FIVB Archives - Kampuchea Thmey Daily

អ្នកប៉ះសេ Alessia ឈ្នះពានកីឡាការិនី ឆ្នើមបំផុតប្រចាំព្រឹត្តិការណ៍បាល់ទះនារីពិភពលោក

chean virakbot — Mon, 08 Sep 2025 02:30:56 +0000

កីឡាការិនីលើកបាល់ទះជម្រើសជាតិ អ៉ីតាលី Alessia Orro បានឈ្នះពានឯកត្តជនចំនួន ២ ម្នាក់ឯង បន្ទាប់ពីបានជួយក្រុមនារី អ៉ីតាលី ឈ្នះជើងឯកបាល់ទះនារីពិភពលោក ឆ្នាំ ២០២៥។

ក្រុមក្តីស្រមៃ

កីឡាការិនី Alessia Orro បានដើរតួនាទីយ៉ាងសំខាន់ក្នុងការលើកបាល់ឲ្យមិត្តរួមក្រុមផ្តាច់រកពិន្ទុតាំងពីវគ្គសន្សំពិន្ទុក្នុងពូល រហូតដល់វគ្គផ្តាច់ព្រ័ត្រ។ ក្រុមនារី អ៉ីតាលី មិនស្គាល់បរាជ័យឡើយពោលគឺឈ្នះ ៣ លើកនៅវគ្គសន្សំពិន្ទុក្នុងពូល លើ ប៊ែលហ្ស៊ិក គុយបា និងស្លូវេនី។ នៅវគ្គ ១៦ ក្រុមចុងក្រោយ ពួកគេបាន ឈ្នះ អាល្លឺម៉ង់ ៣-០, វគ្គ ៨ ក្រុមចុងក្រោយ ឈ្នះ ប៉ូឡូញ ៣-០ និងវគ្គពាក់កណ្តាលផ្តាច់ព្រ័ត្រ ឈ្នះ ប្រេស៊ីល ៣-២ មុនពេល វគ្គផ្តាច់ព្រ័ត្រ ឈ្នះ តួកគី ៣-២។

កីឡាការិនី Alessia Orro

ដូច្នេះ ពួកគេបានឈ្នះជើងឯកបាល់ទះនារីពិភពលោក ឆ្នាំ ២០២៥ និងជាការឈ្នះជើងឯកលើកទី២ក្នុងប្រវត្តិសាស្ត្ររបស់ខ្លួន បន្ទាប់ពីពួកគេបានឈ្នះលើកទី១ កាលពីឆ្នាំ ២០០២។ តួកគីទទួលបានចំណាត់ថ្នាក់លេខ ២ និងប្រេស៊ីលលេខ៣ ខណៈជប៉ុន លេខ ៤ អាមេរិកលេខ៥។

បើនិយាយពីពានឯកត្តជនវិញគឺកីឡាការិនី Alessia Orro ពានឈ្នះពាន ២ ម្នាក់ឯងគឺពានកីឡាការិនីឆ្នើមបំផុតប្រចាំព្រឹត្តិការណ៍ និងពានអ្នកប៉ះសេល្អបំផុត។ ពានស្មាត់ស្តាំល្អបំផុតបានទៅកីឡាការិនីប្រេស៊ីល Gabriela Guimaraes និងកីឡាការិនីជប៉ុន Mayu Ishikawa ខណៈ ពានស្មាត់ឆ្វេងល្អបំផុតបានទៅកីឡាការិនីតួកគី Melissa Vargas ហើយពានអ្នកការពារកណ្តាលល្អបំផុតបានទៅកីឡាការិនី តួកគី Eda Erdem និងកីឡាការិនីអ៉ីតាលី Anna Danesi ហើយចុងក្រោយពានលីប៊ើរ៉ូល្អបំផុតបានទៅកីឡាការិនីអ៉ីតាលី Monica De Gennaro។

ពានឯកត្តជន

កីឡាការិនីឆ្នើមប្រចាំព្រឹត្តិការណ៍៖ Alessia Orro (អ៉ីតាលី)
អ្នកប៉ះសេល្អបំផុត៖ Alessia Orro (អ៉ីតាលី)
ស្មាត់ស្តាំល្អបំផុត៖ Gabriela Guimaraes (ប្រេស៊ីល) និង Mayu Ishikawa (ជប៉ុន)
ស្មាត់ឆ្វេងល្អបំផុត៖ Melissa Vargas (តួកគី)
អ្នកការពារកណ្តាលល្អបំផុត៖ Eda Erdem (តួកគី) និង Anna Danesi (អ៉ីតាលី)
លីប៊ើរ៉ូល្អបំផុត៖ Monica De Gennaro (អ៉ីតាលី)

ក្រុមអ៉ីតាលី លេខ១

ក្រុមតួកគី លេខ២

ក្រុមប្រេស៊ីល លេខ៣

អត្ថបទ៖ វីរបុត្រ
ប្រភពរូបថត៖ Volleyball World

The post អ្នកប៉ះសេ Alessia ឈ្នះពានកីឡាការិនី ឆ្នើមបំផុតប្រចាំព្រឹត្តិការណ៍បាល់ទះនារីពិភពលោក appeared first on Kampuchea Thmey Daily.

