Rodrigo Duterte Archives - Kampuchea Thmey Daily

មេដឹកនាំអាស៊ីអាគ្នេយ៍២រូបប្រឈមច្បាប់ឧក្រិដ្ឋកម្មអន្តរជាតិ ក្រោយ ICC ចេញដីកាស្វែងរកចាប់ខ្លួន មីនអ៊ុងលាំង

Rann Reuy — Thu, 28 Nov 2024 01:03:56 +0000

មេដឹកនាំអាស៊ីអាគ្មេយ៍ពីរូបកំពុងស្ថិតក្រោមការស៊ើបអង្កេតនិងប្រឈមដីកាស្វែងរកការចាប់ខ្លួនក្នុងបទចោទប្រកាន់ឧក្រិដ្ឋកម្មប្រឆាំងមនុស្សជាតិ គឺមានមេដឹកនាំយោធាមីយ៉ាន់ម៉ាបច្ចុប្បន្ន និងអតីតប្រធានាធិបតីហ្វីលីពីនដែលសម្លាប់មនុស្សជាង៦០០០នាក់ក្នុងសង្គ្រាមប្រឆំាងគ្រឿងញៀនដ៏កក្រើកប្រព្រឹត្តនៅឆ្នាំ២០១៦ដូចគ្នា។

អតីតមេបញ្ជាការមីយ៉ាន់ម៉ា មីន អ៊ុងលាំង (ឆ្វេង) និង អតីតប្រធានាធិបតី ហ្វីលីពីន Rodrigo Duderte ចាប់ដៃគ្នា។ online

សំណុំរឿងអំពីហិង្សាប្រឆាំងជនជាតិភាគតិចរ៉ូហ៊ីងយ៉ានៅមីយ៉ាន់ម៉ាកាលឆ្នាំ២០១៦ដល់ឆ្នាំ២០១៧ ក្នុងអាណត្តិដឹកនាំរបស់លោកស្រី អ៊ុងសាន ស៊ូជី (Aung San Suu Kyi) ដ៏មានប្រជាប្រិយភាព បាននាំទៅដល់ការចោទប្រកាន់ចុងក្រោយនៅក្នុងតំបន់អាស៊ីអាគ្នេយ៍ ប្រឆាំងឧត្តមសេនីយ មីន អ៊ុងលាំង (Min Aung Hlaing) ដែលជាមេបញ្ជាការយោធាក្នុងកាលនោះ។

លោក មីន អ៊ុងលាំង ដែលបានដណ្តើមអំណាចតាមរយៈការធ្វើរដ្ឋប្រហារកាលថ្ងៃទី១ខែកុម្ភៈឆ្នាំ២០២១ ដោយទម្លាក់មេដឹកនាំជាប់ឆ្នោតលោកស្រី អ៊ុងសាន ស៊ូជី ត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិចំពោះការនិរទេស និងធ្វើទុក្ខបុកម្នេញលើជនជាតិរ៉ូហ៊ីងយ៉ា។

ប្រធានរដ្ឋអាជ្ញារបស់តុលាការឧក្រិដ្ឋកម្មអន្តរជាតិ (ICC) ប្រចាំទីក្រុងឡាអេប្រទេសហូឡង់ កាលពីថ្ងៃពុធ បានស្នើសុំចៅក្រមឱ្យចេញដីកាចាប់ខ្លួនមេដឹកនាំរបបយោធាមីយ៉ាន់ម៉ា លោក មីន អ៊ុងលាំង ពីបទឧក្រិដ្ឋកម្មមនុស្សជាតិប្រឆាំងនឹងជនជាតិភាគតិចមូស្លីមរ៉ូហ៊ីងយ៉ារបស់ប្រទេសនេះ។

ក្នុងសេចក្តីថ្លែងការណ៍របស់ខ្លួន រដ្ឋអាជ្ញារបស់តុលាការICC លោក Karim Khan បាននិយាយថា លោកមានបំណងស្នើសុំដីកាបន្ថែមសម្រាប់មេដឹកនាំប្រទេសមីយ៉ាន់ម៉ាក្នុងពេលឆាប់ៗនេះ។

