Dave Leduc Archives - Kampuchea Thmey Daily

កីឡាករ Dave Leduc ទាមទារឲ្យ The Wall Street Journal សុំទោសកម្ពុជា

chean virakbot — Wed, 22 Apr 2026 03:12:44 +0000

កីឡាករប្រដាល់កាណាដា-មីយ៉ាន់ម៉ា Dave Leduc បានចេញវីដេអូទាមទារឲ្យស្ថាប័នព័ត៌មានលំដាប់ពិភពលោក The Wall Street Journal ធ្វើការសុំទោសប្រទេសកម្ពុជា ចំពោះការប្រើពាក្យខ្វះការគោរពគឺ «Scambodia» នៅលើចំណងជើងនៃអត្ថបទអំពីការឆបោកតាមអនឡាញនៅកម្ពុជា។

កីឡាករដែលមានដើមកំណើតនៅប្រទេសកាណាដា បានសរសេរថា ៖«The Wall Street Journal ត្រូវតែធ្វើការសុំទោស ព្រះរាជាណាចក្រកម្ពុជាចំពោះការដាក់ចំណងជើងអត្ថបទខ្វះការគោរព។ អ្នកឯងពិតជាគួរឲ្យខ្មាសអៀនណាស់ Wall Street Journal»។

កីឡាករប្រដាល់ Dave Leduc បានប្រកួតជាមួយកីឡាករ ព្រំ សំណាង កាលពីខែវិច្ឆិកា ឆ្នាំ ២០២៣ ហើយបន្ទាប់មក រូបគេក៏បាននាំប្រពន្ធកូនមកបានមកស្នាក់នៅ និងធ្វើអាជីវកម្មនៅប្រទេសកម្ពុជា។

សម្រាប់ការស្នាក់ និងធ្វើអាជីវកម្មនៅកម្ពុជារយៈពេលប្រមាណ ២ ឆ្នាំកន្លងទៅនេះ Dave Leduc មានទំនាក់ទំនងល្អជាមួយអាជ្ញាធរ ហើយតែងតែកោតសរសើរប្រទេសកម្ពុជាជាកន្លែងមានសុវត្ថិភាពទាំងការរស់នៅ និងដំណើរការអាជីវកម្ម។

ជាក់ស្តែង កាលពីថ្ងៃទី១៨ ខែមេសា កីឡាករបានរៀបរាប់ថា ៖«ហេតុអ្វីបានជាខ្ញុំនាំគ្រួសារមករស់នៅកម្ពុជា? ពីព្រោះនិយាយដោយស្មោះទៅគឺជាកន្លែងដ៏ល្អបំផុតក្នុងពិភពលោកសម្រាប់ការរស់នៅ មានសុវត្ថិភាព ពន្ធទាប មនុស្សល្អ អាកាសធាតុល្អ ឆ្នេរខ្សាច់ល្អ រដ្ឋាភិបាលស្ថិរភាព សេរីភាព ទិដ្ឋាការស្រួលបានយូរ និងជាកន្លែងក្បាច់គុន»។

លោកបានបញ្ជាក់ថា មនុស្សជាច្រើនពីកោះបាលី និងឌូបៃ កំពុងផ្លាស់មកទីនេះ ដោយសារភាពងាយស្រួល។ លោកបានរស់នៅកម្ពុជាជិត ៣ ឆ្នាំហើយ។ កូនតូចរបស់លោកមានកំណើតនៅទីនេះ។ លោកបានដើរជាង ៣០ ប្រទេសទូទាំងពិភពលោក ប៉ុន្តែមានតែកម្ពុជាដែលលោកមានអារម្មណ៍ជាកន្លែងមានសុវត្ថិភាពបំផុត៕

អត្ថបទ៖ វិរបុត្រ

The post កីឡាករ Dave Leduc ទាមទារឲ្យ The Wall Street Journal សុំទោសកម្ពុជា appeared first on Kampuchea Thmey Daily.

ដាវ លីឌុច សម្រេចឡើងសង្វៀនវិញ ព្រោះចង់បំបាក់អំនួត ម៉ូតាសា

chean virakbot — Tue, 25 Feb 2025 06:20:30 +0000

កីឡាករប្រដាល់មីយ៉ាន់ម៉ា ដាវ លីឌុច បានសម្រេចវិលត្រឡប់មកកាន់សង្វៀនវិញ បន្ទាប់ពីចូលនិវត្តន៍រយៈពេលជាងមួយឆ្នាំ ក្រោយពេលប្រកួតជាមួយកីឡាករកម្ពុជា ព្រុំ សំណាង កាលពីខែវិច្ឆិកា ឆ្នាំ២០២៣។

ការវិលមកកាន់សង្វៀនជាថ្មីនេះ ដាវ លីឌុច អាចនឹងជួបកីឡាករអ៉ីរ៉ង់ ម៉ូតាសា ស៊ីហ្វីហ្វាដ ដែលបានច្របាច់កកីឡាករ ធន់ រិទ្ធី ក្នុងពិធីថ្លឹងទម្ងន់កាលពីពីរប៉ុន្មានខែមុន។ រូបគេពិតជាមិនចង់ឃើញកីឡាករមានអំនួតនៅក្រៅសង្វៀនបែបនេះទេ។