ក្រោយឈ្នះជើងឯកយប់មិញ ក្រុមបាល់ទះនារី អ៉ីតាលី ឈ្នះជើងឯកគ្រប់ព្រឹត្តិការណ៍ធំៗលើលោកទាំងអស់

chean virakbot — Mon, 08 Sep 2025 01:33:55 +0000

ក្រុមបាល់ទះជម្រើសជាតិនារី អ៉ីតាលី បានឈ្នះជើងឯកបាល់ទះនារីពិភពលោក (FIVB Volleyball Women’s World Championship) ឆ្នាំ ២០២៥ បន្ទាប់ពីបានយកឈ្នះលើក្រុមនារី តួកគី ដោយលទ្ធផល ៣-២ នៅវគ្គផ្តាច់ព្រ័ត្រ នាយប់ថ្ងៃអាទិត្យ ទី៧ ខែកញ្ញា ឆ្នាំ ២០២៥។

ក្រុមនារី អ៉ីតាលី ជើងឯក

វាពិតជាអស្ចារ្យណាស់ សម្រាប់ក្រុមបាល់ទះនារី អ៉ីតាលី ដោយពួកគេបានឈ្នះជើងឯក (មេដាយមាស)ពិភពលោកគ្រប់កម្មវិធីបាល់ទះធំៗលើលោក។ និយាយពីព្រឹត្តិការណ៍កីឡាអូឡាំពិក (Olympic Games) អ៉ីតាលី បានឈ្នះមេដាយមាស កាលពី ឆ្នាំ ២០២៤ នៅប្រទេសបារាំង។ ចំណែក ព្រឹត្តិការណ៍ លីគបាល់ទះនារីពិភពលោក (FIVB Women’s Volleyball Nations League) ពួកគេបានឈ្នះជើងឯក ៣ លើកគឺលើកទី១ ឆ្នាំ ២០២២ លើកទី២ និងលើកទី៣ គឺឆ្នាំ ២០២៤ និង ២០២៥។

ក្រុមនារី អ៉ីតាលី ជើងឯក

បន្ទាប់មកនៅឆ្នាំ ២០២៥ ពួកគេបានឈ្នះជើងឯកបាល់ទះនារីពិភពលោក ឆ្នាំ ២០២៥ ដែលជាការឈ្នះជើងឯកលើកទី ២ ក្នុងប្រវត្តិសាស្ត្ររបស់ខ្លួន បន្ទាប់ពីពួកគេបានឈ្នះលើកទី១ កាលពីឆ្នាំ ២០០២។

អ្វីដែលភ្ញាក់ផ្អើល ក្រុមនារី អ៉ីតាលី បានបង្កើតកំណត់ត្រាឈ្នះការប្រកួត ៣៦ លើកជាប់គ្នា ដោយគ្មានក្រុមនារីណាយកឈ្នះពួកគេបានឡើយនាមួយរយៈពេលចុងក្រោយ។

ក្រុមនារី តួកគី លេខ២

នៅមានព្រឹត្តិការណ៍កម្រិតពិភពលោក និងតំបន់ជាច្រើនទៀតដែល ពួកគេ បានឈ្នះជើងឯក ដូចជា World Cup ពីរលើក World Grand Champions Cup ១ លើក ជើងឯកទ្វីបអឺរ៉ុប European Championship ៣ លើក Univeersiadde ៣លើក និង Medditerranean Games ៨ លើក ព្រមទាំងចំណាត់ថ្នាក់លេខ ២ (មេដាយប្រាក់) និងចំណាត់ថ្នាក់លេខ៣ (មេដាយសំរិទ្ធ) ជាច្រើនទៀត៕

កីឡាការិនីឈ្នះពានឯកត្តជន

អត្ថបទ៖ វីរបុត្រ

The post ក្រោយឈ្នះជើងឯកយប់មិញ ក្រុមបាល់ទះនារី អ៉ីតាលី ឈ្នះជើងឯកគ្រប់ព្រឹត្តិការណ៍ធំៗលើលោកទាំងអស់ appeared first on Kampuchea Thmey Daily.

