Mark Zuckerberg Archives - Kampuchea Thmey Daily

ទម្លាប់ពេលព្រឹកមិននឹកស្មានរបស់មហាសេដ្ឋីបច្ចេកវិទ្យាអាមេរិក ២ រូបលើរឿងសុខភាព

Mean Ratana — Fri, 19 Jan 2024 08:22:41 +0000

សម្រាប់អ្នកមានសេរីភាពផ្នែកហិរញ្ញវត្ថុ ឬអាចហៅយ៉ាងសាមញ្ញថា អ្នកមានលុយចាយលែងអស់ រឿងសុខភាពអាចជាអាទិភាពចម្បងមួយសម្រាប់ពួកគេ ។ ជាមួយគ្នានេះ បើយើងក្រឡេកមើលទម្លាប់មហាសេដ្ឋីក្នុងវិស័យបច្ចេកវិទ្យាល្បី ២ រូប គឺលោក Elon Musk និងលោក Mark Zuckerberg ថាតើលោកទាំងពីរនេះមានទម្លាប់គិតគូរយ៉ាងណាលើរឿងសុខភាព ស្របពេលដែលលុយពុំមែនបញ្ហារបស់ពួកគេនោះ ។

១– នាយកប្រតិបត្តិក្រុមហ៊ុន Tesla

ប្រិយមិត្តអាចនឹងភ្ញាក់ផ្អើលពេលដឹងពីទម្លាប់ញ៉ាំអាហារពេលព្រឹករបស់អ្នកមានលុយមិនខ្វះ Elon Musk។ ស្ថាបនិកក្រុមហ៊ុន SpaceX រូបនេះបានសរសេរក្នុងបណ្ដាញ X ផ្ទាល់ខ្លួនថា “ខ្ញុំតែងតែញ៉ាំនំដូណាត់រាល់ព្រឹក” ។ លោកក៏បានលើកឡើងដែរថា ចំណែករបបអាហារជាទម្លាប់របស់លោក គឺញ៉ាំអាហារតាមចំណូលចិត្ត ដូចជា ស៊ូស៊ី (Sushi), សាច់គោ, ភេសជ្ជៈកាហ្វេ, សូកូឡា និងកូកាកូឡាជាដើម ។

ជារៀងរាល់ឆ្នាំ Musk បានប្រាប់ជាសាធារណៈថា លោកពុំសូវមានទម្លាប់ល្អក្នុងរបបអាហារនោះទេ ។ លោកថែមទាំងនិយាយក្នុងកម្មវិធី Podcast មួយឈ្មោះ Joe Rogan Experience កាលពីឆ្នាំ ២០២០ ទៀតថា “ខ្ញុំសុខចិត្តញ៉ាំអាហារឆ្ងាញ់ៗ ទោះបីរស់មិនបានយូរក៏ដោយ” ។

ទម្លាប់ខាងលើនេះអាចជារឿងភ្ញាក់ផ្អើលមួយសម្រាប់មនុស្សគ្រប់គ្នា ដោយហេតុថា លោក Musk ដែលមានក្រុមហ៊ុនធំៗចំណូលជាច្រើនក្នុងដៃ ជាមហាសេដ្ឋីកំពូល និងមានលទ្ធភាពជួលចុងភៅចម្អិនអាហារផ្ទាល់ខ្លួនបាន ហើយថែមទាំងមានម្តាយជាគ្រូណែនាំ និងជាអ្នកជំនាញខាងផ្នែកជីវជាតិចំណីអាហារនៃសាកលវិទ្យាល័យ Toronto ទៀតនោះ ប៉ុន្តែលោកនៅមិនមានពេលវេលាគ្រប់គ្រាន់សម្រាប់គិតគូរលើរឿងនេះទៅវិញ ។

គួររំឭកថា ការមានទម្លាប់ញ៉ាំនំដូណាត់រាល់ព្រឹកនេះ ធ្វើឲ្យសាធារណជនភ្ញាក់ផ្អើលមិនតិចឡើយ ដោយហេតុថា ម្ចាស់ក្រុមហ៊ុន X (ពីមុន Twitter) រូបនេះ មានទ្រព្យសម្បត្តិសុទ្ធសរុបដល់ទៅ ២៣៩ ពាន់លានដុល្លារអាមេរិកគិតត្រឹមឆ្នាំ២០២៣ ដែលអាចនិយាយថា លោកអាចជួលអ្នកជំនាញផ្សេងៗសឹងគ្រប់ផ្នែកសម្រាប់ផ្តោតលើសុខភាព ប៉ុន្តែបែរជារលោក Musk មិនមានទស្សនៈបែបនេះទៅវិញ ។

២-នាយកប្រតិបត្តិក្រុមហ៊ុន Meta Plaforms (អតីត Facebook)

ក្រឡេកមកមើល មហាសេដ្ឋីបច្ចេកវិទ្យាបណ្តាញសង្គមឯនេះវិញ គឺលោក Mark Zuckerberg ។ ក្នុងវ័យ ៣៩ ឆ្នាំ លោកក៏មានទ្រព្យសម្បត្តិច្រើនក្រាស់ក្រែល ក្នុងចំណោមអ្នកមានទាំងអស់នៅលើពិភពលោក ដែលស្ថិតនៅចំណាត់ថ្នាក់លេខ ៦ ។ នេះបើយោងតាមទិន្នន័យពីសារព័ត៌មាន Forbes ។

