ONE Champion Archives - Kampuchea Thmey Daily

Demetrious Johnson ប្រាប់អ្នកគាំទ្រថា ជាឱកាសដែលឃើញរូបគេបញ្ចប់ Rodtang ដោយស្នៀតឃ្លេនៅលើសង្វៀន

Sorn Phanith — Thu, 17 Mar 2022 09:53:35 +0000

វីរបុរសគុនចម្រុះនឹងជួបម្ចាស់ខ្សែក្រវាត់មួយថៃ ONE Flyweight កីឡាករ Rodtang Jitmuangnon ក្នុងនាមជាគូកំពូលមួយនៅសង្វៀន ONE X នាថ្ងៃសៅរ៍ទី ២៦ ខែមីនា ឆ្នាំ ២០២២។ ការប្រកួតនេះ គឺជាការប្រារព្ធខួប ១០ នៃការរៀបចំព្រឹត្តិការណ៍ប្រកួតប្រចាំសង្វៀន ONE Championship។

Demetrious Johnson បានប្រាប់ឲ្យអ្នកគាំទ្រទៅទស្សនានៅសិង្ហបុរី និង មើលការឃ្លេរបស់គេលើមនុស្សដែក Rodtang។ កីឡាករអាមេរិករូបនេះ ថ្លែងប្រាប់ដល់អ្នកគាំទ្រថា៖«ហ្វេន(Fans) នៅសិង្ហបុរី នេះជាឱកាសរបស់អ្នកដើម្បីឃើញខ្ញុំបញ្ចប់ Rodtang ដោយក្បាច់ឃ្លេនៅលើសង្វៀន។ អ្នកទាំងអស់គ្នានឹងហើបគូថចេញពីកៅអី»។ ម្ចាស់ខ្សែក្រវាត់គុនចម្រុះពិភពលោក ១២ សម័យគូសបញ្ជាក់ថា នេះដូចជាការប្រកួតរវាងមនុស្សប្រចៀវ និង ស៊ុបពើមែនអីចឹង។ កីឡាករអាមេរិកសង្ឃឹមថា គេនឹងទទួលជោគជ័យទល់នឹង “The Iron Man” ខណៈមានស្ទិលប្រកួតជាច្រើនដើម្បីផ្ដួលគូប្រកួត។

“Mighty Mouse” សង្កត់ធ្ងន់ ៖«ពេលខ្ញុំអង្គុយពេលគិតអំពីការប្រកួតនេះនៅទឹកទី១ និងទឹកទី៣ គឺដូចមនុស្សប្រចៀវវ៉ៃនឹងស៊ុបពើមែន។ នៅទឹកទី២ និងទឹកទី៤ វាច្បាស់ជាមានស្នៀតសុំារបស់ខ្ញុំ ប៉ុន្តែ ៣នាទីច្បាស់ជាមានសារសំខាន់ខ្លាំងណាស់។ ខ្ញុំមានពេល ៣ នាទីដើម្បីបញ្ចប់គូប្រជែង។ ខ្ញុំគិតថា តើគេអាចប្រើជង្គង់ហោះចំមុខទេ? ពិតណាស់ ខ្ញុំនឹងប្រើក្បាច់ចម្រុះក្នុងការប្រកួតនេះ»។

«[ខ្ញុំមិនបានឃើញវិធីដើម្បីផ្ដួលគូប្រកួតលឿនពេកទេ]។ Rodtang នឹងប្រើវិធីម៉ាត់រូបគេគ្រប់ពេល។ Danial Williams និង Jonathan Haggerty សុទ្ធតែចាញ់ក្រោមកណ្ដាប់ដៃរបស់គេ។ នរណាដែលប្រឈមនឹងរូបគេ អ្នកនោះតែងតែរងនូវកណ្ដាប់ដៃ។ ខ្ញុំមិនមែនឡើងប្រកួតដើម្បីផ្ដួលនរណាម្នាក់ឲ្យសន្លប់ ឬ បញ្ចប់នរណាម្នាក់ទេ។ វានឹងចំណាយពេល ១២ នាទី»។ កីឡាករវ័យ ៣៥ បញ្ចេញទស្សនៈមុនការប្រកួតបែបនេះ។ Johnson ត្រូវសម្របខ្លួនឲ្យល្អ, ភាពវៃឆ្លាត, និង រកវិធីផ្ដួលគូប្រកួត។ កីឡាករអាមេរិកសង្ឃឹមថា គេនឹងទទួលជោគជ័យទល់នឹង “The Iron Man” ខណៈរូបគេមានស្ទិលប្រកួតជាច្រើនដើម្បីផ្ដួលគូប្រកួត៕

The post Demetrious Johnson ប្រាប់អ្នកគាំទ្រថា ជាឱកាសដែលឃើញរូបគេបញ្ចប់ Rodtang ដោយស្នៀតឃ្លេនៅលើសង្វៀន appeared first on Kampuchea Thmey Daily.