ក្រុមបាល់ទះ កម្ពុជា បានធ្លាក់ចំណាត់ថ្នាក់ពិភពលោកខ្លាំង ក្រោយធ្វើបច្ចុប្បន្នភាពចុងក្រោយ

Kosal Sem — Sat, 06 Sep 2025 03:57:51 +0000

ក្រុមបាល់ទះជម្រើសជាតិ កម្ពុជា បន្តស្ថិតនៅក្នុងតារាងចំណាត់ថ្នាក់ពិភពលោក ក្រោយធ្វើបច្ចុប្បន្នភាពចុងក្រោយ ប៉ុន្តែបានធ្លាក់ចំណាត់ថ្នាក់ខ្លាំង រហូតដល់ទៅ ១១ លេខឯណោះ។

កីឡាករបាល់ទះជម្រើសជាតិ កម្ពុជា

ជាការពិត មុនការប្រកួតពាន SEA V. League ចាប់ផ្តើម ក្រុមបាល់ទះជម្រើសជាតិកម្ពុជា ទទួលបានដំណឹងល្អមួយ ដោយត្រូវបានគេបញ្ចូលចំណាត់ថ្នាក់ជាលើកដំបូងទៅក្នុងតារាងចំណាត់ថ្នាក់បាល់ទះពិភពលោក។ ពេលនោះ កម្ពុជា ស្ថិតនៅចំណាត់ថ្នាក់លេខ ៦៦ ឈរនៅលើក្រុមតំបន់ អាស៊ានគឺ ហ្វីលីពីន ២ ចំណាត់ថ្នាក់ ហើយឈរនៅក្រោមឥណ្ឌូណេស៊ី ១ ចំណាត់ថ្នាក់ ក្រោមវៀតណាម ៥ ចំណាត់ និងក្រោម ថៃ ១០ ចំណាត់ថ្នាក់។

ប៉ុន្តែ បន្ទាប់ពីបញ្ចប់ការប្រកួតពាន SEA V. League ឆ្នាំ ២០២៥ ត្រឹមថ្ងៃ អាទិត្យ ទី ២០ ខែ កក្កដា ក្រុមបាល់ទះជម្រើសជាតិកម្ពុជា បានធ្លាក់ចំណាត់ថ្នាក់ខ្លាំង ពោលដល់ទៅ ២០ ចំណាត់ថ្នាក់ ដោយស្ថិតនៅចំណាត់ថ្នាក់ទី ៨៦ វិញ ដោយសារពួកគេធ្វើមិនបានល្អនៅក្នុងពាននេះ បន្ទាប់ពីឆ្លងកាត់ ៨ ប្រកួតទាំង ២ ជើង គឺបរាជ័យទាំងអស់។

តារាងចំណាត់ថ្នាក់ពិភពលោកកាលពីខែ កក្កដា ឆ្នាំ ២០២៥

យ៉ាងណា នៅខែ កញ្ញា ឆ្នាំ ២០២៥ ស្ថាប័នបាល់ទះអន្តរជាតិ (FIVB) បានធ្វើបច្ចុប្បន្នភាពចំណាត់ថ្នាក់ពិភពលោក សម្រាប់ក្រុមទាំងអស់ជាថ្មី ក្នុងនោះក្រុមបាល់ទះជម្រើសជាតិ កម្ពុជា បានធ្លាក់ ១១ ចំណាត់ថ្នាក់បន្ថែមទៀត ដោយឈរនៅលេខរៀងទី ៩៧ ក្បែរបាតតារាង ខណៈក្រុម អ៉ីស្លង់ គឺឈរនៅចំណាត់ថ្នាក់លេខ ៩៨ ស្ថិតនៅបាតតារាងតែម្តង។

