កសិករចិញ្ចឹមបង្គាថៃ ត្រៀមលើកគ្នា ទៅធ្វើបាតុកម្ម នៅ បាងកក ព្រោះទ្រាំលែងបាន

ដោយសារតែមិនអាចស៊ូទ្រាំនឹងទុក្ខលំបាករបស់ខ្លួនបាន កសិករចិញ្ចឹមបង្គា នៅភាគខាងត្បូងប្រទេសថៃ នឹងលើកគ្នាទៅធ្វើបាតុកម្មនៅទីក្រុងបាងកក ដើម្បីតវ៉ាចំពោះរដ្ឋាភិបាលដឹកនាំដោយ អានុទីន ឆាន់វីរៈគុល ឲ្យចាត់វិធានការបន្ទាន់ ដោះស្រាយបញ្ហាជូនពួកគេ។

តាមការផ្សាយរបស់ Amarin នៅថ្ងៃអង្គារ ទី២ ខែមិថុនា ឆ្នាំ២០២៦ លោក ម៉ានីត អ៊ិនថងផាន់ តំណាងកសិករចិញ្ចឹមបង្គា ក្នុងខេត្ត Trang និងជាអតីតប្រធានសហករណ៍វារីវប្បកម្មខេត្ត និយាយថា ឆ្នាំនេះ កសិករ ជួបបញ្ហាធ្ងន់ណាស់ ពោលគឺធ្ងន់ជាងឆ្នាំណាណាទាំងអស់។ បង្គានាំចេញមិនបាន ហើយបើទោះបីជាលក់ក្នុងស្រុក ដោយដាក់តម្លៃថោក ក៏គ្មានអ្នកទិញដែរ។

តាមសម្តីរបស់លោក ម៉ានីត, ការដែលម៉ាឡេស៊ី ហាមនាំចូលបង្គាថៃ ៥ប្រភេទ វាបានជះឥទ្ធិពលដ៏អាក្រក់ ដល់កសិករ នៅភាគខាងត្បូង រួមមានខេត្ត Trang, Satun និង Songkhla ព្រោះថា ទីផ្សារបង្គាចម្បងមកពីតំបន់ទាំងនេះ គឺជាប្រទេសម៉ាឡេស៊ី។ 

ដូច្នេះ នៅថ្ងៃទី៤ ខែមិថុនា បណ្តាញកសិករចិញ្ចឹមបង្គា នឹងទៅបាងកក ដើម្បីធ្វើបាតុកម្ម ហើយក៏នឹងជួបជាមួយអគ្គនាយក នៃនាយកដ្ឋានជលផលផងដែរ ដើម្បីដាក់លិខិតជូនរដ្ឋមន្ត្រីក្រសួងកសិកម្ម និងសហករណ៍ ដោយជំរុញឲ្យពួកគេ ស្វែងរកវិធានការជំនួយ ក្នុងរយៈពេលខ្លីជាបន្ទាន់។

ជុំវិញរឿងនេះ ពលរដ្ឋថៃ នៅភាគខាងត្បូង កំពុងក្តៅចិត្តខ្លាំង នឹងរដ្ឋាភិបាលទីក្រុងបាងកក ​ដែល​ហាមឃាត់​ការនាំចូលត្រីឆ្ពុង ពីប្រទេសម៉ាឡេស៊ី ធ្វើឲ្យទីក្រុងគូឡាឡាំពួ ចាត់វិធានការសងសឹកវិញ ដោយ​ហាមឃាត់ការនាំចូល បង្គាពីប្រទេសថៃ ដូចគ្នា។

ជម្លោះផ្តើមចេញពីថៃមុន ដែលហាមឃាត់ការនាំចូលត្រីឆ្ពុង ពីម៉ាឡេស៊ី ដោយអះអាងថា រកឃើញសារធាតុគីមីក្នុងត្រីនោះ ទើប ម៉ាឡេស៊ី សងសឹកវិញ ដោយហាមឃាត់ ការនាំចូលបង្គាថៃ ចំនួន ៥ប្រភេទ។

ចំណាត់ការនេះ ធ្វើឲ្យពលរដ្ឋនៅភាគខាងត្បូង ក្តៅចិត្តមិនស្ទើរឡើយ ដោយពួកគេត្អូញត្អែរអំពីទុក្ខលំបាក និងជំរុញឲ្យ អានុទីន ពិភាក្សាជាមួយម៉ាឡេស៊ី ជាបន្ទាន់ ព្រោះថា ម៉ាឡេស៊ី គឺជាទីផ្សារបង្គាដ៏សំខាន់មួយរបស់ថៃ ដោយមួយឆ្នាំៗ ការនាំចេញបង្គាថៃទៅ ម៉ាឡេស៊ី មានបរិមាណចន្លោះពី ១៥ ០០០ ទៅ ២៥ ០០០ តោន បើគិតជាទឹកប្រាក់ គឺស្មើនឹងប្រហែលពី ៦០ ទៅ ៩០ លានដុល្លារអាមេរិក៕

អត្ថបទ៖ សុខ សុវណ្ណ