ចាន់ រតនា ទទួលស្គាល់មូលហេតុធ្វើឲ្យចាញ់ Eko Roni យ៉ាងឆាប់រហ័ស

Sorn Phanith — Wed, 16 Mar 2022 09:13:11 +0000

អ្នកលេងគុនចម្រុះកម្ពុជា ចាន់ រតនា បានចាញ់កីឡាករឥណ្ឌូណេស៊ី Eko Roni Saputra យ៉ាងឆាប់រហ័សក្នុងដើមទឹកទី ១ នៃព្រឹត្តិការណ៍ផ្សាយផ្ទាល់ ONE: LIGHT OUT កាលពីថ្ងៃសុក្រ ទី១១ នៅប្រទេសសិង្ហបុរី។

ជុំវិញបរាជ័យយ៉ាងឆាប់រហ័សហួសពីការរំពឹងទុកនេះ ត្រូវបាន ចាន់ រតនា បានប្រាប់ក្រោយពេលប្រកួតថា កត្តាចម្បងដែលធ្វើឲ្យរូបគេចាញ់យ៉ាងឆាប់រហ័សបែបនេះ គឺបណ្តាលមកពីរូបគេមើលស្រាលដៃគូ។ ចាន់ រតនា បានរៀបរាប់ថា ៖«មូលហេតុចម្បងមកពីខ្ញុំធ្វេសប្រហែស។ ខ្ញុំមើលស្រាលការចាប់របស់គេពេក។ ធ្វើឲ្យដៃរបស់គាត់ឃ្លេដល់បំពង-ករបស់ខ្ញុំពេញ។ តាមពិតទៅដៃរបស់គាត់ធំអីចឹង ឃ្លេមិនសូវដល់បំពង-ក ទេ បើបានការពារ តែខ្ញុំប្រហែសធ្វើឲ្យដៃរបស់គាត់ចូលដល់បំពង-កពេញ»។

សម្រាប់កម្លាំងស៊ុហ្វ និងកាយសម្បទារបស់ Eko Roni មិនសូវខ្លាំង និងរឹងមាំដូចដៃគូមុនគឺកីឡាករចិនឡើយ ហើយអាចទប់ទល់បានសម្រាប់កម្លាំងស៊ុហ្វ និងកាយសម្បទា។ «បើនិយាយកម្លាំង និងរាងកាយ គឺមិនដូចដៃគូខ្ញុំមុនគឺ Xie Wei ទេ។ បើខ្ញុំដោះឃ្លេរបស់គាត់បាន ខ្ញុំអាចទប់ទល់ ហើយក៏មានសង្ឃឹមឈ្នះច្រើនដែរ»។ ចាន់ រតនា បានបន្ថែម។

ការពិតនៅលើសង្វៀនបង្ហាញថា ចាន់ រតនា បានចាប់ផ្តើមការប្រកួតនៅទឹកទី ១ ដោយមិនមានការវាស់ស្ទង់ឡើយពោលគឺចូលទាត់ និងទាត់តែម្តង ខណៈកីឡាករឥណ្ឌូណេស៊ី Eko Roni ក៏បានទាត់ ព្រមទាំងប្រើកណ្តាប់ដៃដ៏មានប្រសិទ្ធភាពដែរ។ បន្ទាប់មកកីឡាករឥណ្ឌូណេស៊ីរូបនេះ ចូលអោប ហើយនៅពេល ចាន់ រតនា ក្រោកឈរ រូបគេបានអោបពីក្រោយ និងកាច់ផ្តួល។ ពេលនោះហើយរូបគេមានឱកាសចាប់ឃ្លេដៃទាំងពីរបង្ខំឲ្យអ្នកលេងគុនខ្មែរគោះដៃសុំចាញ់តែម្តងនូវនាទី១:៤០ក្នុងទឹកទី១។

នេះជាបរាជ័យលើកនេះ គឺជាពីរលើកជាប់គ្នាសម្រាប់ ចាន់ រតនា បន្ទាប់បានចាញ់កីឡាករចិន Xie Wei ក្នុងទឹកទី ៣ កាលពីចុងឆ្នាំ ២០២០ ។ ទោះជាយ៉ាងណា អ្នកលេងគុនខ្មែររូបនេះ នៅតែប្ដេជ្ញាបន្តហ្វឹកហាត់តាមរយៈគំនិតវិជ្ជមានជានិច្ច និងទុកជាមេរៀនក្នុងជីវិត៕

The post ចាន់ រតនា ទទួលស្គាល់មូលហេតុធ្វើឲ្យចាញ់ Eko Roni យ៉ាងឆាប់រហ័ស appeared first on Kampuchea Thmey Daily.

វ៉ៃល្អ De Ridder និង Roman ទទួលបានប្រាក់រង្វាន់ទឹកចិត្តសរុប១០ម៉ឺនដុល្លារ

Kang Tola — Mon, 28 Feb 2022 15:33:16 +0000

ស្ថាប័នប្រដាល់ធំបំផុតប្រចាំអាស៊ី ONE Championship បានចំណាយប្រាក់ចំនួន១០ម៉ឺនដុល្លារទៀតហើយដើម្បីផ្តល់ជារង្វាន់លើកទឹកចិត្តដល់កីឡាករដែលប្រកួតបានល្អឥតខ្ចោះកាលពីថ្ងៃសុក្រ ទី២៥ ខែកុម្ភៈកន្លងទៅនេះនៅប្រទេសសិង្ហបុរី។

នារាត្រីនៃសមរភូមិប្រយុទ្ធផ្សាយផ្ទាល់ ONE: Full Circle ជើងខ្លាំងមិនដែលចាញ់មកពីប្រទេសរុស្ស៊ី និងជាម្ចាស់ខ្សែក្រវាត់ពិភពលោកពីរប្រភេទទម្ងន់កីឡាករ Reinier de Ridder និងជើងឯកឃីកបុកសីងពិភពលោកទម្ងន់ធ្ងន់ពិភពលោកកីឡាករ Roman Kryklia ជាអ្នកទទួលបានប្រាក់រង្វាន់លើកទឹកចិត្តបន្ថែមលើប្រាក់តម្លៃខ្លួន។