តារាងចំណាត់ថ្នាក់ពិភពលោកខែ កញ្ញា ឆ្នាំ ២០២៥

ក្រឡេកទៅមើលក្រុមស្ថិតនៅចំណាត់ថ្នាក់លំដាប់កំពូលទាំង ១០ ក្នុងពិភពលោកវិញ ក៏មិនមានអ្វីប្រែប្រួលច្រើនដែរ ក្នុងនោះក្រុមលេខ ១ គឺក្រុមបាល់ទះជម្រើសជាតិ ប៉ូឡូញ។ ចំណែកចំណាត់ថ្នាក់លេខ ២ គឺ អ៉ីតាលី, ចំណាត់ថ្នាក់លេខ ៣ ប្រេស៊ីល, ចំណាត់ថ្នាក់លេខ ៤ បារាំង, ចំណាត់ថ្នាក់លេខ ៥ ជប៉ុន, ចំណាត់ថ្នាក់លេខ ៦ អាមេរិក, ចំណាត់ថ្នាក់លេខ ៧ ស្លូវេនី, ចំណាត់ថ្នាក់លេខ ៨ អាល្លឺម៉ង់, ចំណាត់ថ្នាក់លេខ ៩ អាហ្សង់ទីន និងចំណាត់ថ្នាក់លេខ ១០ គុយបា៕

តារាងចំណាត់ថ្នាក់ពិភពលោកក្រុមកំពូលទាំង ១០

អត្ថបទ៖ សេម កុសល

The post ក្រុមបាល់ទះ កម្ពុជា បានធ្លាក់ចំណាត់ថ្នាក់ពិភពលោកខ្លាំង ក្រោយធ្វើបច្ចុប្បន្នភាពចុងក្រោយ appeared first on Kampuchea Thmey Daily.

ទីបំផុត! ក្រុមបាល់ទះកម្ពុជា ត្រូវបានបញ្ចូលក្នុងចំណាត់ថ្នាក់ពិភពលោក FIVB ហើយ

Kosal Sem — Fri, 11 Jul 2025 03:28:57 +0000

ក្រុមបាល់ទះជម្រើសជាតិកម្ពុជា ត្រូវបានសហព័ន្ធបាល់ទះអន្តរជាតិ (FIVB) បញ្ចូលចំណាត់ថ្នាក់ទៅក្នុងចំណាត់ថ្នាក់បាល់ទះពិភពលោកជាផ្លូវការ។

ក្រុមបាល់ទះកម្ពុជា ឈ្នះមេដាយប្រាក់ស៊ីហ្គេម ឆ្នាំ២០២៣

នេះជាដំណឹងរីករាយមួយសម្រាប់អ្នកគាំទ្របាល់ទះ កម្ពុជា ដោយកាលពីថ្ងៃ ព្រហស្បតិ៍ ទី ១០ ខែ កក្កដា ឆ្នាំ ២០២៥ ម្សិលមិញ FIVB បានបញ្ចូលក្រុមបាល់ទះ កម្ពុជា ទៅក្នុងចំណាត់ថ្នាក់ពិភពលោក។ ជាលទ្ធផល ក្រុមបាល់ទះ កម្ពុជា ស្ថិតនៅចំណាត់ថ្នាក់លេខ ៦៦ ដោយមាន ៤២.២៦ ពិន្ទុ។

ចំណាត់ថ្នាក់នេះ បានធ្វើឱ្យក្រុមបាល់ទះ កម្ពុជា បច្ចុប្បន្ន ឈរនៅលើក្រុមតំបន់ អាស៊ាន ហ្វីលីពីន ២ ចំណាត់ថ្នាក់ ហើយឈរនៅក្រោមឥណ្ឌូណេស៊ី ១ ចំណាត់ថ្នាក់ ក្រោមវៀតណាម ៥ ចំណាត់ និងក្រោម ថៃ ១០ ចំណាត់ថ្នាក់។

ចំណាត់ថ្នាក់ក្នុង FIVB

ទោះបីជាយ៉ាងណា នេះគឺជាជោគជ័យធំមួយសម្រាប់ក្រុមបាល់ទះ កម្ពុជា ដែលបានជាប់ក្នុងចំណាត់ថ្នាក់របស់ FIVB ក្នុងចំណោមក្រុមកំពូលទាំង ៧៨ នៅលើពិភពលោក ជាលើកដំបូងក្នុងប្រវត្តិសាស្ត្រ។

ក្រុមបាល់ទះកម្ពុជា

ការទទួលបានចំណាត់ថ្នាក់នៅក្នុង FIVB នេះ គឺកើតឡើង បន្ទាប់ពីក្រុមបាល់ទះ កម្ពុជា សាងបានស្នាដៃយ៉ាងច្រើននាមួយរយៈចុងក្រោយនេះ។ ជាពិសេស គឺការឈ្នះមេដាយសំរឹទ្ធក្នុងកីឡាស៊ីហ្គេម ២០២១ នៅវៀតណាម, ការឈ្នះមេដាយប្រាក់ក្នុងកីឡាស៊ីហ្គេម ២០២៣ នៅកម្ពុជា និងការឈ្នះជើងឯកពាន SEA V League Challenge កាលពីឆ្នាំ ២០២៤ រហូតដណ្តើមបានកៅអីឡើងមកលេងពាន SEA V League នៅឆ្នាំ ២០២៥ ។