សេចក្តីថ្លែងការណ៍នោះសរសេរថា៖«ក្នុងការធ្វើបែបនេះ យើងនឹងធ្វើការតវ៉ារួមគ្នាជាមួយនឹងដៃគូរបស់យើងទាំងអស់ថា ជនជាតិរ៉ូហ៊ីងយ៉ាមិនត្រូវបនបំភ្លេចចោលឡើយ ថាពួកគេ ដូចជាមនុស្សទាំងអស់នៅជុំវិញពិភពលោក មានសិទ្ធិទទួលបានការការពារពីច្បាប់នេះ»។

យោងការផ្សាយរបស់សារព័ត៌មាន AP មនុស្សជិតមួយលាននាក់ត្រូវបានបង្ខំឱ្យនិរទេសខ្លួនចេញពីមីយ៉ាន់ម៉ាចូលទៅក្នុងប្រទេសបង់ក្លាដែសដែលនៅជិតខាងដើម្បីគេចចេញពីអ្វីដែលហៅថាយុទ្ធនាការបោសសម្អាតជនជាតិភាគតិចដែលពាក់ព័ន្ធនឹងការរំលោភដ៏ច្រើន ការសម្លាប់ និងការដុតផ្ទះ។

ក្នុងសេចក្តីថ្លែងការណ៍របស់ការិយាល័យរដ្ឋអាជ្ញា Karim Khan តុលាការ ICC ចាប់ផ្តើមស៊ើបអង្កេតតាំងពីថ្ងៃទី១៤ខែវិច្ឆិកាឆ្នាំ២០១៩ លើករណីសង្ស័យឧក្រិដ្ឋកម្មដែលប្រព្រឹត្តិចន្លោះឆ្នាំ២០១៦ និង២០១៧។ កាលនោះ លោក មីន អ៊ុងលាំង ជាអគ្គមេបញ្ជាការកងទ័ព ហើយការស៊ើបដ៏ទូលំទូលាយ ឯករាជ្យ និងមិនលម្អៀង បានធ្វើឡើងដោយការិយាយល័យរដ្ឋអាជ្ញាមុនឈានទៅចោទប្រកាន់នេះ។

ក្រោយការចេញដីកាស្វែងរកការចាប់ខ្លួនលោក មីន អ៊ុងលាំង គេសង្កេតឃើញមានក្រុមរដ្ឋាភិបលស្រមោល និងអង្គការនយោបាយ អង្គការសង្គមស៊ីវិលនានាដែលធ្វើការប្រឆាំងរដ្ឋាភិបាលយោធាបច្ចុប្បន្ន នៅជុំវិញពិភពលោក បានចេញមកសាទរ និងទាមទារការទទួលខុសត្រូវ។

ដោយមិនទាន់រាប់បញ្ចូលអំពើហិង្សានយោបាយក្រោយរដ្ឋប្រហារឆ្នាំ២០២១ ដែលរហូតមកដល់ពេលនេះ បានសម្លាប់មនុស្សជាង៦៣០០នាក់ ការចាប់ខ្លួនអ្នកតវ៉ារាប់ម៉ឺននាក់ និង បណ្តាលឲ្យប្រទេសមីយ៉ាន់ម៉ាធ្លាក់ទៅក្នុងសង្គ្រាមស៊ីវិលដ៏ជ្រៅ។

ក្នុងពីរឆ្នាំចុងក្រោយនេះ រដ្ឋអាជ្ញានៃតុលាការ ICC ចេញដីកាស្វែងរកចាប់ខ្លួនមេដឹកនាំសំខាន់ៗ ដូចជា លោក ប្រធានាធិបតីរុស្ស៊ី លោក វ៉្លាឌីមៀ ពូទីន ដោយចេញប្រកាន់បទល្មើសប្រឆាំងមនុស្សជាតិប្រព្រឹត្តិនៅអ៊ុយក្រែន និង ការស៊ើបអង្កេតលើអតីតប្រធានាធិបតីហ្វីលីពីន លោក Rodrigo Duterte ចំពោះការជាប់សង្ស័យនៃការសម្លាប់មនុស្សប្រមាណ៦០០០នាក់ក្នុងសង្គ្រាមប្រឆាំងគ្រឿងញៀនក្នុងអាណត្តិរបស់លោកចន្លោះឆ្នាំ ២០១៦ ដល់២០២២។