ប្រធាន និងជានាយកប្រតិបត្តិរបស់ ONE Championship លោក Chatri Sityodtong បានម្រេចផ្តល់ប្រាក់រង្វាន់លើកទឹកចិត្តចំនួន៥ម៉ឺនដុល្លារអាមេរិកម្នាក់ដូចគ្នាដល់ម្ចាស់ខ្សែក្រវាត់ពិភពលោកទាំងពីរនាក់ បន្ទាប់ពីការប្រកួតរបស់ពួកគេត្រូវបានវិនិច្ឆ័យថា វ៉ៃល្អជាងគេណាៗទាំងអស់ និងស័ក្តិសមទទួលបានប្រាក់រង្វាន់លើកទឹកចិត្ត។

ការទទួលបានប្រាក់រង្វាន់យ៉ាងច្រើនសន្ធឹកសន្ធាប់នេះបានកើតមានឡើងនៅពេលអ្នកលេងគុនចម្រុះរុស្ស៊ី De Ridder ប្រើពេល៣ទឹកក្នុងការប្រើជំនាញឃ្លេរបស់ខ្លួនគ្របគ្រងទាំងស្រុងលើកីឡាករ Kiamrian Abbasov។ បន្ទាប់ខំប្រឹងតស៊ូ និងការពារខ្លួនពីរទឹកដំបូងរហូតចូលទឹកទី៣ កីឡាករ Abbasov ទ្រាំលែងបាន និងបានគោះដៃសុំចាញ់តែម្តង។

ចំណែកការប្រកួតដណ្តើមខ្សែក្រវាត់ឃីកបុកសីងពិភពលោកទម្ងន់ធ្ងន់ កីឡាករអ៊ុយក្រែន Roman Kryklia ប្រើពេលមិនបានយូរទេក្នុងការផ្តួលដៃគូឲ្យសន្លប់។ រូបគេបានប្រើរន្ទះជើងឯក និងកណ្តាប់ដៃឆ្វេងស្តាំផ្ទួនៗបណ្តាលឲ្យ Murat Aygum ដួលលើកទី១ និងលើកទី២ត្រូវបានអាជ្ញាកណ្តាលបញ្ឈប់ការប្រកួតក្នុងទឹកទី១តែម្តង។

នេះជាលើកទី១ដែល ONE ចំណាយអស់ត្រឹមតែ១០ម៉ឺនដុល្លារក្នុងការផ្តល់រង្វាន់ដល់កីឡាករត្រឹមតែពីរនាក់ ពីព្រោះកន្លងមកចំណាយចន្លោះពី១៥ម៉ឺនដុល្លារទៅ២០ម៉ឺនដុល្លារក្នុងមួយព្រឹត្តិការណ៍ បន្ទាប់ពីប្រាក់រង្វាន់លើកទឹកចិត្តបានប្រកាសជាផ្លូវកាលកាលពីដើមខែមករា ឆ្នាំ២០២២នេះ៕

The post វ៉ៃល្អ De Ridder និង Roman ទទួលបានប្រាក់រង្វាន់ទឹកចិត្តសរុប១០ម៉ឺនដុល្លារ appeared first on Kampuchea Thmey Daily.

ហេតុផលសំខាន់៤គួរទស្សនាការប្រកួត ONE: FULL CIRCLE ថ្ងៃសុក្រនេះ

Kang Tola — Wed, 23 Feb 2022 10:43:41 +0000

ព្រឹត្តិការណ៍ប្រកួតផ្សាយផ្ទាល់ ONE: FULL CIRCLE នឹងផ្សាយចេញពីប្រទេសសិង្ហបុរីនាថ្ងៃសុក្រ ទី២៥ ខែកុម្ភៈនេះ ដែលមានគូប្រកួតខ្សែក្រវាត់ពិភពលោក និងគូពិសេសៗរហូតដល់១៤គូ។ យ៉ាងណា ក្រុមការងារ ONE ប្រចាំស្រុកខ្មែរសូមលើកយកហេតុផលសំខាន់៤ដែលលោកអ្នកគួរតាមដានព្រឹត្តិការណ៍ប្រកួតដ៏អស្ចារ្យនេះ។

ទី១៖ ការប្រកួតដណ្តើមខ្សែក្រវាត់ពិភពលោកពីរគូ

លោកអ្នកនឹងបានទស្សនាការប្រកួតដណ្តើមខ្សែក្រវាត់ពិភពលោក២គូនារាត្រីដ៏អស្ចារ្យនេះ។ ស្តេចទម្ងន់ធ្ងន់ Reindier de Ridder នឹងឡើងការពារខ្សែក្រវាត់ ONE Middleweight ទល់នឹងអធិរាជសង្វៀនទម្ងន់ ONE Welterweight កីឡាករ Kiamrian Abbasov ។

ជើងខ្លាំងជីគីស្ថានបានដើរតាមគន្លងដៃគូដែលបានតម្លើងទម្ងន់ប្រកួត និងដាក់គោលដៅយកខ្សែក្រវាត់មួយប្រភេទទម្ងន់ទៀត ប៉ុន្តែអធិរាជសង្វៀនពីរប្រភេទទម្ងន់របស់ហុល្លង់ជឿជាក់ថា រូបគេនឹងការពារខ្សែក្រវាត់បានជោគជ័យ។

ស្របពេលជាមួយគ្នា គូឯករងប្រចាំព្រឹត្តិការណ៍ ជើងខ្លាំង Roman Kryklia ប្រកួតជាមួយ Murat Aygun សម្រាប់ការដណ្តើមខ្សែក្រវាត់ឃីកបុកសីងពិភពលោកទម្ងន់ធ្ងន់ ONE Light Heavyweight ដូច្នេះអ្នកគាំទ្រនឹងជក់ចិត្តសម្រាប់ការប្រកួតដ៏អស្ចារ្យទាំងពីរគូនេះ។