សារព័ត៌មាន New York Post បានឲ្យដឹងពីទម្លាប់ប្រចាំថ្ងៃរបស់មហាសេដ្ឋីរូបនេះ មានចំណូលចិត្តច្រើនទៅលើការហ្វឹកហាត់ប្រកួតគុនចម្រុះ MMA (Mixed Martial Arts) ដោយចំណាយពេលហាត់ ៣ ទៅ ៤ ដង ក្នុងនោះក៏មានការរត់ ៣ ដងក្នុងមួយសប្តាហ៍ផងដែរ ។ បន្ថែមពីនោះគេសង្កេតឃើញថា លោកក៏មានទម្លាប់ចំណាយពេលច្រើនទៅលើការមើលថែកូនស្រីទាំងបី របស់លោក គឺ Maxima, August និងAurelia មិនថាការអានសៀវភៅ ការរៀនពីបច្ចេកវិទ្យាកូដកម្មវិធីកុំព្យូទ័រនោះឡើយ ។

បើគេក្រឡេកទៅមើលរបបអាហាររបស់លោកវិញ លោកច្រើនមិនបើកបង្ហាញនូវអ្វីដែលខ្លួនទទួលទានទេ ប៉ុន្តែលោកប្រាប់ថា ជារៀងរាល់ព្រឹកលោកតែងញ៉ាំអាហារសម្រាប់ជាថាមពលក្នុងបរិមាណ ៤០០០ កាល់ឡូរី ។ ការញ៉ាំនេះ គឺដើម្បីប៉ះប៉ូវទៅលើចំណូលចិត្ត ដែលលោកចូលហ្វឹកហាត់គុនចម្រុះនោះឯង។

នៅក្នុងកម្មវិធីសំនួរ-ចម្លើយរបស់ Business Insider ព័ត៌មានផ្សេងៗទាក់ទិននឹងរឿងទម្លាប់ផ្ទាល់ខ្លួន លោក Mark បានឲ្យដឹងថា ជាទម្លាប់ លោកចំណាយពេលព្រឹកទៅនឹងទូរសព្ទ ។ ដោយទម្លាប់នោះ គឺតាមដានពីព័ត៌មាន ព្រឹត្តិការណ៍នានាលើពិភពលោក ពិសេសទិន្នន័យផ្សេងៗសម្រាប់ការសម្រេចចិត្តនានា របស់ក្រុមហ៊ុនសាវជីវកម្មបច្ចេកវិទ្យារបស់ខ្លួន។

សេដ្ឋីប្រាក់ពាន់លានដុល្លាររូបនេះ ក៏ធ្លាប់បានសារភាពប្រាប់ទៅ កម្មវិធី Podcast Joe Rogan ពីបទពិសោធផ្ទាល់ខ្លួនទៅកាន់សាធារណជនផងដែរថា ទម្លាប់ពេលព្រឹករបស់លោក មិនល្អនោះទេ ពិសេសក្រោកពីម៉ោង ៨ ព្រឹក ពាក់អាវម៉ូដដដែលៗដោយមិនសូវខ្វល់ខ្វាយច្រើន និងចុចមើលទូរសព្ទជាច្រើនម៉ោង ។ ប៉ុន្តែទន្ទឹមនឹងនោះលោកក៏ព្យាយាមញ៉ាំអាហារប៉ះប៉ូវ ចូលហាត់កីឡា ចំណាយពេលជាមួយគ្រួសារ និងព្យាយាមគេងឲ្យបានគ្រប់ ៨ ម៉ោងផងដែរ ៕

អត្ថបទដោយ៖ មាន រតនា

The post ទម្លាប់ពេលព្រឹកមិននឹកស្មានរបស់មហាសេដ្ឋីបច្ចេកវិទ្យាអាមេរិក ២ រូបលើរឿងសុខភាព appeared first on Kampuchea Thmey Daily.

បុរសថៃម្នាក់ដុតផ្ទះខ្លួនឯងឆេះខ្ទេចខ្ទី ហើយអះអាងមុខប៉ូលិសថា ជា Mark Zuckerberg

សាង ស្រីល័ក្ខ — Thu, 28 Dec 2023 03:27:21 +0000

បុរសជនជាតិថៃម្នាក់ដុតបំផ្លាញផ្ទះឆេះខ្ទេចខ្ទី ហើយបដិសេធមិនទទួលយកឈ្មោះខ្លួនឯងដោយនិយាយអះអាងថា គាត់ជា Mark Zuckerberg ខណៈគេរកឃើញថា គាត់ធ្លាប់មានប្រវត្តិជំងឺផ្លូវចិត្ត និងប្រើប្រាស់គ្រឿងញៀន។

នៅវេលាម៉ោងប្រមាណ៩ និង៣០នាទីយប់ នាថ្ងៃទី២៧ ខែធ្នូ មន្ត្រីជំនាញប្រទេសថៃបានទទួលដំណឹងថា មានអគ្គិភ័យឆាបឆេះស្ថិតក្នុងភូមិលេខ១ ឃុំមឿងមូ ស្រុកមឿងស៊ីងបុរី បន្ទាប់មកមន្ត្រីជំនាញបានសម្របសម្រួលជាមួយមន្ត្រីពន្លត់អគ្គិភ័យ និងក្រុមសង្គ្រោះដោយបានចុះទៅពិនិត្យកន្លែងកើតហេតុ។