ក្នុងបទសម្ភាសជាមួយសារព័ត៌មាន«កម្ពុជាថ្មី»កាលពីថ្ងៃអាទិត្យ ទី២៣ ខែកុម្ភៈ ឆ្នាំ២០២៥ ក្នុងពិធីបិទការប្រកួតកីឡាជឺជីតស៊ូជ្រើសរើសជើងឯកថ្នាក់ជាតិ នៅសាកលវិទ្យាល័យភូមិន្ទភ្នំពេញ កីឡាករមីយ៉ាន់ម៉ា ដាវ លីឌុច បាននិយាយថា ៖«ការប្រកួតចុងក្រោយរបស់ខ្ញុំជាមួយ ព្រុំ សំណាង កាលពីខែវិច្ឆិកា ឆ្នាំ២០២៣។ នោះជាការប្រកួតដ៏អស្ចារ្យ។ ក្រោយមក ខ្ញុំបានចូលនិវត្តន៍។ ខ្ញុំមានកូននៅកម្ពុជា ឥឡូវអាយុជិតមួយឆ្នាំហើយ»។

កីឡាករបានបន្តថា ៖«ឥឡូវខ្ញុំបានឃើញកីឡាករ ម៉ូតាសា បង្ហាញភាពក្អេងក្អាង ខ្វះការគោរព បានច្របាច់ក ធន់ រិទ្ធី។ យើងដឹងទេ កីឡាគឺជាការប្រកួតនៅលើសង្វៀន មិនមែនធ្វើបែបនេះទេ។ ខ្ញុំមិនចូលចិត្ត ហើយមានអ្នកគាំទ្រច្រើនក៏មិនចូលចិត្តដែរ។ នេះជាការមើលងាយ ហើយខ្ញុំមិនចូលចិត្តសោះឡើយ។ គេនិយាយថា ខ្ញុំមិនល្អ។ ខ្ញុំចង់បង្ហាញចំពោះអ្នកប្រមាថមើលងាយ។ ខ្ញុំត្រូវតែត្រឡប់មកកាន់សង្វៀន វិលត្រឡប់ពីចូលនិវត្តន៍វិញ។ ខ្ញុំចង់វ៉ៃជាមួយកីឡាករនេះ សម្រាប់ចុងក្រោយនៃអាជីព»។

ដាវ លីឌុច មើលមិនឃើញពីភាពខ្លាំងណាមួយរបស់កីឡាករ ម៉ូតាសា ទេ។ លទ្ធផលដែលកីឡាករអ៉ីរ៉ង់ទទួលបានជ័យជម្នះលើកីឡាករកម្ពុជាកន្លងមកគ្រាន់តែសំណាងប៉ុណ្ណោះ។ «ខ្ញុំមើលមិនឃើញពីចំណុចខ្លាំងណាមួយអំពី ម៉ូតាសា ទេ។ ឈ្នះ ធន់ រិទ្ធី និងកីឡាករកម្ពុជាផ្សេងៗទៀតគ្រាន់តែសំណាងប៉ុណ្ណោះ។ ខ្ញុំគិតថា គាត់សំណាងហើយ គាត់គ្មានជំនាញ ហើយខ្ញុំចង់កម្ចេចម្នាក់នេះ»។

នៅពេលសួរថា តើ លីឌុច សង្ឃឹមទទួលបានជ័យជម្នះទេ? កីឡាករបានឆ្លើយថា ៖«ខ្ញុំសង្ឃឹម១០០% នឹងផ្តួលគាត់ឲ្យសន្លប់។ នេះជាការប្រកួតងាយស្រួលសម្រាប់ខ្ញុំ បានលុយស្រួល។ ខ្ញុំចង់ឲ្យគាត់ស្គាល់មេរៀន។ ខ្ញុំគិតថា ប្រហែលជាចុងឆ្នាំនេះ មនុស្សប្រហែល៤០០០នាក់ នឹងបានឃើញពីការប្រកួតរបស់ខ្ញុំដើម្បីប្រជាជនកម្ពុជា។ ខ្ញុំមកពីប្រទេសមីយ៉ាន់ម៉ា ខ្ញុំកំពុងរស់នៅប្រទេសកម្ពុជា ខ្ញុំត្រូវតែជួយ និងការពារបងប្អូនកម្ពុជា។ នេះជាកម្ពុជា-មីយ៉ាន់ម៉ាប្រឆាំងនឹងកីឡាករម្នាក់នេះ»។

ដាវ លីឌុច បានបញ្ជាក់ថា នៅពេលខ្លួនប្រកួតជាមួយ ព្រុំ សំណាង គឺ បន្ទាប់ពីខកខានប្រកួតរយៈពេល៣ឆ្នាំ ប៉ុន្តែនៅតែធ្វើបានល្អ។ «សម្រាប់ខានប្រកួតទើបតែមួយឆ្នាំគឺមិនបាកសម្រាប់ខ្ញុំ។ វាប្រៀបដូចជាយើងជិះកង់អីចឹង យើងចេះជិះកង់ តែយើងមិនភ្លេចទេ បើទោះជាយើងខានជិះយូរ។ ខ្ញុំជឿជាក់ថា ខ្ញុំនឹងធ្វើបានល្អ ហើយសូមអរគុណដល់ប្រជាជនកម្ពុជាសម្រាប់ការគាំទ្រ និងផ្ញើសារគាំទ្រ។ វានឹងក្លាយជាថ្ងៃដ៏ល្អ»។

ទោះបីជាយ៉ាងណា នៅមិនទាន់កំណត់ពេលវេលាជាក់លាស់ណាមួយដែលកីឡាករទាំងពីរជួបគ្នាទេ ប៉ុន្តែកីឡាករទាំងពីរសុទ្ធតែបង្ហាញឆន្ទៈក្នុងការជួបគ្នានាពេលខាងមុខ៕

អត្ថបទ៖ វីរបុត្រ

The post ដាវ លីឌុច សម្រេចឡើងសង្វៀនវិញ ព្រោះចង់បំបាក់អំនួត ម៉ូតាសា appeared first on Kampuchea Thmey Daily.