ទី២៖ វីរបុរសភូមា Aung La N Sang ប៉ះ Bigdash លើកទី៣

វាមានរយៈពេល៥ឆ្នាំហើយចាប់តាំងពី Aung La N Sang និង Vitaly Bigdash បានប្រកួតគ្នាដើម្បីដណ្តើមខ្សែក្រវាត់ពិភពលោក ONE Middleweight។ ជំនួបគ្នា២លើកសរុបចំនួន១០ទឹកមានរយៈពេល៥០នាទី កីឡាករទាំងពីរឈ្នះនិងចាញ់ម្តងម្នាក់ដូចគ្នា។

ដូច្នេះសម្រាប់លើកទី៣នេះ គឺជាការជម្រះបញ្ជីចាស់ឲ្យដាច់ស្រឡះដោយចង់បញ្ចប់ដោយលទ្ធផលពាក់កណ្តាលផ្លូវផ្ទុយពីការប្រកួតពីរលើកកន្លងមកគឺឈ្នះចាញ់ដោយពិន្ទុ។ ពស់ថ្លានមីយ៉ាន់ម៉ាន់បាននិយាយថា លោកចង់បញ្ឈប់ដៃគូ និងឲ្យនិយាយពាក្យថា ឈប់ប្រកួតគ្នាហើយ។

ទី៣៖ ជំនួបខ្លារខិនទម្ងន់ Bantamweight

Fabricio Andrade ត្រូវបានចាត់ទុកជាកីឡាករវ៉ៃរស់រវើក និងរហ័សរហួនក្នុងរយៈពេលពេលថ្មីនេះ។ រាល់ការប្រកួតកីឡាករប្រេស៊ីលនេះគឺសកម្ម និងគួរឲ្យចាប់អារម្មណ៍ខ្លាំងដែលត្រូវគ្នានឹងសមាជិកក្រុម Team Lakay របស់ហ្វីលីពីន Jeremy Pacatiw ដែលស្មារតីប្រយុទ្ធពោរពេញដោយបច្ចេកទេស និងសន្ធាប់លើដៃគូខ្លាំង។

បើនិយាយពីបទពិសោធវិញ អ្នកទាំងពីរជំនាញវ៉ៃឈរសាហាវដូចគ្នា។ កីឡាករ Andrade មានបទពិសោធមួយថៃ ខណៈ Pacatiw លេចធ្លោខ្លាំងជំនាញវូសូ។ ដូច្នេះគូនេះចង់មិនចង់ដឹងតែកក្រើកសង្វៀនហើយ។

ទី៤៖ ជំនួបឃីកបុកសីងរស់រវើក

បន្ទាប់ពីធ្លាក់ចេញពីការប្រកួតកម្មវិធីខ្សែក្រវាត់ពិភពលោក ONE Featherweight Kickboxing World Grand Prix ក្នុងវគ្គ៨នាក់ដំបូង ឥឡូវនេះកីឡាករអាល្លឺម៉ង់ Eniko Kehl និងកីឡាករតួកគី Tayfun Ozcan បានណាត់ជួបគ្នាឡើងសង្វៀនថ្ងៃសុក្រនេះ ហើយអ្នកឈ្នះនឹងក្លាយជាផ្កាយគ្រោះទៅគំរាមម្ចាស់ខ្សែក្រវាត់នាពេលខាងមុខ។

ចាំថា Kehl បានចាញ់កីឡាករ Chingizw Allazov ខណៈ Ozcan បានចាញ់កីឡាករថៃ Sitthichai ក្នុងកម្មវិធីខ្សែក្រវាត់ខាងលើដូចគ្នា។ ប៉ុន្តែអ្នកទាំងពីរមានមហិច្ឆតាសំដៅទៅរកខ្សែក្រវាត់ពិភពលោកដូចគ្នា៕

The post ហេតុផលសំខាន់៤គួរទស្សនាការប្រកួត ONE: FULL CIRCLE ថ្ងៃសុក្រនេះ appeared first on Kampuchea Thmey Daily.

Jonathan Haggerty និយាយអំពីជំនួបរវាង Demetrious Johnson និង Rodtang Jitmuangnon

Kang Tola — Tue, 22 Feb 2022 10:23:00 +0000

កីឡាករចក្រភពអង់គ្លេស Jonathan Haggerty ដែលជាអតីតម្ចាស់ខ្សែក្រវាត់មួយថៃ ONE Flyweight បានសម្ដែងមតិជុំវិញបទបញ្ជាពិសេសនៃការប្រកួតរវាង Demetrious Johnson និង Rodtang Jitmuangnon នៅព្រឹត្តិការណ៍ ONE X ខាងមុខ។ ការប្រកួតរវាង Rodtang និង DJ ធ្វើឡើង ៤ ទឹកក្នុងនោះទឹកទី១ ប្រកួតមួយថៃ, ទឹកទី២គុនចម្រុះ, ទឹកទី៣មួយថៃ និង ទឹកទី៤គុនចម្រុះវិញ។

កីឡាកររហស្សនាម “The General” ជឿជាក់ថា វាជាការផ្ដល់ឲ្យវីរបុរសគុនចម្រុះ នូវផលលំបាកជាងតារាជួរមុខរបស់ថៃ។ អតីតម្ចាស់ខ្សែក្រវាត់មួយថៃទម្ងន់ Flyweight បានបញ្ចេញមតិថា៖«ខ្ញុំគិតថាការប្រកួតនោះ គឺកាន់តែលំបាកខ្លាំងសម្រាប់ Demetrious Johnson»។

