បន្ទាប់ពីខកចិត្តនៅក្នុងការប្រកួតដំបូងទល់នឹងក្រុម កុងហ្គោ គឺនៅយប់រំលងអាធ្រាត្រឈានចូលថ្ងៃទី ២៤ ខែ មិថុនា ឆ្នាំ ២០២៦ នេះ Ronaldo បានបង្ហាញសមត្ថភាពយ៉ាងអស្ចារ្យ ដោយបានស៊ុត ២ គ្រាប់ ជួយឱ្យក្រុម ព័រទុយហ្គាល់ លត់ក្រុមជម្រើសជាតិ អ៊ុយបេគីស្ថាន ក្នុងលទ្ធផល ៥-០។

លទ្ធផលដ៏ត្រចះត្រចង់នេះ បានធ្វើឱ្យ ព័រទុយហ្គាល់ ហក់ឡើងមកឈរកំពូលតារាងពូល K បណ្តោះអាសន្ន ដោយមាន ៤ ពិន្ទុក្នុងដៃ។ យ៉ាងណា លំដាប់ចំណាត់ថ្នាក់នៅក្នុងពូល K នេះ នឹងមានការប្រែប្រួល បន្ទាប់ពី កូឡុំប៉ី បញ្ចប់ការប្រកួតទល់នឹងក្រុម កុងហ្គោ។

ងាកមកកាន់ប្រធានក្រុម Ronaldo វិញ ក៏ត្រូវបានគេកត់ត្រាកំណត់ត្រាថ្មី ៣ បន្ថែមទៀតផងដែរ ក្រោយស៊ុតបញ្ចូលទី ២ គ្រាប់នេះ។ កំណត់ត្រាទី ១ ខ្សែប្រយុទ្ធវ័យ ៤១ ឆ្នាំរូបនេះ បានក្លាយជាកីឡាករវ័យចំណាស់ជាងគេបំផុត ដែលអាចរកបានគ្រាប់បាល់ ២ គ្រាប់ក្នុងមួយប្រកួតនៅ World Cup។

កំណត់ត្រាទី ២ ខ្សែប្រយុទ្ធរបស់ក្រុម Al-Nassr បានក្លាយជាកីឡាករដំបូងគេបង្អស់ ដែលអាចស៊ុតបញ្ចូលទីបាននៅ World Cup ៦ លើកផ្សេងគ្នា ពោលគឺនៅឆ្នាំ ២០០៦, ២០១០, ២០១៤, ២០១៨, ២០២២ និង ២០២៦។

កំណត់ត្រាចុងក្រោយ គឺ Ronaldo បានក្លាយជាកីឡាករ ដែលស៊ុតបញ្ចូលទីឱ្យក្រុមបញ្ចខែល ព័រទុយហ្គាល់ ច្រើនបំផុតនៅ World Cup ពោលគឺចំនួន ១០ គ្រាប់។ ពីមុនកំណត់ត្រានេះ ត្រូវបានកាន់កាប់ដោយអតីតខ្សែប្រយុទ្ធលោក Eusébio ដែលមាន ៩ គ្រាប់ ប៉ុន្តែបន្ទាប់ពី Ronaldo ស៊ុត ២ គ្រាប់យប់មិញ គឺបានបំបែកជាផ្លូវការហើយ។

អត្ថបទ៖ សេម កុសល

The post Ronaldo បំបែកកំណត់ត្រាធំ ៣ នៅ World Cup ក្រោយស៊ុត ២ គ្រាប់យប់មិញ appeared first on Kampuchea Thmey Daily.