ក្រោយពេលដែលករុអ្នកជំនាញបានៅដល់កន្លែងកើតហេតុ ក៏ប្រទះឃើញផ្ទះស៊ីម៉ងត៍មួយជាន់កំពុងត្រូវអគ្គិភ័យឆាបឆេះយ៉ាងសន្ធោសន្ធៅ។ មន្ត្រីចល័តបានប្រញាប់ទៅបាញ់ទឹកពន្លត់ដោយប្រើពេលប្រហែល៣០នាទី ទើបអាចគ្រប់គ្រងភ្លើងទាំងស្រុង ។

ទោះយ៉ាងណាក៏ដោយ ផ្ទះទាំងមូលត្រូវខូចខាតគ្មានសល់ ចំណែកទ្រព្យសម្បត្តិនៅក្នុងផ្ទះរួមមានទូទឹកកក, ម៉ាស៊ីនបោកគក់ ម៉ូតូ២គ្រឿង និងសំលៀកបំពាក់រងការខូចខាតទាំងអស់។

បន្ទាប់ពីប៉ូលិសសាកសួរម្ចាស់ផ្ទះក៏បានរកឃើញថា បុរសជាឪពុកមានកូនប្រុសពីរនាក់ស្នាក់នៅខាងក្រោម ចំណែកគាត់ស្នាក់នៅផ្ទះខាងលើ។ មុនពេលកើតហេតុ គាត់បានអង្គុយជជែកលេងជាមួយមិត្តភ័ក្តិនៅផ្ទះអ្នកជិតខាងដែលនៅកៀកផ្ទះ ហើយនៅក្នុងមានកូនប្រុសតែម្នាក់ឯងប៉ុណ្ណោះ។ មួយសន្ទុះក្រោយកមក អ្នកជិតខាងបានស្រែកថាមានភ្លើងឆេះ។ គាត់មានអារម្មណ៍ភ័យខ្លាចនិងរន្ធត់ ហើយប្រញាប់ដើរតាមរកកូនមិនដឹងថារត់ចេញពីផ្ទះឬយ៉ាងណា។

យ៉ាងណាក៏ដោយ ក្នុងពេលដែលមន្ត្រីជំនាញកំពុងជួយគ្រប់គ្រងអគ្គិភ័យនោះ។ អ្នកភូមិម្នាក់បានរាយការណ៍ថា គាត់បានប្រទះឃើញលោក Art (ជាកូនប្រុសជនរងគ្រោះ) អង្គុយតែម្នាក់ឯងនៅមាត់ផ្លូវ ចម្ងាយប្រហែល១០០ម៉ែត្រពីកន្លែងកើតហេតុ។ ពេលនោះសមត្ថកិច្ចបានចុះទៅឃាត់ខ្លួន និងសួរនាំ ប៉ុន្តែលោក Art បាននិយាយយ៉ាងដាច់អហង្កការថា “ខ្ញុំមិននិយាយច្រើនទេ! ខ្ញុំដឹងតែប៉ុណ្ណឹង មុនពេលកើតហេតុ ខ្ញុំកំពុងធ្វើការ និងសរសេរកូដកម្មវិធីកុំព្យូទ័រ”។

ក្នុងនោះផងដែរ ប៉ូលិសបានរកឃើញក្នុងផ្ទះបុរសជាជនសង្ស័យ មានដែកបិទភ្ជាប់ដើម្បីបង្កើតអ្វីមួយយ៉ាងចម្លែក មុនពេលមានផ្កាភ្លើងចេញពីឧបករណ៍ម្យ៉ាងហៅថា soldering រហូតដល់ភ្លើងឆេះភ្លាមៗមិនអាចគ្រប់គ្រង់បាន ទើបគាត់ភ័យហើយប្រញាប់រត់ចេញពីផ្ទះយ៉ាងលឿនតែម្ដង។

ពេលសាកសួរលម្អិតម្ដងទៀត បុរសជនជាតិថៃដដែលនេះបានសារភាពប្រាប់ប៉ូលិសថា គាត់មិនមែនឈ្មោះ Art នោះទេ។ ប៉ុន្តែគាត់បាននិយាយថាឈ្មោះរបស់គាត់គឺ Mark Zuckerberg ជាមេស្ថាបនិកហ្វេសប៊ុក។ មិនបង្អង់យូរសមត្ថកិច្ចបាននាំខ្លួនគាត់ទៅប៉ុស្តិ៍នគរបាលដើម្បីឃុំខ្លួនទុក ខណៈអ្នកជិតខាងបាននិយាយដូចៗគ្នាថា លោក Art មានជំងឺផ្លូវចិត្តយូរឆ្នាំ មានប្រវត្តិពាក់ព័ន្ធគ្រឿងញៀន ហើយកន្លងមកគាត់តែងតែបង្កភាពចលាចលក្នុងភូមិជាច្រើនដងរួចមកហើយ៕

ប្រែសម្រួល៖ សាង ស្រីល័ក្ខ

ប្រភព៖Thaiger

ចុចអាន៖ភោជនីយដ្ឋាននៅជប៉ុន បម្រើស៊ូស៊ីតូចបំផុតក្នុងលោក ប្រើអង្ករមួយគ្រាប់ប៉ុណ្ណោះ

The post បុរសថៃម្នាក់ដុតផ្ទះខ្លួនឯងឆេះខ្ទេចខ្ទី ហើយអះអាងមុខប៉ូលិសថា ជា Mark Zuckerberg appeared first on Kampuchea Thmey Daily.