គួរបញ្ជាក់ថា ក្រុមបាល់ទះជម្រើសជាតិកម្ពុជា កំពុងចូលរួមប្រកួតពាន SEA V League ឆ្នាំ ២០២៥ ជុំទី១ នៅប្រទេសហ្វីលីពីន និងជុំទី២ នៅប្រទេសឥណ្ឌូណេស៊ី៕

ក្រុមបាល់ទះកម្ពុជា ឈ្នះជើងឯក SEA V. League ឆ្នាំ២០២៤

អត្ថបទ៖ សេម កុសល

The post ទីបំផុត! ក្រុមបាល់ទះកម្ពុជា ត្រូវបានបញ្ចូលក្នុងចំណាត់ថ្នាក់ពិភពលោក FIVB ហើយ appeared first on Kampuchea Thmey Daily.

ក្រុមបាល់ទះបារាំងឡើងលេខ២ក្នុងតារាងចំណាត់ថ្នាក់ពិភពលោក

Pha Rothana — Wed, 25 Sep 2024 01:22:36 +0000

ក្រុមបាល់ទះបុរសជម្រើសជាតិបារាំងក្នុងឆ្នាំ២០២៤ ពិតជាធ្វើបានយ៉ាងល្អ ក្រោយពួកគេក្លាយជាម្ចាស់ជើងឯកក្នុងព្រឹត្ដិការណ៍លំដាប់ពិភពលោកចំនួន២គ្រឿងផ្សេងគ្នា។

ក្រុមបាល់ទះបារាំងបានឡើងមកឈរលេខ២ ក្នុងតារាងចំណត់ថ្នាក់បាល់ទះពិភពលោក ជាមួយពិន្ទុសរុប៣៧៨.០៧។ ២០២៤ជាឆ្នាំជោគជ័យបំផុតសម្រាប់ក្រុមបាល់ទះបារាំង ដោយបានឈ្នះជើងឯកលំដាប់ពិភពលោក២ផ្សេងគ្នា។ ពួកគេបានឈ្នះជើងឯក 2024 Men’s Volleyball Nations League និងឈ្នះមេដាយមាស កីឡាអូឡាំពិកឆ្នាំ២០២៤។

ស្ថិតិ១០ប្រកួតចុងក្រោយក្នុងឆ្នាំ២០២៤ ក្រុមបាល់ទះបារាំងឈ្នះ៩លើក និងចាញ់១លើក។ ពួកគេរកបានចំនួន៧២.២៩ពិន្ទុ។ ក្រុមបាល់ទះជម្រើសជាតិប៉ូឡូញ នៅតែបន្តឈរចំណាត់ថ្នាក់លេខ១ បើទោះជាក្នុងឆ្នាំនេះពួកគេរកបានត្រឹមតែ២៣.២៤ពិន្ទុប៉ុណ្ណោះ។

ទោះបីជាយ៉ាងណា បារាំង មានឱកាសឡើងឈរលេខ១ ប្រសិនបើពួកគេបន្ដធ្វើបានល្អក្នុងការប្រកួតជើងឯកពិភពលោក 2025 FIVB Men’s Volleyball នៅប្រទេសហ្វីលីពីន។

ការប្រកួតពានរង្វាន់ 2025 FIVB Men’s Volleyball World Championship នឹងប្រព្រឹត្តទៅនៅប្រទេសហ្វីលីពីនចាប់ពីថ្ងៃទី១២ ដល់ថ្ងៃទី២៨ ខែកញ្ញា ឆ្នាំ២០២៥។ ការប្រកួតជើងឯកពិភពលោកមួយនេះបានពង្រីកក្រុមឲ្យចូលរួមរហូត៣២ក្រុមដើម្បីចូលរួមប្រកួតប្រជែង ហើយការប្រកួតនឹងធ្វើឡើងជារៀងរាល់២ឆ្នាំម្ដង៕

ប្រែសម្រួល៖ ផា រតនា

The post ក្រុមបាល់ទះបារាំងឡើងលេខ២ក្នុងតារាងចំណាត់ថ្នាក់ពិភពលោក appeared first on Kampuchea Thmey Daily.

