ថៃ អះអាងថា មនុស្ស ៣នាក់​ ដែល​ស្លាប់​ដោយសារផ្ទុះ​ដ្រូន​អត្តឃាត​មីយ៉ាន់ម៉ា មិនមែនជាពលរដ្ឋខ្លួនទេ

ប្រទេសថៃ អះអាងថា មនុស្ស ៣នាក់ ដែលស្លាប់ក្នុងហេតុការណ៍ ផ្ទុះដ្រូនអត្តឃាតមីយ៉ាន់ម៉ា ដែលហោះវង្វេងចូលដីរបស់ខ្លួន គឺមិនមែនជាជនជាតិថៃទេ។  

ភ្នាក់ងារព័ត៌មាន AFP បានដកស្រង់សម្តីមេប៉ូលិសក្នុងតំបន់ លោក Anusorn Dungkong ដែលនិយាយ កាលពីថ្ងៃពុធ ទី៣ ខែមិថុនា ឆ្នាំ២០២៦ អ្នកស្លាប់ទាំង៣ តាមពិតជាពលករចំណាកស្រុក ជនជាតិមីយ៉ាន់ម៉ា ទេ ចំណែកអ្នករបួស ២នាក់ទៀត ក៏ជាជនជាតិមីយ៉ាន់ម៉ា ដែរ។

យ៉ាងណាក្តី ជុំវិញរឿងនេះ ភាគីមីយ៉ាន់ម៉ា មិនទាន់ចេញមុខ បកស្រាយអ្វីទេ។

សូមជម្រាបជាថ្មី កាលពីថ្ងៃអង្គារ ដ្រូនអត្តឃាតមួយគ្រឿង ដែលហោះពីមីយ៉ាន់ម៉ា ចូលទឹកដីរបស់ថៃ បានផ្ទុះ បណ្តាលឲ្យមនុស្ស ៣នាក់ស្លាប់ និង ២នាក់ទៀត រងរបួសធ្ងន់។

ហេតុការណ៍នេះ កើតឡើងនៅរសៀលថ្ងៃអង្គារ ទី២ ខែមិថុនា ឆ្នាំ២០២៦ ក្នុងស្រុក Phop Phra ខេត្ត Tak ជាប់ព្រំដែនមីយ៉ាន់ម៉ា ដែលកំពុងមានការប្រយុទ្ធគ្នា យ៉ាងស្វិតស្វាញ រវាងកងកម្លាំងប្រឆាំង និងទាហានរបស់រដ្ឋាភិបាល។

យោងតាមរបាយការណ៍ ដ្រូនមួយគ្រឿងនេះ បានហោះពីខាងមីយ៉ាន់ម៉ា ហើយក៏ធ្លាក់ក្បែរដើមឈើមួយដើម ក្នុងចម្ការម្ទេសនៃភូមិ Moo 1 ប៉ុន្តែវាមិនបានផ្ទុះភ្លាមៗទេ។

នៅពេលឃើញដ្រូននេះ គ្រួសារមួយបាននាំគ្នាទៅមើល រួចយកដៃប៉ះ ក៏ធ្វើឲ្យដ្រូនផ្ទុះ ស្លាប់មនុស្ស ៣នាក់នៅនឹងកន្លែង រួមមានឪពុកម្តាយ និងកូនប្រុស ខណៈមនុស្ស ២នាក់ទៀតរងរបួសធ្ងន់៕

អត្ថបទ៖ សុខ សុវណ្ណ