ជនភៀសសឹក​ក្នុង​ខេត្តព្រះវិហារ ​ត្រឡប់​ទៅ​លំនៅឋានវិញបណ្ដើរៗ ​នៅ​សល់​ត្រឹម​៥០០គ្រួសារ​ប៉ុណ្ណោះ

ព្រះវិហារ ៖ អាជ្ញាធរ​ខេត្ត​ព្រះវិហារ​បាន​ឱ្យ​ដឹង​ថា គិតត្រឹមថ្ងៃទៅ២៨ខែតុលាឆ្នាំ២០២៥នេះ ជនភៀសសឹកនៅខេត្តព្រះវិហារ ដែលបានរត់គេចពីការឈ្លានពានប្រដាប់អាវុធរបស់យោធាថៃ បានវិលត្រឡប់ទៅលំនៅឋាន​ខ្លួន​ជា​ច្រើន​គួរ​ឱ្យ​កត់​សម្គាល់។ ការត្រលប់ទៅវិញយ៉ាងច្រើននេះ គឺ​បន្ទាប់​ពី​ប្រមុខ​រដ្ឋាភិបាល​កម្ពុជា និងរដ្ឋាភិបាលថៃ បាន​ចុះហត្ថលេខា​លើ​សេចក្តីថ្លែងការណ៍​រួម​មួយ​ស្តី​ពី​សន្តិភាព​រវាងកម្ពុជា និងថៃ នៅ​ទី​ក្រុងគូឡាឡាំពួ ប្រទេសម៉ាឡេស៊ី ដោយ​មាន​វត្តមាន​របស់ប្រធានាធិបតីអាមេរិកលោក ដូណាល់ ត្រាំ និង នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ជាសាក្សី។

លោកណុប វុធ្ធី អភិបាលរងខេត្តព្រះវិហារ បាន​ឱ្យ​ដឹង​ថា ពលរដ្ឋ​ភៀសសឹក​មួយ​ចំនួនក៏បានវិលត្រឡប់​ទៅ​កាន់​លំនៅឋាន​វិញ​ដែរ និង​បច្ចុប្បន្ននេះ គិត​ត្រឹម​ថ្ងៃទី២៨ ខែតុលា ឆ្នាំ២០២៥ មានពលរដ្ឋភៀសសឹកស្នាក់នៅមណ្ឌលសុវត្ថិភាព ដែល​រៀបចំ​ដោយ​រដ្ឋបាល​ខេត្ត​ទាំង១៥​ទីតាំង បាន​ត្រឡប់​ទៅ​លំនៅឋាន​របស់ពួកគាត់វិញយ៉ាងច្រើន ដើម្បីប្រកបរបរធ្វើស្រែចំការ រកស៊ីផ្សេងៗវិញ។ ដោយនៅសល់តែប្រមាណ៥០០គ្រួសារទៀតប៉ុណ្ណោះ ហើយពួកគាត់ក៏នឹងចាកចេញអស់នាពេលឆាប់ៗនេះផងដែរ។

ការ​ចាកចេញយ៉ាងច្រើននេះ គឺដោយសារតែប្រជាពលរដ្ឋយល់ដឹងពីប្រមុខរដ្ឋាភិបាលកម្ពុជា និងរដ្ឋាភិបាលថៃ បានចុះហត្ថលេខាលើសេចក្តីថ្លែងការណ៍រួមមួយស្តីពីសន្តិភាពរវាងកម្ពុជា និងថៃ នៅទីក្រុងគូឡាឡាំពួ ប្រទេសម៉ាឡេស៊ី។ អាជ្ញាធរខេត្តព្រះវិហារ បាន​ណែនាំក៏​ដូច​ជា​អប់​រំ​ដល់​ជនភៀសសឹក ដែលត្រឡប់ទៅលំនៅឋាន ដើម្បីប្រកបរបររកស៊ី​ក៏​ដូច​ជាធ្វើស្រែចម្ការឡើងវិញនោះ គឺ​ត្រូវប្រុងប្រយ័ត្នស្រែចម្ការ ដែលសង្ស័យ​មាន​គ្រាប់​មិន​ទាន់​ផ្ទុះ បើ​បាន​ប្រទះ​ឃើញ​ត្រូវ​រាយការណ៍​ជូន​សមត្ថកិច្ច​ពាក់ព័ន្ធ។ ជាពិសេសគឺត្រូវណែនាំដល់កូនៗ​ដែលមិនទាន់ស្គាល់​ពី​គ្រាប់​មិន​ទាន់​ផ្ទុះ​ទាំង​នោះ។

ទោះ​ជា​ពលរដ្ឋ​ភៀសសឹក​មួយ​ចំនួន​ធំ បាន​វិល​ត្រឡប់​ទៅ​លំនៅឋាន​វិញ​ក៏​ដោយ ក៏​រដ្ឋបាល​ខេត្តព្រះវិហារ បន្តយកចិត្តទុកដាក់ពិនិត្យទីតាំងមណ្ឌលសុវត្ថិភាព រក្សាសន្តិសុខ ទឹក កញ្ចប់​អាហារ គ្រឿងឧបភោគបរិភោគ ប្រព័ន្ធ​ទឹកស្អាត អគ្គិសនី បង្គន់​អនាម័យ ក្រុមគ្រូពេទ្យថែទាំងជំងឺ ជូនដល់បងប្អូនពលរដ្ឋភៀសសឹកនៅតាមមណ្ឌលសុវត្ថិភាពជាបន្ត៕

ដោយ ៖ ជុន កុសល