លោក Rodrigo Duterte នៅឆ្នាំ២០១៩ បានដកប្រទេសហ្វីលីពីន ចេញពីតុលាការឧក្រិដ្ឋកម្មអន្តរជាតិ ប៉ុន្តែមិនបានរារាំងដល់ការស៊ើបអង្កេតរបស់រដ្ឋអាជ្ញាICC ដែលដីកាចាប់ខ្លួនលោកត្រូវបានគេជជែកយ៉ាងទូលំទូលាយថា អាចនឹងត្រូវចេញក្នុងពេលឆាប់ៗនេះ៕

ដោយ រ៉ាន់ រើយ

The post មេដឹកនាំអាស៊ីអាគ្នេយ៍២រូបប្រឈមច្បាប់ឧក្រិដ្ឋកម្មអន្តរជាតិ ក្រោយ ICC ចេញដីកាស្វែងរកចាប់ខ្លួន មីនអ៊ុងលាំង appeared first on Kampuchea Thmey Daily.

លោក Duterte គំរាមលាតត្រដាង Pacquiao រាល់ថ្ងៃជាមនុស្សកុហក បើមិនបង្ហាញការពិត

chean virakbot — Tue, 29 Jun 2021 02:58:08 +0000

លោកប្រធានាធិបតីហ្វីលីពីន Rodrigo Duterte នៅថ្ងៃចន្ទ ទី២៨ ខែមិថុនា បាននិយាយថា កំពូលអ្នកប្រដាល់ Manny Pacquiao គួរដាក់ឈ្មោះការិយាល័យរដ្ឋាភិបាលអំពើពុករលួយដើម្បីបញ្ជាក់ថា សមាជិកសភា និងជាជើងឯកពិភពលោកនេះមិនត្រឹមតែប្រឡូកនយោបាយមុនពេលបោះឆ្នោតជ្រើសរើសប្រធានាធិបតីនៅឆ្នាំក្រោយប៉ុណ្ណោះទេ។

ការលើកឡើងរបស់លោកប្រធានាធិបតីគឺជារឿងថ្មីសន្លាងមួយទៀតនៅក្នុងសង្គ្រាមពាក្យសំដីគួរឲ្យភ្ញាក់ផ្អើលរវាងលោក និង Pacquiao ដែលត្រួវបានគេមើលឃើញក្នុងចំណោមអ្នកគាំទ្រដ៏ខ្លាំងក្លាបំផុតរបស់លោក ហើយអាចជាអ្នកបន្តវេនសម្រាប់ប្រធានាធិបតីបន្ទាប់ នៅពេលលោកអស់អាណត្តិនៅខែមិថុនា ឆ្នាំ២០២២។

លោក Rodrigo Duterte

មេដឹកនាំហ្វីលីពីនរូបនេះបាននិយាយថា Pacquiao បានរិះគន់ពីអំពើពុករលួយនៅក្នុងរដ្ឋាភិបាលរបស់លោក និងបានគំរាមលាតត្រដាងកំពូលអ្នកប្រដាល់នេះជា«មនុស្សកុហក»។

លោក Duterte បានថ្លែងសុន្ទរកថាផ្សាយតាមទូរទស្សន៍ពេលយប់ថា ៖«ខ្ញុំមិននិយាយថា គ្មានអំពើពុករលួយទេ ដូច្នេះសូមបង្ហាញមក។ បើអ្នកមិនបង្ហាញទេនោះ ខ្ញុំនឹងលាតត្រដាងអ្នករាល់ថ្ងៃថាជាមនុស្សកុហក។ ខ្ញុំដឹងថា អ្នកមានវិធីគាំទ្រ»។