មេធំក្រុមហ៊ុន Meta ត្រៀមប្រកួតក្នុងទ្រុងជាមួយមហាសេដ្ឋី Elon Musk

Sonya — Thu, 22 Jun 2023 13:54:44 +0000

មហាសេដ្ឋីបច្ចេកវិទ្យាល្បីបំផុតរបស់ពិភពលោកពីររូបគឺលោក Elon Musk ម្ចាស់បណ្ដាញ Twitter និងលោក Mark Zuckerberg ម្ចាស់ក្រុមហ៊ុន Meta បានយល់ព្រមប្រកួតគ្នាក្នុងទ្រុងមួយ បង្កឱ្យមានការចាប់អារម្មណ៍យ៉ាងខ្លាំងពីមហាជន។

ជាដំណឹងដ៏ភ្ញាក់ផ្អើល ដែលលោក Elon Musk បានបង្ហោះសារនៅលើប្រព័ន្ធផ្សព្វផ្សាយសង្គម Twitter របស់លោកថា លោកបានត្រៀមខ្លួនរួចជាស្រេចសម្រាប់ការប្រកួតក្នុងទ្រុងជាមួយលោក Mark Zuckerberg ។

រឿងហេតុដំបូងដែលនាំឱ្យមានការប្រកាសនូវការប្រកួតមួយនេះឡើង គឺកាលពីខែឧសភា កន្លងទៅ លោក Mark Zuckerberg បានឈ្នះមេដាយក្នុងការប្រកួតកីឡា ជឺជិតស៊ូ ហើយថ្មីៗនេះ លោក Elon Musk បានធ្វើការបង្ហោះសារមួយក្នុង Twitter ថា “I’m up for a cage match if he is lol” ( ខ្ញុំចង់ឡើងប្រកួតដាក់ទ្រុង បើគាត់ហ៊ាន) ។

មិនបង្អង់យូរ លោក Zuckerberg បាន Screenshot សារនៅលើ Twitter របស់លោក Musk និងបង្ហោះនៅលើ Instagram របស់លោកជាមួយនឹងខេបសិន (Caption) ថា “Send me location” (ផ្ញើទីតាំងមក) ។

មិនបញ្ចប់ត្រឹមនេះ មហាសេដ្ឋី Elon Musk បានឆ្លើយតបទៅនឹងលោក Zuckerberg ជាមួយនឹងសារខ្លីពីរម៉ាត់គឺ “Vegas Octagon” ពោលគឺជាទីតាំងប្រកួតដែលគេដឹងថា វាមានមូលដ្ឋាននៅទីក្រុង Las Vegas រដ្ឋ Nevada សហរដ្ឋអាមេរិក៕

ប្រែសម្រួល៖ សន្យា

ប្រភព៖ BBC

ចុចអាន៖ អ្នកជំនាញព្រមានថា បច្ចេកវិទ្យា AI នឹងធ្វើឲ្យមនុស្សដាច់ពូជ

ចុចអាន៖ FDA យល់ព្រមឲ្យក្រុមហ៊ុនរបស់ Elon Musk ធ្វើតេស្តដាក់បន្ទះឈីបក្នុងខួរក្បាលមនុស្ស

The post មេធំក្រុមហ៊ុន Meta ត្រៀមប្រកួតក្នុងទ្រុងជាមួយមហាសេដ្ឋី Elon Musk appeared first on Kampuchea Thmey Daily.

ស្ងាត់ៗ Mark Zuckerberg ឈ្នះមេដាយមាសនិងប្រាក់ ក្នុងការប្រកួតកីឡាជឺជិតស៊ូតាមតំបន់

Boa Sokunveary — Tue, 09 May 2023 02:44:40 +0000

លោក Mark Zuckerberg អ្នកបង្កើត Facebook បានឈ្នះមេដាយមាសនិងប្រាក់ក្នុងការប្រកួតកីឡាជឺជិតស៊ូលើកដំបូងនៅរដ្ឋកាលីហ្វ័រញ៉ាខាងជើង ទីក្រុង Redwood កាលពីថ្ងៃសៅរ៍សប្ដាហ៍មុន ។

ពិតជាគួរឲ្យស្ងើចសរសើរមែនទែនព្រោះលោក Mark វ័យ ៣៨ ឆ្នាំរូបនេះទើបតែហ្វឹកហាត់ក្បាច់គុនក្នុងអំឡុងពេលជំងឺរាតត្បាតកូវីដ១៩ ប៉ុណ្ណោះ ប៉ុន្តែគាត់អាចផ្ដួលគូប្រកួតបានជោគជ័យរហូតឈ្នះមេដាយមាសនិងប្រាក់ ។

យ៉ាងណា Mark នៅតែជួបឧបសគ្គបន្តិចបន្តួច ទោះបីគាត់ឈ្នះការប្រកួតជាច្រើនហើយក្ដី ។ គេសង្កេតឃើញថាក្នុងការប្រកួតមួយ Mark បានទម្លាក់ទឹកមុខឡើងស្រពោនដោយមិនដឹងមូលហេតុ ក្រោយការសន្ទនាជាមួយដៃគូរួចទើបពួកគេចាប់ដៃគ្នាបញ្ចប់បញ្ហាទៅ ។