Jean Patry ជាកីឡាករបាល់ទះជោគជ័យបំផុតក្នុងឆ្នាំ២០២៤

Pha Rothana — Fri, 20 Sep 2024 07:08:40 +0000

តារាបាល់ទះជម្រើសជាតិបារាំង Jean Patry ជាកីឡាករទទួលបានជោគជ័យបំផុតក្នុងឆ្នាំ២០២៤ បន្ទាប់ពីជួយក្រុមបាល់ទះជម្រើសជាតិបារាំងឈ្នះជើងឯក Volleyball Nation League ឈ្នះមេដាយមាសកីឡាអូឡាំពិក និងក្លិបឈ្នះបានពានរង្វាន់ជាច្រើន។

Jean Patry អាយុ២៧ឆ្នាំបានលេងឲ្យក្លិបអាជីព៣ផ្សេងគ្នា។ រូបគេបានជួយក្លិប Jastrzębski Węgiel ឈ្នះជើងឯកលីគកំពូលបាល់ទះប៉ូឡូញ ទទួលបានជើងឯករងបាល់ទះខាប់ប៉ូឡូញ ទទួលបានជើងឯករងស៊ុបភើខាប់ប៉ូឡូញ និងជើងឯករង CEV Champions League។

បន្ទាប់ពីជោគជ័យជាក្លិបនៅប្រទេសប៉ូឡូញ កីឡាករ Jean Patry បានផ្លាស់ទៅលេងឲ្យក្រុម Jakarta Bhayangkara ក្នុងប្រទេសឥណ្ឌូណេសុី ហើយជួយក្រុមមួយនេះឈ្នះជើងឯកលីគកំពូលបាល់ទះឥណ្ឌូណេសុី និងទទួលបានចំណាត់ថ្នាក់លេខ៣ ក្នុងពានរង្វាន់ក្លិបអាស៊ី Asian Club Championship ឆ្នាំ២០២៤។ ឥឡូវនេះ រូបគេបានចូលរួមជាមួយក្លិបបាល់ទះតួកគី Galatasaray។

សមិទ្ធផលជាមួយក្រុមជម្រើសជាតិវិញ Jean Patry បានជួយក្រុមបារាំងឈ្នះជើងឯកពិភពលោក Volleyball Nation League និងឈ្នះមេដាយមាស កីឡាអូឡាំពិកទីក្រុងប៉ារីស។

បើនិយាយពីពានរង្វាន់ឯកត្តជនវិញ រូបគេបានឈ្នះពានរង្វាន់«អ្នកវាយផ្តាច់ស្តាំ ឬ Best opposite) ចំនួន៤ក្នុងព្រឹត្តិការណ៍៤ផ្សេងគ្នា នៅក្នុងឆ្នាំ២០២៤គឺក្នុងព្រឹត្តិការណ៍ Asian Club Championship, ព្រឹត្តិការណ៍កីឡាអូឡាំពិកទីក្រុងប៉ារីស, ព្រឹត្តិការណ៍បាល់ទះពិភពលោក Volley Nation League និងក្នុងលីគបាល់ទះកំពូលប៉ូឡូញ។

ក្រោយសម្រេចសមិទ្ធផលជាច្រើនក្នុងឆ្នាំ២០២៤ បានធ្វើឲ្យកីឡាករកម្ពស់២.០៧ម៉ែត្រ ឈរនៅចំណាត់ថ្នាក់លេខ១ ក្នុងតារាងពិន្ទុកីឡាករបាល់ទះរកបានពិន្ទុសរុបច្រើនបំផុតទូទាំងពិភពលោក ដែលរៀចចំដោយ Volleybox ជាមួយពិន្ទុចំនួន៩៤២,៥០ពិន្ទុ៕

អត្ថបទ៖ ផា រតនា

The post Jean Patry ជាកីឡាករបាល់ទះជោគជ័យបំផុតក្នុងឆ្នាំ២០២៤ appeared first on Kampuchea Thmey Daily.

ជើងឯកបាល់ទះនារីពិភពលោក Nations League ចាប់ផ្តើមការប្រកួតថ្ងៃស្អែក

Pha Rothana — Mon, 13 May 2024 07:22:26 +0000

ការប្រកួតបាល់ទះពានរង្វាន់ពិភពលោក FIVB Volleyball Women’s Nations League លើកទី៦ ចាប់ផ្ដើមការប្រកួតក្នុងវគ្គសន្សំពិន្ទុនៅថ្ងៃទី១៤ ខែឧសភា ឆ្នាំ២០២៤ ដែលប្រទេសថៃធ្វើជាម្ចាស់ផ្ទះ។