ការប្រើប្រាស់ពាក្យពេចន៍ខ្លាំងៗប្រឆាំងនឹង Pacquiao លោក Duterte បាននិយាយថា ប្រសិនបើគាត់មិនលាតត្រដាងអំពីអំពើពុករលួយទេ គាត់នឹងជាអ្នកនយោបាយលេងសើច និងសន្យាចាត់វិធានការលើមន្ត្រីណាដែលធ្វើខុស។

គេមិនទាន់ដឹងច្បាស់ទេថាតើមន្ត្រីណាដែលលោកកំពុងជំរុញឲ្យ Pacquiao លាតត្រដាង ឬមូលហេតុអ្វី។ Pacquiao មិនត្រូវបានគេមើលឃើញនិយាយជាសាធារណៈអំពីការចោទប្រកាន់ណាមួយពាក់ព័ន្ធនឹងអំពើពុករលួយកម្រិតខ្ពស់ទេក្នុងប៉ុន្មានថ្ងៃចុងក្រោយនេះ។

ជាមួយគ្នានេះ Pacquiao ប្រធានស្តីទីគណបក្សនយោបាយរបស់លោក Duterte មិនទាន់មានការឆ្លើយតបអ្វីឡើយ។

កំពូលអ្នកប្រដាល់ Manny Pacquiao

កំពូលអ្នកប្រដាល់ Pacquiao អាយុ៤២ឆ្នាំស្ថិតក្នុងចំណោមអ្នកគាំទ្រដ៏ស្មោះស្ម័គ្ររបស់លោក Duterte បានកំពុងគាំទ្រសង្គ្រាមបង្ហូរឈាមពាក់ព័ន្ធនឹងគ្រឿងញៀន និងស្នើឲ្យមានទោសប្រហារជីវិតឡើងវិញ។ ជើងឯកពិភពលោក៨ស្ថាប័នរូបនេះក៏មិនទាន់ប្រកាសពីការប្រជែងបតំណែងប្រធានាធិបតីដែរ។

កាលពីដើមខែនេះ លោក Duterte បានរិះគន់ពីចំណេះដឹងគោលនយោបាយការបរទេសរាក់របស់ Pacquiao បន្ទាប់ពីសមាជិកសភារូបនេះនិយាយថា គាត់បានរកឃើញពីគោលជំហររបស់មេដឹកនាំខ្លួនអំពីសមុទ្រចិនខាងត្បូងគឺខ្វះខាត និងខកចិត្ត។

លោក Duterte នៅតែមានប្រជាប្រិយភាពខ្លាំងក្នុងប្រទេសហ្វីលីពីន។ សម្ព័ន្ធភាពនយោបាយកំពុងជំរុញលោកឲ្យបន្តតំណែងជាអនុប្រធានាធិបតី នៅពេលអាណត្តិរបស់លោកត្រូវបានបញ្ចប់។ កូនស្រីរបស់លោកដែលជាជំនួយការក៏ត្រូវបានគេមើលឃើញក្នុងចំណោមអ្នកដែលអាចបន្តវេនពីលោកដែរ៕

ប្រែសម្រួល៖ វីរបុត្រ
ប្រភព៖ Reuters

The post លោក Duterte គំរាមលាតត្រដាង Pacquiao រាល់ថ្ងៃជាមនុស្សកុហក បើមិនបង្ហាញការពិត appeared first on Kampuchea Thmey Daily.