ការប្រកួតពូល K នៃព្រឹត្តិការណ៍ World Cup 2026 ក្រុមជម្រើសជាតិ ព័រទុយហ្គាល់ ទទួលបានត្រឹម ១ ពិន្ទុប៉ុណ្ណោះ បន្ទាប់ពីស្មើក្រុម កុងហ្គោ ១-១។ ប្រធានក្រុម Ronaldo បានក្លាយជាផ្ទាំងស៊ីបរិះគន់យ៉ាងខ្លាំង បន្ទាប់ពីការប្រកួតនេះ ដោយសារការលេងរបស់គាត់ មិនសូវបានល្អដូចការរំពឹងទុក ហើយក៏មិនអាចរកបានគ្រាប់បាល់ឱ្យក្រុមថែមទៀត។

លោក Henry បានចេញមុខរិះគន់អំពីចំណុចមួយចំនួន នៃការលេងរបស់ខ្សែប្រយុទ្ធវ័យ ៤១ ឆ្នាំផងដែរ។ អតីតខ្សែប្រយុទ្ធ បារាំង បានសង្កត់ធ្ងន់ខ្លាំង ត្រង់ចំណុច ដែលកីឡាករ Francisco Conceição កាត់បាល់ចូលក្នុងប្រអប់ ប៉ុន្តែ Ronaldo មិនរត់ទាញខ្សែការពារ ដើម្បីបើកចន្លោះឱ្យ Bruno Fernandes បែរជាស៊ុតដោយខ្លួនឯងទៅវិញ។

ត្រង់ចំណុចនេះ លោក Henry បានថ្លែងនៅក្នុងការវិភាគជាមួយសារព័ត៌មាន Fox News ថា៖ «រឿងមួយដ៏សំខាន់បំផុត គឺក្រុមត្រូវការរកគ្រាប់បាល់ មិនមែនអ្នកត្រូវការរកគ្រាប់បាល់ដើម្បីខ្លួនឯងទេ»។

បុរសសញ្ជាតិ បារាំង បានបន្ថែមទៀត ថា៖ «ដូចដែលយើងឃើញ ពេល ព័រទុយហ្គាល់ កំពុងគ្រប់គ្រងបាល់ គឺ Cancelo នឹងទទួលបានបាល់។ Cristiano Ronaldo បានស្ថិតក្នុងស្ថានភាពបែបនេះជាច្រើនដង។ ប្រសិនបើអ្នករត់ចូលទៅតំបន់នោះ អ្នកនឹងបង្ខំឱ្យខ្សែការពារត្រូវសម្រេចចិត្តថា តើពួកគេគួរតាមអ្នកចូលទៅក្នុងប្រអប់ ១១ ម៉ែត្រឬក៏អត់»។

លោក Henry បានសង្កត់ធ្ងន់ ថា៖ «ប៉ុន្តែដោយសារតែគាត់ចង់ស៊ុតបញ្ចូលទីដោយខ្លួនឯង គាត់បានរត់ចូលទៅក្នុងចំណុចរបស់ Bruno។ ប្រសិនបើគាត់រត់ចូលទៅក្នុងប្រអប់ ១១ ម៉ែត្រ នោះខ្សែការពារនឹងត្រូវតែមកតាមគាត់។ ពេលនោះ Bruno នឹងមានឱកាសបញ្ចប់ទីយ៉ាងងាយស្រួល។ ប៉ុន្តែដោយសារតែគាត់ចង់រកគ្រាប់បាល់ដោយខ្លួនឯង គាត់បានរត់ចូលទៅក្នុងផ្លូវនៃការបញ្ជូននោះ។ ពេលខ្សែការពារឃើញអ្នកទាំងពីរនៅកន្លែងតែមួយ វាកាន់តែងាយស្រួលសម្រាប់ពួកគេក្នុងការការពារ»៕

ប្រែសម្រួល៖ សេម កុសល
ប្រភព៖ GOAL

The post លោក Henry បានរិះគន់ពីភាពអាត្មានិយមរបស់ Ronaldo ក្រោយ ព័រទុយហ្គាល់ ស្មើ កុងហ្គោ យប់មិញ appeared first on Kampuchea Thmey Daily.