ការប្រកួតក្នុងពានរង្វាន់នេះនឹងដំណើរនៅពីទី១៤ ខែឧសភា ដល់ថ្ងៃទី២៣ ខែមិថុនា ឆ្នាំ២០២៤ ដែលមានក្រុមកីឡាការិនីបាល់ទះជម្រើសជាតិចំនួន១៦មកពីជុំវិញពិភពលោក។ បើកឆាកការប្រកួតនៅថ្ងៃទី១៤ ខែឧសភា មាន៤គូ ក្នុងពូលទី១ ក្រុមបាល់ទះនារីប៊ុលហ្គារី ជួបជាមួយក្រុមបាល់ទះនារីហុល្លង់ ខណៈក្រុមអុីតាលី ត្រូវជួបជាមួយក្រុមប៉ូឡូញ។ ការប្រកួតក្នុងពូលទី២ ក្រុមបាល់ទះនារីចិន ជួបកូរ៉េខាងត្បូង ហើយក្រុមប្រេស៊ីល ជួប កាណាដា។

ការប្រកួតពានរង្វាន់ FIVB Volleyball Women’s Nations League បែងចែកចេញជា៦ពូល ខណៈការប្រកួតធ្វើឡើង៣សប្ដាហ៍ ក្នុងនោះ១សប្ដាហ៍នឹងធ្វើការប្រកួតចំនួន២ពូល។

ក្រោយបញ្ចប់ការប្រកួតក្នុងវគ្គសន្សំពិន្ទុ ក្រុមលេខ១ដល់លេខ៧ នឹងឡើងទៅកាន់វគ្គ៨ក្រុមចុងក្រោយដែលជាការប្រកួតជុំផ្តាច់ព្រ័ត្រ ហើយក្រុមនារីថៃជាម្ចាស់ផ្ទះបានឡើងទៅកាន់វគ្គ៨ក្រុមចុងក្រោយស្វ័យប្រវត្តិ៕

ប្រែសម្រួល៖ ផា រតនា

The post ជើងឯកបាល់ទះនារីពិភពលោក Nations League ចាប់ផ្តើមការប្រកួតថ្ងៃស្អែក appeared first on Kampuchea Thmey Daily.

កីឡាការិនីឆ្នើម Zhu Ting ប្រកាសវិលចូលក្រុម បាល់ទះជម្រើសជាតិនារីចិន

Pha Rothana — Thu, 11 Apr 2024 02:42:08 +0000

កីឡាការិនីឆ្នើម Zhu Ting វ័យ២៩ឆ្នាំ បានប្រកាសពីការចូលរួមជាមួយក្រុមបាល់ទះជម្រើសជាតិនារីចិនវិញហើយ បន្ទាប់ខកខានជាមួយក្រុមជម្រើសជាតិតាំងពីឆ្នាំ២០២២ ក្រោយពីរបួសជាសះស្បើយ។

ការវិលត្រឡប់មកវិញ Zhu Ting បានប្ដេជ្ញាចិត្តជួយក្រុមនារីចិនឲ្យមានឈ្មោះឡើងវិញក្នុងព្រឹត្តិការណ៍កីឡាអូឡាំពិកទីក្រុងប៉ារីស ឆ្នាំ២០២៤។ កីឡាការិនីរូបនេះបានជួយក្រុមនារីចិនឈ្នះមេដាយមាសអូឡាំពិកឆ្នាំ២០១៦ និងជាកីឡាការិនីឆ្នើមប្រចាំព្រឹត្តិការណ៍កីឡាអូឡាំពិកទីក្រុងតូក្យូក្នុងឆ្នាំ២០២១។ បន្ទាប់ពីជាសះស្បើយរបួសកដៃ Zhu បានត្រឡប់ចូលទីលានបាល់ទះវិញ កាលពីខែតុលា ឆ្នាំ២០២២ ជាមួយក្រុម Savino Del Bene Scandicci របស់ប្រទេសអុីតាលី ប៉ុន្តែនាងមិនបានចូលរួមជាមួយក្រុមជម្រើសជាតិទេ។

ក្រោយអវត្តមានកីឡាការិនីឆ្នើមខាងលើ ក្រុមនារីចិនធ្វើមិនសូវបានល្អទេ ក្នុងព្រឹត្តិការណ៍ FIVB Road to Paris Volleyball Qualifiers នៅក្នុងទីក្រុង Ningbo កាលពីខែកញ្ញាឆ្នាំមុន ដោយបញ្ចប់ត្រឹមលេខ៣ក្នុងពូល។ បច្ចុប្បន្នក្រុមបាល់ទះនារីចិនឈរលេខរៀងទី៦ លើពិភពលោក និងជាក្រុមអាស៊ីមានចំណាត់ថ្នាក់ខ្ពស់ជាងគេ ក្នុងតារាង FIVB ជាតំណែងមួយដែលធានាបានកៅអីទៅកាន់ទីក្រុងប៉ារីស ប៉ុន្តែពួកគេត្រូវប្រកួត VNL Preliminary Phase ដើម្បីបន្តឈរក្នុងចំណាត់ថ្នាក់ល្អ។