អ្នកនាំពាក្យរបស់លោក Duterte តេស្តវិជ្ជមានកូវីដ ១៩

Sok Chivon — Mon, 15 Mar 2021 07:31:31 +0000

អ្នកនាំពាក្យប្រធានាធិបតីហ្វីលីពីនលោក Harry Roque បានប្រកាសនៅថ្ងៃចន្ទនេះថា លោកបានធ្វើតេស្តវិជ្ជមានជំងឺកូវីដ ១៩ ។

នៅក្នុងសន្និសិតកាសែតតាមទូរទស្សន៍លោក Roque បាននិយាយថា គាត់បានធ្វើតេស្តវិជ្ជមានជំងឺកូវីដ ១៩ កាលពីថ្ងៃអាទិត្យ ហើយបានផ្ដាច់ខ្លួននៅដាច់ដោយឡែកដើម្បីត្រៀមជួបជាមួយលោកប្រធានាធិបតី Rodrigo Duterte នៅថ្ងៃចន្ទនេះ ហើយលោកក៏បានជំរុញឲ្យអ្នកដែលមានទំនាក់ទំនងជិតស្និទ្ធជាមួយគាត់ត្រូវធ្វើចត្តាឡីស័កផងដែរ ។

លោក Roque គឺជាសមាជិកទី ៥ ហើយនៃជួរគណៈរដ្ឋមន្រ្តីរបស់លោក Duterte ដែលបានឆ្លងជំងឺកូវីដ ១៩ ។ កាលពីឆ្នាំមុនរដ្ឋមន្ត្រីក្រសួងពាណិជ្ជកម្មលោក Ramon Lopez រដ្ឋមន្ត្រីក្រសួងសាធារណការលោក Mark Villar រដ្ឋមន្ត្រីក្រសួងអប់រំលោក Mark Villar លេខាធិការអប់រំលោក Leonor Briones និងរដ្ឋមន្ត្រីក្រសួងមហាផ្ទៃលោក Eduardo Ano ក៏បានឆ្លងវីរុសនេះផងដែរ ហើយបច្ចុប្បន្នមន្ត្រីទាំងបួននាក់បានជាសះស្បើយហើយ ។

បច្ចុប្បន្នប្រទេសហ្វីលីពីនកំពុងតែមានការកើនឡើងនៃករណីឆ្លងជំងឺកូវីដ ១៩ ក្នុងខែនេះពោលប្រហាក់ប្រហែលនឹងខែកក្កដា និងសីហា ឆ្នាំ ២០២០ ខណៈករណីប្រចាំថ្ងៃបានឡើងដល់កម្រិតកំពូល ។ ប្រទេសហ្វីលីពីនបានរាយការណ៍ករណីឆ្លងថ្មីចំនួន ៥,០០០ ករណីកាលពីថ្ងៃសៅរ៍ដែលជាករណីឆ្លងប្រចាំថ្ងៃខ្ពស់បំផុតចាប់តាំងពីខែសីហាឆ្នាំមុន ។

គួរបញ្ជាក់ថា គិតត្រឹមពេលនេះប្រទេសហ្វីលីពីនមានករណីឆ្លងជំងឺកូវីដ ១៩ ចំនួន ៦២១,៤៩៨ ករណី និងមានអ្នកស្លាប់ចំនួន ១២,៨២៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ថ្ងៃនេះឆ្នាំមុន ហ្វីលីពីនចាត់វិធានការប្រឆាំងជំងឺកូវីដ ១៩ ក្រោយមានអ្នកឆ្លងជាបន្តបន្ទាប់

ចុចអាន ៖ មួយថ្ងៃ ហ្វីលីពីន រកឃើញអ្នកឆ្លងកូវីដ៣,៧៤៩ករណី មិនធ្លាប់មានសោះក្នុងរយៈពេលជិត៦ខែ

The post អ្នកនាំពាក្យរបស់លោក Duterte តេស្តវិជ្ជមានកូវីដ ១៩ appeared first on Kampuchea Thmey Daily.

