កម្មវិធី MU រងការអាម៉ាស់ ដោយសារម្ចាស់ផ្ទះថៃ បង្ករឿងដល់បវរកញ្ញាគ្រប់គ្នា

កម្មវិធីប្រកួតបវរកញ្ញាចក្រវាឡឆ្នាំ២០២៥ (Miss Universe) នៅប្រទេសថៃ បានស្ថិតក្នុងភាពចលាចលជាច្រើនថ្ងៃមកហើយ ខណៈដែលព្រឹត្តិការណ៍ ភាពចម្រូងចម្រាស និងព័ត៌មានមិនពិតជាបន្តបន្ទាប់បានកើតឡើង។ ជាក់ស្ដែងម្ចាស់ផ្ទះថៃបានបង្ករឿងនិងបញ្ហាដល់បវរកញ្ញាជាច្រើន រហូតឈានដល់ដកខ្លួនចេញពីការប្រកួតពាក់កណ្ដាលទីថែមទៀត។

បវរកញ្ញា៤៣នាក់មិនបានចូលរួមពិធីជប់លៀងអាហារពេលល្ងាច

យោងតាម Nawat Itsaragrisil បានថ្លែងអំពីស្ថានភាពដ៏គួរឲ្យព្រួយបារម្ភនៅកម្មវិធីប្រកួតបវរកញ្ញាចក្រវាឡឆ្នាំ២០២៥ថា ជាក់ស្ដែងទៅមានតំណាងមកពី៤៣ប្រទេសប៉ុណ្ណោះ ដែលមិនបានចូលរួមពិធីជប់លៀងអាហារពេលល្ងាចកាលពីថ្ងៃទី១១ ខែវិច្ឆិកា ខណៈដែលនៅព្រឹកដដែលនោះ ក៏បានឃើញតំណាងចំនួន១៧នាក់អវត្តមានពីសកម្មភាពមើលការប្រកួតមួយថៃ។

ទីស្នាក់ការកណ្តាល Miss Universe នៅប្រទេសម៉ិកស៊ិក បានដកឡូហ្គោចេញ ស្របពេលដែលប្រធាន Raúl Rocha មិនទាន់មកដល់ប្រទេសថៃ

និមិត្តសញ្ញា Miss Universe បានបាត់ភ្លាមៗពីអគារទីស្នាក់ការកណ្តាល Legacy Holdings ក្នុងទីក្រុងម៉ិកស៊ិក បន្ទាប់ពីត្រឹមតែ ១ យប់ប៉ុណ្ណោះ ដែលធ្វើឲ្យមនុស្សជាច្រើនភ្ញាក់ផ្អើល។ នៅលើទំព័រផ្ទាល់ខ្លួនរបស់នាង បវរកញ្ញាចក្រវាលឆ្នាំ ១៩៩១ Lupita Jones បានបង្ហោះវីដេអូឃ្លិបមួយនៅពីមុខទីស្នាក់ការកណ្តាល Legacy Holdings ដើម្បីបញ្ជាក់ពីព័ត៌មានខាងលើ។

ក្នុងពេលជាមួយគ្នានេះ ប្រធាន Miss Universe លោក Raul មិនទាន់មកដល់ប្រទេសថៃនៅឡើយទេ ទោះបីជាសកម្មភាពផ្លូវការត្រូវបានបញ្ចប់ពាក់កណ្តាលផ្លូវនៃដំណើរក៏ដោយ។ កម្មវិធីដែលបង្កឲ្យមានការសង្ស័យជាច្រើនអំពីស្ថានភាពផ្ទៃក្នុងនៃការរៀបចំការប្រកួតឆ្នាំនេះ។ ពីមុនលោក Osmel Sousa ក៏បានប្រកាសនៅលើ Instagram ថា គាត់បានលាលែងពីតំណែងជាទីប្រឹក្សារបស់ស្ថាប័ន Miss Universe។

បវរកញ្ញាទួកគីបដិសេធថាមិនបានបង់ប្រាក់សម្រាប់ការសម្ភាសន៍

Ceren Arslan – តំណាងប្រទេសទួកគី – បានក្លាយជាចំណុចកណ្តាលនៃភាពចម្រូងចម្រាសនៅពេលដែលនាងត្រូវបានចោទប្រកាន់ពីបទស្នើសុំឲ្យអ្នកសរសេរប្លុកវីដេអូហ្វីលីពីន Adam Genato បង់ប្រាក់សម្រាប់ការសម្ភាសន៍។ ស្ថាប័នបវរកញ្ញាចក្រវាលទួកគី បានចេញសេចក្តីថ្លែងការណ៍មួយយ៉ាងឆាប់រហ័សដោយបញ្ជាក់ថា សេចក្តីថ្លែងការណ៍ទាំងនេះគឺមិនពិត និងគ្មានមូលដ្ឋានទាំងស្រុង។ Ceren Arslan មិនដែលស្នើសុំ ឬទទួលយកការទូទាត់ណាមួយពីប្រព័ន្ធផ្សព្វផ្សាយ អ្នកសរសេរប្លុកវីដេអូ ឬតំណាងណាមួយឡើយ។

ស្ថាប័នដដែលនោះ បានស្នើសុំកុំឲ្យការអះអាងដែលមិនបានផ្ទៀងផ្ទាត់ត្រូវបានផ្សព្វផ្សាយបន្ថែមទៀត ព្រោះវាធ្វើឲ្យខូចកេរ្តិ៍ឈ្មោះរបស់ទាំងតំណាង និងរូបភាពរបស់ប្រទេសដោយអយុត្តិធម៌។