បច្ចុប្បន្ន Ronaldo មានវ័យ ៤១ ឆ្នាំហើយ ប៉ុន្តែនៅតែជាកីឡាករដ៏សំខាន់របស់ក្រុមបញ្ចខែល ព័រទុយហ្គាល់។ ខ្សែប្រយុទ្ធរបស់ក្រុម Al-Nassr ត្រូវបានលោក Martinez បញ្ចូលឈ្មោះទៅក្នុងបញ្ជីកីឡាករទាំង ២៦ នាក់ ទៅលេងនៅ World Cup 2026 ជាផ្លូវការ ដែលនេះនឹងក្លាយជាការបង្ហាញខ្លួនលើកទី ៦ នៅក្នុងអាជីពរបស់គាត់។

ទោះបីជា Ronaldo មានវ័យរៀងជ្រែហើយក៏ពិតមែន ក៏លោក Martinez នៅតែជឿជាក់លើសមត្ថភាពរបស់ប្រធានក្រុមរូបនេះ នឹងមិនទាន់បញ្ចប់ត្រឹម World Cup 2026 នោះទេ។ អតីតខ្សែប្រយុទ្ធក្រុម Real Madrid អាចនឹងលេងដល់ World Cup 2030 ដែល ព័រទុយហ្គាល់ ធ្វើជាសហម្ចាស់ផ្ទះថែមទៀត ប្រសិនបើកីឡាករនៅបន្តលេងបាល់ទាត់។

ជុំវិញរឿងរ៉ាវខាងលើ អតីតគ្រូបង្វឹកក្រុមជម្រើសជាតិ ប៊ែលហ្ស៊ិក ត្រូវបានអ្នកសារព័ត៌មានសួរ ថា តើ Ronaldo អាចជាប់ឈ្មោះទៅលេង World Cup 2030 ទេ? ភ្លាមនោះគ្រូបង្វឹកវ័យ ៥២ ឆ្នាំបានមានប្រសាសន៍ ថា៖ «គាត់នឹងប្រយុទ្ធដើម្បីវា។ ខ្ញុំគិតថា គ្មាននរណាម្នាក់គួរសង្ស័យអំពីរឿងនោះទេ ព្រោះយ៉ាងហោចណាស់ គាត់ទទួលបានសិទ្ធិនៅទីនោះរួចហើយ។ សូមកុំគិត ថា នេះមិនមែនជាប្រធានបទ ដែលត្រូវពិភាក្សាគ្នាជាមួយក្រុមការងារគ្រូបង្វឹក ព្រោះពួកយើងពេញចិត្ត ដើម្បីបញ្ជូន Ronaldo ធ្វើជាគម្រូដល់កីឡាករវ័យក្មេង»។

លោក Martinez បានលើកឡើងពីសមត្ថភាពរបស់ Ronaldo ថា៖ «ខ្ញុំជឿថា Cristiano Ronaldo មិនលេងបាល់ទាត់ដើម្បីឈ្នះពានរង្វាន់ជាក់លាក់ណាមួយទេ មិនថាជាពានរួមក្រុម ឬពានផ្ទាល់ខ្លួនឡើយ។ អាថ៌កំបាំងរបស់គាត់មិនមែនស្ថិតនៅលើអ្វីដែលគាត់ញ៉ាំនោះទេ ប៉ុន្តែស្ថិតនៅលើភាពស្រេកឃ្លានក្នុងការសម្រេចជោគជ័យ»។

គ្រូ ព័រទុយហ្គាល់ បានបន្ថែមទៀត ថា៖ «មិនថាគាត់ឈ្នះអ្វីក៏ដោយ នៅថ្ងៃបន្ទាប់គាត់នៅតែមានការប្តេជ្ញាចិត្ត និងភាពស្រេកឃ្លានដូចគ្នាក្នុងការកែលម្អខ្លួនឯង។ ខ្ញុំគិតថា ការមានគោលដៅបែបនេះហើយ ដែលអាចធ្វើឱ្យអាជីពរបស់គាត់មានភាពយូរអង្វែង។ ខ្ញុំបានធ្វើការជាមួយកីឡាករជាច្រើន។ បន្ទាប់ពីពួកគេបានឈ្នះ Champions League ឬ Ballon d’Or រួចហើយ ពួកគេមិនមានភាពស្រេកឃ្លាន និងការប្តេជ្ញាចិត្តចង់ប្រកួតប្រជែងទៀតទេ»។

ប្រែសម្រួល៖ សេម កុសល
ប្រភព៖ GOAL

The post គ្រូ ព័រទុយហ្គាល់ ថា Ronaldo មាន​ចំណុច​ពិសេស ២ យ៉ាង អាចលេងដល់ World Cup 2030 appeared first on Kampuchea Thmey Daily.