ឧកញ៉ា ស្រី ចាន់ថន ថា សហព័ន្ធគុនខ្មែរគួរជួប Leduc ជជែកគ្នាទល់មុខ

chean virakbot — Tue, 11 Jun 2024 07:45:58 +0000

ឧកញ៉ា ស្រី ចាន់ថន ដែលជាស្ថាបនិកក្លិបប្រដាល់គុនខ្មែរអន្តរជាតិ (KKIF) ចង់ឃើញមានការជួបគ្នារវាងថ្នាក់ដឹកនាំសហព័ន្ធគុនខ្មែរជាមួយកីឡាករកាណាដា-មីយ៉ាន់ម៉ា Dave Leduc បន្ទាប់ពីប៉ុន្មានថ្ងៃចុងក្រោយនេះមានសារឆ្លើយឆ្លងគ្នាច្រើននៅលើបណ្តាញទំនាក់ទំនងសង្គម។

កាលពីថ្ងៃអាទិត្យ ទី៩ ខែមិថុនា ឆ្នាំ២០២៤ លោក ខូវ ឆាយ បានប្រកាសនៅលើគណនី Facebook ផ្ទាល់ខ្លួនអំពីការបិទកីឡាករ Dave Leduc ក្នុងអាណត្តិរបស់លោក ដោយសារតែមិនអាចជឿទុកចិត្តបានលើជនបរទេសម្នាក់នេះ។

ភ្លាមៗនោះ កីឡាករ Dave Leduc បានចេញវីដេអូមួយដោយលើកឡើងថា ការប្រកាសបិទផ្លូវរបស់លោក ខូវ ឆាយ គឺជាវាយប្រហារដ៏ធ្ងន់ធ្ងរលើលោក ហើយសហព័ន្ធគួរតែហៅលោកជជែកគ្នាផ្ទាល់ ប្រសើរជាង។ បន្ទាប់មកលោកបានលុបវីដេអូនោះចោល ដោយបានសរសេរសារថា លោកមានលុយ និងមានម្ចាស់ឧបត្ថម្ភរួចហើយ ដូច្នេះលោកមិនត្រូវការឲ្យអ្នករៀបចំកម្មវិធីចំណាយប្រាក់ឲ្យលោកទេ។ មួយថ្ងៃបន្ទាប់ពោលគឺនៅថ្ងៃចន្ទ ទី១០ ខែមិថុនា ឆ្នាំ២០២៤ លោកបានធ្វើសន្និសីទសារព័ត៌មានថែមទៀតដើម្បីបកស្រាយជុំវិញការលើកឡើងរបស់លោក ខូវ ឆាយ ដែលធ្វើឲ្យរឿងរ៉ាវកាន់តែធំ។

នៅព្រឹកថ្ងៃអង្គារ៍ ទី១១ ខែមិថុនា ឆ្នាំ២០២៤ ឧកញ៉ា ស្រី ចាន់ថន បានបញ្ចេញមតិយោបលើគណនី Facebook ថា ៖«មតិរបស់បងប្អូនទាំងអស់គ្នា៨០% មិនគាំទ្រ ដាវ លីឌុច តែបើតាមគំនិតខ្ញុំក៏មិនខុសពីបងប្អូនដែរ ប៉ុន្ដែខ្ញុំគិតថា រឿងទាំងអស់ គួរនិយាយគ្នាដាក់លើតុសិន ហើយត្រូវមានលក្ខខណ្ឌកិច្ចសន្យា សិទ្ធិក្នុងការរស់នៅ ច្បាប់ក្នុងប្រទេស»។

លោកបានបន្តថា ៖«បើតាមខ្ញុំគិត ដាវ លីឌុច ខុសតែម៉្យាងទេ គឺភាពអំនួតអួតអាងរបស់គាត់មិនឲ្យតម្លៃអ្នកដទៃ។ នេះជាចំណុចអវិជ្ជមានរបស់គាត់ តែបើយើងមើលទៅផ្លូវជីវិតរបស់គាត់ គាត់ដាក់ចិត្តមករស់នៅកម្ពុជាយើង ដោយយកប្រពន្ធ និងកូនមកនៅកម្ពុជា។ បើកអាជីវកម្មមុខរបរផ្ទាល់ខ្លួន ហើយគាត់ក៏មានផែនការផ្សែងៗទៀត ដោយមិនបានរៃអង្គាស់លុយពីបងប្អូនណាទេ។ ខ្ញុំបានដឹងរឿងទាំងអស់រាល់កីឡាកបរទេសមកជួបខ្ញុំ តែខ្ញុំមិនអាចនិយាយបានទាំងអស់នោះទេ។ ក្នុងនាមខ្ញុំបាទជាប្រជាពលរដ្ឋមួយរូបស្នើឲ្យមានកិច្ចប្រជុំមួយដើម្បីដោះស្រាយ និងសម្របសម្រួលរឿងនេះ»៕

អត្ថបទពាក់ព័ន្ធ

អត្ថបទ៖ វីរបុត្រ

The post ឧកញ៉ា ស្រី ចាន់ថន ថា សហព័ន្ធគុនខ្មែរគួរជួប Leduc ជជែកគ្នាទល់មុខ appeared first on Kampuchea Thmey Daily.