Jonathan Haggerty ត្រៀមខ្លួនជាថ្មីដើម្បីជួប Rodtang ក្នុងការដណ្ដើមខ្សែក្រវាត់

បន្ទាប់ពីផ្ដួលកីឡាករ Mongkolpetch Petchyindee ឲ្យសន្លប់នៅព្រឹត្តិការណ៍ ONE: BAD BLOOD នាដើមខែ នេះ ជើងខ្លាំង Jonathan Haggerty បានត្រលប់ទៅហ្វឹកហាត់វិញហើយក្នុងករណីដែលអាចឡើងទៅដណ្ដើមខ្សែក្រវាត់មួយថៃ ONE Flyweight ពីមនុស្សដែក Rodtang នៅពេល Johnson ខកខានឡើងសង្វៀន ONE X ដោយប្រការណាមួយ។

កីឡាករមានមូលដ្ឋាននៅទីក្រុងឡុងដ៍ បានរៀបរាប់បែបនេះ៖ «ពេលណាខ្ញុំត្រលប់ទៅហ្វឹកហាត់វិញ ខ្ញុំហ្វឹកហាត់ស្នៀត MMA និង រង់ចាំការហៅឲ្យឡើងប្រកួតជាថ្មី។ ដូចដែលខ្ញុំបាននិយាយ ខ្ញុំគិតដោយស្មោះត្រង់ទៅថា ខ្ញុំអាចជាការប្រកួតលំបាកសម្រាប់ Demetrious Johnson។ ដូច្នេះមានតែរង់ចាំមើលទេថា មានអ្វីនឹងកើតឡើង»។

ខណៈដែល ក្បាច់ចំបាប់របស់គេមិនស្ថិតក្នុងលំដាប់ខ្ពស់ Haggerty មានអារម្មណ៍ថាល្អគ្រប់គ្រាន់ដើម្បីអាចទ្រាំទ្របាននៅទឹកទី ១ ឬ ទឹកទី២ ពេលនៅលើសង្វៀននិងអាចចេញស្នៀតដើម្បីឲ្យគូប្រកួតចុះចាញ់បាន ។

Haggerty គូសបញ្ជាក់៖«ខ្ញុំអាចធ្វើបាន។ អ្នកដឹងទេ ខ្ញុំត្រៀមរួចរាល់គ្រប់ពេលវេលា។ ខ្ញុំអាចព្យាយាមបញ្ចប់គូប្រកួតនៅទីនោះ។ ប៉ុន្តែ យើងត្រូវរង់ចាំមើលសិន។ ខ្ញុំបានហ្វឹកហាត់ [ជឺជិតស៊ូ]។ ពុករបស់ខ្ញុំបើកក្លិបមួយ។ រយៈពេលប៉ុន្មានឆ្នាំនេះ ខ្ញុំបានរីកធំធាត់ និង ហ្វឹកហាត់មូលដ្ឋានគ្រឹះជឺជិតស៊ូជាច្រើនឆ្នាំមកនេះ តែ មិនបានដាក់ចិត្តកាយមួយរយភាគរយទេ»។

គួរដឹងថា Johnson ត្រូវតតាំងនឹង Rodtang នៅសង្វៀន ONE X ដែលជាខួប ១០ ឆ្នាំនៃការរៀបចំព្រឹត្តិការណ៍ប្រកួត ONE Championship។ ការប្រកួតនឹងផ្សាយផ្ទាល់ចេញពី Singapore Indoor Stadium ប្រទេសសិង្ហបុរី នៅថ្ងៃសៅរ៍ទី ២៦ ខែ មីនា ខាងមុខ។ អ្នកគាំទ្រកំពុងរង់ចាំមើលអំពីការឡើងសង្វៀនគុនចម្រុះ របស់ Haggerty នាថ្ងៃណាមួយ៕

The post Jonathan Haggerty និយាយអំពីជំនួបរវាង Demetrious Johnson និង Rodtang Jitmuangnon appeared first on Kampuchea Thmey Daily.

នេះច្បាប់ប្រកួតកូនកាត់ពិសេសរវាង មនុស្សដែក Rodtang ប៉ះខ្លាចាស់ Johnson

Kang Tola — Thu, 27 Jan 2022 10:56:00 +0000

ជើងឯកគុនចម្រុះពិភពលោករបស់អាមេរិក Demetrious Johnson ត្រូវប្រឈមមុខនឹងជើងខ្លាំងមនុស្សដែកជើងឯកមួយថៃពិភពលោក Rodtang Jitmuangnon នាថ្ងៃសៅរ៍ ទី២៦ ខែមីនា ឆ្នាំ២០២២ ក្នុងព្រឹត្តិការណ៍ប្រកួត ONE X ដែលជាខួប១០ឆ្នាំនៃការបង្កើតស្ថាប័ន ONE។

សម្រាប់កេរ្តិ៍ឈ្មោះលើឆាកអន្តរជាតិវិញ Johnson ល្បីទូទាំងពិភពលោកច្រើនឆ្នាំមកហើយនៅពេលរូបគេជាជើងឯកពិភពលោកនៅស្ថាប័ន UFC ខណៈកីឡាករថៃទើបតែលេចធ្លោខ្លាំងនៅពេលក្លាយជាជើងឯកពិភពលោកនៅស្ថាប័ន ONE Championship នៅឆ្នាំ២០១៩។

ជំនួបជើងខ្លាំងខុសជំនាញគ្នាទាំងពីរត្រូវបានប្រសិទ្ធនាមថា«ការប្រកួតកូនកាន់» ពីព្រោះកីឡាករអាមេរិកមានជំនាញគុនចម្រុះ (MMA) ខណៈ Rodtang មានជំនាញមួយថៃ ប៉ុន្តែអ្នកទាំងពីរជាជើងឯកពិភពលោកដូចគ្នា។