លោក Duterte ឲ្យអាមេរិកបង់ប្រាក់ដើម្បីរក្សាកតិកាសញ្ញាយោធាជាមួយហ្វីលីពីន

Sok Chivon — Sat, 13 Feb 2021 05:14:11 +0000

ប្រធានាធិបតីហ្វីលីពីនលោក Rodrigo Duterte បាននិយាយថា លោកចង់ឲ្យសហរដ្ឋអាមេរិកបង់ប្រាក់ដើម្បីរក្សាកតិកាសញ្ញាដែលមានអាយុកាលពីរទសវត្សរ៍ដែលសម្របសម្រួលសមយុទ្ធយោធារួមគ្នា ហើយជាកិច្ចព្រមព្រៀងមួយដែលលោកបានព្យាយាមលុបចោលកាលពីឆ្នាំមុន ។

លោក Duterte បាននិយាយកាលពីថ្ងៃសុក្រអំពីកិច្ចព្រមព្រៀង Visiting Forces Agreement ឬហៅកាត់ថា VFA ជាមួយសហរដ្ឋអាមេរិកថា “ពួកគេត្រូវបង់ប្រាក់ ។ វាជាចំណែកនៃការទទួលខុសត្រូវរួមគ្នា ប៉ុន្តែចំណែកនៃការទទួលខុសត្រូវរបស់អ្នកមិនត្រូវធ្វើឡើងដោយទទេរនោះទេ” ។

លោកបាននិយាយនៅក្នុងសុន្ទរកថាមួយទៅកាន់ទាហានហ្វីលីពីនដោយសំដៅទៅលើជម្លោះណាមួយដែលអាចកើនឡើងនៅក្នុងសមុទ្រចិនខាងត្បូងថា “ពីព្រោះបន្ទាប់ពីសង្គ្រាមផ្ទុះឡើងយើងទាំងអស់គ្នាត្រូវបង់ប្រាក់ ហើយគាត់មិនបាននិយាយថាគាត់ចង់បានអ្វីនោះទេ” ។

លោក Duterte បានធ្វើការកត់សម្គាល់បែបនេះនៅប៉ុន្មានថ្ងៃ បន្ទាប់ពីមន្រ្តីហ្វីលីពីន និងសហរដ្ឋអាមេរិកបានធ្វើការពិភាក្សាលើកិច្ចសហប្រតិបត្តិការសន្តិសុខ ខណៈរដ្ឋមន្រ្តីក្រសួងការពារជាតិលោក Delfin Lorenzana បាននិយាយថា លោកសង្ឃឹមថា សមយុទ្ធយោធារួមគ្នាជាមួយសហរដ្ឋអាមេរិកនឹងចាប់ផ្តើមឡើងវិញនៅរដូវក្តៅនេះ ។

កាលពីមួយឆ្នាំមុនលោក Duterte បានបញ្ចប់កិច្ចព្រមព្រៀងកតិកាសញ្ញាឆ្នាំ ១៩៩៨ ជាមួយសហរដ្ឋអាមេរិកមុនពេលងាកមកវិញនៅពីរបីខែក្រោយមក ។ ខណៈពេលដែលលោក Duterte តែងតែចោទសួរពីផលប្រយោជន៍នៃសម្ព័ន្ធមិត្តសហរដ្ឋអាមេរិក កងយោធាហ្វីលីពីនបានធ្វើការជាមួយសមភាគីអាមេរិកដើម្បីប្រឆាំងនឹងការទាមទារទឹកដីរបស់ទីក្រុងប៉េកាំងនៅសមុទ្រចិនខាងត្បូង ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg

ចុចអាន ៖ អាមេរិកនៅតែប្ដេជ្ញារំសាយកម្មវិធីអាវុធនុយក្លេអ៊ែរ និងមីស៊ីលផ្លោងរបស់កូរ៉េខាងជើង

ចុចអាន ៖ ក្រោយរកឃើញវីរុសកូរ៉ូណាបម្លែងខ្លួនប្រភេទថ្មី ប្រធានាធិបតីហ្វីលីពីនប្រាប់ក្មេងៗនៅផ្ទះមើលទូរទស្សន៍

The post លោក Duterte ឲ្យអាមេរិកបង់ប្រាក់ដើម្បីរក្សាកតិកាសញ្ញាយោធាជាមួយហ្វីលីពីន appeared first on Kampuchea Thmey Daily.