លោក ខូវ ឆាយ៖«បិទ Leduc តែឡើងសង្វៀន តែស្វាគមន៍ការរកស៊ីនៅកម្ពុជា»

chean virakbot — Tue, 11 Jun 2024 05:00:43 +0000

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរស្វាគមន៍ជានិច្ច និងអរគុណដែលកីឡាករកាណាដា-មីយ៉ាន់ម៉ា Dave Leduc មករស់នៅ ក៏ដូចជាបើកអាជីវកម្មនៅក្នុងប្រទេសកម្ពុជា ប៉ុន្តែលោកមិនអនុញ្ញាតឲ្យឡើងប្រកួតគុនខ្មែរនៅលើទឹកដីប្រទេសកម្ពុជាឡើយ។

លោកប្រធានសហព័ន្ធគុនខ្មែរបានប្រាប់សារព័ត៌មាន«កម្ពុជាថ្មី»ថា ៖«ខ្ញុំអត់មានអីត្រូវជួបជាមួយគាត់ទេ។ គាត់មានសិទ្ធិនិយាយអ្វីក៏និយាយទៅគឺជាសិទ្ធិរបស់គាត់។ ធម្មតាមនុស្សមិនដែលទទួលស្គាល់កំហុសខ្លួនទេ។ ក្នុងនាមខ្ញុំជាប្រធានសហព័ន្ធ និងជាពលរដ្ឋម្នាក់ ខ្ញុំស្វាគមន៍ដែលគាត់មករស់នៅកម្ពុជា។ ខ្ញុំស្វាគមន៍គាត់មករកស៊ីនៅកម្ពុជា។ គាត់មានសិទ្ធិសេរីភាពគ្រប់គ្រាន់ក្នុងនាមជាជនបរទេសដែលមកស្នាក់នៅកម្ពុជា គោរពតាមច្បាប់កម្ពុជា»។

«ប៉ុន្តែគ្រាន់តែមិនស្វាគមន៍គាត់ក្នុងការឡើងប្រកួត ពីព្រោះសហព័ន្ធនឹងមិនធ្វើការជាមួយគាត់ទេ ដោយសារតែយើងមិនមានការជឿជាក់លើគាត់។ យើងនឹងមិនប្រថុយក្នុងការធ្វើការជាមួយគាត់ទេ។ បើដៃគូណាដែលយើងមិនជឿជាក់ហើយ តើយើងត្រូវប្រថុយធ្វើការជាមួយមិចកើត ក្រែងមានហានិភ័យ»។ លោក ខូវ ឆាយ បានរៀបរាប់។

លោកបានសង្កត់ធ្ងន់ថា ៖«ក្នុងនាមខ្ញុំជាថ្នាក់ដឹកនាំសហព័ន្ធ យើងនឹងមិនអញ្ជើញគាត់ទៅចូលរួមប្រកួតទេ ព្រោះយើងមិនមានការជឿទុកចិត្តក្នុងការអនុវត្តការងាររបស់គាត់។ សម្រាប់ការងាររកស៊ីរបស់គាត់នៅកម្ពុជា យើងអត់មានសិទ្ធិអ្វីទៅប៉ះពាល់ជាមួយគាត់ទេ។ ក្នុងនាមយើងជាពលរដ្ឋខ្មែរមានតែរីករាយ ស្វាគមន៍ និងអរគុណដែលគាត់បានមករស់នៅធ្វើវីនិយោគនៅកម្ពុជា។ ប៉ុន្តែបើគាត់ចង់ឡើងសង្វៀនគឺអត់រៀបចំឲ្យគាត់ទេ»។

ការបិទកីឡាករកាណាដា-មីយ៉ាន់ម៉ា Dave Leduc ឡើងប្រកួតគុនខ្មែររបស់លោក ខូវ ឆាយ ក្នុងនាមជាប្រធានសហព័ន្ធកីឡាប្រដាល់គុនខ្មែរបានកើតឡើងកាលពីថ្ងៃទី៩ ខែមិថុនា ឆ្នាំ២០២៤ ដោយសារតែថ្នាក់ដឹកនាំសហព័ន្ធមិនជឿទុកចិត្តលើជនបរទេសម្នាក់នេះ។

នៅពេលប្រកួតជាមួយ ព្រុំ សំណាង កាលពីចុងឆ្នាំ២០២៣ Dave Leduc បានធ្វើឲ្យសហព័ន្ធមិនមានជំនឿចិត្តគឺការផ្លាស់ប្តូរគោលការណ៍ពីការប្រើហ្គង់ដៃទៅជារុំអំបោះឆៅវិញនៅពេលការប្រកួតចាប់ផ្តើម ខណៈពីដំបូងមកដាក់លក្ខខណ្ឌប្រើហ្គង់ដៃ។ បន្ទាប់មក រូបគេតែងតែចេញសារពីភាពខ្លាំងរបស់ខ្លួនថាជាស្តេចប្រដាល់ មើលស្រាលលើកីឡាករ ធឿន ធារ៉ា មិនសមនឹងប្រកួតជាមួយខ្លួន ពាក់អាវដែលមានសុទ្ធតែរូបរបស់ ព្រុំ សំណាង ដែលរូបគេចាត់ទុកជាជនរងគ្រោះរបស់ខ្លួនចុងក្រោយបំផុត ហើយកាលពីពេលថ្មីៗនេះ រូបគេបានទារតម្លៃខ្លួន១លានដុល្លារដើម្បីឡើងប្រកួតផ្តួលកីឡាករថៃជាដើម។