ការប្រកួតកូនកាត់ពិសេសសម្រាប់អ្នកទាំងពីរនេះគឺត្រូវប្រើពេល៤ទឹកដែលលាយចម្រុះគ្នារវាងជំនាញគុនចម្រុះ និងមួយថៃ។ ការប្រកួតនៅទឹកទី១ និងទី៣ គឺជំនាញមួយថៃ ខណៈទឹកទី២ និងទី៤ប្រកួតជំនាញគុនចម្រុះ។

វានឹងក្លាយជាការសាកល្បងសមត្ថភាពដ៏តឹងតែងសម្រាប់ជើងឯកពិភពលោកទាំងពីរ ដោយសារពួកគេសុទ្ធតែមានឆន្ទៈផ្លាស់ប្តូរជំនាញដូចគ្នា បន្ទាប់ពួកគេទទួលបានជោគជ័យលើអាជីពរៀងៗខ្លួន។

ជើងខ្លាំងរហស្សនាម«មនុស្សដែក» Rodtang ដែលមានប្រវត្តិប្រកួតមួយថៃឈ្នះ២៦៧ដងចង់ចូលប្រឡូកក្នុងអាជីពប្រដាល់គុនចម្រុះ និងកំណត់គោលដៅក្លាយជាជើងឯកគុនចម្រុះពិភពលោក។ ជាមួយគ្នានេះ វីរបុរសអាមេរិក Johnson ហាក់ដូចឆ្អែតឆ្អន់នឹងអាជីពគុនចម្រុះរបស់ខ្លួនហើយ បន្ទាប់ពីចូលប្រឡូកតាំងពីឆ្នាំ២០០៧ ហើយក៏ឈ្នះជើងឯកពិភពលោកជាច្រើនឆ្នាំដែរ។

បើនិយាយពីសមត្ថភាពវិញ អ្នកគាំទ្រដឹងច្បាស់ហើយថា ខ្លាចាស់អាមេរិកពូកែក្បាច់ក្រោមណាស់។ រូបគេរាល់ពេលអោបរឹតនៅលើក្តារសង្វៀនគឺមានចលនាលឿនរមូលស្ទើរដូចពស់ទៅហើយ។ ចំណែកជើងខ្លាំងថៃត្រូវបានគេស្គាល់ច្បាស់គឺមុខរឹងដូចថ្ម កណ្តាប់ដៃវ៉ៃសន្ធាប់ដូចម៉ាស៊ីន និងទឹកចិត្តក្លាហានមុះមុតខ្លាំងណាស់។

ជារួម Rodtang និង Johnson មានឱកាសយកឈ្នះរៀងៗខ្លួននៅពេលចូលទឹកជំនាញរបស់ខ្លួន ដូច្នេះជំនួបនេះមិនមែនជាការឡើងសម្តែងនោះទេ ហើយនឹងទទួលបានការចាប់អារម្មណ៍ខ្លាំងពីអ្នកគាំទ្រទូទាំងពិភពលោក៕

ការប្រកួត៤ទឹក

• ទឹកទី១៖ ប្រកួតមួយថៃ

• ទឹកទី២៖ ប្រកួតគុនចម្រុះ

• ទឹកទី៣៖ ប្រកួតមួយថៃ

• ទឹកទី៤៖ ប្រកួតគុនចម្រុះ៕

The post នេះច្បាប់ប្រកួតកូនកាត់ពិសេសរវាង មនុស្សដែក Rodtang ប៉ះខ្លាចាស់ Johnson appeared first on Kampuchea Thmey Daily.

រឿងរ៉ាវ ៣ សំខាន់ៗ ដែលត្រូវទស្សនាកម្មវិធី ONE: ONLY THE BRAVE នាថ្ងៃសុក្រនេះ

Kang Tola — Wed, 26 Jan 2022 15:19:08 +0000

ONE: ONLY THE BRAVE គឺជាព្រឹត្តិការណ៍ប្រកួតទី២នៅឆ្នាំ២០២២ នេះ ដែលនឹងធ្វើឲ្យរំជួលចិត្ត នៅកីឡដ្ឋាន Singapore Indoor Stadium អមដោយការប្រកួតឃីកបុកសីង និង គុនចម្រុះគួរឲ្យចាប់អារម្មណ៍។ មុនដល់ព្រឹត្តិការណ៍ប្រកួតនាថ្ងៃសុក្រទី ២៨ ខែ មករា នេះ សូមចាប់អារម្មណ៍លើ ៣រឿងសំខាន់ៗដែលគួរឲ្យចាប់អារម្មណ៍ដូចខាងក្រោម៖

#1 ការប្រកួតឃីកបុកសីង Grand Prix វគ្គពាក់កណ្ដាលផ្ដាច់ព្រ័ត្រពីរគូ

នេះជាកម្មវិធីដ៏ធំមួយដែលមានជើងខ្លាំង ៤ រូបស្វែងរកកៅអីទៅកាន់វគ្គផ្ដាច់ព្រ័ត្រកម្មវិធី ONE Featherweight Kickboxing World Grand Prix Championship។

តារាឃីកបុកសីងលំដាប់លេខ៣សញ្ជាតិថៃ Sitthichai “Killer Kid” Sitsongpeenong ត្រូវតតាំងនឹង Davit Kiria ក្នុងនាមជាគូឯក។