ចាប់តាំងពី Ronaldo ផ្លាស់មកកាន់ក្លិប Al-Nassr កាលពីឆ្នាំ ២០២៣ គឺគ្មានកីឡាករណាម្នាក់អាចរកប្រាក់ចំណូលបានលើសខ្សែប្រយុទ្ធសញ្ជាតិ ព័រទុយហ្គាល់ វ័យ ៤១ ឆ្នាំរូបនេះឡើយ។

កាលពីរដូវកាលក្តៅឆ្នាំ ២០២៥ កន្លងទៅ Ronaldo ទើបតែបន្តកិច្ចសន្យាថ្មីជាមួយក្លិបជើងឯកលីគកំពូល អារ៉ាប៉ីសាអ៊ូឌីត ២ ឆ្នាំបន្ថែមទៀត ដែលធ្វើឱ្យគាត់រកបានថ្លៃនឿយហត់ច្រើនជាង ២០០ លានដុល្លារអាមេរិកក្នុង ១ ឆ្នាំ។

យោងតាមទស្សនាវដ្តី Forbes បានបង្ហាញ ថា នៅឆ្នាំ ២០២៦ Ronaldo គឺជាអត្តពលិក ដែលមានប្រាក់ពលកម្មច្រើនជាងគេកីឡាករណាទាំងអស់ ពោលគឺរកបាន ៣០០ លានដុល្លារអាមេរិក។

ចំនួននេះ បានលើសអ្នកឈរលំដាប់លេខ ២ គឺកីឡាករប្រដាល់សកលសញ្ជាតិ ម៉ិកស៉ិក Canelo Alvarez ដោយរកបាន ១៧០ លានដុល្លារអាមេរិក និង Messi ឈរលេខ ៣ រកបាន ១៤០ លានដុល្លារអាមេរិក។

គួរបញ្ជាក់ជាថ្មី ថា នេះជាលើកដំបូងហើយ ដែល Ronaldo កាន់កំណត់ត្រាឈរជាអត្តពលិករកបានប្រាក់ចំណូលច្រើនជាងគេ ៤ ឆ្នាំជាប់គ្នាបែបនេះ។ ក្រឡេកទៅកាន់ ៣ ឆ្នាំមុន គឺឆ្នាំ ២០២៣ រកបាន ១៣៦ លានដុល្លារអាមេរិក, ឆ្នាំ ២០២៤ រកបាន ២៦០ លានដុល្លារអាមេរិក និង ២០២៥ រកបាន ២៧៥ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ Forbes

The post សេដ្ឋីកីឡា Ronaldo ឈរជាអត្តពលិករកបានប្រាក់ចំណូលច្រើនជាងគេបំផុត ៤ ឆ្នាំជាប់គ្នា appeared first on Kampuchea Thmey Daily.

The Bloomberg Billionaires Index ដែលជាក្រុមហ៊ុនតាមដានអ្នកមានកំពូលៗក្នុងពិភពលោក ដោយផ្អែកលើទ្រព្យសម្បត្តិជាក់ស្តែង បានធ្វើការវាយតម្លៃអំពីទ្រព្យសម្បត្តិរបស់ Lionel Messi។ តាមរយៈការវាយតម្លៃ ដោយផ្អែកលើចំណូលក្នុងអាជីពជាកីឡាករបាល់ទាត់ បូកជាមួយការវិនិយោគផ្សេងៗ គឺ ខ្សែប្រយុទ្ធសញ្ជាតិ អាហ្សង់ទីន រូបនេះត្រូវបានគេអះអាង ថា បច្ចុប្បន្នមានទ្រព្យសម្បត្តិសរុបច្រើនជាង ១ ពាន់លានដុល្លារអាមេរិក។

Messi ត្រូវបានគេនិយាយ ថា រកបានតម្លៃពលកម្មសរុបបានលើស ៧០០ លានដុល្លារអាមេរិក រាប់ចាប់ពីការចាប់អាជីពជាកីឡាករ​ដំបូងពីឆ្នាំ ២០០៧ មក។ ជាមួយគ្នានេះ កីឡាករវ័យ ៣៨ ឆ្នាំ នៅរកបានប្រាក់ចំណូលជាច្រើនទៀតតាមរយៈការផ្សព្វផ្សាយឱ្យក្រុមហ៊ុន Adidas និងក្រុមហ៊ុនធំៗជាច្រើនទៀត។