ទោះបីជាយ៉ាងណា Dave Leduc បានបដិសេធ និងបញ្ជាក់ថា ខ្លួនឡើងសង្វៀនប្រកួតគឺប្រើអំបោះឆៅតាំងពីដើមរហូតមក។ ការប្រកួតជាមួយ ព្រុំ សំណាង លោកមិនបានផ្លាស់ប្តូរគោលការណ៍ទេគឺគោលការណ៍ប្រើអំបោះឆៅនិយាយគ្នាតាំងពីដំបូង។ កាលពីម្សិលមិញគឺថ្ងៃទី១០ ខែមិថុនា ឆ្នាំ២០២៤ លោកបានធ្វើសន្និសីទសារព័ត៌មានដោយបញ្ជាក់ថា ការផ្សព្វផ្សាយខ្លួនឯង និងផ្សព្វផ្សាយគុនខ្មែរខុសដែរមែន៕

អត្ថបទ៖ វីរបុត្រ

The post លោក ខូវ ឆាយ៖«បិទ Leduc តែឡើងសង្វៀន តែស្វាគមន៍ការរកស៊ីនៅកម្ពុជា» appeared first on Kampuchea Thmey Daily.

Dave Leduc រង់ចាំម៉ោង២ថ្ងៃនេះដើម្បីឆ្លើយតបលោកប្រធានគុនខ្មែរ

chean virakbot — Mon, 10 Jun 2024 04:00:38 +0000

កាលពីរសៀលថ្ងៃអាទិត្យ ទី៩ ខែមិថុនា ឆ្នាំ២០២៤ កីឡាករ Dave Leduc បានចេញវីដេអូបកស្រាយទៅនឹងការលើកឡើងរបស់លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរជុំវិញការមិនអនុញ្ញាតឲ្យរូបគេឡើងប្រកួតគុនខ្មែរដាច់ខាតក្នុងអាណត្តិរបស់លោក។

នៅព្រឹកថ្ងៃចន្ទ ទី១០ ខែមិថុនា ឆ្នាំ២០២៤ Dave Leduc បានចេញសារលើគណនី Facebook របស់លោកដើម្បីរង់ចាំការឆ្លើយតបចំពោះការវាយប្រហារតាមបណ្តាញទំនាក់ទំនងសង្គម។

លោកបានរៀបរាប់ថា ៖«ថ្ងៃនេះជាថ្ងៃចន្ទ ទី១០ ខែមិថុនា ខ្ញុំនឹងនៅចាំមុខហាងកាហ្វេរបស់ខ្ញុំ DAV House នៅម៉ោង២រសៀលដើម្បីឆ្លើយតបទៅនឹងការវាយប្រហារនៅលើបណ្តាញសង្គម ពីលោក ខូវ ឆាយ មកកាន់រូបខ្ញុំ»។

«ខ្ញុំមានការភ្ញាក់ផ្អើលយ៉ាងខ្លាំងចំពោះទង្វើ របស់លោកប្រធានថ្មីនៃសហព័ន្ធគុនខ្មែរ ដែលគ្មានវិជ្ជាជីវៈ និងមិនមានការផ្តល់តម្លៃមកលើរូបខ្ញុំ។ អតីតប្រធានសហព័ន្ធគុនខ្មែរមុន មានទាំងវិជ្ជាជីវៈ និងចាស់ទុំជាង គួរឲ្យគោរព។ ខ្ញុំគិតថា អ្នកថ្មីកំពុងព្យាយាមចង់ល្បីដោយយកឈ្មោះខ្ញុំមកធ្វើជាវិធានបទ ពេលនេះដំណើរការហើយ សូមអបអរសាទរ។ ប្រសិនបើជាមនុស្សប្រុសមែន គួរតែនិយាយជាមួយគ្នា ហើយពិភាក្សាអំពីបញ្ហា។ ប៉ុន្តែគាត់បានសម្រេចចិត្តនិយាយជាមួយអ្នកកាសែត ហើយផ្សព្វផ្សាយនៅលើបណ្តាញសង្គមនិងធ្វើឲ្យរឿងនេះផ្ទុះ។ គាត់បានបង្ខូចកេរ្តិ៍ឈ្មោះខ្ញុំជាសាធារណៈ ហើយប្រឌិតរឿងមិនពិតអំពីខ្ញុំ»។

លោកបានបន្តទៀតថា ៖«ខ្ញុំស្រលាញ់ប្រទេសកម្ពុជា។ ខ្ញុំរស់នៅទីក្រុងនៅភ្នំពេញជាមួយគ្រួសាររបស់ខ្ញុំ និងកូនរបស់ខ្ញុំទើបតែកើតបាន១ខែនៅទីនេះ។ ខ្ញុំបានវិនីយោគនៅទីនេះ។ ខ្ញុំបានបង្កើតការងារសម្រាប់បុគ្គលិកជាច្រើន ខ្ញុំបានជួយគ្រួសារជាច្រើន ដែលជាអតីតយុទ្ធជន។ ខ្ញុំបានបើកអាជីវកម្មនៅទីនេះ ហើយអ្នកដែលបានតាមដានខ្ញុំ ដែលជា Fan ខ្ញុំ។ ពួកគាត់ដឹងហើយថា ខ្ញុំបានជួយផ្សព្វផ្សាយគុនខ្មែរស្ទើរតែរាល់ថ្ងៃតាមបណ្តាញសង្គម»។