បវរកញ្ញាកម្ពុជាយំ បន្ទាប់ពីត្រូវបានបុគ្គលិកថៃបរិហារកេរ្តិ៍

រឿងអាស្រូវបានផ្ទុះឡើងនៅពេលដែលបវរកញ្ញាកម្ពុជា ហ្វីយ៉ាតា បានយំបន្ទាប់ពីត្រូវបានបុគ្គលិកប្រព័ន្ធផ្សព្វផ្សាយថៃពីរនាក់បរិហារកេរ្តិ៍នៅចំពោះមុខនាង។ ពួកគេបានអះអាងថា នាងមិនយល់ភាសាថៃទេ ប៉ុន្តែតាមពិតនាង បានឮមតិយោបល់អវិជ្ជមានទាំងស្រុង។

ហេតុការណ៍នេះបានរីករាលដាលយ៉ាងឆាប់រហ័សក្នុងចំណោមសហគមន៍អ្នកចូលរួមប្រកួត។ នេះជាលើកទីបីហើយដែលបេក្ខភាពកម្ពុជា បានប្រឈមមុខនឹងអាកប្បកិរិយាមិនគោរព ដែលបណ្តាលឲ្យនាងនិយាយសុំជំនួយនៅក្នុងក្រុមជជែកផ្លូវការ។

ក្រោយមក បវរកញ្ញាចក្រវាឡម៉ិកស៊ិកនិងសិង្ហបុរី បានចេញមុខការពារបវរកញ្ញាកម្ពុជា ដោយប្រកាសក្ដែងៗថា ពួកនាងស្រឡាញ់ទឹកចិត្តកម្ពុជា និងសូមជូនពរឲ្យរាជិនីសម្រស់រូបនេះនៅតែភ្លឺស្វាងជារៀងរហូត។ យ៉ាងណា រឿងរ៉ាវដ៏កក្រើកនេះកើតឡើង បន្ទាប់ពីហ្វីយ៉ាតាប្រឈមមុខនឹងភាពចម្រូងចម្រាសជុំវិញការរើសអើងដោយប្រព័ន្ធផ្សព្វផ្សាយថៃ ចំពោះការបង្ខំឲ្យនាងដោះស្បែកជើង នៅពេលចូលទៅកន្លែងមួយក្នុងប្រទេសថៃ។

មិនមែនត្រឹមប៉ុណ្ណឹងទេ ដែលកម្មវិធីប្រកួតសម្រស់ MU នៅឆ្នាំនេះរងភាពអាម៉ាស់ឥតស្រាកស្រាន្តនៅលើទឹកដីនោះ។ កាលពីប៉ុន្មានថ្ងៃមុននេះ ក្រុមហ៊ុន Miss Grand International (MGI) នាថ្ងៃទី១១ វិច្ឆិកា បានប្រកាសពីការសម្រេចចិត្តលុបចោលការវិនិយោគលើភាគហ៊ុនចំនួន ១០០លានហ៊ុនរបស់ JKN Global ដែលគេស្គាល់ថាជាក្រុមហ៊ុនកាន់កាប់ភាគហ៊ុន ៥៨% នៃស្ថាប័ន Miss Universe (MU) ក្រោមហេតុផល រងសំពាធផ្លូវចិត្តធ្ងន់ធ្ងរ និងហត់នឿយខ្លាំង។

យ៉ាងណាមិញ ហេតុការណ៍ចុងក្រោយដ៏គួរឲ្យព្រួយបារម្ភបំផុតមួយគឺការពុលអាហារ ដែលបានប៉ះពាល់ដល់បេក្ខនារីជាច្រើន ជាពិសេសបវរកញ្ញាឥណ្ឌូនេស៊ី Sanly Liu ត្រូវបានបញ្ជូនទៅមន្ទីរពេទ្យជាបន្ទាន់ បន្ទាប់ពីអាហារពេលល្ងាចដោយសារតែរោគសញ្ញាក្អួត និងឈឺពោះធ្ងន់ធ្ងរ។ ហេតុការណ៍នេះមិនត្រឹមតែបណ្តាលឲ្យនាងខកខានពិធីជប់លៀងអាហារពេលល្ងាចប៉ុណ្ណោះទេ ប៉ុន្តែថែមទាំងបណ្តាលឲ្យមានតំណាងយ៉ាងហោចណាស់ ៥-៧ នាក់ផ្សេងទៀត ដែលបង្ខំឲ្យអ្នករៀបចំកម្មវិធីពិនិត្យមើលសុវត្ថិភាព។ សូម្បីតែបវរកញ្ញាអ៊ីស្លង់ Helena O’Connor បានដកខ្លួនចេញដោយសារហេតុផលសុខភាព បន្ទាប់មកគឺបវរកញ្ញាអាល្លឺម៉ង់ Diana Fast (ដោយសារហេតុផលគ្រួសារ) បវរកញ្ញា Persia Sahar Biniaz (ដោយសារទិដ្ឋាការ) បវរកញ្ញានីហ្សេ Zoul Kadi (ដោយសារហេតុផលគ្រួសារ) និងបវរកញ្ញាប៉ាណាម៉ា Itari Mora (ដោយសាររបួស)៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

បវរកញ្ញា ម៉ិកស៊ិក និង សិង្ហបុរី ប្រកាសក្ដែងៗថា ឈរខាង កម្ពុជា ជុំវិញរឿងថៃ បង្ខំ ហ្វីយ៉ាតា