Sitthichai មានបទពិសោធន៍ច្រើន និងឈ្នះជើងឯកជាច្រើនក្នុងអាជីព ខណៈដែល Kiria មានសមត្ថភាពអាចផ្ដួលកីឡាកររូបណាក៏បាន។ ក្នុងការប្រកួតវគ្គពាក់កណ្ដាលផ្ដាច់ព្រ័ត្រដូចគ្នាក្នុងកម្មវិធី Grand Prix កីឡាករថៃ Smokin’ Jo Nattawut ហក់ចូលជំនួសកីឡាករ Marat Grigorian។ អ្នកលេងកណ្ដាប់ដៃថៃរូបនេះត្រូវតតាំងនឹងកីឡាករលំដាប់លេខ៥ Chingiz “Chinga” Allazov ក្នុងនាមគូឯករង ។

គួរដឹងថា Allazov បានផ្ដួល Samy “AK47” Sana ដែលឡើងវគ្គពាក់កណ្ដាលផ្ដាច់ព្រ័ត្រកាលឆ្នាំ ២០១៩ គឺជាការគំរាមកំហែងដ៏ខ្លាំងមួយ។ តែ Nattawut មានកណ្ដាប់ដៃដែលមិននឹកស្មានដល់។ តើកីឡាកររូបណា នឹងឡើងទៅកាន់វគ្គផ្ដាច់ព្រ័ត្រ?

#2 អ្នកជំនាញកណ្ដាប់ដៃបញ្ចប់គូប្រកួត

Tang Kai និង “The Fighting God” Kim Jae Woong សុទ្ធតែជឿថា គេមានជំនាញប្រយុទ្ធដើម្បីឈ្នះការប្រកួតដូចគ្នា ជាពិសេសការប្រើជំហរប្រយុទ្ធ និងបម្លាស់ទីឈរបានល្អ។ ម្នាក់ៗចង់ឡើងទៅដណ្ដើមខ្សែក្រវាត់ ONE Featherweight World Title។ ម្ចាស់ខ្សែក្រវាត់បច្ចុប្បន្ន គឺ Thanh Le ដែលនឹងត្រូវឡើងការពារខ្សែក្រវាត់របស់ខ្លួនទល់នឹង Garry “The Lion Killer” Tonon នៅក្នុងឆ្នាំនេះ។

Tang ដែលស្ថិតនៅលំដាប់ថ្នាក់លេខ៤ បានឈ្នះ ៨ លើកជាប់គ្នា ក្នុងនោះឈ្នះ៦ដងដោយសន្លប់។ ចំណែកគូប្រជែងស្ថិតនៅលំដាប់ថ្នាក់លេខ១ Kim បានឈ្នះ ៣ ដង និងចាញ់ ១ ដង នៅសង្វៀន ONE ក្នុងនោះផ្ដួលគូប្រកួតឲ្យសន្លប់ ៣ ដង។

បន្ទាប់ពីបញ្ចប់អតីតម្ចាស់ខ្សែក្រវាត់ទម្ងន់ featherweight កីឡាករ Martin “The Situ-Asian” Nguyen នាប្រកួតចុងក្រោយ “The Fighting God” បានបង្ហាញថាគេជាបេក្ខភាពឡើងប្រជែងជើងឯកពិភពលោកនាថ្ងៃអនាគត។ ពេលនេះ គេទទួលសំណើប្រកួតតទល់នឹង Tang ដែលត្រូវបានចាត់ទុកថាការប្រកួតកម្ដៅសាច់ដុំ។

យ៉ាងណាក្ដី កីឡាករចិននឹងបំផ្លាញ់ផែនការរបស់ Kim ព្រោះថាមិនសម្ដែងការគោរពដល់ខ្លួន ដោយបោះពាក្យសម្ដីថាជាការប្រកួតកម្ដៅសាច់ដុំមុនទៅដណ្ដើមខ្សែក្រវាត់។

#3 តារាទម្ងន់ Strawweight មិនអាចមើលរំលងបាន

នេះជាការប្រកួតកម្រិតកំពូលទម្ងន់ strawweight ដែលកំពុងព្យាយាមបង្កើនសមត្ថភាពឈានទៅដណ្ដើមខ្សែក្រវាត់ពិភពលោក។ កីឡាករលំដាប់ទី៣ Jarred “The Monkey God” Brooks បានស្គាល់កីឡាករលំដាប់ទី៤ Hiroba Minowa ដែលមិនអាចមើលស្រាលបានក្នុងទម្ងន់នេះ។ ប៉ុន្តែ កីឡាករអាមេរិកថាមានវិធីដើម្បីឲ្យកីឡាករជប៉ុនចុះចាញ់បាន។

Minowa ត្រលប់មកវិញនឹងធ្វើឲ្យបានល្អបំផុត។ កីឡាករវ័យ ២៣ ឆ្នាំ ក៏ជឿជាក់ថា គេអាចយកឈ្នះ “The Monkey God” បានដែរដើម្បីស្វែងរកលទ្ធផលល្អឆ្ពោះទៅកម្រិតបន្ទាប់។ កីឡាករកំពុងរះទាំងពីរកាន់តែខិតជិតទៅដណ្ដើមខ្សែក្រវាត់ទម្ងន់ featherweight ពី Joshua “The Passion” Pacio បន្ទាប់ពីការប្រកួតយប់ថ្ងៃសុក្រនេះ៕

The post រឿងរ៉ាវ ៣ សំខាន់ៗ ដែលត្រូវទស្សនាកម្មវិធី ONE: ONLY THE BRAVE នាថ្ងៃសុក្រនេះ appeared first on Kampuchea Thmey Daily.