«លោក ខូវ ឆាយ កំពុងតែនិយាយកុហក។ ខ្ញុំមិនដែលកែប្រែច្បាប់ប្រកួតជាមួយ ព្រំ សំណាងទេ។ អ្នកទាំងអស់គ្នាដឹងហើយថា ខ្ញុំមិនក្រកួតដោយពាក់ហ្គង់នោះទេ។ ខ្ញុំជាជើងឯក bareknuckle។ ការប្រកួតជាមួយអំបោះឆៅគឺជាលក្ខខណ្ឌដ៏សំខាន់សម្រាប់ខ្ញុំក្នុងការប្រកួតនៅប្រទេសកម្ពុជា។ Promoter បានសន្យាជាមួយខ្ញុំថា ការប្រកួតរបស់ខ្ញុំនឹងនៅជាមួយអំបោះឆៅ ហើយបន្ទាប់មកគាត់បានព្យាយាមផ្លាស់ប្តូរវាមុនពេលប្រកួត។ គាត់ដឹងការពិតច្បាស់ណាស់។ អ្នករាល់គ្នាអាចពិនិត្យមើលការប្រកាសប្រកួតជាផ្លូវការរបស់ខ្ញុំ នៅលើបណ្តាញសង្គមដោយមានអ្នកចូលមើល១លានដង។ ខ្ញុំបានពន្យល់លម្អិតអំពីការប្រួត»។

កាលពីម្សិលមិញ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រកាសពីការមិនអនុញ្ញាតឲ្យ Dave Leduc ប្រកួតគុនខ្មែរដាច់ខាតក្នុងអាណត្តិរបស់លោក។

បន្ទាប់មក លោក Dave Leduc បានចេញវីដេអូ បកស្រាយជុំវិញការលើកឡើងរបស់លោក ខូវ ឆាយ ដែលចាត់ទុកលោកជាបុគ្គលមិនគួរឲ្យទុកចិត្ត។ ការទាមទារយកតម្លៃខ្លួនដល់១លានដុល្លារ និងថា លោក ខូវ ឆាយ គួរហៅលោកឲ្យជួបជជែកគ្នាផ្ទាល់ប្រសើរជាងការវាយប្រហារតាមបណ្តាញទំនាក់ទំនងសង្គម។ យ៉ាងណា វីដេអូ ត្រូវបានលុបចោលវិញបាត់ទៅហើយ។ ពេលនេះ លោកចេញសារដើម្បីឆ្លើយតបទៀត៕

អត្ថបទ៖ វីរបុត្រ

The post Dave Leduc រង់ចាំម៉ោង២ថ្ងៃនេះដើម្បីឆ្លើយតបលោកប្រធានគុនខ្មែរ appeared first on Kampuchea Thmey Daily.

លោក ខូវ ឆាយ៖«Leduc ជាបុគ្គលមិនគួរឲ្យទុកចិត្ត មិនអនុញ្ញាតឲ្យប្រកួតគុនខ្មែរដាច់ខាត»

chean virakbot — Sun, 09 Jun 2024 08:53:13 +0000

លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបានប្រកាសមិនអនុញ្ញាតឲ្យកីឡាករ Dave Leduc ប្រកួតគុនខ្មែរដាច់ខាតនៅលើទឹកដីកម្ពុជា ដរាបណាលោកនៅតែជាប្រធានសហព័ន្ធកីឡាប្រដាល់គុនខ្មែរ។

លោក ខូវ ឆាយ បានលើកឡើងថា ៖«តើបុគ្គលនេះចង់បានលុយ ឬចង់ផ្តួលកីឡាករមួយថៃ? បើចង់ផ្តួលកីឡាករមួយថៃ អ្នកអាចទៅប្រកួតនៅសង្វៀនប្រទេសថៃ ឬទៅប្រកួតនៅភូមាស្រុកអ្នកឯងចុះ។ គុនខ្មែររបស់កម្ពុជាមានសមត្ថភាពគ្រប់គ្រាន់ក្នុងការយកឈ្នះគូប្រកួតគ្រប់ជាតិសាសន៍ មិនត្រូវការពឹងពាក់អ្នកឯងទេ។ ដរាបណាខ្ញុំនៅជាប្រធានសហព័ន្ធគុនខ្មែរ ខ្ញុំមិនស្វាគមន៍បុគ្គលនេះឡើងសង្វៀនគុនខ្មែរដាច់ខាត។ បើចង់ឡើងសង្វៀនគុនខ្មែរម្តងទៀត អ្នកអាចរង់ចាំរហូតដល់ប្រធានសហព័ន្ធអាណត្តិថ្មីចុះ»។

បើតាមបទសម្ភាស លោក ខូវ ឆាយ បានលើកឡើងពីមូលហេតុជាច្រើនដែល Dave Leduc ជាបុគ្គលមិនគួរឲ្យទុកចិត្ត។ ជាក់ស្តែង នៅពេលប្រកួតជាមួយ ព្រុំ សំណាង ដល់ម៉ោងប្រកួតហើយ ស្រាប់តែប្រែក្រឡាស់ទៅជាអត់ប្រើហ្កង់វិញ ដោយទាមទាររុំអំបោះឆៅវិញដែលខុសពីគោលការណ៍ពីដំបូង។ ដើម្បីកុំឲ្យខូចកម្មវិធី ព្រុំ សំណាង សុខចិត្តធ្វើតាម។ លោកប្រធានគុនខ្មែរបញ្ជាក់ថា Leduc ជាបុគ្គលមិនគួរឲ្យទុកចិត្តដែលមិនអាចធ្វើការជាមួយបានទេ។