ទន្ទឹមនោះដែរ មានអ្នកប្រដាល់ MMA ល្បីៗជាច្រើនចូលរួមអបអរសាទរមហាសេដ្ឋី Mark ដូចជា Israel Adesanya, Brandon Moreno, និង Alex Volkanovski ៕

ប្រែសម្រួល ៖ វារី

ប្រភព៖TMZ

ចុចអាន ៖ ជាមហាសេដ្ឋីមែន តែថៅកែក្រុមហ៊ុន Meta បែរជិះឡានថោកៗ មិនគួរឱ្យជឿ

The post ស្ងាត់ៗ Mark Zuckerberg ឈ្នះមេដាយមាសនិងប្រាក់ ក្នុងការប្រកួតកីឡាជឺជិតស៊ូតាមតំបន់ appeared first on Kampuchea Thmey Daily.

មេធំក្រុមហ៊ុន Meta លក់ផ្ទះមួយខ្នង យកប្រាក់ឧបត្ថម្ភមូលនិធិមនុស្សធម៌

Sonya — Wed, 27 Jul 2022 11:48:13 +0000

សហស្ថាបនិក Facebook លោក Mark Zuckerberg និងភរិយា Priscilla Chan បានលក់ផ្ទះមួយខ្នង នៅទីក្រុង San Francisco ក្នុងតម្លៃ ៣១លានដុល្លារ ដែលជាកិច្ចព្រមព្រៀងក្រៅទីផ្សារ ដើម្បីយកប្រាក់ជួយសកម្មភាពមនុស្សធម៌។ នេះបើតាមអ្នកនាំពាក្យរបស់គ្រួសារបានបញ្ជាក់។

កិច្ចព្រមព្រៀងនេះ ត្រូវបាន Zillllow ឱ្យដឹងថា គឺជាការលក់ថ្លៃបំផុតមិនធ្លាប់មានប្រចាំឆ្នាំ២០២២ នៅសាន់ហ្វ្រាន់ស៊ីស្កូ។ ផ្ទះដែលសាងសង់ក្នុងឆ្នាំ ១៩២៨ ទំហំ ៧,៣៨៦ ហ្វីតការ៉េ មានបន្ទប់គេងចំនួន ៤ និងបន្ទប់ទឹកចំនួន ៤ បានបិទការដាក់លក់តាំងពីនៅថ្ងៃទី១ ខែកក្កដា ប៉ុន្តែដំណឹងនេះទើបតែលេចឮជាជាសាធារណៈ នៅថ្ងៃទី២៥ ខែកក្កដា។

ផ្ទះមួយខ្នងដែលទើបតែលក់នេះដែរ ត្រូវបាន Mark Zuckerberg និងភរិយា ទិញយកកាលពីឆ្នាំ ២០១២ ក្នុងតម្លៃត្រឹមតែ ១០លានដុល្លារ ខណៈបច្ចុប្បន្នប្ដីប្រពន្ធទាំងពីរលក់វាវិញ បានចំណេញកប់ក្ដោងឯណោះ។

ប្រភពពីកាសែត Wall Street Journal បានទម្លាយថា មូលហេតុដែល Mark Zuckerberg និងភរិយា លក់ផ្ទះមួយខ្នងនេះ មកពីអ្នកទាំងពីរយកប្រាក់ចូលរួមមូលនិធិ Chan Zuckerberg ដើម្បីជួយដោះស្រាយបញ្ហាប្រឈមរបស់សង្គមដូចជា ការលុបបំបាត់ជំងឺ និងលើកកម្ពស់វិស័យអប់រំ។

ទោះបីជាយ៉ាងណា មហាសេដ្ឋីបច្ចេកវិទ្យា Mark និងលោកស្រី Priscilla មិនទាន់ចេញមុខដើម្បីធ្វើការអត្ថាធិប្បាយអំពីរឿងនេះនៅឡើយ៕

ប្រែសម្រួល៖ សន្យា

ចុចអាន៖ មហាសេដ្ឋី Bill Gates បរិច្ចាគ ២០ពាន់លានដុល្លារ ជូនមូលនិធិសប្បុរសធម៌

The post មេធំក្រុមហ៊ុន Meta លក់ផ្ទះមួយខ្នង យកប្រាក់ឧបត្ថម្ភមូលនិធិមនុស្សធម៌ appeared first on Kampuchea Thmey Daily.

