អ្នកជំនាញព្រមានថា បច្ចេកវិទ្យា AI នឹងធ្វើឲ្យមនុស្សដាច់ពូជ

អ្នកជំនាញ រួមទាំងប្រធានក្រុមហ៊ុន OpenAI និង Google Deepmind ផងដែរ បានព្រមានថា បញ្ញាសិប្បនិម្មិត (AI) អាចនាំទៅដល់ការផុតពូជរបស់មនុស្សជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ មនុស្សរាប់សិបនាក់ បានគាំទ្រសេចក្តីថ្លែងការណ៍នេះ ដែលត្រូវបានចេញផ្សាយនៅលើគេហទំព័ររបស់មជ្ឈមណ្ឌលសម្រាប់សុវត្ថិភាព AI។

សេចក្តីថ្លែងការណ៍នេះបានឲ្យដឹងថា “អាទិភាពសកលនាពេលបច្ចុប្បន្ន គឺជាការកាត់បន្ថយហានិភ័យនៃការផុតពូជមនុស្សដែលបង្កឡើងដោយ បច្ចេកវិទ្យា AI ក៏ដូចជាកាត់បន្ថយហានិភ័យក្នុងសង្គមផ្សេងទៀត ដូចជាជំងឺរាតត្បាត និងសង្រ្គាមនុយក្លេអ៊ែរ ជាដើម”។

លោក Sam Altman នាយកប្រតិបត្តិនៃក្រុមហ៊ុន OpenAI, លោក Demis Hassabis នាយកប្រតិបត្តិនៃ Google DeepMind និងលោក Dario Amodei នៃក្រុមហ៊ុន Anthropic សុទ្ធតែបានគាំទ្រសេចក្តីថ្លែងការណ៍ខាងលើ។

ទាក់ទិននឹងបញ្ហានេះ គេហទំព័ររបស់មជ្ឈមណ្ឌលសម្រាប់សុវត្ថិភាព AI បានបង្ហាញសេណារីយ៉ូគ្រោះមហន្តរាយចំនួន៤ ដែលអាចកើតមាន ក្នុងនោះមានដូចជា៖

1. បច្ចេកវិទ្យា AI អាចត្រូវបានគេប្រើធ្វើជាអាវុធ, ឧទាហរណ៍៖ AI នឹងក្លាយជាឧបករណ៍ស្វែងរកគ្រឿងញៀន ហើយអាចត្រូវបានប្រើប្រាស់ដើម្បីផលិតអាវុធគីមី។
2. ព័ត៌មានមិនពិតដែលបង្កើតឡើងដោយ AI អាចធ្វើឲ្យសង្គមអស្ថិរភាព និងធ្វើឲ្យខូចដល់ការសម្រេចចិត្តរួម
3. អំណាចរបស់ AI អាចប្រមូលផ្តុំនៅក្នុងដៃមនុស្សមួយចំនួន ដែលអនុញ្ញាតឲ្យមានការអនុវត្តវិធានការឃ្លាំមើល និងការត្រួតពិនិត្យគៀបសង្កត់កាន់តែរីករាលដាល
4. មនុស្សប្រែជាខ្សោយកម្លាំង ហើយពឹងផ្អែកលើបច្ចេកវិទ្យា AI ស្រដៀងទៅនឹងសេណារីយ៉ូដែលបានបង្ហាញនៅក្នុងខ្សែភាពយន្ត Wall-E៕

ទោះបីជាយ៉ាងណាក៏ដោយ ក៏មានអ្នកវិទ្យាសាស្រ្តមួយចំនួនចេញមុខបដិសេធចំពោះការអះអាងខាងលើផងដែរ ដោយពួកគេបានលើកឡើងថា នេះគ្រាន់តែការស្រមើស្រមៃប៉ុណ្ណោះ ប៉ុន្តែរឿងជាក់ស្តែងមិនមែនដូចនោះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ រូបភាព AI បង្ហាញទិដ្ឋភាពនៃទីក្រុងអាមេរិកនាពេលអនាគត មើលទៅប្លែកភ្នែកខ្លាំង