កន្លងមក Dave Leduc ត្រូវបានគេប្រកាសជាញឹកញាប់អំពីខ្លួនឯងជាស្តេចប្រដាល់ រួមទាំងស្តេចប្រដាល់គុនខ្មែរផងដែរ បន្ទាប់ពីប្រកួតជាមួយ ព្រុំ សំណាង។ កាលពីពេលថ្មីៗនេះ រូបគេបានទារតម្លៃខ្លួនដល់១លានដុល្លារដើម្បីឡើងប្រកួត និងផ្តួលកីឡាករថៃ ប៉ុន្តែប្រការនេះបានធ្វើឲ្យប្រធានសហព័ន្ធកីឡាប្រដាល់គុនខ្មែរមិនពេញចិត្ត។ លោក ខូវ ឆាយ បានបញ្ជាក់ថា កីឡាគឺជាមិត្តភាព សាមគ្គីភាព និងមិនយកប្រទេសណាជសត្រូវទេ ហើយកីឡាករកម្ពុជាមានសមត្ថភាពគ្រប់គ្រាន់ក្នុងការប្រកួតជាមួយកីឡាករបរទេស។

កាលពីយប់ថ្ងៃទី៣១ ខែឧសភា Dave Leduc បានចូលរួមក្នុងកម្មវិធីប្រកួតមួយនៅកោះពេជ្រ រូបគេបានឲ្យកំពូលអ្នកប្រដាល់ហ្វីលីពីន ម៉ានី ប៉ាគីអាវ ធ្វើសកម្មភាពអំពីសញ្ជាកីឡាឡេវីរបស់ប្រទេសមីយ៉ាន់ម៉ាថែមទៀត។ ប្រការនេះក៏មិនមែនជាសញ្ញានៃការជួយផ្សព្វផ្សាយគុនខ្មែរឡើយ៕

អត្ថបទ៖ វីរបុត្រ

The post លោក ខូវ ឆាយ៖«Leduc ជាបុគ្គលមិនគួរឲ្យទុកចិត្ត មិនអនុញ្ញាតឲ្យប្រកួតគុនខ្មែរដាច់ខាត» appeared first on Kampuchea Thmey Daily.

Dave Leduc ប្រកាសពីការនាំប្រពន្ធកូនមករកស៊ីនៅកម្ពុជាជាកន្លែងដ៏សុវត្ថិភាព

chean virakbot — Mon, 22 Apr 2024 07:37:48 +0000

កីឡាករប្រដាល់កាណាដា-មីយ៉ាន់ម៉ា Dave Leduc បាននាំប្រពន្ធ និងកូនមករស់នៅប្រទេសកម្ពុជាដើម្បីបើកអាជីវកម្ម បន្ទាប់ពីមកប្រកួតជាមួយកីឡាករកម្ពុជា ព្រុំ សំណាង កាលពីចុងឆ្នាំ២០២៣។

Dave Leduc បានប្រកាសថា លោកគ្រោងចំណាយដើមទុនប្រមាណ១០ម៉ឺនដុល្លារអាមេរិកដើម្បីបើកអាជីវកម្មនៅប្រទេសកម្ពុជា។ ក្នុងនោះលោកគ្រោងបង្កើតក្រុមកីឡាអេឡិចត្រូនិកមួយឈ្មោះ Dave Army ដើម្បីចូលរួមប្រកួតពានរង្វាន់នានាក្នុងប្រទេសកម្ពុជា និងក្រៅប្រទេស។ លោកបានជួលអគារកម្ពស់៤ជាន់មួយនៅទួលទំពូងដែលជាកន្លែងលោករៀបចំបើកក្រុមកីឡាអេឡិចត្រូនិក និងអាចមានអាជីវកម្មផ្សេងទៀត។

ពេលនេះ លោកបានប្រកាសជាសាធារណៈពីសុវត្ថិភាពក្នុងការប្រកបអាជីវកម្មនៅប្រទេសកម្ពុជា។ លោកបាននិយាយថា ៖«សារពិសេសជូនចំពោះកងកម្លាំងនគរបាលកម្ពុជា។ ប៉ូលិសខ្មែរមានវិជ្ជាជីវៈ និងចិត្តល្អ ហើយបើអ្នកមានគម្រោងមកលេងប្រទេសកម្ពុជា អ្នកអាចជឿជាក់ក្នុងចិត្តថា អ្នកទទួលបានការគោរព និងមានយុត្តិធម៌»។

Dave Leduc បានសង្កត់ធ្ងន់ថា «ខ្ញុំបានរើទីលំនៅមកប្រទេសកម្ពុជាជាមួយកូនប្រុសអាយុ២ឆ្នាំ និងប្រពន្ធមានផ្ទៃពោះ ៨ខែ ហើយខ្ញុំគិតថា ប្រទេសមានសុវត្ថិភាពខ្លាំងណាស់។ សូមថ្លែងអំណរគុណដល់មន្ត្រីទាំងអស់ទូទាំងប្រទេស»។

មួយរយៈពេលចុងក្រោយនេះ Dave Leduc មានសកម្មភាពច្រើននៅក្នុងប្រទេសកម្ពុជាដោយចេញមុខធ្វើកិច្ចការសប្បុរសធម៌។ លោកក៏បានចេញមុខជួយផ្សព្វផ្សាយពីវប្បធម៌ខ្មែរ ខណៈលោកកំពុងសម្រុករៀបចំទីកន្លែងបើកអាជីវកម្ម។

កាលពីចុងឆ្នាំ២០២៣កន្លងទៅ Dave Leduc បានប្រកួតស្មើជាមួយកីឡាករកម្ពុជា ព្រុំ សំណាង បន្ទាប់ពីតស៊ូគ្នា៣ទឹក។ លោកបានវាយឲ្យអាជ្ញាកណ្តាលរាប់កីឡាករកម្ពុជា៨ម្តង ប៉ុន្តែដោយលក្ខន្តិកៈទាល់តែមានអ្នកសន្លប់ទើបមានឈ្នះ និងចាញ់៕

អត្ថបទ៖ វីរបុត្រ

The post Dave Leduc ប្រកាសពីការនាំប្រពន្ធកូនមករកស៊ីនៅកម្ពុជាជាកន្លែងដ៏សុវត្ថិភាព appeared first on Kampuchea Thmey Daily.