ទីបំផុត លោក Duterte ចេញមុខលូកដៃរឿងនារីអូតែស ហ្វីលីពីន

Sok Sovann — Sat, 09 Jan 2021 00:44:29 +0000

ប្រធានាធិបតីហ្វីលីពីនលោក Rodrigo Duterte បានប្តេជ្ញាថា នឹងផ្តល់យុត្តិធម៌ដល់នារីបម្រើការតាមយន្តហោះកញ្ញា Christine Dacera។

អ្នកនាំពាក្យប្រធានាធិបតី លោក Harry Roque បាននិយាយនៅក្នុងសន្និសីទសារព័ត៌មានមួយថា “ជាបឋម ការសន្យារបស់ប្រធានាធិបតីគឺថា យុត្តិធម៌នឹងមានសម្រាប់ក្រុមគ្រួសាររបស់ Dacera។ យើងនឹងដឹងការពិត”។

លោក Roque និយាយថា លោក Duterte នឹងមិនអនុញ្ញាតឲ្យឧក្រិដ្ឋជនរួចខ្លួនឡើយ ប្រសិនបើគ្រប់យ៉ាងត្រូវបានបង្ហាញនោះ ពួកគេមិនអាចរួចផុតពីទង្វើរបស់ពួកគេបានទេ។

កញ្ញា Dacera ត្រូវបានគេប្រទះឃើញដេកស្លាប់ ក្នុងអាងងូតទឹកនៅឯសណ្ឋាគារ Makati បន្ទាប់ពីពិធីជប់លៀង ជាមួយមិត្តភក្តិរបស់នាងនៅយប់ឆ្លងឆ្នាំ។

បីនាក់ក្នុងចំណោមអ្នកដែលស្ថិតក្នុងការឃុំឃាំងរបស់ប៉ូលិស ត្រូវបានដោះលែងកាលពីថ្ងៃពុធតាមបញ្ជារបស់រដ្ឋអាជ្ញាក្រុង Makati ដែលបានកត់សម្គាល់ថា ភស្តុតាងបន្ថែមទៀត គឺត្រូវការជាចាំបាច់ដើម្បីកំណត់ថា តើវាជាករណីរំលោភសេពសន្ថវៈពិតមែនឬក៏អត់៕

ប្រែសម្រួលដោយ៖ Vann Vann

ប្រភព៖ Filipino Times

ចុចអាន៖ នៅសុខៗ មេធាវីប្រាប់ឲ្យ Pacquiao ដករង្វាន់ដែលផ្តល់ជូនអ្នករកឃើញជនពាក់ព័ន្ធករណីស្លាប់នារីអូតែស

The post ទីបំផុត លោក Duterte ចេញមុខលូកដៃរឿងនារីអូតែស ហ្វីលីពីន appeared first on Kampuchea Thmey Daily.

លោក Duterte ហ៊ានលាលែងពីតំណែង បើមានភស្តុតាងបង្ហាញពីការសូកប៉ាន់របស់ខ្លួន តែគំរាមសម្លាប់អ្នកចោទប្រកាន់ខុស

Sok Chivon — Wed, 09 Dec 2020 02:51:16 +0000

ប្រធានាធិបតីហ្វីលីពីនលោក Rodrigo Duterte បានធ្វើសំណើយ៉ាងមុតមាំដើម្បីលាលែងពីតំណែង ប្រសិនបើនរណាម្នាក់អាចបញ្ជាក់ថា គាត់បានទទួលការសូកប៉ាន់នៅពេលកំពុងកាន់តំណែង ប៉ុន្តែបានបដិសេធសំណើរបស់គាត់វិញដោយគំរាមសម្លាប់នរណាម្នាក់ពីបទប្រឌិតរឿងរ៉ាវពាក់ព័ន្ធនឹងបញ្ហានេះ ។

ថ្លែងនៅក្នុងសុន្ទរកថាតាមទូរទស្សន៍មួយកាលពីយប់ថ្ងៃអង្គារលោក Duterte បាននិយាយថា លោកនិងសមាជិកគណៈរដ្ឋមន្រ្តីរបស់លោកនឹងចុះចេញពីតំណែង ប្រសិនបើការចោទប្រកាន់ថា ពួកគេពាក់ព័ន្ធនឹងអំពើពុករលួយត្រូវបានបង្ហាញ ។