ប្រភពចំណូលផ្សេងទៀតរបស់ Messi ត្រូវបានគេដឹង ថា ទទួលបានពីជំនួញរបស់ខ្លួន ដូចជាការវិនិយោគអចលនទ្រព្យ វិស័យសណ្ឋាគារ ហើយជាពិសេស គឺកីឡាកររកបានភាគលាភយ៉ាងច្រើនពីសិទ្ធផ្សាយរបស់ Apple TV ចាប់តាំងពីចូលរួមជាមួយ Inter Miami កាលពីឆ្នាំ ២០២៣។

តាមការវាយតម្លៃរបស់ Bloomberg បានបញ្ជាក់យ៉ាងច្បាស់ ថា Messi ពេលនេះ គឺជាមហាសេដ្ឋីម្នាក់ក្នុងពិភពលោក។ យ៉ាងណា នេះពិតជារឿងភ្ញាក់ផ្អើលមែនទែន ដែល​រូប​គេ​ជាកីឡាករបាល់ទាត់ម្នាក់ មិនត្រឹមតែមានសមត្ថភាពកំពូលនោះទេ ប៉ុន្តែថែមទាំងបានប្រើសមត្ថភាព និងភាពល្បីល្បាញរបស់ខ្លួន រហូតរកចំណូលបានខ្ទង់ពាន់លានដុល្លារអាមេរិក និងបានក្លាយជាមហាសេដ្ឋីបាល់ទាត់ម្នាក់ទៀត បន្ទាប់ពី Ronaldo ដែលត្រូវបានគេទទួលស្គាល់កាលពីឆ្នាំ ២០២៥៕

ប្រែសម្រួល៖ សេម កុសល
ប្រភព៖ GOAL

The post Messi ត្រូវបានទទួលស្គាល់ជាមហាសេដ្ឋីបាល់ទាត់ទី ២ បន្ទាប់ពី Ronaldo appeared first on Kampuchea Thmey Daily.

Ronaldo បានសម្រេចគោលដៅជួយក្រុម Al-Nassr ឈ្នះជើងឯកលីគ SPL រដូវកាលនេះ ដែលជាពានផ្លូវការលើកដំបូងរបស់គាត់ជាមួយក្រុមអ្នកមាន អារ៉ាប៉ីសាអ៊ូឌីត បន្ទាប់ពីចូលរួមតាំងពីឆ្នាំ ២០២៣។

នៅក្នុងការប្រកួតសប្តាហ៍ទី ៣៤ ទល់នឹងក្រុម Damac ដែលជាការប្រកួតចុងក្រោយរដូវកាលនេះ Ronaldo បានរួមចំណែកស៊ុត ២ គ្រាប់ ជួយឱ្យ Al-Nassr យកឈ្នះក្នុងលទ្ធផល ៤-១។

ជ័យជម្នះដ៏ធំធេងនេះ បានធ្វើឱ្យក្រុម Al-Nassr កក់ក្តៅ ដើម្បីគ្រងជើងលីគកំពូល អារ៉ាប៉ីសាអ៊ូឌីត រដូវកាលនេះ បន្ទាប់ពីរកបានពិន្ទុសរុប ៨៦ ពិន្ទុ ដោយបានវ៉ាពិន្ទុក្រុមលេខ ២ Al-Hilal ២ ពិន្ទុ ដែលមាន ៨៤ ពិន្ទុនៅក្នុងដៃ។

ក្រឡេកមកមើល Ronaldo វិញ បន្ទាប់ពីជួយឱ្យ Al-Nassr ឈ្នះពានលីគ SPL រដូវកាលនេះ កីឡាករទទួលបានអត្ថប្រយោជន៍ តាមរយៈប្រាក់លើកទឹកចិត្តបន្ថែមយ៉ាងច្រើនរហូតដល់ទៅ ៨ លានដុល្លារអាមេរិក។ ប្រាក់ឧបត្ថម្ភ ៨ លានដុល្លារនេះ ក្រោយជួយឱ្យ Al-Nassr លើកពានលីគនេះ គឺត្រូវបានចងនៅក្នុងកិច្ចសន្យា ពេលដែលកីឡាករបន្តកុងត្រាថ្មីជាមួយ Al-Nassr កាលពីរដូវក្តៅឆ្នាំ ២០២៥ កន្លងទៅ។