ជើងខ្លាំងឃីកបុកសីងថៃ Sitthichai រំពឹងថានឹងយកឈ្នះ Kiria ម្ដងទៀតនៅវគ្គពាក់កណ្ដាលផ្ដាច់ព្រ័ត្រ World Gran Prix

Kang Tola — Thu, 20 Jan 2022 11:12:00 +0000

Sitthichai “Killer Kid” Sitsongpeenong យល់ថាការឈ្នះជើងឯក ONE Featherweight Kickboxing World Grand Prix គឺជាស្នាដៃធំបំផុតមួយក្នុងអាជីពរបស់ខ្លួន។ បន្ទាប់ពីផ្ដួល Tayfun “Turbine” Ozcan ក្នុងការប្រកួត ៣ ទឹកដ៏ល្អមើល កីឡាករថៃនឹងជួប Davit Kiria ក្នុងការប្រកួតវគ្គពាក់កណ្ដាលផ្ដាច់ព្រ័ត្រនៅព្រឹត្តិការណ៍ ONE: ONLY THE BRAVE នាថ្ងៃសុក្រទី ២៨ ខែ មករា នេះ។

កីឡាករលំដាប់ទី៣ នឹងផ្ដល់ភាពល្អឥតខ្ពោះពេលជួប កីឡាករអន្តរជាតិហ្សកហ្សី ដើម្បីឆក់ឱកាសទៅវគ្គផ្ដាច់ព្រ័ត្រ។ បែបណាក្ដី កីឡាកររហស្សនាម “Killer Kid” បានយកឈ្នះជើងខ្លាំង Kiria ពីរដងរួចមកហើយ ហើយឥឡូវនេះ គេរំពឹងថានឹងឈ្នះលើកទី ៣ ទោះបីគូប្រជែងចាស់មានការអភិវឌ្ឃខ្លួនគួរឲ្យកត់សម្គាល់នៅលើសង្វៀនក៏ដោយ។

មុនឡើងជួបគ្នានៅកីឡដ្ឋាន Singapore Indoor Stadium ក្នុងនាមគូឯករង ឯប្រទេសសិង្ហបុរី Sitthichai បានបង្ហើបអំពីការឡើងផ្ដួល Kiria នៅសង្វៀន World Grand Prix បែបនេះ ៖«នេះជាលើកទី៣ដែលជួប Kiria ។ ខ្ញុំនៅតែមានអារម្មណ៍ថាដូចកាលជួបលើកមុនអីចឹងទោះរូបគេរីកចម្រើនប៉ុណ្ណាក្ដី។ ជំនាញរបស់គេពិតជាអភិវឌ្ឍខ្លួនបានល្អមែន។ គេឈ្នះការប្រកួតដោយសន្លប់កាលប្រកួតចុងក្រោយ។ កណ្ដាប់ដៃរបស់គេធ្ងន់ និងរាងកាយកាន់តែល្អប្រសើរ។ ខ្ញុំរំភើបក្នុងការជួបរូបគេជាថ្មីទៀត»។

Sitthichai សង្កត់ធ្ងន់ថា ៖«ខ្ញុំនឹងឈ្នះលើកទី៣ មិនខាន។ ការលើកទឹកចិត្តរបស់ខ្ញុំ គឺចង់ឈ្នះជើងឯក។ ខ្ញុំចង់ក្លាយជាជើងឯក World Grand Prix Champion ឆ្នាំនេះ។ ព្រោះវាជាព្រឹត្តិការណ៍ធំ។ វាពិតជាមោទកភាព និង កិត្តិយសក្នុងអាជីពរបស់ខ្ញុំ។ លើសពីនេះទៀត ខ្ញុំកាន់តែចាស់ហើយ ខ្ញុំចង់ឈ្នះជើងឯកលំដាប់ពិភពលោកម្ដងក្នុងអាជីព។ ខ្ញុំគិតថា World Grand Prix គឺធំបំផុតក្នុងអាជីពរបស់ខ្ញុំ»។

នៅថ្ងៃជាមួយគ្នានោះដែរ ការប្រកួតវគ្គពាក់កណ្ដាលផ្ដាច់ព្រ័ត្រ FEATHERWEIGHT KICKBOXING GRAND PRIX សម្រាប់គូឯកគឺ MARAT GRIGORIAN ត្រូវតតាំងនឹង CHINGIZ ALLAZOV។ តើកីឡាករពីរូបណាឡើងដល់វគ្គផ្ដាច់ព្រ័ត្រក្នុងកម្មវិធីនេះ?៕

The post ជើងខ្លាំងឃីកបុកសីងថៃ Sitthichai រំពឹងថានឹងយកឈ្នះ Kiria ម្ដងទៀតនៅវគ្គពាក់កណ្ដាលផ្ដាច់ព្រ័ត្រ World Gran Prix appeared first on Kampuchea Thmey Daily.

ONE Champion Archives - Kampuchea Thmey Daily

Demetrious Johnson ប្រាប់អ្នកគាំទ្រថា ជាឱកាសដែលឃើញរូបគេបញ្ចប់ Rodtang ដោយស្នៀតឃ្លេនៅលើសង្វៀន

ចាន់ រតនា ទទួលស្គាល់មូលហេតុធ្វើឲ្យចាញ់ Eko Roni យ៉ាងឆាប់រហ័ស

វ៉ៃ​ល្អ De Ridder និង Roman ទទួល​បាន​ប្រាក់​រង្វាន់​ទឹកចិត្ត​សរុប​១០​ម៉ឺន​ដុល្លារ

ហេតុផល​សំខាន់​៤​គួរ​ទស្សនា​ការប្រកួត ONE: FULL CIRCLE ថ្ងៃ​សុក្រ​នេះ

Jonathan Haggerty និយាយ​អំពី​ជំនួប​រវាង Demetrious Johnson និង Rodtang Jitmuangnon

នេះ​ច្បាប់​ប្រកួត​កូនកាត់​ពិសេស​រវាង មនុស្ស​ដែក Rodtang ប៉ះ​ខ្លា​ចាស់ Johnson