Dave Leduc ជួលអគារនៅទួលទំពួងបើកក្រុមកីឡា E-Sports

chean virakbot — Wed, 03 Apr 2024 09:07:23 +0000

កីឡាករប្រដាល់កាណាដា-មីយ៉ាន់ម៉ា Dave Leduc បានប្រកាសជាផ្លូវការពីដំណើរការអាជីវកម្មរបស់ខ្លួននៅក្នុងប្រទេសកម្ពុជាដោយបើកក្រុមកីឡាអេឡិចត្រូនិកអាជីពគ្រោងចូលរួមប្រកួតពានរង្វាន់កំពូលនៅកម្ពុជា MPL-KH។

ពេលនេះ លោកបានចុះកុងត្រារួចរាល់ហើយដើម្បីជួលអគារកម្ពស់៤ជាន់នៅទួលទំពួងសម្រាប់ក្រុមកីឡា E-Sports របស់លោក។ រសៀលថ្ងៃទី៣ ខែមេសា ឆ្នាំ២០២៤ លោកបានប្រកាសថា ៖«ខ្ញុំពិតជាមានសេចក្តីសោមនស្សរីករាយដែលខ្ញុំទើបតែបានចុះកិច្ចសន្យាជួលអគារពាណិជ្ជកម្មនៅទួលទំពួងរយៈពេលពីរឆ្នាំ កម្ពស់៤ជាន់ មានបន្ទប់គេង៦ និងបន្ទប់ទឹក៥ សម្រាប់អាជីវកម្មដំបូងរបស់ខ្ញុំនៅក្នុងប្រទេសកម្ពុជា ដែលជាទីតាំងនៃក្រុម eSport DAV Army «កងទ័ពដាវ» របស់ខ្ញុំ។ ជាន់ទីមួយនឹងប្រើសម្រាប់គម្រោងសម្ងាត់របស់ខ្ញុំ»។

លោក Dave Leduc គ្រោងបោះទុន១០ម៉ឺនដុល្លារអាមេរិកដើម្បីបង្កើតក្រុមកីឡាអេឡិចត្រូនិកនៅប្រទេសកម្ពុជា។

ការបើកអាជីវកម្មនៅកម្ពុជាបានកើតមានឡើង បន្ទាប់ពីលោកបានមកប្រកួតជាមួយកីឡាករ ព្រុំ សំណាង កាលពីចុងឆ្នាំ២០២៣ ហើយលោកក៏បានចាប់អារម្មណ៍នឹងការងាររកស៊ីតែម្តង។ បន្ទាប់ពីវិលត្រឡប់មកកម្ពុជាលើកទី២ និងលើកទី៣ លោកក៏ចាប់ផ្តើមបង្ហាញផែនការអាជីវកម្មតែម្តង៕

អត្ថបទ៖ វីរបុត្រ

The post Dave Leduc ជួលអគារនៅទួលទំពួងបើកក្រុមកីឡា E-Sports appeared first on Kampuchea Thmey Daily.

Dave Leduc Archives - Kampuchea Thmey Daily

កីឡាករ Dave Leduc ទាម​ទារ​ឲ្យ The Wall Street Journal សុំ​ទោស​កម្ពុជា

ដាវ លីឌុច សម្រេច​ឡើង​សង្វៀន​វិញ​ ព្រោះ​ចង់​បំបាក់​អំនួត ម៉ូតាសា​

ឧកញ៉ា ស្រី ចាន់ថន ថា សហព័ន្ធគុន​ខ្មែរ​គួរ​ជួប Leduc ជជែកគ្នាទល់មុខ

លោក ខូវ ឆាយ៖«បិទ Leduc តែឡើង​សង្វៀន តែស្វាគមន៍ការ​រកស៊ីនៅកម្ពុជា»

Dave Leduc រង់ចាំ​ម៉ោង២​ថ្ងៃនេះ​ដើម្បី​ឆ្លើយតបលោកប្រធានគុន​ខ្មែរ

លោក ខូវ ឆាយ៖«Leduc ជាបុគ្គលមិនគួរឲ្យទុកចិត្ត មិនអនុញ្ញាតឲ្យប្រកួតគុនខ្មែរដាច់ខាត»

Dave Leduc ប្រកាសពីការនាំប្រពន្ធកូនមករកស៊ីនៅកម្ពុជាជាកន្លែងដ៏សុវត្ថិភាព

Dave Leduc ជួលអគារនៅទួលទំពួងបើកក្រុមកីឡា E-Sports

កីឡាករ Dave Leduc ទាមទារឲ្យ The Wall Street Journal សុំទោសកម្ពុជា

ដាវ លីឌុច សម្រេចឡើងសង្វៀនវិញ ព្រោះចង់បំបាក់អំនួត ម៉ូតាសា

ឧកញ៉ា ស្រី ចាន់ថន ថា សហព័ន្ធគុនខ្មែរគួរជួប Leduc ជជែកគ្នាទល់មុខ

លោក ខូវ ឆាយ៖«បិទ Leduc តែឡើងសង្វៀន តែស្វាគមន៍ការរកស៊ីនៅកម្ពុជា»

Dave Leduc រង់ចាំម៉ោង២ថ្ងៃនេះដើម្បីឆ្លើយតបលោកប្រធានគុនខ្មែរ