កីឡាការិនី Zhu Ting បាននិយាយថា ៖««នៅពេលខ្ញុំចូលនិវត្តន៍ មានមន្ត្រីមកពីការិយាល័យកីឡា Henan រដ្ឋបាលកីឡាចិន និងសមាជិកជម្រើសជាតិជាច្រើនបានបង្ហាញពីការព្រួយបារម្ភយ៉ាងខ្លាំង។ ពួកគេបានទាក់ទងខ្ញុំ លើកទឹកចិត្ត និងបញ្ចុះបញ្ចូលខ្ញុំ។ ក្នុងរយៈពេល២ឆ្នាំកន្លងមកនេះ អ្នកចាត់ការរបស់ខ្ញុំគឺអ្នកស្រី Lang Ping បានលើកទឹកចិត្តខ្ញុំយ៉ាងខ្លាំង ឲ្យវិលត្រឡប់ចូលក្រុមជម្រើសជាតិវិញ។

អ្នកស្រី Lang Ping ជាអីតតកីឡាការិនីបាល់ទះជម្រើសជាតិចិននិងជាអតីតគ្រូបង្វឹកក្រុមបាល់ទះនារីចិន។ លោកស្រីជាកម្លាំងចិត្តដ៏សំខាន់ដែលជំរុញនាងឲ្យវិលចូលជម្រើសជាតិវិញ។ ជាពិសេសការដាក់គោលដៅជួយក្រុមជម្រើសជាតិ ដណ្ដើមមេដាយក្នុងកីឡាអូឡាំពិក នៅប្រទេសបារាំង។

កីឡាការិនី Zhu Ting បានបន្ថែមថា ៖«ខ្ញុំនឹងខំធ្វើឲ្យបានល្អក្នុងការប្រកួតដែលនៅសល់ក្នុងលីគអុីតាលី Serie រដូវកាលនេះ។ បន្ទាប់មក ខ្ញុំនឹងផ្តោតលើការស្តារឡើងវិញនូវកាយសម្បទា។ ខ្ញុំនឹងប្រឹងប្រែងឲ្យអស់ពីសមត្ថភាព ដើម្បីជួយក្រុមបាល់ទះនារីចិនទទួលបានកៅអីនៅអូឡាំពិកទីក្រុងប៉ារីស»៕

សមិទ្ធផលដែល Zhu Ting បានជួយក្រុមជម្រើសជាតិនារីចិន

មេដាយមាសអូឡាំពិក (Olympic Games) ឆ្នាំ២០១៦
មេដាយមាសពិភពលោក (World Cup) ឆ្នាំ២០១៥
មេដាយមាសពិភពលោក (World Cup) ឆ្នាំ២០១៩
មេដាយមាសពិភពលោក (World Grand Championship Cup) ឆ្នាំ២០១៧
មេដាយមាសកីឡាអាស៊ី (Asian Games) ឆ្នាំ២០១៨
មេដាយមាសជើងឯកអាស៊ី (Asian Championship) ឆ្នាំ២០១៥

ប្រែសម្រួល៖ ផា រតនា
ប្រភព៖ Volleyballworld

The post កីឡាការិនីឆ្នើម Zhu Ting ប្រកាសវិលចូលក្រុម បាល់ទះជម្រើសជាតិនារីចិន appeared first on Kampuchea Thmey Daily.

FIVB Archives - Kampuchea Thmey Daily

អ្នក​ប៉ះ​សេ Alessia ឈ្នះ​ពាន​កីឡាការិនី​ ឆ្នើម​បំផុត​ប្រចាំ​ព្រឹត្តិការណ៍​បាល់ទះ​នារី​ពិភព​លោក​

ក្រុមបាល់ទះ កម្ពុជា បានធ្លាក់ចំណាត់ថ្នាក់ពិភព​លោកខ្លាំង ក្រោយធ្វើបច្ចុប្បន្នភាពចុងក្រោយ

ទីបំផុត​! ក្រុមបាល់ទះកម្ពុជា ត្រូវបានបញ្ចូលក្នុងចំណាត់ថ្នាក់ពិភព​លោក​ FIVB ហើយ