ទីបំផុត​! ក្រុមបាល់ទះកម្ពុជា ត្រូវបានបញ្ចូលក្នុងចំណាត់ថ្នាក់ពិភព​លោក​ FIVB ហើយ

ក្រុមបាល់ទះជម្រើសជាតិកម្ពុជា ត្រូវបានសហព័ន្ធបាល់ទះអន្តរជាតិ (FIVB) បញ្ចូលចំណាត់ថ្នាក់ទៅក្នុងចំណាត់ថ្នាក់បាល់ទះពិភពលោកជាផ្លូវការ។

នេះជាដំណឹងរីករាយមួយសម្រាប់អ្នកគាំទ្របាល់ទះ កម្ពុជា ដោយកាលពីថ្ងៃ ព្រហស្បតិ៍ ទី ១០ ខែ កក្កដា ឆ្នាំ ២០២៥ ម្សិលមិញ FIVB បានបញ្ចូលក្រុមបាល់ទះ កម្ពុជា ទៅក្នុងចំណាត់ថ្នាក់ពិភពលោក។ ជាលទ្ធផល ក្រុមបាល់ទះ កម្ពុជា ស្ថិតនៅចំណាត់ថ្នាក់លេខ ៦៦ ដោយមាន ៤២.២៦ ពិន្ទុ។

ចំណាត់ថ្នាក់នេះ បានធ្វើឱ្យក្រុមបាល់ទះ កម្ពុជា បច្ចុប្បន្ន ឈរនៅលើក្រុមតំបន់ អាស៊ាន ហ្វីលីពីន ២ ចំណាត់ថ្នាក់ ហើយឈរនៅក្រោមឥណ្ឌូណេស៊ី ១ ចំណាត់ថ្នាក់ ក្រោមវៀតណាម ៥ ចំណាត់ និងក្រោម ថៃ ១០ ចំណាត់ថ្នាក់។

ទោះបីជាយ៉ាងណា នេះគឺជាជោគជ័យធំមួយសម្រាប់ក្រុមបាល់ទះ កម្ពុជា ដែលបានជាប់ក្នុងចំណាត់ថ្នាក់របស់ FIVB ក្នុងចំណោមក្រុមកំពូលទាំង ៧៨ នៅលើពិភពលោក ជាលើកដំបូងក្នុងប្រវត្តិសាស្ត្រ។

ការទទួលបានចំណាត់ថ្នាក់នៅក្នុង FIVB នេះ គឺកើតឡើង បន្ទាប់ពីក្រុមបាល់ទះ កម្ពុជា សាងបានស្នាដៃយ៉ាងច្រើននាមួយរយៈចុងក្រោយនេះ។ ជាពិសេស គឺការឈ្នះមេដាយសំរឹទ្ធក្នុងកីឡាស៊ីហ្គេម ២០២១ នៅវៀតណាម, ការឈ្នះមេដាយប្រាក់ក្នុងកីឡាស៊ីហ្គេម ២០២៣ នៅកម្ពុជា និងការឈ្នះជើងឯកពាន SEA V League Challenge កាលពីឆ្នាំ ២០២៤ រហូតដណ្តើមបានកៅអីឡើងមកលេងពាន SEA V League នៅឆ្នាំ ២០២៥ ។

គួរបញ្ជាក់ថា ក្រុម​បាល់ទះ​ជម្រើស​ជាតិ​កម្ពុជា កំពុង​ចូល​រួម​ប្រកួត​​ពាន SEA V League ឆ្នាំ​ ២០២៥ ជុំ​ទី១ នៅ​ប្រទេស​ហ្វីលីពីន និង​ជុំ​ទី២ នៅ​ប្រទេស​ឥណ្ឌូណេស៊ី៕

អត្ថបទ៖ សេម កុសល