លោក Duterte បាននិយាយថា “ប្រសិនបើមាននរណាម្នាក់អាចបញ្ជាក់បានថា ខ្ញុំបានទទួលប្រាក់ពីការិយាល័យប្រធានាធិបតីពីរដ្ឋាភិបាល មួយប៉េសូលើសពីប្រាក់ខែខ្ញុំ ខ្ញុំនឹងលាលែងពីតំណែង ប៉ុន្តែដរាបណាវាជាការពិត” ។

លោក Duterte បានទទូចផងដែរថា លោក និងគណៈរដ្ឋមន្ត្រីរបស់លោកសុទ្ធតែជាមនុស្សស្មោះត្រង់ហើយបានប្រកាន់ជំហរមិនអត់ឱនចំពោះអំពើពុករលួយ ។ ទោះយ៉ាងណាគាត់បានព្រមានប្រជាជនយ៉ាងខ្លាំងកុំឲ្យធ្វើការចោទប្រកាន់ខុសដោយនិយាយថា “កុំកុហក កុំបង្កើត ឬប្រឌិតរឿងរ៉ាវដែលមិនល្អ ។ ប្រសិនបើរឿងនោះកើតឡើង ខ្ញុំនឹងសម្លាប់អ្នក” ។

លោក Duterte បានកាត់បន្ថយយ៉ាងខ្លាំងចំពោះអំពើពុករលួយចាប់តាំងពីចូលកាន់តំណែងក្នុងឆ្នាំ ២០១៦ ។ កាលពីខែវិច្ឆិកាគាត់បានប្រកាសឈ្មោះមន្ត្រីសាធារណៈដែលគាត់និយាយថាកំពុងស្ថិតនៅក្នុងការស៊ើបអង្កេតពីបទចោទប្រកាន់អំពើពុករលួយ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ តៃវ៉ាន់ពិន័យពលករបរទេសម្នាក់ រាប់ពាន់ដុល្លារ ក្រោយចេញពីបន្ទប់ធ្វើចត្តាឡីស័ក

ចុចអាន ៖ Manny Pacquiao ឆ្ពោះទៅតំណែងប្រធានាធិបតីហ្វីលីពីន ក្រោយជាប់ឆ្នោតជាប្រធានគណបក្សកាន់អំណាច

The post លោក Duterte ហ៊ានលាលែងពីតំណែង បើមានភស្តុតាងបង្ហាញពីការសូកប៉ាន់របស់ខ្លួន តែគំរាមសម្លាប់អ្នកចោទប្រកាន់ខុស appeared first on Kampuchea Thmey Daily.

Rodrigo Duterte Archives - Kampuchea Thmey Daily

លោក​ Duterte​ គំរាម​លាត​ត្រដាង​ Pacquiao រាល់​ថ្ងៃ​​ជា​មនុស្ស​កុហក​ បើមិនបង្ហាញ​ការពិត

អ្នកនាំពាក្យរបស់លោក Duterte តេស្តវិជ្ជមានកូវីដ ១៩

លោក Duterte ឲ្យអាមេរិកបង់ប្រាក់ដើម្បីរក្សាកតិកាសញ្ញាយោធាជាមួយហ្វីលីពីន

ទីបំផុត លោក Duterte ចេញមុខលូកដៃរឿងនារីអូតែស ហ្វីលីពីន

លោក Duterte ហ៊ានលាលែងពីតំណែង បើមានភស្តុតាងបង្ហាញពីការសូកប៉ាន់របស់ខ្លួន តែគំរាមសម្លាប់អ្នកចោទប្រកាន់ខុស

លោក Duterte គំរាមលាតត្រដាង Pacquiao រាល់ថ្ងៃជាមនុស្សកុហក បើមិនបង្ហាញការពិត