គួរបញ្ជាក់ផងដែរ ថា ទឹកប្រាក់ចំនួន ៨ លានដុល្លារនេះ គ្រាន់តែជាប្រាក់លើកទឹកចិត្តប៉ុណ្ណោះ។ ចំណែកប្រាក់ឈ្នួលគោលរបស់ខ្សែប្រយុទ្ធសញ្ជាតិ ព័រទុយហ្គាល់ វ័យ ៤១ ឆ្នាំវិញ គឺទទួលបានលើស ២០០ លានដុល្លារអាមេរិកក្នុងមួយឆ្នាំ៕

ប្រែសម្រួល៖ សេម កុសល
ប្រភព៖ Bolavip

The post Ronaldo ទទួលបានប្រាក់លើកទឹកចិត្តបន្ថែមរាប់​លានដុល្លារ ក្រោយជួយ Al-Nassr ឈ្នះជើងឯក​លីគ SPL appeared first on Kampuchea Thmey Daily.

នៅក្នុងការប្រកួតសប្តាហ៍ទី ៣២ នៃលីគកំពូល អារ៉ាប៉ីសាអ៊ូឌីត (SPL) កីឡាករ Ronaldo បានស៊ុតបញ្ចូលទីមួយគ្រាប់ ជួយឱ្យ Al-Nassr យកឈ្នះក្រុម Al-Shabab ក្នុងលទ្ធផល ៤-២។ ជ័យជម្នះនេះ បានធ្វើឱ្យ Al-Nassr កំពុងមានភាគរយខ្ពស់ ក្នុងឈ្នះពានលីគ SPL នៅរដូវកាលនេះ បន្ទាប់ពីនាំមុខពិន្ទុក្រុមលេខ ២ Al-Hilal ៥ ពិន្ទុ។

ជុំវិញគ្រាប់បាល់ ១ គ្រាប់នេះផងដែរ បានធ្វើឱ្យ Ronaldo រកបានគ្រាប់បាល់ទី ១០០ គ្រាប់ឱ្យ Al-Nassr សម្រាប់ការប្រកួតក្នុងលីគ SPL បន្ទាប់ពីលេងបាន ១០៥ ប្រកួតក្នុងរយៈពេល ៤ រដូវកាល។ ស្ថិតិនេះ បានធ្វើឱ្យ Ronaldo ក្លាយជាកីឡាករតែម្នាក់គត់នៅក្នុងប្រវត្តិសាស្ត្របាល់ទាត់ ដែលអាចរកបានច្រើនជាង ១០០ គ្រាប់ក្នុងលីគចំនួន ៣ ផ្សេងគ្នា។

អំឡុងពេលលេងនៅ Real Madrid ៩ រដូវកាល ខ្សែប្រយុទ្ធសញ្ជាតិ ព័រទុយហ្គាល់ វ័យ ៤១ ឆ្នាំរកបាន ៣១១ គ្រាប់នៅលីគកំពូល អេស្ប៉ាញ La Liga ពីការលេង ២៩២ ប្រកួត។ ចំណែកពេលលេងនៅ Man United ២ លើក ដោយលើកទី ១ ពីឆ្នាំ ២០០៣ ដល់ ២០០៩ និងលើកទី ២ ពី ២០២១ ដល់ ២០២២ កីឡាកររកបាន ១០១ គ្រាប់នៅលីគកំពូល អង់គ្លេស Premier League បន្ទាប់ពីលេងបាន ២៣៦ គ្រាប់។

