន​ច្បាប់​កូវីដ​នោះ​ទេ»

វិធានការកូវីដនៅអង់គ្លេស ហាមរួមភេទរហូតដល់ពាក់កណ្តាលខែឧសភា

នាយករដ្ឋមន្រ្តីអង់គ្លេសត្រូវដាក់ខ្លួននៅដាច់ពីគេក្រោយប៉ះពាល់ជាមួយសមាជិកសភាឆ្លងកូវីដ

អង់គ្លេសប្រកាសបិទប្រទេស៤សប្តាហ៍ទៀតដោយសារកូវីដ១៩

លោកនាយករដ្ឋមន្ត្រីអង់គ្លេស Johnson ប្រឈមអស់តំណែងថ្ងៃនេះ

នាយករដ្ឋមន្ត្រីអង់គ្លេស Johnson បដិសេធលាលែងពីការចោទប្រកាន់បំពានបំរាមកូវីដ

បែកធ្លាយនាយករដ្ឋមន្ត្រីអង់គ្លេស Boris ជប់លៀងខួបកំណើតក្នុងពេលបំរាមកូវីដ

សប្បាយក្លាយទុក្ខ នាយករដ្ឋមន្ត្រីអង់គ្លេសកំពុងប្រឈមអស់តំណែង

នាយករដ្ឋមន្ត្រីអង់គ្លេសថា «គ្មាននរណាព្រមានខ្ញុំពីការជប់លៀងបំពានច្បាប់កូវីដនោះទេ»