ជាមហាសេដ្ឋីមែន តែថៅកែក្រុមហ៊ុន Meta បែរជិះឡានថោកៗ មិនគួរឱ្យជឿ

Sonya — Mon, 25 Apr 2022 12:05:00 +0000

មិនដូចមហាសេដ្ឋីដទៃទៀតនោះទេ មហាសេដ្ឋីពិភពលោក Mark Zuckerberg តែងតែប្រើជីវិតយ៉ាងសាមញ្ញ ដែលសាធារណជនអាចមើលឃើញតាមរយៈសម្លៀកបំពាក់ធម្មតាៗ និងរថយន្តតម្លៃថោកៗ ដែលលោកប្រើប្រាស់ជាប្រចាំ។

ក្នុងឆ្នាំ ២០០៧ លោក Mark Zuckerberg បានក្លាយជាមហាសេដ្ឋីវ័យក្មេងបំផុតដែលបង្កើតទ្រព្យសម្បត្តិដោយដៃឯង ដោយសារបណ្តាញទំនាក់ទំនងសង្គម Facebook បានផ្ទុះការគាំទ្រ និងមានមនុស្សរាប់លាននាក់សម្រុកប្រើភ្លូកទឹកភ្លូកដី ក្នុងពេលដ៏ខ្លី។ ហើយរហូតដល់ឆ្នាំ ២០២២នេះ ទ្រព្យសម្បត្តិសុទ្ធរបស់ស្ថាបនិកក្រុមហ៊ុនបច្ចេកវិទ្យាយក្សរូបនេះ បានឡើងដល់ទៅ ៧៩.៥ ពាន់លានដុល្លារអាមេរិកឯណោះ។

ទន្ទឹមនឹងភាពមានបានដ៏មហាសាល ជីវិតរបស់លោកគួរណាស់តែហាយសូរ ប្រើរបស់ប្រេនៗ ថ្លៃៗ ឬប្រណីតៗ។ ផ្ទុយទៅវិញ Mark Zuckerberg បែរជាចំណាយលើជីវិតរស់នៅយ៉ាងសាមញ្ញបំផុត ជាពិសេសថយន្តដែលលោកធ្លាប់ទិញ សុទ្ធតែមានតម្លៃទាបៗ បើធៀបទៅនឹងមហាសេដ្ឋីផ្សេងទៀត។

រថយន្ត Honda Fit

គេតែងតែប្រទះឃើញថៅកែក្រុមហ៊ុន Meta បើកបររថយន្តម៉ាក Honda Fit ញឹកញាប់នៅឯ សហរដ្ឋអាមេរិក។ រថយន្តនេះតម្លៃត្រឹមតែ ១៦,១៩០ដុល្លារអាមេរិកប៉ុណ្ណោះ ដែលវាជាម៉ូឌែល hatchback មានកៅអីអាចបត់បានច្រើនរបៀប ដើម្បីងាយស្រួលផ្ទុកទំនិញ។

រថយន្ត Acura TSX

រថយន្ត Acura TSX ពណ៌ខ្មៅ ត្រូវបានថៅកែក្រុមហ៊ុម Meta ជិះតាំងពីយូរយារណាស់មកហើយ ជាមួយនឹងតម្លៃ ២៧,៥៤៥ដុល្លារអាមេរិក។ នេះជារថយន្តកម្រិតមធ្យមដែលបំពាក់ដោយដំបូលកម្ដៅអគ្គិសនី ការគ្រប់គ្រងអាកាសធាតុដោយស្វ័យប្រវត្តិ កៅអីស្បែក និងប្រព័ន្ធសំឡេង 7-speaker។

រថយន្ត Volkswagen Golf MK6 GTI

នេះក៏ជារថយន្តកម្រិតមធ្យមដែលមានតម្លៃ ២៩,៥៤៥ដុល្លារអាមេរិក។ វាជាប្រភេទរថយន្តប្រអប់លេខដៃ និងជាកម្មសិទ្ធិរបស់ Mark Zuckerberg កាលពីឆ្នាំ ២០១៧។

រថយន្ត Infiniti G Sedan

រថយន្តប្រណីតនេះ ថ្លៃគួរសមដែរ និងសក្តិសមសម្រាប់ការធ្វើដំណើរជាលក្ខណៈគ្រួសារ។ ទោះជាយ៉ាងណាក៏ដោយ បើប្រៀបធៀបជាមួយនឹងទ្រព្យសម្បត្តិដ៏សន្ធឹកសន្ធាប់របស់ថៅកែ Meta រថយន្តនេះនៅតែមិនសមនឹងលោកទាល់តែសោះ ព្រោះតម្លៃរបស់វាត្រឹមតែ ៣៣,២៥០ដុល្លារអាមេរិកប៉ុណ្ណោះ។

រថយន្ត Pagani Huayra

ជាមួយនឹងតម្លៃ ៣.៨លានដុល្លារអាមេរិក រថយន្តម៉ាក Pagani Huayra នៅតែត្រូវបានគេយល់ថា វាថោកនៅឡើយសម្រាប់មហាសេដ្ឋីប្រាក់វាល់កោដរូបនេះ ហើយវានៅតែមិនអាចប្រៀបបានទៅនឹងរថយន្តទំនើបរបស់គ្រួសារធំៗដទៃទៀតលើលោក។

ចំពោះ Mark Zuckerberg ត្រូវបានគេមើលឃើញថា ជាមហាសេដ្ឋីមួយរូបដែលមិនសូវចាប់អារម្មណ៍នឹងការប្រើប្រាស់សម្ភារប្រណីតនោះទេ ទោះបីលោកជាមនុស្សដែលមានទ្រព្យច្រើនបំផុតនៅលើភពផែនដីក៏ដោយ។ ផ្ទុយទៅវិញ ជំនួសឱ្យការសម្ញែងអួតទ្រព្យសម្បត្តិ ថៅកែ Meta និងភរិយា នាំគ្នាសកម្មខ្លាំងលើកម្មវិធីសប្បុរសធម៌ ដោយអ្នកទាំងពីរតែងតែជួយឧបត្ថម្ភដល់ក្រុមរងគ្រោះនៅតាមប្រទេសនានាជុំវិញពិភពលោក៕

ប្រែសម្រួល៖ សន្យា

ចុចអាន៖ កំពូលមេដឹកនាំមានឥទ្ធិពលលើពិភពលោក ជិះរថយន្តអ្វី?