នៅក្នុងអាជីពរបស់ Ronaldo គឺធ្លាប់លេងនៅក្លិបក្នុងលីគចំនួន ៥ ផ្សេងគ្នា ប៉ុន្តែក្លិបក្នុងលីគ ២ ទៀត គឺ Ronaldo មិនអាចរកបានដល់ ១០០ គ្រាប់បានទេ ដោយអំឡុងពេលលេង Sporting ក្នុងលីគកំពូល ព័រទុយហ្គាល់ គាត់រកបាន ៣ គ្រាប់ពីការលេង ២៥ ប្រកួត និងនៅ Juventus ក្នុងលីគ Serie A រកបាន ៨១ គ្រាប់ ពីការលេង ៩៨ ប្រកួត។

គួរបញ្ជាក់ ថា Ronaldo បច្ចុប្បន្នកំពុងឈរជាកីឡាករស៊ុតបញ្ចូលទីច្រើនជាងគេបំផុតនៅក្នុងប្រវត្តិសាស្ត្របាល់ទាត់ ដោយបូកបញ្ចូលគ្រាប់បាល់សរុបគ្រប់កម្មវិធីចំនួន ៩៧១ គ្រាប់៕

ប្រែសម្រួល៖ សេម កុសល
ប្រភព៖ BOLA VIP

The post Ronaldo បំបែកកំណត់ត្រាធំ ១ គ្មាននរណាធ្វើបានដូច ក្រោយស៊ុតមួយគ្រាប់យប់​មិញ appeared first on Kampuchea Thmey Daily.

នៅក្នុងពាណិជ្ជកម្មនោះមានការចូលរួមថតដោយកីឡាករបាល់ទាត់ល្បីៗ ២ នាក់ទៀត ក្រៅពី Messi និង Ronaldo រួមមានខ្សែប្រយុទ្ធជម្រើសជាតិ ប្រេស៊ីល កីឡាករ Vinicius Jr. និងកីឡាករជម្រើសជាតិ បារាំង Kylian Mbappe។

រាល់ពាណិជ្ជកម្មណា ដែលមាន Messi និង Ronaldo ថតជាមួយគ្នាបែបនេះ គឺធ្វើឱ្យមានការផ្ទុះការចាប់អារម្មណ៍ជាខ្លាំង ដោយសារអ្នកទាំងពីរជាគូប្រជែងនឹងគ្នា ហើយក៏ជាកំពូលកីឡាករបាល់ទាត់ដូចគ្នាថែមទៀត។ ជាមួយគ្នានេះ អ្នកគាំទ្របាល់ទាត់ជាច្រើន ក៏ចង់ដឹងផងដែរ ថា តើក្រុមហ៊ុននីមួយៗត្រូវចាយថ្លៃឈ្នួលអស់ប៉ុន្មាន ដើម្បីជួលឱ្យ Messi និង Ronaldo ថតផ្សព្វផ្សាយពីផលិតផលរបស់ពួកគេម្តងៗ?

យោងតាម ONE Football បានបង្ហាញ ថា Messi ស៊ីថ្លៃឈ្នួលចំនួន ២.៦ លានដុល្លារអាមេរិក ដើម្បីថតផ្សព្វផ្សាយពីផលិតផលមួយ ដោយបង្ហោះនៅលើគណនី Instagram របស់គាត់។ ចំណែក Ronaldo វិញ ស៊ីថ្លៃឈ្នួលខ្ពស់ជាង Messi ដោយការថតផ្សព្វផ្សាយពីផលិតផលមួយ និងបង្ហោះនៅលើគណនី Instagram គឺចំនួន ៣.២ លានដុល្លារអាមេរិក។

គួរឱ្យដឹងថា នេះជាលើកទី ២ ហើយ ដែល Messi និង Ronaldo មានវត្តមានក្នុងការថតផ្សព្វផ្សាយពាណិជ្ជកម្មជាមួយគ្នា។ លើកទី ១ គឺ ពួកគេបានថតជាមួយគ្នាកាលពីឆ្នាំ ២០២២ ឱ្យក្រុមហ៊ុន Louis Vuitton៕

ប្រែសម្រួល៖ សេម កុសល
ប្រភព៖ ONE Football

The post ថតផ្សាយ​ពាណិជ្ជកម្ម​ជា​មួយ​គ្នា Ronaldo ទទួល​បាន​ថ្លៃ​ឈ្នួល​ខ្ពស់​ជាង​ Messi appeared first on Kampuchea Thmey Daily.