សេដ្ឋីកីឡា Ronaldo ឈរជាអត្តពលិករកបានប្រាក់ចំណូលច្រើនជាងគេបំផុត ៤ ឆ្នាំជាប់គ្នា

ខ្សែប្រយុទ្ធរបស់ក្រុម Al-Nassr កីឡាករ Cristiano Ronaldo បានជាប់ជាអត្តពលិករកបានប្រាក់ចំណូលច្រើនជាងគេបំផុតនៅឆ្នាំ ២០២៦ នេះ ដែលជាកំណត់ត្រា ៤ ឆ្នាំជាប់គ្នា។

ចាប់តាំងពី Ronaldo ផ្លាស់មកកាន់ក្លិប Al-Nassr កាលពីឆ្នាំ ២០២៣ គឺគ្មានកីឡាករណាម្នាក់អាចរកប្រាក់ចំណូលបានលើសខ្សែប្រយុទ្ធសញ្ជាតិ ព័រទុយហ្គាល់ វ័យ ៤១ ឆ្នាំរូបនេះឡើយ។

កាលពីរដូវកាលក្តៅឆ្នាំ ២០២៥ កន្លងទៅ Ronaldo ទើបតែបន្តកិច្ចសន្យាថ្មីជាមួយក្លិបជើងឯកលីគកំពូល អារ៉ាប៉ីសាអ៊ូឌីត ២ ឆ្នាំបន្ថែមទៀត ដែលធ្វើឱ្យគាត់រកបានថ្លៃនឿយហត់ច្រើនជាង ២០០ លានដុល្លារអាមេរិកក្នុង ១ ឆ្នាំ។

យោងតាមទស្សនាវដ្តី Forbes បានបង្ហាញ ថា នៅឆ្នាំ ២០២៦ Ronaldo គឺជាអត្តពលិក ដែលមានប្រាក់ពលកម្មច្រើនជាងគេកីឡាករណាទាំងអស់ ពោលគឺរកបាន ៣០០ លានដុល្លារអាមេរិក។

ចំនួននេះ បានលើសអ្នកឈរលំដាប់លេខ ២ គឺកីឡាករប្រដាល់សកលសញ្ជាតិ ម៉ិកស៉ិក Canelo Alvarez ដោយរកបាន ១៧០ លានដុល្លារអាមេរិក និង Messi ឈរលេខ ៣ រកបាន ១៤០ លានដុល្លារអាមេរិក។

គួរបញ្ជាក់ជាថ្មី ថា នេះជាលើកដំបូងហើយ ដែល Ronaldo កាន់កំណត់ត្រាឈរជាអត្តពលិករកបានប្រាក់ចំណូលច្រើនជាងគេ ៤ ឆ្នាំជាប់គ្នាបែបនេះ។ ក្រឡេកទៅកាន់ ៣ ឆ្នាំមុន គឺឆ្នាំ ២០២៣ រកបាន ១៣៦ លានដុល្លារអាមេរិក, ឆ្នាំ ២០២៤ រកបាន ២៦០ លានដុល្លារអាមេរិក និង ២០២៥ រកបាន ២៧៥ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ Forbes