The post ជាមហាសេដ្ឋីមែន តែថៅកែក្រុមហ៊ុន Meta បែរជិះឡានថោកៗ មិនគួរឱ្យជឿ appeared first on Kampuchea Thmey Daily.

មេ Meta លោក Zuckerberg បាត់ទ្រព្យ២៩ប៊ីលានដុល្លារតែ១ថ្ងៃម្សិលមិញ

chean virakbot — Fri, 04 Feb 2022 03:23:02 +0000

លោក Mark Zuckerberg បានបាត់បង់ទ្រព្យសម្បត្តិ២៩ប៊ីលានដុល្លារអាមេរិកកាលពីថ្ងៃព្រហស្បតិ៍ ទី៣ ខែកុម្ភៈ ដោយសារភាគហ៊ុនរបស់ក្រុមហ៊ុន Meta បានធ្លាក់ចុះអាក្រក់បំផុតជាប់កំណត់ត្រាក្នុងរយៈពេលត្រឹមតែមួយថ្ងៃ បន្ទាប់ពីការព្យាករប្រាក់ចំណូលខកចិត្តដែលបានធ្វើឲ្យរន្ធត់ទិដ្ឋភាពបច្ចេកវិទ្យាសកល។

យោងតាម Forbes បានបង្ហាញថា ភាគហ៊ុនរបស់ Meta បានធ្លាក់ចុះ២៦% ដែលបានលុបបំបាត់ជាង២០០ប៊ីលានដុល្លារអាមេរិកនៅក្នុងការធ្លាក់តម្លៃទីផ្សារធំបំផុតមិនធ្លាប់មានក្នុងមួយថ្ងៃសម្រាប់ក្រុមហ៊ុនអាមេរិកនេះ។ លទ្ធផលនេះបានទាញទ្រព្យសម្បត្តិរបស់ស្ថាបនិក និងជានាយកប្រតិបត្តិ លោក Zuckerberg សល់ត្រឹម៨៥ប៊ីលានដុល្លារអាមេរិក។

លោក Mark Zuckerberg

លោក Zuckerberg មានភាគហ៊ុនប្រហែលជា១២.៨%នៃក្រុមហ៊ុនបច្ចេកវិទ្យាយក្សដែលពីមុនឈ្មោះ Facebook។

ការធ្លាក់ចុះទ្រព្យសម្បត្តិមួយថ្ងៃរបស់លោកស្ថិតក្នុងចំណោមការខាតបង់ធំបំផុតមិនធ្លាប់មាន និងបានកើតឡើង បន្ទាប់ពីម្ចាស់ក្រុមហ៊ុនរថយន្ត Tesla លោក Elon Musk បានបាត់បង់មួយថ្ងៃ៣៥ប៊ីលានដុល្លារអាមេរិកកាលពីខែវិច្ឆិកា។

យ៉ាងហោចណាស់ឈ្មួញកណ្តាល២១នាក់បានកាត់បន្ថយតម្លៃគោលដៅនៅ Meta បន្ទាប់ពីក្រុមហ៊ុនបានចេញផ្សាយការព្យាករខ្សោយជាងការរំពឹងទុកកាលពីថ្ងៃពុធ បណ្តាលមកពីការកែប្រែឯកជនភាពរបស់ Apple និងការប្រកួតប្រជែងកើនឡើងសម្រាប់អ្នកប្រើប្រាស់ក្នុងនោះមានគូប្រជែងធំ TikTok និង YouTube។

បន្ទាប់ពីបាត់បង់ប្រាក់២៩ប៊ីលានដុល្លារអាមេរិក លោក Zuckerberg បានស្ថិតនៅចំណាត់ថ្នាក់លេខ១២ក្នុងបញ្ជីមហាសេដ្ឋីលើលោករបស់ Forbes ដែលស្ថិតនៅពីក្រោមមហាសេដ្ឋីឥណ្ឌា Mukesh Ambani និង Gautam Adani៕

ប្រែសម្រួល៖ វីរបុត្រ
ប្រភព៖ reuters

The post មេ Meta លោក Zuckerberg បាត់ទ្រព្យ២៩ប៊ីលានដុល្លារតែ១ថ្ងៃម្សិលមិញ appeared first on Kampuchea Thmey Daily.

មេហ្វេសប៊ុកប្រាប់បុគ្គលិកមិនចាំបាច់ចាក់វ៉ាក់សាំងកូវីដ ហើយត្រឡប់មកធ្វើការនៅអូហ្វីសវិញ

Sok Chivon — Fri, 11 Dec 2020 04:45:07 +0000

បើយោងតាមរបាយការណ៍ដែលបានដកស្រង់ប្រភពដែលសុំមិនបញ្ចេញឈ្មោះកាលពីថ្ងៃព្រហស្បតិ៍បានឲ្យដឹងថា លោក Mark Zuckerberg បានប្រាប់បុគ្គលិកហ្វេសប៊ុករបស់លោកជាង ៥០,០០០ នាក់នៅក្នុងកិច្ចប្រជុំរបស់ក្រុមហ៊ុនថា ពួកគេនឹងមិនចាំបាច់ចាក់វ៉ាក់សាំងប្រឆាំងជំងឺកូវីដ ១៩ នោះទេ ហើយបានបញ្ជាឲ្យត្រឡប់ទៅធ្វើការនៅការិយាល័យវិញ ក្រោយចំណាយពេលធ្វើការពីផ្ទះ ។

បុគ្គលិកហ្វេសប៊ុកភាគច្រើនជាពិសេសអ្នកដែលរស់នៅក្នុងសហរដ្ឋអាមេរិកបានធ្វើការពីផ្ទះចាប់តាំងពីការចាប់ផ្តើមរោគរាតត្បាតនៃជំងឺកូវីដ ១៩ ។

នាយកប្រតិបត្តិហ្វេសប៊ុករូបនេះក៏បានទទូចផងដែរថា វ៉ាក់សាំងកូវីដ ១៩ នឹងក្លាយជាការវិវឌ្ឍន៍យ៉ាងវិជ្ជមាន ហើយជំរុញឲ្យបុគ្គលិកអនុវត្តតាមវិធានការប្រឆាំងនឹងជំងឺកូវីដ ១៩ ដោយមិនចាំបាច់ចាក់វ៉ាក់សាំង ។

នៅក្នុងខែឧសភាក្រុមហ៊ុនបានប្រកាសអំពីគោលនយោបាយធ្វើការងារពីផ្ទះដល់បុគ្គលិករបស់ខ្លួន ។ បច្ចុប្បន្ននេះបុគ្គលិកមួយចំនួនបានវិលត្រឡប់ទៅអគាររបស់ពួកគេវិញនៅតាមបណ្តាប្រទេសដែលមានអត្រាឆ្លងកូវីដ ១៩ ទាប ។

បើយោងតាមសាកលវិទ្យាល័យ Johns Hopkins បានឲ្យដឹងថា រហូតមកដល់ពេលនេះសហរដ្ឋអាមេរិកជាប្រទេសដែលរងផលប៉ះពាល់ខ្លាំងបំផុតនៅលើពិភពលោកដោយជំងឺកូវីដ ១៩ ដែលមានករណីឆ្លងជាង ១៥.៣ លានករណី និងមានអ្នកស្លាប់ជាង ២៨៩,០០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មន្ទីរបញ្ចកោណដាក់ពង្រាយយន្តហោះទម្លាក់គ្រាប់បែកនុយក្លេអ៊ែរ B-52 ទៅតំបន់មជ្ឈិមបូព៌ា

ចុចអាន ៖ ចំនួនអ្នកស្លាប់ដោយកូវីដ ក្នុងមួយថ្ងៃនៅអាមេរិកអាចវ៉ាដាច់ជនរងគ្រោះនៅព្រឹត្តិការណ៍វាយប្រហារ ៩/១១

The post មេហ្វេសប៊ុកប្រាប់បុគ្គលិកមិនចាំបាច់ចាក់វ៉ាក់សាំងកូវីដ ហើយត្រឡប់មកធ្វើការនៅអូហ្វីសវិញ appeared first on Kampuchea Thmey Daily.

Mark Zuckerberg Archives - Kampuchea Thmey Daily

ទម្លាប់ពេលព្រឹកមិននឹកស្មានរបស់មហាសេដ្ឋីបច្ចេកវិទ្យាអាមេរិក ២ រូបលើរឿងសុខភាព

បុរសថៃ​ម្នាក់ដុតផ្ទះខ្លួនឯងឆេះខ្ទេចខ្ទី ហើយអះអាងមុខប៉ូលិសថា ​ជា Mark Zuckerberg

មេធំក្រុមហ៊ុន Meta ត្រៀមប្រកួតក្នុងទ្រុងជាមួយមហាសេដ្ឋី Elon Musk

ស្ងាត់ៗ Mark Zuckerberg ឈ្នះមេដាយមាសនិងប្រាក់ ក្នុងការប្រកួតកីឡាជឺជិតស៊ូតាមតំបន់

មេធំក្រុមហ៊ុន Meta លក់ផ្ទះមួយខ្នង យកប្រាក់ឧបត្ថម្ភមូលនិធិមនុស្សធម៌

ជាមហាសេដ្ឋីមែន តែថៅកែក្រុមហ៊ុន Meta បែរជិះឡានថោកៗ មិនគួរឱ្យជឿ

មេ Meta លោក Zuckerberg បាត់​ទ្រព្យ​២៩​ប៊ីលាន​ដុល្លារ​​​តែ​១​ថ្ងៃម្សិល​មិញ​

មេហ្វេសប៊ុកប្រាប់បុគ្គលិកមិនចាំបាច់ចាក់វ៉ាក់សាំងកូវីដ ហើយត្រឡប់មកធ្វើការនៅអូហ្វីសវិញ

បុរសថៃម្នាក់ដុតផ្ទះខ្លួនឯងឆេះខ្ទេចខ្ទី ហើយអះអាងមុខប៉ូលិសថា ជា Mark Zuckerberg

មេ Meta លោក Zuckerberg បាត់ទ្រព្យ២៩ប៊ីលានដុល្លារតែ១ថ្ងៃម្សិលមិញ